Post: #1
Title: معقول الدولار يزيد بالساعة
Author: عبدالحفيظ ابوسن
Date: 11-16-2017, 05:03 PM
04:03 PM November, 16 2017 سودانيز اون لاين
عبدالحفيظ ابوسن-no where
مكتبتى
رابط مختصر في صورة لافة لسعر الدولار بالساعة
بي اختصار تسعة صباحا كان 26.2
تلاتة ضهر 28.2 ج
ستة ساعات زاد اتنين ج
الخبر فاجع جدا ولا يصدق
سألت كم زول من الخرطوم
قالوا صحيح
وناس شارع الحرية موقفين البيع
موقفنو لامن يحددو الاسعار
دى كارثة
وانهيار اقتصادي
واقع مظلم
ومستقبل اكثر إظلاما
|
Post: #2
Title: Re: معقول الدولار يزيد بالساعة
Author: عبدالحفيظ ابوسن
Date: 11-16-2017, 05:29 PM
Parent: #1
يعني الجنية فقد 7.6% من قيمتو امام الدولار في ظرف ستة ساعات
دة بوضح انو اصلا مافي دولار
ودي اسعار غير حقيقية
غير حقيقية تماما
|
Post: #3
Title: Re: معقول الدولار يزيد بالساعة
Author: محمد الأمين موسى
Date: 11-16-2017, 06:11 PM
Parent: #2
أخي ودأبسن تستطيع الأنظمة أن تقمع المظاهرات وتفشل دعوات الاعتصام المدني، ولكنها لا تستطيع أن تقمع الاقتصاد أو تكذب عليه. الاقتصاد قائم على الحساب... وحساب الاقتصاد مثل حساب يوم القيامة: من يعمل مثقال ذرة خيرا يره.
مشروع الجزيرة لا يعمل - المصانع لا تعمل - السياحة لا تعمل - المغتربون يعيشون على الكفاف أو أصبح وضعهم طاردا - الإنجازات أقرب إلى الهدر منه إلى الإثمار - الضرائب أكثر من الأرباح...
تذكر يا أخي عبدالحفيظ أن الدولار الآن يساوي 26 ألف جنيه وليس 26 جنيه، ثم تأمل في مدى التدهور الذي أصاب الاقتصاد السوداني.
نسأل الله السلامة.
|
Post: #4
Title: Re: معقول الدولار يزيد بالساعة
Author: Dr. Ahmed Amin
Date: 11-16-2017, 06:23 PM
Parent: #3
يعني الناس ما تنوم تاني ..
شكله بكره الى ال 30 ج من الصباح
انا لله وانا اليه راجعون
ود الباوقة وين يا ناس . 
سلام عبدالحفيظ
|
Post: #5
Title: Re: معقول الدولار يزيد بالساعة
Author: محمد عبد العظيم فرح
Date: 11-16-2017, 06:37 PM
Parent: #4
قفل الدولار على 30 الف
سلام عبدالحفيظ
|
Post: #6
Title: Re: معقول الدولار يزيد بالساعة
Author: محمد جبره
Date: 11-16-2017, 06:52 PM
Parent: #5
البزيد بالساعة دا دولار ولا ضل؟
واضح انه في تسابق لتحويل الكاش السوداني لدولار ...
|
Post: #7
Title: Re: معقول الدولار يزيد بالساعة
Author: Dr. Ahmed Amin
Date: 11-16-2017, 07:26 PM
Parent: #6
محمد جبرة ... 
رد أوسكااار ...
| Quote: البزيد بالساعة دا دولار ولا ضل؟ |
انت رباطابي ؟ هاهاهاهاهاهاهاهاها
|
Post: #8
Title: Re: معقول الدولار يزيد بالساعة
Author: امتثال عبدالله
Date: 11-16-2017, 08:26 PM
Parent: #7
اذا كده يا عبد الحفيظ ابو سن نحن ما غنينا،،،،
وقالوا مصائب قوم عند قوم اخرين فوائد،،،،،هههههه...
ناس الداخل في السودان يعانوا اشد المعاناة من ارتفاع الدولار،،لان ارتفاع الدولار يعني
ارتفاع جميع السلع، وحتى المويه،،،،مويه البحر،،،
وناس الخارج ، المغتربين والمهاجرين، يفرحوا لان دولاراتهم البسيطة بتجيب ليهم ملايين سودانية،،،
والله يا ود ابو سن نحن بالجد ما فرحانين،،،،
مع وافر الاحترام والتقدير
|
Post: #9
Title: Re: معقول الدولار يزيد بالساعة
Author: محمد حيدر المشرف
Date: 11-16-2017, 11:23 PM
Parent: #1
أثني الكلام بتاع انو الددولار يساوي 26 الف جنيه وليس 26 جنيه .. واعتقد انو ده تمييز مهم جدا وجتى لا نقع جميعا في براثن خدعة ساذجة جدا ووعي مزيف بالاشياء ..
فيما يتعلق بالمقارنة بين سودانيي الخارج والداخل .. ده برضو وعي زايف بالاشياء ... المغتربون الذي يظن بان دولارو قد ارتفع عليه ان يتذكر حقيقة ان الدولار يساوي دولار .. اذا كان بمائة الف جنيه سوداني فهو دولار .. ولو عاد 12 جنية (المحطة التي تم انقاذنا فيها وبصورة مستمرة منذ 28 سنه) .. لو عاد لتلك المحطة فهو يساوي ايضا دولار) ..
البلد منتهية .. ليس اليوم .. البلد منتهية منذ زمن بعيد .. منذ حاجات كتيرة حصلت للانسان السوداني .. وحقيقة لم يعد هناك تعريف لهذا المسمى (انسان سوداني) .. الفوضى عارمة والحدود مفتوحة للداخل والخارج .. تغييرات كبيرة على مستوى الديمغرافيا هي المسؤولة عن هذا الواقع الذي تكون (الانقاذ) وفشلها الذريع واحدة من مظاهرو ليس الا ... لو تغيرت اليوم بفعل صدفة تاريخية او قدر فلن يتغير شيء .. فشل متراكب ومتراكم لن ينتهي مطافه الا بحروبات اهلية طاحنة وانقسامات وانفلاتات وكوارث انسانية متواصلة.
|
Post: #10
Title: Re: معقول الدولار يزيد بالساعة
Author: عبدالحفيظ ابوسن
Date: 11-17-2017, 06:08 AM
Parent: #9
كتر خيركم والله
اريتو كان ضل جبرة نضمن برجع تاني
الامر معقد مشرف وامتثال وصحيح كلامكم
السلعة بتزيد بوتيرة اكبر من وتيرة زيادة الدولار
يعني الالف دولار البترسلهم لاهلك بالسوداني قروشها اكتر لكن ما بتجيب نفس حاجات الالف الفاتت اقل
مؤجر بيتك لحسابات صرفك ايجار بيتك ما بغطي
ما ممكن نفس المية ألف الكانت امس بتجيب ليك خضارك واكلك الليلة ما تجيبها فرق ساعات
المعلمين في كوستي صرفو ماهيتهم اول امس نص الشهر
من أعراض الإدمان على المخدرات:
1- الكآبة
2- العزلة
3- عدم الإهتمام
4- الحاجة الملحة للمال
....
طيب هسع كيف نميز بين المدمن والمواطن ؟!!
😳😳😳😩😩
|
Post: #11
Title: Re: معقول الدولار يزيد بالساعة
Author: عبدالحفيظ ابوسن
Date: 11-18-2017, 08:27 AM
Parent: #10
ضربت لي واحد شغال دولار
قال لي السعر 28 ج
في بيع وشراء
قال لي مافي سعر بس في خشوم الناس
الكارثة انو التجار الما شغالين دولار اعتمدوهو وعدلو اسعارهم علي اساس انو 28
زيادات لو الدولار بقا بي 30ج برضو كتيرة
|
|