من اشد انواع المعاناة فى خرطوم اليوم، وهى انواع كتيرة ومتفاوته، المعاناة يعنى هى معاناة الاكل، على الرغم من الوفرة و الكترة الشديدة فى محلات الاكل والشراب من كافتيريات ومطاعم وفنادق واكشاك وحتى المفروشة على الطريق مباشرة ومن جنسيات مختلفة كمان، شى تركى وشى شامى وشى مصرى الخ
المعاناة المقصودة بتقابل الزول بمجرد ما يحس برغبة فى اكل وجبة او تحتم عليه ظروف وجوده فى السوق مثلا او فى اى مكان تانى لاى غرض او عمل
ومباشرة بتلقى نفسك بين خيارين احلاهما مر و صعب
يا تدخل واحد من المطاعم البتدعى انها فاخرة وفخمة وتدفع دم قلبك فى وجبة بلا طعم ولا نكهة ولا رائحة اللهم الا بهرجة المكان والديكور وما بتغنى ولا تسمن من جوع ومؤكد تماما انها ممكن تخرب عليك ميزانية شهرك كله
واكيد الخيار ده ما متاح لغالبية الناس وممكن لفئة معينة و قليلة
او الخيار التانى وهو الأسوأ والاخطر فى نفس الوقت
تدخل واحد من محلات الاكل من النوع العادى غير الفخم سواء اسمه مطعم او كافتيريا او اى كان
وتضطر تاكل حاجات ما عندها اى صلة ولا علاقة بالاكل، وبرضو تدفع الشى الفلانى
ومصدر السوء والخطورة المقصود هو تحديدا فى انعدام كل مظاهر الصحة قى الاكل بداية بالافراد البعملو الاكل ومرورا ببيئة العمل نفسها وصولا للاوانى المخصصة للاكل ولو صادف وشفت بعينك مكان وطريقة غسيل الاوانى دى، احتمال تحصل ليك ازمة نفسية او صحية مباشرة والله
وياما شفنا وسمعنا و قرينا عن مطاعم تبيع لحوم فاسدة وحتى كمان لحوم حيوانات تانيه غير المعروفة فى الاكل
وابلغ دليل على انعدام البيئة الصحية هو انتشار وكترة امراض زى التيفوئد والتهابات الكبد و المعدة
المهم البيع ولم القروش بغض النظر عن كيف و ليه
يا حليلك يا خرطوم
وندخل فى سياحة بسيطة فى مطاعم و كافتيريات الخرطوم لغاية عهد قريب
ما حنجيب سيرة الفنادق الكبيرة او حتى ما كان يعرف ب اللوكاندات والمطاعم الفيها، لانها من باب اولى كانت فى قمة الرقى والنظافة
نتكلم بس عن المطاعم العادية او ممكن نقول الشعبية والمتاحة لكل الناس
و الكلام ده يمكن لغاية بداية التمانينات
فى المقدمة عندنا
مطعم الإخلاص
وما ادراك ما مطعم الاخلاص
موقعه فى الشارع الممتد من الطرف الغربى لميدان الامم المتحدة و المتجه غربا على شارع الحرية ويبدا من شركة ابو العلا وبنك باركليز وبكون على يدك اليمين وانت متجه غربا
مطعم الإخلاص، ومعاه حلوانى الإخلاص برضو فى جنوب غرب السوق العربى، ملك لاخوان من نوبة حلفا المبدعين فى كل شى
و بكفى بس عشان نعرف قيمة ومعنى المطعم انه كان المكان المفضل لكتير من موظفى الوزارات والادارات الحكومية والبنوك، ايام الدنيا سمحة ورخية ومعظمهم كانو بدفعو بالشهر وكل زول عنده صفحة فى دفتر المطعم واشهى الاكل و أطعم الاصناف كانت بتتم على يد الشيف المبدع عبد الوهاب
وبعد الاخلاص حنجى بالتفصيل ل
مطعم الجمهورية مطعم الانطلاقة مطعم الشمالية مطعم سلوى مطعم الهلال
عبارة عن دكان مساحته صغيرة نسبيا وما كبير وبالرغم من كده كان محتشد باشهى انواع سندوتشات الفول والطعمية بنكهة مصرية وعلى يدك اليمين وانت داخل بتلقى الجزء المخصص للفطائر بما فيه الفرن
ومباشرة يلفت نظرك تنظيم المكان و دقة توزيع اماكن الخدمة والنظافة التلقائية واللافتة
يا سلام عليك رجعتنا للزمن الجميل زمن جوز الحمام تلاتة ورطل السمن البملأ القزازة جنبو طوالي في الكورنر كان في منصفون بتاع الاشرطة الغنائية ... بعد تضرب الفطاير تغاشهم وتشترى ليك شريط شريطين من احدث التسجيلات .. بالمرة كمان تمر على مكتبة الجامع الكبير والكتب المفروشة حول سور الجامع الكبير
مني برقر دي اخوي ابو ذر علي ما اذكر كان مطعم نضيف جدا يقع بالقرب من مطبعة التمدن بالخرطوم صاحبته اثويبية تدير المطعم بنفسها فهي متخصصة في عمل البرقر الكلاام ده كان في اواخر الثمانينات وبداية التسعينات
طالما اواخر التمانينات واول التسعينات معناه فعلا ما بكون شفتها عشان دة بالضبط الفترة الانا طلعت فيها من السودان
ولو كان قبل الفترة دى قطع شك كنت شفتها لاننا بنمش مطبعة التمدن دى على وجه الخصوص وصاحبها كان حاج ابوزيد جارنا فى الخرطوم 3 قدام القسم الجنويى مباشرة فى المثلث الواقع بين شارعين
للأسف البلديات ما شايفة شغلها لكني أشك في مقدرة هذه البلديات المهنية التي تؤهلها للقيام بما يجب اقلها مفروض قيام مؤسسات للتدريب هذه العمالة وعمل رخص زي رخص السواقة لا يسمح لأحد بممارسة العمل في المطعم كالمطابخ أو عامل شاورمة أو ما شابه دون الحصول عليها
المشكله ان كل الحرف المرتبطه بحياة الانسان اليوميه تمارس دون رقابه (حقيقيه) ويفترض ان لاتمارس دون ترخيص قائم على شهاده خبره او تدريب الطبخ - السباكه - الكهربه .....الخ اما عن المطاعم فى عده جوانب الطباخ والجرسون وحتى بتاع الماركات (الكاشيير). تجى داخل الطعم تلقى الجرسون يافاتح التلفون ومشغول بالتكنولوجيا او بهظر مع مع زميله (حاليا الجرسونات علبهم حبش) والترابيز لم يتم تنظيفها بعد قيام الزبائن الا بعد ان تجى وتطلب تنظيف التربيزه الداير تقعد فيها تنتهى من الاكل تفتش على المغسله يابرا افى الشارع او جوه لو دخل بطنك تقلب من طبيعه المكان. والكلام دا فى مطاعم فى مركز الخرطوم او بحرى او امدرمان مش فى الاحياء الطرفيه
Post: #9 Title: Re: مطاعم الخرطوم Author: قسم الفضيل مضوي محمد Date: 10-25-2017, 03:52 PM Parent: #8
. .. ... في معهد المواصلات السلكية واللاسلكية (الخرطوم 2) كان في واحد في التمانينات عنده فول ممكن تشبيهه بالغول والعنقاء والخل الوفي ... فول في غاية الروعة ... فطاير على الطائر صحيح كانت في فندق اراك وتفتح غربا ... مستحيل تجي بهناك وما تمر عليهم للتمتع بفطيرة ولا في الخيال ... ليه الناس قفلوا يا رب ؟؟؟ ولا فاتحين في محل جديد ونحن ما عارفنه !!! في الاوقاف الفيها صيدلية سعد الدين في حلويات اولاد الزبير يا ابا ذر ... محل برضو في غاية الرقي والنظافة ... اكلت قبل كم شهر في شارع عبيد ختم ساندوتش سمك وقلت دي اضمن حاجة والله راقد يومين من التسمم ... شكرا يا ابا ذر وواصل بالله ... ... .. .
نسينا فعلا مطعم على السيد الفوال قريب من فندق السواحلى
كان المطعم المفضل للناس الشغالين فى زنك الخضار واللحوم والفواكه وسواقين التاكسى خصوصا تكاسى الطرحة من الخرطوم ل امدرمان وموقفها كان لصق جدار ميدان الامم المتحدة الغربى
طبعا كانت المقولة الشائعة بتقول
لو عايز تعرف مكان الاكل التمام شوف بس سواقين التاكسى بياكلو وين
ومجرد ما تشوف عربات التاكسى واقفه كتيره قدام محل طوالى تعرف انه ده مطعم كويس
اجمل واروع ليمون شربته فى حياتى وربما يكون فى ناس معانا هنا شربو واستمتعو بيهو
كان فى قهوة اسمها قهوة الواثق وعمنا الواثق هو والد الفنان الجيلانى الواثق
القهوة كانت فى قلب السوق العربى شمال شرق مدرسة الشيخ مصطفى الامين فى الشارع المتجه شمالا ناحية الجامع الكبير
الليمون ما كان تبع القهوة، لكين كان عبارة عن حلتين المنيوم من الحجم الكبير وفى البرنده بتاعة القهوة مباشرة كل حلة ملاصقة للتانية وقاعده فى بنك او تربيزه عالية
والله العظيم من الصباح بدرى جدا لغاية قريب العصر الناس بكونو صفوف عشان يشربو الليمون ده ومعظم الناس ديل بشيلو سفرى سواء للمحلات التجارية فى السوق او للترزية الكانو موجودين بكثرة لافتة فى البرندات قدم المحلات التجارية وناس بشيلو لبيوتهم كمان
والله يا حامد انا شخصيا من عشاق المشروبات وخاصة العصائر الطبيعية وفى اى بلد مشيت ليه اول شى بفتش محلات العصير و الايسكريم ويمكن شربت وجربت العصائر والمشروبات فى 13 مدينة فى العالم
واقسم بالله صادق ما لقيت اجمل واحلى واطعم من ليمون قهوة الواثق
ويا ريت لو شفت نظافة الناس الكانو بعملوه والمكان والاوانى والكبابى
والرقابة والدقة والصرامة ما حتلقاها الا لما الشى يتعلق برسوم او جبايات تتشال من الناس بدون مقابل
ياخى نحن ملزمين وغصبا عننا ندفع رسوم للنفايات سواء فى البيوت او المحلات التجارية والله العظيم انا شخصيا بقيت اخجل واستحى اخت النفايات والاوساخ قدم البيت فى انتظار يجو يشيلوها زى ما قالو لينا لانها قعدت واتراكمت فى مره من المرات لمدة 3 شهور، 3 شهور مش تلاتة ايام او تلاتة اسابيع
الاخ ابوذر وضيوفه الكرام بجد دا شيء مؤسف هذا الوضع علي حسب وصفك وطبعا كل المشاكل لو راجعتها تجد وراها الفساد وسوء الاداره وغياب وتغييب الكودار براي هذا مشروع لكل شخص يمتلك بعض المال يمكنه الان في الاكل ( المطاعم النظيفه) وصدقوني لو بس خمسه مطاعم فتحت وطبقت ال Hygiene Standard واسعار مدروسه بعدها يا الجماعه ديل قفلو محلاتهم او اتعبوا النهج البجيب الزبون واصلا النظافه والنظام مادايره دعايه الناس يتكلمو بيها في كل مكان
Post: #20 Title: Re: مطاعم الخرطوم Author: قسم الفضيل مضوي محمد Date: 10-25-2017, 10:15 PM Parent: #19
بمناسبة جيلاني الواثق دي يا ابا ذر ... في اواخر التسعينات جيلاني كان عنده مزرعة في حلتنا جنوب الخرطوم (احتمال ما زال) ... وكان في دكان ببيع لبن وكان في ازمة في اللبن واللبن يا دوب مكفي الزبائن ... فجاء جيلاني ومعاه مرافق مارين بالدكان وشافوا اللمة بتاعة الزبائن فقاموا وقفوا العربية ونزل المرافق وقال ليه عليك الله ادينا 3 ارطال لبن ... صاحب الدكان قال ليه ما في طريقة ... فقام قال ليه عليك الله ادينا لبن عشان خاطر جيلاني الواثق وهو راكب معاي برة .. فقام صاحب الدكان قال ليه انا جيلاني دا لما يجيبوا في الرادي .. بقفل الرادي ... جيلاني كان سامع الكلام وجاء يضحك وقال ليه ليه ياخ حرام عليك ... وبسبب الموقف داك توطدت علاقته بصاحب الدكان وبقوا اصدقاء ... وبقى زبون معتمد للبن ... التحية للفنان الاستاذ جيلاني الواثق ... ... .. .
Post: #21 Title: Re: مطاعم الخرطوم Author: احمد عمر محمد Date: 10-26-2017, 07:35 AM Parent: #20
موضوع شيق اخ ابو ذر مع نحن عايشنا الخرطوم في عهدها المتأخر ولم نستمتع بكل ما ذكرت، لكني كنت احيانا حين اعرج على وسط الخرطوم كنت اذهب لتناول وجبة الافطار من مطعم الان لايحضرني اسمه، لكنه في شارع الجمهورية ومواجه محلات المسرة واعتقد المطعم في نفس المبنى اللي فيه فندق اولمبيا بارك ومواجه للعمارة الموجود بها المطعم فندق صحارى. المهم كل مافي الموضوع المطعم ممتاز للغاية و يبدو انه من علامات الزمن القديم وكنت اتناول فيه ساندوتش لسان الخروف دائماً. كان هذا قبل ستة او سبعة اعوام وامتد ترددي عليه فترة طويلة من اوائل العام 2003 حتى 2011 اخر عهدي بالمدينة. تحياتي لك ولزوارك الكرام احمد عمر
اجمل وارقى مطعم فى المنطقة دى هو مطعم الغار وكان فى الدور السفلى لعمارة فندق اكسلسيور القريب من فندق صحارى بس ما كان قصاد المسرة فى عمارة الشيخ مصطفى الامين، غرب منها شويه
لو انت شفت محلات الاكل والشراب فى الاسةاق الشعبية حتحزن لحال الناس هناك، والناس مغلوبة على امرها ومحاصرة بضيق الحال واليد وما فى اليد حيلة
ما الناس كمان لازم تاكل وتشرب عشان تعيش وغالبية الناس المساكين فى المناطق دى عذابة زى ما بقولو والةاحد بيقضى اليوم كله فى مكان عمله و رزقه الضنين، لا بيت ولا اسرة ترعاه وتهتم باكله وشربه
موقعه كان فى الدور الاول فى عمارة جنوب موقف بصات الديوم الغربية والشرقية القديم والكان غرب محلات المدرسة الاهلية
من افضل المطاعم فى المنطقة لتناول وجبة الغدا
كان بتتوقر فيه كل انواع اطباق الخضروات وبطريقة طبخ مميزة وغريبة وتفنن فى اطباق اللحوم والسلطات
ومتخصص فى تقديم الخشاف بطريقة مذهلة والله
والاهم هو النظافة والنظام والجدية
يا ليتنا عدنا او عادت الايام
Post: #29 Title: Re: مطاعم الخرطوم Author: عباس محمود Date: 10-26-2017, 11:57 AM Parent: #26
سلامات يا أبوذر بوست خفيف ولطيف وفيهومن الزكريات مافيهو هل جات سيرة كافتيريا أتيني في البوست ده ؟ يبدو يا ابوذر نحن من نفس الجيل وده من واقع السرد اللطيف بتاعك في منتصف الثمانينات وحتي بداية التسعينات كان في كافتيريا في بحري - غرب البوستة مباشرة محترمة ونضيفة وبتقدم سندوتشات محترمة وعلي ما أزكر الشيف بتاعم كان من أصول غير سودانية - ربما أرمني - ويمكن كان أسمه طناش .... ماعارف ده أسم ولا لقب عدت قبل 5 ايام من الخرطوم ..... هذا العام قررت الا اتناول اي طعام من المطاعم ماعدا الفول وده ذاتو الا اذا أضطريت. لأنه بأمانة مستوي الأهتمام بالهايجين متدني جدا جدا . آخر مطعم كان بيقدم ساندوتشات معقولة في شارع الجمهورية أعتقد كان أسمه كوكي بيرغر - تقريبا -..حسع ماعارفه شغال ولا لا. لك الشكر يا أبو ذر
نحن اولاد صغار والحاجات دى انا سمعتها من بابا هههههههه
ازيك يا عباس غالبا بنكون فعلا فى نفس العمر ويمكن نحن نكون اخر جيل تقريبا حضر وشاف وعايش اخريات عهود و ازمان البلد الجميلة فى كل شى
كافتيريا اتينى نسيتها فعلا والله وما كان ينبغى طبعا
اتينيه، وده اعتقد الاسم الصحيح، والمقصود طبعا التسمية على مدينة اثينا عاصمة الاغريق واصحابها المؤسيين كانو من القريك قبل ما تؤول الملكية لجماعة من اهلنا من ناس العيلفون لو ما تخونى الذاكرة
اتينيه كانت اكتر من مجرد مكان الاكل والشراب كانت ملتقى و موئل للمفكرين والكتاب والصحفيين والفنانين
وكانت اشبه بمقهى ريش القاهرى الشهير
هى و جارتها كوبا كوبانا
كوبا كويانا عبارة عن بار للمشروبات الروحية طبعا مع تقديم وجبة العشاء المتكامل والسمح من كل انواع المشويات ونشاط المكان يكون فقط بالمساء والليل وما بقدم اى خدمة بالنهار
وهو ملك لجماعة من اهلنا الأقباط الجميلين، وعلى راسهم صديقنا جميل
برضو كان فى الدور الاول فى مبنى عتيق من مبانى الخرطوم وموقعه شمال موقف بصات الديوم، يعنى فى الاتجاه المعاكس لمطعم الانطلاقة
وتحت منه فى الدور الارضى صف محلات ودكاكين القطن والمراتب والمخدات قبل غزو الاسفنج
اخر وجبة انا اكلتها هناك كانت ب 10 قروش ريال واحد بس، ريالنا الفضى الزاهى داك
ما ريال مدريد
ولا ريال السعودية
هههههه
Post: #32 Title: Re: مطاعم الخرطوم Author: محمد عبد الله الحسين Date: 10-26-2017, 12:39 PM Parent: #31
الأخ أبو ذر شنو ياخ؟ ما جوعتنا. على وزن( ما عذبتنا ..)هههههه بوست مهم مفروض يتفتح من بدري.زلأنه بيلقي الضوء على العاصة التي كانت...و على سوء الخدمات الآن.. زمااان كان في مطعم في السوق العربي اسمه مطعم سلوى في الشارع التاني من شارع الجامع الكبير... بتذكر بيعمل فول بالسمن و فول بالصلصة على ما أذكر..زاكان ما اخاف الكضب... تضرب الفول بالسمنة ده و تشرب موية بااااردة من حلة كبيرة فيها موية مثلجة ....لامن تنسطل...أعتقد كان ب 7 أو 8 قروش... تاني في بحري كان في مجموعة من المطاعم الجيدة آخر ما أند\ثر منها مطعم الخيام كان بيقدم تشكيلة من الوجبات في الفطور و الغداء و العشاء... و كذلك كان في مطعم اسمه مطعم منى.. للأسف الناس بتمشي لي قدام و نحن بنرجع لي وراء.
كافتريا تقدم البرقر فقط تقع في مبني فندق أراك من الناحيه الشرقيه كانت بتفتح علي مدرسة الخرطوم القديمه عليها رحمة الله الكافتريا فرنسيه من وإلي وكان صاحبا مآخد توكيل من شركة مكسيم للحوم (( شفت العظمه ده كيف ؟؟؟ ))
البرقر كان بيجي جاهز من فرنسا ولحم حلال مكتوب عليه كده
والله يا أباذر وقتها في النصف الأول من الثمانينيات كنا طلبه في معهد الكليات التكنولوجيه بنجي نآخد الغداء من مكسيم والله ووالله لا تقول لي كنتاكي ولا ماكدونالدز ولا اي إسم من أسماء اليومين ديل لم أتذوق طعامة ولم اري نظافة هذا الممكان لا في داخل السودان ولا خارجه
زمن زمن
تخريمه :- ًطبعا الأرشفه شالت موضوع غزل أمحمد زين ورفاقه
لكن بجيك ببوست متكامل عن أمحمد زين ومن شخص عاصره وعايشه كمان
نسينا فول أبو العباس شرق كمبونى فى الخرطوم شرق وانت ماش على جهة القيادة العامة
Post: #43 Title: Re: مطاعم الخرطوم Author: Mohammed Alhasan Mohammed Date: 10-28-2017, 07:23 AM Parent: #40
تحياتى لصاحب البوست وضيوفه الكرام ...
اذا سمحت لى ان اضيف درة اخرى الى هذا العقد الفريد....
كافتيريا مرسى ميامى ...المحطة الوسطى امدرمان .. سندويشات راقية والكافتيريا نفسها ....كانت علامة فارقة فى النظافة والجمال..وتتميز بصالة علوية راقية جدا ومطلة على المحطة الوسطى ...
ايواااااا انت كنت بتمش مرسى ميامى بالليل ولا بالنهار ؟
هههههههه
بالنسبة لوجبة العشاء على وجه التحديد وغير المطاعم المعروفة كانت فى اماكن مميزة بالجد فى كل العاصمة المثلثة
فى امدرمان ممكن وبكل سهولة و يسر تتناول اجود انواع المشويات فى حديقة الريفيرا وفى الجندول
وفى الخرطوم تمشى تسهر وتستمتع بالهدوء والاكل النضيف وشهى فى حديقة الرويال فى الخرطوم شرق او تمشى الليدو فى نمرة 2
وفى بحرى بالليل اجمل مكان للعشاء والسهر هو حديقة النيل الازرق فى مدخل كبرى النيل الازرق على يمينك مباشرة وانت متجه على الخرطوم
كل الاماكن دى بتوفر وجبة عشاء على اجمل ما يكون وباسعار متهاوده ومناسبة فى متناول الجميع
الا ليت الزمان يعود يوما لاخبره بالحصل
هههههه
Post: #45 Title: Re: مطاعم الخرطوم Author: حسن حماد محمد Date: 10-28-2017, 09:02 PM Parent: #1
الأخ ابوذر والضيوف الكرام السلام عليكم
موضوع على درجة من الأهمية
ادارة محلات بيع الأكل والمشروبات من المفترض أن تكون من ضمن اختصاصات وزارة الصحة
ويجب أن يكون هناك قسم كامل بادارته وموظفيه
ينقسم الى اقسام داخلية منها ماهو معنى بمنح التراخيص بعد فحص المكان وصلاحيته لاعداد وتقديم الطعام
ومن ثم حصول عمال الطبخ على دروس والحصول على شهادة بعد اجتياز امتحان
على أن يدرس الطباخ كل خطوات اعداد الطعام
بداية بشراء اللحوم بأنواعها المختلفة من جهة معلومة ومرخصة مع تفتيش اللحوم للتاكد من صلاحيتها وتاريخ الانتهاء
ثم تأتى خطوة حفظها تحت درجة حرارة معينة قبل طبخها لمنع توالد وتكاثر البكتريا والفيروسات
وبعد الطبخ هناك طريقة يجب اتباعها فى عرض الطعم وحفظه أيضا فى درجة حرارة معينة لنغس السبب السابق
ومن المعلوم أيضا أن عمال المطبخ ربما يتسببون فى نقل الامراض عبر تعاملهم مع الطعام
مثلا قبل البدء فى اعداد الطعام عليهم غسل الايادى بالماء والصابون بكيفية معينة وأيضا غسل الايادى بالماء والصابون بعد استخدام المرحاض جيدا لمنع انتقال عدوى بعض الامراض
حتى الاظافر والشعر تحتم عليهم استحدام جوارب البلاستيك وقبعات لتقطية شعر الراس وضورة الالنزام بمستوى معين من النظافة الشخصية وعد لمس الطعام بعد طبخه بالاصابع مباشرة
ياخى عندنا لما تطلب ساندوتش العامل يشيل اللحمة او السمك أو الطعمية ويشكها ليك شك بصوابعو ويسلمك ليها وما معروق صوابعو دى لمست شنو وهذه من أكبر المخالفات
والمعروف أن اللحوم وخاصة بعض انواع الاسماك والبيض خاصة المسلوق توفر فرصة جيدة لنمو انواع معينة من الباكتريا والفيروسات اذا لم تحفظ تحت درجة حرارة معينة
وايضا نظافة المحل وخلوه من الذباب والفئران والحشرات وحتى الحيوانات مثل القطط لأنها تساعد فى نقل امراض معينة
عموما ثقافة التعامل من المأكولات عندنا كسودانيين فيها الكثير من الاشكالات.
تعلم تماما اخى ابوذر تفشى الاسهلالات والنزلات المعوية والسبب الرئيسى فيها هو عدم طهى وحفظ الطعام فى درجة حرارة معينة
بعد طهى الطعام هناك خيارين لحفظها بعد مضى اقل من ساعتين .
اما فى درحة برودة اقل من 41 فهرنهايت أو اعلى من 141 حتى تمنع نمو وتكاثر البكتريا.
وفى معظم بيوتنا يعد طهى الملاح يترك خارج درجات الحرارة المذكوره اعلاه لساعات قبل تقديمه فيكون سبب فى الأمراض وأحيانا التسمم.
بوست موفق جدا وان كان الاخوة المتداخلين دلفوا الى جانب معين وهو الحنين للماضى وذكر اسماء ومواقع المطاعم العريقة فى العاصمة
ولكن موضوع البوست هو السلامة وضمان تناول وجبة صحية باسعار مناسبة.
اما الحديث عن اماكن بيع اللحوم والشواء السريع فى ضواحى العاصمة حدث ولا حرج
يتكاثر الذباب بصورة مقذذة جدا ولا يراعى فيه أبسط قواعد السلامة وخاصة ام فتفت والكبدة.
تحياتى ولنا عودة ان شاء الله
Post: #46 Title: Re: مطاعم الخرطوم Author: Ashraf El Bagir Date: 10-29-2017, 05:18 AM Parent: #45
سلام صاحب البوست
ياخ حرام عليك تنسي اهم حاجة واطعم والذ اكل في مطاعم الخرطوم زمان
سلام صاحب البوست.. وموضوعك جميل وشيق وفيهو ذكريات تاريخية بالنسبة لمطعم منى بارك كما قلت فهي فعلا سيدة اثيوبية تمتطي مرسيدس وفي زيارتي الأخيرة للسودان زرت فرع الخرطوم 2 وعلمت أن لها فرع آخر في الرياض أجمل مطعم بعمل أكل بلدي ومتنوع كان في الخرطوم 2 اسمو (سودان تكل) قريب من البنك الفرنسي.. فيهو قراصة وبلدي ومشويات حاجة عجيبة.. حالياً في العمارات قريب من شارع 61 في مطعم اسمو ملك الفول والكوارع بشتغل بالمساء بس.. فيهو زحمة مبالغة.. مطعم الأمريكيين السياحي في شارع المثلث بتاع بنك النيلين كان بعمل أكل جميل جدا جداً في التسعينات..
الاسم الصحيح منى بارك كانت منى امرأة أنيقة جداً وتهتم بالنظافة وطعم البيرقر مختلف خالص.. رغم انو المحل صغير وفيهو دور علوي عن طريق سلم خشبي ملتوي.. كان في وكالة سفر اسمها عفاف للسفر والسياحة قريبة من المطعم وفي نفس الشارع فيهو المطابع بتاعت ناس محمود صالح وحسن صالح..
يا أخانا الحبيب أبوذر، سليل الدوحة الصوفية و الشاعر الصوفي الكبير حياتي! يحل على روحك و يغشاك السلام و المحبة و كل القيم الإنسانية الجميلة. بوست نستالجيك في موضوع هام له علاقة مباشرة بمعاش الناس و صحتهم الفيزيائية. أعترف انو المطاعم و الكافتيريات الببتكلم عنها هذه كنت أراها بأم عيني لكنني لم أتمكن من دخول الكثير منها لضيق ذات اليد حينها. أنا زول اكبر منك شوية في العمر، الحمد لله الصحة عال العال. هل تصدق أنني ركبت الترام في الخرطوم و أنا طفل صغير بمعية الوالدة يرحمها الله؟ بس الشهادة لاه، ليمون الواثق هذا، ( و شكرا على المعلومة الجديدة:: كون صاحبه هو والد الفنان الكبير جيلاني الواثق، بالجد أنا بحب غناه القديم، و بالذات أغنيتي يا اميرتي، و القميرة، و كمان أغنيته الأخرى ديل عيونك ولا واحة ) كنت أحرص على شرابه ما استطعت إلى ذلك سبيلا. و كان مستوى النظافة في الأواني عاليا. و كان الذين يقدمون الخدمة به في مستوى عال من النظافة في هندامهم و طيبتهم. كانوا يرتدون جلابيات سودانية بيضاء. و يقدم الليمون المركز و عليه السكر المضبوط و الثلج على كبابي الشوب، و يظهر الليمون من خلالها رائقا و نظيفا بلونه الأخضر الذي يميل للصفرة. ما يعجب في هذا الليمون أن الخلطة ثابتة في تركيبتها، و بالتالي يأتي التركيز و الطعم ثابتا، و يكثر لك العامل من الثلج عند إبداء رغبتك في ذلك. محلات زمزم هذا كنت ارتادها لشراء الآيس كريم و البسبوسة، و ربما الباسطة المحشوة. و كان الذي يعمل في المحل زول مشلخ دنقلاوي. الوكت داك أنا كنت صبي أو شاب في مقتبل العمر
Post: #58 Title: Re: مطاعم الخرطوم Author: Osman Musa Date: 10-29-2017, 09:15 PM Parent: #57
الاستاذ آب ذر سلام شديد ليك و للمطاعم في بندرنا القديم الكان بندر وكان حضر قبل ما ينقلب الي بنشر . ههههها تحياتي
عذرا: كان إسمه: حلواني زمزم. أيضا في زماننا الجميل ذاك، نهايات خمسينيات القرن الماضي و بدايات الستينيات منه، درج السودانيون على إطلاق العبارة الدارجة: الطرماج( قلب التاء طاء في حالة الكلمات الانجليزية واللاتينية ربما أتانا من أسلافنا المغاربة.يعود أصل معظم السودانيين المغرب العربي. الاسلام و العروبة دخلا السودان، في غالب الأحوال عبر رجال الطرق الصوفية اامغربية و المتخلفين من قوافل الحج المغربية التي كانت تعبر السودان في طريقها لميناء سواكن ) و ربما أيضا ترماي على الترام.
مطاعم الخرطوم .. ما لها و عليها .. واضح ان هناك تدهور الخدمات التى تقدمها المطاعم السودانية للزبزون .. و هذا موضوع ضرورى و مهم ..
اريد الاشارة الى جزء مهم تطرقت اليه و هو مسألة النظافة .. يفتح السودانيون مطاعم .. مطعم الخرطوم او مطعم السودان فى بلاد كثير حيث يوجد السودانيون ..
فى دول المشرق و المغرب .. رزت عدد من تلك المطاعم .. بكل اسف تدار كأنها فى السودان .. دون مراعاة الى مواصفات و شروط تلك البلاد من حيث الاتباع
كثير من مطاعم الخرطوم تم اغلاقها فى كثير من بلاد العالم لانها لم تتبع الشروط اللصحية لتلك البلاد ..
رزت كثير من المطاعم فى دول الخليج .. يباع "التمباك" مع الكسرة و بقية انواع الاطعمة التى تقدم فى المطاعم .. شئ مؤسف للغاية ..
ساعود ..
تحياتى
Post: #61 Title: Re: مطاعم الخرطوم Author: اباذر عبد العال Date: 10-30-2017, 08:07 AM Parent: #60
سلامات يا ابوذر
الخرطوم سهل وجميل الاكل في المطاعم فيها بعد المغرب ...تجد جميع محلات الاكل فاتحه ابوبها لكن حاليا فعلا شكلها جاطت
فول واحة الهجره ام درمان مبالغة بوش عمر بوش شارع الاربعين مع الكوخ الفرنسي شارع العرضه
الان تقريبا بين كل ومطعم ومطعم في مطعم
في الحالة دي زحمة وارتفاع اسعار من الافضل تاكل في البيت وجبه اساسية والباقي هلوسه ساي
Post: #62 Title: Re: مطاعم الخرطوم Author: أحمد الشايقي Date: 10-30-2017, 08:31 AM Parent: #61
شكرا أخ أبو ذر
ببساطة كان هناك مجالس وكانت هناك صحـة بيئـة
والآن تحولت المجالس إلى مجرد وظائف لأناس (مجاهدين) ما ليهم في العير ولا في النفير
وتحولت صحة البيئة إلى مرفــق مهمـل لانه الصرف عليه من المحليات والمحليات مش
فاضية من الصرف على السيارات الفارهة للمجاهدين
يعني يا عزيزي ما فيش نظام ولا اشتراطات ولا تفتيش ولا متابعة ولا ولا ولا
في نفس الوقت الجبايات على هذه المطاعم 10000% مما يعني أنها تدفع لــ ... تفتــح ...
فلا يبقى لها شيئاً تدفعــه لــ تحسـن ظروف العمل ...
ملاحظة المطاعـم السورية من الواضح أنها تحصل على (استثناءات)
أحمد الشايقي
Post: #63 Title: Re: مطاعم الخرطوم Author: عادل فقاد Date: 10-30-2017, 09:13 AM Parent: #62
التحية لك اخي ابوذر موضوع البوست جميل و كل المشاركات من ناس عجايز عاشوا الزمن الجميل :) اكتر ما لفت نظري ذكرك لى مطعم الاخلاص و للشيف عبدالوهاب بالتحديد الذي بالنسبة لي هو خال و كنت اذهب معه للمطعم في فترة الاجازة فعلا كان مطعم مميز في كل شئ مع تحياتي
سلام يا أبو ذر ونحييك على الموضوع الدسم واللذيذ لست من ساكني الخرطوم بل نحن ضهاري عل قول أخونا توفيق . كنا نأتيها في العطلات كإجازة عند أعمامنا من قاطنيها . ولكن ممكن أساهم فيه قدر جهدي وشهيتي .. في إحدى عطلاتنا في الثمانينات أبناء عمنا كان عندهم مكتبة في شارع الجمهوري جوار جامع فارق . في إحدى تلك الاجازات دعوني للفطور في كافتريات شهيرة بشارع الجمهورية .لأذكر اسمها أو بالأصح لم اهتم باسمها كثيرا لكنها كانت مزدحمة جدا وهي تبيع السندوتشات الفخمة . فقط ما يميز تلك الكافتريا كان فيها بنت بائعة جميلة جدا وجهها طفولي قاصة شعرها مثل الأولاد ولها ابتسامة ووجنتين تضيئان المكان . ترتدي سكيرت قصير وبلوزة. بل أكثر ما يميزها أنها ظهرت في إعلان تلفزيوني دعاية لبان لو تذكرون هذا الاعلان ( طق طق وطق طق طق ) ومعها باقي اغنية لا أذكره .. واعتقد أنه هي السبب وراء الزحمة في هذه الكافتريا . المهم أبناء العم طلبوا لي معهم سندوتش باسطرما . أول مرة اسمع بشئ يؤكل اسمه باسطرما من باب الفضول انتظرت السندوتش . وشاهدت قرص الباسطرما الوردي يتوسط السندوتش مع من حوله من سلطة .. بصراحة كشيت منه .. بقى لي يشبه جنين الوطواط . شممته وتذوقته بلساني .. رفعت رأسي وجدت أبناء عمي يأكلونه بنهم شديد .. غمضت عيني وقضمته وأنا متقزز من ملمسه .. لكن شفعت له النكهة والطعم .. وجدته شئ لذيذ جدا .. وواصلت فيه وأنا مغمض .. قلت لي اسمه شنو الشي دا ؟ قالوا باسطرما .
عمنا علد الوهاب بابتسامته السمحه لسه بتذكره والله وهو يوزع فى الاجوار والتوجيهات ده ايام البلد طيبه ورضيه وكل الناس مرتاحه وسعيده كيف ما كانو ومهما كان حالهم
مطعم الإخلاص كان علامة مضيئه فى الخرطوم وكان نموذج للاشياء المحترمة
فعلا الاولويات عند الناس الماسكين البلد بقت شى تانى اخر حاجه فيها هو الاهتمام بحال البلد واهل البلد
السلسلة طويلة ومرتبطة ببعض ولو مسكت اى مرفق و اى مجال بتعلق بحياة الناس حتشوف العجب ونا بتلقى حرص واهتمام الا لما الأمر يتعلق بالجبايات والرسوم من المواطنين المغلوبين
محلات الاكل والشراب فى الخرطوم، خصوصا البنقول عليها شعبيه وصلت مرحله متاخرة من التدنى فى كل شى وبقى الهم والغرض هو الربح لس بغض النظر عن كيف تجيب الربح ده
الاكل ده زى العلاج ممكن الزول يدفع فيه اى ميلغ طالما كان جيد التدهور بقى هو السائد فى كل شى يا اباذر
كلامك صحيح حتى المطاعم السودانية خارج السودان ما بتكون بالمستوى المطلوب ولو فى الحد الادنى
انا برضو شفت مطاعم سودانية كتير خصوصا فى منطقة الخليج والزول يستحى والله يعزم ناس غير سودانيين هناك عشان يعرفهم بالطعام السودانى والوجبات حقتنا تلقى العمال جايطين والخدمات فوضى شديده وحتى الاوانى المستخدمة بتلقاها فى حاله مذريه
يا زول يا زول يا نسيب، المتزوج قريبتي، أنت بيجاي و أنا ما عارف؟ يا لها من مصادفة جميلة! أنا أكتب هنا منذ زمن بعيد، لكنني مقل، و انقطعت طويلا عن المنبر ثم عدت إليه مؤخرا. يا دوب أكملنا الرحيل لشقة جديدة. سأتصل عليك عبر الما يدسبنجر عصر اليوم، باذن الله.
طارق الفزاري ود زينب
Post: #69 Title: Re: مطاعم الخرطوم Author: احمد الشيخ Date: 10-31-2017, 07:31 AM Parent: #68
لا بد من مقاطعة الناس المتزوجة او العزابة سندوتشين من البيت تشيلهم معاك من بالليل تجهز رغيفك ، فولك، جبنتك ، مربتك، فواكهك، البتقدر عليه تحشي وتشيل حسب وضعك لا مطعم لا الله قال تجوع تطلع حشواتك تاكل والله ما في شي مستأسد المطاعم علينا الا اننا بناكل فيها على اي حال والله اوفر ، واصح، واوفر ، واريح، واوفر ، واطعم
لكن السودانيين اتعودو و لزمن طويل جدا انهم يفطرو فى اماكن العمل فى الاسواق والمدارس والمكاتب
كل شى كان ماش كويس وعلى احسن حال
لكن فجاة لقينا روحنا خارج الحياة، الحياة فى ابسط مستوياتها العادية وسمحه لقينا روحنا مرقنا منها
وضيق الحال كمان ما بساعد كتير على الطريقة دى يعنى الموظف او العامل المسكين بفضل يخلى السندوتشات دى لى اولاده الماشين المدرسة ويمشى هو و يمكن ما يفطر كمان ولا ياكل لغاية ما يرجع البيت
اسمح لي أخي أباذر اتونس شوية مع نسيبنا حسن حماد. عساك و أولادك جميعا بخير، أخي حسن سعيد بالالتقاء بك هنا أخي الكريم. أنا أكتب هنا لماما و يالها من أيام جميلة قضيتها بين ظهرانيكم في مدينة نيويورك البهية، و أنا في طريقي الى السودان. طبعا الكلام دا ليهو زمن طويل. مشكورين أهلي في نيويودك، فقد اكرمتم وفادتي. بس كيف يا أخوي ما أكون حضرت زمن الطرماج بي عمري دا. نحمد الله على نعمة الصحة.
سلام يا أبوذر آخر عهدي بأكل المطاعم كان قبل 15 سنة أو يزيد وكان بمطعم مشهور في قلب الخرطوم .. بتذكر مشيت عشان اجيب طلبي لقيت الراجل اللي بغرف عرقو كابي شو وعليك أمان الله العرق دا نصو في الواطة ونصو الكتير التاني في صحني قمتا خليتو ومشيت ولا قلت لبتاع الكاشير أية حاجة في أية حاجة . بس تاني من ديك ما أكلت في الشارع .
أأأأأيه زمن .. تكون مارق من تمرين حار .. تجي تلهط ليك ايسكريم شعلة من بيمبو ده .. التعب داك كلو يمرق منك ..
غايتو يا سيف .. ياريت تضم لي قايمتك دي حلويات سلا .. شي عجيب يأخ .. تحبّس بيها بعد الايسكريم داك .. الأجمل انك تجي الحتات دي بالليل .. اصلا بالنهار مابتنفع .. الخرطوم بالليل عندها طعم آخر .. الناس الكتار اللافين بالنهار كلهم بيكونوا شخروا .. ههههه .. والله فعلا البلد راحت شمار في مرقة ... نص الخرطوم بالليل بعد ان كان ينبض بالحياة .. الآن أصابه موت سريري وكوما عجيبة .. نقلوا المراكز والمحلات التجارية والمطاعم .. ودوها قسرا وعلى هواهم شرق الخرطوم .. شوارع تم اصطناعها هكذا بصورة عشوائية .. وسط الاحياء السكنية وبين السكان والبيوت .. عالم وهم فعلا وتفكيرهم مافايت ركابينهم .. قلعة تقلعهم ياخ ..
البيزعل بقى احياءنا بتاعة غرب الخرطوم .. زول شغال بيها مافي .. حقو كان يجرونا يرمونا في البحر ويستريحوا مننا ..
اذكر ان هناك كان .. حلوانى و مكان للايسكريم كان مميز للغاية .. اسمه .. اولاد الزبير .. يفع فى الناحية الجنوبية للجامع الكبير بالخرطوم .. و تحيديا قبالة الركن الجنوبى الشرقى ..
فى اول التسعينيات كنت اتوقف عنده .. تقريبا يويما .. للشراء منه .. لا ادرى كان لايزال موجودا ..
Post: #77 Title: Re: مطاعم الخرطوم Author: محمد عبد الله الحسين Date: 11-01-2017, 08:50 AM Parent: #75
الأخ أبو ذر و ضيوفه الكرام التحايا الطيبة لكم جميعا تعرف بوستك ده مهم لأنه بيعرِّف الواحد بأفضل الاماكن لتناول الطعام .. كأنه خدمة للقراء.. زي الخدمات متوفرة في كثير من العواصم العربية في الصحف و المواقع...و هي بتسهل للشخص الاختيار و بيعرف نوعية الطعام المقدم و مستوى الخدمة و الأسعار .. و كذلك بيعرف المواقع و اماكن التوزيع بدل تفتش بنفسك و تجرب و تشوف و تخسر و تضيّع وقت. لك الشكر عزيزي الفاضل
يا جيمي الفضحية والسترة بنات أعم لزم قدر ما قوقلت ومخ مختا وقولبت الذاكرة ما عرفتا ليها أثر ينوبك ثواب قول ..
Post: #79 Title: Re: مطاعم الخرطوم Author: جمال ود القوز Date: 11-01-2017, 10:51 AM Parent: #78
دي يا طلحة كناية عن انك تحشي بطنك .. بي اي حاجة واي كلام وتبقى مارق .. هههه .. البُتاب هو المحصول غير مكتمل النمو .. الكلمة اصلا نوبية .. من اشوف ناس المطعم داسين مسرح العمليات .. بعرف انه الوضع مش ولابد .. فبتخارج طوالي وبعمل انسحاب تكتيكي .. هههه .. بس مرات صراحة الزول لمن يكون جعان .. والجوعه قارصاهو ومافي مطعم قريب .. بعمل رايح .. وبقول اكيييد المطعم ده جوه بكون نضيف .. خخخخخخخ .. على وزن الكديس لامن مايحصل اللبن ..
هههههههه أظنها ( ورتاب) يا جيمي الصفق الناشف في قصب السكر والعنكوليب بعد ما ينضفو بدفسوا في الشولات عشان عندو استعمالات أخر منها الزبالة بتاعت بيوت الطين .. خخخخخخ
مرة قبل حادثة المطعم الطباخو عرقان دي مشيت أكلت عند النسوان البقعدن جمب باب جامعة النيلين .. سلطة أسود حمرا ومعاها بيضة في عيشة فاخرة وشطة خدرا تقول يا قربتي وبعديها كوباية كركدي بارد وبعد دا كلو كوباية قهوة ساموطي .. عليك أمان الله تاني تلاتة يوم وضحوة ما أكلت غير الزبادي .. تخمة واللا حاجة غلط غايتو .. لكن ما تسمم على أي حال.
Quote: هههههههه أظنها ( ورتاب) يا جيمي الصفق الناشف في قصب السكر والعنكوليب بعد ما ينضفو بدفسوا في الشولات عشان عندو استعمالات أخر منها الزبالة بتاعت بيوت الطين .. خخخخخخ
يا طلحة يأخ عملت الشغلة سكلانس .. هههههه .. الورتاب براهو .. داك القصب الناشف بعد يقطعو القندول منو ,, يحشوهو وبيربطوهو على شكل خزم وبيختوهو .. لامن ينشف ويدوهو البهايم .. ثم الصفق الناشف ده كمان براهو اسمو الكاويق .. خخخخخ .. والبليسوا بيهو داك كمان براهو وهو التين .. يتكون بعد انتهاء عملية النوريق .. أوعك تكون مابتعرف النوريق كمان .. ههههههههه ..
يا سلااام ... على سلطة الاسود .. طوالي كنت باكلها لكن البيض المسلوق مابدورو .. ولا برتاح ليهو وكنت بستعيض عنو بي تلات اربع طعميات .. يكونن مطعونات في قلب السندوتش .. فبتحس بالدهشة وانت تترقب تعفص ليك طرف واحدة .. وانت بتفرم في اللقمة .. طبعا لا تنسى تلك الشطة بالليمون والدكوة .. لازم تعمل ليك منها معلقتين تلاتة .. قبل أن تبدا عملية القضم .. خخخخخ ..
الشاي ده عندي ليهو طقوس خاصة .. وعندي ستات شاي معينات .. عند غيرن مابشربو ... أصلا ما عندي كبير غرص بالقهوة دي .. لو شربتها او جليتا .. أو أخمج للجماعة السكر كل شوية اكب ملعقة .. فيقولوا لي انت مش كييف .. ولايحتفوا بحضوري أويحفلوا به كثيرا .. تماما زي القهوة بالنسبة لشخصي الضعيف .. خخخخ ..
والله ونستني يأخ .. الله يعرّس ليك ... خخخخخخخ .. (او) يعرس لي معاك .. كما يقول قريبي داك .. هههه ,,
Post: #81 Title: Re: مطاعم الخرطوم Author: الامين محمد علي Date: 11-01-2017, 11:55 AM Parent: #78
كازبلانكا للايسكريم
شارع الجمهورية او البرلمان في - ايسكريم رهيب
مكسيم بيرقر
في واحد بعمل فتة قريب لي كايرو جلابية ...مش فتة فول ..فتة لحمة تقريبا والمكان متواضع بس فتة رهيبة
عن أذنك يا أبوذر ياخ لحظة مع عزيز القوز دا .. عارف ياجيمي كل أصناف الأكل ما لذ وطاب كوم وسلطة طماطم تقطعا صغيرة مع البصل والخيار والجبنة وشوية دكوة وزيت سم سم كوم تاني براهو خالص .. والله وما ليك علي حلفان أنا مستعد آكل طشت ( بتعرف الطشت ؟ ههههه ) براي والأمر سيان بى رغيف واللا بى كسرة ما فرقت .. قبل عشرين خريف أو يزيد أيام الجامعة كنتا ساكن عزابة مع أولاد الحلة في بري .. أها جمب البيت يوجد طيب الذكر سوق أربعة ( يا ربي شالوهوا واللا لسة كائن ؟) .. أها لما الجماعة ديل يطلعوا الشغل الصباح بخلونا أنا ومعاي صاحبي برضو كان شغال لكن شغلو متأخر بعد الساعة اتناشر .. أها يا زول نقوم نمشي سوق أربعة دا نملأ الكيس طماطم وبصل وكل ما خف ثمنو وحلا طعمو من لوازم السلطة، ونحن راجعين نغشى دكان عثمان الله يديهو العافية .. ودا برضو ساكن معانا عزابي في نفس البيت وعارف نومتنا وضايقا كمان، أها أول ما نظهر ليهو في عتبة الدكان طوالي يناولنا طشت البلاستيك الكبير ونص رطل زيت سم سم في كيس ونص كيلو جبنة في كيس برضو، بالإضافة لكيس ثالث شحمان فيهو يمكن تلين أربعين رغيفة .. ويقول لينا حقي برا لو ما حصلتكم .. طبعا حقو في الفطور ما القروش لأنو هو مشاركنا بالحاجات الأدانا ليهن.. تعرف يا جيمي تقطيع السلطة دا براهو برنامج ممتع جدا والله لدرجة قاعدين نعمل القرعة منو البقطع .. المهم يا زول نلم ليك في الشغل قطعك قطعك اهرسك أهرسك عشر دقائق بس نرقدا ليك سلطة زي ما الله خلقا، ونقول كدا نترعا ليك بزيت السم سم ( اتخيل منظر لوحة السلطة دي بعد تقطيع الطماطم والبصل الأخدر والفلفلية وتهرس عليها جبنة ودكوة وشطة خدرا وترشها بالزيت ) أخ .. أنا غايتو لما نجىء على الأكل أول حاجة بقلع ببقي بالفنلة والشورت لا مؤاخذة .. أما صاحبي فدا عليك أمان الله الا الشورت الساترو .. أها وتعال شوف النهز والعزف .. أكاد أجزم يا جيمي انو العرق البنزل أثناء ما نحن غرقانين لاضنينا في السلطة دي لو عرضوا ليهو جردل يستفو للزيق .. خخخخخ طبعا نسيت أقول ليك انو عثمان سيد الدكان لما يجيء بجيب معاهو جردل ملان كوكا كولا أو بيبسي وتلجو يتشاكل جواهو غايتو بس الله يلزمنا الصبر على الأيام الفارهة تلك خخخخخخخخخ
Quote: أوعك تكون مابتعرف النوريق كمان .. ههههههههه ..
شكلك كدا عايز تزنقني في زقاق يا جيمي ..
Quote: الله يعرّس ليك ... خخخخخخخ .. (او) يعرس لي معاك ..
ياسلام يا طلحة وأيم الله أكلتكم دي تفوق شية خروف مضبوح طازة .. دي اكلة تاكل منها لامن تقيف تيوة ..هههه .. الاجمل بقى هو جردل الكوكاكولا اب تلجا يتعاوم ده .. وهكذا نحن نحب البوش ولانستبدله بأي أكله .. واهم حاجة زيت السمسم ده .. يخليك تكون مرخم اليوم كلو .. ههههه ..
زمن المدرسة الحصة التالتة مع مراوح الفصل البتهبب ديك .. الاستاذ بيكون كانه بيشرح للكنب والترابيز .. الفصل كله كأن على رؤوسه الطير .. ههههه .. نوووم تقيل والنعسة ما بتفك الا مع بداية الحصة الرابعة .. الترخيم ده وعن تجربة من تأثير ترعة زيت الجم جم دي .. سرها باااتع خالص خالص ..
أسفنا الشديد لصاحب البوست لاننا احتليناه ليهو .. لكن اهو كلو في الأكل والعضة .. وكلو يتبع للمطاعم والبوفيهات والذي منو .. خخخخخخ ..
نوريق زي النوريق أخوي طلحة ..
Post: #86 Title: Re: مطاعم الخرطوم Author: Mohammed Alhasan Mohammed Date: 11-02-2017, 07:21 AM Parent: #84
الخرطوم 2017
دكاكين الفول
طبعا الظاهرة الانتشرت حاليا بصورة خيالية هى دكاكين الفول ....يعنى بقى الاكل وبالذات الفطور والعشاء لاغلب سكان العاصمة عبارة وجبة فول فى اقرب دكان ومعظم الدكاكين او البقالات بقى عندها الفول والطعمية والباسطة دى حاجة اساسية ..وتتنافس فيها بصورة متزايدة ..
والناس بقت ما محتاجة كراسى ..صناديق بيبسى كدا واقرب ضل للدكان .... مع ملاحظة ان الفول بشتغل طول اليوم من الصباح الباكر و عدا ساعات الظهيرة والعصرية ... وحتى وقت متاخر من الليل ..والدكاكين دى تحظى بالسواد الاعظم من الشعب وخصوصا الطلاب والعمال ...
والملاحظ ايضا ان المطاعم والمعروفة التقليدية او السياحية اصبح روادها فقط من الطبقة الغنية والمتوسطة فقط .......
ابا ذر وزي ما انت قلت انه في لحوم فاسدة وفي ناس اصحاب مطاعم ما عندهم ذمة بيضبحوا كدايس وكلاب، وفي غياب التفتيش الصحي لمطاعم الخرطوم فاحسن حاجة وعشان تضمن تاكل لحم خروف ومضبوح حلال تمشي مطاعم اولاد امدرمان فهم يضبحوا الخروف قدامك ومعلق قدامك ومغطى ببلاستيك نضيف لابعاد الحشرات وتقعد في جو سوداني ميه الميه في بنابر او ترابيز نظيفة،،،وتكون مطمئن انت ما بتاكل لحم حمار او او كلب او كديس،،،،واسعارهم معقولة ،،،، اذا انت في الخرطوم، امشي لناس اولاد امدرمان ووريهم البوست ده وقول ليهم بسمات عملت ليكم دعاية مجانية ، والمرة الجاية عاوزة ثلاث وجبات مجانا ومعاي خمسة اشخاص،، ..وبالمناسبة عندهم فرع في الخرطوم ، مع انه اسمه اولاد امدرمان،،،وده المطعم البناكل فيه اول ما نصل الخرطوم،،، والسؤال هو:: هل في الخرطوم يوجد تفتيش دوري من ناس الصحة على المطاعم للتاكد من نظافة المحل والتاكد من جودة الاكل الذي يقدم للزبائن؟؟ ودمت بخير وعافية
تحياتي شاعرنا المرهف أبوذر (الأصلي) و ضيوفه الكرام. ما شايف أمدرمان كثير في هذا البوست الشهي! الأسماك، و عمك السبكي في سوق الموردة، تجي يوم الجمعة تلقى الفنانيين الكبار، الضباط و الوزراء و نجوم المجتمع. يقول لي ناس الحلة ما تجوا يوم الجمعة (ناس سمك بي جنيه لي خمسة جنيه) عشان ناس الحلة بحتجوا و الضيوف الكبار بيقارنوا الكميات 😁😁😁
عمك عبد الرحمن بتاع الليمون و الشعير، و الحاج بتاع الفول، عليهم الرحمة. يقول للزبائن أي حاجة غير الشمار و الزيت، بتخرب الفول بتاعي!!
يا ابا ذر زي ما انت قلت في بعض المطاعم في الخرطوم بتقدم لحوم فاسدة للزبائن ومرات بتضبح كدايس وكلاب ، وعشان تتاكد انك بتاكل لحم خروف ومضبوح حلال امشي لمطاعم اولاد امدرمان، وهم بيضبحوا الخرفان قدامك والخرفان معلقة قدامك ومغطية ببلاستيك لحمايتها من الاوساخ والحشرات وتختار انت القطعة من الخروف وينضجوها ليك قدامك، وتاكل وانت مطمئن انك ما بتاكل لحوم فاسدة،،، والا خليك في الفول،،، ونحن اول ما نصل الخرطوم وجهتنا مطعم اولاد امدرمان ، وعندهم فرع في الخرطوم.. ويا ابا ذر اذا انت في الخرطوم قول لاولاد امدرمان بسمات بتعمل ليكم دعاية مجانية وهي طالباكم خمس وجبات لعدد خمسة اشخاص للدعاية دي،،،، وبعدين اذا انتو مصرين تاكلوا فول، اخدوا مشوار سريع لام المدائن عطبرة ، لان عطبرة فيها مطاعم بتعمل احسن والذ فول في الدنيا،،،والمشوار من الخرطوم ما بعيد، وخاصة بنسمع اشاعات انو في قطر سريع بيوصلك عطبرة في ساعة واحدة، يعني اقصر من مشوار الخرطوم امدرمان... ودمتم بخير وعافية
الموقع فيه خطا فني،،،،ثلاثة مرات اكتب تعليق في هذا البوست يا ابا ذر، والتعليقات تتمسح...في حاجة غلط.. ..اما انك انت صاحب البوست بتمسح المداخلة، زي ما اشرت في تعليقي السابق او الباشمهندس بكري هو البيمسح التعليق لانه فيه دعاية لمطاعم اولاد امدرمان، او الخطا الفني،، ،او الجوال بتاعي سكنته الشياطين،،، ومخصوص كتبت المداخلة الرابعة دي عشان اتاكد انها بتتمسح بفعل فاعل، ،ودمت بخير وعافية
الفول فى الدكاكين وخاصة فى الاحياء شى قديم جدا طبعا ومن ايام كناتين اخوانا اليمنيين زمان
الشى الغالب كان الناس بشيلو الفول للبيت، لكن حاليا وزى ما انت قلت الدكان بقى مطعم والاكل فى الشارع وده السائد ومنتشر يعنى الناس بتخت الصحن فى الارض وياكلو
مشهد ومنظر عادى و مالوف بقى
وملاحظتك المهمة يا محمد هى انه الناس فعلا ممكن تاكل تلاتة وجبات فول فى اليوم فى الدكان
