وزير الداخلية يكشف تفاصيل جديدة عن رجل الأعمال المتهم باستدراج العذارى

09:57 AM October, 18 2017

سودانيز اون لاين
Hassan Farah-جمهورية استونيا
مكتبتى
رابط مختصر

قال إنه لم يتم حظره من السفر
10-18-2017 02:47 AM
البرلمان: الراكوبة إعتبر وزير الداخلية الفريق شرطة حامد منان الحديث عن تورط نافذين في إطلاق سراح رجل الأعمال المتهم بفض بكارة الفتيات، ومغادرته البلاد بالإشاعات. وطالب الصحفيين بالإستيثاق من المعلومات، وان لا يتحدثوا عن ما يدور في الشارع دون تثبت.
وأكد منان في جلسة البرلمان اليوم، ان رجل الاعمال المتهم باستدارج الفتيات، تم الافراج عنه بالضمان العادي، لافتاً الى انه غير ممنوع من السفر.
إلى ذلك؛ طالبت النائبة رجاء حسن خليفة وزير الداخلية، في جلسة البرلمان التي خصصت لمسالة مستعجلة بشان لاجي دولة جنوب السودان، بضرورة القبض على رجل الأعمال عبر الانتربول بوصفه اجنبياً ومحاسبة الجهات التي ساعدته على الهروب، الا ان منان اوضح للنائبة ان المتهم سوداني الجنسية وليس اجنبياً منوها إلى انه غير محظور من السفر وانه تم اطلاق سراحه بالضمان العادي.
وكانت النيابة قد وجهت تهما تحت المواد 155 و88 من القانوني الجنائي للمتهم، المتعلقة بممارسة الفاحشة والرشوة، بعد ان تم ضبطه متلبسا برفقة فتاة داخل شقة بوسط الخرطوم.
https://www.alrakoba.net/news-action-show-id-289321.htmhttps://www.alrakoba.net/news-action-show-id-289321.htm

يا اخوانا منو فيكم الفهم حاجة؟
الزول بعد فعلته الشنيعة دى تم القاء القبض عليه ووجهت له تهمة وعين يوم المحكمة...طبعا كان مفروض يكون فى الحبس حتى انعقاد المحكمة ولا شنو؟
وزير الداخلية قال الزول سافر بضمان عادى......هههههه من الذى ضمنه؟؟؟؟

تحياتي يا حسن

كلام مجوبك

المتهم سافر ول موجود بالسودان؟

المتهم سافر ول موجود بالسودان؟
----------------------------------------------------------------------
حاتم الهوارى لك التحية
من كلام وزير الداخلية ومناقشات البرلمان يفهم ان الزول هربوه للخارج (بضمان) ههههه ....فى نائبة طالبت بالقبض عليه وارجاعه بالانتربول

تحياتي حسن
كيفية الضمان في الشرطة تتوقف على المواد المفتوح بيها البلاغ و ماذا وضع المشرع لها من عقوبات حال الادانة
يعني اذا العقوبة ممكن تصل الاعدام يرفض الافراج بالضمانو وإذا كانت المواد فيها امور مالية شيكات مثلا يكون الضمان مالي يوازي قيمة مبلغ البلاغ
بعض المواد يطلب وكيل النيابة ضامن يلزم بإحضار المضمون أويحاكم حال عدم حضوره
وهناك مواد يكفي فيها الضمان الشخصي او يقال بضمان محل عمله او اقامته
عموما اذا التهمة الرئيسة الموجهة للرجل هي ارتكاب الفاحشة وعقوبتها التي هي الجلد وربما الحبس لمدة بسيطة عادي ان يطلق سراحه بالضمان الشخصي كونه سافر برضو امر عادي اذ لم يحظر من السفر
يبدو اننا كنا ضحية مبالغات الواتساب المعتادة بالمبالغة في تصوير الجريمة و الحديث عن ضمانه بواسطة وزير و تهريبه وبتاع

لله درك يا ود البشرى
الموضوع يبدو انو كان ماسورة ساي

الموضوع بالشكل الذي ناقشه برلمان الإنقاذ - مطبوخ وموجبك ! إن كان الموضوع بهذه البساطة - فلماذا قام البرلمان بإستدعاء وزير الداخلية ومسآلته ؟ * إن كان الموضوع زنا مثبت و كان الزاني محصن رجم علي طوالي غير محصن جلد ! الحالات التي لم يتم فيها إثبات زنا في فجر الإسلام لم تطبق فيها إي عقوبة بديلة وإنما تم إطلاق سراح المتهميين - وجلد الأشخاص الذي قاموا بتوجيه الإتهام لهم ~! ماكان في شريعة "موازية"تنسف الحكمة من تصعيب إثبات الزنا ! * الشريعة الموازية "شريعة السوق السوداءوالنظام العام!!جلد وغرامة وسجن -لمن إتهم بماهو دون الزنا - وجلد المحصن بدل رجمه ! وإسقاط معطيالشهود الأربعة والمرواد في المكحلة !* أها المتهم دا لو حوكم بالشريعة الموازية - أو النظام العام - محكمة سريعة وجلد حتي وإنلم يثبت عليه زنا بالمنظور الإسلامي ** القوانين العصرية تعاقب عقابا مغلظا علي زنا الإغتصاب - وعلي مواقعة القصر وفي أغلب الأحيان البغاء والدعارة= التصرف في الجسد جنسيا بمقابل مالي ! وتستعين في ذلك بوسائل إثبات عصرية - DNA وغيره وإفادة الضحية والأدلة والشهادة الخ * المتهم في القضية مثار الجدل متهم بالإغواء والبغاء ومواقعة القصر والرشوة ومسألة إنويأخذ شوية جلدات ويمشي بيتو لامحل لها في الإعراب - فجريمته - كارثية وكبيرة !* بعدين ضمان عادي بتاع الساعة كم ؟ وإش معني البسطاء والمسحوقيين الذين يقبض عليهم بتهمة الأفعال الفاحشة والفاضحة يتمحبسهم حتي محاكمتهم وجلدهم ! ضمان عادي وسفر وحرية تنقل وحبس مهين وإذلال لحين إيقاع عقوبة الجلد !* من الواضح أن مسرحية إستدعاء البرلمان ومسآلة الوزير مطبوخة لتم التشويش عبرهاعلي تسوية وكلفتة القضية وتمويتها ! وربما دخل نافذون علي الخط كالعادة - وقتلو الموضوعوربما أن إثارة الموضوع في الأساس تم نتاج تصفية حسابات وصراع أفيال لاكحرص عليتطبيق القانون وصيانة الفضيلة !** مثل هذه القضايا تكشف أزمة المشروع الإسلاموي وتطبيق الحدود خارج سياقها التاريخي!* لابديل لدولة القانون والمؤسسات والتشريعات الوضعية -وسيادة مبادئ الشفافية والمحاسبة بدلا من الفوضي التشريعية والتخبط والمحسوبية وغياب هيبة القانون !..

بالله دة كلام يقولوا وزير داخلية مسئول؟؟

خليكم من وزير داخلية مسئول فى السودان المنكوب دة كلام يقوله سودانى راضع قيم أهل السودان مع لبن أمه ،،
قيم مقنع الكاشفات وستار العروض،
والمامون على بنوت فريقه،
قيم السودانى البياكل النار والعروض عنده خط أحمر ؟!
قيم كسار قلم ماكميك الوقف للخواجة ألف احمر حماية للسودانيات ؟؟
منتظرين شنو يارجال السودان بعد تصريح وزير الداخلية دة ؟!

منتظرين الذئاب البشرية تكسر بيوتكم وتنتهك أعراضكم قدام عيونكم؟!!

ود البشري جاهز لتمييع أي قضية وأي موضوع
الكوز تلقاهو يدافع عنو
الملحد يدافع عنو
الوهابي يدافع عنو
غايتو يا ود البشري...
الواحد مستحيل يكون مع ديل كلهم
إلا يكون أمنجي ...لأنهم هم الوحيدين
المستفيدين من وجود هؤلاء..
اجمعين

خليناه الها رب الزاني. الكلام ود البشرى و ايمن محمود. لماذا الجري وراء التبرير و ايجاد المخارج لشخص مخطئ؟

سلام ودالبشرى تلفونه سلموه ليه ولا إتحفظوا عليه

والضمان العادي ده كيف بضامن ملزم بإحضاره للمحكمة ولا زي ما بقولوا في المسلسلات المصرية تم الإفراج عنه بضمان محل إقامته

يا محمد البشرى للعلم

المتهم عليه بلاغ من النيابة تحت المادة 155
ودي في بعض أحكامها وخصوصا اذا ثبت عليه الادانة لاكثر من مرة (3 مرات) قد تصل عقوبتها للاعدام او المؤيد
ودا بنص قانون 1991 ذاتو

يا شباب دقيقة دقيقة مالكم هايجين كدا
ابرر شنو ؟ انتوبتقروا بشنو - السؤال للزملاء عدا منتصر الصوفي دا عارفة بقرأ بأذنيه
يعني الواحد يلغي عقله و يسلّم ذقنه للواتساب و الهجايص الفيه يا يبقى يبرر!

يا باشمهندس عبدالله, أنا لا ابحث عن مخارج لشخص مخطئ, هذا الرجل يكفيه الفضيحة الاجتماعية التي طالت اسرته الكبيرة و الصغيرة و اعماله و سمعته كرجل اعمال في السوق!
لكن كمان ما ممكن تحاكم الناس على مالم يحدث ولم يصدر عنهم, القصة الطلعت اول يوم عنه فيها مبالغات بان كذب بعض جزئياتها ثم تاني يوم اخذت طابع نضالي عن تدخل وزير وذكر بالإسم اتضح ايضا كذبها
الجريمة في نظري عادية وترتكب كل يوم عشرات ومئات المرات و المتهمين فيها كبيرهم وصغيرهم يخرج بالضمان واحيانا تتم المحاكمة في نفس اليوم قي محاكم النظام العام

يا منتصر - العاقل :) - ما عارف عن تلفونه معلوماتي نفس معلوماتك بس انا ما بصدق الواتساب طوالي كدا
وكذلك تفاصيل الضمان لا اعلم عنها فالخبر لم يذكر مزيد من التفاصيل, لكن اصبر شوية لا بكرة بتلقى كل شي في السهلة

فعلا يا هواري بحثت عن المادة 155 لقيتها ادارة محل للدعارة وفعلا الادانة الثالثة في احكامها الاعدام او المؤبد وحتى في المرة الاولى قد تصل العقوبة للسجن 5 سنوات
انا كنت اظن ان جريمته ستكون الزنا او الافعال الفاحشة ما عارف ليه اختاروا ليه ادراة محل للدعارة, يمكن دا السبب الخلا الدفاع بتاعه يستأنف ويعيد القضية للنيابة

Quote: الكوز تلقاهو يدافع عنو الملحد يدافع عنو الوهابي يدافع عنو غايتو يا ود البشري... الواحد مستحيل يكون مع ديل كلهم إلا يكون أمنجي ...لأنهم هم الوحيدين المستفيدين من وجود هؤلاء..

طبعا يؤسفني اقول دا منطق بليد جدا
انا لا ادافع عن ناس أو انتماءات أنا لو دافعت ادافع عن الحق - كما اراه
ولأني حر ومستقل و عقلي بيدي لا بيد (سيدي) لا يفرق معي انتماء او صفة أو ديانة أو عنصر أو جهة الأطراف المتورطة
عشان تفهمني تحتاج ان تطلع شوية من عباءة التبعية و تكون مستقل و حر
إن بقت قاسية عليك ما مشكلة بعذرك

Quote: فعلا يا هواري بحثت عن المادة 155 لقيتها ادارة محل للدعارة وفعلا الادانة الثالثة في احكامها الاعدام او المؤبد

تحياتي يا محمد البشرى
تبقى مسالة "الضمان الشخصي" في قضية تصل عقوبتها الاعدام او المؤبد فيها "أنَّ" واعتقد تحتاج توضيح اكثر من الوزير فالموضوع ليس بسيطا او عاديا كما حاول ان يصوره امام البرلمان "النايم"

Quote: يمكن دا السبب الخلا الدفاع بتاعه يستأنف ويعيد القضية للنيابة

من حقه الاستئناف ولكن يظل الوضع القانوني كما هو عليه بالنسبة للضمان يعامل معاملة المادة 155 الى حين العرض على القاضي و البت فيه ...موش يمنح ضمان شخصي و يزوغ من المحكمة ويسافر

حسب الخبر يقول ضمان عادي وليس شخصي يا حاتم
عموما قبل الاستعجال كالذي حدث اول يوم انتشار الخبر يومين تلاتة ستظهر التفاصيل الحقيقية و مدى التجاوزات في الموضوع

الضمان العادي يا حسن فرح هو اطلاق سراحه بضمان محل سكنه ومحل عمله،،،
وهذا الضمان يسري فقط على الجرائم الخفيفة وما عندها صلة بالجرائم الخطيرة الجنائية،،،
وفي هذه الحالة فان النيابة تعتبر جرائم الدعارة واصطياد القاصرات وممارسة البغاء من الجرائم
العادية ولا تحتاج الى ضامن،،،
وطبعا كلام وزير الداخلية تشجيع لممارسة هذا النوع من الجرائم...
اللهم اصلح حال السودان
ودمت بخير وعافية

مع الإنقاذ ومحاكمها (مش حتقدر تغمض عينيك)

من كلام الوزير في البرلمان .. أول افادة وصلتنا بأنه الموضوع (صحيــــح)

يعني هناك تهمــة ومتهــم وأكيــد (أسباب كافية) لتوجيــه الاتهـــام وعملية قبض

على المتهــم (حدثــت خلالها) محــاولــة رشــوة .. فتم تسجيل بلاغ بالرشـوة

مجموعة هذه الجــرائم تمنــع الافراج بالضمان لأنه بعض (العقوبات المتوقعــة

والمنصوص عليها في القانون الجنائي تشمـل عقوبة الإعدام) يعني متهــم ممكن

توصل عقوبته لعقوبة الإعدام لا يجيــز قانون الإجراءات الافراج عنـه بالضمان

أي نوع من أنواع الضمان .....

ومن ناحية أخرى حتى لو اعتبر سيادة الوزير الموضوع (بسيــط) و (عــادي) والـ

متهــم (مش ممنوع من السـفــر) فمن إجراءات محاكم الإنقاذ أنها تعتبر الموضوع

(نظام عام) والمحاكمـة في هذه الأحوال (سريعة) اسمها في قانون الإجراءات محاكمة

(إيجازيــة) ودي ما بتهتــم بــ (مشغوليات) حضرة المتهــم سواء كانت تبيع (الشاي) أو

كان يبيع (المصانع والمشاريع)

على أية حال البركــة في أول تصريح رسمي يثبت أنه الموضوع صحيح وانه الاتهام

لحضرة (المتهــم) قد صــدر وحاول يتخارج بي (رشــــوة) كما رشـــح في الأخبــار

مسكين ما عنده بطاقــة (حصانة دبلماسيـــة)

أحمد الشايقي

هل اتهام زي دة بخلو الزول يسافر
ولا بفكو بضمان عادي

بالطبع لا نلغي عقولنا ونسلم بتصريحات وزير الانقاذ ونواب برلمان الانقاذ ونمضي علي بياض علي كلامهم ونبصم عليه باعتباره القول الفصل ! مايصدر عن قيادات الانقاذ في مثل هذه الاحوال لايخنلف عن عن شطط
وتلفيق بعض ما يصدر في وسايط التواصل الاجتماعي ! والمحك هنا اعمال العقل !!
اعمال العقل وقدح الذهن لا المسارعة بالبصم علي تخريجات وزير الداخلية وبناء احكام. عليها !! هكذا وبكل وثوقية يقصر البعض الامر علي تهمة الأفعال الفاحشة وعقوبة الجلد. وانتهاء الموضوع علي هذا!! فان كان
يقوم بالتهويل فان البعض الاخر يقوم بالتبسيط واختزال الامر في فعل. فاحش. ينتهي بمجرد شويةً. جلدات !!
الموضوع في بغاء ودعارة. ورشوة وبالتالي مسالة الضمان العادي وشوية جلدات برة المعادلة ! الجريمة كارثية وخطيرة عقوبتها كبيرة وبالتالي مسالة ضمان بسيط وسفر ما واردةً!!
** ونذكر هنا انو حتي ناس الأفعال الفاحشة والإخلال بالنظام العام يحبسو حتي تطبق العقوبة عليهم في نفس. الْيَوْمَ او الذي يليه !!فلماذا الخيار والفقوس ؟
وحقو الناس قبل ما تبصم علي التصريحات الإنقاذي وتوهم الناس انو القضية فقط فعل فاحش تشوف الاتهام شنو وبعدها نشوف الاتهام دا بترتب عليهو شنو - !!
الموضوع. بالكيفية التي تناولها الوزير تفوح منه رايحة الطبخ والسنسرة. وفيه عدم احترام للعقول !
** اعمال العقل والتفكير ليس مناطه فقط مايصدر في وسائل التواصل لاجتماعي وإنما تصريحات ومواقف الانقاذ !

في جانب مهم في الموضوع والناس مطنشين منه
البت الدكتورة الجابت أختها للراجل دا
ومنتظراها برة في العربية (والعهدة حتى الآن على الواتساب)
موقعها شنو من القضية
لأنه أنا شايف انه دي قضية خطيرة وتحتاج وقفة

غايتو .. ربنا يصلح الحال
تحياتي سيد البوست والزوار

Quote: البرلمان: الراكوبة إعتبر وزير الداخلية الفريق شرطة حامد منان الحديث عن تورط نافذين في إطلاق سراح رجل الأعمال المتهم بفض بكارة الفتيات، ومغادرته البلاد بالإشاعات.

الكلام في الكوت ده بينفي سفر المتهم.
الضمان البيتكلم عنه هو لإطلاق سراحه.
يعني إنو كان مقبوض عليه وأطلق سراحه بضمان.
ما قال إنو سافر، لكن قال إنو غير ممنوع من السفر

يبقى ليه بعدها جاء كلام عن إستدعاءه بالإنتربول؟

متهم اتقبض في قضية كبيرة بالشكل ده ..
وبالثابتة واثباتاتو معاهو ..
فكيف لا يتم حظره من السفر ..
بنفس وقت الموافقة على اطلاق سراحه بضمان عادي ..
أو كما يقول الوزير الماعارف التكتح ..
دي ما قضية ساهلة والتهم مثبته على المتهم ..
فكيف يتم اطلاق سراحه ..
اليس هذا تضييع وتمييع للعدالة ..
اللذيذة سلموهو تلفونو ..
وعلى حسب ما سمعنا ..
انه الضابط القبضو ..
حتتم مساءلته على استخدام القوة المفرطة ..
يعني ناس المباحث شغلهم ..
بقى هسه تجسس وتحسس .. !! ..
الشغلة واضحة من الأول ..
والنية مبيتة لترك المتهم يهرب ..
لان هناك من يريد أن يحميه ..
بلد هاملة ومطلوقه في السهلة ساي ..
ده وزير داخلية شنو ده القاعد ساي ده ..