Post: #1 Title: يا جماعة السودان فيه شغل تقيل Author: Osman Musa Date: 10-13-2017, 06:23 AM Parent: #0
05:23 AM October, 13 2017 سودانيز اون لاين Osman Musa- مكتبتى رابط مختصر صحيح الدولة ما مساعدة وهمة الوزارات كحيانة و بنيات الطرق السريعة كعبة و الجبايات أشكال و ألوان . و المواني تعبانة وشحن الكاركو غير منتظم . و التهريب ما واقف . ووو إلا يا جماعة بي الجد في السودان في شغل تقيل . مشترين للسلع السودانية من تشاد و من دول جوار افريقية ومن ارتريا و الحبشة .
Post: #2 Title: Re: يا جماعة السودان فيه شغل تقيل Author: وضاحة Date: 10-13-2017, 07:34 AM Parent: #1
سلام يا ود موسي شغل زي شنو ؟
Post: #3 Title: Re: يا جماعة السودان فيه شغل تقيل Author: حيدر حسن ميرغني Date: 10-13-2017, 07:39 AM Parent: #2
Quote: من تشاد و من دول جوار افريقية ومن ارتريا و الحبشة .
التجارة دي لو ختت الجبايات والنهب المسلح مافي عوجة تب تخيَل تكون مشتري ZY بكم مليار وشاحنو بضاعة .. يطلعوا ليك طرازانات الخلا ويعدموك نفاخ النار أي كركبة يملوك رصاص زي بتاع اعدام ضباط الانقلابات
Post: #5 Title: Re: يا جماعة السودان فيه شغل تقيل Author: Abureesh Date: 10-13-2017, 08:16 AM Parent: #3
"صحيح الدولة ما مساعدة وهمة الوزارات كحيانة و بنيات الطرق السريعة كعبة و الجبايات أشكال و ألوان . و المواني تعبانة وشحن الكاركو غير منتظم . و التهريب ما واقف "
الكلام انتهى هنا.. شغل شنو مع الفساد وعدم الامن والإبتزاز
Post: #11 Title: Re: يا جماعة السودان فيه شغل تقيل Author: Osman Musa Date: 10-13-2017, 11:02 AM Parent: #5
الأخ أبوالريش سلام . والكلام برضو انتهي هنا . وبر ضو في شغل و تكون عامل حساب الحاجات . تحصل حاجات في شرق بروكلن و في بعض المدن الصينية و في ريودي جانير و و في مكسيكو سيتي و في السوق الشعبي أمدرمان . في كل إلمكانات دي يومي وكل دقيقة تحصل حاجات صعبة جدا جدا جدا بس في شغل ابن كلب . يعني لو ما رق للشغل تتوقع كل البلاوي . بلدنا دخل فيها الصيني و السوري و التركي و الصومالي و السعودي وكلهم عاملين فلوس الجن . و في ناس كتيرين عندهم أعمال ممتازة و شاعرين بالظلم و ما مشاركين في الفساد . القصة مش ساهلة كلو كلو . ودايرة صبر شديد . بس ممكن .
Post: #6 Title: Re: يا جماعة السودان فيه شغل تقيل Author: Osman Musa Date: 10-13-2017, 08:34 AM Parent: #3
الأخ حيدر سلامات نعم ده هو الحاصل ممكن يملوك جبخانة ولو عديت جيبك ح ينفخ .
Post: #4 Title: Re: يا جماعة السودان فيه شغل تقيل Author: Osman Musa Date: 10-13-2017, 08:13 AM Parent: #2
مجالات كتيرة يا دكتورة وضاحة مجالات لأحد لها . عندك شاب كان مندوب مبيوعات في شركة أدوية في نيويورك . عمل شركة صغيرة في امدرمان واشتغل توزيع أدوية بي فهم مختلف ومع الحظ . نبل فوق في سنتين . فوق شديد .. تحياتي
Post: #7 Title: Re: يا جماعة السودان فيه شغل تقيل Author: بشير حسـن بشـير Date: 10-13-2017, 08:35 AM Parent: #4
كلامك صاح يا عثمان
السودان فيه شغل تقيل
اوجه الدفه
شغل في الفساد والنهب والسرقه
يا أخوي لينا خمسه سنوات قاعدين متوهطين ومقابلين الحاجات ده البتقول عليه ده الا في حالات قليله
الغالبيه العظمي النجحت نجحت لظروف تانيه يا يكون عنده زول نافذ في الحكومه والشغل فيفتي فيفتي
يا يكون رباطي عديل كده والربط هو النهب المسلح في دارفور عندي مجلدات من النماذج ده معايشها يوم بيوم
يا يكون من ناس الدهب وما أقلهم لانه الموضوع بقي عند ناس الحكومه ومنسوبيها
آخرهم ناس حميدتي وموسي هلال
ده الموجود في السودان
مع التحيات
Post: #13 Title: Re: يا جماعة السودان فيه شغل تقيل Author: Osman Musa Date: 10-13-2017, 03:04 PM
الأخ بشير سلامات نعم يا بشير في كل شي ولابد انك تعمل حسابك من الجميع . ولا بد تتعلم تعرف تشتغل . في الأسبوع الفات ده في واحد من جنسية عربية اضرب 450 مليون دولار في فد عملية نصب . و بعدو تاني واحد من جنسية عربية تانية اضرب 250 مليون دولار . والضربو هرب الي ماليزيا .
Post: #8 Title: Re: يا جماعة السودان فيه شغل تقيل Author: أبوبكر عباس Date: 10-13-2017, 08:36 AM Parent: #4
فيهو شغل أعظم من دبي فيهو مشكلة واحدة لو قدرت تتصالح معاها أخلاقيا ببقى ما في أحسن منو للاستثمار
كيف تتخطى موظفي الحكومة والنافذين
Post: #9 Title: Re: يا جماعة السودان فيه شغل تقيل Author: محمد عبد الله الحسين Date: 10-13-2017, 08:51 AM Parent: #8
الأخ عثمان تحياتي اتفق معك يا عثمان فعلا فيه شغل تقيل..الكلام هذا من متابعة لصيقة مني و من معلومات من ناس يعملون في مجالات الأعمال المختلفة.. بس عشان ما يكون الكلام عام و مضلل لبعض من يودون الاستثمار...مش أي واحد ممكن يعمل في أي مجال أو يدخل تووووش و يفتكر نه حينجح.. طبعا هذا بغض النظر عن المعاكسات.... .و لعلمكم المعاكسات دي في الحاجات الكبيرة جدا.....مش الصغيرة زي المطاعم و الكافتيريات و وكالات السفر ....و السوبر ماركت لكن العايز يعمل بيزنس على قدر حالة في حدوةد 200 ألأو 300 مليون و ينتظر الربح و الفرج..فدي ما فيها مشكلة.. بعدين لاحظت الناس بي كلامهم عن معاكسات من بعض المترصدين بيخوفوا الناس الصغار من الاستثمار... ففي كلام عام زي ده أصبح من المسلمات رغم نه محدود في مجالات معينة زي التنقيب و الخدمات الوجستية ..إلخ
Post: #10 Title: Re: يا جماعة السودان فيه شغل تقيل Author: مني عمسيب Date: 10-13-2017, 09:06 AM Parent: #9
السودان فيه شغل وداير الشغل فعلآ .......... ولكن ! هذه هي العقبات بالنسبة للجميع الذين يريدون العمل وانا من ضمنهم :
_ الاحتكار لدرجة الحسد من قبل النافذين . _ الابتزاز والتعجيز من دفع ضرائب وغيره ! _ التهديد بالانتزاع تحت اي لحظة !
اقول ليك كلام ويشهد الله عندنا مزرعة حاولت اطورها ارسل معدات زراعية لانها هنا وفي الدول المجاورة لينا رخيصة جدآ تصدق سبقني احد الاخوة المعانا في المدينة كان شايل ليه معدات زراعية اضطر يرجعها تاني هنا ! لانه فرضو عليهو ضرائب اكتر من سعرها قال لي حسيت بانه الموضوع بقي ابتزاز ولوي يد عشان كدا فضل ارجعها . وكلنا في الصف اسه منتظرين عشان نطور بلدنا من ناحية زراعية . بس المشكلة كيف ومتين الله اعلم ! نسأل الله الفرج العاجل .
اها ماشين بعيد ليه ؟ اسمع المحن وسوء السمعة ! تفتكر تاني في زول بحاول يستثمر عندنا ؟ دا مستوي النافذين !
Post: #18 Title: Re: يا جماعة السودان فيه شغل تقيل Author: Osman Musa Date: 10-14-2017, 05:08 PM Parent: #10
بتنا م عمسيب سلامات . لابد من القفز فوق العقبات القلتيها دي . الناس تعلمت في الغرب والشرق وتسلحت بالطرق الحديثة للإدارة و الأعمال . لازم الناس تكون اقوي من العقبات واقوي من الفساد . البلد فيها فرص كتيرة .
Post: #16 Title: Re: يا جماعة السودان فيه شغل تقيل Author: Osman Musa Date: 10-13-2017, 10:12 PM Parent: #9
الأخ محمد عبدالله سلامات . والف شكر علي الكلام المفيد . اتخيل أي زول لو جرب حتي لو خسر برضو بكون كسب معرفة الحاصل وكسب القعاد الجميل مع الاهل . وطبعا ممكن يكسب فلوس كتيرة جدا و ممكن يز هج . و ممكن يمرض . بعد ده كلو ح يلاقي الحياة في السودان حلوة وبي بلاوي فرش الطماطم في الدلجة . هههههها
Post: #14 Title: Re: يا جماعة السودان فيه شغل تقيل Author: Osman Musa Date: 10-13-2017, 05:49 PM Parent: #8
الأخ أبوبكر عباس سلامات . السودان نعم فيه موارد كثيرة جدا لكن يا اخ أبوبكر الأعمال في إمارة دبي منسابة بي صورة فريدة . دبي من أكثر البلدان المحظوظ وحكومة دبي حكومة قلبها علي البلد وجادة في الاستمرار في التنمية و في النهضة .
Post: #19 Title: Re: يا جماعة السودان فيه شغل تقيل Author: Asim Ali Date: 10-14-2017, 11:44 PM Parent: #14
سلامات الشغل الجد فى بلد زى السودان لازم يكون شغل انتاج حقيقى لموارد البلد الطبيعيه والصناعه القائمه عليها ومحمي بالقانون. خلاف ذلك انشظه طفبلبه مترهله اصابت البلد بالغلاء الطاحن والمهن الهامشيه ...الكل داير يتاجر ويكون وسيط (سمسار) . اذن الكلام عن شغل جد ...قصدك اعمال تجاريه تدر مبالغ ..طيب ....وين حجم الزراعه والثروه الحيوانيه وصناعاتها البتخلى البلد فيها شغل جد ؟ اذا كان الخضروات غاليه وبعضها يستورد من بره البلد ......دا ياهو الشغل الثقبل ؟!!!! . الشغل الثقيل نستورد مايمكن ان ننتجه من ارضنا ؟؟!!!! خلينا واقعيين نتكلم عن الحال بصدق ووضوح طالما المواطن يعانى من الغلاء والندره فى بعض الاشياء ..دا معناهو مافى شغل حقيقى وانما امتصاص دماء الغلابه باسم التجاره وبمعاونه الوسطاء (السماسره) . . رغبت بالمشاركه كمواطن من الداخل واكتفى بما ذكرت وامسك عن الكثير. وشكرا
Post: #22 Title: Re: يا جماعة السودان فيه شغل تقيل Author: Osman Musa Date: 10-15-2017, 05:08 PM Parent: #19
الأخ عصام سلامات . نعم شغل ليهو ضل وفي مجالات كتيرة بس تحتاج لي رأس مال وتعمل مليون حساب لي رأس مالك . عشان رأس مالك لو طار معناتو رأسك طار ؟
Post: #12 Title: Re: يا جماعة السودان فيه شغل تقيل Author: وضاحة Date: 10-13-2017, 11:24 AM Parent: #4
كيف قدر يدخلها السودان من امريكا انا حاولت أشحن معاي أدوية لما رجعت من كندا بعد مليت الفورمات في الشركة قالوا لي ماشة وين الأدوية دي قلت ليهم السودان مستشفي الزرة للطفال العندهم كانسر رفضوا قالوا لي السودان من الدول المحظورة والشركة بتاعت الشحن طلعت شركة أمريكيا
Post: #15 Title: Re: يا جماعة السودان فيه شغل تقيل Author: جمال ود القوز Date: 10-13-2017, 06:14 PM Parent: #12
أكيد الشغل موجود وأبوابه كتيرة .. لكن الحكومة خارباهو .. بي ضرائبها وجباياتها الكتيرة .. تشتغل لامن عينك تطلع .. ويجي فيل ضرائب الحكومة .. يدوس على جل مكاسبك .. ولايترك لك الا الفتافيت .. التي لا تسمن ولا تغني من جوع .. وحتى ان بقت مكاسبك معقوله .. انت ما بترضى زول يغبنك .. ويستولي على كل أرباحك اوانطة .. وهو قاعد تحت المكيفات وانت شقيان انت ماشايف الناس تركت الزراعة .. وهجرتها كيتن في الحكومة .. لانك كمزارع بتلقى نفسك مارق مديون .. او لو خلاص الموسم جايب همه .. بتقدر تسدد ديونك وتقعد معلّم الله ... الحكومة أكبر سمسار غشيم .. تديهو يبيع بيتك يديك سعر ميت .. يا تمشي ليهو البيعة ياما حتلقى مشتري .. السوق تم الاستيلاء عليه بقوة النظام .. وتم توزيعه زي المرارة للمحاسيب والارزقية .. صاحبي ضرب معاهو اللوتري قبل سنين .. نصحته ما يمش ضحك من كلامي .. مشى هناك قعد سنتين وجا حانف وشيهو .. قلت ليهو مالك جيت راجع !.. قال لي شقيان وجاري زي المجنون .. من صباح ابوفاطنة لامن عشيه .. واجي آخر الشهر ألقى معاي حاجةً ميتة .. وانا اصلا ما عايز جواز امريكي .. ولاتبهرتي عيشة الغرب زي ما عارف .. تاني البيقعدني هناك شنو ؟ .. يبقى لو مافي مكسب معتبر .. يرد لك جزء من شقاك وتعبك .. المخارجة بتكون أحسن .. على الأقل الزول يكسب زمنه ..
تقديري يا عثمان .. وربنا يوفقك .. وتجارة مباركة باذن الله .. بعدين صدقني رغم قساوة الحياة .. القعاد جنب الاهل ما شيتن ساهل .. لازم تحسب ليهو قيمة .. وقيمة معتبرة كمان ..
Post: #17 Title: Re: يا جماعة السودان فيه شغل تقيل Author: Muhib Date: 10-14-2017, 03:49 AM Parent: #15
الاخت وضاحه بعد رفع الحصار بعض الاشياء تغيرت ومن موقع السفاره الامريكيه في الخرطوم في لنك مهم للخزانه الامريكيه وفيه توضيح لهذا التغيرات
Post: #20 Title: Re: يا جماعة السودان فيه شغل تقيل Author: أحمد الشايقي Date: 10-15-2017, 09:34 AM Parent: #17
يا عم عثمان شكرا كتير
نعم البلد فيها شغل وهناك مجال انشغل عنه الكثير من السودانيين بينما هو الأساس في التجارة
في كل العالم وهو العمل من خلال تكوين شركات متخصصة
الشركات السودانية من الصعب قيامها ومن الصعب عملها ومن الصعب جدا جدا استمرارها
تصور كل اغتراب السودانيين فيما فوق الــ 50 سنــة لم يكون عدد من الشركات تفوق أصابع
اليد الواحــدة ومع قلتها فمعظمها انهار
الآن توجد فرصة للمواطنين الأمريكان مثلا من اصل سوداني ان يقوموا بتكوين شركاتهم والقدوم
مع الشركات الامريكية في حماية الزخم الاستثماري الأمريكاني
مع استصحاب أموال من الخليج فمعظم المغتربين في الخليج ليس لهم مواعين استثمارية لمدخراتهم
عندنا تجربة بدأت مع هذا المنبر وخبرنا فيها الكثير من الخبرات وهي مع كل المعاكسات ناجحة
والحمد لله تعالى ..
أحمد الشايقي
Post: #21 Title: Re: يا جماعة السودان فيه شغل تقيل Author: محمد إبراهيم علي Date: 10-15-2017, 09:50 AM Parent: #20
كلامك صاح يا عثمان لكن للداير يشتغل قبل يومين في الجرايد قالو تحويلات الاجانب (مقصود السوريين والاتراك) الشغالين في منتجات الاسمنت (البلوك) تحويلاتهم الشهرية 100 مليون دولار اها دي شغلة لا بنافسك فيها نافذ ولا دايرة واسطة كبيرة في مدن ما فيها مصانع بلوك ولا قريب منها بيجيبو من الخرطوم ثانيا التشاديين بقو مصدر دخل رهيب لكثير من التجار وكثير من الاطباء والدفع بالدولار كاش اعرف طبيب اسنان بقو يتصلو عليهو من تشاد للحجز قال لي بقيت ما عايز اشتغل مع السودانيين زاتو ههههه اليوم داك فكرت قلت لو في واحد تفتيحة مشى فتح ليهو مستوصف راقي في الجنينة بيغنى (لو ختا ناس الجلا جلا والجنجويد) هههه
Post: #27 Title: Re: يا جماعة السودان فيه شغل تقيل Author: Osman Musa Date: 10-18-2017, 05:58 AM Parent: #15
الأخ كابتن القوز سلامات شغل كتير جدا فاتح لكن مرات مع كثرة الجبايات و الحكومة دي تحس بي انك زي الشغال تحت كفيل سعودي و زي الممكن الكفيل ده يقوم يكاوش الأشغال بتاعتك كلها و يسجلها في أسمو . يعني لازم يكون في تغيير في طريقة جمع الجبايات . في شغل كتير بس التجار تعبانينن جدا من سياسات المحليات
Post: #28 Title: Re: يا جماعة السودان فيه شغل تقيل Author: عليش الريدة Date: 10-18-2017, 06:13 AM Parent: #27
يوم راكبلي في جامبو شايل بصل موديهو القلابات..السواق ولد صغير عمرو 26سنة.. اها، خاتيليهو رزمتين بتاعات قروش،واحدة فيها خمسات والتانية عشرات.. مشينا بطريق الدامر،الخرطوم،مدني ،القضارف ،القلابات... كان في نقاط كتيرة جدا على الشارع الطويل دا... قدر مانقرب لي نقطة الشاب دا بطلع ورقة من الرزمة دي او ديك... بقولي مثلا:ديل حبوبين بقبلوا بالخمسة...او ديل شومين مابرضو إلاّ بالعشرة... انا كل مرة أقول في سري ،إن شاء الله يلم فيهو واحد يفتح فيهو بلاغ بتاع رشوة،لكن هيهات... بعد مااتعشينا في حنتوب وتحركنا،سألتو :هل في زول قبل كدا رفض يشيل منك؟ قالي بعفوية:لا.. تاني استدرك:آي والله،واحد كدا قبل سنتين... لما وصلنا بوابة القلابات الرزمتين خلصن... لما خشينا القلابات لقيت في شارع كاتبين عليهو:شارع الزاكي طمل... المشوار دا كان فرصة مواتية لتجديد الأحزان...
Post: #23 Title: Re: يا جماعة السودان فيه شغل تقيل Author: Osman Musa Date: 10-17-2017, 12:58 PM Parent: #12
دكتورة وضاحة سلام حاولي موضوع الشحن تاني .
Post: #24 Title: Re: يا جماعة السودان فيه شغل تقيل Author: الحاج حمد الحاج Date: 10-17-2017, 01:10 PM Parent: #23
الاخ عثمان موسى
تحياتي ، فعلا في شغل تقيل و تحويلات الاجانب من سوريين و اتراكأصبحت مبالغ كبيرة.
الحكاية تحتاج لتريث و دراسة نوع النشاط المناسب و الصبر.
متابع..شكرا
Post: #25 Title: Re: يا جماعة السودان فيه شغل تقيل Author: أيمن محمود Date: 10-17-2017, 01:48 PM Parent: #24
اغلب السودانيين ما بتاعين شغل كسالى
Post: #26 Title: Re: يا جماعة السودان فيه شغل تقيل Author: علي عبدالوهاب عثمان Date: 10-17-2017, 05:55 PM Parent: #25
حبيبنا عثمان مع التحية .. عندنا في الشمالية بعد دنقلا شرق النيل هناك اراضي شاسعة للاستثمار الحكومة تسمح للمستثمر المحلي بأي عدد من الافدنة ولكن المشكلة كانت في كيفية حفر الابار ناس شركة زادنا كانوا عندهم حفارة واحدة وبطيئة جداً ومكلفة جداً .. لأن الحفر يكون إلى عمق 170 م وأكثر أحياناً .. جاء أحد السوريين ووضع حفارة تقريباً منطقة القولد واخرى قصاد السليم والثالثة في منطقتنا قصاد البرقيق تكلفة الحفر حتى المياه والتركيب حوالي 40 - 50 مليون جنيه ( يساوي حوالي 10 الف ريال ) إبن عمي لديه مشروع هناك وهو في جدة .. قال أنه تبادل الحديث مع السوري وإجابه السوري 50 مليون يساوي 10 الف ريال سعودي ويمكن له حفر أربعة آبار في الشهر .. يعني دخله 40 ألف ريال في الشهر وقال مشكلته تكمن في توفير العمالة وعدم الانضباط في العمل .. وديل شباب بلدنا
صدق أيمن محمود .. ما ناس شغل .. ما عليهم إلا يحكوا ليك قصة نجاح السوري ويصورونه كبطل ..
شكراً عثمان موسى بوست حيوي .. بإختصار نحن ما ناس إنتاج نحن سمسرة Easy Money مودتي مرة أخرى .. بوست مفيد ..
