Post: #1
Title: ماذا يحدث في سوق العقار في الخرطوم
Author: بدرالدين بابكر مصطفى
Date: 09-21-2017, 08:31 AM
Parent: #0
07:31 AM September, 21 2017 سودانيز اون لاين
بدرالدين بابكر مصطفى-مكة المكرمة
مكتبتى
رابط مختصر أمس قابلني أحد الأصدقاء ..
حكى لي قصة غريبة ..
قال لي أخوانو مشوا يشتروا بيت جنوب الخرطوم وقابلوا سيد البيت واتفقوا على سعر محدد
السعر كان (200) ألف جنيه .. يعني 200 مليون
والراجل وافق .. واتفقوا على إنهم يجوا بعد يومين تلاتة يجيبوا قروشهم ويمشوا المحامي
لامن جابوا قروشهم وجو .. قابلهم واحد سمسار وقال لهم البيت بي 600 ألف
والبيت جايب السعر دا .. وإنتو ما دفعتو عربون عشان كدي بيعتكم ما بتتم
الحاصل شنو ؟؟؟
بيت من 200 يصل لي 600 في ظرف اسبوع واحد ؟؟؟ علماً إنو البيت يعتبر في الأطراف يعني ما في حتة قريبة
|
Post: #2
Title: Re: ماذا يحدث في سوق العقار في الخرطوم
Author: walid taha
Date: 09-21-2017, 09:20 AM
Parent: #1
| Quote: اتفقوا على إنهم يجوا بعد يومين تلاتة يجيبوا قروشهم |
يومين تلاتة والبيت تمنو 200 مليون وفي جنوب الخرطوم!!!!
والله ديل أتأخرو تأخير !!!
|
Post: #3
Title: Re: ماذا يحدث في سوق العقار في الخرطوم
Author: الحاج حمد الحاج
Date: 09-21-2017, 09:34 AM
Parent: #2
| Quote: يومين تلاتة والبيت تمنو 200 مليون وفي جنوب الخرطوم!!!! |
walid taha يقصد ليك الكلام دا كلو هضربة !! ما في بيت جنوب الخرطوم بي 200 مليون و ما في بيت بي 200 مليون بعد يومين تلاتة بقى بي 600 مليون !!غايتو اتأخروا جنس تأخير أو كما قال الأخ walid taha !!!عنوان البوست جاذب الناس تقول يمكن نلقى لينا معلومة مفيدة تفسر ما يحدث في سوق العقار في الخرطوم !! يجو يلقوهو بيت بي 200 مليون بس و بعد يومين تلاتة بقى بي 600 مليون !! غايتو جنس غايتو!!
|
Post: #4
Title: Re: ماذا يحدث في سوق العقار في الخرطوم
Author: shaheen shaheen
Date: 09-21-2017, 09:51 AM
Parent: #3
انهيار العملة السودانية الذى لا يتوقف دفع الناس لشراء الاراضى والعقارات للمحافظة على قيمة العملة .
هذا التدافع خلق هذا الارتفاع الجنونى .
ولا توجد خطط اقتصادية من الدولة لامتصاص السيولة النقدية عند البعض , لا مشاريع تجارية محمية من عبث الجبايات التركية الظالمة .. لا بورصة نشطة .. لا ودائع بنكية بارباح عادلة ( يتبعون نظام اسلامى فى المعاملات البكنية يُعطل النظام الراسمالى المتبع ) .
عمالة اكثر من الطلب .. تتجه نحو السمسمرة والمضاربة على الاراضى كوسيلة ليست للثراء فقط , وانما لاكل العيش .
السودان يتجه نحو السيناريو الصومالى , ونحو السيناريو اليونانى , على صعيد الاقتصاد .
تنتظرنا ايام قاسية .. ايام يأكل فيها الناس لحوم الناس بالمعنى الحرفى للعبارة .
|
Post: #5
Title: Re: ماذا يحدث في سوق العقار في الخرطوم
Author: سيف اليزل الماحي
Date: 09-21-2017, 10:10 AM
Parent: #4
.
Quote: قال لي أخوانو مشوا يشتروا بيت جنوب الخرطوم وقابلوا سيد البيت واتفقوا على سعر محدد
السعر كان (200) ألف جنيه .. يعني 200 مليون
والراجل وافق .. واتفقوا على إنهم يجوا بعد يومين تلاتة يجيبوا قروشهم ويمشوا المحامي
لامن جابوا قروشهم وجو .. قابلهم واحد سمسار وقال لهم البيت بي 600 ألف |
يابدر ياحبيب
ياخي كلم اخوانك يرجعوا ليك الـ ٢٠٠ مليون بتاعتك، انت بتشتري بيوت من ورانا؟!!
صاحبك بيسلم عليك.
.
|
Post: #6
Title: Re: ماذا يحدث في سوق العقار في الخرطوم
Author: عمر دهب
Date: 09-21-2017, 10:17 AM
Parent: #5
سلام بدر مافى بيت بمبلغ ٢٠٠ فى كل العاصمه قطعه ارض ممكن بعد عد بابكر فى بحرى ممكن قطعة ارض فى اقصى طريق الشماليه ممكن
|
Post: #7
Title: Re: ماذا يحدث في سوق العقار في الخرطوم
Author: جمال ود القوز
Date: 09-21-2017, 10:23 AM
Parent: #6
ما أظن في بيت بالمبلع ده يابدر ..
أكيد سيد البيت ده غلطان ..
في ياتو حي جنوب الخرطوم ..
|
Post: #8
Title: Re: ماذا يحدث في سوق العقار في الخرطوم
Author: بدرالدين بابكر مصطفى
Date: 09-25-2017, 06:47 AM
Parent: #7
يا جماعة والله الزول دا قال لي البيت في الدخينات .. وأظن الدخينات دي قريبة من الكلاكلة ..
والبيت أكيد ما بكون بيت زي البيوت البتقولو عليها .. المدهش في الموضوع والقاصدو أنا إنو السماسرة ممكن يرفعوا السعر لأضعاف مضاعفة عدة مرات
ومعظم الأسعار الفي سوق العقار دي السماسرة زايدنها كوز
يعني مثلاً بيت بي مليار ونص لو قابلت سيدو مباشرة ممكن يديك ليهو بي مليار
|
Post: #9
Title: Re: ماذا يحدث في سوق العقار في الخرطوم
Author: بدرالدين بابكر مصطفى
Date: 09-25-2017, 06:50 AM
أما حكاية إنو مافي بيت بي 200 في الخرطوم
في أحياء الأسعار فيها لسع في الرينج دا .. قد تكون لسع ما فيها شهادة بحث
زي دردوق مثلاً
لأنو يمكن دي الحتة الوحيدة البعرف فيها أسعار العقار .. الحقيقة هي المنطقة البتهمني لأني أملك فيها قطعة ما معروف أسع البقى عليها شنو
|
Post: #10
Title: Re: ماذا يحدث في سوق العقار في الخرطوم
Author: بدرالدين بابكر مصطفى
Date: 09-25-2017, 06:53 AM
Parent: #9
*******
يابدر ياحبيب
ياخي كلم اخوانك يرجعوا ليك الـ ٢٠٠ مليون بتاعتك، انت بتشتري بيوت من ورانا؟!!
صاحبك بيسلم عليك.
********
والله ياسيف كان حقتي ما أدخلا في عقار في الخرطوم أصلاً ..
عندي أرض زراعية في البسلي .. بمشي أعمرا وأقعد فيها وأحلب بقراتي وأبيع لبنن وأسوي لي راكوبة أقعد في ضلها ..
مالي ومال الزحمة والضيق والقمامة ... ياخ نفسك دا إلا تلاوي ملاواة حتين تلم فيهو
أصلاً ما عندي رغبة أسكن في الخرطوم
|
Post: #11
Title: Re: ماذا يحدث في سوق العقار في الخرطوم
Author: سيف اليزل الماحي
Date: 09-25-2017, 07:35 AM
Parent: #10
.
| Quote: عندي أرض زراعية في البسلي .. بمشي أعمرا وأقعد فيها وأحلب بقراتي وأبيع لبنن وأسوي لي راكوبة أقعد في ضلها |
مافي عز أحسن من كده، وبيني وبينك عمرنا اتسرق، وماتبقى يحتاج لشيء من الهدوء، يبدو اننا سننتظر كثيرا حتى تنفض الخرطوم هذا العنت عن كاهلها!
نحنا أولادها مجبورين ننتظر، لكن انتو ياعيال الريف "الحبيب" مافي حاجة تجبركم على الأذى والضيم، أزرعو زراعتكم وأحلبو بقراتكم والزارعها الله في الخرطوم تقوم، بس اللبن ما تزيدو موية!
ههههههههه جات على خاطري قصيدة:
أيها العمال أفنوا العمر كدا واكتسابا *** واعمروا الأرض فلو لا سعيكم أمست يبابا
وقت دراستها قلت للأستاذ: دي قسمة غير عادلة يعني العمال المساكين ديل يقضوا عمرهم كلو في الكد والصعاب والباقين ياكلوا ويشربوا؟
قال لي اها انت رايك شنو؟
قلت ليهو: والله يا استاذ أمست يبابا ولا صبحت يماما، هذه ليست مسئوليتهم، يشتغلوا قدر قدرتهم ويتخارجوا!
أنا يا صاحبي أخشى عليك ان تفني العمر كدا مع زباين لايستحقون .
ههههههههههه
.
|
Post: #12
Title: Re: ماذا يحدث في سوق العقار في الخرطوم
Author: محمد مجيدو
Date: 09-25-2017, 07:45 AM
Parent: #1
بد الدين وضيوفك .. سلام
في حي الاندلس جنوب الخرطوم ممكن تلقى قطعة ارض مطرفة بــ 200 مليون ...
و 600 مليون في الازهري وما جاورها ...
عاالم بطاالـــــــــــــة ,,
|
Post: #13
Title: Re: ماذا يحدث في سوق العقار في الخرطوم
Author: مازن فيصل هلال
Date: 09-25-2017, 07:57 AM
Parent: #12
طيب انا بسال عن شقة مشطبة و 3 غرف و صالة و مطبخ و حمامين لو في الفيحاء او الاندلس او النصر من المالك مباشرة ممكن تكون في حدود كم ؟!
|
Post: #14
Title: Re: ماذا يحدث في سوق العقار في الخرطوم
Author: بدرالدين بابكر مصطفى
Date: 09-25-2017, 11:35 AM
Parent: #13
الأخوة مجيدو وشاهين ومازن (صديقنا زمان)
والله للأسف ما عندي فكرة عن أسعار العقارات .. بس القصة دي لفتت نظري لأفعال السماسرة وجشعهم .. وقلت يمكن الغلاء الحاصل في العقار دا يكون سببه السماسرة ديل
يعني الزول ممكن ينفرد بي سيد عقار براهو قبال يعرفو السماسرة يشتري منو بيت بي سعر معقول
لأنو لو حسبت النسبة بتلقى ربح السماسرة حوالي 80% وسيد الحق بجيهو 20% فقط
وبما إني متفائل قلت في سري أي بيت في الخرطوم سعرو يساوي 20% من المعلن
عموماً أنا ما عندي نية اشتري ولا اسكن الخرطوم وإن جبرتني الظروف بشوف لي حتة طريف كدي اتلم فيها مع وليداتي
بعدين نحن ناس خلاء ساي وضهاري عندنا مثل بقول البيت الضيق زي المركوب الضيق
والخرطوم دي كلها بيوتا جخانين وضيقات .. الواحد لو داير يتقلب ساكت إلا يطلع برة يتقلب ويرجع تاني
وتحياتي مثنى وثلاث ورباع
|
|