سورة الطلاق _التحريم_المجادلة الخ الخ ؛؛؛؛؛

05:22 AM September, 19 2017

سودانيز اون لاين
علي دفع الله-سنار
مكتبتى
رابط مختصر

ابنتي تدرس في الصف الرابع اساسى.
والإمتحانات يوم الاربعاء الجايي.
جيت من الشغل المساء لقيتا مبوزة
مالك حبيبتو (لقبها لانها واحدة وسط شرامة 😂)
بابا انا عندي تلاتة سور ما حفظتهن
والامتحانات قربت .
طيب يا بتي تلاتة سور ما حفظتيهن ولسع دي الفترة الاولى يعني عندكم كم سورة .
بكت وقالت لي كتااار .
طيب ما تراجعك ليك امك
قالت لي ماما ولدها الصغير عيان قالت ما فاضية.
خلاص هسي براجعن ليك
بس خليني اتغدي
قالت لي نبداء بي سورة الطلاق .
كب انا اخو الطلاق جيبي الكتاب .
نواصل ؛؛؛

Quote: ابنتي تدرس في الصف الرابع اساسى

Quote: قالت لي نبداء بي سورة الطلاق

ياخي معقولة دي؟؟؟

في رابع .. يعني اطفال .. ويدرسوهم سورة الطلاق؟؟؟!!!!!

اسع ديل يعرفو شنو للطلاق والفايدة شنو من تدريس اطفال

لسورة تحمل احكام وتشريعات للبالغين؟؟

اما كان الاولى ارجاءها الى ان يصلوا المرحلة العمرية المناسبة؟؟

غايتو الوضع السورة دي في مقرر صف رابع دا بالغ وشذة


تحياتي لك علي وللأمورة بنيتك

اي والله يا هيثم معقولة ونص وخمسة بالله مش ببالغو
يا اخي الشفع نايمين يهدربوا بالحفظ

وهم بذلك مفتكرين الجيل دا حا يقود العالم !!
تحياتي يا فردة

الاخ علي دفع الله تحياتي. جلسنا لامتحان الشهادة السودانية عام 1972. من من ثالثة ثانوي (اصبحت ثانية ثانوي بعد تعديل السلم التعليمي) تم تقسيمنا الى ثلاثة تخصصات، ادبي و علمي احياء و علمي رياضيات. في امتحان الشهادة لم تكن المواد الاتية ضمن ورقات الامتحان لقسمي الاحياء و الرياضيات (التاريخ و التربية الاسلامية و البلاغة و النحو و القواعد و المحفوظات). نحن في قسم العلمي رياضيات ندرس رياضيات اولية و رياضيات اضافية. الرياضيات الاولية تشمل الهندسة التحليلية و الجبر و حساب المثلثات. الرياضيات الاضافية تشمل التكامل و التفاضل و الاستاتيكا و الديناميكا و مستوي اعلى من الهندسة التحليلية. كان نظاما رائعا و اتي بجيل مميز من الادباء و المهندسين و الاطباء و العلماء. تصور يا علي كان عندي ولدين بجامعة الخرطوم احدهم في كلية الهندسة و واحد في كلية الطب. جلسا لامتحان التربية الاسلامية و كان من ضمن اسئلة الامتحان (اذكر نواقض الوضوء). واهم و غائب عن الوعي من يعتقد ان مقررات الدراسة في عهد الانقاذ يمكن ان تخرج لنا جيلا مؤهلا. الانقاذ بقيت لانها اوصدت باب المع فة.

يا ابوعلوة
ازيك
من ديك وعيك
وما قلتا لي
جافر
وانت اسا جافل
عارف سورة الطلاق أهم سورة في بناء الاسرة
مفروض تدرس كجزء من امتحان الشهادة السودانية
لأنو بكون ابناؤنا اكثر وعياً
ونحن في السودان ما بنعمل باحكام الطلاق الصحيحة
لأنو لا يكون الطلاق صحيحاً إلا أن تتوفر فيه الشروط التالية:
شهودين عدلين
أن يبعثوا حكماً من اهله وحكماً من اهلها أن يريدا اصلاحاً يوفق الله بينهما
أن تكون المرأة على طهر لم يجامعها زوجها بعد طهرها
أن يلتفظ بلكة الطلاق وليس بمعني الطلاق وامام الشهودين
ان تمضي المرأة عدتها في بيتها ولا تخرج منه ولا يخرجها زوجها من بيتها
وان يكون الفراق باحسان
والله دينا دين حلو عديل كدا
بس عاير تغبهم و فهم ومن يفهم
اسا اي واحد يقول للمراة انت طالق تلفح توبا وتمشي بيت ابوها
وكان قعدت المسكينة
يقول ليها المقعد شنو قومي غوري

يا علي عليك قول كلام يدخل العقل
أنا مامصدق الطلاق والتحريم والمجادلة حفظ غيبي على رابعة أساس ؟؟؟؟؟؟؟؟؟
يازول نحن زمان في رابعة درسنا التكوير وعبس وتولى والنبأ والبروج ,

Quote: يا علي عليك قول كلام يدخل العقل

حبيبنا الشغيل
طول بالك
الراجل لسة ما كتب حاجة

علي تحياتي
بدرالدين كيف ؟

عماد يا حبوب
بدر حرق تش وبقى عال العال
شاكر مرورك يا صديقي

الشغيل يا حبيب
شفت مداخلتك بي قوم لف 😂😂
لكن وحات النبي دا الحاصل اها رايك شنو؟
مودتي يا صديقي

ول ابا علي..حبابك يا صديقي
كامل التضامن معاك يا قريبي..

كتب صديقنا هيثم غالي:

Quote: ياخي معقولة دي؟؟؟

والله يا هيثم يا صديقي ، شغلانة تموخل..وكتر خير صديقنا علي دفع الله ، من زمان داير ابحث عن الحاجات دي لكن قاعد انسى طوالي..وفاقد لي مدخل..

هل تصدق يا هيثم..دي مناهج الصف الرابع اساس:

اولا: القران الكريم (كتاب 29 صفحة) والسور المقررة: المجادلة ، الحشر ، الممتحنة ، الصف ،الجمعة ، المنافقون ، التغابن ، الطلاق ، التحريم..
ثانيا: كتاب الفقه (97 صفحة ، يبدأ بالآيات (95-99) سورة الأنعام)
ثالثا: كتاب المنهل (255 صفحة)
رابعا: كتاب الرياضيات (196 صفحة)
خامسا: كتاب مسكننا (173 صفحة)
سادسا: كتاب الأرض بيئة الحياة/الإنسان والكون (174 صفحة)..

لاحظ الطفل/ة مفروض يمر على كل المقررات دي ومطلوب منو ينجح؟..مع انو ده عمر اللعب والطفولة الجد..فهل اطفالنا سرقت طفولتهم؟..

كبر

المناهج محتاجة لمراجعة، مراجعة حقيقة
لا تبنى على الحاد او ايمان او اصطياد في المياه العكرة.

مرحب بأخونا الأنسان أبوعلوة

ياخي الواحد يشفق علي صغارنا وحظهم العاثر الرماهم في زمن بطال ومتخلف!!
تعليم الأديان للأطفال يعتبر جريمة في حقهم لايضاهيه جريمة أخري!!0
لأنك تقتل فيهم روح البراءة المصاحبة للدهشة وتقتل فيهم ملكةالإبداع
والعطاء بتخويفهم بأشياء غيبية لا أنت ولا حكومتك بوزارة التربية والتعليم متأكددين
من صحتها بل هي تجارب خالصة لغيركم !!0

تعليم الدين للأطففال جريمة نكراء وقريبا بإذن الله سيتم تضمينه بمواثيق الأمم المتحدة
بتحريمه وجعله ضمن وثيقة ال Child Abuse بل هو أكثر Abuse من غيره!!0

تضامني اللامحدود لحبيبتو ولأي طفل أخر يمر بهذه المحنة,0

محمد ادم يا صديقي
فعلا الواحد بشفق علي هؤلاء الصغار .
وزي ما قلت الحفظ المربوط بالثواب والعقاب بقتل روح الابداع والخلق .
اصبحو كما الروبوتس يسحن راسو بي كلام يفرغو في ورق وهكذا .
ودا في كل المواد مش القراءن والفقه
منهج باءيس
مودة عميقة يا صديقي

المهم
قعدت اقري فيها وهي تردد وراي
----------------------------------

بسم الله الرحمن الرحيم

يَا أَيُّهَا النَّبِيُّ إِذَا طَلَّقْتُمُ النِّسَاء فَطَلِّقُوهُنَّ لِعِدَّتِهِنَّ وَأَحْصُوا الْعِدَّةَ وَاتَّقُوا اللَّهَ رَبَّكُمْ لا تُخْرِجُوهُنَّ مِن بُيُوتِهِنَّ وَلا يَخْرُجْنَ إِلاَّ أَن يَأْتِينَ بِفَاحِشَةٍ مُّبَيِّنَةٍ وَتِلْكَ حُدُودُ اللَّهِ وَمَن يَتَعَدَّ حُدُودَ اللَّهِ فَقَدْ ظَلَمَ نَفْسَهُ لا تَدْرِي لَعَلَّ اللَّهَ يُحْدِثُ بَعْدَ ذَلِكَ أَمْرًا

فَإِذَا بَلَغْنَ أَجَلَهُنَّ فَأَمْسِكُوهُنَّ بِمَعْرُوفٍ أَوْ فَارِقُوهُنَّ بِمَعْرُوفٍ وَأَشْهِدُوا ذَوَيْ عَدْلٍ مِّنكُمْ وَأَقِيمُوا الشَّهَادَةَ لِلَّهِ ذَلِكُمْ يُوعَظُ بِهِ مَن كَانَ يُؤْمِنُ بِاللَّهِ وَالْيَوْمِ الآخِرِ وَمَن يَتَّقِ اللَّهَ يَجْعَل لَّهُ مَخْرَجًا

وَيَرْزُقْهُ مِنْ حَيْثُ لا يَحْتَسِبُ وَمَن يَتَوَكَّلْ عَلَى اللَّهِ فَهُوَ حَسْبُهُ إِنَّ اللَّهَ بَالِغُ أَمْرِهِ قَدْ جَعَلَ اللَّهُ لِكُلِّ شَيْءٍ قَدْرًا

وَالَّلائِي يَئِسْنَ مِنَ الْمَحِيضِ مِن نِّسَائِكُمْ إِنِ ارْتَبْتُمْ فَعِدَّتُهُنَّ ثَلاثَةُ أَشْهُرٍ وَالَّلائِي لَمْ يَحِضْنَ وَأُوْلاتُ الأَحْمَالِ أَجَلُهُنَّ أَن يَضَعْنَ حَمْلَهُنَّ وَمَن يَتَّقِ اللَّهَ يَجْعَل لَّهُ مِنْ أَمْرِهِ يُسْرًا

ذَلِكَ أَمْرُ اللَّهِ أَنزَلَهُ إِلَيْكُمْ وَمَن يَتَّقِ اللَّهَ يُكَفِّرْ عَنْهُ سَيِّئَاتِهِ وَيُعْظِمْ لَهُ أَجْرًا

أَسْكِنُوهُنَّ مِنْ حَيْثُ سَكَنتُم مِّن وُجْدِكُمْ وَلا تُضَارُّوهُنَّ لِتُضَيِّقُوا عَلَيْهِنَّ وَإِن كُنَّ أُولاتِ حَمْلٍ فَأَنفِقُوا عَلَيْهِنَّ حَتَّى يَضَعْنَ حَمْلَهُنَّ فَإِنْ أَرْضَعْنَ لَكُمْ فَآتُوهُنَّ أُجُورَهُنَّ وَأْتَمِرُوا بَيْنَكُم بِمَعْرُوفٍ وَإِن تَعَاسَرْتُمْ فَسَتُرْضِعُ لَهُ أُخْرَى

لِيُنفِقْ ذُو سَعَةٍ مِّن سَعَتِهِ وَمَن قُدِرَ عَلَيْهِ رِزْقُهُ فَلْيُنفِقْ مِمَّا آتَاهُ اللَّهُ لا يُكَلِّفُ اللَّهُ نَفْسًا إِلاَّ مَا آتَاهَا سَيَجْعَلُ اللَّهُ بَعْدَ عُسْرٍ يُسْرًا

وَكَأَيِّن مِّن قَرْيَةٍ عَتَتْ عَنْ أَمْرِ رَبِّهَا وَرُسُلِهِ فَحَاسَبْنَاهَا حِسَابًا شَدِيدًا وَعَذَّبْنَاهَا عَذَابًا نُّكْرًا

فَذَاقَتْ وَبَالَ أَمْرِهَا وَكَانَ عَاقِبَةُ أَمْرِهَا خُسْرًا

أَعَدَّ اللَّهُ لَهُمْ عَذَابًا شَدِيدًا فَاتَّقُوا اللَّهَ يَا أُولِي الأَلْبَابِ الَّذِينَ آمَنُوا قَدْ أَنزَلَ اللَّهُ إِلَيْكُمْ ذِكْرًا

رَّسُولا يَتْلُو عَلَيْكُمْ آيَاتِ اللَّهِ مُبَيِّنَاتٍ لِّيُخْرِجَ الَّذِينَ آمَنُوا وَعَمِلُوا الصَّالِحَاتِ مِنَ الظُّلُمَاتِ إِلَى النُّورِ وَمَن يُؤْمِن بِاللَّهِ وَيَعْمَلْ صَالِحًا يُدْخِلْهُ جَنَّاتٍ تَجْرِي مِن تَحْتِهَا الأَنْهَارُ خَالِدِينَ فِيهَا أَبَدًا قَدْ أَحْسَنَ اللَّهُ لَهُ رِزْقًا

اللَّهُ الَّذِي خَلَقَ سَبْعَ سَمَاوَاتٍ وَمِنَ الأَرْضِ مِثْلَهُنَّ يَتَنَزَّلُ الأَمْرُ بَيْنَهُنَّ لِتَعْلَمُوا أَنَّ اللَّهَ عَلَى كُلِّ شَيْءٍ قَدِيرٌ وَأَنَّ اللَّهَ قَدْ أَحَاطَ بِكُلِّ شَيْءٍ عِلْمًا

----------------------------
بالجد تعبت ونفسي قام ..وحسيت بالبت تعبت وزغللت وحنيت عليها ..
لسع راجياني التحريم وبقية السور .
فكرت واقترحت ليها اقتراح انو اقوم انزل ليها السور دي في الI pad
متها انا اتفك وهي تكون ليها بصور مشوقة .
اتجهت لي قوقل ولقيت جميع السور دي بصوت واحد اسمو المعيقلي وبديت انزل فيها ..
المدام قالت لي احسن تنزلها بصوت شيخ الزين لان مخارجو اسهل من الشيخ دا ..
قلت ليها لا لا بس المعيقلي دا ما عارف لي شنو علقت فيه .
اقتراح المدام جيد بس انا شيخ الزين اصلا ما بدورا ..

حا اواصل في معناة حشو المنهج البتعرضو ليه اولادنا .
شاكر مروركم
وحا اجيكم بي رواقة

الاخ على

ربنا قراك القرآن غصبا عنك، ولسة جاياك السيرة والفقه وعلوم الحديث.
حا تتبحر تب فى علوم الدين.
ربنا يحفظ ليك بنتك ويهديك الى سراطه المستقيم.

تحياتي الأخ أستاذ علي،
أولا حفظ الله حبيبة أهلها، ووفقها وأهلها في كل مناحي الحياة...
...
خلينا في الأول ننكت ... عن جد:
غايتو بنتك كان رسبت في الدين بتطلع علمانية، مكسب ليك.
وكان نجحت بتطلع كوزة....
شفت كيف الورطة من خلاف؟!
ههههه
....
في السودان الرواية المنتشرة هي الدوري.
شيخ الزين يقرأ برواية الدوري في الغالب، تأكد منها، وله تسجيل أيضا برواية حفص...
شيخ ماهر يقرأ برواية حفص فقط..
حتى لايحدث لبس بين المسموع والمرئي في المصحف بالنسبة للصغيرة، تأكد من المدرسة أي رواية مستخدمة للحفظ،
ومن ثم تأكد من الرواية المكتوب بها المصحف ، وكذلك رواية القارئ....
ولو أنه لاتوجد اختلافات كثيرة بين كل الروايات، إلا أن تجنب اللبس مطلوبة... سواء كان رسما أو نطقا، أو عدد الآيات.
أضف إلى ذلك أن تحاول الابنة الحفظ من مصحف مطبعة واحدة لأن الطالب كثيرا ما يتذكر الكلمة التي تبدأ بها الصفحة،
وهي طريقة معينة على الحفظ...
....
ا لاستماع جيد، ولكن وجود مصححة لتلاوة الطالبة ضروري جدا، ربما تكون المدرسة ،وربما أي شخص آخر.
أما مسألة الحفظ بالنسبة للطالبة فليست صعبة إذا هُيئ الجو لها في المنزل بعد تصحيح تلاوتها.
...
وفقكم الله ... .. . . .... . . . ......

شيخ قصي يا صديقي
شكرن علي النصايح
بعدين رواية ورش و لا الدوري دي ما المشكلة اصلا المشكلة في الحشو دا .
حفص الدوري ورش عيبهن لي في جزء عمو😂

عبد العظيم مكي يا حبوب
حسب تقرير قريتو اتمنى القاه بتحدث انو السعودية من اكتر الدول البترفع فيها موجة الالحاد مع العلم نظامها التعليمي ديني حتى في المدارس .
فثق التعليم ذو المناهج المملة الزي السودان والسعودية نتايجو حتى على التربية الدينية سلبية اكتر من كونها ايجابية .
مودتي يا صديقي

كبر يا عزيزي اي والله الطفل شنطتو ما قادر يشيلها من الكتب وكل يوم عاملات ليهم فلايت
تعليم كمي مقيت والنتاج صفر كبير والله لو ما امهاتهم والمعلمين الخاصين حا يتخرجوا من مدارسهم اكثر امية .
الكل انهار يا كبر واسواء كارثة انهيار هو هذه المناهج المملة الغير مواكبة المتخلفة المرهقة .
الشافع يصحيك مع النجمة برجف انا عاوز احفظ .
بحفظو القراءن والفقه والادب من غير حب للمادة
تقراء الهلع والقلق والاساء في عيونهم
تبا لسنين لم ترحم صغير ولا كبير لا في تعليم ولا صحة ولا اي شيء
عميق مودتي يا صديقي

علي الكنزي يا حبيب
غايتو كلامك تدريسها في الشهادة السودانية نوعا ما فيه قبول
ولكن كان علي انا لا في الثانوي ولا الاساس
العاوز يقراء قراءن في خلاوي وفي جامعة مخصصة ليه
نحن درسنا كل المراحل ولا زلنا نحفظ السور الدرسناها من الابتداءي للثانوي حفظ مع معاني وشرح الكلمات لانها كان ناس المناهج علماء مش زي ناس التمكين البوظو اي شيء
تحياتي يا صديقي

غايتو الوضع السورة دي في مقرر صف رابع دا بالغ وشذة
ـــــــــــــــــــــــــــــــــــــــــــــــــــــــت

عايزين جيل مازوم زيما حاصل هسي

Quote: عايزين جيل مازوم زي ما حاصل هسي

صديقي لطيف الشهير بي حسن بالجد بالحال دا قطع الشك الجيل حا يكون مأزوم مأزوم ..
مودتي يا صديقي

Quote: تعليم الدين للأطففال جريمة نكراء وقريبا بإذن الله سيتم تضمينه بمواثيق الأمم المتحدة بتحريمه وجعله ضمن وثيقة ال Child Abuse بل هو أكثر Abuse من غيره!!0

تحياتي محمد آدم و علي دفع الله والمشاركين

قبل كده انا كتبت بوست فيه تساول اخلاقي عن المسالة دي وهل يجوز فرضنا ديانة محددة على الاطفال؟

ماهو خيارهم؟

اليس هذه المسالة فيها انتهاك لحقوق الاطفال؟
المعتقدات الدينية والأطفال

المعتقدات الدينية للاطفال

حاتم هواري يا جميل والله ليك وحشة
سيبك من انتهاك حقوقهم في مسألة الدين يا اخي والله المعناة في الحفظ والتلقين والخوف والهلع من الرسوب او العقاب حا تقومهم جيل مشوه .
مودتي يا صديقي

روى مالك في الموطأ عن نافع عن ابن عمر قال: "تعلّم عمر البقرة في اثنتي عشرة سنة، فلما ختمها نحر جزوراً".
روي عن النبي صلى الله عليه وسلم كراهة الإسراع في حفظ القرآن دون التفقه فيه.

فكيف و ما الداعي لأن تتفقه طفلة لا تجاوز العشر سنوات في مواضيع مثل الطلاق و العدة؟

بالمناسبة البوست ده مهم جدا لانه ممكن يقود لاصلاح وتقويم وتقييم المنهج الدراسي
لمرحلة الاساس...لان الذين وضعوا هذا المنهج وضعوه على عجل وبدون دراسة وتفكير
غير حشو ذهن الطلبة بالحفظ والتسميع ودون تدبر وتحليل وادكار ....وعشان كده بلدنا
ماشة لورا بسرعة الصاروخ...
وكمان ما معقولة لبنت صغيرة اول سورة يحفظوها ليها تكون سورة الطلاق...وتنشا وتتربى
وهي تفكر اول ما تفكر في الطلاق...وشروطها .....معقولة جي...يا ناس وزارة التربية والتعليم
ربوا الاطفال بكريقة صحيحة وسليمة وعودوهم على التفكير والتحليل العلمي بدل الحفظ
والتسميع ،،، و.عشان ما يكبروا وهم كالحمير يحملون اسفارا لا يفهمون معناها..
ودمتم بالف خير

بصراحة اول مرة اعرف انه في سورة مفصولة اسمها سورة الطلاق

كنت اعتقد انها آيات داخل سورة النساء

من أول العام الدراسي و الموضوع ده مؤرقني يا علي ..
بتي آية آخر العنقود .. كل يوم في صراع مع أمها .. ما قادرة على حفظ سور الطلاق و التحريم و المجادلة ..
يوم سألت أمها .. بتحفّظيها في سورة شنو ؟ قالت : الطلاق .. قلت ليها و أنا جاد ، في سورة اسمها الطلاق ؟ .. و هسّا آية ال ما أكملت 9 سنوات ، و طول اليوم بتحضر توم و جيري ، دخلها بمشاكل الطلاق شنو ؟
غايتو ربنا ينتقم منهم ، بشر ساديين ما أكتر .

حاتم الهواري :

Quote: بصراحة اول مرة اعرف انه في سورة مفصولة اسمها سورة الطلاق

خشبة يا حاتم 😊
مداخلتين متزامنات تقريباً

Quote: قلت ليها و أنا جاد ، في سورة اسمها الطلاق ؟

لووول

طلعتا مابراي...طمنتني يا ابوحميد
كان هسي جو ردموني

Quote: خشبة يا حاتم 😊

خشبتين يا عمك

Quote: الخرطوم الجديدة

Quote: الخرطوم الجديدة

في تالتة ثانوي، في الخرطوم الجديدة ، حيّاها الغمام ، دخل علينا أستاذ الرشيد ، له الرحمة ، مدرس التربية الإسلامية ، و بدأ يسمّع لينا سورة النور ، لما وصل لأخينا خلف الله ، و كان أول الدفعة ، قال للأستاذ ، أنا ما شايل التربية الإسلامية ، الأستاذ قال ليهو ما شايلها وين ؟ قال ليهو: الدين ما داخل معانا في البوكسنق 😊.
الأستاذ حِرِدْ الحصة و طلع .
:
تحياتي حاتم .

حاتم ومحمد محمودوالله انتو ناس ظريفين معقولة ما سمعتوا بسورة الطلاق برضه احسن .وفي علماء بيقولو الطلاق ذاتو حرام .عشان الله يبغض هذا الأمر...
(وبيني وبينكم ..انا ذاتي كنت مفتكرة ان موضوع الطلاق جزء من سورة النساء)) ...تصحيح أخطاء إملائية عديدة ..لان الموبايل بيكتب حاجات ما كتبتها...
.ودمتم بخير ...وشكرا ..وضحكتونا في بلد الهم والغم..

يا ابو علوة ...
البكور لغوه ولا لسه ؟؟؟
والساعة جروها ولا لسه ؟؟؟
ومرحلة الاساس لغوها ولا لسه ؟؟؟
.
.
.
عندي بنت اختي زمان امها كانت كل يوم بتراجع معاها من كتاب (أمل قرأت وبدر كتب) ...
في نهاية السنة البنت حفظت الكتاب ...
تقول ليها العنوان بس وبتسمع ليك الباقي ... هههه

الاخ على وضيوفه - سلام عليكم

Quote: نحن درسنا كل المراحل ولا زلنا نحفظ السور الدرسناها من الابتداءي للثانوي حفظ مع معاني وشرح الكلمات لانها كان ناس المناهج علماء مش زي ناس التمكين البوظو اي شيء

.
وماذكره الاخ خافظ

Quote: روى مالك في الموطأ عن نافع عن ابن عمر قال: "تعلّم عمر البقرة في اثنتي عشرة سنة، فلما ختمها نحر جزوراً". روي عن النبي صلى الله عليه وسلم كراهة الإسراع في حفظ القرآن دون التفقه فيه.

.
*اذكر قصه عن بعض الصحابه انهم كانوا يحفظوا عشره ايات -ولايحفظوا غيرها- حتى يعملو بما فيها .وفعلا الافضل حفظ ابات تناسب فهم الطفل مفسره ومعروف معانى كلماتها
وفيها تحفيزعلى قيم حميده هى جزء من العمليه النربويه ونحنا كل شىء حشو من غير فهم وبالمناسبه الطالب ينسى ماحفظه مجرد ماطلع من الامتحان ..
*نقطه تانيه القراءاه الصحيحه :افلب المعلمين فى المواد المعتمده على النطق السليم عربى - انجليزى - دين تجد نطق الكلمات غير صحيح واحيانا يغير معنى الكلمه والجمله الوارده فيها
.

الله ما بضرب بي عصا ،ان شاء الله في سنة ساتة يودوهم ليك الحج مع ولي أمرهم 😀

العزيز علي دفع الله والاخوة الاكارم تحياتي ..

دائما بلقى شنطة موسى "الصف الرابع" في طرف السرير ول في كرسي
المهم في اقرب حاجة يلقاها قدامو ..
صراحة كل الاسرة لاحظت الوضعية الجديدة ل"موسى" الي كان مرتب جدا ..
وهو دون العمر دا بكتير ..
المهم لما بشيلا كدا لمن بشفق عليهو من وزنها بعيد عن المنهج الدراسي ..
اما اخوهو الفي الصف السادس ياخي دا قرب يصلع عديل كدا ..

بصراحة الموضوع خطير جدا لو حفظتهم على النجاح والتفوق كدا بتضغط عليهم شديد ..
ولو ما اديتهم احساس عن مدى تشوقك واهتمامك بي نجاحهم وتفوقهم يمكن تخلق
فيهم روح متراخية ..
كيف السبيل ما بين هذا وهذا ..؟








.

Quote: فَإِذَا بَلَغْنَ أَجَلَهُنَّ فَأَمْسِكُوهُنَّ بِمَعْرُوفٍ أَوْ فَارِقُوهُنَّ بِمَعْرُوفٍ وَأَشْهِدُوا ذَوَيْ عَدْلٍ مِّنكُمْ وَأَقِيمُوا الشَّهَادَةَ لِلَّهِ ذَلِكُمْ يُوعَظُ بِهِ مَن كَانَ يُؤْمِنُ بِاللَّهِ وَالْيَوْمِ الآخِرِ وَمَن يَتَّقِ اللَّهَ يَجْعَل لَّهُ مَخْرَجًا

غايتو يا علي في كل الاحوال حالكم افضل ..
والله انا شلت هم وليداتنا هناك الغير ناطقين بها ..
افصح واحد فيهم لما يجي لى ( بلغن أجلهن ) دي بفتكرها لما تموت ..
مرة قاعدين نتناقش في معاني بعض الكلمات القرآنية ..
معانا وكيل نيابة حلفاوي ..
قال : تصدقوا قريبات دي أنا عرفت معنى ( كل همزة لمزة ) ..
ربنا يحفظها هي وإخوانا.

أغرب حاجة في البوست دا كبر ما نزل فيديو مع مداخلتو !،
بيكون نسى .
المفروض في السن دي يدرسوهم مقتطفات من القصص
في القرآن عشان يرغبوهم فيه، لكن ديل اصلا قصدهم
يكرهوا الناس الدين .

تحياتي يا شنفرة لك ولضيوفك الكرام .

لحين الرجوع للتعقيب على جمال حروفكم احكي ليكم انا امبارح مشيت جامعة سنار دقة سريعة كدة وانا طالع بالبوابة الشرقية لقيت مدرسة اسمها البراء بن عازب😂
وتقولوا لي سورة الطلاق لسنة رابعة لي شنو😄
جاييكم
مودتي لكم جميعا

ذكرتني نكتة جاتني من احد الأصدقاء :

عاد المغترب بعد 20 سنة، واستقل التاكسي لـ أم درمان
وطول الطريق لاحظ السائق انه يقرأ اللافتات منبهرا :
مطعم البينة
جزارة الصالحين
صيدلية الإسراء والمعراج
داخلية الصحابة
سكن المبشرون بالجنة
مطعم تبارك
مدرسة خولة بنت الازور الابتدائية
يقرأ ويردد ماشاء الله ماشاء الله !!
تبارك الله !!
ضحك صاحب التاكسي وقال له :
ياخوي الجماعة ديل طلعوا ديننا وعلقوهوا هنا !!!

تحياتي علي
وضيوفه
وانا من زمان حسي انقرش مع المناهج دي
المسألة مش الحفظ بس ..المسألة في مواد تانية مفروض تقراها وتفهمها .. وبرضو تلعب
اضف لي دي هي زاتا ما بتكون فاهمه العلاقة بين ابوها وامها وانها زواج
اضف لي دة كلو كيف تفهمها الوطء والطهارة من الجنابة
ايوة نعم في دراسة قريتها انو السعودية اكثر الدول العربية فيها إلحاد

يا علي دفع الله .....سلام
وتحية ل ( حبيبتو) والدعوات لها بالتوفيق

البوست حيشبعك تنظير في مناهج موضوعه سلفا
واذا انتظرت البوست البنيه تسقط في الدين ...فهل يرضيك
بعدين رابعه اساس ما اياها رابعه اوليه ورابعه ابتدائي بتاعت زمان ونفس الصور حفظناهن

تحياتي

ياعلى ود دفع الله يا حبيب ،
سلامة حبيبتو ،، معقولة مجادلة وحشر وكمان طلاق ؟؟؟
انا سياستى مع الاولاد فى موضوع الدين دا واضح جدا ،،،
مع انو ماعندنا فى اوربا دين كتير ،،
اولا مشجعم انو يسالو وما يخافو فى طرح الاسئلة ،
الشى التانى مهم جدا ،نوريهم الكلام دا اتكتب متين ؟ وعلاقة الكلام دا اسي بالحاصل شنو!
بين كل سطر والتانى بتلقى ،،واقتلوا المشركين ،،، ونحن والمشركين ديل ما مقصرين معانا تب .
اهم حاجة هدم اسس التفكير السلفى السايد فى المجتمعات السودانية ،واول ناس نبدا بيهم اطفالنا ..
تحياتى يا حبيب ...

Quote: بعدين رابعه اساس ما اياها رابعه اوليه ورابعه ابتدائي بتاعت زمان ونفس الصور حفظناهن

كلامك ما صحيح طبعا .. لغاية رابعة أولية أو سادسة أبتدائي المنهج لم يتعدى جزء عمّ .
يبدو إنك ما انكويت بالمسألة دي .. لما بتّك العمرها 9 سنوات تسألك : من قبل أن يتماسّا يعني شنو يا بابا ؟
نحن إنكوينا بالمعاتيه ديل ..ما تجيب ليها تبريرات كاذبة كمان.

في أطفال أعمارهم سبعة وتمنية سنوات وحافظين القرآن كامل، تلاتين جزء
انا بتي قدر بتك وحافظة لغاية فصلت، وحافظة في البيت ما في المدرسة
القرآن ساهل

الفائدة المرجوّة شنو من تحفيظ سور لا تستوعب عقولهم الصغيرة معانيها ؟.

عماد الدين
الله يجازي شيطان عقلك يا اخوي...
والله انا من الله خلقني ما ضحكت زي ما ضحكت من النكتة الاوسكار دي بتاعة المغترب الرجع بعد
عشرين سنة وبقرا في اليافطات الاسلامية...
والله شكرا ليك لانك خففت لينا اليوم كثيرةجدا من الام الغربة وفراق الاتبراوي..وحنظل نضحك لمدة
شهر كامل لغاية ما تجينا بنكتة جديدة....
ودمت بالف خير وصحة وعافية.....

عماد الدين
ويا فرحة ما تمت ويا ضحكة ما استمرت....
فجاة قرينا قصة الضابط الاداري الذي اخذ ابنة راعي رهينة
لانه لم دفع ضريبة القطعان وانقطعت الضحكات وانحل محلها الالم
والمرارة.....امشي اقرا الخبر بهناك في بوست امجد الجميعابي..
ودمت بخير

التحيات أخي علي دفع الله
ولضيوفك الكرام.
اتفق معك ان المنهج ينبغي ان يكون في حدود المقدرة العقلية للطالبات والطلاب وعلى الوزارة ان تجتهد في هذا الأمر لمخاطبة كل مستوى على مقدرته على الاستيعاب..
الشي الثاني شنطة الكتب تقصم الظهر واقول لمعلمي الاساس بنات بصفة خاصة... رفقا بالقوارير ...

ابو علوة . ياصديقي .
لك مني اجمل التحايا
والله حكاية التعليم ده في السودان . حكايتوا حكاية .
غايتو الواحد لازم يتابع . لانو لو غفل لحظة بتضيع الطاسة
مواد حشو . وزحمة كتب في الفاضي .

تحياتي لك وللعائلة الكريمة .

قسم الفضيل يا صديقي
البكور اصلا ماسورة بتخالف التوقيت الدولي لكن علي عصمان لازما يضع بصمتو.والساعة حا يجروها ومرحلة الاساس حا يلغوها والدعم السريع حا يشتتوه واي حاجة عملوها ثق حا تتلاشى لانهم بفتقدوا المخطط الاستراتجي الفاهم وطلعوا اكبر كضبة .
مودتي

الاصدقاء
حاتم هواري
محمد محمود
ههههه اهو ثقفناكم دينيا وعرفتو سورة الطلاق lol
وعلي فكرة عندهم سورة اسمها الصف علي الحلف اول مرة اسمع بيها 😃😃
مودتي يا جميلين

الصديقة العزيزة بسمات الشيخ
كلامك سليم في حتة الاختيار البناسب السن العمرية
مودتي

صديقي المستنير حافظ بشير عمت مساءا
لمن عمر بن الخطاب شخصيا حفظها في عشرة سنة طيب الناس ديل بستمدوا مشروعهم الحضاري دا من عمرو دياب 😂
مودتي

Quote: مالك حبيبتو (لقبها لانها واحدة وسط شرامة 😂) بابا انا عندي تلاتة سور ما حفظتهن والامتحانات قربت . طيب يا بتي تلاتة سور ما حفظتيهن ولسع دي الفترة الاولى يعني عندكم كم سورة . بكت وقالت لي كتااار . طيب ما تراجعك ليك امك قالت لي ماما ولدها الصغير عيان قالت ما فاضية. خلاص هسي براجعن ليك بس خليني اتغدي قالت لي نبداء بي سورة الطلاق . كب انا اخو الطلاق جيبي الكتاب .

سلام يا على دفع الله والتحية ل حبيبتو وربنا يحفظها ويبارك فيها

والله حرام ليه يا وزارة التربية معقولة لسة الوزارة متمسكة بطريقة المناهج القديمة والتعليم التقليدى { حفظ وتسميع } وفى احيان كثيرة بدون فهم !!
العالم تخطى تلك الطريقة واتجه الى طريقة { تنمية قدرات ومهارات الطالب }
اعطاء الطلاب ( من الصف الاول وحتى الخامس ) أوقات واسعة اثناء اليوم الدراسى للعب والمرح وذلك ليستمتعوا بأوقات سعيدة ويعودوا الى فصولهم
بأذهان صافية قابلة لاستيعاب الدروس ..
اقول هذا عن تجربة حيث اننى اشتغلت قبل فترة مترجما فى مدرسة عالمية هنا فى النرويج .

على وزارة التربية والتعليم عمل ثورة حقيقية فى طريقة التعليم المتبعة حاليا فى السودان .

المفروض في مسألة حفظ القرآن هذه يستعمل
أسلوب التعليم الفردي المعمول به في الخلاوي وهو أفيد
لأنه يقدر الفروق الفردية ويعطي نتائج افضل..ولا ينتقل المدرس بالطالب لسورة إلا إذا حفظ ما قبلها حفظا جيدا
أما تعليم سواقة القطيع هذه الذي زرعه فينا المستعمر
فهو من جعل الطلاب تهدر أعمارهم في أسلوب التعليم الجماعي
الذي يخرج أنصاف متعلمين

كتب معاوية المدير:

Quote: أغرب حاجة في البوست دا كبر ما نزل فيديو مع مداخلتو !، بيكون نسى .

بالعكس يا حبيب..نجيب فيديو عشان شنو؟؟منو البيفهم يا معاوية؟...

مش فيديو..اهو نخط ليك يا صديقي..سورة التحريم..!!




اقرأ القرآن باستمرار..يا صديقي ..ومن عجب اقراه بصوت الشيخ عوض عمر..وبعد قليل ح اقرا سورة الدخان..وده موضوع شخصي للغاية..في ترتيب ترتيل القران بالأجزاء..!!

جات كده ، يا صديقي ، في الترتيب..وسوف اواصل ..ولا اخشى احد..غير الله رب العالمين..والنقة بيني وبينه..!!

اهو فيديو يا معاوية.. ولا شغلة لي بقراءة الدوري...أو اي كان...!!

طفلة على دفع الله..قالوا ليها احفظي كيت وكيت من القرأن الكريم..فذاك خطأ ومليون خطأ..!!

كبر

كان الله في عون صغارنا ..
اصلا مافي مناهج يقولوا عليها ..
ده شغل بتاع ناس ما عندهم ..
اي علافة بتنشئة وتربية الصغار ..
أو بمعنى أصح ماعايزين يصلحوا ..
لانهم شغالين يخربوا كل شيء في البلد ..
بصورة عجيبة والله زول ما واعي خالص ..
مايقر مقرراتهم دي لطلبة صغار السن ..
أو يوافق على السلم العجيب اللامي ..
طلبة بقوا رجال في ثامنة وجاينهم ناس تاسعة ..
مع اولاد اعمارهم سبعة وثمانية سنة ..
ما يحدث هو اذلال للشعب السوداني ..
وافساد متعمد للمجتمع والناشئة ..
وده شغل مقصود ماساي كده ..
البنيات الصغار قاعدات في حوش واحد ..
مع طالبات بقن حريم وبلغن وبيحيضن ..
تخيل في الحمامات البنيات الصغار ...
بيلقن المودس واثار دم حيض البنات الكبار ..
في البيت يدسوا منهن الكلام ده ..
لحدي ما يكبرن ويعرفن ...
يمشن يلاقنوا في المدرسة في الحمامات ..
مجدع في الواطة يشيلنو مستغربات ..
تخيل بالله عليك كلام غبي زي ده ..

والله يا علي بنيتتي قدر حقتك دي ..
قسم بالله جات حكت لي عن المودس ودم الحيض ..
في الحمامات تحتار ذاتو ترد تقول ليها شنو ..
بلا يخمهم ويخم مشروعهم اللا حضاري ده ..
أفسد علينا صغارنا واحرجنا امامهم ..
عرفوهم بالشي المامفروض يعرفوه ..
في عمرهم الغض الصغير ده ..
دايرين الدنيا تبقى هايصة وبزرميطة ..
لافساد الاجيال الجديدة وهدم تراتيبية التنشئة والتربية ..
عايزين يقعدوا لي متين الناس ديل ما عارفين ..
حيرونا والله ..
غايتو احسن سلم حق كبارنا ..
4 - 4 - 4 ..
سلم مرتّب وزي الورد وافضل من ..
6 - 3 - 3 .. ذاتو ..

دفع الله
انت راجل نكته وربنا يعينك

وجه مبتسم

طبعا التعليم الديني ممنوع في المدارس العامه في بلدنا ولكن
في المدارس المسيحيه وفي الكنائس تسمي


مدارس الاحد
يتم تدريس الاطفال من الكتاب المقدس المرسوم في شكل قصصي
واحيانا يتم التدريس عن طريق الدراما حيث يشارك الاطفال في التمثيل كثير من القصص والاحداث

لو شارك الطفل في مسرحيه عن الخروج من مصر لن ينساها
ولكن اذا حاولت تدريس القصه بالطريقه التقليديه قد ينسي لان للاطفال مدة انتباه قصيره


في نسخ وترجمات للكتاب للاطفال و للمراهفين بلغه ابسط لان الهدف ليس الحفظ ولكن الفهم

انا كنت استاذ في مدرسه مسيحيه لفتره وفي التدريس يتم استخدام خرط لشرح جغرافيه الاحداث
والقصص المصوره وايضا ازياء لشرح نوعيه الملابس التي كان يلبسها موسي كمثال وهكذا

ربنا يعينك

تحياتي لكم جميعا
اكيد مودتي لكل من اتداخل
سأعقب عليكم جميعا

وافر احترامي

*

بتذكر في بدايات الانقاذ لقاء تلفزيوني للاستاذ سبدرات و كان وقتها وزيرا للتربية و التعليم. كان بتكلم بحماس شديد انو التلاميذ حيدرسو جزء كامل من القرأن في كل عام دراسي و عند اكمال الثانوي حيكون الواحد قد حفظ 12 جزء من القران.
يبقي انو المنهج ده مطبق و بحسب ترتيب السور و الاجزاء هذه السور تقريبا في الجزء 28 يعني الشقع ديل بكونو حافظين الجزء 30 و الجزء 29 و الان في الجزء 28

الاصدقاء الاعزاء
---------------

عبد الحفيظ ابو سن
الشامي عبد الوهاب
علي الكرار هاشم
مرتضى عبد الجليل
احمد الشيخ
هاشم كاروري
علاء سيد احمد
منتصر عبد الباسط
جمال ود القوز
محب
محجوب عبد الله

شاكر مروركم وعلى ما اعتقد معظمكم مقتنع بانه هذا المنهج الدراسي عقيم و نتيجته ستكون جيل غير مبدع وخلاق
اتيت بمنموزج واحد فقط هو مادة القرآن الكريم وايضا هناك الفقه واللغة العربية والرياضيات والعالم من حولنا الخ .
كلها مواد حشو فقط .
تتخيلو في اللغة العربية مقرر عليهم قصيدة منقو قول لا عاش من يفصلنا !!!!
اي والله

مودتي