السلام عليكم ورحمة الله وبركاته اريتكم عافية .. جابني صاحب قناة دان سودان .. كاتب على الفيديو خاص قناة دان سودان الفيديو الاصلي بعنوان : حفلة عامر يعقوب تراث قبيلة الشنابلة بدارفور ينوبكم ثواب اشرحوا لينا طريقة ارفاق الفيديو .. زمان نسخ شفرة التضمين ولصق
قباني يا حبيب يوم بتقتلك زول كنا ذات عشاء على شرف الاستاذ الطيب صالح و قد كان صاحب الدعوة اخونا من الشوايقة و سأل الطيب صالح يا استاذ الشوايقة كتابين و وصافين في الشعر و ما اظن في السودان في ناس كتبوا زيهم فرد عليه الاستاذ الطيب صالح قائلا (يا ابني انت مشيت بادية كردفان) الناس ديل بيكتبوا كلام لم يعرفه الكثيرين رحم الله الاستاذ الطيب صالح
يا جماعة انتو ب تجيبوا الروائع دي من وين؟؟ أنصاف فتحي فنانة بحق وحقيقة وهي أنصاف الفن وامتثال بتقول الوضع اللحن فنان مبدع... والله انتو ناس بتذوقوا الفن الراقي الرائع وشكرا ليكم...يا احلى ناس خليتو الدنيا حلوة..
الفديو ده حملتو في اليوتيوب جاب ليا مشاهدات لامن اتخلعتا والعجب الحليله جا حتل فيو الحليله تعال بي جاي ناخد لينا انجمامة في البوست ده
تشكر ياقباني وعبرك التحايا للموثق كبر والاشواق والتبريكات بي عيد الاضحى ولكل البورداب نواحي كندا ومحدثتكم ترجرج تحية خاصة
Post: #12 Title: Re: الجمرة للواطيها .. بلقى مرادي مع المريود ... Author: Kabar Date: 09-16-2017, 08:05 AM Parent: #10
عمر السلمة..حبابك يا صديق ملاحظتك سليمة ، وانا من قبل جبت نفس الفيديو كليب..وكان صافي تماما وطولو اربعة دقايق ..وعلقت على اختنا اللابسة توب ازرق خفيف (لبني)..وكت داك ما كانت في مزيكا..!! وقام صاحبنا دان سودان أو اي كان اسمو..شال نفس الفيديو واضاف عليهو المزيكا والتي هي شعار سلسلة (أرض السمر)..!! طبعا يا عمر..طوالي قاعد اقول لصديقنا بريمة..الواحد بقى يخشى الإكتشاف..تقوم تجيب ليك حاجة وتعلق عليها وتحاول تشرحها ، بعد شوية الجماهير تقوم تشرشح بيها زي الترتيب..! لو ملاحظ يا عمر..انا قلت لصديقنا ول ابا يحي ..ح اجيب الفوتش الأصلي..لأنو غنية انصاف فتحي ما فيها التفاصيل الموجودة في الفيديو..وانما التفاصيل دي بتخص الفنانة شادن محمد حسين ، وكانت ذات عيد في غرب كردفان (شادن اصلا من غرب كردفان..وبالمناسبة هي الفنانة الوحيدة من اهلك المسيرية الزرق..وهم ناس كبر وكده..!!).. كنت متابع اعلان الفنانة انصاف فتحي لغنية (مريودي)..وكنت متخيل انها ح تكون فيديو كليب..ولكن لمن ظهرت..شفت فقط غلاف الألبوم (انصاف عاملة شلخ نقرابي ..حرف تي صغير..ولون ساكت ..يعني شوية موية ممكن يتمسح..وزعلت من الحركة دي من قبل انصاف..لأنها ما محتاجة تكذب بالطريقة الهايفة دي..!!).. لمن شفت المكساج الجابو صديقنا يحي هنا (اتفرجت عليه من بدري شوية)..فكرت اسأل انصاف فتحي عن رأيها..لكني صرفت النظر..فالناس محتاجة الإنتشار حتى لو على حساب الأخرين..! المكساج في غنية انصاف فتحي..عملو زول من جنوب كردفان..وهدفو اظهار الكرنق..واستاد مدينة كادقلي..وفاتت عليهو حتة بسيطة..انو غنية انصاف اصلا قايمة على تراث الأبالة وديل ناس شمال كردفان وشمال دارفور..!! هنا ..ح اضيف الفوتش الظاهرة فيهو شادن حسين..وقبل ذلك..الفيديو الأصلي بتاع اهلنا الشنابلة..!! طبعا بتعجبني الحاجات التلقائية..ودي الحتة القاعد اوصي بيها الشباب..وما قصروا..عشان كده بتشوف النقارة والمردوم على اصولها..! فيديو الشنابلة..مهم للغاية..لأنو لأول مرة في حياتي اشوف تراث الناس ديل..والحاجة التانية..الشغل ده فيهو حاجات مهمة للغاية..ولو كنت املك امرا على كلية المزيكا في السودان..كنت بقول ليهم يتفرجوا على العمل ده..الشغل مركب: غنية السيرة (فوكال نسائي) ، ثم الغناء الجماعي بتاع الشباب الرجال..ثم الرقص..وياريت زول يقول لينا اسم الرقصة دي شنو بالضبط.. غناء الشباب الجماعي..يبدو انو شائع عند ناس دارفور..شفتو عند الرزيقات..والمعاليا..في دارفور..!! كبر
Post: #13 Title: Re: الجمرة للواطيها .. بلقى مرادي مع المريود ... Author: Kabar Date: 09-16-2017, 08:58 AM Parent: #12
هنا الفيديو الذي يريد صديقنا عمر السلمة اضافته..ويوضح تراث اهلنا الشنابلة..
بالمناسبة..دي المادة الوحيدة عن الشنابلة ..ومن بيئتهم الحقيقية..!!
الشنابلة موجودين في دارفور و كردفان..خصوصا مناطق ام روابة..وشفتهم حوالي مدينة الدلنج..وهم ناس ابالة..لكن الشهادة لله..يوم واحد ما شفت تراثهم الغنائي..!
الفيديو بيدأ بي شغل سيرة..والأرض الماشين فيها الناس..ياها الأرض لمن تترش بمطر الرشاش بتجيب ريحة الدعاش الجننت صاحبنا عمر ابو عاقلة..ولو شاف باقي البهارات..ح يواصل جن عديييل..!!..يحي قباني هين..الكلام عمر ابو عاقلة..!!
ده الفيديو..القام بعض الناس بوضعو..كخلفية لغنية انصاف فتحي..!
فيهو بتظهر الفنانة شادن حسين..والفيديو من غرب كردفان..وشادن اشتغلت على البئيتن بقارة وابالة..والجميل في اشغالها بتمشي للناس ديل في فرقانهم وبواديهم..!
الغنية..ايقاع الربة الحمري (ايقاع الدلوكة/السيرة يا ناس كلية الموسيقي).. لي هسع بنريدو.. حلفتا ما بنسيبو.. ابوا لي بحوش الخضار.. حوش الخضار السمح سيدو..!!
شغل تلقائي ونقي للغاية..!
اما الحتة المرقت منها الشابات ديل..فح نوضحها في فيديو لاحق...!
كبر
Post: #14 Title: Re: الجمرة للواطيها .. بلقى مرادي مع المريود ... Author: Kabar Date: 09-16-2017, 09:44 AM Parent: #13
ول ابا حامد بدري..حبابك يا صديقي عارف يا حامد..مش مرات كده بتجيك حالة انك داير تقبقب ليك زول من تلابيبو وتخنقو..عشان تقنعو؟.. الحالة دي بتجيني..قصاد ول ابا يحي قباني..يعني مرات المنطق بيغلبني معاهو ما يفضل لي غير اقبقبو..واسوقو من اضانو اوديهو تلك البوادي النايرات.. عشان يقتنع..!! كتر خيرك يا حامد..وبرضك ول ابا يحي قباني اشتغل توثيق جميل لناس امسودان..توثيق فيهو علمية كبيرة خلاس..(يحي صاحب موقع مكتبة الأغنية السودانية)..واشتغل التوثيق ده..لأنو فاض بيهو من كتر الشرشحة القاعدين يسوهوا ناس امسودان..والموقع فيهو شغل نضيف وكبير ومرجع امين لكل من يرغب في كتابة تاريخ الأنثربولوجيا الغنائية في امسودان..!!
في هذا الخيط..يحي مزنوق يا حامد..والزنقة هنا زنقة روح ، نسال الرب ما تشوفها ياحامد..والله صحي..!!
من باب التوثيق يا صديقي..في حاجة في امسودان اسمها المسيرية الزرق..ديل منهم جات زولة مذيعة اسمها دكتورة بخيتة الجبوري (ركز في الجبوري دي) في زمن حكم نظام جعفر نميري ، ثم الناقد البعثي محمد الربيع (اسمو الكامل محمد الربيع محمد صالح البقاري )..ثم محمد النور كبر ، ثم شادن محمد حسين ، ثم احمد الضي بشارة (عندو فيديوهات كتيرة حايمة) ثم الفاضل حامد الجبوري (عندو تسجيلات كتيرة حايمة في الواتساب..!!!)..غريبة مش؟؟؟؟؟؟
ليك ولي صديقنا ول ابا الصادق اسماعين..الحتة الكسر فيها ركبة حبيبنا يحي قباني..حتة عجيبة خلاس..واسمها الخوي..ويقال انو محمد احمد المحجوب بجلالة قدرو...قال: لو علمت ما في الخوي ، لطويت اليها الأرض طي..!! ومش مهم..!
الخوي هي المنطقة التي جاء منها حبيبنا عبد اهل البحيراوي..!!!!!!
سواقة العريس(بخصوص تساؤل الصديق كبّر عن اسم الرقصة بالضبط)
أولاً التحية للناس المرقو بهنا كلهم وحباب صاحب البوست والجايين.
يا ول ابا مساك طيب شايفك من البداية ركزت في غناء الشباب كتير في الفيديو ربما لأنو صوت الشباب أوضح في المقطع ؛ عشان كدة جا رصدك (لكرتهم) " قصة الجلكسي" ودا مدخل جيد على العموم . أولاً فيما يخص الرقصة اسمها " ام رُدس" وهي جائلة في الطرقات -كما تراها- أبدا. و الأحداث البتترقص فيها اتنين فقط احدهم استثناء وهو سواقة عيال الطهور اما الأساسي فهو الظاهر على الفيديو الفوق واسمه " سواقة العريس" وهي سيرة العريس المعروفة في ربوع البلاد التانية ؛ والسواقة دي بالذات ليها طقوس عجيبة خلاس ياعمك؛ وخساير كمان . أصل الرقصة هو غناء النسوان الماشات ورا العريس وهو غناء خفيف لاتتعدى كلماته بيت شعري واحد على إيقاع التوية مع صفقة سريعة يُضبط ضرب الارجل ليأتي مخالف لها. والغناء القصير دا اسمو (الشيلان) وهو غناء يمجد العريس على العموم . اما غناء الشباب الجماعي الانت رصدته -بجلكساته ومقاشيشه- فاسمو "كرير" الكرير الواحد دا بتاع السنجك والعريج والكاتم والجراري ووو" وهو ضروي لرفع ريتم الردس وكتل الارض في الطرف الاخر - الطرف الناعم- وعشان كدة زي ما شايفو غزل حصيف وكدة" جلكسي مقشاشة سواني شماشة".
سواقة العريس بتكون في اليوم القبل ليلة الدخلة وتوقيتها عصر كبير ومن الطقوس الاساسية فيها ركوب العريس في حصان ؛ وعادة بكون جواد بدين ومانع يقوم بإلجامه وزير العريس ( الشاب ابو بدلة اشتراكية رمادية في الفيديو) حتى يجاري تمهل القافلة و الواضح انو الفيديو الفوق دا مصور في مدينة تعذر وجود جواد فيها؛ ثم الهلال العلى جبين العريس؛ قلائد الدهب والسوميت ؛ ثم السوط او السعفة؛ بعدين لازم تبدأ رحلة سواقة العريس من بيت أمه وتنتهي في بيته الجديد مارة ببيوت الفريق/ الحلة بيت بيت؛ وفِي النهاية تكمن الخسائر ياصحبي!؛ حيث يتمثل الطقس الأخير المسمى "دليان العريس" ودليان دي من تدلى يتدلى تدلياً. والتدلي عندو مقطع غنائي ثابت تغنية النساء ( الخلف العريس كما في الفيديو) ومتنه (ادلى… ادلى …صقير الخير ادلى) هنا يأبى العريس ان ينزل من جواده مالم ينزله اخوانه وأبناء عمومته واصحابه والتابعين وتابعيهم الى اخر القافلة الرادسة. ويُقصد بالتنزيل هنا الهبات والهدايا بمناسبة الزواج السعيد؛ مثلا كأن يقول احد اصاب العريس:( نزلتك بناقة بكرة؛ او نزلتك بعجلة جدعة او عبور او جواد او قروش او اي شيء ذي قيمة ) والوزير( الشاب ابو بدلة اشتراكية رمادية في الفيديو ) هو المفوض بقبول الهبات أو رفضها. وبعد انتهاء الطقس الشباب البكرو بالجلكسي ديل حيحلوا غردة سرج الحصان ويدخلوا العريس بي سرجه في بيته وحينتهي الدور ليتحول الجمع للسهر في الساحة عريج /كاتم /سنجك جراري/ كشوك /حجوري … الخ. والسيرة او والسواقة الماشة في الفيديو دي حتطوف الحلة بيت بيت وفي كل بيت حتستقبلهم ست البيت راشة عليهم فتيل كامل من عطر فلير دمور او صاروخ او بالعدم بخاخ.
أشهر مقطع غنائي في سواقة العريس هذا البيت (عريسنا هلال ياهلال … العز والدلال) ومن المقاطع الشائعة التي أتذكرها في ام ردس البيت الاول من أغنية غنتها شادن حسين : كسوا غادي المامننا… العز الصافي هَنَ* جدنا. وكذلك مقطع اخر: العريس صندل بي دكانا … الزول عزه بي خيانا وأيضا : أمه زغردت أنحنا جينا … الليد* قلب الخيل بالشتيمة.
تحياتي تلبو
——— *هوامش هَنَ: حق؛ للتملك. هناه حقه او ملكه. الليد: الولد او الشاب.
Post: #15 Title: Re: الجمرة للواطيها .. بلقى مرادي مع المريود ... Author: عمر أبوعاقلة Date: 09-16-2017, 09:56 AM Parent: #9
انت القال ليك ناديهو منو
Quote: ياخ فديوك ده ازاني زيادة
ماك عارف كبر لمن يقوم علي جنّو الفيدوهات مبالغة كعادة أهلنا في كردفان والناس الجو يسلموا كل واحد شايل قدحو معاه قداحة السرور يا هندسة .. أقعدوا عافية
Post: #16 Title: Re: الجمرة للواطيها .. بلقى مرادي مع المريود ... Author: Kabar Date: 09-16-2017, 11:43 AM Parent: #15
حبيبنا ول ابا الصادق اسماعين..حبابك.. يحي قباني بتاع كماين يا قريبي..كمين في طيز كمين..ولكن..!
النص ده يا الصادق..رغم جمال الفوكال النسائي فيهو..لكن فيهو ميزة عجيبة..!!
ده ، يا الصادق ، واحد من النصوص النادرة التي وثقت لحال الجفاف..بتاع سنة 1985 في امسودان (سنة المجاعة السقطت حجر نظام جعفر نميري..!
لو عندك رغبة توثيق..ممكن تعمل خيط..ونجيب ليك النصوص التي وثقت تلك الحقبة..سواءا تراث بقارة أو ابالة..!!
كبر
Post: #17 Title: Re: الجمرة للواطيها .. بلقى مرادي مع المريود ... Author: Kabar Date: 09-16-2017, 11:55 AM Parent: #16
ول ابا يحي..حبابك يا صديقي.. ده حالتو..لسه ماوصلنا فكرة (غصن الرياض المايد)..!! كنت داير اخط ليك حاجات من شاكلة (الحالم سبانا) وحسيت انها بندرية خالص..يعني نظام حاجة تسمعها او تشوفها وانت في خاطرك عروض سينما بانت..!! ثم..كنت مفكر اخط (البان جديد ، اليوم سعيد ،يلا نمرح في حدايق البان جديد) وحسيت انها كردفان موغلة في التفاصيل..! لقيت شغل اللحو..وانا بحب الحقيبة وعبد العزيز محمد داوؤد..رضي الله عنه دنيا واخرى..!!
رياها ، سبحان وسورة الفجر..!!!!!
كبر
Post: #18 Title: Re: الجمرة للواطيها .. بلقى مرادي مع المريود ... Author: Kabar Date: 09-16-2017, 11:56 AM Parent: #17
برضوا في ملاحظة يا أستاذ كبر .. شكل الدلوكة في كردفان تختلف عن الدلوكة في باقي وسط السودان هنا بكون كم واحدة وصغيرة تشليها الفنانة وتدق عليها اما في باقي وسط السودان حجمها اكبر و في السيرات زي سيرة الجماعة ديل بتكون واحدة شايلا الدلوكة والتانية تدق وتغني .. وكمان في رثصة في الخليج اسمها رقصة النعاشات قريبة لدي ..