زيادة تذكرة بصات كوستي الخرطوم

05:48 AM September, 14 2017

سودانيز اون لاين
عبدالحفيظ ابوسن-no where
مكتبتى
رابط مختصر

بدون اعلان
من 110 لي 145 ألف
بزيادة اكثر من 30%
دون اسباب
أذيتو الناس وعذبتوهم
وما خفتو فيهم الله
واحد مسافر مع ولدو اضطر يرجع . فوجئ بالزيادة في الشباك

بسيطة
ما تسافروا
و السفرة تبور
براهم بكوسوكم بى
علينا جاى التذكرة بى خمسين
و نفر و السفر

والماشي لي واجب يا جلال
ولا علاج
ولا قراية
لوبي اصحاب العربات وعلاقتهم مع مراكز اتخاذ القرار
يعني المواطن يلقاها من منو ولا منو

ابوسن
صباحكم طيب

عليكم بالبحر اركبوا الموية
النقل النهرى خط جديد كوستى جبل اولياء
سريع بدون حوادث و الطبيعة مناظر ساحرة ومافى اى مرور سريع بهناك
قصرنا معاك
تحياتى

لطفك ربي !!
فوضى .

تحياتي عبد الحفيظ

صحيح الزيادة كبيرة على بعض المواطنين لكن ضع نفسك مكان أصحاب البصات

قطع الغيار مترتبطة ارتباط وثيق بسعر الدولار

زيادة سعر صرف الدولار تعني زيادة اسعار قطع الغيار يعني زيادة تكاليف التشغيل للبصات

أها أصحاب البصات ديل ما فاتحنها سبيل وشغالين بزنس وعايزين يكسبوا عشان يأكلوا ويعلموا أولادهم.

تكلفة الرحلة لمسافة 320 كيلومتر من كوستي للخرطوم بالمقاييس الدولية رخصية جداً إذ تساوي فقط حوالي 5 دولار وذلك لأن المحروقات مدعومة في السودان.

كل شوارع السودان خطرة جداً بها كثير من المطبات والحفر والعوائق تهلك السيارات وتزيد من تكلفة التشغيل وتقلل من عمر السيارة الإفتراضي.

كل رحلة صاحب الباص يضع يده على قلبه حتى يصل البص لنهاية الرحلة دون خسائر فادحة أو حادثة تلجن البص بسبب حمار.

Quote: تكلفة الرحلة لمسافة 320 كيلومتر من كوستي للخرطوم بالمقاييس الدولية رخصية جداً إذ تساوي فقط حوالي 5 دولار وذلك لأن المحروقات مدعومة في السودان

منو في السودان قاعد يصرف بالدولار

نفسي القى مداخلة لفرانكلي يقيف فيها في صف المواطن
كل مداخلاته تبرير وتبرير غير مقنع كمان
يعني في يوم واحد قطع الغيار دي زادت 30%؟
الحكومة ما عندها شغلة بالمواطن ولا بالظلم البحصل عليه
ومعظم اصحاب شركات النقل الكبيرة تبع الجماعة ، يعني منهم وفيهم
لازم تتعمل دراسة لتكاليف الرحلة الحقيقية بين المدن وتكلفة الوقود وتكلفة قطع الغيار والسواقين وتتفرض التعريفة العادلة
مش اي اتفاق بين شركات النقل ويتفرض على الناس

يا فرانكلي الموظفين والعمال في السودان بيصرفوا بالجنيه السوداني .. ولاحظ الدولار بيرتفع والمرتب بالجنيه ثابت .. والدولار بيرتفع والأسعار بتزيد ولا زيادة في المرتبات بالعملة المحلية !!

بعدين الحكومة مفروض تراجع الرسوم البتفرضها على الموقف وعلى الرحلات وفي الطريق وتخفضها لأكبر قدر ممكن
لأنه كل الرسوم دي بتتخت على التذكرة وبزيادة كمان

كتر خيركم والله وتشكروا
الحكومة التراجع جباياتها في الاول . البص بدفع قبل يركب الزلط ويدفع لامن يصل .
وبرضو بتاعين البصات التعريفة القديمة فاحشة واكتر من مجزية
اولا مؤجرين مكتب وفيهو موظفين وبعد دة بدفعو للسمساري البجيب راكب عشرة ج .. مستفيدين جدا
مرحب فرانكلي
حسبتها كيف خمسة دولار كدي فصلها لينها

Quote: وبرضو بتاعين البصات التعريفة القديمة فاحشة واكتر من مجزية

فاحشة كيف يعني يا عبد الحفيظ كدي فصل لينا في النقطة دي ومجزية بقدر كم؟

يا مشوار أمجاد من الثورة لنص الخرطوم ب100 جنيه لمشوار أقل من 20 كيلومتر أنت راكب من كوستي لحدي الخرطوم لمشوار 320 كليومتر ب145 جنيه وفاحشة؟

حقوا أصحاب البصات ديل يفكروا يبيعوا بصاتهم دي ويشتروا أمجادات يشغلوها في الخرطوم محل الرئيس بنوم والطيارة بتقوم و تجيب ليهم ربح حقيقي يعيل أولادهم

أيوة يا صبري دا من البديهيات لكن كصاحب بص أو حافلة أو هايس ما عندي حل غير أزيد السعر لو قطع الغيار زاد سعرها عشان الدولار البستوردوا بيه قطع الغيار سعره مقابل الجننيه زاد

يا صبري الموضوع ما مفروض يكون فيه أي توجيه لوم لصاحب البص اللي هو وفر في الأول البص دا لخدمة الشعب لكن مقابل عائد يعيش بيه أولاده زي الموظفين واحد

وبالمناسبة واحد من اسباب زيادة سعر الدولار هو عدم الإنتاج. لو كان عندنا خدمة مدنية منتجة ما كان دا الحاصل.

بل بتاع اللبن وبتاع قدرة الفول ح يزيد سعره لأن تكلفة التوصيل ح تزيد وهكذا دواليك

عايزين تعالجوا المشكلة عالجوا الأسباب الحقيقية مش الظواهر الطرفية.

بتاع البص دا في نهاية قائمة الظواهر.


________

أنا زمان كنت بغسل العربية بجنيهين وتلاتة في الشهر الفات دا غسلت العربية ب25 جنيه يعني يورو واحد لا غير.

دا ما عندو علاقة كبيرة بالدولار لكن بيوضح أنه في زيادات حتى في الخدمات لأن مقدمي الخدمات لما يمشوا يشتروا حاجياتهم برضو بيلقوها زادت.

تلوم منو؟

التحية للجميع .

ودا الشيخ سلام .. يعني اول مرة تعرف ليك كوز ما حا يقف مع المواطن ؟
نفسي القى مداخلة لفرانكلي يقيف فيها في صف المواطن
فرانكلي كوز ارهابي وقالها قبل كدا ووقفوه من المنبر ( رصاص في الرأس )
ويقصد المواطنين فماذا بعد ؟ بعدين هو البجيبو بوستات السودانيين شنو !؟
خلاص انتهي من بوستات اهلو الخلايجة القطرين !!! الله لا بارك فيه ولا
كسبه هو والبدافع عنه الله ارينا فيهم عظمة جلالك اقدرتك المفسدين الكضابين
السفلة ! انهم لايعجزونك .

اعتقد مفروض التعرفة المجزية تكون مربوطة بعدد الكيلومترات المقطوعة وسعة البص

الكيلومتر الطولي ب جنيه سوداني واحد يكون مشوار كوستي الخرطوم ب 320 جنيه للراكب الواحد.

وفي الخرطوم تكرة البص بعشرة جنيه للراكب الواحد غض النظر عن طول المشوار في دائرة عشر كيلومترات

كدا بنكون وقفنا مع المواطنين أصحاب البصات

Quote: أنا زمان كنت بغسل العربية بجنيهين وتلاتة في الشهر الفات دا غسلت العربية ب25 جنيه يعني يورو واحد لا غير. دا ما عندو علاقة كبيرة بالدولار لكن بيوضح أنه في زيادات حتى في الخدمات لأن مقدمي الخدمات لما يمشوا يشتروا حاجياتهم برضو بيلقوها زادت. تلوم منو؟

عشان كدا المصيبة بتقع على رأس المعتمدين على المرتبات

بالنسبة للتجار ومقدمي الخدمات حتى بتاعين غسيل العربات ما عندهم مُشكلة الواحد بيزيد على حسب الزيادات العامة عشان يعوّض طبعاً ...

لكن بتاع المرتب الثابت دا حيعمل شنو ؟ ودي المُشكلة هنا !!

غايتو أنا واحد من الناس لو نزلت البلد نهائي ما حأشتغل في أي وظيفة بي مرتب إلاّ في حالة واحدة بس إذا بستلم مُرتبي بالدولار :)

بالضبط كدا يا صبري

عشان كدا معالجة السبب هي الأهم

يعني الدولة تضع حد أدنى للإجور مرتبط بقيمة التضخم كلما لازاد التض زادت المرتبات

لكن دا عايز دولة منتجة تقدر تعوض وتحجم الضغوطات الإجتماعية والإقتصادية على المواطن

بالمناسب في بعض الناس لما يتحدث عن أصحاب مهن طوالي يرميهم في الجهة البتريحوا يوبيقيهم هم الحكومة والحكومة هم وذا تصرف ساذد وبسيط جداً

مثلاً أصحاب البصات أو التجار طوالي بقوهم حكومة مع أنهم مواطنين يقع عليهم ما يقع على غيرهم من زيادة الأسعار غير أنهم يمتازن على غيرهم بأنهم فئة منتجة ومحركة للسوق ومخففة لهموم المواطنين أمثالهم بتقديم هذه الخدمات

اسهل حاجة وفي نفس الوقت أبلد حاجة هي التفكير الرغبوي

يعني يا فرانكلي ناس البصات كانو بياخدو 110 ج وربحانين لدرجة بدفعو عشرة ج للركيب البجيب راكب .. فجأة كدة يلقو نفسهم خسرانين
اظن التكلفة بتتقاس بكلفة ومصاريف التشغيل . وتتقسم علي عدد الراكب ووضع هامش ربح

يا عبد الحفيظ مثلك دا بيدل على أنهم مضطرين يكسبوا راكب واحد وإن كلفهم دفع عشر جنيهات لسمسار

من يسعى لكسب راكب واحد مقابل عشر جنيهات لا يمكن أن يكون ربحان وإلا كان سافر بما حمل ولا شنو؟

معناها خسارته في بصه الفاضي وناقص راكب ودا لما يلقاه وإن خسر فيه عشرة جنيها سيقلل الخسارة.

أنت اشتري بص وشوف الربح كيف يا عبد الحفيظ ؟

الكلام من برا ساهل لكن أصحاب البصات ديل في واحدين أفلسوا وخسروا القدامهم ورواهم والناس تشيل في حسهم

ابدا فرانكلي بتاعين البصات بزيدوا وبجددوا في اسطولهم . وكل مرة شركة جديدة
بدفعوا عشرة لأنو مستفيد اصلا والعشرة مخصومة مصاريف
صاحب البص مواطن واحد قصاد آلاف مواطن متضرر من بحثو عن زيادة الفائدة
أكيد بقيف مع الالاف . هي مش رغبوية ولكن حسابات ربح و خسارة . مع انو الرغبة في سهولة ورخص مواصلات موجودة
الحساب كم يعيش البص عمرا
كم يستهلك من اسبير
اجر السواق والمضيف
الاجور الاخري
المصاريف
تتحسب كدة .. مش مقارنة مع الدول الاخري
الدولة بتاخد كم
المواطن ماعندو ضهر . رفعو السعر دون اعلان .
الحل
مناقشة رسوم الحكومة
يا فرانكلي
مصلحة الجميع فوق مصلحة الافراد

بتاع البص برضو مواطن ما عنده ضهر يا عبدالحفيظ

البخلي سعر 110 جنيه كويس وسعر 145 كعب شنو مع أن الدولار زاد أكثر من 30%؟

بتاع البص دا لمن يجي يصلح بصه ح يلقى الأسعار زادت المكنيكي زاد اسعاره والكهربجي زاد اسعاره وبتاع الإسبيرات زاد أسعاره وبتاع اللحام زاد اسعاره والبغسل البص ظاد اسعاره والكمسرجي عايز زيادة وطالع الزلط يدفع ونازل الزلط يدفع ويؤمن ويرخص وكل مرة غرامة من شرطي مرور وجباية من ولاية لولاية ولو عايز يشتري خضار الخضار سعره زاد ولو عايز دواء الدوا سعره زاد ولو عايز يرتاح في لكوندا بلقى سعرها زايد وبتاع الفول سعره زايد ولو مرته عايزة تركب ركشة من فريق حي فوق لفريق حي تحت بتلقى التعرفة زادت بقت عليه هو بس عشان الناس تديه شهادة مواطن صالح؟

يا فرانكلي بتاع البص مواطن عندو ضهر .. البص سعرو فوق المليار وعندو كم بص . وأكيد لو بتخسر معاهو عندو القدرة المالية للبحث عن استثمار آخر
التذكرة كانت كم وسبعين والدولار زاد والتذاكر زادت معاهو لامن حصلت 110ج
ال 110ج دي اسعار اخر ارتفاع للدولار
مالو نحسبها بالدولار
التذكرة كانت 72 ج والدولار كان 18 ج يعني التذكرة ب 4 دولار
شوف ال4 دولار بي كم اليوم
القصة ما دولار ولا غيرو
جشع وحكومة لا تقف مع مواطنها لأسباب مختلفة واقربها ان ملاك البصات هم اهل الحكومة نفسها

بالطريقة دي بتاع التركتر عنده ضهر وبتاع الكارو عنده ضهر وبتاع الركشة عنده ضهر لكن ضهره دا لو حاجته دي باظت مافي زول بيقول ليه هاك دي عشرة جنيه صلح بيها .يا عبدالحفيظ المليار دي أنت قايل لمها بالساهل وهل هي قروش زايدة وراميها البحر ولا زول عايز يستثمر ويطلع قرش قرشين يسترزق بيهم.

ليه بنعاين للزول القراء وعمل شهادة عشان يحسن متسواه المادي والإجتماعي أنه استثمر في حاجة كويسة ولما واحد يبني ليه مزرعة ولا عمارة ولا بص سفري بنشوف أنه دي قروش كتيرة ساكت وما محتاج يكون في تصنيف المواطن البيبحث عن لقمة عيشه؟

دا تفكير خطير جداً في حياة الناس ومعاشهم.

أنا لو عندي قروش يا أرميها البحر يا أدفنها تحت عنقريبي؟

زول استثماره مليار ما مكن يكون دخله زي صاحب حمار؟

زول بنى عماره ما ممكن يأجرها زي إجار راكوبة في سوق قندهار

زول فرش شقته هايلوكس ما ممكن تطلب منه يؤجرها زي قطية في الركابية

البص عايز قطع غيار وقطع الغيار زادت يبقى من الطبيعي بتاع البص صاحب الاستثمار الملياري دا يلقى مقابل مجزي وافتكر ما يلقاه صاحب البص مقابل متواضع جداً لو وضع قروشه دي في استثمارات تانية زي بيع البطيخ وبيع البوش

أو يبني ليه عمارة يرقد في ضلها ويؤجرها للمغتربين وأولاد المغتربين.

بدل قطعة الغيار دي ما في منها أصلي ودي سعرها زاد ودي تعال ليه بكرة بجيبها ليك من بورتسودان

دة كلام مؤلم فرانكلي
يخلو من روح الدين أي دين
ويخلو من روح الانسانية
ويخلو حتي من روح الرأسمالية التي لا تعرف الا الربح
واخشي انها سياسة وروح الدولة
تحسب هكذا
علي من يملك مليارا ان يربح أكثر
وان يعاني ممن لا يملك شيئا سوي جهده
فتعطي عشرات الملايين راتبا لبعضهم
ثم لا تستحي فتجعل الحد الادني للاجور نصف مليون او ادني
ثم تطلب منهم ان يواجهو سوقا واحدا

معقولة يا سنّو تغالت اهل الخبرة و العلم
ناس الخردة و الاسبيرات و السكند هاند عارفين السوق وين
و معدّل الاستهلاك العالى وين و السعر المرتفع وين
فما تغالت ساكت بدون فهم او منطق مستقيم

يا جلال للاسف حتي التعليم لا يجدي
تجدي الفهلوة والحظوة
البلد الوحيد الفي العالم العندو انو عربية موديل 76 احسن من 2017
شوف دي مصنوعة من حديد مستهلك من قبل 41 سنة افضل من حديد مرق من المصنع هسة
تمنع زول عمرو يكون موظف وعمرو 65 لكن تسمح ليهو يبقا وزير ولا مسؤول كبير وعمرو اكتر من 65 سنة
من لا يصلح موظف في عمر 65 لا يصلح لوظيفة اهم وهو في سن 65
البلد الوحيد الذي لا يستحي موظف فيه محدود الدخل من التطاول في فاره البناء والعربات ويتفاخر بصرفه البذخي ولا يسأله احدا
من اين لك هذا

والله يا حفيظ الزيادة غير مبررة وغير مقبولة ..
نحن حقيقي تعبنا وملينا من حجوة ام ضبيبنة ..
حقت الدولار زاد دي ..
وحدها وين ما معروف والله العظيم فترنا ..
بلد منهارة واقتصاد اكثر من سيء ..
التجار يسمعوا الدولار زاد شوية ..
يزيدوا قدر زيادة الدولار ضعفين تلاتة ..
خلاص يخلوا العملة الدولار وانتهينا ..
وكل ده والحكومة رافعه يديها تماما من السوق ..
ومخليه المواطن غنيمة للتجار ..
لا بتسال التاجر باع بي كم ولا ربحه كم ؟ .
فترنا ياخ من سواقة الحكومة الشتراء دي ..

صدقت ودالقوز
اها
خشت الرغيف
ازمة يوماتي
وحتبقي رغيفة بي جنية ولو رجعتها للدولار كأنو زاد 100%

هو من ناحية مؤلم مؤلم

لكن اصحاب البصات ما فتحنها مؤسسات خيرية

فما تتوقع لما قطع الغيار تزيد أصحاب البصات يعملوا وكأن الأمر لا يعنيهم لأن المواطن الغلبان دا ح يتعب زيادة

دا كلام مثالي جداً وما ليه علاقة بالواقع


الواقع الزيادة حاصلة وح تحصل ليس في سعر التذاكر فحسب بل في ثمن اللبن والزيت والصابون وساندوتش الأطفال للمدارس.

ماياهون دة الفرق فرانكلي بين الحكومات الوطنية والحكومات اللاوطنية
بين الحكومات البتعمل مشاريع لاعاشة للمواطنين والحكومات البتصرح انو الحكومة ما مؤسسة خيرية
الحكومات البتعمل من اجل مصلحة المجموع
والحكومة البتعمل من اجل مصلحة فئة قليلة وتركز كل رأس مال الدولة في افراد
أكون بحلم لو توقعت ان رأسمالية البلد دي بتعمل عمل خير وتتنازل من اجل الناس . فهذا ليس طبعها . ولا طبع الرأسمالية
هي ستنصاع للقوانين الوطنية ان وجدت حكومة وطنية . وستدفع صاغرة للوطن
انا بينت ليك فيك منطق الدولار ما صحيح
ووريتك التذكر مفروض تكون 88 ج وفقا لمقياسك بالدولار
لكن الرأسمالية لا تفعل ذلك ولكن ستفعله لو وجدت سلطة تهتم لأمر الناس

يا عبدالحفيط حساباتك للدولار بسيطة جداً

العملية ما بالبساطة دي

الأسعار بالخارج غير ثابتة والجمارك والجبايات والترحيل وأجور العمال والموظفين دي كلها عوامل غير ثابتة عشان كدا العملية الحسابية ما ممكن تكون بالبساطة دي

الأهم هو أن أصحاب البصات ما حكومة ولا هو من زاد سعر الدولار ولا هم الأستوردوا قطع الغيار ولا هم الزادوا سعر قطع الغيار ولاهم تاجر الجملة أو القطاعي لقطع الغيار هم زي أي مواطن بيشتروا بضاعة اليوم بتختلف عن ثمن نفس البضاعة بالأمس.


فما ممكن تطالب من هو في نهاية السلم أن يتحرك بمرونة والناس الفوق دي كلها طالعة فوق ضهره.


هسع دي جاية زيادة كبيرة في أسعار الدواء بعد تعديل حساب الدولار الزيادة ممكن تفوق ال30%

يعني يا فرانكلي ما زيادة الدولار هي السبب
بالمناسبة التحت السلم وراكبين في ضهرو دة المواطن
وانت داير بساطة اكتر من انو يحددو السعر فورا مع زيادة سعر الدولار
وبعدينك
انت ما بتتكلم عن زول عندو هايس ولا امجاد
بتتكلم عن زول عندو اسطول وقاعد مع ذات ناس الاسبيرات لو ما كان معاهم . المستورد مش صاحب دكان الاسبيرات

ما عارف البخلي العنده هايس ولا أمجاد مواطنين شرفاء وهم كل يوم زايدين الأسعار شنو والبخلي العنده اسطول بصات مجرم ومستهبل وماكل حق الغلابة شنو؟

أنا وضحت ليك أكتر من مرة الموضوع ما موضوع بصات بس في زيادة في كل شيء


أها الحل شنو ؟

نفترض معاك بتاعين البصات ديل حرامية وبزيدوا على كيفهم

ح تعمل شنو عشان ما يعملوا كدا؟

انا ما قلت حرامية
قلت جشعين
والمثل بين بتاع الهايس والبصات مش دة شريف وداك حرامي . بل ذلك من يتحكم في الاسعار والاخر تابع
والحل قلتو فوق
حكومة وطنية تعمل من اجل مصلحة الاغلبية
لأني وضحت ليك موضوع الدولار دة وسيلة لزيادة الجشع
اظن يا جلال المواصلات العامة حتي في الدول الرأسمالية تبع الدولة زي امريكا مثلا ولا ما صاح

Quote: اظن يا جلال المواصلات العامة حتي في الدول الرأسمالية تبع الدولة زي امريكا مثلا ولا ما صاح

الصحيح داخل الولاية
المواصلات تبع الولايةلكن السفريات بين الولايات دى شركات خاصّة
ده بالنسبة لى امريكا
لكن التسعيرة خاضعة لى التنافس بين الشركات
و من اساسياتو التنافس فى تخفيض السعر و نوعية الخدمة
و دى تقراها من كثافة حركة الناس

لا حكومة وطنية لا حكومة غير وطنية ما ح تقدر تصلح من الحال إلا إذا كان هناك انتاج والميزان التحاري إيجابي

وحقو حتى ذلك الحين نبتعد عن تجربة الدول الرأس مالية في المواصلات لأن أسعار المواصلات العامة غالية جداً وممكن الراكب يدفع ثمن تلاتة لتر ديزل لمشوار بيكلف نصف لتر.

خليكم في تحميل أصحاب البصات فشل إدارة الدولة.

للاسف اتفق مع الضلامي

ابدا فرانكلي
ان احمل انهيار للوطن للحكومة التي اطلقت يد الرأسمالية
وانت قايل يا فرانكلي انا من زمان بقول في شنو ما ياهو كلامك الاخير دة
طريق تطور لارأسمالي

Quote: تحياتي عبد الحفيظ صحيح الزيادة كبيرة على بعض المواطنين لكن ضع نفسك مكان أصحاب البصات قطع الغيار مترتبطة ارتباط وثيق بسعر الدولار زيادة سعر صرف الدولار تعني زيادة اسعار قطع الغيار يعني زيادة تكاليف التشغيل للبصات أها أصحاب البصات ديل ما فاتحنها سبيل وشغالين بزنس وعايزين يكسبوا عشان يأكلوا ويعلموا أولادهم. تكلفة الرحلة لمسافة 320 كيلومتر من كوستي للخرطوم بالمقاييس الدولية رخصية جداً إذ تساوي فقط حوالي 5 دولار وذلك لأن المحروقات مدعومة في السودان. كل شوارع السودان خطرة جداً بها كثير من المطبات والحفر والعوائق تهلك السيارات وتزيد من تكلفة التشغيل وتقلل من عمر السيارة الإفتراضي. كل رحلة صاحب الباص يضع يده على قلبه حتى يصل البص لنهاية الرحلة دون خسائر فادحة أو حادثة تلجن البص بسبب حمار.

لماذا لا تذكر دور دولة الجبايات في رفع التذكرة!!
جني

عشان عايز أمسّكك المايك تتحدث نيابة عني

جنّى وقع فى شر تعليقاته
اها المايك معاك

اوريك تفكير الحكومة من خلال متابعة سلعة واحدة وهي المتحكمة فيها . وتكلفة انتاجها معروفة
السكر
السكر بتوزعو الحكومة وبسعر محدد
تتخلق ازمة ويزيد سعرو فوق للسعر المعلن
طوالي الحكومة ترفع سعرو ويكون السعر الجديد هو سعر السوق الاسود
وقت الناس قبلت بالسعر احسن الزيادة تمشي لينا
وتتخلق ازمة جديدة وتنعاد نفس القصة
الحكومة بتربح في السكر اضعاف سعر تكلفتو
بالرسوم
نفس القصة .. البصات .. رسوم رسوم رسوم
من جهات مختلفة
كنانة بدت تصنع عسل قصب في عبوات صغيرة استهلاكية
كل يوم بجي زول شايل تربيزة وكرسي وقدامو دفتر حابس باب المخزن
كنانة وقفت تصنع عسل قصب . العسل بار عندهم سعرو عالي بقا

Quote: صحيح الزيادة كبيرة على بعض المواطنين لكن ضع نفسك مكان أصحاب البصاتقطع الغيار مترتبطة ارتباط وثيق بسعر الدولارزيادة سعر صرف الدولار تعني زيادة اسعار قطع الغيار يعني زيادة تكاليف التشغيل للبصاتأها أصحاب البصات ديل ما فاتحنها سبيل وشغالين بزنس وعايزين يكسبوا عشان يأكلوا ويعلموا أولادهم.تكلفة الرحلة لمسافة 320 كيلومتر من كوستي للخرطوم بالمقاييس الدولية رخصية جداً إذ تساوي فقط حوالي 5 دولار وذلك لأن المحروقات مدعومة في السودان.كل شوارع السودان خطرة جداً بها كثير من المطبات والحفر والعوائق تهلك السيارات وتزيد من تكلفة التشغيل وتقلل من عمر السيارة الإفتراضي.كل رحلة صاحب الباص يضع يده على قلبه حتى يصل البص لنهاية الرحلة دون خسائر فادحة أو حادثة تلجن البص بسبب حمار.[/QUOTE ]كل الاسباب الفوق د يسبب ارتفاع قيمةالبص بسبب ارتفاع الرسوم الجمركية وارتفاع قيمة الدولار الجمركي وانخفاض قيمة الجنيه السوداني وارتغاع فيمة اجور الشحن واجرة المناولة بسبب تدهور الاداء في ميناء بورسودان و ارتفاع اجور الترخيص السنوي واجور التامين وجبايات الطريق ومن ثم كلفة استهلاك قطع الغيار والاطارات الناتجة عن سوء حالة الطرق جني

---

Post: #44 Title: Re: زيادة تذكرة بصات كوستي الخرطوم Author: كمال عباس Date: 09-15-2017, 01:12 PM Parent: #43 الحكومة هي المسؤول الأساسي عن الإنهيار والغلاء والفوضي الإقتصادية! فكيف يتحسن الإقتصاد و يتوقف الإنهيار في ظل الفساد والنهب وتبديد الموارد ؟ أين الزراعة ؟ أين مشروع الجزيرة والقضارف والدمازيين؟ أين تذهب عائدات الدهب// والبترول سابقا ؟ **كيف يتوقف النزيف والتدهور في ظل إدارة "حكومة" متخبطة وفي غياب الشفافية ومبدأ المحاسبة؟ الحكومات التي لم تكن تملك نفطا أو ذهبا كانت تدعم الوقود والخبز والعلاج والتعليم وقد رفعت الدولة يدها عن دعم العلاج والتعليم وعن الإستثمار في الإنسان أساس التنمية فقد إتسعت الهوة بين الأغنياء والفقراء وإنهارت العملة بوتائر أسرع ! وأدت السياسات الطفيلية للإفقار والضرائب والجبايات الباهظة والسياسات الطاردة للإستثمار لمزيد من التردي ! * كيف ينمو إقتصاد إذا كان معظم إيراد ودخل الدولة وميزانيتها تذهب للأجهزة الأمنية ؟ وأجهزة الأمن همها الأساسي هو حماية كرسي السلطان وحماية مكاسب منتسبيها ؟

---

Post: #45 Title: Re: زيادة تذكرة بصات كوستي الخرطوم Author: عبدالحفيظ ابوسن Date: 09-15-2017, 02:03 PM Parent: #44 تشكروا جني وكمال عباس فعلا اياها السلطة من ساهمت وتساهم يوماتي في ارتفاع الاسعار ووضع المتاريس امام التنمية الحقيقية وتسلك طريقا يؤدي لجعل حياة الناس اكثر صعوبة تحارب الناس بإفقارهم