شاعر ود مدني الجميلة حمزه بدوي ينعي الفقيدة فاطمه احمد إبراهيم

09:05 AM August, 17 2017

سودانيز اون لاين
محسن عثمان-Sudan
مكتبتى
رابط مختصر

دنيا وفاطنه مافي
حمزة بدوي حجازي
العتمة اندست ... سكنت لب النضم ..
الشاوي لهات الجوف ... الروح .
بقاق الحزن الخيم ابا ما يروح .
أهو فوق لجرحنا اتتنا جروح .
يا ماسك الزمن وقصبة الصبق
الحارس الميس .
ذاك الممهول .
اليم الوردك انقي خيول
وفحول .
مجهول الخطو .. الساقا خطاهم
للمجهول .
بين المعقول ..
ولا المعقول .
لمتين بندور ..
لمتين في زهول .!
...... ....... .....
.. جات مارقة من بطن البحر ..
درة .
تحررت من قيدها .
أزارها ..

سوارها .
البشارة الطمي .
.. دخلت علي الجهل الظلام . .
منارة .
بصوتها .
لاصمتها .
ضياؤها .
.. جلبت حقوق كل النساء ..
بجدها .
بعزمها .
بمنهج .
مكافح .
مصالح .
ومنصف
اصالة .. ترياق .
.. رحلت بعد سنت سنن ..
بفكرها .
بوعيها .
بفعلها .
نشيدها .
...... ....... ..... ...
دنيا و فاطنة مافي
مسيخه .. كجناها .
جمره بلاكي فاطنه .
منو الركز ووطاها .
وا.. وجعة يتيم .
ويتيمه جروا غتاها .
وا .. وجعة بلد .
الليلة فاقدة غناها .
..... .... ...... ......
فاض نعشك دفق .
مسح الترد وجوابي
أنزوت الوحوش ..
تمساح .. مرابي .. دوابي .
يا تلك .. التي .
الصالتا .. ما بتهابي .
وا .. وحشة بيوت .
فرقان .. عشش .. وكنابي .
...... ...... ...... ......
إن واروا الجسد .
ذي فاطنه ما بتوارا .
رباها الحزب .
تريانا .. ماها عدارا .
جيل من بعد جيل .
دي المن زمن مترارا
ربت .. كبرت ..
شتلاتا .. خير وبشاره .
...... ..... .....
توسدت نجيمة
ذراع كوكب مضيء .
مسافر .. وراحل إلي البعيد .
علي امتداد افقنا
تمدد الضياء نون نسوة .
تضمخت انامل البرازخ
.. العلو
بريحة الصباغ .. والكليت .
ضجت الأكوان زهوة .
مزهل .. مدهش ..
توحد اللغات والنشيد .
تنادت الاصوات ..
فاطمه ... فاطمة .
تدافع الغمام نشوة حفي
بالقادم الجديد .
يا فرحة السماء بالتي ...
يا حزننا الذي ..

مدني
16 أغسطس 2017