Post: #1
Title: ضو فاطنه
Author: أبوذر بابكر
Date: 08-13-2017, 08:44 AM
07:44 AM August, 13 2017 سودانيز اون لاين
أبوذر بابكر-
مكتبتى
رابط مختصر
صباحنا القيّل
تحت الضليل الرامى منك
شايل شمسو فى ايدو
ومباريكى
وفرحنا الميّل
وفات حد السكوت
مرق حاضن غناهو ويحكى عنك
فى نص البلد واقف
يناديكى
ويا فاطنة
سألتك بى دم البلد المدفق نيل
امرقى على الخلوق الشاته
تشحد فى سماك الفوق عزك
مغطيكى
ندهتك بى لسان شغفى الأساهو طويل
فكى جداول إسمك المسحور
واسقينا
شوفى بلية الولد المرق مجبور
ونادينا
اربطى جبيرة الخاطر الدوام مكسور
وداوينا
نرسم ليك شمس
محروسة بالأفلاك
نلون ليك قمر
فى حضنو ركّ ملاك
نحلب ليك غنا الليل المحين ريد
تشربى بى كفوفنا
لما تتكفى
وتنهلى من قلوبنا
لما تدفى
يا فاطنة
هاكى الفينا فضّل من غنانا
بعد عشرق علينا الصوت
وهاكى الدنيا مزروعة
مستفه بالشدر والناس
تسبح ديمه بى اسمك
لا بتفوت ولا بنفوت
لا بتموت ولا بنموت
هاكى رحيح ارواحنا كايسك يوت
شيلى الباقى من فضلة منانا
يا فاطنه
راوى الحلة غناكى
بى الفا فرح
يغشاكى يملاكى
بى الآ أرض
مكسيه بى رونق بهاكى
بى الطا طعم
اشهى من الشهد السكن جواكى
بى النون نعيم
ينزل عليك
يغمر رباكى
بى الها همبريب
يملا حيشان البلد
ومطر رحيم يرويها من تالاكى
|
|