بخصوص الهوية السودانية (بوست منبثق)

04:24 PM August, 10 2017

سودانيز اون لاين
علي دفع الله-سنار
مكتبتى
رابط مختصر

طبعا ما بحب البوستات البتنبثق من البوستات ؛ لكن البوست بتاع اخونا الاستاذ عبد الله عثمان ونقلو لي موضوع الدكتور النور حمد بصراحة فيه جهد كبير ومداخلات قوية وانا عندي قناعة تامة اي موضوع بزيد عن 5 صفحات وقمت اتداخلت بتكون زي الزول العاوز يلحق السوق .
برضو انا مش مثقف اوي بس ممكن اضيف واضافتي حا تكون في المداخلة الجاية ...

اولا للذين يصرون بأنهم عرب..
انا نفسي افهم الحاجة المشجعة او البتخلي الواحد مصر وفخور بإنتماؤه للعرب شنو !!!
يعني ما هي اضافة العرب للبشرية في الماضي او الحاضر وما اسواء ما اضافته الامة العربية في حاضرنا ..
الامة العربية اخص عرب الجزيرة العربية والشام مهما حاول المستعربين السود الانتماء لهذا الكيان تجدهم يصطدمون بعنصريتهم الفظة ولنا آلاف الدلاءيل ..
لماذا الاصرار على صبغ امتنا السودانية بالعربية او التعصب من بعضنا على هذا الانتماء المقرف لامة تتافف من حالة كوننا ننتمي لهم ..
العاصرنا عليهم شنو ؟؟
نواصل ...

هى الهوية دى شنو يا على؟؟

بجاوبك يا جلال

منقوووووووووووووول:

هى الهوية دى شنو يا على؟؟
هى الهوية دى شنو يا على؟؟
هى الهوية دى شنو يا على؟؟

يا علي وانت ليه عاوز الآخرين يعملوا ليك ما ممكن بنفس المستوى نقول وشنو الأضافته الزنوج والأفرقة لإفريقيتنا
بل بالعكس المجال العربي كان مجال الهجرات السودانية والإسهامات السودانية.. بكل سؤ الأعراب قول لي شنو الأكتر من كدا
كان متوفر لينا في المجال الإفريقي
في الحوار في البوست المعني أنا لاحظت إنه القلة الكانت بتأكد على عامل العروبة كان بتأكد معاها على الإفريقية أي أننا
خليط من هذا ومن هذا لكن في مجموعة كانت مصرة إنها تنفى أي علاقة بالعروبة وأننا زنوج وأفارقة وبس

تحياتي علي
وضيوفه
مافي خيارات تاني

حا ارجع ليكم عبد الصمد وحفيظ لحدت ما اكمل الشق الاول الخاص بي حملة لواء العربنة والجزء التاني الخاص بي حملة لواء الافرقنة..
اما جلال وقصي عليكم التوم ود بانقا تاني في سؤال بربط ليه راس زول وعمنا قوقل رضي الله عنه متمدد وملان اجابات .ولكن مع ذلك حا اجاوب ليكم من راسي دا عن سؤالكم ..

هي الإجابة من الرأس ساهلة؟!
هنا تكمن العبقرية ....
--------------
نحنا ذاتنتا Will improvise some more emanated questions

رغم تعدد السحنات واللغات واللهجات تضمنا وحدة جوهرية هي السودانوية

الوجدان المشترك

اختلاف في وحدة هو المعني الاوضح للهوية

Quote: رغم تعدد السحنات واللغات واللهجات تضمنا وحدة جوهرية هي السودانوية الوجدان المشترك اختلاف في وحدة هو المعني الاوضح للهوية

لطيف الشهير بي حسن
لك في القلب مودة ومضطر اجاوبك
السودانوية تجمعنا ...
وتبا لعروبة او افريكانا تفرقنا ..
سودانوية تجمعنا....
آسف للرد على لطيف الشيعي او كما قال الشريف عرفات في لحظة خطل
حا اواصل ...

مرحب استاذنا عبد اللطيف و الف مليار مبروك تانى
و ما دام جيت و اثق تماماَ فى اسلوب تفكيرك و عقلانيته
دايؤين الخطوط الفاصلة بين الهوية و الانتماء و المواطنة
عشان نفرز الهوية دى براها و نشوف مشكلتا معانا شنو
علاقة اللغة و الجنس و الدين بالهوية
تعريف الهوية
مكونات الهوية
مفهوم الهوية
انواع الهوية
خصوصيات الهوية معناها بأعتبارها فلسفياَ جوهر الشئ و حقيقته

ايوة
عشان نمرق من نظرية ابوالريقيع

شيخي المستنير الاكبر مشغول حاليا
قال لي قول لعلي " شوفت ليك زول لابس جلابية بناقش في الهوية " :))

يوست سايق

نحن وثقافة التنوع

باضدادها تعرف الاشياء, وكذا باشباهها تعرف
.
قد لا يجمعنا ارث تاريخى وثقافى كبير بالولايات المتحده الامريكيه, لكن يجمعنا بها ربما لحد التماثل التنوع بكل اشكاله

عرقيآ ولغويآ ودينيآ واقتصاديآ وسياسيآ.

بعد قرنين من الحرب التى كان وقودها ها التنوع , نجحت الولايات المتحده فى توظيفه ايجابيآ الى الحد الذى اصبحت تفتخر به ,

وليس غريبآ ان يحدثنا الرئيس

الامريكى السابق بيل كلينتون بأن السر وراء تقدم الولايات المتحده فى كل مناحى الحياة هو التنوع .

وليس غريبآ ان تحتوى مناهج كل المستويات التعليميه فى الولايات المتحده على

ثقافة التنوع بل وحتى الدورات التدريبيه المهنيه للشركات الامريكيه لا تخلوا مناهجها من تناول التنوع.

من الجانب الاخر يجمعنا التاريخ والدبن واللعه والعرق بدول الخليج العربيه ولكن يفرق بيننا التنوع.

فهم بحكم نكوينات مجتمعانهم المتناسقه والمتطابفه عرقيآ

وثقافيآ ودينيآ وحتى طائفيآ لا يوجد لديهم من التنوع الكثير ربما ماعدا التنوع القبلى الذى اصبنا منه واصابنا منه الكثير.

ولقد نجحوا كثيرآ فى توظيف هذا التماثل

قاقاموا مجنمعات مستقره اقتصاديآ وامنيآ تصل الى مرحلة الرفاه الاجتماعى.

اذا حاولنا قراءة واقعنا السودانى فى هذا المنحى فاننا نجد انفسنا متقوقون على الولايات المتحده فى اشكال التنوع.

فاضافة لاشكال التنوع التى يذخر بها مجتمعهم

فاننا نضيف اليها الفبليه والطائفيه والجهويه والمناطقيه.

كما ان حكوماتنا تمضى منذ الاستقلال فى توظيف الجانب السلبى من التنوع خدمة لاهداف بقائها فى السلطه.

مما ادى الى تشظى البلاد وتقسيمها والى اللجوء لقوة السلاح من بعض مكوناتها لضمان حقوقهم المهضومه.

ولم تسلم من هذا التوظيف السالب معظم القوى السياسيه التقليديه ببنائها لمناطق نفوذ مقفوله فى بعض ارجاء الوطن.

وللتنوع وتوظبفه سلبآ ايضآ ابعاد خارجيه تتمثل فى لجوء بعض المكونات الاجتماعيه والسياسيه الى بعض دول الجوار التى ترتبط بها عرقيآ وثقافيآ لحمايتها من

الصراعات السياسيه والعسكريه الجاريه فى هذا المجتمع.

مع اضمحلال التكوينات الاهليه مثل النقابات والانديه الثقافيه والاجتماعيه لم يجد الافراد يد من الارتداد الى مكوناتهم القبليه والجهويه لتعويض ما افتقدوه من

تلاشى هذه المكونات بفعل سلطه ترى فيها خطرآ على وجودها.

هذا التنوع ليكون ايجابيآ يجب ان ينعكس على مناهجنا التربويه التى تتحاشى اثارته خوفآ من اثارة النعرات فى حين انه لو اثير بالطريقه الصحيحه سيكون سبيلآ

الى نزع فتيل هذه التوترات.

يقتضى التوظيف الايجابى للتنوع الاعتراف بالمكونات المحليه لمجتمعاتنا فى نواحيها اللغويه والثقافيه وعاداتها وتقاليدها بل وتشجيعها والعمل على تطويرها بدلا عن محاولة

اذابتها فى مكونات اخرى لا تمت لها بصله.

دون الاعتراف بهذا التنوع سنظل نعانى من المواجهات السلبيه فى كافة مناحى تكويننا ولن تكون لبلادنا فرصه للحاق بركب الدول المتقدمه ما لم نقوم باداء واجبنا المنزلى

باشاعة ثقافة التنوع فى مجتمعاتنا باشرا ك اهل السياسه والدين والثقافه وكل اطياف المجتمع فى حوار صحى حول تنوعنا .ونزعم انه ان تم ذلك سيقدم الاجابه على كثير

من الاسئله المثاره حول هويتنا وانتماءنا

يا على ياخى قول انتا ماشى فى شارع فى اى دولة
لاقاك مطعم مكتوب عليهو مطعم القراصة
البيتبادر لى ذهنك طوالى انو ده مطعم سودانى
قول سيد المطعم ده من جبال النوبة
او دنقلاوى او هدندوى او شلكاوى
هل ده بينتقص من هوية المطعم
بل بيأكّدا و ح تستمتع بى اكل سودانى اصيل
علاقة الدين و اللغة والجنس بالحتة دى شنو
خصوصية الاسماء عامل مؤثر فى الهوية
المداخلة دى فى اطار الهوية الوطنية بس

الاخ على دفع الله وضيوفه الكرام - سلام عليكم
اولا اقدم مداخلتى فى الموضوع الاب ثم احاول اضافه اخرى متواضعه
لدينا في مجتمعاتنا تكون جزء من اسرتين ممتدتين اسرة الاب واسرة الام ويكون لك التزاماتك تجاه الاسرتين بشكل متساوي حتى لوكان هناك عداوة بين الاسرتين.
كذلك الحال والقياس بالنسبة للسودان. فالسودان مكون من مزيج متنوع من عرقيا وثقافيا يتراوح بين الأفريقية والعروبة. والتزاماته تجاه البعد الأفريقي تكون بنفس القدر للبعد العربي.
اما محاوله تعميم موقف فردى على اساس الانتماء لثقافه وبعد داخل المجتمع السوداني على حساب الثقافة والبعد الاخر هو نوع من الديكتاتورية المؤدية الى مزيد
من الصراع والتمزق......والاولى بنا تقبل وتعميق نماذج التمازج لدينا لإبراز هويه سودانية متميزة في ثقافتها ولها مواقفها التي تميزها في المحيط الإقليمي سواء في البعد العربي او البعد الأفريقي.
******************************************************************************************************************************

بدأيه أقدم سؤال بسيط الأبناء نتاج زواج الوالدين ينتموا لقبيلتين مختلفتين (جعليه ونوبة او شايقيه وشلك او فور وبنى عامر) هل يتفقون معكم في حوار إعطاء هويه واحده للسوداني وتهميش
الأخرى؟
بلغه العلم والرياضيات المعادلة تتكون من متغير وثابت وهنا المتغيرات ثلاثة عربيه وأفريقية وثالث يعتمد على هذين المتغيرين تزيد وتقوى قيمته بتضاؤل المتغيرين العربي والأفريقي والثابت هو الجغرافيا.
نقف على ارضيه ذات بعدين عربي وأفريقي وما يجب ان نقف على هذه الأرضية والعمل على تأكيد البعد الثالث اعتمادا على ارضيه متمازجة تشكل فيها الابعاد الثلاثة فضاء الهوية السودانية
ومحاوله وصف الوضع بقيامه على بعد واحد اما عربي او أفريقي يعنى تفكيك الجغرافيا والانقسام وضياع السودان كحاله لها تميزها الثقافي والاجتماعي عن المحيط الإقليمي والعالمي.
ضروري نحاول نقبل حالتنا ونرسم المستقبل على هذا الأساس زى الثقافه الهنديه مثلا اللى اثبتت تميزها وثرائها من خلال تنوعها واختلافاتها...........
والا سيدخل السودان القرن ال 22 (ان بقي على الخارطة) ونحن نبحث لأي ثقافه ننتمي والعالم يتطور من حولنا.
.

تحياتى

نواصل في متصلقي العربنة
اي واحد له تجربة في اي بلد عربي حتى ولو كان يحمل كرتونة مختومة بالشرف سيتهكم عليه في كل بلدان العرب من المحيط للخليج ..
هذه ليس عقدة او مركب نقص بل هي الحقيقة فعلام الاندفاق والتلصق ..
في مصر التاافهة كلنا حتة بوابين
وفي الخليج مهما على شانك وابيض وجهك انت عبد ولو طالت عمامتك
وفي الشام سوريا فلسطين لبنان الاردن والعراق انت عبد و فولك فستق العبيد ..
اعلم جيدا الانفة والكبرياء والمجد والتاريخ والعزة لكل مكوننا الاثني وهو جواز مرورنا لقلوب هؤلاء الاجلاف فعلام التلصق والاندفاق بنسبنا الزيف للعباس اوعبد الله بن الزبير او لجهينة او لي من جدود هؤلاء الاعراب..
نواصل....

معليش الموضوع يتكلم عن الدونية،
لان الهوية هي ابراز الجزور والحقائق دون اقحام التعاملات الاخرى،
بينما موضوع الاستاذ علي يتكلم عن التعالي والدونية المتلازمتان....
..
نزلت هنا، ومعفي من باقي الرد...
..

سلام يا علي
مرة خشيت في نقاش مع أول كفيل لما جيت السعودية
بدون ما أشعر قلت ليه نحن عرب وأولاد عرب قالي لي أولاد عرب نعم لكن ما عرب غلبني الأقولوا
لكن هو نفسو قال لي أبشرك ما براكم - المصريين واللبنانيين والجزائريين والتوانسة والفلسطينيين وجزء كبير من المغاربة والموريتانيين والليبيين كلهم أولاد عرب لكن ما عرب خُلّص شفت كيف بس ديل شايلهم اللون فقط
خليك من عربي
لو زول قال ليك انت ما سوداني هل المسألة دي بتأثر فيك وبتحسسك بدونية ؟
أي زول اعتقد زي ما عايز ماهو ملبسين فينا كلمة كسالى

"انا نفسي افهم الحاجة المشجعة او البتخلي الواحد مصر وفخور بإنتماؤه للعرب شنو !!!"

اخونا على..
سلامات..
لو الشخص عربي فهذه وحدها يجب ان تكون اكبر مفخرة ومشجع له ليحرن فوقها.. ما عندى مشكلة مع العرب.. بالعكس اعترف بما قدموه للبشرية والقدرة.. وتجدنى اختلف مع اى محاولة لدمغ مجموعة معينة وتعميم صفات سالبة عليها.
اقول هذا.. وفى الجانب الاخر اعجب من سودانى له جذور عربية ويريد ان يختطف هوية السودان الإفريقية وينسبها لمجموعته.. زمن مثل هذا ولى الى غير رجعة. عرب السودان لهم الحق ان يفخروا باصولهم العربية بل هذا مطلوب من اجل رفد التنوع وخصوبة المجتمع.. وقبل هذا لتنمية ارثهم العربى وتنميته.. فى السودان قبائل عربية لم تختلط مثل عرب كردفان والبطانة. وعلينا ان نفخر بهذا المكون والتنوع الإثنى.. ولكن لن نسمح لاقلية إثنية ان تعرف هوية قارة كاملة .

Quote: شيخي المستنير الاكبر مشغول حاليا قال لي قول لعلي " شوفت ليك زول لابس جلابية بناقش في الهوية " :))

قول ليه ما شايف بشاشا في البوست الرئيسي لابس "جلابية الاعراب" وبعد دا يقول ليك انا كوشي
بشاشا تخلي ... علي دفع الله تشيل :)

......

بالنسبة لموضوع البوست دا والبوست الرئيسي انا بعتبر دا جدل بيزنطي بامتياز ...
بلدكم بهناك غرقانة لي حدها وانتوا بجاي بتتناقشوا في مواضيع مترفة ...
غايتو سجم السودان الراجيكم ...
.
.

اجابة لسؤال جلادونا وقصي (هي الهوية دي شنو يا علي)
الهوية هي احساس بالإنتماء لكيان جغرافي فيه ناس البجمع بينهم اكتر من البفرق بينهم برغم تناقضاتهم واختلافهم في كتيييير من العادات ..
الهوية هي تناغم برغم نشاز طرى على اثنيات المكون الجغرافي في حيز ربط بينهم الجوار والمناخ والافراح والاتراح ..
الهوية هي كاءين يمشي بين المجموعة في تلك الديار عشقا ووعدا وتمني بيوم بكرة اجمل برغم صعوبة التحقيق ..
الهوية هي ان تجد جارك يختلف معك في اللسان والبيان والغذا ولكن بقدرة قادر انت مجبل على حبه ومشاركته كل لحظات حزنه وفرحة بقلب راضي
الهوية هي حينما تجبركم الظروف لمغادرة هذا المكان تكونوا انا وودعمي على الغريب..
نقاط التواصل و التآلف والتقارب اسهل الطرق للاندماج الكلي لهذا الكيان الاسمو السودان ...
ولكن تبا للاستعراب و مروجيه وتبا للافريكان ومروجيها ..
هويتنا هي السودانيوية .
التاريخ والجغرافيا الحاضر والماضي والمستقبل هو من اراد ان نكون سودانيين فعلام الهروب والدناءة لقوم هم ادنى منى ..
نواصل.....

طه السيد اسهب في ما اطنبت فيه
منبر المنابر السودانوية هو انتم

أخونا علي دفع الله وضيوفه الكرام! سلام عليكم !
سؤال الهويه دا سؤال ظللنا نلتاكه من ثلاثينيات القرن الماضي دون جدوي وذلك لأننا سألنا السؤال الخطأ والذي بدوره قاد إلي إجابات خطأ و مفخخه كمان!! في العام ١٩٩١ قدمت ورقة بعنوان سؤال الهوية أم التميه بمركز الدراسات السودانيه بالقاهرة فحصاً لمقولة وردت في ميثاق التجمع الوطني الديمقراطي والتي تقول بأنهم أرجأوا الإجابه عن سؤال الهوية للمؤتمر القومي فلكأنما الهوية شيئ مادي كالحلاوة يمكن تقسيمه كأن تقول للشايقي شيل شلوخك وأمشي وللبجاوي هاك خلالك و غور من هنا ! فيا جماعه الهويه خيار فمن إختار أن ينتمي للعباس فلينتمي ومن إختار أن ينتمي للنميانق فلينتمي ولكن وفق شروط محروسة بالقانون ألا وهي إحترام هذا الإختلاف !! فيا جماعه السودان بلد مهاجرين شأنه في ذلك شأن أمريكا و كندا وأستراليا فهذه البلدان لم يرهقها هذا السؤال المضلل لأنها أدته كواجب منزلي وفق قوانين وتشريعات تسمح لأن من يصل الأراضي الأمريكية بطريقة شرعية مواطن أمريكي لديه كل الحقوق وعليه كل الواجبات غض النظر عن نوعه، جنسه، دينه!! ولذلك إتجهوا لسؤال التنميه فهو سؤال البرامج وتنفيذها و جدواها الإقتصاديه والإجتماعيه والثقافيه!
غداً نواصل في فحص مقولات دعاة الأفريكانية ناس فيلب غبوش وعبدالقادر مرسال ودعاة العربّانيه ناس خضر حمد والمحجوب ودعاة الخلاصيه ناس الآفروعروبيه! ودعاة سؤال التميه ويمثلهم إبراهيم العبادي! وأتمني أن لا ينفلت البوس في لجاج النقاش !

من روايات غسان كنفاني
واحد مع الاجتياح الاسرائيلي لفلسطين . اضطر يخلي طفلو الرضيع في البيت ويهرب مع اسرتو . ما كان في طريقة يرجع ليهو
ومرت السنوات ويجد الفرصة بعد استقرار الاوضاع وسيطرة اسرائيل . فرصة يزور وطنو وبيتو
الاحاسيس والذكريات .. والرغبة الممضة في رؤية ابنه
وجد البيت كما هو . نفس التفاصيل داخله وخارجه
وجد اسرة اسرائيلية تسكن البيت . وسألهم عن ابنه . قالو ليهو انتظرو بجي هسة
وفعلا دخل شاب يلبس ملابس الجيش الاسرائيلي
وتمت المواجهة . ولدو اسرائيلي لن يتورع عن قتال الفلسطينين
هي رواية كاملة مليئة بالمشاعر والمفهوم حول الوطن
عائد الي حيفا اسمها اظنو
ف شنو يا علي
كلامك صاح نحن هنا داخل الوطن ماهي مشاكلنا وكيف الخروج منها .

لحين ميسرة
او كما قال ابسن رضوان الله عليه.

Quote: لماذا الاصرار على صبغ امتنا السودانية بالعربية _____________ العاصرنا عليهم شنو ؟؟

http://gulfup.co/9lzd0ce5nzuihttp://gulfup.co/9lzd0ce5nzui


العاصرنا عليهم عمتك اللافيها فوق راسك يا على...

هاك:

(حديث مرفوع)
حَدَّثَنَا مُوسَى بْنُ زَكَرِيَّا ، ثنا عَمْرٌو ، وحدثنا ابْنِ عُلاثَةَ ، ثنا ثُوَيْرٌ ، عَنْ خَالِدٍ ، عَنْ مَالِكِ بْنِ يَخَامِرَ ،
عَنْ مُعَاذِ بْنِ جَبَلٍ ، قَالَ : قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ : " الاحْتِبَاءُ حِيطَانُ الْعَرَبِ ، وَالاتِّكَاءُ رَهْبَانِيَّةُ الْعَرَبِ ،
وَالْعَمَائِمُ تِيجَانُ الْعَرَبِ ، فَاعْتَمُّوا تَزْدَادُوا حِلْمًا ، وَمَنِ اعْتَمَّ فَلَهُ بِكُلِّ كَوْرٍ حَسَنَةٌ ، فَإِذَا حَطَّ فَلَهُ بِكُلِّ حِطَّةٍ حَطُّ خَطِيئَةٍ )...

(اختصت العرب بأربع : العمائم تيجانها والدروع حيطانها والسيوف سيجانها والشعر ديوانها)...
____

نا بن جلاء وطلاع الثنايا .. متى أضع العمامة تعرفوي

فجاءت به سبط البنان كأنما *** عمامته بين الرجال لواء

تلوث عمامة وتجر رمحا *** كأنك من بني عبد المدان
___
قال جرير ..
يا أيها الرجل المرخي عمامته *** هذا زمانك إني قد مضى زمني

ابسن وحات النبي ما شردت
بس مشغول للطيش

الأستاذ على دفع لله وضيوفك الأكارم لكم التحية سواء أكنا عرباً أوأفارقة ما أظنها تفرق كتير لنكن سودانيين فقط ولننشغل بهمومنا ومشاكلنا الكتيرة (الزى الرز) على قول صاحب المصطلح ياخوانا نحن فى شنو ؟ والعالم في شنو ؟ يعنى خلاص إنتهينا من مشاكلنا وبقي لينا موضوع الهوية دا الشغل الشاغل والبلد من شمالها لغربها وشرقها وجنوبها سايطة وجايطة شىء كوليرا وشىء خطف وشيكات بدون رصيد وغلاء فاحش وقضايا إجتماعية ماأنزل الله بها من سلطان وبعد دا كلو محتارين نفتش فى هوية بين العرب والأفارقة خلونا سودانيين بس ونهتم بمشاكلنا الداخلية ولما تستقر بلدنا ويرتاح إنسان السودان الوقت داك كونوا طليان على كيفكم ولكم الود والتقدير