خذلتنا يا مريخ

10:05 PM July, 25 2017

سودانيز اون لاين
عبد الصمد محمد-السعودية
مكتبتى
رابط مختصر

إداء مهزوز خاصة في الشوط الأول في مباراة كنا ننتظرها منذ عدة أسابيع
وفضيحة إنو قمة الكرة السوداني يفتش للتعادل أمام الفريق التاني للهلال للسعودي
المعلق كان متحيز بدرجة تغيظ ودا ما عدل دا
التحكيم برضو ما كان عادل
ما عارف بطني طمت من البطولة
فريق ما عندو صانع ألعاب ولا بيعرف يسرّق

حبيبنا عبدالصمد .. مودتي
لم أشاهد المباراة ..
مع أني هلالابي في السودان .. لكن هنا بشجع النصر
كنت منتظر المريخ يهزم هلال السعودية ..
كورتنا بدون تخطيط وخطط ..
كان أملي كبير في فوز المريخ .. ويمكن أول مرة اشجع المريخ عشان هلال السعودية
خبر محزن ..
ما في فايدة للدورة نفسها

تحياتي عبد الصمد
بغض النظر عن شماتتي كسيد بلد في الوصيف ورغم الفرحة لكن النصيحة لله حسيت بالأسى وأنا ارى الفارق الكبير بين اللاعب السعودي و اللاعب السوداني
بالأمس شباب هلال السعودية أنا أجزم انهم لا يتفوقون علينا في المواهب الفطرية ولا في القوة البدنية وقد وضح تفوق المريخ في اللياقة في الشوط الثاني لكن التفوق كان واضح جدا في معرفة اللعيبة بأساسيات كرة القدم و واضح ان هؤلاء الشباب نتاج مدارس كرة قدم وتعليم منظم وضح في تفاصيل صغيرة مثل استلام الكورة و التصرف السليم تحت الضغط ولعب الباص ودي كلها حاجات يتم تعليمها في مدارس الكورة
اضف لذلك انضباطهم التكتيكي و الالتزام بتعليمات المدرب ودا يرجع لصغر سنهم اولا و أيضا لأنهم خريجي مدارس تعلّم المبادئ و تشرح اهمية الالتزام لاتعليمات
تعال شوف عندنا احرف حريف وبلعب بموهبته الربانية يحكي ليك اتعلم الكورة كيف او كان في المدرسة مثلا حصة الرياضة بقضوها كيف؟ واحد يجيب الكورة من المكتب ويشوتها في نص الحوش و هاك يا دافوري !
عشان كدا اللاعب السوداني مهما توقعنا منه لن يقدم أداء مفيد للفرقة ومنضبط ولن يهتم بالتعليمات ولا بالحفاظ على لياقته وتوزيعها إذا كان الاستلام الصحيح لا اسه ما بعرفه او اتعلمه كبير
بعد ان كنا في مقدمة الدول العربية و لاعبينا ومدربينا اسسوا لهم الاتحادات و الاندية سنقبع في المؤخرة مالم نرجع للتأسيس السليم بالمدارس السنية و نستقدم لها مدربين محترفين واساسا هم معلمين قبل ان يكونوا مدربين
غايتو بدري علينا خالص ح نقعد في العك دا وصرف القروش في لعيبة منتهين ليس لديهم ما يقدموه اكتر من كدا و نظل ندور في الدائرة المفرغة و دول مثل السعودية تبني مستقبلا حقيقيا للكرة

١٤ تمريرة سليمة للاعبي الهلال تم نقل الكرة من نصف ملعبهم إلي خط ١٨ كهجمة واعدة ولعيبة المريج يتفرجون.
تابعوا الشوط الأول والتحليل

القول ما قلت يا ود البشرى

تسلم ياخ

على حسب رأي الشخصي, بقدر ما قدم الهلال والمريخ للسودان في السابق, الأن يساهموا في تدمير الكرة السودانية, ما ممكن البلد كلها تشجع فريقين بس وحتى أسماء الفرق التانية مشتقة من إسم الفريقين, ده حاصل في ياتو بلد غير السودان؟ وبعدين حتى ألقاب اللعيبة مشتق من أسماء لعيبة دوليين, ياخي إسم كاريكا ده لو مشيت في موطنه الأصلي ما بتلقى لاعب لقب بهذا الأسم.
المصيبة حتى الفريق الظهر مؤخرا وأثبت نفسه محليا وإفريقيا مثلا هلال الأبيض, برضو إسمه الهلال,,, نتمنى تغيير الإسم إلي إسم مثل التبلدي....

أتمنى أن تظهر فرق تنافس الهلال والمريخ عشان نرتاح منهم شوية.

الشكر لكم يا أحبة على المشاركات الضافية، لكن ما يحيرني أن المريخ يظهر في بعض المباريات بتنظيم جيد وخطط ممتازة لا سيما أن له مدرب أجنبي قدير وعد بالعودة بكأس البطولة ويرأس بعثته هاشم الزبير ذو الخبرة الإدارية من أيام النميري. على كل حال اللعيبة وعدوا بالتعويض أمام الترجي والفريق العراقي القوي لذا فمباراة يوم الخميس ستكون صعبة شديد علينا وسيتضح لو فعلاً المريخ لا زال فريقاً كبيراً وأنه لم يكن في يومه أمام هلال الرياض أمام نقنع من الكورة

كانت مباراة ضعيفه جدا وليس لها علاقة باسم وسمعة المريخ صاحب الكاسات المحمولة جوا ... فعلا لا يوجد كورة في السودان فعلينا ان نقتنع ولا نشارك في المحافل الدولية الا بعد زوال هذا الجيل من الالعبين فقد ياتي مستقبلا جيل يمثل السودان خير تمثيل اما هؤلاء فحسب راي الشخصي لا يناط بهم تمثيل المريخ ولا السودان خارجيا .... مهزلة ان تتم المباراة بالتيم الثاني او الثالث من قبل الهلال وان يكون المريخ بكامل نجومه .. والحمد لله انو الهلال لعب بالصف الثاني لكانت فضيحتنا بجلاجل وربنا قدر ولطف بينا ... غايتو الواحد ما عارف يلقاها من وين ولا وين ...
تحياتي صاحب البوست وضيوفه الاكارم ....

ياسر العيلفون ....

اتفق معك اخى عبد الصمد فى افتقاد المريخ لصانع العاب

كمشاهد ومتذوق لدى بعض الملاجظات عن مباراة الامس
اداء المريخ سىء فى الشوط الاول وتحسن فى الشوط الثانى
بدا غارزيتو بتشكيل خاطىء باشراك راجى ونمر وتبديلاته بالنعسان والتكت واحمد ادم افادت الفريق
معظم الاهداف التى ولجت فى مرمى المريخ فى المباريات الافريقية الاخيرة وفى مباراة الامس جاءت عن طريق اختراق عمق الدفاع
رمضان عجب افيد فى الهجوم وضفر يمكن اتن يغطى الطرف الايمن
لاعبا الارتكاز الافارقة فى المريخ لا يقومان باى ادوار هجومية مثل التسديد البعيد
السمانى يرسل العكسيات من مسافات بعيدة وفشل فى تجاوز المدافع وعكس كرات خطرة

شكراً ياسر العيلفون
شكراً محمد سيد أحمد على الملاحظات الفنية وبالفعل التغيير كان مهماً بسبب توهان راجي ولا أدري ما فائدة الأفارقة - زمان كنا بنستجلب لعيبة محترفين حقيقيين هسة بقينا نجيب تمامة عدد
أظن أن المريخ به لاعبين ذوي إمكانات فردية هائلة بس عاوزين مدرب يخلطهم من جديد ويعيد توزيع الخانات والمهام وخطط اللعب
ما شاهدته من أداء لكل الفرق بما فيها الترجي يمكن باخطة لعب ممتازة التغلب عليها