القانونيين : المسئولية التقصيرية

07:30 AM July, 12 2017 سودانيز اون لاين
حمد عبد الغفار عمر-
مكتبتى
رابط مختصر
المسؤولية التقصيرية
يقصد بالمسؤولية عند إطلاق هذا المصطلح تحمل الشخص لنتائج و عواقب التقصير الصادر عنه أو عمن يتولى رقابته و الإشراف عليه
يتولى رقابته أو الإشراف عليه
مثلا الإبن القاصر لو تسبب في ضرر لشخص هل على أبيه تحمل الضرر؟

سلام يا حمد
زمان لمن كنا في الثانوي العالي كان عندي كلب عضّ ود جيراننا. والولد ودوهوا المستشفى لكن ناس المستشفى طالبوا يضرورة إحضار اورنيك 8 من الشرطة باعتبار أن الفعل الذي وقع عليه فعلاً جنائياً ( Criminal act).
المهم اضطر" ولد جيرانا" لفتح بلاغ وجابوا أمر قبض في مواجهتي، وأخضعوا الكلب لمراقبة السلطات البيطرية ( Veterinary probation). ونحن طبعا ما كنا فاهمين موضوع المسؤولية التقصيرية الصارمة ( The strict vicarious liability) لمالك الحيوان إلا بعد دخولنا كلية القانون.
اما بالنسبة لمسؤولية الأباء عن تصرفات الاطفال القُصّر (The un-emancipated children) فالقانون الإنجليزي يقر بتلك المسؤلية، وكذلك القانون الأميركي الذي توسع فيها إلى درجة تحميل ليس الآباء فحسب، بل وحتى شركات التأمين مسؤولية التبعات المترتبة على أفعال الاطفال ( The consequences of the children’s acts) كما في بعض الولايات.
وقياساً على ذلك يمكن أن يصبح الآباء مسؤولين تقصيرياً(Vicariously liable) عما يغترفه أطفالهم من أخطاء تلحق اضراراً بالآخرين أو ممتلكاتهم، إعمالاً للمثل الشعبي " البلدي المِحن لا بد يلولي جهالن"



محبتي

مرحب الفاتح ميرغني

شكرا للشرح الوافي
وما دام الله جابك هل كلمة tort ممكن تكون مرادفة لـ vicarious liability

البلدي المِحن لا بد يلولي جهالن
دي مناسبة جدا

Quote: مثلا الإبن القاصر لو تسبب في ضرر لشخص هل على أبيه تحمل الضرر؟

الأخوان حمد والفاتح سلام كبير ..
توقعت أن يجيب على سؤالك أحد الزملاء ممن لهم دراية بالقوانيين الساارية في الخليج ..
لكن لا بأس خليني انفض الغبار عن الذاكرة ..
في تقديري كل القوانين المدنية كما تفضل الأخ الفاتح ..
تكاد تكون مشتركة في تعريف ومبادئ المسؤولية التقصيرة ..
لكن بالضرورة الاجابة الدقيقة تتطلب معرفة قانون البلد الذي يحكم الحالة ..
خاصة إنو في بلدان على الرغم من وجود قانون للمسؤولية التقصيرية ..
يلعب العرف الاجتماعي دور فاعل فيها..
عندنا مثلا في السودان ..
في الغالب الأعم الناس يعفون عن الصغار عندما يرتكبون أخطاء تسبب ضررا للغير ..
ويكتفون بقبول الاعتذار من كفيل الطفل سواء كان أبوه أو آخر ..
لذلك سوف أقصر الإجابة على ضوء المبادئ العامة المشتركة ..
المسؤولية التفصيرية قد تحكمها حالة تعاقدية أوغير تعاقدية أو إدارية ..
المسؤولية التعاقدية هي فعل أو امتناع ..
يتسبب فيه أحد اطراف التعاقد ما يترتب عليه ضرر ..
يلحق بالطرف الآخر بقصد أو عن طريق الخطأ ..
أما المسؤولية التقصيرية غير التعاقدية ..
فهي تقع بسبب فعل أو امتناع ينتج عنه اضرار بالغير ..
الفرق بين المسؤولية التعاقدية وتلك غير التعاقدية يمكن تلخيصها فيما يلي :
في المسؤولىة التعاقدية يشترط أن تكون العلاقة مبنية على عقد ..
ومن ثم فلا بد من توفر شرط الأهلية لتحمل المسؤولية التقصيرية التعاقدية ..
أما المسؤولية التقصيرية غير التعاقدية فلا تشترط أهلية الفاعل ..
فإن توفرت علاقة السببية بين الفعل والفاعل..
يتحمل الفاعل مسؤولية الضرر سواء كان كامل الأهليه أو فاقدها كالطفل مثلا ..
هنالك أيضا نوع آخر من المسؤولية التقصيرية غير التعاقدية ..
وهي الناتجة عن أخطاء إدارية ..
وللقضاء السوداني أحكام عديدة في هذا الجانب ..
من أشهرها سابقة ميشيل قطران ضد حكومة السودان..
مجلة الأحكام القضائية السودانية 1958 ص 85..
حيث قضت المحكمة بتعويض المدعي عما لحقه من ضرر جراء سقوطه في مجرى ..
باختصار أركان المسؤولية التقصيرية هي الضرر وعلاقة السببية بين الفعل والفاعل..
وللإجابة على سؤالك بصورة مباشرة :
حكاية الاستاذ الفاتح مثال جيد بجانب إضافته عن القوانين الانجليزية والأمريكية ..
فقد درجت الكثير من البنوك وشركات التأمين وأحيانا شركات السكن الأوربية ..
تقدير مبلغ تأميني تدفعه الأسرة لتغطية الضرر الناتج عن مسؤولية أطفالهم التقصيرية ..
انا شخصيا بدفع 17 يوري شهريا لتأمين ما يمكن أن يحدثه أطفالي من ضرر لممتلكات الغير ..
وممكن أن يشمل التأمين حتى أشياء منزلك ..
مثلا طفلك الذي يتسبب في كسر زجاج بيتك أو شباك جارهم ..
يتحمل أبوه أو من يكفله أو شركة التأمين تعويض الضرر الناتج ..
سواء تعمد الطفل ذلك الضرر أو وقع الضرر بسبب الأهمال وعدم الانتباه ..
القيمة التعويضية للضرر مسألة تقديرية للقاضي وفقا لمبادئ العدالة ..
إذا ما وصل الأمر للقضاء دون تسوية ..
بمعنى آخر القاضي غير ملزم بقبول المبلغ الذي يطلبه المتضرر في كل الحالات.

Quote: وما دام الله جابك هل كلمة tort ممكن تكون مرادفة لـ vicarious liability

بعد إذن الفاتح ..
Law Of Tort هو المصطلح المستخدم للمسؤولية التقصيرية وإليك التعريف:

Quote: A body of rights, obligations, and remedies that is applied by courts in civil proceedings to provide relief for persons who have suffered harm from the wrongful acts of others. The person who sustains injury or suffers pecuniary damage as the result of tortious conduct is known as the plaintiff, and the person who is responsible for inflicting the injury and incurs liability for the damage is known as the defendant or tortfeasor.

http://legal-dictionary.thefreedictionary.com/Tort+Law
مودتي لكما وشكرا على انعاش الذاكرة.

Quote: " البلدي المِحن لا بد يلولي جهالن"

مربع دوبيتا

صخرات الجبال كيفن رحيل حجارِن
ونحن قلوبنا ما بسكن خلل في ديارِن
بمشن دقري بالدرب المشوبو كبارِن
والبِلد المحن لابد يلولي صغارِن

عبدالمنعم الطيب حسن
(باحث في التراث الشعبي)*

...............................
* يُقرأ مع بوست صديقنا ذو اليد في الصفحة الاولى؛

يا حمد الافتاء، وأستاذنا/ محمد علي طه الملك في المنبر، من الممكن أن يوقع بالمرء تحت طائلة المسؤولية التقصيرية الصارمة. والنسبة لسؤالك أعتقد أن عزيزنا الملك قد أجاب عليه إجابة ضافية، لكني عاوز اضيف حاجة " صغنّونة" عن الـ ( Tort) وهي كلمة فرنسية الأصل وكانت تستعمل في أوساط الطبقات المخملية وتعني "الخطأ". وفي فيلم" الفرسان الثلاثة" المأخوذ عن رواية الكاتب العبقري الكسندر دوماس، خاطب الكاردينال دي ريشيليو الملك لويس الثالث عشر بقوله : لقد أخطأت يا مولاي" ( Vous avez eu tort)) وقد أثارت العبارة جدلاً آنذاك لأن الملوك لا يجوز تخطئتهم مهما كانت رفعة اللغة المستخدمة، عملاً بقاعدة شاعت وسادت في القرون الوسطي تقول:" The king can do no wrong". ودي القاعدة الإستلهما شعراؤنا عندما قالوا:" أغلطوا إنتو يا أحباب نجيكم نحن بالأعذار"!

عزيزنا عبد المنعم الطيب حسن : احبك ياخ وربنا يحفظ السندريلا الجميلة الفي بوروفايلك. وعليك الله دائماً أبحث وواصل من غير فواصل. أنا من المحبين جداً لرباعيات الدوبيت ورباعيات الخيام زاتو!


محبتي

هههههههه ..
دا تواضع منك ساكت يا أستاذ الفاتح ..
الفرنسيين هم العلموا الشعوب وهم من وضعوا قواعد القانون ونظم الدولة في العصر الحديث ..
إضافتك فيها توسيع للمعرفة.
:
عزيزي عبد المنعم سلامات ..
أم نجمة دي شايفا كانت قاعدالك في زورك كان ما فكيتها كانت أذتك ههههه ..
لكين تتمة البيت الجابو الفاتح غاية في الروعة .
لكم مودتي.

ههههها يا ملك
لقيتك شفت لكن؛
تفهما وهي طايرة....

..........
شكرا يا رشيق
.........
سلامات أستاذ الفاتح
تسلم حبيبنا

ياسلام عليكم ياخ
بوست دسم جدا
أعتقد اجمل تقافة طُرحت في المنبر ده الثقافة القانونية لأن لها أعمدتها في المنبر من امثال المولانات الملك والفاتح وكبر وود شيقوق وغيرهم
يستحقوا لقب الـ all rounder البوصفوا بيهو اللاعب الشامل في لعبة الكريكت لما لهم من إلمام وإحاطة ليس في مجال القانون وانما في كافة صنوف المعرفة
يديكم العافية

شكرا حيدرنا والله كلكم عندكم إضافات ومعارف نوعية بنستفيد منها ..
باين لي حمد لبد كان كايس ليهو مراقة ولما الموضوع ما جاب تمنو زوغ هههه.

السلام عليكم
مولانا الملك ومنعم وحيدر والفاتح

أبدا يا مولانا ما زايغ
لكن أمس انزلقت على السلم لو لا لطف الله كان مشكلة
ما بقدر أقعد في الكرسي فترة طويلة وكتابة الجوال ما بحبها عديل
عملت مرهم والحالة تحسنت كتير في المساء أو بكرة بنزل الملعب
واصلوا لحدي ما أجيكم

كفارة حمدنا والف سلامة ليك ياخ
-
الإنزلاقة دي فيها مسؤولية تقصيرية واضحة
قول لصاحب العمارة يقبض على المقاول

حمد سلام عليكم
عندي إضافة بسيطة لمداخلات الاساتذة الكرام .
ساضيف المواد المتعلقة بالمسؤولية التقصيرية في القانون السوداني .
حيث ورد في قانون المعاملات المدنية ١٩٨٤ الاشارة للمسؤولية التقصيرية في الباب الثالث ، فقد ذكرت المادتين ١٣٨, ١٣٩ من هو ملزم بالتعويض .
المادة ١٣٨ : كل فعل سبب ضرراً للغير يلزم من ارتكبه بالتعويض ولو كان غير مميز.
المادة ١٣٩ : اذا كان من صدر منه الفعل الضار غير مميز ، وتعذر الحصول على التعويض من ماله جاز للمحكمة أن تلزم من هو مسؤول عنه بمبلغ التعويض.
تحياتي

" الـ all rounder البوصفوا بيهو اللاعب الشامل في لعبة الكريكت"
بمناسبة رياضة الكريكيت اتذكر عندما أجرت باكستان أول تجربة في سلسلة تفجيراتها النووية، علّق الراحل زبيغنيو بيرجنيسكي، مستشار الأمن القومي الأمريكي الأسبق في إدارة كارتر، عن ذلك الحدث فقال: " لا شك أن باكستان بهذه السلسلة من التفجيرات قد خلقت رادعاً مهاباً في مواجهة جارتها اللدودة الهند، وهو أمر قد يبعد شبح الحرب النووية بين الدولتين حول كشمير، ولكن لو قيض لمثل هذه الحرب أن تندلع يوما، فإن شرارتها ستكون مباراة "كريكيت ". !
لم أكن اعرف أن هذه الرياضة هي القوة الوحيدة القادرة على تحشيد وجمع شعوب تلك الأصقاع إلا بعد تعليق بيرجنسكي وما شرحته لي أنت لاحقا عن اهتمامهم وحبهم لهذا الضرب من ضروب الرياضة.

لقيتك خطير يا مان وكمان بتدرس قانون بالدس. لوول
كفارة وسلامتك يا حمد، وسامحنا ياخ، الواحد شكلو كده زي حتل في البوست ده!




.محبتي

حمد لله على سلامتك يا حمد ..
المراهم المسكنة دي ما كفاية وأوع تستهون الانزلاقات لازم تراجع طبيب أو فيزوتربي ..
الموضوع دا قد تراه بسيطا الآن لأنك بحمد لله لا زلت بصحة شابة ولكن ح يتعبك لى قدام إذا أهملته

مولانا الملك
مشكور كتير على الشرح باقي دول الخليج ما عارف لكن في السعودية على ما اعتقد في حاجة زي دي
بس الانا عارفو إنو القانون لا ينطبق على الأطفال دون سن الرشد وفاقدي العقل
يبقى من الظلم معاقبة شخص آخر بجرم غير مستوفي لدرجة الاتهام
حتى الاسلام يرفع القلم عن ثلاثة الطفل والمجنون والنائم


بخصوص الشباب انا لحدي أول أمس كنت قايل نفسي شاب لكن تأكدت إنو المرحلة دي فاتت لأنو زي الزلقة دي كنا بنتصرف تقلب هوبة أو تعمل أي حركة تعيد ليك التوازن
لكن الحصل إنو أنا وجركانة الموية اتكومنا في السلم دون أي محاولة

الإنزلاقة دي فيها مسؤولية تقصيرية واضحة قول لصاحب العمارة يقبض على المقاول

المشكلة انزلقت الجزمة وما متذكر اشتريتها من وين

يا حمد
ولدك مالو
هبب شنو؟

كل عام وانت بالف خير

هلا عبدالمنعم
صخرات الجبال كيفن رحيل حجارِن ونحن قلوبنا ما بسكن خلل في ديارِن بمشن دقري بالدرب المشوبو كبارِن والبِلد المحن لابد يلولي صغارِن

ياخ دا كلام فيهو ثقة وتحمل مسئولية بشكل غير طبيعي
عشان كدا كانت الإدارة الأهلية بتمثل ذراع قانوني مهم جدا في تنظيم حياة الناس غير المتعلمين
كان الاعتراف بالجرم وتحمل عواقبه يشكل طريقا سهلا لحل المشاكل بالتراضي الحميم

قد يكون الدوبيت دا اتقال في بداية حرب ولكن أهو تحمل المسئولية

حيدرنا كيفك

دراسة وممارسة القانون تفتح الأفق على الحياة والإلمام بكل مستعصياتها ومعاصيها
نتمنى إنهم يواصلوا في تثقيف قانوني محتاجين ليهو بشدةفي زمن ضياع الحقوق دا

مرحب أحمد سيدأحمد
المادة ١٣٨ : كل فعل سبب ضرراً للغير يلزم من ارتكبه بالتعويض ولو كان غير مميز.
المادة ١٣٩ : اذا كان من صدر منه الفعل الضار غير مميز ، وتعذر الحصول على التعويض من ماله جاز للمحكمة أن تلزم من هو مسؤول عنه بمبلغ التعويض.

دا كلام واضح
لكن الما واضح لي انو سنة 84 تم تطبيق قوانين الشريعة الإسلامية
لو ممكن توضيح هل قانون المعاملات المدنية دا خارج إطار الشريعة
بمعنى : هل الشريعة الاسلامية لم تكن المرجع لكل القوانين
نرجو تفصيل حول انواع القوانين ومرجعيتها لو منك أو من باقي الأخوة

لك التحية والتقدير اخي غفار .. ولضيوفك القانونين العظام .


بوست دراسة يجب علي الجميع الحضور لاهميتها والعمل بها .
ولا ننسي بوجود قانونيين سودانيين عظام نقيف لهم تحية واجلال
ويجب متابعة واتباع ما يقولون من تثقيف تربوي نستفيد به عن
ما قريب في وطن نحن سوف نكون من صناعه الجدد باذن الحق
والشعب .
بالنسبة لتجربتنا عن مسؤلية صغارنا :
هولندا زيها وزي اي دولة متقدمة واضعها قانون متبع ويحترم من
قبل الجميع . بمعني احترامنا للقوانين العادلة ومنصفة وموستوفين
شروطها تابعنا الاجراءات المفترض التزامها ففورآ قمنا بعملها ..
مثلآ في حالة التضرر المادي من قبل الاطفال اول خطوة عملناها
فتحنا حساب تامين شامل كامل في حالة تضرر اي انسان من قبلنا
بندفع مبلغ معين عشان لو حصل فورآ البنك بدفع ليك للمتضرر
ودا بالاضافة لتأمينات آخري عشان نعيش في سلام مدي ما في
العمر بقية .

موضوع في غاية الاهمية وبتمني المزيد من الشرح للتثقيف .

ولكم وافر الشكر ,,

حمد..حبابك يا صديقي
وحباب الأصدقاء هنا..
وقبل المطايبة..
انت قلت:

Quote: لكن أمس انزلقت على السلم لو لا لطف الله كان مشكلة

اولا كفارة يا حمد وربنا يكتب سلامتك..

اول حاجة لازم تقابل طبيب ويعمل ليك تقرير طبي..ما تستهون الحاجات يا صديقي

تاني حاجة..لو بتقدر قوم بتصوير السلم ، تحديدا النقطة الإنزلقت فيها..وهل هناك اثر مياه او سائل يساعد على الإنزلاق..!!..انا ما دايرك تكون زول كعب يا صاحب..ولكن الحق حق..!!

جسم الإنسان يا صديقي فيهو حاجات مدهشة وعجيبة..وعندك فترة سماح مقدارها سنة..يعني الألم ممكن يعاود ويرجع تاني ويدخلك في مشكلة..وبتكون انت نسيت سببها وظروفها..!!

عندنا هنا يا صاحب ، في مدينة كالقري (غرب كندا) في فصل الجليد..بتكون درجة الحرارة اربعين تحت الصفر..وبتلاقي كل زول شايل كوريق وبينضف الممشى قدام بيتو وكم متر من الممشى العام (ده تابع للبلدية)..ولو ناس البلدية جوا مارين ولقوك ما منضف الحتات دي..طوالي بيلصقوا ليك غرامة ليها ضل..!!..يعني تجنبا للمسئولية التقصيرية..!!

المباني الشاهقة (ناطحات السحاب)..في مدينتنا (وما اكثرها)..زمن الجليد..عندها لافتات جاهزة ومتنقلة..مكتوب عليه (سطح يسبب الإنزلاق)..او (امامك جليد متساقط).. وبيرصوها في كل نواحي المبني من الخارج..!!

في داخل المبني ، أي عامل نضافة بيستخدم مياه او سوائل اخرى لتنظيف ارضية المبني ، قبل ادوات النضافة بيحرص انو يخط علامات التحذير (سطح مبتل) ، (سطح يسبب الإنزلاق)..!!

الناس البتنضف القزاز ، بتكون عندها حاجة كده ، ما عارف اسمها بالعربي شنو ، لكن بالإنجليزية اسمو..
Swing Stage
ديل قبال ما يطلعوا للسطح بيختوا علامات تحذير (امامك رجال يعملون في السطح)..!!

عندنا في جنب المبني الشغالين فيهو..محل لتركين (باركنغ) للدراجات الهوائية (العجلات)..يعني ممكن تجي تربط عجلتك بجنزير وتمشي تقضي اشغالك وترجع تسوقها..جنب الحتة دي (موقف العجلات) بتلاقي عبارة مكتوبة بحروف عريضة للغاية بتقول (الدراجات المخزنة هنا على مسئولية اصحابها ، والمبني واهله لا يتحملون أي ضرر يحدث لها)..!!

اللافتات دي ياحمد الغرض منها التبرؤ من المسئولية التقصيرية..يعني اول حاجة لو لا قدر الله حصلت ليك حاجة..اول سؤال:هل هناك تحذير واضح؟..

اذا لم يوجد تحذير..فهنا تقع المسئولية التقصيرية والمتضرر عادي بيلقى تعويض..اما اذا كان هناك تحذير ..فالتعويض قد ينعدم تماما..او ربما اقل بعض الشئ..!!

السلم الإنزلقت فيهو يا حمد..لو فيهو شرمة بسيطة أو كان مبتل ، ومافيش علامة تحذير بالحاصل..ممكن تعمل بيها جاكة..!!!

كبر

التحية للأصدقاء..استاذنا الملك ، استاذنا الفاتح ميرغني ، صديقنا احمد سيد احمد عثمان ، ويا احمد هل متذكر انو قانون المعاملات المدنية لسنة 1984 هو اطول قانون سوداني من ناحية المواد (819 مادة بالتمام والكمال ، وانا بكتب المعلومة بسمع ناس البي بي سي بيتكلموا عن استاذنا محمد طه القدال ، وسيرة الأبنودي ، واستاذنا الكبير الطيب صالح..!!..يعني نظام السياق وكده..!!..ويا ريت لو نعمل اسبوع:كل زول بيكتب في المنبر جنبو شنو ، بيسمع شنو..الخ)..التحية لصديقنا الجميل حيدر حسن ميرغني..ولسه بسأل: ليه يا حيدر الثقة في عمنا كبر؟..ياخي يا ريت الاقيك قبال سيد الأمانة يشيل امانتو..!!..لو سيدنا شالها بقول ليهو: دقيقة..داير ابرى عم حيدر ياااااخ..!!

عارف يا احمد سيد احمد عثمان ، لمن درسنا المسئولية التقصيرية بكلية القانون بجامعة الخرطوم ، درسنا ليها استاذنا العظيم الجميل دكتور عمر سيد احمد الشيخ ، كانوا زميلاتنا وزملاؤنا في الدفعة بيتضايقوا منها..وناس كتار بتقول ليك : دي المادة الوحيدة المافيش زول فاهم فكرتها شنو..!!..وكنا قلة قليلة للغاية (يعني اربعة انفار: ثلاثة من جنوب كردفان/شخصي وصديقنا الأستاذ جلال الشايب المحامي ، وصديقنا دكتور موسى ابو عنجة، وزول تالت من شمال كردفان صديقي العزيز الأستاذ حامد ابراهيم شطة المحامي ، من ناس النهود..)..كنا بنضحك على صديقاتنا واصدقاءنا..لأن مبادئ المسئولية التقصيرية وقانونها الموجود ضمن قانون المعاملات المدنية لسنة 1984 هي مبادئ كنا بنشوفها في حياة اهلنا اليومية في مجتمعات كردفان ، ودارفور ، واقصى الشمال ، والشرق ، والنيل الأزق..!!

صديقنا واستاذنا الفاتح ميرغني جاب نموذج ذكي وحي..نموذج (مسئولية صاحب الحيوان/الكــــــلــب)..!

عارف يا الفاتح ، سنة 1996 قضيت الخدمة الإلزامية (اسمها المهذب الخدمة الوطنية)..في مدينة ابي زبد كمعلم في المدارس الثانوية هناك..واهلنا كانت فرقانهم حوالي مدينة ابي زبد..وقاموا جابوا لي عجلة(بيسكليت) ، وتور ، وحمار..عشان امشي الفريق..واخترت المشي كداري..انا والنجم يا صاحب..لمن اولاد اعمامي احتاروا ذاتو..بنجمة وديتهم ليك من ابي زبد لغاية فرقانهم في شمال غرب ابي زبد..!

في الفريق ، حصلت حادثة عجيبة ومدهشة..تورين..من مراحين مختلفين..اتداوسوا..وتور واحد تمكن من الآخر..وطعنو..وسبب ليهو اذى جسيم..بعد تلاتة ايام التور المطعون مات متأثرا بجراحه..!!

التور الطاعن (المتهم) مملوك لعمي ، والتور المطعون (الضحية) مملوك لخالي..!

صاحب التور المطعون (خالي) طالب بتعويض..!!
واهلك البقارة يشيلوا ويتغالطوا..!!

قلت لعمي: مفروض تدفع تعويض لخالي..!!

عمي عمل نايم..وقال لي فيما معناهو : انت حنكوش وليد مدينة ساكت..!!

اجتمع كبار الفريق للفصل في النزاع..والخال..اعتمد على حيلة اتهام غريبة للغاية.. فقال: ان التور الطاعن قرونو مطرقة (مبرية) بفعل فاعل ، يعني مهئ لإحداث الأذى..!!

والله يا الفاتح..اهلك البقارة ناس الفريق..في مجلسهم بتاع فض النزاع ، قاموا ارسلوا اربعة رجال عدول..والرجال ديل كتفوا التور الطاعن..رموهو في الأرض التقول دايرين يضبحوهو..عشان يتأكدوا من واقعة القرون المطرّقة (المبرية)..وتوصلوا الى واقعة ان الإنسان تدخل في طبيعة القرون دي وجعلها سنينة..ولولا هذا التدخل لما حدث الأذى الجسيم...!!!!!!!!!!!!

حكم ،يا الفاتح ، مجلس الشيوخ من اهلك البقارة ، في ذاك الفريق ، بان يدفع صاحب التور الطاعن تعويض لصاحب التور المطعون ، يعني عمي يدفع تعويض لخالي..!!
عمي قبل بحكم التعويض ، لكن ملاني فقر ما انزل الله به من سلطان..اقلاه اتهامي بان تعليمي في كلية القانون بجامعة الخرطوم ، ما هو الإ شغلات شيوعيين ولاد لذينا..!!

هل تصدق يا حمد..فكرة :
البيلد المحن ، لابد يلولي صغارهن..
(بعد تصحيح اخونا عبد المنعم حسن الطيب)..
ده مبدأ مسئولية تقصيرية يا حمد..!!..والله صحي..!!
والأهم يا صاحب..فكرة بسيطة ، وناس كتيرة ما عارفه قيمتها الحقيقية..!

طبعا انت يا حمد ، وغيرك ناس كتار ، بتتذكر فكرة اهلنا ..اعمامنا والسواقين العجايز من امثالنا..الواحد يوقف العربية (السيارة) خصوصا لو كانت كبيرة شوية وراخية كهربا ولا شنو كده ما عارف..اها الزول ده اول ما ينزل من العربية بينادي المساعد: يا ولد دقر للعربية..!!
او
يا ولد خت الدقار للعربية..!!
الدقار حجرين ، يوضعان تحت عجلات السيارة الخلفية..!!
ليه؟
عشان العربية (السيارة) ما تدحرج وتسقط ليها حجر ناس واحدين..!!
يعني نظام الحيلة لتجنب المسئولية التقصيرية..!!!..والله صحي..!!

اها فكرة الدقار يا حمد..ياها اللافتات الأنيقة..البنشوفها قدامنا في مدائن ناطحات السحاب..بتاعة (احترز قدامك سطح يسبب الإنزلالق..!) او (احترز قدامك ناس شغالة في السطوح)...! وعي بمسئولية تقصيرية للطيش يا حمد..والمحير اعمامنا السواقين في امسودان..شغالين بيها فطرة ساكت..,,!!!!..والله صحي..!!

عبرك يا حمد..وعبر الأصدقاء هنا..تحية لأستاذنا وصديقنا الجميل دكتور صديق عبد الباقي حسين..وهو الرجل الذي درسني مادتين في كلية القانون بجامعة الخرطوم: مادة قانون الإثبات ومادة قانون التأمين..وواحدة من صفاتو المهنية الجميلة العديدة ، ان كان مستشار قانوني للبنك السوداني الفرنسي..!!

مبادئ المسئولية التقصيرية يا اصدقائي ، الملك والفاتح ميرغني..هي الأساس لقوانين التأمين..على ألأقل في حقل امسودان..!!

يعني ياحمد..وانت مغترب او مهاجر أو لاجئ..لمن ترسل قروش لناس بيتكم ويبنوا بيهم بيت ..وتكون حيطة مايلة وتقع في راس زول ماري بشارعكم..فهنا بتحصل مسئولية تقصيرية..!!

وعلى حسب قفشات صديقنا واستاذنا دكتور صديق عبد الباقي..لو عيالك الصغار يا حمد ضحكوا على زول ماري بالشارع..والزول ده قام اتخجا ووقع وكسر ليهو ساق ولا ضلعة..فانت المسئول ومفروض تدفع تعويض..!!

لو لقينا فرقة ، نرجع تاني نبسط للناس فكرة المسئولية التقصيرية..!!

كبر

والله يا أستاذ كبر تعرضت للموضوع باسلوب شيق وعرض ممتع ..
مقرون بوقائع وأحاث من واقع بيئتنا الإجاماعية الثرية ..
شايل حال الخدمة الإلزامية ساكت يا صديق ..
أهو واضح أثر اشتغالك بمهنة التدريس في الطريقة الشائقة البتشرح بيها المعلومة ..
أظن لو أنت كنت مدرس المادة في الكلية ما كان في طالب بنفر من المادة ..
:
يا حمد كأنك منطلق من الحيث :
( رفع القلم من ثلاثة النائم حتى يستيقظ ، والصبي حتى يبلغ ، والمجنون حتى يعقل )
بالفعل المسؤولية مرفوعة عن هؤلاء حتى في القوانين غير الشرعية ..
ولكن ما تنسى مسؤولية هؤلاء منسوبة لكفلائهم ..
وإذا ما معروف له كفيل كالطفل المتشرد مثلا ..
الأمر الطبيعي أن تكون الدولة كفيلة ..
دا طبعا لما تكون في دولة مسؤولة عن رعاياها ..
وقضاء مستقل يطبق العدالة ..
الطفل المرتكب لجريمة جنائية يساءل وفق قانون الأحداث ..
والضرر المترتب على الغير من الجريمة يتحمله كفيله .

هلا د.محمد حسن

أبدا الولد ما عمل حاجة
كان في يدي عقد عمل شركة استشارية وأول مرة تقابلني مادة المسئولية التقصيرية دي وتوقعت اسئلة حول العقد فقلت أعرف المزيد عنها

غير إنها أثارت في رأسي اسئلة ما عارف ليها إجابة
يسأل منك الخير

" في الفريق ، حصلت حادثة عجيبة ومدهشة..تورين..من مراحين مختلفين..اتداوسوا..وتور واحد تمكن من الآخر..وطعنو..وسبب ليهو اذى جسيم..بعد تلاتة ايام التور المطعون مات متأثرا بجراحه..!!"
/green]ول ابا كبر
تحياتي،
ياخ قصتك بتاعت " دواس التيران "( The bull fighting) تصلح سيناريو لفيلم من النوع البكتبوا ليك فيهو -قبل الفيلم- " هذه القصة واقعية وقد حاز الفيلم علي ثلاث جوائز أوسكار، أما ملاحظتك عن مسألة " الدقارات " ( The blocks) فهي تنِم عن ذهنية متقدة.!
الـ Tort ده إتكتب فيهو مليارات الرسائل في درجة الدكتوراه والاف الكتب والمراجع وملايين السوابق، ويجي شاعر يلخص ليك المسألة دي كلها ببيت شعر. ياخ ده إدهاش ما بعدو ادهاش.!
مرة صاحبنا حيدر بمداخلة في بوست ولع نار، وقام مستشارنا الطيب شيقوق جاب " قضية بطران " بتاعت الزول الوقع في حفرة داك، والتي ذكرها استاذنا الملك. القضية دي اتكتب فيها كلام يخلي اللورد دينيغ واللورد آكتون في حالة إندهاش مستدام. وبالرغم من أن اللورد دينينج كان يشار إليه ضمن القضاة القلائل الذين كانوا يزينون قراراتهم بمقولات شكسبير وجون ميلتون، صاحب " Paradise lost"، ناس مولانا ابو رنات وهنري رياض سكلا والعباسي كانوا بعملوا "الحاجة دي عادي جدا"، إذ كانوا يستشهدون بالشعر ومأثور الاقول أحياناً، كما حدث في قضية " نجمة" وهي – في تقديري - من أشهر وأجمل السوابق القضائية في تاريخ السودان والعالم، ولو اتكتبت فصولها كأوبرا، لتفوقت على " O Mio Babbino Caro " لما حفلت به من عناصر ملحمية وشعرية ورومانسية قل أن تتوفر لأي عمل اوبرالي. وده موضوع آخر. ياخ السودان ده زي ما بيقول روبرت فيسك:" مدهش في ابداعاته ومدهش في اخفاقاته"!

محبتي

Quote: وبالرغم من أن اللورد دينينج كان يشار إليه ضمن القضاة القلائل الذين كانوا يزينون قراراتهم بمقولات شكسبير وجون ميلتون، صاحب " Paradise lost"، ناس مولانا ابو رنات وهنري رياض سكلا والعباسي كانوا بعملوا "الحاجة دي عادي جدا"، إذ كانوا يستشهدون بالشعر ومأثور الاقول أحياناً، كما حدث في قضية " نجمة" وهي – في تقديري - من أشهر وأجمل السوابق القضائية في تاريخ السودان والعالم، ولو اتكتبت فصولها كأوبرا، لتفوقت على " O Mio Babbino Caro " لما حفلت به من عناصر ملحمية وشعرية ورومانسية قل أن تتوفر لأي عمل اوبرالي. وده

أعذرني يا حمد ياخي مداخلة الفاتح دي ما بقدر أفوتا ..
عارف يا أستاذ الفاتح أنت من الناس الغلبت موهبتهم الإعلامية على تخصصك القانوني ..
الشاهد على ذكر سابقة نجمة ( هسه يجي أستاذ شيقوق طاير) ..
تصدق حيثيات القضية دي من شدة ما جذبتني يوما ما فكرت بل حاولت على أيام الطلب ..
إعادة صياغتها في شكل سناريو ..
يعكس وقائعها كتجربة متقدمة لنظرة فتاة ريفية سوانية لثقافتها الاجتماعية ..
وينقلها إلى دنيا التمثيل والمسارح ..
ولكن هزمتني المعرفة الدقيقة وربما الموهبة ..
أنا متأكد يا الفاتح بموهبتك الإعلامية وثقافتك الـ Multicultural الواسعة ..
تسطيع الولوج لهذا العمل وتنحج فيه ..
وفي الذاكرة تجربة عدلي المولد المحامي في مجال سيناريو النصوص السينمائية ..
ولا أدري إنا كان لقب المحامي المقرون مع إسمه لقب مهني أم اسم .

سلام يالملك
ملاحظة في محلها والفاتح زول متعدد المواهب
ذكرتني بالمحامي Federico Castelluccio اللي تحول لسينارست screenwriter وابدع في اول افلامه Brooklyn Banker (فيلم رهيب جدا ياريت تشاهدو) crime film ، لذلك ابدع فيه لانه أسقط فيه خبرته وثقافته القانونية .
السؤال هنا هل يقبل مجتمعنا تحويل قضية مثل قضية نجمة لعمل درامي؟

شكرا حيدرنا على التقاط الملاحظة وتشجيعها ودعمها بأمثلة عالمية حية ..
القضية قديمة يعنى أطرافها لو أحياء بكونوا في عمر التسعينات ..
لكن بالضرورة تغير الاسماء في العمل الدرامي ..
ياريت الفاتح يتشجع للفكرة لأن امكاناته تسمح .

سلامات حمد وتحية لضيفوك القانونين

جاي هنا أقاطع لأخونا حيدر

Quote: يستحقوا لقب الـ all rounder البوصفوا بيهو اللاعب الشامل في لعبة الكريكت لما لهم من إلمام

في حاجة في الكريكت إسمها (بوم بوم) دي يعني شنو؟

اهلا عبد العظيم
دي مقصود بيها king of sixes واشتهر بها شاهد افريدي لاعب باكستان المعتزل
لو انت متابع اللعبة ال ٦ عبارة عن عدد نقاط يحرزها اللاعب بضرب الكرة ضربة تتخطى حدود الملعب من فوق .. اما اذا الكرة مشت بالارض بتكون ٤ فقط .

اللقطة دي توضح البوم بوم الاشتهر بها افريدي
ضرب الكرة ضربة بت كلب لحدي ما طلعت برة الاستاد
تحسب ٦ نقاط
urlm]l]

بوست جميل ونقاش اجمل من ناس جميلين
مولانا الملك والفاتح وكبر وفواصل حيدر الممتعه
من العبارات المشهوره لرفع المسؤولية التقصيرية
العفش داخل البص على مسؤولية صاحبه
كنا زمان بنشوفه في البصات السفريه
وبالنسبه لي ناس العماري بكتبوا
لو ما فاطر ما تخاطر
والف سلامه يا حمدنا
والمسؤولية التقصيريه تظهر واضحه في الاسلام
في حديث عمر لو بغلة عثرت بالعراق لكنت مسؤول عنها لماذا لم اسوي لها الطريق
وهناك قصه ايضاً لسيدنا عمر لا اذكر تفاصيلها ولكن فيها تحذير لاهل بلد حفروا بئر في طريق الناس
وقال لهم والله لو سقط فيها احد ومات لاخذتكم جميعاً بدمه

شكرا يا حيدر علي الشرح

تعرف ما عندي علاقة بالكريكت بس في بريطاني صاحبنا
معجب بي شاهد أفريدي وقادينا ليك بي (بوم بوم)

اهلا بيكم جميعا كبر وعبد العظيم وعلي والملك والفاتح وحيدر

ملخبط شوية لكن بجيكم واصلوا البوست لكم
بس عندي سؤال
لو مجنون اهلو رقدوهو في مستشفى الأمراض النفسيه (يعني عملوا ما عليهم عمله)
ضرب دكتور أو ممرض في العنبر وتسبب في أذى بليغ
في الحالة دي عليهم مسئولية تقصيرية

خطرت لي حاجة مضحكة ياحمد
زميل المنبر ابراهيم النعمة لو ما خانتني الذاكرة اول ايامه في المملكة بداية التسعينات كان شغال تدريس
عيال السعودي سقطوا في الامتحان ورفض يعطيه حق التدريس رغم شرحه له بأنه عمل اللي عليه كاستاذ والتوفيق من عند الله واجتهاد عيالو يعني ماقصر في واجبه
قعد يزازي في ابو الاولاد لحدي ما يوم جاء صاحبه وعرف النقة قال ليهو طال عمرك انت كنت تدري حاتخلف الاولاد ديل لما عرست امهم
قال لا ..
طيب اخونا السوداني ده نفس حالك ايش دراهو انهم حاينجحوا او يسقطوا وزي ما انت عملت العليك هو كذلك عمل مابوسعه يعني مافي تقصير من جانبه .. امشي شوف التقصير من منو
إقتنع واعطى صاحبنا حقه
عجبتني طريقة الاقناع دي :))

Quote: لو مجنون اهلو رقدوهو في مستشفى الأمراض النفسيه (يعني عملوا ما عليهم عمله) ضرب دكتور أو ممرض في العنبر وتسبب في أذى بليغ في الحالة دي عليهم مسئولية تقصيرية

يا حمد دا مثال جيد للمسؤولية التعاقدية غير التقصيرية ..
الدكتور والممرض وكافة العاملين في المصحة متعاقدين مع وزارة الصحة ..
الأضرار التي تقع عليهم بسبب أداء واجباتهم الرسمية..
لا تندرج تحت مفهوم المسؤولية التقصيرية ..
بل تندرج تحت مفهوم مخاطر العمل ..
ومثل هذه المخاطر تسال عنها الجهة المخدمة ..
لذلك يلجأ الكثير من المخدمين لتأمين أعمالهم تحوطا لمثل تلك الأحداث ..
القضايا الزي دي كثيرة في قانون العمل والعمال .

هلا كبر
شكرا على الشرح المهيب
إذن بناء على كلامك لا يوجد استثناء في نصوص المسئولية التقصيرية
يعني مثلا القتل تلقاه مقسم عمد وشبه عمد وخطأ
دي مافيها أي نفس

"
أعذرني يا حمد ياخي مداخلة الفاتح دي ما بقدر أفوتا ..
عارف يا أستاذ الفاتح أنت من الناس الغلبت موهبتهم الإعلامية على تخصصك القانوني ..
الشاهد على ذكر سابقة نجمة ( هسه يجي أستاذ شيقوق طاير) ..
تصدق حيثيات القضية دي من شدة ما جذبتني يوما ما فكرت بل حاولت على أيام الطلب ..
إعادة صياغتها في شكل سناريو ..
يعكس وقائعها كتجربة متقدمة لنظرة فتاة ريفية سوانية لثقافتها الاجتماعية ..
وينقلها إلى دنيا التمثيل والمسارح ..
ولكن هزمتني المعرفة الدقيقة وربما الموهبة ..
أنا متأكد يا الفاتح بموهبتك الإعلامية وثقافتك الـ Multicultural الواسعة ..
تسطيع الولوج لهذا العمل وتنحج فيه ..
وفي الذاكرة تجربة عدلي المولد المحامي في مجال سيناريو النصوص السينمائية ..
ولا أدري إنا كان لقب المحامي المقرون مع إسمه لقب مهني أم اسم . ."
___

/green]أستاذنا الملك
ياخ كون خيالك ذهب بك إلى حد التفكير في كتابة سيناريو لسابقة" نجمة" في تلك الفترة الخصبة من التلّقي، فهذا في حد ذاته ينم عن خيال زول خصب وتذوق للجمال، حتى ولو في ثنايا قصة مخضبة بالدماء!.
بس انت بكون كسل منك ساى، لكني لا اعتقد اطلاقا أن الموضوع كان له علاقة بقلة موهبة أو حاجة زي دي.!
طبعاً البريطانيون كانوا أكتر ناس اشتغلوا في الحتة دي، وبعيدا عن روايات اجاثا كريستي وافلام الفريد هيتشكوك، عملوا سلسلة افلام مقتبسة من مواضيع وقضايا قانونية ، في فيلم موضوعو كلو كان قائما على الكونسبت بتاع الشاهد العدائي( The hostile witness)
وكان واحدا من أجمل الافلام لدرجة مثّلناهو في الكلية في المحاكمات الصورية ( The mock trials) ، وطبعا لقيت نفسي بعيد كل البعد عن موهبة التمثيل لدرجة واحد من أصدقائي قال لي : "أول مرة اشوف شاهد عدائي وخجول فالشاهد العدائي ده مفروض تكون عينو قوية" ، على حد تعبيره
عشان كده أخاف لو حاولت اخش في المجال الحاجات العندها علاقة بالسينما - إخراج سيناريو ولا كده : To be arrested for fraud

ومع ذلك تجدني شاكر ليك شديد يا حبيبنا تحفيزك وحسن ظنك العريض.

محبتي

مثلآ في حالة التضرر المادي من قبل الاطفال اول خطوة عملناها فتحنا حساب تامين شامل كامل في حالة تضرر اي انسان من قبلنا بندفع مبلغ معين عشان لو حصل فورآ البنك بدفع ليك للمتضرر

هلا منى عمسيب
ياخ دا حل مثالي جدا بس ينفع في بلد فيها عدل اجتماعي راسخ
طبعا مسألة التأمينات دي رغم مساعدتها في حلحلة كتير من المشاكل الصحية والقانونية لكنها أحيانا تبدو مثقلة لكاهل الشخص خاصة في دولة محدودة الدخل زي السودان.

العفش داخل البص على مسؤولية صاحبه كنا زمان بنشوفه في البصات السفريه وبالنسبه لي ناس العماري بكتبوا لو ما فاطر ما تخاطر

مرحب علي محمد الفكي
ياخ نحن حياتنا كانت مبنية على الفطنة والفطرة السليمة عشان كدا بتلقى حياة الناس كانت منسابة بتلقائية كانت محتاجة لتدخل ثقافي وتكنولوجي بسيط وبفهم يخاطب هذه الفطرة لانتاج مجتمع مثالي له ضوابطه وتقاليده التي تنظم هذه الحياة السلسة ولكن حاليا التربيزة كوعت في اتجاه ما محدد

الملك والفاتح وكبر (القانونين) البوست دا مفتوح باسمكم وشرفتوهو بدخولكم فهو ملك لكم وملك كل من يتداخل
انا والأخوة الكرام المتداخلين ضيوف عندكم بنساعدكم بالباصات

تاخري غير وقعة السلم داخل لي في موضوع شاغلني كتير

ف واصلوا