ههههههههه..!! غمض عيونك وقول وراي (الله خلق للنعجة ضنب)..!! انت رمضان قام بيك (سداري) ساكت يا صديقي..(البكرة) بتكون بادية من سنة 2007..ولو دققت شوية يمكن تلقاها سنة 1997..وانا غايتو عندي أي (بكرة) ما بادية من سنة 1977 دي مزيفة ساكت..وشغل تمييع للصراع..مرة مسئولية داعش ومرة مسئولية ترامب..وتحت تحت مسئولية عمك عمر البشير ظاتو (ياخي ده هوايلو يا ما شيبت الولدوهم امبارح خليك من ناس زمان)..!!
وصدقني الكمبيوتر قاعد يغلط كتير يا ول ابا (ما قالوا الكمبيوتر بيعرف كل شئ..مالو ما عرف الحلا..يا سيدة لا..فايتانا وين مستعجلة..!!..او كما قال)..فشنو ..كمبيوتر جلاها واقفة (حلاة سيدة) باقي ليك ما يجلي عمرك..؟!!..وانت من غمار الناس ساكت زي ناس كبر؟..
اللستة..طبعا ..وللصدفة المحضة ( والله صحي يا يحي) جليت عنوانها الفيهو اشارة للكوامر..وبقيت اشيل واصحح..كويس ،عبد الله خليل ما شفتو لكن سمعت بيهو..الأزهري ما شفتو لكن سمعت بيهو..وحي الأزهري (خلطت) فيهو ذات مرة من المرامير علي قول سيدنا الشفيف دكتور سيد احمد الحردلو..والباقي : اي والله حصل..ياخي لمن زعلت عدييل..وكتين جات سيرة شطة والمفك والتحرير..وفي نفسي قلت..الجاب اللستة دي.. يكون واحد حاقد من عيال بحري..ككيف يعني ما يتذكر عبد الكافي بتاع فريق بري..ياخي بعد قاقرين والدحيش..عبد الكافي ده كان عامل شغل اسكت ساكت خليهو..!!
طبعا الإحباط جاني..لمن لقيت اخر جملة..انك لو بتعرف الحاجات دي فانت كومر اصلي..قمت راجعت القايمة تاني وبديت (بيني وبين بت ام روحي بت اللذينا) اشيل و اشطب واشطب واشطب..وبراي قلت لي نفسي الحمد لله..الحاجات دي ما حضرتها..يعني نظام انا ما كومر..!!..شفت الإنسان لمن يكون في ذات جرسة بيكون متجرس قدر شنو؟؟؟؟!
اما حكاية سنة 1988..ياخي صاحبنا قايم سداري بسرعة تفوق سرعة طيب الذكر الفريق طه بن عثمان بن احمد الحسين في تنسم جخانين الدولة السودانية..!! شفت نحن قاعدين امفكو ككيف يا قريبي..!!..
الغريبة يا يحي..صاحبنا بتاع 1988 قال فنانو المفضل..رمضان حسن..!!!
1988 اول مرة اشوف الشقلة الحاج يوسف (طبعا قريبك زول ضواحي ساكت)..مشينا ايام الفيضان..عشان نغيث ناس الشقلة..ونحن طلبة في الجامعة..مرة خلط ومرة جكيس ومرة ناس تغلبني القراية ذاتو..ومرة تلم ليك بواقي (فضية) ومرتبة وسرير مكسر..!!
ولو جاملتني وعصرت علي شوية..احتمال اجيب ليك قصايدي (أي والله يا يحي) الخجولة الكتبتها سنة 1988..!!..وعشان ما تحرج روحك..اخير ما تعصر علي..!!
وانتا بتقول لي واقف في صف سفارة وين؟..ياخي السفارات تطير يا قريبي..وخصوصا غنية مصطفى سيد احمد (والله نحن ما الطيور ، المابتعرف ليها خرطة ولا في ايدا جواز سفر..!!) خلي بالك الكلام ده قبال ما ناس الخضر يعرفوا سكة المواطنة الكونية ..ويقوموا بعد داك يملونا فقر ما انزل الله به من سلطان..!!!!!
اها ، اول انطباع قلت اجامل صاحبنا بتاع سنة 1988 واخت ليهو واحدة من روايع رمضان حسن..لكني بيني بينك خفت يا يحي..ياخي مد ثوري هادر زي بتاع صاحبنا ده لو وقفت قدامو على بالحلال يشيلك وما يعرفوا يلموك لا من رشيد ولا من دمياط..!!!
اها لأنها واقفة لي في زوري..اهو اخطها هنا (رمضان حسن: الزهور صاحية)..وده مش المهم..!
المهم..(الله خلق للنعجة ضنب)..*
كبر
____________
*المقدمة الموسيقية في اغنية رمضان حسن (الزهور صاحية) ، ذات يوم كان خيال اطفال امسودان يترجمها بعبارة (الله خلق للنعجة ضنب)..أي زول/ة بيسمع المقدمة دي يردد في نفسو ، مع الموسيقى (الله خلق للنعجة ضنب)..لو حصل فرق او مشاترة قولوا لينا عووووووووووووووك..!!
Post: #10 Title: Re: نفسي قام لغاية ما لقيت سنة ميلادي في البَك Author: Kabar Date: 06-21-2017, 09:05 AM Parent: #9
عبد الحفيظ..!!
ده كلام شنو يا قريبي..؟ ياخي نحن جلينا معاوية الزبير (السلامو عليكو ساكت ما قلناها ليهو)..تجي انت طاير وفاكي الزراير..وبكل طفاسة بتقول (سنة كم)..؟..ياخي سنة وقع في كوستى شهاب ذات غفلة كونية ما ..لمن عساكر امسودان احتسبوهو هجوم غادر..!!..اول مرة يا عبد الحفيظ اعرف انو في وين كده ما عارف في قاعدة جوية..!!..والله صحي..!!
ما سمعت يا عبد الحفيظ بي نقتنا بتاعة.. الــــ Damage Control القام فحط بيها صاحبنا دكتور امير بوب؟.. يعني اجيب ليك فرقة جاز (هارامبي)* ولا جاز العقارب؟..
ولو داير (حركة شعبان) ذاتو..بنجيبها ليك في نص رمضان..او كما قال صاحبنا واحد (الجامعة بقت جزيرة معزولة في محيط مد ثوري هادر..!!)**..
ومنصور خالد يشيل ويضحك من بساطة متطلبات الثورة الظافرة (استقلال الجامعة..!!)..شكرا يا منصور خالد وانت متمرد من ما كنت وزير خارجية ووزير تربية..وشنو كده ما عارف..!! سنة كم، يا عبد الحفيظ..؟
ياخي..!!
سنة الخواجات وحضارتهم الغربية العاجزة لمن قالوا.. The Year of our Lord سنة ربنا ياعمك..وبالبلدي سنة حفروا البحر ذاتو..!! المافي شنو؟..على قول صديقنا الجميل قيقراوي..!!
سلامات يا ول ابا(عبد الحفيض) يا زول يا صابر..صبر يحرج حميد في ذات نفسو لدرجة ما يقدر يقول فيهو قصيدة..!! كبر _____________ * بت ابا امتثال ، كلمي معاك بسمات واميرة: هارامبي فرقة جاز..فيها بنات واولاد كنا بنسمعها وبنحضر حفلاتها في جامعة الخرطوم ، ذات يوم..سنة كم؟..أسالي عبد الحفيظ ابو سن (ما قالوا الكمبيوتر بيعرف كل شئ ، مالو ما عرف الحلاة..)!! ** المقولة يا امتثال ، ومعاك بسمات واميرة ، هي منسوبة للمرحوم الخاتم عدلان..بداية حكم الديكتاتور جعفر نميري..وقتها ..ابوالقاسم محمد ابراهيم..احد اعضاء مجلس الثورة بتاع نميري..قام زعل من جامعة الخرطوم..وقام هاجم نشاط الطلاب بالدبابات..وكانت من الهتافات المنسوبة للخاتم: حاسم حاسم يا ابو القاسم..!!ومقولة جامعة الخرطوم جزيرة رجعية في محيط ثوري هادر..!!..وانا ما بجيب سيرة الجنوب يا ابونا وصديقنا واستاذنا العريبي محمد طه القدال..!! لمن ابو القاسم ، جابتو الظروف يقعد في برلمان (مجلس وطني) واحد مع (حاجة آمنة/فاطنة محمد ابراهيم)..قال كده حاجة امنة شبكتنا:ما كنتا قايلة ده ياهو ذاتو..!! ادخلي اليوتوب يا امتثال واسمعي غنية عقد الجلاد (حاجة آمنة اتصبري)..!!!! وبرضو..انا ما بجيب سيرة الجنوب..!!!!!!!!!!!!!!
Post: #11 Title: Re: نفسي قام لغاية ما لقيت سنة ميلادي في البَك Author: Mohammed Abdullah Date: 06-21-2017, 09:12 AM Parent: #1
هههههههههههههههههههه والله ضحكتني الله يبسطك ويمد ليك البكرة بتاعتك زي السبحة الالفيه
لكن عصرتا علينا وطلعته لينا الما داريرين نجيب سرتو
Post: #12 Title: Re: نفسي قام لغاية ما لقيت سنة ميلادي في البَك Author: معاوية الزبير Date: 06-21-2017, 10:26 AM Parent: #11
سنَه يا سنة كم! طيب هاك دي إنت وقّباني والفطّاني
بعد إذن الأستاذة نجاة وهاشم و عجب الفيا، راجع سودان فور اول موضوع الرسالة: هاشم محمد صالح، سنة يا أم خالد، حفر في حفريات عجب الفيا
Post: #13 Title: Re: نفسي قام لغاية ما لقيت سنة ميلادي في البَك Author: Kabar Date: 06-21-2017, 10:35 AM Parent: #12
وباقي التراش يا يحي..
عبد الحفيظ بيسال سنة كم؟.. سنة..لمن كانت حليمة محمد قول (حليمة الصومالية) بتغني (السايق العظمة)..سنة محمد سليمان ضو البيت(جراب الحاوي) بيقدم عازف من الصومال (اسمو عويس) وعويس مفتكر روحو اخترع الة الطمبور..!!
سنة جيمي كليف (فردة بوب مارلي) كان بيصدح في سموات طيبة الذكر مدينة جوبا.. القمنا اخترعنا ليها لغة خاصة وسميناها (عربي جوبا)..!!
وقتها يا صديقي..احمد ربشة كان حايم في الحواري..والغريبة عمرو ما حسه بانو اجنبي الإ لمن سافر واغترب ومشى الخليج..!!..خليج محمد زايد الطالع في الكفر اليومين ديل..!! سنة الصومالي احمد ناجي..لمن كان بيغني (حان الزفاف ، وانا حالي كيف بوصفو)..!
كنت يا يحي ..ناوي اهديك..غنية سودانية بصوت الصومالي (احمد ربشة)..وهي غنية التاج مكي (شاقي روحك ليه)..اللحن..الكلمات..الأداء حنين شديد..وعامر الجوهري تم الناقصة باداء النص كاملا..وعامر عرفني عليه صديقنا الغايب تمبس (ده بمناسبة بوست صديقنا العريبي معاوية المدير في شان استقبال استاذنا عمر منصور..وبالتحديد اشارة استاذنا ترهاقا لتمبس..!!)..ولكن..!!
سنة كم بتاعة ايه..يا عبد الحفيظ ابو سن..قلبت الفي راسنا ...راسا على عقب..!!
ياخي سنة ، يا عبد الحفيظ ، لمن ناجي القدسي بيسكب روحو في اجمل الألحان الخالدة في الوجدان السوداني ( احلي منك ، حمام الوادي ، الساقية..جسمي انتحل ..الخ) ثم ينتهي به المقام في زاوية..في شارع ضيق في اليمن السعيد..ليترك لنا ملح السؤال المر: كيف اليمن تصدر لنا فلذات اكبادها..من ناجي القدسي وانتا ماشي..لتحميهم شوارعنا وازقتنا الضيقة ومزاجنا الرايق في امسودان ، لنرسلهم ليعودوا الى اليمن السعيد..ثم ناخد صنة..و نصدر ليهم الجنجويد فيما يسمى بعاصفة الحزم..؟...
اليمن التي وهبتنا العظيم ناجي القدسي ، عدنا لنهبها قوات الدعم السريع؟..أي بشر نحن يا عالم هوي..!!
سنة كم يا عبدالحفيظ؟..سنة الفجيعة ياااااااااااااااااخ..!!!
(حمام الوادي) يا يحي..اخترت الفيرشن ده مخصوص..لأنو فيهو عمر جعفر..وانا بتذكر..سنة 2012 حينما قررت العودة لزيارة امسودان..بعد غياب كم طاشر سنة..كان اخر نغمة برددها وانا في طريقي لأمسودان..واحدة من اغاني الذري بصوت عمر جعفر..!!..وعمر عرفتني على صوته صديقة سودانية..هي صديقتي الجميلة دكتورة نهى (نون)..استاذة في جامعة السودان..!!
فشنو..(البكرة انواع) يا قريبي..افرز يا ديجانقو على قول قريبك البقاري..!!
كبر
Post: #14 Title: Re: نفسي قام لغاية ما لقيت سنة ميلادي في البَك Author: Deng Date: 06-21-2017, 05:24 PM Parent: #13
قباني
سلامات.
ياخ لكن ما عصرت علينا شديد باللستة دي!
هسع الجاب عبد الله خليل لي بيتزا الأيتاليان سناك شنوا؟؟
على فكرة كان في محل تاني بتاع بيتزا فتح في فندق المريديان من الجهة الشرقية (شارع القصر) بس ما زي بتاعت الأيتاليان سناك.
بعد ده كلوا يجي الرئيس البشير ويعير الناس بي الهوت دوق، وهو لا يدري أن الهوت دوق أكل الغلابة في أمريكا وبيتم صنعه من بواقي اللحوم.
Post: #15 Title: Re: نفسي قام لغاية ما لقيت سنة ميلادي في البَك Author: Deng Date: 06-21-2017, 05:27 PM Parent: #14
بعدين العضو الجديد بتاع 88 ده أنا بسميهو كوكب جديد.
Post: #16 Title: Re: نفسي قام لغاية ما لقيت سنة ميلادي في البَك Author: عبدالعظيم عثمان Date: 06-21-2017, 05:38 PM Parent: #15
يا قباني تاني اذا سألوك ولدوك متين قول : وقت جوز الحمام 3
Post: #17 Title: Re: نفسي قام لغاية ما لقيت سنة ميلادي في البَك Author: محمد أبوالعزائم أبوالريش Date: 06-21-2017, 08:10 PM Parent: #16
يا عمّو ............
قلت لي عملت سكرول داون لما نَفَسك قام؟
يعملوا ليك شنو لو سقت أوبل تعشيقتها فوق وبطاريتها 6 فولت؟
Post: #18 Title: Re: نفسي قام لغاية ما لقيت سنة ميلادي في البَك Author: السر عبدالله Date: 06-21-2017, 08:28 PM Parent: #17
يعملوا ليك شنو لو سقت أوبل تعشيقتها فوق وبطاريتها 6 فولت؟ .....
هل تصدق يا محمد فعلا انا كنت عندي اوبل تعشيقتها فوق وبطاريتها 6 فولت عام 1981م خلاص يا قباني هرمنا ... وبقينا زي الغرباء لمن نمشي السودان اجازة
Post: #19 Title: Re: نفسي قام لغاية ما لقيت سنة ميلادي في البَك Author: يحي قباني Date: 06-21-2017, 08:55 PM Parent: #18
Quote: من اظرف البوستات التي قراتها في الاونة الاخيرة
ولكن لا تياس ابدا ابدا يا يحى قباني فانت بالنسبة لعجائز امريكا
الذين يستمتعون بحياتهم في كل لحظة طفل يحبو...يعني انت احتمال
بتتكلم عن ان من حضروا تلك الاحداث التي نقراها معك لاول مرة قد بلغوا
يا امتثال ...
Age is Just a Number :)
Post: #20 Title: Re: نفسي قام لغاية ما لقيت سنة ميلادي في البَك Author: muntasir Date: 06-21-2017, 09:14 PM Parent: #19
قبلك وحَّدَّكْ
Post: #21 Title: Re: نفسي قام لغاية ما لقيت سنة ميلادي في البَك Author: حمد عبد الغفار عمر Date: 06-21-2017, 09:34 PM Parent: #20
في داعي تقولي مافي؟
يا اللستة
كب كاس خلينا ننسى
Post: #22 Title: Re: نفسي قام لغاية ما لقيت سنة ميلادي في البَك Author: يحي قباني Date: 06-21-2017, 09:48 PM Parent: #19
Quote: هههههه..
التالي من نقة هو مجرد تراش ساكت..مجرد قاربش..مجرد زبالة.. مجرد وساخة بتتجدع في كوشة النسيان..أي كوشة للنسيان..!!
من المية حاجة الكتبها الزول ده ما لقيت غير مراقة عبد الله خليل ... لانو رغم جيرتنا لكني ما بتذكر شفته شخصياً رغم دخولي بيتهم في زقاقهم داك ...
و هم مقابل بيت ازهري من الغرب ...
غير كده يا كبر ...
أبو الزهور قدمت ليهو الشاي و القهوة بي يدي في بكا جدي محمد سعيد القباني يناير 69 في ود ارو ...
و معاي نادر الفضلي ده ... و كنا نلم الفاضي و نمش نغسل الكبابي ...
الخرطوم شرق قريت فوقها سنتين ...
اما البلوستارز فحدث و لا حرج ... كانت صحبة عديل ... رحم الله عمر قيلي ... و ابرزقة ...
و الاتنية بالله سندوتشات البانيه و المخ يا عمك ... و نقعد في قواعد العواميد خلف عمارة أبو العلا ناكل ...
و حدثني عن الدبل كولا ... و الله ماجات حاجة بتشبها تاني ... كمية كافيين تسطل يا كبر ...
و ردفنا و اكلنا الاسبيشال من اعمامك الحلفاويين في السفرة ...
اما بص الوردية حق مصنع النسيج ... الأول كان حق العمال بيبدا زي 4 صباحا ...
و كان جارنا مهندس جديد فقالوا ليهو تركب بص العمال الساعة 4
و هو كل يوم بساهر لي تلاتة و أربعة ... ( الباقي بتمو ليك في تلفون ) هههه
و الله يا كبر ... ما في شي حيمرقنى من الخلعة دي الا ( قصايدك الخجولة ) حقة 88
بالله فرجها علينا ياخ خلينا نشم ريحة المليون ميل التي كانت ...
و الله خلق للنعجة ضنب يا صديقي ...
Post: #23 Title: Re: نفسي قام لغاية ما لقيت سنة ميلادي في البَك Author: يحي قباني Date: 06-21-2017, 10:41 PM Parent: #22
Quote: هههههههههههههههههههه والله ضحكتني الله يبسطك ويمد ليك البكرة بتاعتك زي السبحة الالفيه
لكن عصرتا علينا وطلعته لينا الما داريرين نجيب سرتو
يا زول البكر بيد الله ...
لكن الفينا اتعرفت ههههه
Post: #24 Title: Re: نفسي قام لغاية ما لقيت سنة ميلادي في البَك Author: يحي قباني Date: 06-21-2017, 10:47 PM Parent: #23
Quote: سنة كم
قبيل يا عبد الحفيظ ...
واحدة تضحك في اللستة و قالت لي لكن عندك كم مراقة ...
انت طبعاً ما حضرت العربية ام منفله ؟
قلت ليها لا طبعا ما شفتها !!!
كضبة بيضاء ... يمين كان عندنا الجيب الوليز في بورسودان و في مدني بي منفلتو
و المنفلة عندها محلة بتخزنها فيها قدام الكبوت و الفتحة قدام محل اللديتر ...
ياخ بس معقول ؟
Post: #25 Title: Re: نفسي قام لغاية ما لقيت سنة ميلادي في البَك Author: يحي قباني Date: 06-21-2017, 10:53 PM Parent: #24
Quote: قباني
سلامات.
ياخ لكن ما عصرت علينا شديد باللستة دي!
هسع الجاب عبد الله خليل لي بيتزا الأيتاليان سناك شنوا؟؟
على فكرة كان في محل تاني بتاع بيتزا فتح في فندق المريديان من الجهة الشرقية (شارع القصر) بس ما زي بتاعت الأيتاليان سناك.
بعد ده كلوا يجي الرئيس البشير ويعير الناس بي الهوت دوق، وهو لا يدري أن الهوت دوق أكل الغلابة في أمريكا وبيتم صنعه من بواقي اللحوم.
دينق يا حبيب ...
الشئ المؤلم في اللستة دي انها ( updated ) و مفصلة علي جيلنا عاشق معشوق ...
لحد قريب كنا عايشين على قصص ناس الترماج وود نفاش و الجدادة بقرشين ...
الجيل داك انتهى من على وش الأرض هو و حكاياتو ...
بقينا انحنا و انتو في وش القفص يا صديقي ...
Post: #26 Title: Re: نفسي قام لغاية ما لقيت سنة ميلادي في البَك Author: يحي قباني Date: 06-24-2017, 07:47 AM Parent: #25
Quote: يا قباني تاني اذا سألوك ولدوك متين قول : وقت جوز الحمام 3
أي و الله بس ياهو يا عبد العظيم ...
زمن كنا بنمرق من المولد نلحق السحور .... :)
Post: #27 Title: Re: نفسي قام لغاية ما لقيت سنة ميلادي في البَك Author: يحي قباني Date: 06-24-2017, 07:53 AM Parent: #26
Quote: يا عمّو ............
قلت لي عملت سكرول داون لما نَفَسك قام؟
يعملوا ليك شنو لو سقت أوبل تعشيقتها فوق وبطاريتها 6 فولت؟
و الله سقتها ... اكضب عاد ...
و عملت بيها حادث مرة خبت سواق تكس كورولا 80 في شارع البرلمان قصاد سودان كلب
الكورولا كبت موية لديترها و اتفرطقت على مية حتة ...
و الاوبل جاتها طفجة سغيرونه كده جنب الفانوس ...
لي يوم الليلة السمكرجية ما قدرو يستعدلوها ... و لعلمك الخبتة ما وصلت الفانوس ...
ياخي أقول ليك سر تاني ؟
انا ركبت عربية ( ما كنت بسوق لسه ) منفلتها طارة و حبل !!!
دي اسأل منها كبر ... :)
Post: #28 Title: Re: نفسي قام لغاية ما لقيت سنة ميلادي في البَك Author: ترهاقا Date: 06-24-2017, 07:56 AM Parent: #27
لو اشتريت تكسي هكر عشان تصرف كوتة بنزين ------- تقصد هنتر يا باشمهندس؟
Post: #29 Title: Re: نفسي قام لغاية ما لقيت سنة ميلادي في البَك Author: يحي قباني Date: 06-24-2017, 08:23 AM Parent: #27
Quote: هل تصدق يا محمد فعلا انا كنت عندي اوبل تعشيقتها فوق وبطاريتها 6 فولت عام 1981م خلاص يا قباني هرمنا ... وبقينا زي الغرباء لمن نمشي السودان اجازة
نان انحنا جرينا خط على الرجعة لي شنو ؟
بقينا اغراب جوه و بره ...
Post: #30 Title: Re: نفسي قام لغاية ما لقيت سنة ميلادي في البَك Author: يحي قباني Date: 06-24-2017, 08:25 AM Parent: #29
Quote: قبلك وحَّدَّكْ
المنتصر ...
كدي قول بسم الله ...
Post: #31 Title: Re: نفسي قام لغاية ما لقيت سنة ميلادي في البَك Author: نادر الفضلى Date: 06-24-2017, 10:58 AM Parent: #30
Quote: لو اكلت ايس كريم من بابا كوستا
أيسكريم بابا كوستا .. دا ما بذكره .. يبدو معلومة خاطئة معليش .. العيش التوستة المضفر لبابا كوستا ( توستة تختلف عن توستت عيش أمريكا ، ومقصود الأفرنجى الشبيه بالإيطالى) كنافة ... وجاتوهات .. بابا كوستا
أما كوستا بأمدرمان .. فتوزيع الرغيف للبيوت العم شريف بالعربة التى يجرها الحصان (ليس مثل الآن التوزيع بعجلة Byic وآخر جهجهة) يوزع عيش بلدى وأفرنجى وعيش (القالب)
و GB حيث الجودة العالية .. ليس يعرفه كل الكوامر !
بمناسبة العيش .. أضيف للقائمة عيش الردة ـ أفران سيحة
ويا قبانى القائمة خرتومية .. الكوامر ديل بس خرتوميين ؟! وشايف ما فى تبرم و إحتجاج عليها مثل الإحتجاج على الحقيبة مثلاً ما فى حضارات سادت ثم بادت بباقى السودان .. أم لدواعى تفادى الكمرنة .. وش مبتسم
* القائمة بعض معلوماتها مفيدة للبعض ممن يريد إثبات أنه خرتومى من زمن لسة ! سينجحوا فى المعاينة الأولية ولكن المعاينة التخصصية ما ظنيت ... وش ضاحك
وفى السودان بسبب العشوائية وضياع الحقائق والمعلومات .. الكوامر لهم مسمى آخر يرفع معنوياتهم .. شاهدى عصر .. شهود عيان يقفون ضد الزيف ولوى عنق حقائق التاريخ الحديث للسودان يصدون المزيفيين وينقلون الحقائق لأجيال التويتر والوتساب
وكما قال قبانى Age is just a number ورينا ينعم بالصحة والعافية على الجميع
وسلام للجميع ...
Post: #32 Title: Re: نفسي قام لغاية ما لقيت سنة ميلادي في البَك Author: الزاكى المغيرة Date: 06-30-2017, 10:20 PM Parent: #31
ياقبانى كل عام وانتم بخير نحنا ناس ضهارى جينا الخرتم زمن كوكبانا والتكس الهيلمن
Post: #33 Title: Re: نفسي قام لغاية ما لقيت سنة ميلادي في البَك Author: Mahjob Abdalla Date: 07-01-2017, 02:34 PM Parent: #32
سلام قباني و كل عام و انت بخير الكومر البدور بالمنفلة دا عندنا. تعرف قبل استقلال السودان بشوية, الخواجة حاكم محافظة كتم (مستر مور) بني المدرسة الوسطي و جهزها بكل ما هو حديث في ذلك الزمان. سكن الاساتذة و المدير و الداخليات و مشرفي الداخليات و بالاضافة ليهم كومر المدرسة لنقل المعلمين من و الي السوق و العم جوكر الخراج الذي ينقل الماء للداخليات. اها الكومر و العم جوكر من المؤسسين لهذه المدرسة و كانو لسة شغالين في الثمانينات لما احنا دخلنا و خرجنا منها.
Post: #34 Title: Re: نفسي قام لغاية ما لقيت سنة ميلادي في البَك Author: سيف اليزل برعي البدوي Date: 07-01-2017, 02:44 PM Parent: #33
في اي سن تكون كبيراً في السن؟ قدمت منظمة الصحه العالميه تصنيفا جديداً لمراحل عمر الانسان، فقد أعلنت أن الاشخاص الى عمر ٦٥ يعتبرون في سن الشباب حيث قسمت حياة الناس كالتالي: ▪٠ - ١٧ دون السن القانونيه ▪١٨ - ٦٥ شباب ▪ ٦٦ - ٧٩ متوسطوا العمر ▪ ٨٠ - ٩٠ كبار سن ▪١٠٠ فما فوق معمرون
يالله افرحوا ياشباب😀😀
Post: #35 Title: Re: نفسي قام لغاية ما لقيت سنة ميلادي في البَك Author: Mannan Date: 07-02-2017, 09:17 AM Parent: #34
يا قباني ;كبرنا وكبرت أحزاننا وهرمنا وهرمت أهرامنا والباقى فكة...
Post: #36 Title: Re: نفسي قام لغاية ما لقيت سنة ميلادي في البَك Author: محمد أبوالعزائم أبوالريش Date: 07-02-2017, 09:29 AM Parent: #35
Quote: جايبين بكرة بتعمل فيها سكرولنج داون
طبعاً بلغة الكوامر ما إسمها بكرة ....................... إسمها كرورية :)
Post: #37 Title: Re: نفسي قام لغاية ما لقيت سنة ميلادي في البَك Author: Basamat Alsheikh Date: 07-02-2017, 09:46 AM Parent: #36
سيف اليزل التصنيف بتاعك مطبق عمليا في امريكا واوروبا... ولكن للاسف عندنا في السودان التصنيف معكوس على النحو التالي:~ ~من سن ١ الى سن ٥ الطفولة ~من سن٦ الى سن ١٥ سن الشباب من سن ١٦ الى سن ٢٥ متوسط العمر من سن ٢٦. الى سن ٣٦ سن الكهولة من سن ٣٧ الى سن ٤٧ سن الشيخوخة ونهاية العمر من سن ٤٨ الى سن ٥٨ المعمرون وهم في بيوت العجزة من سن ٥٩...لا يوجد... .....لان الامريكان والاوربيين بيعتبرو عدد سنوات عمرهم مجرد ارقام كما قال صاحب البوست يحى ..وهم يعيشون لحظات العمر دون اعتبار لسنوات العمر.. ولا يتخلون عن الامل ابدا....فحياة بلا امال واحلام حياة كئيبة جرداء.. ودمت بخير وصحة وعافية
Post: #38 Title: Re: نفسي قام لغاية ما لقيت سنة ميلادي في البَك Author: عبدالحفيظ ابوسن Date: 07-02-2017, 09:57 AM Parent: #37
لي زمن ما بعيد جدا منتصف السبعينات شفت المنفلة نوعين حقت الكوامر واللواري طارة وعندها مجرة في النص للحبل . الحبل دة مرات بجرو نفرين او لاندروفر بي منفلة بدون حبل وكانت تمام لا استارتر نام ولا بطارية ولا لزة مع التذكير كوستي كلها ما بتلحق ليها عشرة عربات خاصة ما حضرت 😊😆 لكن كلموني انا مولود نهايات القرن المنصرم
Post: #39 Title: Re: نفسي قام لغاية ما لقيت سنة ميلادي في البَك Author: Basamat Alsheikh Date: 07-02-2017, 01:26 PM Parent: #38
المسنوح ود ابو سن اعترف وما تكضب....ما حضرت كيفن،،،!! وكان كلموك..الزول الكلمك ده اذا كان حاضر الزمن داك يعني قريب منك( وجه ضاحك حد القهقهة).. بس انت قلد الامريكان والاوربيين وما تجيك حبة العوجة...وكتر من اكل السمك ، فهو يجدد الشباب، وسلافة بنت كوستي بتقول ان كوستي بها نصف كمية السمك الموجود في السودان كله...ورخيص رخصة التراب... ودمت بالف خير وصحة وعافية
Post: #40 Title: Re: نفسي قام لغاية ما لقيت سنة ميلادي في البَك Author: عبدالحفيظ ابوسن Date: 07-02-2017, 05:04 PM Parent: #39
تسلمي بسمات يعني اكضب انا قلت ليك مولود في نهاية القرن اها نهايتو دة من متين
Post: #41 Title: Re: نفسي قام لغاية ما لقيت سنة ميلادي في البَك Author: Basamat Alsheikh Date: 07-02-2017, 06:33 PM Parent: #40
حاشاك من الكضب يا ابن عمتي ايام اونلي كيدينق Im only kidding ودمت بالف خير
Post: #42 Title: Re: نفسي قام لغاية ما لقيت سنة ميلادي في البَك Author: عبدالحفيظ ابوسن Date: 07-02-2017, 07:21 PM Parent: #41
هههه جادة مالك يا مسنوحة ولا طولتي من تعابير السودان يعني اكضب دى برضو هظار بالجد انا مواليد 1994 البعرفونا ما يحضرونا
Post: #43 Title: Re: نفسي قام لغاية ما لقيت سنة ميلادي في البَك Author: محمد أبوالعزائم أبوالريش Date: 07-02-2017, 10:03 PM Parent: #42
Quote: لي زمن ما بعيد جدا منتصف السبعينات شفت المنفلة نوعين حقت الكوامر واللواري طارة وعندها مجرة في النص للحبل . الحبل دة مرات بجرو نفرين او لاندروفر بي منفلة بدون حبل
ما حصل دوّرت ليك مكنة ليستر إنجليزية أو هندية بي منفلة؟
ده شغل ناس المشاريع الزراعية.
Post: #44 Title: Re: نفسي قام لغاية ما لقيت سنة ميلادي في البَك Author: الأمين عبد الرحمن عيسى Date: 07-02-2017, 11:22 PM Parent: #43
هههههههههههههه ولله أنا ناجح جبت 47 من 48.. بس عبدالله خليل ما حضرته لكن بذكر رهاب رهاب هتافات زمان حررت الناس ياسماعيل الكانوا عبيد يا سماعيل وطبعا الهتاف المرادف ليهو عبدالله خليل جنقاوي طويل..عبدالله خليل جنقاوي طويل.. كنا نرددها زمان لكن ما عارفين عبدالله خليل منو ولا اسماعيل منو.. المهم .. البكرة هينة.. الكلام صورة البرووفايل الفيها إينشتاين عملتها فيك.. ولو رجعت للبروفايل السابق بنصنفك مع ناس 88 تحياتي قباني وضيوفك..
Post: #45 Title: Re: نفسي قام لغاية ما لقيت سنة ميلادي في البَك Author: Elmoiz Abunura Date: 07-03-2017, 05:39 AM Parent: #44
سلامات يايحى
اما عنى فاعترف باننى كومر بدرجة مشير.
ومثل اخوى الكاشف, نادرمحمود الفضلى فاناخريج الخرطوم شرق الاوليه فى منتصف الستينات.
اما البيه عبدالله خليل و الزعيم اسماعيل الازهرى فلم اشاهدهم فقط, بل قدمت لهم الشاى والبارد فى افراحنا و اتراحنا فى طفولتى و صباى البارد و زرت بيوتهم كمان. فعلا بابا كوستى من زمن الاغارق حتى زمن المرحوم محمد عبدالقادر اسماعيل ماكان فيها ايس كريم. مع ودى
Post: #46 Title: Re: نفسي قام لغاية ما لقيت سنة ميلادي في البَك Author: الزاكى المغيرة Date: 07-03-2017, 07:06 AM Parent: #45
ياشيخ قبانى مسعول من الخير
معلم ربى من شهادة ميلاد تسنين ومن بربر ابد مابتعرف لى تاريخ انتقال الحلفاوين الى حلفا الجديدة سنة كم الليلة داير اكون شفاف مع نفسى واعرف عميرى كم باقى كنت مطارش الحكاية دى زى ماتقول مجهجة ومفطسة على الاقل الواحد يقيس ويضبط عليها عميرو ويحسن خطو قبل ماتقع الواقعة ويتلافوهو على الجبانة والاعمار بيد الله ولكل اجل كتاب نسال الله طول العمر باقى نحنا صغار نشاهد قطارات من على البعد بالضفة الشرقية بصورة غير مالوفة سمعنا اهلنا فالو ديل ناس حلفا غرقومنطقتهم ومرحلين
والنسوان والرجال كانو غضبانين ويدعو على الحكومة
Post: #47 Title: Re: نفسي قام لغاية ما لقيت سنة ميلادي في البَك Author: يحي قباني Date: 07-03-2017, 07:13 AM Parent: #45
لغاية ما أجي لكل الاحبة
بابا كوستا كما قال نادر و ابو نورة
عيش توستا ... زي الباقيت الفرنسي ...
الايسكريم كان عند محلات سويت روزانا قصاد بابا كوستا من الجهة التانية و كان جنبهم محلات عمك دياب حق الشنط و الجلود جوار بابا كوستا كانت لي جوه شركة الدلتا للمواد الكهربائية عمك علي عوض الكردي و أولاده ( عيال خالتي ) محمد و باهي الدين رحمهم الله ثم يأتي بعدهم محلات جمبرت للاواني المنزلية و صاحبها عمك جوزيف قهواتي ...