Post: #3 Title: Re: أحلى دراما سودانية رمضانية .. دقيقتين بس ي� Author: أحمد محمد عمر Date: 06-18-2017, 09:29 PM Parent: #1
حاج التوم وحمدنا الله (ابوبكر فيصل ومحمد جلواك) المقاطع في الفيديو أعلاه بتشتغل معاك بالترتيب من برنامج (حنك) البناقش كل يوم قضية جديدة من داخل الاستديو بالإضافة لتقرير ميداني على طريقة جلواك الشهيرة ثم فقرة حنك زمان الموجودة فيديوهاتها حقيقة أجادوا الدور شديد ومتعوني
Post: #4 Title: Re: أحلى دراما سودانية رمضانية .. دقيقتين بس ي� Author: أحمد محمد عمر Date: 06-18-2017, 09:33 PM Parent: #3
محمد عمر ابراهيم محمد جلواك دة مبدع كامل الدسم والله في رمضان دة انتشر انتشار ما طبيعي عندو دراما يومية (شقة ديلوكس) على الشروق ومشارك في (زواويل) و (حنك) على سودانية 24 وعندو أبواب الهمبريب على أنغام .. ديل الشفتهم لحدي هسة وكلهن يوميات ما عارف عندو تاني زيادة ولا لأ
يسعد مساكم يااحمد عمر الحجاج الاتنين مبدعين وخفيفي الظل
Post: #10 Title: Re: أحلى دراما سودانية رمضانية .. دقيقتين بس ي� Author: أحمد محمد عمر Date: 06-19-2017, 06:35 AM Parent: #9
أيوة يا نجمة ذكرتيني إنه اعجابي بجلواك نساني أشيد بطريقة ابوبكر فيصل في رسم شخصة العجوز .. مدة اللسان وحركته وحركة اليدين وطريقة الكلام والنظرات والأضان التقيلة .. ياخي جننها جن يدوك احساس إنه الدراما السودانية لسة بخير
Post: #11 Title: Re: أحلى دراما سودانية رمضانية .. دقيقتين بس ي� Author: أحمد محمد عمر Date: 06-19-2017, 07:40 AM Parent: #10
محمد جلواك وابوبكر فيصل برضو مشاركين في الدراما اليومية (شقة ديلوكس) على قناة الشروق
بالنسبة للناس الما بقدروا يشغلوا يوتيوب سواء بسبب الشبكة أو الحجب في مكاتب العمل قلنا نهديهم صور من الحلقة
أكيد الصور حتكون لمحمد جلواك وابوبكر فيصل يعني انتو قايليني داير اجيب صور تانية ولا شنو ! أنا غايتو بوقف الفيديو على جلواك واعمل برنت اسكرين وارفق ليكم طوالي لكن أكان جلى مني مؤشر الفيديو وما جاب جلواك مع الصيام والجوع دة ما بقدر اسكو ليكم والله المهم انتو ارضو بالقاسمها ربنا