مدير مكتب الرئيس ؛؛؛

08:07 PM June, 14 2017
سودانيز اون لاين
علي دفع الله-سنار
مكتبتى
في ظل اي نظام يصل مرحلة التخمة من الفساد تزداد هذه الوظيفة أو المنصب اهميته ....
وفي ظل دولة القانون والمؤسسات يصبح هذا المنصب برتكولي وسكرتارية لتنظيم دولاب عمل الرئيس وهاكم الامثلة ..
يتبع ...

والله يا أبو الدفاع قبل ما تقول حاجة

أنا مندهش من طه دا يمكن لدرجة الإعجاب

الراجل دا دخل وكر الكيزان ساطهم ليك غير سياستهم لحس قروشهم ومرق زي الشعرة من العجين خلاهم يتلفتوا محتارين

سلامات علي دفع الله

السودان بلد الهرج الأكبــر
حيث مدير مكتب الرئيس يعمل عمل وزير الخارجية
ويعمل عمل نواب الرئيس ويعمل عمل مساعديـن الرئيس كلهم

طه الدلاهة دا شغلته مفروض تكون زي شغله البيكون قاعد في تربيزة الإستباليه
شغلته كلها يدخل العيانيين للكتور يقفل باب العيادة بعد ما الناس يفوتوا ...

بي قدرة قادر الزوول العجيب دا مبعوث الرئيس وماسك ملفات حساسة تتعلق بمستقبل السودان
وعلاقاته الخارجية وملفات إستراتيجية تحتاج الي فريق عمل متخصص كبير
مش زوول واحد لافي زي تاجر الشنطة وكل شوي لافح ليه طاقة ...

المصيبة الناس الشغالين يبشرونا بالتغيير في بلد يدار بهذه الطريقه كيف يعرف التغيير له طريق

تحياتي

صديقي عبد العظيم عثمان تحياتي يا اخي
طه وصل لي مرحلتو دي نتاج قربو من البشير وكل التحليلات السياسية لهذه الشخصية تؤكد بأن طه حامي نفسو جيد وحا يشتغل بنظرية (سيب وانا اسيب)
المحيرني في القصة دي كوووولها يا عظمة في واحدين بقولوا انو بكري حسن صالح بداء الحرب على الفساد ههههههه.

مودتي

درديري يا صديقي ازيك يا اخي
وانا معاك في دهشتك دي ..كتبت بوست عن طه وحميدتي قبل فترة وقلت انو هؤلاء الاسلاميون قالوا في فترة سكرة السلطة والثروة الانبهلت عليهم انو عندهم كوادر مؤهلة تدير شؤون الوطن الى يوم القيامة ولكن تأكد تماما وصولهم لمرحلة الطاهوية والحميدتية اكبر كذبة في تأهليهم السياسي والفكري .
تحياتي

حضرت فلم مصري اسمو طباخ الريس بتناول قضية مدير مكتب الرءيس بصورة عميقة جدا ..
------------------------
في آخر فترة حكم الرءيس المصري حسني مبارك طغت شخصية ماسكة بجميع ملفات الدولة المصرية اسمو زكريا عزمي ما اشبه الليلة بالبارحة كذلك طغت شخصية طه بصورة ازعجت اهل النظام قبل المعارضة ..

قرب طه من صانع القرار في ظل نظام فاسد ودساءيس ومؤمرات وتسجيلات وdirty files وصلت لي مرحلة جعلت البدريين (دا مصطلح انقاذي يعني من قام النظام علي اكتافهم) يتوددون قربه .
في ظل هذا الوضع ومع خواء طه الفكري والسياسي والخبرة اصبح هذا فوق لمقدراته الذهنية والعملية وهنا بدأت الربكة..
واصاب النظام التململ من هذه الشخصية التي اصبحت الدينمو المحرك ليس لدولاب مكتب الرءيس فقط بل تعداه لشؤون سياسة الدولة الخارجية والاستثمار وتذكرون تصريحه بخصوص قطع العلاقات مع ايران .
--------------
سؤال ما هو مصير طه ؟؟
يتبع

يا علي شايف هسه مع مين كده بخيت ده بقت "مكاتب" الرئيس وليس مكتبا واحدا وحيدا
يكون الزول الجديد ده قال ليهم مكتب الرئيس بدورلو رفيقة هههههه

ههههههه والله فعلا يا دكتور سيف بقت مكاتب

ماهو مصير طه !!
غايتو بشة لو فرط فيه وخلاه طلع بالجد حا يوريهم النجوم عز الضهر ..الراجل سحارة اسرار البيت للرءياسي .
ولو تم زجه في السجن برضو مشكلة لانو السعوديين والامارتيين ما حا يسكتوا ..
النظام يترنح ..
-------------
وين تراجي من المولد دا 😂

يا سيف مكاتب من اخر تعيين ل طه
يا علي
الامريكان لو قبضو ليهم جاسوس بنكرو
حسب افلام جيمس بوند

الأخ علي دفع الله____ تحياتي...... موضوع اعتقال طه ، يشوبه الكثر من الغموض. ..! المسائل المالية والسرقات -لدي أهل الانقاذ- لا تعني شيئاً . كلهم يفعلون ذلك دون حرج . ما تسرب من معلومات عن مكالمات خطيرة ، يمكن هو أحد الأسباب ، وان لم تظهر بوضوح -حتي الاَن- نوع تلك المكالمات وأهميتها. خلافاتهم الشخصية لا تهم الشعب السوداني في شيء. المفيد أن تظهر بؤر الفساد وصنًاعها ، خاصة اذا تم اطلاق سراحة و اذا كان يملك شجاعة في توضيح الحقائق للرأي العام. سبقه صلاح قوش وسكت عن الكلام المباح وفي جوفه العديد من الخبايا، لكن اشتروا صمته مقابل شركات تزيده ثراءً وأشياء أخري...وطالما كانت أجهزة الدولة تعمل بعقلية جمعيات الأحياء الشعبية الخيرية-دون نظام اداري ومؤسسي لكل مفاصل الدولة- فلا حرج أن يخرج كل من سرق من موقع الدولة - بريء. وأمثالهم السلبية :( السارق اذا ما ضبطوه فهو شريف)...رغم تضاد الشرف والسرقة.....وأغلب الظن هو ومجموعته مصيرهم ينتهي كما تم مع قوش ويبدأ مسلسل الهاء الشعب السوداني (بفرعون ) جديد..

تحياتي صديقي نصر الدين .
فعلا الشغلة لو فساد واموال ما كان وصلت للحد دا ..
في حاجات وصراع اجنحة
تحياتي

ابسن اخوي حتة طه جاسوس دي ما واقعة لي لانو عقلو اصغر من ان يقوم بالدور دا ..
الوصلو ليه الكيزان دا نتيجة حتمية لحالة اللادولة ..
والله انا بقيت اخاف علي ضياع الوطن وهم أحرص علي ضياعو ..
تبا لهم يا اخي
مودتي

ألحسين

صديق ميرغني يا صاحب تحياتي

ابو ادم
طيب يا اخي شوف لي اخوك فرقة طالما الوظيفة متاحة
و الله اظبط ليك بشة دا تظبيطة بالصح

و كمان ما تنسى برضو عمك بكري
و قالوا بقى محارب الفساد
هههههههههههههههههههههههههههه
دا دواه عندي

انا اخوك يااااااااا أبو ادم

طه الدلاهة .. جاسوس؟؟؟؟


ههههههههههه

ياخي كمان ما تبالغو

دا بندق دلاقين ساي


علي سلامات ورمضان كريم

ود دفع الله ياحاقد
هو كل واحد ابو اسمو دفع الله ياحاقد يازنديق ههههه
هسى اكان رشحت عمتك تراجى لادارة ماكاتب راعى البردولبة مش كان اخير ليك وممكن تلقى ليك كجة
تراجى سودانية وكندية وعندها علاقات وطيدة مع اسرائيل وحميدتى بزات نفسو معجب بيها وعزمها تحضر
حفل تخريج دفعة من القتلة تبعو .... متى متى تعو وترعو انت وود دفع الله ومعكم حاجة المؤتمر الوطنى
تبا لكم ياقول بشاشة

عماد الطيب يا صديقي هههههه عاوز تبقى مدير مكاتب بشة وما جاورها هههه خسءت ..
غايتو لو الله وقعك مع بكري ما عليك الا تجينا زيارة في الصعيد ونديك من وارد ابصامولة سجارات يقمن صلبه😃😃

سلام الجميع، صاحب المنشور والمتداخلين.
امتدادا لمداخلة الأخ عبدالعظيم عثمان،
مهام مدير المكتب اعلى قليلا من مهام السكرتير التنفيذي،
وزي ما يقول الاخ عبدالعظيم، ليس له صلاحيات خارج المكتب سوى
متابعة مهام الرئاسة المخولة للوزراء والمساعدين عن طريق المراسلات الايميلاتية
والاتصالات الهاتفية، والرفع بالمستجدات
للرئيس حتى انتهاء الامر المعين، بالاضافة لترتيب ملفات الرئيس
الموجودة بدواليب المكتب، وتنظيمها من اجل سهولةالوصول
للملف المعني،الى جانب نسخ الكترونية software تحفظ في
ال drive.
......
تحرك مدير المكتب خارجيا فيه انتقاص وتقليل من شأن وزير الخارجية
والبعثات الدبلوماسية في الدول المعنية، وقد يمتد الامر
لعدم الثقة فيهم او ان الامر مصلحة خاصة اكثر من هي عامة.
......
كأن الامر يقول لدينا وزيري خارجية،
او وزير خارجية ومبعوث خاص للرئيس.
....

تحياتي اصدقاءي
بدر ابو لبيد
هيثم غالينا
شيخ قصي
شاكر مروركم ومع طه مش حا تقدر توقف كيبوردك ..

اها يا سلاجقة مين اللي بعدوووووو...طه لحق اماتو ..
-----------------------------------
والله الواحد يشعر بالعار للزمن الخلانا نحكم بي طه وحميدتي وبكري وبشة ولمبي وساطور كمال عمر وعبد العاطي وبقية الاوغاد .
تبا لنا نحن ثم تب ..