قهر مبتلاه فحمد الله لله دره من فتى

08:41 PM June, 12 2017

سودانيز اون لاين
حامد بدري-
مكتبتى
رابط مختصر

رمان كريم عليكم احبتي وسحوركم فوقو العافية بتوقيتنا وكده
قبل يومين لاقيتو وبي بسمة حياني وحييتو في موقع فيس بوكي جميل اسمو ممكن خدمة شايل من اسمو كل الطيبة والحب والمحبة كاتب ليو بوست :
( الطيب عبدالمنعم المشهور ( بي الطيب ام دقرسي ) الحمدلله الله شال مني حاجه اداني حاجه اقوي منها و الحمدلله واتساب و فيس بدردش بي لساني زي الزول العندو يدين الحمدلله مبسوط مع الاخوان وهو اصلو الدنيا غير اخوان شنو بحليها
بس داير اوريكم ربنا كريم كيف و داير اتكلم علي المعاقين البكونو ياسانين لمن الحزن باين في وشهم لالا دا كدا مو صاح و في نوع دا من البيت ما بطلع خجلان من روحو لالا ياخ كدا انتا ما صاح والله انا الحمدلله من يومي معاق و من يومي ما بقول غير الحمدلله دي ياها النفعتني و انا الحمدلله الله اكرمني بي اخوان و الله بقيت قوي بيهم انا الحمدلله صغير عمر عمري 25 لكن لاقيت رجال يسدو عين الشمس لاقيت رجال مكوك لاقيت رجال بي معني الكلمه ملكة السودان دا كلو في تلفوني دا متواصل مع ناس كباااااااااااار في الدوله دا كلو من فضل ربي)
دخلتا قتا ليو اول شئ اقبل صداقتي ولو تفضي لي خانة مع الالوف البتحبك دي وتاني هام ماتقول اعاقة دي في خشمك عشان ناس الامارات الناس الراقية اطلقت اسم غير اصحاب الاحتياجات الخاصة وسمتوم اصحاب الهمم ارفع راسك الدنيا بتشيل الناس كلها واملانا معاك يقين وود ووحب ومحبة اها قالي برسل ليك فديو عايزك تنشرو في صفحتك ومعاو صور وليو يومين شفقان شفقة السنين اها المنبر مافتح وللتعترو مية محاولة دخول كلهن فشلن يقولي انا عايز الناس تتواصل معاي وابقى زي فلان داك وقاليو اسم عنجليزي اظنو نسيتو داير اشتهر يااااحبيب تشتهر ياابو الطيب اكتر من يجيك طارق الامين وطارق اللبيب وناس عديل المدارس وبنوت جامعة الخرطوم بطن بيتك علا نجيب النجدة والقاضي المقيم ودقوشة بتاع مدني ياابداقوسة وشابكني ليك اها بكري فتح اقوليو لسه بكري مشا تركيا يزرع الصلعه ونسا المفتاح الليلة راجع بفتح ونرشح
ابو الطيب ده من ناس ام دقرسي قرا الروضة والاساس على كرسي متحرك امو الله يديها الصحة والعافية بتوديو وترجعو لامن تعبت ومرضت خلا القراية وحفظ تلتين القران سماعيا بتواصل مع الناس فيس وواتص بي طريقة سريعة حتشوفوها في الفديو امدقرسي بعرف فيها واحد زميل دراسة جامعية زول ملح جروح وبعشي ضيوفو السحاب شايل واخو اخوان اخوي الماولدتو امي عثمان ود الطيب يونس
التحية ليكم ناس ام دقرسي القاطعين زلط الخرطوم لاكرام الناس في رمضان والتحية للطيب وعبره لصديقي وتوام روحي عثمان عشا الضيفان

الحبوب الهميم الطيب في دردشة واتصابية دينو وايمانو واتصاب امس صور لي كم الف رسالة في الواتص قتا ليو لسانك ده بتزلطو ")

ابو الطيب المنبر ففتح نشوف لينا جوكي يدخلك هنا فيس بوكيا

الاخ حامد بدري رمضان مبارك وتقبل الله منكم الصيام والقيام وجعلنا الله واياكم من العتقاء في. هذا الشهر
والتحية ابعثها عبرك. للشاب الطيب أم دقرسي وربنا. يقويه ويفتح عليه من كل جوانب. الخير

رمضان كريم يا حامد
تحياتي للطيب صاحب الارادة الحديدية وخير ما فعل حمده لله و شكره, نجتهد غايتو ونحاول يمكن تزبط

Quote: رمضان كريم يا حامد تحياتي للطيب صاحب الارادة الحديدية وخير ما فعل حمده لله و شكره, نجتهد غايتو ونحاول يمكن تزبط

الزول الوسيم ودالبشرى تحياتي ليك قلنا تجيب لينا شبكة وصنارة تقوم تجيب السمك جاهز
يالله عملتا كيف الحركة دي انا الاقتباس قعدتا اسبوع حتين ظبت
ربي يعافيك ويسلمك من كل الشرور

Quote: الاخ حامد بدري رمضان مبارك وتقبل الله منكم الصيام والقيام وجعلنا الله واياكم من العتقاء في. هذا الشهر والتحية ابعثها عبرك. للشاب الطيب أم دقرسي وربنا. يقويه ويفتح عليه من كل جوانب. الخير

ودالمسلمي معاك نقول امين يارب وكتر خيرك على المرور

الصورة على مااظن مع طارق اللبيب

سلامات بدري
والتحية عبرك للحبيب الطيب الرجل الطيب
لم التقيه في الواقع لكن التقينا كثيرا في العالم
الاسفيري رجل ملاك بمعني الكلمة له مني كل الاحترام
ولك اخي حامد بدري كل الود والتقدير
تسلم

ودي مع الزول الطيب صاحب مبادرة عديل المدارس طارق اللمين في زيارة ليهم لام دقرسي وفي منزل المبروك ابو الطيب

Quote: سلامات بدري والتحية عبرك للحبيب الطيب الرجل الطيب لم التقيه في الواقع لكن التقينا كثيرا في العالم الاسفيري رجل ملاك بمعني الكلمة له مني كل الاحترام ولك اخي حامد بدري كل الود والتقدير تسلم

اهلا بودالقرشي صراحة يومين متواصل معاو زول ظريق جدا ومابتمل منو وقفشاتو ربنا يوفقو

الزول القالو لي مثلو الاعلى اسمو نيكولاس



قتا ليو لو عايز تبقا زي نيكولاس ده علا تقدم اللوتري ديل ميسي بضييييعو والكوليرا غلبتوم
يابن زايد ياطرمبة احسن دولتين فيهم حفظ لحقوق اصحاب الهمم شوف الاسم زاتو كيف تقول لي جمعية المعاقين والصم والبكم اصحاب الهمم
اقع امريكا والامارات في السعودية في واحد بجيبو ليك بعدين ده شلل كامل وبدير شركة بريد فيها الوف الموظفين

ياسلام عليك ياحامد
بوست جميل
والتحية عبرك للهميم الطيب
ولاهل ام دقرسي

Quote: ياسلام عليك ياحامد بوست جميل والتحية عبرك للهميم الطيب ولاهل ام دقرسي

طلتك علينا هي الاجمل اخوي الصادق ود ميرغني

Quote: ضراعي المافي متلو جزم بشر لاقاني اخوي وربيعي في الحوبات وشيتآ تاني ود البتكي للدرشي البــــشاري القاني سمته وضكره عزه وجــــود وكلو معاني اخوي الطيب الفــارس الموشح هــمه اخوي الكرمو وابل العينه خاتي الزمه الابواتو في الحوبات بفــــشو الطمه م ببره السعوب في الــحله ولا الرمه إسمك م انزكر غيــــر النفايل التامه دارك جامعه محسوب النسب والعامه إيدك للدفع دايمــــآ مواركه وهامه وانت الدخري لي يوم العوج والطامه ود البكرمو الحــــــــلال لحوم وكباد فشاش عاقة الصــــــي للبجيهم صاد بشوشآ خيرو فايض واصلو زول مشهاد بحلحل عقدك. إن مضــــيوم وإمد الزاد حسام ود الجعلي

Quote: بسم الله الرحمن الرحيم 🌴 اللهم صلي علي سيدنا محمد شفاء كل عليلة ومعلول وعلي آله وصحبه وسلم 🌴 محي الدين نديم الليل مع الطيب ام دقرسي 🌴 المولي الكــــــريم كان ابتلاك حباك بتكسب حب نبيك الهادي في ام شباك علي كـــــل البلد بالحب بتلقي نباك وألزم للصبر مــــولاي بشيــل اعباك 🌴🌴🌴🌴🌴🌴🌴 قدر المـــــولي بضرب كل عزيز وذليــل ولا بــــفرز ولا بتلـــــقاه دارلو دلــــيل تكون متعافي قــــول يا كافي هجعة ليل يجيك قدر الله بكرة يقولو فات يا حليل 🌴🌴🌴🌴🌴🌴🌴 الدنيا بتقابلك كل يـــــــوم بي لون تشد وتر الغنا وترخي، وتبكي عيون الحاس بالألم دايمآ بــــــراه ممكون والعافية ان بقت بتساوي كـل الكون 🌴🌴🌴🌴🌴🌴🌴 وياما الدنيـــــا فيها رجال وياما وياما لازمين الصبـــر والباقية غزو خياما سمحت ولة قبــــــحت قبلو بي أياما زي طيب ام دقرسي الزادني في تهياما 🌴🌴🌴🌴🌴🌴🌴 طيبآ ماهـــــــــو طيب عادي، طيب قوة روحو تطــــــوف بساوي ألوف بعز الخوة عندو عزيمة نادرة وقيمة جات من جوة جالب كــــــــــــل نادر وكاسب المرجوة 🌴🌴🌴🌴🌴🌴🌴 ضحوك وبشوش وراجل خير وليك فقاد بعـــــز وبهوش منقي دخير وليل سقاد معاك مــــربوش بلا تأخير وكم كم قاد جلب من كـــــــوش وكم للفرتقن عقاد 🌴🌴🌴🌴🌴🌴🌴 أخـــــــــــــــــــوي الــــــــــــطيب تعال شــــوف اسمــــو كيـــــفن طيب بي فعلو وعلاقتو مــــــع الأباعد طيب أخضر ديمة فـرعو وفي هجيرو رطيب 🌴🌴🌴🌴🌴🌴🌴 بلم الناس متـــــــل يوم الفرح والعيد وكل مـــــن عرفو دوب تلقاه بيه سعيد ناس الخاويــة طارق شوف نديم وسعيد جميعهم بيه طرابة وكل قريب وبعيد 🌴🌴🌴🌴🌴🌴🌴 صاحب همة صاحب ذوق وصاحب نخوة رغم البيه حلق فـــــــوق بريد الاخوة صاحب حس بقابلك شــوق سخيآ سخوة زي بحـــر المحيط حاشاه خاتي الرخوة 🌴🌴🌴🌴🌴🌴🌴 عايش عيشة أطيب مـن ذوات وملوك وسيد نفسك بـراك والله ماك مملوك اخوانك معاك فــوق لي زحل حملوك وفي غنا في غنا وفي كل زين بملوك 🌴🌴🌴🌴🌴🌴🌴 قدر ما تشــوفو مبسوط لي إلهو مسلم ولا شكي من مرض لا تحس بيه،متألم مساهـــو كما الصباح أنوارو ما بتضلم يدي الناس عبـــر بحليفة لينا بعلم 🌴🌴🌴🌴🌴🌴🌴 زول مشلول طريح لا بحرك ايد لا كراع لسانو فصــــــيح معاه وباقي ليه يراع مواصل كــــــل زول مركب عليها شراع بطوف كـــــل الفيافي وكالبرق بسراع 🌴🌴🌴🌴🌴🌴🌴 بدخـــــل في القلب زي النسيم في كرفو كـــــل ما تنطق اسمو يقولو ليك بتعرفو سحاب مطر الخريف الراوي بصعب صرفو شيك دولار دهـــــب يالحر بتخبر صرفو 🌴🌴🌴🌴🌴🌴🌴 بصلي بصـوم وليلو بقوم مع السراي ولي قرآنو يـــــــوماتي الجزء قراي صبورآ صبـــــرو نادر للحجر سراي بخدر فرعــــــو نادي ونابع التراي 🌴🌴🌴🌴🌴🌴🌴 بحلف بــــــي قسم أدانا عز وعزيمة وبعد ما كنا في تغياب وضيم وهزيمة بعزم الطـــيب اترفعنا ضقنا القيمة وعرفناه التعامـــــــل ظللتنا الغيمة 🌴🌴🌴🌴🌴🌴🌴 شوف كـــــــــــل المدن والجامعات لماهن الريف والبــــــــــدو وطيبنا بشرب،ماهن إتعامل وصـــــــــل بي حرفو جت عماهن قصايد الشعراء جملة حلف حفظ أسماهن 🌴🌴🌴🌴🌴🌴🌴 بريد حب الحياة وهام بينا أكتر منو خــــــل الشعراء والكتاب عليه بغنو حروفنا مقصرة وفتراااااانة ما بلغنو وايام السنين بالتجــــــربات دبغنو 🌴🌴🌴🌴🌴🌴🌴 عقبان الـــــــــــزمن حاشاه ما هدنو عالية ثقافتو يعــرف للمدايح اهدنو برفرف برقو لاح وآلات غناي عزفنو كل ما تلقي فــــن طيبنا بطرب فنو 🌴🌴🌴🌴🌴🌴🌴 رجليه ويــــــــديه البتة ما مسكنو صافح لي بعــــيدو وجالب اولاد كنو بلسانو الفصيح قيد الكسيح في كنو أصبح مافي وحــــروف الوصال فكنو 🌴🌴🌴🌴🌴🌴🌴 خيل صيدو البقوم الليل سقد دبكنو قلبن شــــدو جابن ريدو فيه شبكنو عبق بــــــــي ندو أبكاهن وما أبكنو زكي نفوسنا والأيــام نعــــــم زكنو 🌴🌴🌴🌴🌴🌴🌴 كل الناس تريـــــدو وإلا بس لكنو هـــو البهوانا أكتر والنفوس ملكنو ساقنو وجــــرن في سلكهن سلكنو هلك ارواحنا جت بس الا ما هلكنو!!!! 🌴🌴🌴🌴🌴🌴🌴 ولدة رحمة يا البيك ام دقرسي فخورة بيك عزة عيالة وبـــــي نساها وحورة أب جيبين اخوك هيثم عمر واب شورة ما يهمك كتــير قاعدين رجال الشورة 🌴🌴🌴🌴🌴🌴🌴 فيه خصالآ اصـــــلآ بتة مآآآ بندسن بجدد كل يـــــوم بربط وصال القسن بي حسنو ومحاسنو مع التعب بتحسن انطق،يا لسان قـــــول وانطلق واتلسن 🌴🌴🌴🌴🌴🌴🌴 منعم من أبــــوه الغالي عبد المنعم مخصص من كـريم رب العباد المنعم أمك نصــــرة يا رب بيها اكرم وانعم اشملنا الجميع زكي،الدواخل وعمعم 🌴🌴🌴🌴🌴🌴🌴 ومنصور بانتصار ليك الوجوه مبتسمة أمنية بيك تمني الـروح وقالت قسمة كما الانجم علاهــن وهن سماهن اسمأ أبشر بـي محمد وجيب ختامهن أسماء 🌴🌴🌴🌴🌴🌴🌴 شاحد الله الكــريم جمعآ يكونو قراب مــع سيدي الرسول من إيدو يلقو شراب وفي ساعة الهجير والدنيا تبقي خراب يكونو مطمنين فــــي الجنة ما أغراب 🌴🌴🌴🌴🌴🌴🌴 الطيب أخــــــوي حوالينا فتح الباب ويا رب تكرمو وهــــو الطيب الارباب وفي كل اتجاه يا رب حضور مو غياب وزي عثمان تقـوم انت ومعاك زرياب 🌴🌴🌴🌴🌴🌴🌴 وبسأل ربنا المــــتعال تنالو رضاك تقوم مــــن الشلل بي قدرة الشلاك بـي رجليك تمش يا رب ونحن فداك تقابض دة وتفكو وتجري تلحق داك 🌴🌴🌴🌴🌴🌴🌴 محي الدين محمد شريف الشيخ الصديق شيخ العرب نديم الليل 🌴🌴🌴🌴🌴🌴🌴

امس عزمني قهوة جيت اشربا زيو خشمي ورم الله لاتاجرك ياابداقوسة

اللعبة دي ماشا الله تبارك الله جاب فوقا رقم ولدي ماجد احرف واحد فينا ماجاب زيييو

تحياتي لاخونا الطيب
امدقرسي بلد جميلة وناس جميلين جدا
مترعين بطيبة واخلاق الجزيرة السمحة

Quote: تحياتي لاخونا الطيب امدقرسي بلد جميلة وناس جميلين جدا مترعين بطيبة واخلاق الجزيرة السمحة

الحبيب ناصر اغلب السودانيين شايل الطيب والمحنة كتر خيرك اخوي
بعدين ماف برامج او تقنيات او معينات تساعد ابرويس ده لانو الدنقيرة والتعامل مع الشاشة باللسان امر مرهق ومتعب للعيون

ماشا الله تبارك الرحمن