بهدوء حول بيان الكهرباء

07:26 AM June, 09 2017

سودانيز اون لاين
عبدالحفيظ ابوسن-no where
مكتبتى
رابط مختصر

لكم التحية
وبالإشارة الى ما نشر في صحيفتكم ارفق لكم بيان توضيح من توزيع الكهرباء يبين أن التصديق الذي تم نشره في صحيفتكم الموقرة قد شابه نشر مشوه لحقيقة وجبات إفطار العاملين وبقية الوجبات طيلة شهر رمضان المعظم في مواقع العمل.

موضوع ذا صلة: بالمستندات: وزارة الكهرباء تخصص خمسة مليار جنيه لإفطار الموظفين

بيان من الشركة السودانية لتوزيع الكهرباء

رصدت الشركة السودانية لتوزيع الكهرباء تداولاً واسعاً لصورة من موازنة تقديرية لتصديق مالي خاص بتوفير وجبات إفطار وعشاء وسحور للعاملين بمواقع الشركة المختلفة، وتوضيحاً للحقائق نبين الآتي:
1- أن شركة توزيع الكهرباء تعمل على مدار الساعة في كل ولايات السودان بهدف الأطمئنان على استقرار التيار لكل الزبائن الذين بلغ عددهم 2.439.955
2- تعمل الشركة بنظام الورديات على مدار الساعة، كما يتم الاستعانة بكوادر إضافية لمصادفة الشهر الفضيل لفصل الصيف ولضمان استقرار الخدمة.
3- للشركة عدد (332) مكتب بيع وطوارئ ومحطة في كل ولايات السودان، تقوم عليها حراسات دائمة.
4- عدد العاملين من العمال والفنيين المهرة والمهندسين وأفراد ألتأمين والعمال الموسميين يبلغ (3584)
5- نظراً لتواجد كل هذا العدد في مواقع العمل المختلفة على مدار الساعة لخدمة العباد والبلاد رأت الشركة أن واجبها الأخلاقي يحتم عليها في هذا الشهر الكريم أن تبادر إلى توفير وجبة الإفطار والعشاء ومساهمة في السحور، بقيمة تقديرية للوجبات الثلاث بمبلغ اجمالي (50) جنيه في عدد 30 يوماً يكون كالآتي: 3584*50*30 = 5.376.000 جنيه
6- علماً بأن ما تم التصديق عليه ميزانية تقديرية يتم الصرف عليها بالمستندات وحسب العدد الموجود ميدانياً وفق ظروف الطوارئ.
كما أن الشركة السودانية للتوزيع أخذت على عاتقها السهر على مصالح العباد والاجتهاد في ايصال الخدمة لهم على مدار الساعة، ترى أن واجبها الأخلاقي الذي لا يقل عن نداء الواجب لخدمة البلاد بتوفير وجبات الإفطار والعشاء والسحور لهؤلاء الجنود.

ختاماً نتقدم كذلك بالشكر الجزيل لكل من اطلع على التصديق المالي في التداول واتصل مستفسراً، وكلنا وعي تام بالمصائب والتحديات التي تجعل مهامنا عبادة وجهد وعرق ونحتسب الأجر عند الله الكريم

ولكم الشكر والتقدير
منتصر عبدالقادر محمد الشيخ
الإعلام والعلاقات العامة

البيان دة مرسلنو ناس الكهرباء ل الراكوبة ردا علي خبر الصرف

دي قروش كتيرة خلاس
احاول كمواطن بسيطة فهمها
واحتاج مساعدتكم

انا زول عنقالي ساكت . ما بفهم في المبالغ المهولة دي
لكن بعرف انو المليار تسعة اصفار
وبعرف انو طلب الفول والعصيدة الواحد عشرة جنية .
وكباية العصير تلاتة جنية
وبقدر احدد اني محتاج لي كم عشان افطر في رمضان
وبفهم لامن افطر مع مجموعة مساهمتي بتقل

برضو خشيت مكاتب توزيع الكهربا قبل الافطار بزمن وجيز وبعدو
وبقدر احدد كم نفر بكونو في المركز حسب ملاحظتي
وانتو زاتكم بتقدرو تحددو كم نفر تقريبا
الناس البتفطر في المركز كم يعني تقريبا

الفطور معقولا
العشاء والسحور لي شنو
اصلا الناس دي من زمان بتتعشي في رمضان ولا غيرو
والشغل البتكلم عنو دة بنظام الورديات
الا يكونو بفطروهم وبغدوهم وبعشوهم في غير رمضان
البيع بالمركز عندو زمن
وبقفلو عادة عشرة بالليل
افهم الفطور لأنو بقع ضمن ساعات العمل الرسمية للكهربا ومافي طريقة يقفلوا
الخدمة مستمرة من الصباح لي بي الليل

الامر بهمني لانو دة مال عام
انا بتحمل دفعو ويتم ضعطي للايفاء به من خلال رفع سعر الكهربا
داير اعرف قروشي بتمشي وين

ورديات يا قريبك, مافي وردية ح تاخد التلات وجبات ممكن اتنين على اقصى تقدير اما فطور وعشاء أو عشاء و سحور وهذا ليس بدعة
اذكر كنا شغالين في مصنع يعمل بنظام الثلاث ورديات ادراة المصنع كانت توفر الوجبات الثلاث و في رمضان كذلك بنفس الطريقة
تقدير سعر الوجبة بخمسين جنيه دي الممكن يكون فيها كلام لكن تحتاج انو الواحد يكون عارف الاسعار عشان يقدر يفتي فيها
بعدين بالنسبة للموظفين و العمالة ماتنسى ناس الطوارئ و التشغيل في محطات التوزيع و التوليد وما تعتمد على ناس البيع فقط

يا ابسن صباحك خير

انا شخصيا اشتغلت في ورديات الكهرباء بالسودان ستة سنين

وبسلطنة عمان تمانية سنين

ماحصل يوم واااحد زول جاب لينا كباية شاي على حسب الكهرباء

عندنا اول حاجة مطبخنا وشيرنا وبنظبط حلللنا و عصايرنا خاصة العشاء.

الفطور كل زول يجيب معاه شي والعمدان تتطاقش وكلها مرتين في كل عشرة ايام.

ما في زول يوم واحد قال تجيبوا لينا فطور ولا بتاع

شكلها السيولة وااااجدة .


راجل كبير لاقيتو في حلة كوكو والله ماقادر يدفع متاخرات الموية عشان يشترى كهرباء وكووولها 100 جنيه جديد عشان يشغل التلاجة
عشان ادويته ما تبوظ!!!!
ونحن شغالين وجبات 3 نجوم!!

حبابك ود البشرى
في بالي ناس الطوارئ
للعلم هم غير رمضان بوقفو الشغل للفطور العادي
والطواري قول عربية واحدة سواق ونفرين . مع انها اغلب الوقت سواق ونفر
بعدينك يعني بتاع الطواري يرجع من اخر الواطة للمكتب عشان يفطر ويرجع تاني
طيب ما يمشي بيتهم
مالوا نحسبو رغم كل شي
موضوع اكلهم دة بسأل منو هنا
انا لسة ما ادينتهم
لامن احسب واشوف هل الكلام دة معقول ولا لا
وبرضو اتاكد من ناس كوستي بياكلو تلاتة وجبات وشن نفرها

قيمة تقديرية للوجبات الثلاث بمبلغ اجمالي (50) جنيه في عدد 30 يوماً يكون كالآتي: 3584*50*30 = 5.376.000 جنيه


غايتو أنا مصدقهم يا حفيظ ..
ومصدق زعمهم بانهم بياكّلوا العامل حقهم ..
بي 50 جنيه ثلاث وجبات قول لي ليه ؟ ..
خش مكتبهم في أي مكان في السودان وقارن ..
هل موظف / موظفه شغال في الرفاهية دي ..
بياكل أكل أي كلام حتى لو ما لاقيه في بيتهم ..
شوف مخصصات العامل سيبك من مهندس أو اداري ..
عليك الله أسال المهندس عندهم بياخد كم .. وما تتفاجأ ..
وهل انت ممكن تظفر بي وظيفه عندهم ..
شوف ادارة الكهرباء دي ناهبه الناس كيف بي عداد الجمرة ده ..
وأحكم مع مراعاة الكلام ده ..
يأخ ديل مافي زول مرتاح في البلد السجمانة دي زيهم ..
دي وريقة هايفة تحمل مبلغ هايف وسجمان تسربت من بين أيديهم ..
وهم عنها غافلين .. وماحيخلوا الزول السرب وحيلقوهو.
لانهم معودين ناسهم ياكلوا ويقشوا خشمهم بدون زول يفتح خشمو ..

ـــــــــــــــــــــــــــــ

مهندس الكهربا بتاعنا قبل سنتين ..
كنت عارفه بياخذ مخصصات وراتب قريب الـ 10 مليون ..
هسه مخصصاته وصلت كم والله ما بعرف ..
أها زول زي ده بياكل ليك وفي رمضان اكل اي كلام ..!! ..

قالوا يا ودالشيخ راو عن راو
ناس السودان من يجي شهر رمضان اول حاجة بعملوها بشيل بدل الوجبة من الراتب

القصة يا ودالقوز انو الناس الفوق ما بشتغلو طواري
البشتغلو طواري ديل العمال وناس الحماية
الوظايف الكبيرة بتشتغل الدوام الرسمي
ممكن يمشو مأموريات ماليزيا والصين وكدة
اذا هم لا يدخلون في الوجبة الرمضانية

الاخ عبدالحفيظوضيوفه - مساء الخير
سعر الوجبه 50 جنيه كتير (فى حدود 20 - 25) لما تجهز وجبه كفرد فما بالك تقدير سعر الوجبه للفرد فى حساب اجمالى مفروض تنخفض التكلفه .

قالوا 332 مركز في كل السودان
غايتو كوستي كلها في مركز بيع وطواري واحد
وربك كذلك
العاصمة لأنها عاصمة فيها مراكز في كل الاحياء . ما عارف شكلها كيف
لكن شفت مكتب كوستي
زمن الافطار شايف موظف بيع واحد . واتنين من الحرس قاعدين برة
احتمال في غيرهم !!
لكن مرتين مشيت لقيت تلاتة
قول في واحد جوة للتلفونات . دة في مركز مدينة كبيرة والسودان كلو فيهو كم مدينة كبيرة
نخت متوسط خمسة انفار متوسط . يتساوي فيها مركز مدينة كوستي ومراكز احياء العاصمة حقت البيع
خمسة يعني التيم العامل في نفس اللحظة 332 في 5 يساوي 1660
في ايهام في المنشور بذكر العاملين . آي صاح ديل العاملين كلهم . لكن ما كلهم بكونو شغالين في نفس اللحظة في ورديات

تعرف يا عاصم
براي باكل واحد فول بي عشرة ج
لامن نكون نفرين بنطلب واحد فول وزيادة عيش ب 11 ج
ولو اشتريت كيلو فول بي 20 ج وفحم بي عشرة وعيش بي 30 بناكل تلاتين نفر كدة النفر 2 ج قول دفعنا جنية جنية بنعمل نص كيلو جبنة وقول دفعنا تص ج بنعمل رطل زيت

البيان الطلع اول
وجبة فطور
وبرامج دعوية
اضافة العشاء والسحور لحقوها تلحيقة في المنشور الردو بيهو
غايتو السحور دة بالغو فيهو
نحن بنسحر بي موية زرقا
تصحي تقرطع مويتك وتخش الحمام وترجع تنوم

5.376 مليار ج
الكترااابااا
المليار تسعة اصفار
لامن نقسم المبلغ علي العدد الافترضناهو مالم الناس الكهربا يدونا العدد الفعلي البكون شغال في لحظة الفطور بنعتمد رقمنا
بنلقا ان الفرد بكلف تلاتة مليون وميتين الف ودقداقة
بقسمة المبلغ علي شهر
الافطار بكلف 108000 للشخص الواحد
الامر متروك ليكم

يا ود اب سن انت معترض على المبدأ - توفير وجبات فطور, عشاء و سحور عمال الورديات المسائية والليلية - أم معترض على التفاصيل مثل قيمة الوجبات وعدد العاملين وكدا
لأنها تفرق

الرد اعقد من جواب مدرسي بسيط يا ود البشرى
ما موضوع معترض علي الفطور ولا سعر الوجبة

هههه سمح الاعتراض على شنو بالضبط

كويس ودالبشري
تسربت ورقة مالية داخلية للعلن مما لا يمكن دحضه فيها فطور بس
بعد طلعت
دخلو فيها عشاء وسحور
وانت عارف التصاديق المالية محددة جدا بأوجه صرفها المكتوب . لأنو يفترض قصادها فاتورة ومراجعة
اتنين
العمالة الشغالة في الطواري معظمها مؤقتة وباجور زهيدة جدا .
االعمالة مؤقتة لتقليل تكلفة تشغيلها
الشركة تطالب كل مرة بزيادة تعرفة الكهرباء لارتفاع التكلفة ثم لا تتوانى في الصرف الملياري في شهر واحد
مافي زول بيرفض تقديم وجبة لعامل ووضع الامر هكذا مزايدة اخلاقية . فيتحول النقاش من فساد لي اخلاق
في توصيف للوظيفة . بنديك كدة وكدة وما بنديك كدة ومطلوب من كدة
الكهرباء قطاع خدمي والسلطة قدت اضانا بدعمه . لأنو تكلفة التشغيل لا تغطيها التسعيرة
ليه المواطن يدفع من جيبو افطار العاملين الملياري ثم يحسب كل ذلك مرة اخري علي تكلفة التشغيل
الميزانية طالعة للخرطوم ثم حسب كل ذلك علي جميع السودان
التضارب يثير الريبة

نفس التصديق وتحتو مباشرة تصديق ل فطور
964250000 ج تكلفتو
ل عدد 551شخص
اتنين بيع كهربا
523 تأمين
!!!

التصديق التاني رغما علي غرابة منسوبيه بطلع ثمن الوجبة 56 الف
الغريب هل 551 ديل براهم ما تابعين للفوق ولا شنو
في تصوري اذا كان التصديق للخرطوم
بكون دة تصديق الافطار للطوارئ
يدلل علي ذلك في ظني ال 523 عناصر حماية
موزعين في المراكز كلها وما كل المراكز فيها بيع
بل البيع في مركزين
طيب ليه الابهام في التصديقين

تعرف ودالبشرى
قالوا واحد مستهبل غاشي ناس حلة انو شيخ . ساكن ولبن مجاني وماهية ووضع اجتماعي افضل .
جاهم ضيف لقا الزول دة راقد حطب وجاهل . داير يثبت ليهم انو ما عارف شي
سألو
كم عدد سور القرآن
قال ليه
ألف
ضحك فيهو
يا زول ها عدد السور 114 سورة
الشيخ المحتال عاين لي ناسو وشاف الشك في عيونهم وقال ليهم
عاينو زولكم ان بدور ازيد لي الله وهو بدور ينقص ليهو
وكسب الجولة
زي ما قال صديقي فيسل
التفكير داخل الفريم
الموضوع عمل خير وصدقة في الشهر الفضيل
نخليهو

المبلغ المصروف دة بيدي 165415 مواطن ميتين متر مدعومة كما يقولون
وخالص رسوم العداد
اول 200 م ب 30 ج
2.5 ج رسوم عداد شهري
يعني 165415 شخص اشتروا كهربا عشان يسددوا فاتورة الافطار
ودة بدون الفاتورة التانية حقت 551 موظف طواري

الحل شنو
ناس الكهربا يدونا المراكز الاتعمل فيها الفطور
يعني مركز كدة عملنا فيهو فطور وعدد افرادو كدة
الفطور كان عصيدة بي عيش ابيض ولا فتريتة لانو بتفرق معانا في الحساب وجك ابري برضو يحددو ابري احمر ولا ابيض
لو في عصير تاني يدونا ليهو بالاسم عشان الشفافية والتكلفة
جك الكركدي سعرو اقل من البرتكان
وهكذا

سلامات ود اب سن
الواضح انها مأكلة بأسم العمال و الموظفين

Quote: ساد الارتباك أروقة الكهرباء أمس الأول، توتر من يعنيهم الأمر وكانوا يتصايحون وأقبل بعضهم على بعض يتلاومون، نتيجة للتداول الكثيف لإفطار الخمسة مليار ، الخطابات تم تداولها بين منزول وأمين ودار النعيم، فكيف حدث التسريب؟ حاول البيان توضيح أمر ما كان يحتاج إلى توضيح، فالأرقام واضحة كالشمس، ولا يمكن دحضها أو إنكارها كما أن إضافة توصيفات جديدة لبنود الصرف لا معنى لها والعبرة بالأصناف المصدقة في الميزانية. البيان صادر باسم الشركة دون تحديد المستوى الوظيفي الذي أصدره، البيان أضاف العشاء والسحور وهو ما لم يرد ذكره في خطاب الموازنة، البيان تجاهل البرنامج الدعوي، وبرنامج التواصل وتكريم العامل المثالي. ومن فرط الارتباك أجرى عملية حسابية بسيطة بطريقة خاطئة، بغرض (تلتيق) و(تظبيط)الميزانية. أما اغرب محتويات البيان فهو الادعاء بأن الميزانية يتم الصرف منها حسب المتواجدين. الصحيح وهو ما حدث بالفعل أن الميزانية صرفت كرقم واحد بأمر صرف واحد، ما ورد في بيان التوضيح لا أساس له في خطاب الموازنة، لا من حيث الأرقام أو أعداد العاملين في الفترات المحددة. كان على الشركة السودانية لتوزيع الكهرباء أن تتحدث عن التعليقات المصاحبة للتداول الكثيف لخطاب برنامج رمضان، كانت لتدرك عين السخط التي يراها به المواطن. الكهرباء اعترفت بالخطاب وبمحتواه.. ونحن نقرأه مع البيان التوضيحي نسأل هل ما ذكره البيان التوضيحي عن إعداد العاملين صحيح (3548)، كم منهم عمالة موسمية؟ وهل هي عمالة مؤقتة أم موسمية، وهل كل هذا العدد يعمل في وردية الظهيرة والليل؟ هل تساءل من يعنيهم الأمر لماذا تم التداول الواسع و على هذا النحو، وهل هذا يؤشر لتزايد كراهية المواطنين لشركة الكهرباء، وكان الناس قد استقبلوا بيان التوضيح بشيء من عدم الاكتراث وأبدى المجلس الوطني اهتماماً بالأمر ووعد بالتقصي. على الوزارة وهي من أصدرت بيان التوضيح أن تعتذر عن استخفافها بعقول الناس، وربما عليها المبادرة إلى مباشرة التحقيق مع مدير الشركة ونائبه ومدير الإدارة العامة، فالموضوع أصبح قضية رأي عام، لابد من الإحاطة بتفاصيلها، وحتى يتسنى ذلك ربما الإجراء الصحيح إيقاف المدير ونائبه مؤقتاً عن العمل إلى حين الوصول للحقائق دون تأثير أو ضغوط، وإعلان ذلك للرأي العام، ومناقشة ما حدث في ضوء إصرار وزارة الكهرباء على زيادة تعرفة الكهرباء. الكهرباء تحمل تبذيرها وإهدارها للمال العام وفشلها للمواطن، ستتصاعد تكلفة الكهرباء إذا كان منزول هو من يقرر الصرف كما رأيتم، وسترون. محمد وداعة الجريدة

في واحد من جوه أداهم المهموز الحار ده ..
كلما يحاولوا يكحلوا الشغلة المهموز يغرز لي جوه زيادة ..
دي سرقة راسا عديل .. ديل حرامية .. أي والله ..
حرااااامية وسراقين حتى في هذا الشهر الفضيل ..
ما عاتقين المال العام ..وبيغرفوا منه ...
يغرفوا شنو والله ديل بيهتبلوا .. هههه ..
مستحيل فطور العدد الهايف ده بالمليارات ..
والله الا يكون عندنا قمبور .. هههههههههه ..
الشغلة دي اول كانت فطور فقط ..
لمن انكشفت ولقوها شينه قالوا يصلحوها شوية ..
وحاولوا يرقعوا الشغلة بسرعة ..
برضو حساباتهم بقيت جايطة أكثر ..
زمان كان بيقولوا الحريم ما بينهبن ..
من المال العام زي الرجال ..
لكن بعد شغل خالتو دار النعيم ده ..
الرجال راحت عليهم ..خخخخخ ..
قال فطور وعشاء وسحور قال ...
طيب مافي بدل بياته .. خخخخ ..
غايتو المكتب المرق منوا الورق الكارثة ده ,,
كلو حيروح في الكازوزة اللهم الا يكون عندهم ضهر ...

يعني مامزور 😂يلهطو بي مبلغ قدر دا ؟؟؟
ان شاء الله يجيهم اسهال جت 😉
ويلاقو كل الحمامات قافله ياقول عادل امام
عالم حراميه وبطاله ياقول مجيدو

تشكر ناصر
كتر خيرك
الجماعة راسهم لف
والموضوع خرجت عن السيطرة
وبعد دة كلو اليشوفو ليه تكلفة الانتاج عالية لارخص طريقة لتوليد الكهرباء
الناس دي ساكنه فاره القصور ومأجره كم قصر مفروش
مرطبين ي عمك
وعندهم مولدات في بيوتهم .. ما معروف من حر مالهم ولا

غايتو يا ودالقوز
هسة ناس المكتب يكونو مزرورين زرة
يخلو الحقايق الفي التقرير ويمسكو في المرقو منو
دي اسرار
البلد دي اي حاجة تتعلق بالصرف سر
لكن عليك الله مابالغو في السحور دي

دة يا الطيب ما ظهر من جبل الجليد الغاتس في الموية