عمل درامى سودانى يستحق المشاهده https://youtu.be/JMcNZQQEsYUhttps://youtu.be/JMcNZQQEsYU
Post: #2 Title: Re: مسلسل عشم اول دراما سودانية على اليوتيوب Author: أحمد محمد عمر Date: 06-03-2017, 01:13 PM Parent: #1
عملو بروموا وقالوا للناس اشتركوا في القناة والحلقات حيتم عرضها في رمضان جاء رمضان وما ظهرت الحلقات قالوا للناس حيبدأ بث المسلسل يوم الخميس وفات الخميس والجمعة والليلة السبت
شكلهم وعدوا بي وعد هم ما قدرو
Post: #3 Title: Re: مسلسل عشم اول دراما سودانية على اليوتيوب Author: najma Date: 06-04-2017, 05:33 PM Parent: #1
Post: #4 Title: Re: مسلسل عشم اول دراما سودانية على اليوتيوب Author: najma Date: 06-04-2017, 05:37 PM Parent: #3
احمد محمد عمر رمضان مبارك حضرت الحلقة الاولى امس مشجعه للمتابعة اتمنى مشاهدة العمل تقديري أم الأمير
Post: #5 Title: Re: مسلسل عشم اول دراما سودانية على اليوتيوب Author: أحمد محمد عمر Date: 06-12-2017, 12:55 PM Parent: #4
ديك شكلها كانت مقدمة ساي أهي دي الحلقة الأولى
المسلسل واضح انه انتاجه جبار ومكلف لكن توزيعه تعبان ومافي رؤية واضحة ولا موقع رسمي ليه برغم كل الاتصرف فيه
المسلسل جميل وجاذب والممثلين كلهم حلوين ونضيفين وما فيهم غبش لأول مرة في الدراما السودانية الإخراج ابداع عديل كدة التمثيل لحدي هسة كويس رغم إنه البطل الحلبي دة عندو شوية تكلف بس احتمال بعد مواصلة الحلقات يستعدل
Post: #6 Title: Re: مسلسل عشم اول دراما سودانية على اليوتيوب Author: بدر الدين الأمير Date: 06-12-2017, 02:12 PM Parent: #5
مهند ونور النسخة السودانية كل الكاست سمحين ولابسين هدوم العيد لاعراقى لاجلابية ولامركوب ولاتوب وبتكلمو براحا مافى اى كواريك المكياج تمامين بس الموسيقى التصويرة والاغانى كانو ياخدها من اغنيات هاشم ميرغنى وزيدان زى حان الزفاف ـ وفى الليلة ديك ـ وهسى خايف من فراقك لمن يحصل ببقى كيف ... بس مهندكم دا متكلف شوية وخايف من الكمرا بس اخت نور عجبتنى تمثيل وسامر ومكياج
تنهدات: الكلام للطيب صالح (الحضارة عندى انثى وكل ماهو حضارى فهو انثوى)
Post: #7 Title: Re: مسلسل عشم اول دراما سودانية على اليوتيوب Author: الطيب شيقوق Date: 06-12-2017, 02:36 PM Parent: #6
والله شحتفتونا لمشاهدتو
نجمة رمضان كريم و ..................ييييييييين ههههههههههها
Post: #8 Title: Re: مسلسل عشم اول دراما سودانية على اليوتيوب Author: بدر الدين الأمير Date: 06-12-2017, 02:41 PM Parent: #7
شيقوق يابتاع العنكوليب دا مسلسل ماعندك ليهو عيون امش نقى عنكوليبك واقعد في ضل ضحاك
Post: #9 Title: Re: مسلسل عشم اول دراما سودانية على اليوتيوب Author: الطيب شيقوق Date: 06-12-2017, 02:58 PM Parent: #8
Quote: شيقوق يابتاع العنكوليب دا مسلسل ماعندك ليهو عيون امش نقى عنكوليبك واقعد في ضل ضحاك
ود الامير ما تخلوني اباصر ساي شنو الحسادة
هي ذاتا زولتك نجمة البتشاهد في المسلسلات دي ما عندها اهل بجوها ضيوف؟هههههههها
Post: #10 Title: Re: مسلسل عشم اول دراما سودانية على اليوتيوب Author: بدر الدين الأمير Date: 06-12-2017, 03:04 PM Parent: #9
يابتاع العنكوليب انت مطرطش ولا شنو قالو ليك على اليتيوب تقول اهل انت قايل اليتيوب دا تلفزيون الجزيرة امرق من هنا احرجتنا روح دندرك ونقى عونكوليبك
Post: #11 Title: Re: مسلسل عشم اول دراما سودانية على اليوتيوب Author: جمال ود القوز Date: 06-12-2017, 03:58 PM Parent: #10
Post: #12 Title: Re: مسلسل عشم اول دراما سودانية على اليوتيوب Author: najma Date: 06-12-2017, 04:30 PM Parent: #11
ود شيقوق عودا حميد منور المنبر ورمضان مبارك عليك المسلسل جميل للان حلقتين عرضوا منو ونتوقع كشف الستار عن مشكلة في مجتمعات المغتربين زى ماروج للمسلسل انو بهبش قضية من قضايا مجتمع المغتربين السودانين ياشيقوق رمضان ده مامضيوفين مقضنو مع الامير الصغير 🙍 وقفشاتو ومبرمج بينا الاتنين 😥😥ياالطيب مالك بتناوش في ود الامير😄😄😄 اها اعمل حسابك مايقوم ود الامير يديك كوع بعصايتو الشايلها دى في تنهيدة من تنهيداتو 😂😂😂😂😂 بدر وشيقوق ضحكتونى لمن دموعى جرت يجازى محنكم الاتنين ود الجزيرة ود الدندر 🙈🙈🙈
Post: #13 Title: Re: مسلسل عشم اول دراما سودانية على اليوتيوب Author: أحمد محمد عمر Date: 06-12-2017, 04:48 PM Parent: #12
Quote: اخت نور عجبتنى تمثيل وسامر ومكياج
ما أختها .. دي شلابة :) لكن فعلاً دي أفضل واحدة في المسلسل
شوف الحلقة رقم صفر من هنا
Post: #19 Title: Re: مسلسل عشم اول دراما سودانية على اليوتيوب Author: بدر الدين الأمير Date: 06-12-2017, 07:46 PM Parent: #13
احمد محمد عمر كيف انك مع انو ودشيقوق حايشيل حالى بسؤال دا بس منكم نستفيد انا لى 22 سنة من السودان يعنى شنو (شلابة) ا وع تكون داير تقول لى برضك خاتى عينك عليها
Post: #14 Title: Re: مسلسل عشم اول دراما سودانية على اليوتيوب Author: najma Date: 06-12-2017, 05:05 PM Parent: #6
مهند ونور النسخة السودانية 😂😂😂😂 ود الامير ابو الوليدات وحاة جدى الشيخ حامد ابو عصا المسلسل سمح وبسيتاهل تتابعوا ونكفل ليك حق النقد 👌 اها يااحمد عمر نزل لى الحلقات ابو لبيد
Post: #15 Title: Re: مسلسل عشم اول دراما سودانية على اليوتيوب Author: Walid Safwat Date: 06-12-2017, 05:35 PM Parent: #1
Quote: رغم إنه البطل الحلبي
سقطة عنصرية..
Post: #16 Title: Re: مسلسل عشم اول دراما سودانية على اليوتيوب Author: معتصم سليمان Date: 06-12-2017, 06:12 PM Parent: #1
تحية طيبة
فعلا يبدو انه سيكون من الاعمال الكويسة
ياربي لون البنات ده ياهو الطبيعي ولا لزوم التمثيل وده .... عندي تحفظ شديد على الإنفعالات المطلوبة في مصاحبة الموقف ...مالهم كلهم كده باهتين حتى البتكلم مع السعودي ده باهت وماتحس في إنفعال يتناسب مع الحدث ... وكمان البنية مع أمها بدون إنفعال وعييييييييييييك
Post: #17 Title: Re: مسلسل عشم اول دراما سودانية على اليوتيوب Author: أحمد محمد عمر Date: 06-12-2017, 06:20 PM Parent: #16
وليد صفوت الحلبي عنصرية شنو ياخ! نحن أي زول ابيض بنقول ليه الحلبي ما قريت قصيدة شاهين بتاعة عندك مجلات ميكي يا حلبي يا ود يا سمح
Post: #18 Title: Re: مسلسل عشم اول دراما سودانية على اليوتيوب Author: الطيب شيقوق Date: 06-12-2017, 06:55 PM Parent: #17
Quote: امرق من هنا احرجتنا روح دندرك ونقى عونكوليبك
ههههههههههههها بالله عيان دا هو فاكر روحو مولود في القادسية ولا الوادي الاخضر وحياتك دندرنا دا متحضر اكتر من حضارة شوالات بصل اربجي المكفية منتظرين بيها غلاة الاسعار ياخ انتو لسه بتترحلوا بالبرينسات و البربارات جاي تفاصحني انا
ابعدي لي منو يا نجمة
Post: #20 Title: Re: مسلسل عشم اول دراما سودانية على اليوتيوب Author: بدر الدين الأمير Date: 06-12-2017, 07:57 PM Parent: #18
غايتو البدوى لمن يغترب بجيب لروحو بلوة اولا نجمة بتعرف اربجى حضارة وتاريخ وواقع حالى خليها تكلمك عنها ياراعى العنكوليب
Post: #21 Title: Re: مسلسل عشم اول دراما سودانية على اليوتيوب Author: الطيب شيقوق Date: 06-12-2017, 08:06 PM Parent: #20
فرمالتكم بيت ناس جدي عبد الرحمن على طه و رحلوا منكم البندر خلوكم تتلفتوا سااي وتاكلوا في القاورما و البامية و الموليتة و تتلهموا عناقريبكم بعد تصلوا العشاء و تسمعوا اذاعة المتوفين الله يرحمهم هههههههههههها
Post: #22 Title: Re: مسلسل عشم اول دراما سودانية على اليوتيوب Author: بدر الدين الأمير Date: 06-12-2017, 08:11 PM Parent: #21
كدى ياراعى العنكوليب كلمنا عن جدك عبدالرحمن على طه كان برضو ببيع عكوليب في اربجى
Post: #23 Title: Re: مسلسل عشم اول دراما سودانية على اليوتيوب Author: najma Date: 06-12-2017, 08:27 PM Parent: #22
احمد عمر محمد سلام وتحية اها رايك شنو في السؤال ده لقيتو في صفحة المسلسل ود الامير ده معنى شلابة 😊 https://www.0zz0.com
Post: #25 Title: Re: مسلسل عشم اول دراما سودانية على اليوتيوب Author: najma Date: 06-12-2017, 08:42 PM Parent: #21
الطيب شيقوق يسعد مساك انت وزوار البوست 🙏 ✋الحق حق ماتحيز لود الامير ولا لاانا مسقط راس أمير الصغير ولدى اربجى غزتها الحضارة والمدنية اجمل من احياءالعاصمة والاجمل كرم اهلها وبيت ود الامير قبلة الضيفان الزاد جمال اربجى ناسها اها ياشيقوق كده ست صفر عليك بدرالدين😜😜😜 واتمنى نزور الدندر برضو ونتمتع بجمالها صدقنى اربجى تاريخ وحضارة ومدنية وماشة كويس في التنمية بفضل اولادها 👬👫 الف رحمة ونور على المعلم الجليل عبدالرحمن على طه ود شيقوق خت الكورة ارض 😂😂😂
Post: #35 Title: Re: مسلسل عشم اول دراما سودانية على اليوتيوب Author: najma Date: 06-13-2017, 06:25 PM Parent: #25
ود الأمير يسعد مساك شيقوق شلبو ولا شنو اختفي 😂😂😂😂الطيب ماتكون لقيت علبة الماكنتوش دى وخمشتها في رمضان وعملتة رايح بالله عليك الله رايك في الحلقات اختار من العلبة ود الامير اختار اخت العروس 😂😂😂😂
Post: #24 Title: Re: مسلسل عشم اول دراما سودانية على اليوتيوب Author: najma Date: 06-12-2017, 08:31 PM Parent: #16
معتصم سليمان رمضان مبارك الحلقة التانية محبوكة اكتر من الاولى والممثلين اداءهم اوحسن تحس خوفة الكاميرا راحت وبالتشجيع ماشين كويس في الاداء تابع الحلقات وتسلم ع المرور
Post: #26 Title: Re: مسلسل عشم اول دراما سودانية على اليوتيوب Author: الطيب شيقوق Date: 06-12-2017, 09:00 PM Parent: #24
Quote: كدى ياراعى العنكوليب كلمنا عن جدك عبدالرحمن على طه كان برضو ببيع عكوليب في اربجى
والله الحق يقال يا بدر جدي عبد الرحمن كان ولد فدوى بس لكفاه
اما استاذي فيصل فذاك شأن آخر
لكيييييييييييييين يا ام امير ما ممكن تتحدثي عن حضارة و تاريخ اربجي في معزل عن كونها الجغرافيا التي هزم فيها اهلي العبدلاب سلاطين الفونج في القرن الخامس عشر
تقولي لي الخزرجي اب لسانا طويل دا هههههههههها
Post: #27 Title: Re: مسلسل عشم اول دراما سودانية على اليوتيوب Author: بدر الدين الأمير Date: 06-12-2017, 09:16 PM Parent: #26
كدى يالمسنوح بتعرف يعنى شنو كلمة شلابة ولا برضك مسطح زى الزول الجاب الكلمة دى تعليق على البت العجبتنى في المسلسل جهجهنى وما جا يجاوب لمن سالتو عن معنى كلمة شلابة
Post: #28 Title: Re: مسلسل عشم اول دراما سودانية على اليوتيوب Author: أحمد محمد عمر Date: 06-12-2017, 09:36 PM Parent: #27
هههههههههههه الشلابة هي التي تشلب (تسلب) الشاب من حبيبته شكراً نجمة على موقع فيسبوك المسلسل ما كنت عارفه والله .. أنا متابع قناة اليوتيوب بس لكن بعد كدة بنجيب ليكم الأخبار طازجة
Post: #29 Title: Re: مسلسل عشم اول دراما سودانية على اليوتيوب Author: بدر الدين الأمير Date: 06-13-2017, 07:48 AM Parent: #28
تعال يالمفتى احمد محمد عمر ماش وين اها ياخوى والشلابة دى بتشلب مثنى وثلاث ورباع ولا واحد بس البعرفو الكيزان الواحد لوشاف زوجة رجل اخر وسمحة بساومو بدفع له خلو رجل اوالتضيق والحصار اوالتصفية هل دا نوع من فقه الشلب والشلب المودرن زى ناس مسسل عشم اللابسين هدوم العيد لو ادير ابقى شلاب ماهى المؤهلات المطلوبة افيدنا سعادة المفتى
Post: #30 Title: Re: مسلسل عشم اول دراما سودانية على اليوتيوب Author: أحمد محمد عمر Date: 06-13-2017, 08:00 AM Parent: #29
بداية الشلب العلني كانت مع أغنية راجل المرة دة حلو حلا جكس مواليد الألفينات ونهاية التسعينات دة بقو جدااااد لنج .. سمحين سماحة .. ولا عشان نحن كبرنا ما عارف! بقوا مشروع شلب طبيعي ويا كافي البلا الشباب بقوا عصفور في اليد وعشرة في اليد التانية .. بتدخل القلب أشلبهم
.
Post: #31 Title: Re: مسلسل عشم اول دراما سودانية على اليوتيوب Author: بدر الدين الأمير Date: 06-13-2017, 08:56 AM Parent: #30
يا احمد طبعا جيل ناس عمنا شيقوق دا جيل عرس الزين يعنى زي انا مكتول في حوش العمد الجيل البعدو فلان مكسر في فلانة او فلانة مكسرة في فلان الجيل بتاعنا نحن جيل الجكس والجكسوية ودا زاتو جيل شبه شباب هسى تجونا بجيل الشلب الله يستر عمك المخرف شيقوق مايلفح الكلام ويجى يكورك انا مشلوب في نمرة اتنين ههههههههه
تنهدات: حلم البدوى حي راقى في مدينة
Post: #32 Title: Re: مسلسل عشم اول دراما سودانية على اليوتيوب Author: هشام المجمر Date: 06-13-2017, 11:36 AM Parent: #31
نشجع كل عمل فني جديد خاصة لو كان شبابي
لكن التمثيل اقل بكثير من المستوى المطلوب وايقاع العمل الدرامي بطئ و تم اقحام الاغنيات بدون ما يستوجب ذلك من ناحية دراما او انفعال
ده كلام مشاهد ساي
دايرين كلام المتحصصين
Post: #33 Title: Re: مسلسل عشم اول دراما سودانية على اليوتيوب Author: بدر الدين الأمير Date: 06-13-2017, 11:53 AM Parent: #32
يا ابو النسب كيف انك في البدء هى تجربة شبابية وممكن تسميها بداية مافيها كلفتة واستعجال تستحق الاشادة والتشجيع ياخى بطنا طمت من الدرامة المفصلة على مقاس الخال الرئاسى من يوم مسك ادارة التلفزيون وحجب حتى الشاشة بت تكون مع امها في المطبخ او فى لصالة الاتنين محجبات ومامعاهن احد دا غير دراما الكواريك بتاعت ناس جمال حسن سعيد داجيل في تقديرى لومضى بهذه الطريقة لادايرين كرور ولاقدور الجمهور حايتحول لليتيوب لارقيب قبلى ولا بعدى .... وبعدين تعال يا ابوالنسب انت ماشايف البدوى شيقوق ينال من اربجى ونسابتك وانت ساكت على قول الخلايجة ماهقيتا منك
Post: #34 Title: Re: مسلسل عشم اول دراما سودانية على اليوتيوب Author: بدر الدين الأمير Date: 06-13-2017, 12:02 PM Parent: #32
الكلام للفنان محمد تروس (حاجة المؤتمر الوطنى ) على الفيس بك
كتب محمد تروس: ابناء المغتربين ينتفضوا علي الدراما السودانية ام عراريق و الرواكيب و شماسة و حرامية و تليب بيوت ، و ستات شاي ، و كاروهات ، وبتاعين الركشات ، و الحر ، و صريخ الممثلين المفتعل والاخراج الاشتر و وعووووك وورووررروك والحق يا حاج مُحٌمٌد الجني فلقوا اولاد حلة فووق) والنصوص و اللغة التالتة . انتجوا دراما (نضيفة) تعبر عن مشاكل و ملامح تخص ثقافتهم التي اتوجدوا فيها من غير اختيارهم في مدن البترول كما عبرت شخصية ام البنت في الحلقة الاولي ( نحن يابتي البرجعنا السودان شنو لاعندنا ارض لا بيت هناك)... حضرت حلقتين من مسلسل ( عشم) فيهم تشويق و منتاج جيد واخراج والممثلين اكثر تلقائية وتفككوا من حصار مايعانية الممثل السوداني من الرقابة و الحجابات الشينة و دقون المشروع الحضاري و الانتاج يتسم ببزخ بازخ و مكياج كاح و حفلات وغني (واغاني واغاني ) .. اعتقد ان المسلسل يعبر كذلك عن شريحة او طبقة داخل السودان تعيش نفس المستوي الاقتصادي و مواجهة بنفس مشاكل هذا الجيل .. من حقهم وانا كدرامي من الثورة الحارة تلاتاشر ناس العدو رحمة الله علية و عمك خليفة و سيد الكاروا ... ادعم واشجع هذا الجيل بالتوفيق ياشباب العشم.. و انا علي استعداد للتمثيل دور والد الولد الشاطر الفقير الذي يحب مكسر في ومضة او موزة ، و ترفض امه لان اسرتة تسكن في قشلاق البوليس وامه ست البنات بتبيع طواقي في سوق امدرمان ...
Post: #36 Title: Re: مسلسل عشم اول دراما سودانية على اليوتيوب Author: هشام المجمر Date: 06-14-2017, 07:33 AM Parent: #34
Quote: انا شايف احسن تصاهرهم عشان تعرف كيف تحرضهم بصدق على قلب نظام البشير
كيفن الكلام ده يا ود الامير
يا ود شيقوقو اعمل حسبابك ما تهابش نسابتنا ديل......اربجي خط احمر......هههه قوية خط احمر دي يا بدر الدين
Post: #37 Title: Re: مسلسل عشم اول دراما سودانية على اليوتيوب Author: Abureesh Date: 06-14-2017, 10:10 AM Parent: #36
لسة بدرى.. ممل.. عبارة عن معرض لوشوش بنات. الممثلين تسميع ادوار دون العيش فى الدور مثل المسرح المدرسى. البيئة غير سودانية.. زفاف العروس تقليد مصرى
Post: #38 Title: Re: مسلسل عشم اول دراما سودانية على اليوتيوب Author: عبدالعظيم عثمان Date: 06-14-2017, 10:56 AM Parent: #37
سلامات نجمة
الأولاد ديل طلعوا من الصندوق والقالب المرسوم للدراما السودانية من زمن تور الجر .. العراقي الوسخان الشربان حق جمال حسن سعيد
من وجهة نظري دي محاولة جيدة وتستحق الدعم ويجب تشجيعهم بلاي بطلوا الإسقاط النفسي السوداني المستعد فطريا لرفض أي حاجة غريبه دون التمعن في الجودة والأدوات ولغة العصر وقضايا العصر
عاملين تابوهات وحارسينها والممثلين بقوا زي الروبوتات في الأداء
ديل شباب إتمروا علي الكلام دا برافوا عليهم
Post: #39 Title: Re: مسلسل عشم اول دراما سودانية على اليوتيوب Author: بدر الدين الأمير Date: 06-14-2017, 11:07 AM Parent: #36
ياابو النسب المسنوح دا حقارتو بينا نحن بس وحدها دكان بكرى بليل بكون سهران مع آل على طه فى مسقط وهاك ياشكير في اربجى الحضارة واربجى العمارة بس كويس كونك وريتو العين الحمرا ههههههههه
Post: #40 Title: Re: مسلسل عشم اول دراما سودانية على اليوتيوب Author: أحمد محمد عمر Date: 06-23-2017, 07:35 PM Parent: #39
Post: #41 Title: Re: مسلسل عشم اول دراما سودانية على اليوتيوب Author: najma Date: 06-23-2017, 08:43 PM Parent: #40
جمال ود القوز احمد عمر محمد كل سنة وانتو طيبين شكرا لروابط المشاهده الحلقة طويلة المره دى لكن مامحبوكة زى الفاتو الله يستر مايطلع حنك بيش😠 كونوا بخير مشاهده ممتعه للجميع ود المجمر ادينا رايك في الحلقة دى كده👍ولا 👎 ود الامير اها عرفتها معنى شلابة في الحلقة دى 😂😂😂 شيقوق علبة الماكنتوش دى حلال عليك في عيد الفطر 😎 ابو الريش باب النقد مفتوح ومكفول ليك لاخر حلقة 👌 الممثل القدير تروس شكرا لتشيج المواهب الجديدة 👏ويتعلموا من اقتراحاتكم شكرا تانى ود الامير👋 لايراد مداخلة تروس كونوا بخير ومنورين البوست الساده المشاركين والساده المتابعين والمشاهدين وكل سنة وانتو طيبين وعساكم من عواده🌸🌸🌸
Post: #42 Title: Re: مسلسل عشم اول دراما سودانية على اليوتيوب Author: بدر الدين الأمير Date: 06-24-2017, 08:35 AM Parent: #41
نجمة وضيوفها العيد يتبارك عليكم ماقدم في الحلقة التانية من مسلسل عشم فى احسن حالتها يمكن وصفها بلعب عيال اوسلق بيض
Post: #43 Title: Re: مسلسل عشم اول دراما سودانية على اليوتيوب Author: أحمد محمد عمر Date: 06-24-2017, 09:07 AM Parent: #42
في مشكلة في الاخراج تطويل في مشاهد ممكن اختصارها واختصار في مشاهد تحتاج إطالة أعجبني أداء وليد جداً .. أجاد الدور إجادة ما عادية رغم إلزام المخرج ليه بلحظات صمت فيها موسيقى تصويرية أحياناً بتخرب تلقائيته لازال عمار هو الحلقة الأضعف في إجادة التمثيل ظهرت أطراف تانية في المسلسل زي شلة بيت العزابة ودة بديني أمل إنه المسلسل حيناقش قضايا كبيرة ومعاصرة أكتر من نقاش القضية التقليدية بتاعة قريبي بحبني وانا بحب واحد تاني
في مشكلة برضو في الانتاج المفروض إنه المسلسل رمضاني وانتهى رمضان بحلقتين فقط في ارتباك واضح حول موعد البث مرات بقولوا اسبوعي وتتفاجأ إنه تم بعد اسبوعين يبدو لي إنهم بفتشوا لربح عبر الإعلان أو الرعاية ولسة ما اتوفقوا فيها
Post: #44 Title: Re: مسلسل عشم اول دراما سودانية على اليوتيوب Author: عبدالعظيم عثمان Date: 06-24-2017, 09:18 AM Parent: #43
برافوا عليهم صراحة ماشين كويس
تقطيع العمل وتباعد الحلقات أمر متبع في الدراما التركية بينزلوا حلقة وبيشوفوا ردة فعل الجمهور وبعد إسبوع تنزل حلقة ثانية
من وجهة نظري الشباب ديل بيقوموا بي عمل جبار خارج المألوف السوداني لقالب الدراما مفروض نصبر عليهم ولا نتعجل الحكم عليهم ... محتاجين دعم وتشجيع
حتكون في أخطاء في البداية وستكون مقبوله ف أول عمل درامي ....
الشباب ديل اذا حريفين يفتشوا جهات راعية من هسي يعني ما ينتظروا حتي النهاية يعني إدارة التسويق مفروض تشتغل أكثر عشان ما يقيفوا بسبب الدعم حيلقوا دعم كبير جدا اذا تحركوا صاح ...
Post: #45 Title: Re: مسلسل عشم اول دراما سودانية على اليوتيوب Author: أحمد محمد عمر Date: 07-13-2017, 06:14 PM Parent: #44
