► ود اب سن .. مرحب بيك فى الدردشة الرمضانية ◄

07:07 AM June, 03 2017 سودانيز اون لاين
جلالدونا-
مكتبتى
رابط مختصر
رمضانك كريم يا صاحب
ابقى داخل و المكان مكانك
و عن الميلاد و المكان .. اشياء فى الخاطر

مع انك جبت الطعام بعد التحلية
البجي بعد ود المدير مهزوم
حتي الناس قالوا ليك قررض علي كدة وان كان لا محالة فاعلا فود الزبير او تيمما بي بكري عباس
لكن نسوي شنو
فأنت من الاعزاء الذين لا يقولون لهم ابيت
بسملا ابتديت متل البرق لاحا

سعيد بالطلة والله
حوشك مرشوش و مفروشوشاهيك معبّا فى الترامس
اها لو ما كوستى اب سن يكون شنو

كما قال ودالمدير العضو المخلوع تقرأ بجميع حركات التنوين والاشارات
قال
بطاقة شنو كمان في رمضان دة
عبدالحفيظ محمد علي ابوسن احمد عوض الكريم جلي
امي
فاطنة حسب الرسول مليك شهيرة بي
فاطنة بت حليمة واشهر من تعمل ملاح الشرموط حتي لقبت به
ملاح شرموط فاطنة بت حليمة
كوستي المولد والنشأة والسكن والذكريات والوجع
متزوج احمد الله وضد التعدد
لي خمسة اطفال
اكبرهم تهاني الشهيرة ب توتا تانية طب واصغرهم علاء الدين المشرف البروفايل
عيوني ساحرة وعسلية

كلكم تحلية لكن بنكهات متنوعة لإرضاء جميع الأذواق

سؤالي:
- أمنيات لم تتحقق و فات الوقت لتحقيقها
- أخرى لا يزال في العمر (الافتراضي) متسع للسعي لتحقيقها

Quote: وضد التعدد

هسى فى زول سألك من الحتة دى

Quote: أمنيات لم تتحقق و فات الوقت لتحقيقها

دى واحدة منهن يا م الزبير

سلامات الاخ جلالدونا
معاوية الزبير اخبارك و صحتك و ان شاء الله تعود مُعافي
المحتفي به او المدروش ود اب سن من المعجبين بطريقتك في الكتابة و اختيارك للمواضيع
و بعدك عن التهاتر , و احترامك لنفسك و للاخرين
ربنا يحفظ الوالدة و الاولاد و تفرح بيهم ان شاء الله..
رمضان كريم تصوموا و تفطروا علي خير

والله يا معاوية كثير من الاحلام المجهضة بطول العمر . احلام بتتجدد وتجدد الاحزان
الحالم ل البير كامو مش كدة .. وصخرة سيزيف تحملها صاعدا بحلمك نحو قمة سعادتك حتي تكون قاب قوسين .. خطوة واحدة نحو القمة فترتد الصخرة علي رأسك محطمة قفصك الصدري متدحرجة نحو السفح . تعطي جلابيتك بعد ان تنهض من عثرتك متحملا وجع الصدر مهرولا لاهثا خلفها فلا تدركها والا قد قرت في سفح الجبل .. تشيلها تاني
فكانت حياتي قلقا لقلق
حلم يطارد حلم ليتعثر بآخر
اقول
تمنيت لو انني لم افارق دار ابي لأهيم في دروب الدنيا
لو صالونا بيتنا يضيق بنا وبنوامسينا . بدون نت ولا قنوات . نتسامر واخوتي
لو ان الصحاب لم تباغتهم شهوة الغجر بالرحيل
يا معاوية
احلامي بسيطة جدا
جد والله
سبر الروح الكلمة الزينة
ونفسا طيب مالي الجتة
وسبر العاشق
كتر الليمة
ولم الشمل الروح شت
احلامي لازالت
اخاف الفراق

أهل الدردشة
المدخل أنتم تلاتكم من أحب الاقلام التي تكتب الدعابة والاجتماعات و الهموم هموم أهلنا اللي بقت زي مسلسل الليل والنهار ونعلن معا عن بواطن العبث في الشان العام عسي ان يستقيم الوضع ذات يوم ما علينا غير لمبة الديوان حق الدردشة تكون مولعة والشباب لمة هنا كل زول يقول كلامو حتي المصحاح بقلمو الاحمر نسمع رايو برضو تعرفوا أجمل حاجة في الدينا تسامح وترجع ليك كل الاشياء الجميلة والعن شيء تكون عامل مفتح وتخونك عزيمتك في الصبر علي الاخر مهما كان ضعيف ممكن ينفذ ويبقي قيمة وانت تضل بتصرف غاضب ربي رد الاغراب الي بلدانهم
المهم رمضانكم في المهاجر ما ممتع زي رمضان ود أب سن الفارس اللي قعد في العقاب والله يا صاحب دا مقام شيوخ قبايل جد وانت العزيز ود اهلي العزاز والله يا صاحب في الزمن الكعب دا غلبني البعاد من أمدرمان أسوي شنو دا حالي أغيب وأرجع تاني أنشاالله لصحن بليله أو شوية عصيدة في قعر الكورة ومرات لما تضيق بي أسوي السخينة ةشوربة العضام وعدس الصابرين لربهم تعرفوا عدس الصابرين لربهم دا سببب دخول أعداد مقدرة مننا الجنة بأذان الله لا جهاد ولا قيامة رابطة بس بالصبر علي ظروفنا والله الظروف اللي بيعشوا فيها أهل السودان لو ربطوا فيها أي ملة غير أهلنا كنا جروا زمان لكين يبقي التحدي هنا
أهلي أمي أبوي وأختي يا جماعة اي زول من دمك عندك عزيز وتبقي الاواصر بيننا دم و لحم ويبقي الود قائم مقام كل متع الحياة في بلد مع الجمال فيها أروع ما فيها أهلي
.*عاجبني الدردشة حسد من نفسي ح تمشي الخور أنشالله
ما عارف لكين كتبت معكم أنشالله يكون كلالم مناسب مع الشهر الكريم
و ليكم صادق الود ولكل الاحباب في االوطن الكبير والمنبر كذلك و ماتنسوا ترسلوا لي راديو نوعية حديثة عشان أسمع مونت كارلو
وأعرف حركات جلادونا دا

تصوم وتفطر علي خير ناصر
عليك الله الحياة دي مش اقصر من شكل الحياة الحقيقية
لامن نضيف ليها شكل اسافير
الواحد بخش لعدة اسباب
ما اظن واحد منها ممارسة العنف اللفظي والعراك
ياخ الناس يحتو قرض هنا
بعد يتلاقو يكتبو لينا قصايد التغزل في بعض
اها في داعي من اللول

شاحد ربي يلم فيكم عبداللطيف يفرتق ليكم بوستات الونسة دي في راسكم ..

...
منير بالله كلو جضوم وقرقراب وونساب وما عارف شنو داك

سؤال

اذا عاد بك الزمن للوراء هل كنت ستسير في نفس طريقك الذي

تسير فيه الان؟؟

هل انت الذي تختار تخصص ابناءك في الدراسة...يعني انت

الاجبرت بنتك تقرا طب وهي كانت عايزة تقرا قانون مثلا ؟

مع وافر الاحترام مع التحيات لصاحب البوست ومع الاقتراح

لاستضافة الغالية بت عمسيب بعد عبد الحفيظ ابو سن

اووو زهير
بتذكر لي الليلة يا صاحب بوستك وبوست ناذر خليفة
كان تصبرو شوية بدل تلوكو الحنين
اي زول بمرق قطع شك عندو اسبابو .. ودربو اخدر وفي جناح جبرين
لكن عارفينكم بتنقصونا اصلنا ناقصين

ودالمشرف ما تلعب معانا
انت خرخار وبتحنبك
اول امس حنبكت في المطار
قربت تتدلا من طيارتك
خليت قباني خلا المرج زاتو
نحن ناس قرقرابة و طك حنك يلا مافي زول ماخد منها حاجة
هوي ما تحنبك لي بهاظر فيك
لو خشن
قول
اللهم اني صايم

السؤال صعب امتثال
صعب جدا فأنا الان نتيجة قرارات سابقة .. ابن مواقفي
أكيد لو عاد بي الزمان لرفضت اول سجارة واول سفة
وما حبيت البت ديك
وما كان كلمت صحبي بالسر الداسيهو
ابدا امتثال
بتي الكبيرة ما فرضت عليها ولا غيرها
بدعمهم بعقل منفتح بخياراتهم
وبناقشهم
لكن ابدا ما بفرض عليهم

يعجبني في ود ابوسن انو زول راسي وبيقعّد الكلام كويس قبل يدلقوا
ثقافته عالية واكيد هي محصلة او تراكم معارف فرضتها ظروف الحياة
مناضل من الداخل على طريقته الخاصة في وقت يجبن فيه الكثير من التفوه بما يتفوه به من رأي ومحاججة
لعل اكثر ما يحببني فيه انه يعلي من شان حقوق المرأة في المجتمع
مستنير .. لايصرف مساهماته في المنبر في ما لايفيد
مهموم بقضايا مدينته .. مسرح كونه الصغير
تحية ليهو ولامثاله من المجالدين الصابرين
شكرا جلالدونا انك استنطقته

لا والله ما حنبكت ولا قربت انزل من الطيارة بل تعاملت باريحية شديدة وانضباط تكتيكي عالي ..

..
تعرف يا حفيظ ..
تاريخيا كل ما اتعامل باريحية مع الاصدقاء في هذا المجال ... لا ينتهي الامر بسلاسة ولكن .. التعامل باريحية وحميمية مع الاصدقاء مطلوب في ذاته لانو مسالة جميلة وقرقراب اجمل في السياق الاليف..

مودتي للجميع

حبابك حيدر
تشكر لحسن ظنك
بعدينك مستنير دي بتجيب الدواس والعكلتة
هسة يلم فيني سيد الاسم يطلعني بي قد القفة
تعرف يا حيدر
واحدة من ميزات كوستي انها تزخر بالحيوات .. وضجيج الحياة آنذاك .. لامة كل شئ
النوبات والذكر بتاع الصوفية
حلقات علم شيخ الطاهر ومولانا عرمان ومحمد المهدي ومولانا الكتيابي
ومحمود ود شريف ومزار سيدي الحسن
وظار مريسيلا
وغنا التومات
وبار ابونجمة وبار الضلمة
حلواني محمد عمر
ومطعم المعمل
وقهوة ابوشاخورة
القمار
والنوامات وطرة وكتابة وملوص
وبيوت الدعارة
البتخش ليها بالدس
والبتقيف ليها صف في وضح النهار
وعرقي حجر وحامدين
والجروف
والسينماء
ودار الرياضة والليق
ووو
ديل كلهن في مكان ضيق وناس شوية
بتعارفو
كل التناقض دة في تناغم

كويس انك ما حنبكت يا مشرف
اداني احساس الحنبكة قباني .
ياخ الامر لا يستحق عموما . بالذات مع مكايدات الصحاب
تعرف انا هدف لمكايدات اخواني
ما عارف ليه
علموني تحمل الاخر . فقد كنت ضيق الصدر في الهظار وهم كاويين جنس مكاواة ولازالوا
يرفعو الجرعة كل مرة . وكل مرة اصل مناطق جديدة من ضبط النفس وعدم الانفعال .
بكون عارف هدفهم ولكني انساق له دون ارادة
لي معهم حكايات وقصص ولازالت
حين نجتمع نستعيد تلك الذكريات والمناكفات
الذكريات عطر المحبة
التحية لاشقائي الاصغر
دكتور ابوبكر بالحرس الوطني بالرياض
باشمهندس معاذ بجياد
واطلب اغنية
خريف العتة
ل مصطفي سيداحمد
واهديها ل...

Quote: شاحد ربي يلم فيكم عبداللطيف يفرتق ليكم بوستات الونسة دي في راسكم ..

ههههها كدى بل راسك
عبد اللطيف هيّن
بعدين حاول ارتقي بينا ياااخ
فى حاجة اسمها خدود
و كمان كان ما اخاف الكضب
شاربة من لون الشفق عند المغارب
___
حفيظو وينك انت ياخ
فى النشاط المدرسى .. اين تجد نفسك
اساتذة و زملاء فى الذاكرة
مواد تحبها و مواد لا تطيقها
مواقف لا زالت عالقة
اكيد علاقتك حميمة مع حصص تسميع المحفوظات و جداول الضرب و الاسبلنق
زى اخونا زهير كده

Quote: يعجبني في ود ابوسن انو زول راسي وبيقعّد الكلام كويس قبل يدلقوا ثقافته عالية واكيد هي محصلة او تراكم معارف فرضتها ظروف الحياة

و عفيف اللسان و لا تصدر منه الشينة ابداً ...

طيلة السنوات التي قرأت له فيها .. لم تصدر منه كلمة نابية ...

حقيقة اتشرف بمعرفته ايما شرف ...

رجل ( مكرّب ) اموره تمام ...

Quote: و عفيف اللسان و لا تصدر منه الشينة ابداً ... طيلة السنوات التي قرأت له فيها .. لم تصدر منه كلمة نابية ... حقيقة اتشرف بمعرفته ايما شرف ... رجل ( مكرّب ) اموره تمام ...

كتاباتو صادقة و مريحة
حتى فى تشريحو للحالات المؤلمة
يحتطب لنا وقود المعرفة و يبتسم للفرار عشقه الابدى و صانع بهجته

شكرا جلالدونا لهذا الالق الجميل
عبدالحفيظ من الجميلين الذين تمنيت الجلوس بين يديهم
ومتعة الاستمتاع لاحاديثهم الرائعة واكثر ما يعجبني فيه
التواضع الجم وتناول الموضوعات ببساطة مبنية على الق زاهي
قل ان يجود الزمان بمثله فلغته جميلة كجمال روحه
كسرة
اخي الاكبر عبدالحفيظ استميحك عذرا ان تسوح بنا فى رحاب
جامعة الخرطوم فى تلك الايام الجميلة والمستحيلة تشع ضياءا
يملا الافاق نورا ولابد ان تعرج بنا عبر المناشط الثقافية فى المستحيلة
وانا من محبي شعر والقاء الدكتور محمد بادي العكودابي وارتحل معه
واتسامي فى عودة الدراويش واتحسس جمال السودان وصفاء النفوس
فى (انا اخو البت اللكعت قرن الخمرة النازة على وردان الصبو الراكزة)
وتصوايره البديعة للجمال وانت شاهد على هذا الالق الجميل حدثنا وباستفاضة
عن زفة ود بادي
جلالدونا عبدالحفيظ رجل يجسد هذا الوطن الجميل باسلوبه الخاص فشكرا
لك بهذه السياحة الجميلة فى بستان الوطن من خلال ابسن

عامر

يحي قباني
عامر حسين
كل سنة وانتو طيبين

لقد اكدتم الحقيقة المجردة في اخو الاخوان ود ابوسن
وكيفن ما يكون زي ما اكدتم وهو ود ابو سن.

كتر خيركم

حباب عامر حسين
زعلالان منّك يااخ .. الراكوبة ماب تتشكّر فى الخريف... لكن بنمشّيها ليك
و كوست يا عبد الحفيظ .. احياها و اسواقا و شوارعا
غايتو انا سمعت بى الرديف و حى الموظفين و حى الشايقية
شخصياتا و ناسا و قهوة حامد
فول اعمامن الزين و تبورى
سوق السمك و سوق الملجة
كوستى صلاح كوستى
اها نبدا من وييييييين
من وييييييين
من القشّارات احسنك
و كوستى الهمبريب و القعاد فوق العناقريب

هجرت البوست لأعطي الاعضاء فرصة الاستمتاع ب ود المدير
ود المدير يجيد نضم القول واستدعاء ذاكرة العشق والحنين
سأعود
وليس لمثل جلال من يرفض له طلب

حبابك قباني
انت النسعلك القبابين الفي الاذاعة ضكور واناتي ديل هولك
كنت بسمع زمان يقدمه منو كدة قباني
تشكر يا صديقي علي طيب قولك
عندي من الاصدقاء والاهل من يتابعون ما اكتب وفيهم بتي زاتا
وبعدينك هسة تطبيق نبض دخل معاهو سودانيز
اي موضوع جديد يجيك ناطي
ونبض موقع عالمي مشهور
ف شنو عف لسانك تكون في السليم
السلاح ياهو الكلمة
نضفها ياخ
نسة لو سلاحك مسدس مش بتراجعو ما يقوم فيك ولا يركن
اها في بالي ناس اكتر اعرفهم ويقرأون فلا ارغب ان اكون موصوفا عندهم بالفحش او غلظة قول

حبابك عامر
وتشكر لطيب حديثك
ذلك الزمان جامعة الخرطوم تزدهي بكل انواع النشاط .. صباحا و ظهرا في المين رود ومساءا بالميدانين الشرقي والغربي ودار الاتحاد ونادي الاساتذة
نشاط ترفيهي رياضي فني ثقافي سياسي
كنت اميل للنشاط الثقافي والسياسي .. ليالي الشعر الثوري والغناء واركان السياسة
استمع لوردي وعركي وعقد الجلاد واسمع للقدال وحميد وغيرهم
اشهد اركان القدال و دالي واسماء والحاج وراق والمرحوم نزار ومامون سيداحمد والمرحوم محمد طه ووو
ود بادي كان له طريقة مختلفة الشعر جزء منها وله بداخلية حسيب حيران وطريقة وهو اقرب لحلمنتيش
لم اكن احب حلمنتيش كثيرا ولا السخرية الفكهاية من التباين الثقافي والمدني الذي هو موضوعها المفضل . التباين بين اهل الخرطوم والاقاليم
لكن في ملاحظة
ليه معظم شعراء حلمنتيش دار بهم الزمن ليصير جلهم تبع المؤتمر الوطني

تعرف جلال
زمان قبل المشروع الحضاري 1981 البداهو نميري بمشورة الاخوان
كانت المدن لها طعم ونكهة ورائحة
كوستي مدني عطبرة سنار الابيض كسلا الجنينة الخ
كل مدينة لها نكهة مختلفة وصورة متخيلة لو لم ترها
يقول ليك مدني تقعد في الواطة طوالي
سنار تمسك جيبك
كوستي الرديف
سأحاول رسم صورة متخيلة لكوستي حينها
لا اعد بذلك
لامر مربوط