الكوليرا يا حكومة .. الكوليرا .. الكوليرااااا ..

08:48 PM June, 02 2017

سودانيز اون لاين
جمال ود القوز-بين الخاطر والفكرة
مكتبتى
رابط مختصر

والأسخم والأضل والألعن من امتلاك وزير للصحة في هذا البلد الهامل ..
لمستشفيات خاصة كمشاريع ربحية تدر عليه ربحا يتكسب منه ..
وممارستة لعمل ربحي خاص في نفس الاختصاص الذي يمثله كوزير ..
وهو وزير للصحة في هذا الوطن المنكوب .. لاحظوا وزير للصحة !!!! ..
هو منعه وبكل بجاحة وصلف وقوة عين ..
استقبال حالات الكوليرا في مستشفاه الذي يملكه (يستبشرون ) ..
أهوان بعد هذا يا عالم !!!! ..
مهما كان الزول سيء الظن ومتشائم وتفكيره سوداوي ..
مستحيل بل من رابع المستحيلات انه كان يرد على خاطره ..
أن يأتي مثل هذا اليوم الأكلح الأسخم على السودان ...
لا حول ولا قوة الا بالله ..
وزير صحة يمنع مرضى ولا يساعد في القضاء على الكوليرا !!! ..
وكمان لا يزال يحتفظ بمنصبة كوزير للصحة !!!!! ..
دي يعقلوها كيفن يا ناس الله دي ..
منتهى الهوان والامتهان للطب وللمناصب الدستورية وللدولة وللانسان ..
في بلد يعيش منسوبيه حكومته ظلما وعدوانا على قفا المواطن المسكين ..
وبعد ده كله يدوا المواطن المسكين وبالجزمة على نافوخة ..
ويتمسخرو من المرض والوباء الابتلوهو بيهو والأصلا هم من أتوا به ..
بقراراتهم السياسية الغبية في ظل كوليرا تعم دولة جنوب السودان ..
برضو يقرروا يفتحوا الحدود لتعم الكوليرا السودان ..
ويموتوا بيها مئات المواطنين .. ده كله ليه ؟!! ..
الفائدة من قرارات غبية زي دي شنو ؟ .. سبحان الله ..
وكمان يجي مسؤل صحة ولائي يفتي بأن الكوليرا ..
نتجت عن استخدام الصيادين لشباك معطونة في دم المسالخ لاغراء السمك ..
الكلام ده يبلعوه كيفن كسبب منطقي ويعقله عقل زول عاقل وبيفهم ..
الناس دي مودية البلد وين .. أو هي أصلاً ودت البلد في ستين الف داهية ..
حسبنا الله ونعم الوكيل .. وغلبنا النقولوا ..

سلام يا جمال

فعلا أمر يدعو للحيرة ويضاعف الألم
مسئولون يتبارون في الفشل واستفزاز الناس
ويرون ذلك شطارة سياسية
يمارسون السياسة بغباء وعدم مسئولية
انعدمت في قلوبهم الرحمة وتحجرت عاطفتهم
فالمال الحرام يعمي النفس ويملأها بالحقد ويمنعها من فعل الخير

تبا لهم

وعليكم السلام حمد أخوي .. رمضان مبارك عليكـ ..
صدقني ما يحدث قمة المأساة ..
وعدم الاكتراث بصحة مواطن هذا البلد المفترى عليه ..
الوزير الاستثماري ده لو بس تابع في مستشفاه ..
خمسة أو ستة حالات بس ..
أو حدد طاقة استيعابية للمستشفى حتى ..
وقال دي قدرة مستشفاه الاستيعابية ..
مافي زول طالبه يعمل المستحيل على قدر قدرته ..
إن شاء الله حالتين ثلاثة لا أكثر ..
وكذا بقية المستشفيات كل مستشفى ..
يأخذ طاقته الاستيعابية القصوى لا أكثر ..
ما بيكونوا ساعدوا في اندحار هذا الوباء الفتاك ..
الذي لا يحتمل أي مماطلة أوتأخير في اسعاف الحالة ؟ ..
لأنه الحالة ستفقد سوائل في وقت وجيز ..
وبالتالي ستفشل كل أعضاء الجسم ..
عن القيام بمهامها الوظيفية .. ده الفهم المقبول ..
أما عملية رفض استقبال الحالات البتة شيء يدعو للدهشة ..
كيف ترفض علاج مواطنين انت الاتسببت ..
في جلب ما حق بهم من مرض عضال قاتل ومميت كالكوليرا !! ..
ده لو اصلا الناس استساغت مسألة انه وزير للصحة ,,
شغال بنزنس طبي وبيستثمر في مرض المواطن ..
بالله ده وزير صحة ده .. معقول يا ناس ..
زول بالعقلية المدمرة دي يظل لسه قاعد كوزير للصحة ..
مهامه شنو مثلا .. الفايدة منو شنو أصلا ..
لو ما تفاعل مع وباء شغال بيستشري في جسد المواطن الغلبان ..
لنا الله ...

أين السيد بحر أبو قردة الكان مناضل سابق ..
وفي يوما ما كان من حملة السلاح ..
هسه خلاص عمل نايم ..
لمن لقى الراحات باع القضية ..
أين دوره كوزير لصحة المواطن ..
أين تسخيره وفتحه لكل مستشفيات البلد ..
صغيرها وكبيرها .. حكوميها وخاصها ..
حتى تستطيع وزارته محاصرة هذا الوباء الذي انتشر..
أعجز الحيلة عن التحرك في ملف الكوليرا هذا ..
طيب ما يستقيل لمن ما قادر يعمل حاجة ..
المقعده لي هسه شنو ؟ ..
أم هي مصالح شخصية وبحث عن مناصب وبس !! ..

قدامهم حل واحد يفتحوا كل المستشفيات الخاصة ..
لاستقبال حالات الكوليرا ..
غير كده الحالة دي حتستمر وحيموتوا خلق كثير ..
يوفروا المحاليل والمضادات الحيوية لكل المستشفيات ..
ويخلوا حركة المريض يشتري الحقن والشاش ..
حق المستشفى من الصيدليات القدام المستشفى بي قروشو ..
لانه في ظل الوضع المأزوم ده لابد من تضافر..
كل الجهود للقضاء على هذا الوباء الفتاك ..

فوق

تسلمي عزيزتنا منى عمسيب ..
رمضان كريم ..
وربنا يزيح هذه الغمة والابتلاء عن شعبنا ..
وراهم حتى يجدوا لنا حل ..

حكم الإنقاذ أساسه استرخاص حياة المواطن

فلنقد نحن حملة إنقاذ أهلنا من الوباء

ولنحاصر المسئولين بواجباتهم في نفس الوقت

الباقر موسى

تسلم أستاذ الباقر ..
فعلا الجهد الشعبي أخجل النظام ..
كان هو أصلا عنده ذرة من الخجل ..
يجب أن تعي الحكومة ووزراء الصحة حجم المسؤولية ..
ويجب أن يتركوا عنهم الاتكالية والقاء المسؤولية على المواطن ..


رمضان كريم عليك ..

التحية والتجلة لمجهود أهلنا الشعبي في بحر أبيض ..
وهم يكافحون الوباء بأنفسهم ويحرجون النظام المتخاذل ..
وزير الصحة مأمون حميدة المفروض في ظل الأزمة دي ..
ينزل بنفسه يشتغل نبطشي ويستلم وردية ..
مش يمنع المرضى من دخول مستشفاه ..
منتهى الفسالة منه والله ..
وده حالته وزير صحة الولاية كمان ..

Quote: الوزير المعني قال: ان الاسهالات المائية ليست من ضمن اختصاصاته؛ ربما يعتقد انها من اختصاصات وزارة الري والموارد المائية؛ ........................... وزير صحة الخرطوم منع دخول المرضي بالكوليرا لمستشفاه الخاص؛ ........................... غايتو لحكومة دي لو الكولير ا كتلت نص الشعب؛ ولا يهمها؛ ديل ناس فاقدين اي حساس واي حساسية؛ همهم كما حدثني صديق وثيق بالحكومة؛ قال: اي حكومة جديدة هم وزراءها الاول ولاخير الحصول على قطعة ارض في الخرطوم؛ فقد اكد له مدير الاراضي ان الوزراء ياتون كلهم في اول مهامهم لمكتبه بغرض الحصول على قطعة ارض؛ وتبدا سلسلة المصالج الذاتية التي تكبر يوما؛ والمواطن لا احد يفكر حتى في معاناته؛ براه ياكل نارو... تقول لي كوليرا؛

حسب معرفتي رفض معالجة مريض هي جريمة

عدم تقديم متطلب ضروري لحفظ الحياة يساوي جريمة القتل

مثل منع الهواء أو الماء أو الطعام

وكذلك العلاج


في بعض الدول قانون يسمى The good Samaritan بموجبه يحاسب الشخص الذي يمر بإنسان محتاج لمساعدة تنقذ حياته ولا يساعده

الباقر موسى

حبيبنا عبد المنعم الطيب ..
رمصان كريم عليكـ ..
والله منتهى الاستخفاف وعدم الاكتراث بالمواطن الغلبان ..
أن يتم حرمانه من تلقي العلاج ..
في مستشفيات امتلكوها متنفذيه من مص دم هذا المواطن الغلبان ..
وكمان لحدي الآن ما قادر استوعب كيف وزير صحة ..
يطلع ويصرح بأنه المرض الفلاني ليس من تخصصه ..
حاجة عجيبة ..
طيب وزير الصحة اختصاصه شنو ..
لو ما بقى مرض المواطن وعلاجه ..
صدقني ديل أكبر مرض أصاب الوطن والمواطن ..
تسلم كتير ....

صدقت والله أستاذ الباقر ..
دي جريمة المفروض بسببها يتم محاكمة وزراء الصحة ديل ..
لكن في بلدنا الهامل ده .. لا حياة لمن تنادي ..
وعادي جدا أن لا يتم تقديم أحد لمحاكمة ..
ده غير انه المدعوين ديل ..
حيستمروا في منصابهم زي الماحصل حاجة ..

ندعوا الله ان يرأف بعباده وبلاده ..
ويزيح عنا هذه الغمة والابتلاء ..

تحياتي ود القوز
وضيوفه
المرض ماشي
وصل شندي ودنقلا
الجهد الشعبي كان سببا في تراجعه في كوستي ولكنه دخل الدويم
امس سمعت ب 120 حالة هناك

سلامات يا ود القوز ..
شكراً على البوست المهم في زمان أصبح فيه جل اهتمامات الناس الغناء والرقص وكأنهم يعيشون في كوكب آخر !!
تباً لمأمون حميدة وكل من شايعه وناصره .. تباً للكيزان والمنتفعين
نسأل الله عز وجل أن يرفع البلاء ، والله لولا تدرك الناس رحمة الله يهلكوا جميعاً

كل الجهود لمكافحة وباء الكوليرا

حبيبنا ود أب سن .. حبابكـ ..
ورمضان مبارك عليك وعلى أهلك ..
والله صحي متابع أنه ناس كوستي ..
ما قصروا وقدروا حاصروا المرض ..
وقفوا بانفسهم وجلبوا المحاليل والمياه الصحية ..
كوستي مدينة عجيبة تحس الناس كتلة واحدة ..
ناس كوستي عشت بينهم سنين عددا ..
أسروني في نقاط كثيرة جدا وأعتبرهم ناس متفردين ..
وكنت عارف إنهم لن يتركوا هذا الوباء يفتك بالناس ..
جهدهم الشعبي على العين والرأس ..
لكن الا يحق لنا ان نتساءل أين حكومة كاشا من كل الحاصل ده ..
أتقاصرت همة حكومة الولاية الا على المخصصات والمزايا للدستوريين ..
الا يستحوا من أنفسهم .. أمات ضميرهم !!! ..
الكوليرا وباء فتاك ينتقل بسرعة وان لم تتم محاصرته بنفس السرعة ..
حتكون عواقبه وخيمة ومحاصرته أصعب ..
عرفت أنه وصل شندي لكن بلدنا دنقلا البعيدة ديك كونه وصلها ..
معناتها خلاص تاني الفضل ليهو شنو انه يكون عم البلد كلها ..
لا حول ولا قوة الا بالله العلي العظيم ..

ربي لطفك نسأل ..
اللهم الطف بعبادك في أيامك المباركات هذه ..

حبيبنا باشمهندس محد عبد الله مختار ..
رمضان كريم عليكـ .. وعلي أسرتكـ ..
شاكر جدا حسن ظنكـ يا سيدي ..
وفعلا والله تباً لهم ..
لقد اهملوا الوطن والمواطن ..
وتركوا هذا الوباء يستشري وبهذه الصورة المخيفة ..
يجب ان تتضافر كل الجهود وان ندق نواقيس الخطر ..
عسى يرعوي هؤلاء ..
ويعلموا جيدا حجم وثقل المسؤليات الملقاة على عواتقهم ..
والتي اهملوها جريا وراء مكاسب شخصية رخيصة ..
ومخصصات ومزايا على قفا هذا الشعب المكلوم ..
لنا الله هو مولانا ..
نسأله بجاهه الكريم وسلطانه العظيم ..
ان يعم شعبنا برحمته وفضله ..
وان يزيح هذه الغمة عنا فهو ملجأنا وعزاءنا ..
بالذات سط هذا الاهمال الحكومي المؤسف ..

تسلم كتير يأخ ..

Quote: كل الجهود لمكافحة وباء الكوليرا

الهميم أستاذ الباقر ..
رمضان كريم عليك .. وعلى أسرتكـ ..
نعم معا لمكافحة هذا الوباء المهلك ..
يجب ان نكون جميعا يد واحدة ..
حتى ندحر هذا الوباء ..
وكان رجينا حكومتنا دي واطاتنا أصبحت ..
لكن لابد من تكثيف جهدنا لنقض مضاجعهم ..
وان لا يهأنوا ويرتاحوا وشعبنا يعاني من وباء خطير كالكوليرا ..

تسلم كثير ..
وشاكر همتكـ يا سيدي ..

اصعب حاجه اتعبتني نفسيا لحدي الآة الكارثه البتحصل دي ياجمال
اولا بينت مدي عجز وخواء العقليه القياديه في البلد
ومدي سبهللة المتنفذية
وهوان المواطن علي اولي الامر
وعجزنا من تقديم مايقلل من الفقد البشري
ياريت لو بيدي ارسل كمية اد.يه كبيره
او استقبل حالات اكتر
او انزل ارض الواقع مثل اي مواطن اغبش حتي اتخلص ثما بي من حزن واحباط




كل رمضان والوطن والمواطن بخير وانت واسرتك بخير ياجيمي

ملهمنا يا حنين ..
رمضان مبارك عليكـ ..
والله فعلا الحاصل ده منتهى الاهمال والتجني ..
وسلب المواطن المسكين أبسط حقوقه ..
كيف بالله عليك حكومة تنفق المليارات ..
في أصحاب القلوب المؤلفة وسماسرتهم ..
مخصصات ومزايا وعربات وايجارات فنادق ..
لجلب سلام مدعى ومفترى عليه .. لن يأتي ..
وترك هذا المواطن المكلوم يواجه قساوة المرض ..
وجعله يشتري ومن حر ماله ما حرمته منه الحكومة ..
وهو من حقه ومن أبسط واجبات الحكومة تجاهه ..
حكومة عجزت حتى عن الايفاء بشيء أساسي مثل الصحة ..
فقدت سبب بقاءها وهو تمص دم هذا المواطن الغلبان ..
ولن تشبع .. دي كارثة والله ..
تسلم كتير .. وبارك الله فيكـ .. ما بتقصر ..

معا حتى نزيل هذا الوباء الذي أهلك شعبنا ..

جمال سلامات،،

كارثة وعواقبها حتكون أسوء مما نتخيل بكتير!
طريقة انتشارو اشبه بحرب بيولوجية! من اقصى الجنوب تقفز
للخرطوم ثم الى أقصى الشمال في البرقيق!!

السؤال البطرح نفسو .. ليه الحكومة ماعاوزة تعلن
عن وجود المرض وتشغل اعلامها الكان هايج في موضوع مصر دا،
عشان تحصل التوعية الصحية اللازمة عشان تتم محاصرة للمرض!! وليه
المسؤولين الحكوميين بصرحوا بتعليقات مستفزة للناس؟؟

واسئلة كتيرة ما عندها اجابات منطقية، ودا البخلي اي زول يتسأئل
هل الحكومة عندها يد وراء انتشار الوباء؟؟

ــــــــــــــــــــــــــــــــ

دنقلا /نبوكين

كشف مصدر طبي بمستشفي دنقلا عن وصول العديد من حالات الاصابة بمرض الكوليرا للمستشفي من محلية البرقيق وانهم يتلقون العلاج حاليا.
وذكر احد مواطني محلية البرقيق لنبوكين ان هنالك حالات اصابة باالكوليرا في الحارة الرابعة بالبرقيق وان المصابين تم نقلهم الي مستشفي دنقلا بعد فحصهم في مستشفي البرقيق والتأكد من اصابتهم بالكوليرا, واضاف ان هناك حالات اصابة اخري في جزيرة بدين وقري اخري
الجدير بالذكر ان منطقة القعب شهدت تفشي الوباء خلال الشهور الماضية خاصة بين المعدنين العشوائين وتكتمت السلطات علي الامر ومنعت نقل المصابين الي دنقلا واعترف وزير الصحة اخيرا باصابة اكثر من ٧٧ شخصا و وفاة احدهم.

المصدر:
http://nubokeen.com/web/%D8%A7%D9%84%D9%83%D9%88%D9%84%D9%8A%D8%B1%D8%A7-%D8%AA%D8%B6%D8%B1%D8%A8-%D9%85%D8%AD%D9%84%D9%8A%D8%A9-%D8%A7%D9%84%D8%A8%D8%B1%D9%82%D9%8A%D9%82/http://nubokeen.com/web/%D8%A7%D9%84%D9%83%D9%88%D9%84%D9%8A%D8%B1%D8%A7-%D8%AA%D8%B6%D8%B1%D8%A8-%D9%85%D8%AD%D9%84%D9%8A%D8%A9-%D8%A7%D9%8...1%D9%82%D9%8A%D9%82/

أحمد عالم يا انداندي .. رمضان كريم عليك والأسرة ..
والله مصيبة كبيرة ..
الحكومة دي كلما تفرفر في موضوع الكوليرا ده توكر زيادة ..
وبنفسها تزيد مأساتها ..
فالحين بس يستفزوا الناس بالتصريحات وبعدم الاكتراث ..
وما عايزين يعلنوا عن المرض ..
عشان خايفين يوصموهم بالفشل في ادارة البلد ..
وهم أصلا أفشل من الفشل ..
ربما لو أعلنوا انه البلد فيها وباء زي ده ..
كان ساعدوهم في القضاء عليه ..
لكن هؤلاء لا يهمهم المواطن وسلامته ..
ولن يعلنوا انه البلد فيها كوليرا وحيظلوا يستهبلوا على الناس ..
بي حكاية الاسهالات المائية دي ..
بيضحكوا على منو أنا ما عارف ..
الدنيا كلها عارفه انه العندهم دي كوليرااا ..
لكن البيقنع الديك منو ..
وصل البرقيق كمان ..
لا حول ولا قوة الا بالله العلي العظيم ..
المناطق دي فيها كثافة سكانية والقرى قريبة ومتداخلة مع بعض ..
وممكن جدا المرض يكون جابوا شخص أو أشخاص قدموا من الخرطوم ..
فالاكيد المرض حيواصل انتشاره وحينتقل وينتشر شمالا وجنوبا من البرقيق
عشان كده قالوا ليهم يغلقوا مناطق الكوليرا حتى يطعموا ويعالجوا كل الناس ..
لكن لا حياة لمن تنادي ..

ربنا يلطف بعباده وبلاده يارب ..

موضوع القعب ده والله أول مره أسمع بيهو ..
طبعا معدني القعب ممكن يكونوا وبسهولة النواة الاولى لانتشار المرض ..
لانهم جايين من مناطق متعددة ..
واحتمال يكونوا جايين من مناطق استشرت فيها الكوليرا ..
أو حاملين للفايروس ... وقاموا بنقله لمناطقنا ..
ربنا يشفي غايتو ..

تسلم كتير ..
خيرووووووووو .....

معآ حتي زوال وباء الكوليرا .

تسلمي منى عمسيب ...
معا حتى اندحار الكوليرا ...