02:17 AM May, 27 2017 سودانيز اون لاين جلالدونا- مكتبتى رابط مختصر مرحب بيكم كلكم و رمضان كريم و يعود عليكم بالخير و اليمن و البركات و نتمناها دردشة لطيفة و ظريفة و تبنى جسور مودة و محبة بين الجميع
سلامات للجميع . يا زول هوي بطاقة شنو !. معاوية محمد محمد عثمان الخليفة بن إدريس . محمد اللول دا إسم الرسول عليه الصلاة والسلام، ؤ محمد عثمان اسم مركب نسبة لمحمد عثمان المرغني وختمية أهلنا اللتشبكت فينا لا ايدنا لا كراعنا دي وأم السيد علي المن الباوقة البسببها جاتنا المصايب من حيث لا ندري، ؤ بعد دا يجوك ناس الزبير الختمي يزنولك في رأسك !. اتبراوي ؤ بس .
اسمح لى يا ود المدير بى ترحيب خاص لى اخونا ود الزبير و امنياتنا القلبية الصادقة بعاجل الشفاء و العودة سالماً غانماً و معافى لى دار الاهل و ان شالله سلسلة هذا الشهر الرمضانية تكون خفيفة على قلبك و انيسة ليك و تخفف عليك وحدتك و رقدة المرض المملة دى و المستنير اخ عزيز و فى البال و عشانك حيكون ضيف العيد و الختام معاهو مسك ان شاء الله ___ هسى يجينى شايل لمبة استنارتو و يقول لى ده كسّير تلج رمضان كريم يا مستنير و عساك من عوادو
Quote: و التحية للمعاويات الرائعين و ليك يا جلي ... و لصاحب الفيديو حق فرقة جاز سكة حديد عطبره ...
رمضان كريم، وعاطر التحايا للجميع . حقيقة قبل كل شي حقاً صاحب الفيديو يستحق تحايا خاصة وجزيل شكر علي هذا المجهود الرائع بجلب هذه الأغنية من الزمن السحيق بغبار ذكريا ت جميلة عالق في جنباتها، ذكريات جعلت القلوب يزداد خفقانها خوفاً وفرحاً في تلك الحقبة من الزمان . لهذا الشخص الرائع عاطر التحايا وألفين سلآم .
هُما نسونا، تعني هُم نسونا، اي تجاهلونا، ؤقالوا ما نسونا، أي أنكروا نسيانهم لنا وقالوا، إنهم لم ينسونا . فرقة جاز السكة حديد بقيادة تيّة كانت تابعة لمؤسسة السكة حديد والتي كانت تملك مصانع إضافة لفندق (الرست هاوس ) الذي كان يقيم ليالي ساهرة للأُسر بمدينة عطبرة تحيها هذا الفرقة . الحديث عن فرقة جاز السكة حديد يقودنا لذِكر منافستها فرقة دآنة بقيادة طيوّبة وهي تابعة للمدفعية عطبرة . هذه لمحة من طفولتي ...
Quote: ضربة بداية موفقة يا جلال بس أوعك تعقبها بالمستنير خشية إفساد صيام الناس
ود الزبير، إنت أريتك تبقى طيّب أنا البي كُلُو هيّن عشان شوقنا ؤ سلآمنا يصل معطّر نرسلو عبرك للحبيب قباني . هو صاحبك المستنير دا أكِنّوا مطلوق في الشهر دا !...
Quote: و تانى حاجة .. السيّالة .. مرتع الطفولة و حاجات عالقة بالذاكرة من زمن الشقاوة ديك
اولاً، لا يمكن ذِكر السيالة دون الحديث عن النيل حيث وُلدت وترعرعت علي ضفافه وصارعت أمواجه بجسدي النحيل وراء ليحان الخشب التي غالباً ما يلقي بها الأتبراوي في النيل . بالنسبة للشقاوة إذكر منها إنني كنت أُلقب بالمليجي نسبةً للمثل محمود المليجي الذي كان يجيد أدوار الشر في السينما المصرية، وكنت حريف جداً في السطو علي الجناين وسرقة المنقة والبُرتُكان، كذلك كنت امتاز بالسرعة، كنت جراي جداً وكنا في الحِلّة لآمِن نحتاج لكورة امشي ميادين فُرُق الدرجة الأُولى بعطبرة اقيف بعيد خلف القون واوآت الكورة تطلع آوت اختفا واكسح بعد أطلق كرعي للريح عجلآت عطبرة لحدهِن يعجزن معاي . حصلت لي قصة طريفة لا تخلو من شقاوة في الثانوي العام مع مُدرس الرياضيات ...
Quote: ليه مصر تكتب واو العطف ؤ الفكرة شنو تصر علي خطأ زى دة
عبد الحفيض حبابو . هسّع أنا قلت أُم الدنيا الدخلآ شنو في بوستينا دا !. هو ليس إصرار علي خطأ يا حفيض لكني منذ أن إلتحقت بهذا الصرح العظيم وأنا ادردش مع الناس بكتابة خليط بين العربية والدآرجة وهذا يرجع لعجزي عن الكتابة وميولي للونسة . يا حفيض انا زول ونسة اجآد أخوي لا تعاملني ككاتب ؤ تحاسبني من ناحية قواعد نعمني مكجنا ...
مرحب بيك عبد الحفيظ فى كلام ناس الشمال تنظق واو العطف بالهمزة و يمكن تلاحظ فى كتابات اخونا بشاشا مسّاهو الله بالخير بيكتب واو العطف هكذا .. او .. كما تلاحظ فى كلام الشايقية شغفهم باستعمال حرف النون واقحامه فى اى كلمة يعنى مثلا كلمة .. بينهم .. تلقاها بيناتن مكانهم .. مكانن بيتهم .. بيتن ياخى حتى مفردة ياهوداك تلقاها غندهم ياهونداك
امكن يا جلال بنطقوها وا .. وهي دلالة علي كسب الزمن للتذكر الابدال مشهور عندنا في السودان . كما ذكرت مثلا سلامو عليكون او الالف لام . اللمينة اللت البيت ود المدير اذا عادت بك الايام لي لحظة سفرك ل كندا . ماذا سيكون قرارك بعد تجربتك
Post: #15 Title: Re: ► دردشة رمضانية ◄ معاوبة المدير Author: عزالدين عباس الفحل Date: 05-28-2017, 10:54 AM Parent: #14
الإخوة الكرام الأفاضل
سلام ، ينعاد عليكم أجمعين ، رمضان بالصحة والعافية ، يا معاوية طلعت ختمي ، و النعم أكرم و بارك ، و عاش ابوهاشم ،
*** سؤال علي عجل ، عارف أنك بتربطك صلة رحم ، مع الأقطاب المتنافرة ، رغم صلة الدم ،
1 – ود الباوقة ، 2 - معاوية عبيد الصائم ، 3 - MOHAMMED ELSHEIKH
و الثلاثة قمة في الأخلاق الحلوة ، لكن السياسة مشاترة ، و بتفرق الأهل و المصارين ، ممكن توضح صلة القرابة ، ،،،
Quote: ود المدير اذا عادت بك الايام لي لحظة سفرك ل كندا . ماذا سيكون قرارك بعد تجربتك
أصلاً ما كنت حا إتردد، صدقني يا حفيض كنت حا اسافر طوالي لعدة أسباب . أولاً السبب المباشر كان العلاج نسبةً لأني تعرضت لإصابة في ضهري بسبب الكورة في عام 78 وفي 79 بدأت الألآم تنغص حياتي وبدأت رحلتي مع العلآج من داخل السودان، حتي وجدت الفرصة في عام 88 للذهاب لأبو ظبي ورجعت في نفس العام بخفي حنين بعد ان رفضت الإقامة في دولة الأمارات . في 89 شديت الرحال للولايات المتحدة الأمريكية (نيويورك).
تعرف يا قبانى .. ود المدير ده لامن كتب تلاتةايام فى ام قنيفيطة كان مدخله للقصة الزبالة و الزبالة يا ود قبانى لىهو معاها مجاهدات زى ما بقولوا ناسكم اليومين ديل خاضة و السيالة و عموم بيوت عطبرة ليها من الزبالة نصيب وافر يا ود المدير اختيار المدخل ده كان صدفة ولّ شى مربوط بى مواقف اخرى
Post: #18 Title: Re: ► دردشة رمضانية ◄ معاوبة المدير Author: عزالدين عباس الفحل Date: 05-29-2017, 10:45 AM Parent: #17
معاوية المدير
كان قعدت في الواطة ، و إستقريت في الأمارات ، كان كنت رجل أعمال Famous ودخلت عالم الـ Business ما بتدي حريف ، لكن عندك فرصة أخيرة ، تلحق بوفد المنافي ، أها كرسي وهيط في البرلمان ، أشواقي ،
،،،،
Quote:
جدت الفرصة في عام 88 للذهاب لأبو ظبي ورجعت في نفس العام بخفي حنين بعد ان رفضت الإقامة في دولة الأمارات .
ما لن يفلت من حصون ذاكرة الفتى حتى لا تهيم الرؤى بأنه ذلك المدلل
هو بن ذلك العظيم الذي حمل عطبرة في حدقات عينيه تمددت السكة بين راحتيه اللتين أن تباعدتا كانتا ما بين بورتسودان واو وإن تقاربتا حنت على ارزاق الرجال فزاد الفضل فضلا بين أصحابه
يحدثكم عن السيالة والحرازات والحوازات والخلوة ودكان خدر وقيفة النيل التي خرير موجها يدغدغ الأسماع مع شاي الصباح ذلك البيت الأليف الذي في جانبه غرفة لحمام الرقاص الذي أتى من مطار هيثرو وفي طرفه عريشة بها دود القز ميلاد الحرير الذي اتى من مطار بكين وفي جواره حبوبة مدينة أم عشوش زوجة محمد أعمى عطبرة الشهير ومركبهم والساقية والجروف والماقات والخدرة والجرجير كان هذا الفتي يعيش في فلل السودنة ( الفلل الرئاسية بلغة أهل القصر ) نعم حللنا أهلا وسعدنا بالسهل وجلسنا نحسو الذكريات في ذلك المنزل الأليف طوال عامين كان من النعم التي جرت علينا الدخول إلى مدرسة الحفر العتيقة بالداخلة الجميلة في جوار حي العمدة السرور هل يجرؤ أن يتابع مثل هذا الحديث
Post: #24 Title: Re: ► دردشة رمضانية ◄ معاوبة المدير Author: MOHAMMED ELSHEIKH Date: 05-30-2017, 08:11 AM Parent: #23
Quote: ما لن يفلت من حصون ذاكرة الفتى حتى لا تهيم الرؤى بأنه ذلك المدلل
هو بن ذلك العظيم الذي حمل عطبرة في حدقات عينيه تمددت السكة بين راحتيه اللتين أن تباعدتا كانتا ما بين بورتسودان واو وإن تقاربتا حنت على ارزاق الرجال فزاد الفضل فضلا بين أصحابه
يحدثكم عن السيالة والحرازات والحوازات والخلوة ودكان خدر وقيفة النيل التي خرير موجها يدغدغ الأسماع مع شاي الصباح ذلك البيت الأليف الذي في جانبه غرفة لحمام الرقاص الذي أتى من مطار هيثرو وفي طرفه عريشة بها دود القز ميلاد الحرير الذي اتى من مطار بكين وفي جواره حبوبة مدينة أم عشوش زوجة محمد أعمى عطبرة الشهير ومركبهم والساقية والجروف والماقات والخدرة والجرجير كان هذا الفتي يعيش في فلل السودنة ( الفلل الرئاسية بلغة أهل القصر ) نعم حللنا أهلا وسعدنا بالسهل وجلسنا نحسو الذكريات في ذلك المنزل الأليف طوال عامين كان من النعم التي جرت علينا الدخول إلى مدرسة الحفر العتيقة بالداخلة الجميلة في جوار حي العمدة السرور هل يجرؤ أن يتابع مثل هذا الحديث
<=====للزوار: للتعليق على هذا الخبر او المقال اضغط رد
انت يا جنا النو بتجيب الكلام النفر دا من وين؟؟ انت قاعد تذاكر من ورانا ولا شنو؟؟
المهم رمضان كريم عليكم كوووووولكم ..... حتى الضاربنو
عموماً، بوست يصل 11 صفحة ويصل عدد مداخلآته إلي 1059 وعدد قرآأه لا أعلمهم ولا يُذكر فيه مجرّد إسمه !، شي عجيب والله عجيب جداً . هذا رجل اعتز بالإنتساب له وأفخر، ربي أرحمه كما رباني صغيرا ...
Post: #29 Title: Re: ► دردشة رمضانية ◄ معاوبة المدير Author: بدر الدين الأمير Date: 05-30-2017, 12:50 PM Parent: #28
جلادونا الممرج كيف انك شايف ودالمدير من ضربت البداية جاب سيرة البحر
رمضان كريم جلال دونا و تكتب جلالدونا وليس جلادونا ... جلادونا ديل ناس الحكومة الكلام ليك يا بدر الدين الامير باين الصيام تعبك شديد. لك أجمل التحايا يا امير و التحية لزوار البوست جميعا و رمضان كريم ولي عودة
حكاويك عن تجاربك يا ود المدير فيها الكثير من العبر والطرافة واللغة الرويانة، يا ريت تتحفنا ببعضها قبل أن يسرقك ويسرقنا الزمن تقبل مودتي وأشكرك على دعواتك الصادقة
جلالدونا بصراحة بوست دمه خفيف جدا...لاسباب كثيرة ومنها ان البوست فيه ريحة عطبرة
وكنا نتوقع من سؤالك الاول ان يقوم ود المدير يبدا قصة حياته من الطفولة والنوادر
التي مر بها في كل مرحلة ...
اما موسيقى فرقة جاز بوليس عطبرة، ففي نفس اللحظة القرينا فيها البوست طلبنا من امتثال
ان تعزف لينا نفس النغمة واللحن...ما نسونا....وطبعا ما حتصدق عزفت بمهارة وكانها فرقة موسيقية
كاملة وتجمهر جيران الغرفة امام الباب ، ولمن فتحنا الباب لقينا زميلاتنا يرقصن وكانهن في حفلة ...
وكل سنة وانتو طيبين....وخلال شهر رمضان خلو السياسة بعيد وخليكم في البوستات الخفيفة الزي
دي،،،
ودمتم بالف خير وصحة وعافية
Post: #33 Title: Re: ► دردشة رمضانية ◄ معاوبة المدير Author: عزالدين عباس الفحل Date: 05-31-2017, 08:58 AM Parent: #32
معاوية المدير
سلام بطعم الحلو مٌر ، يعني يا ود المدير ، طيب العائلة كلها مسجلة ، في سودانيز اون لايص ، *** سؤال علي عجل :-
1 - كيف تعرفت علي الأخ الأديب جلادونا ؟ 2 - و ليه إنت مكنكش في جلادونا كدا ؟ الكنكشة ما سمحة 3 - و ليه إستقبلت أخونا كبر بالسفنجة ؟ عايز تقول لي بادية و بدو ، و زبادي عادي ، مرفوضة اللهجة العمصرية دي ، و خليني أستنشق هواء ، النيل العليل العذب أثيراياً ، فأجمل بوست ، قرأته لك يا ود المدير هو :- أروع ثلاثة أيام في ام قنيفيطة أخشي العثرة في الإسم ، إنت كاتبي المفضل ، بدون نزاع ، سمحه الهيبة فوق مختار
********** ضربك جله مو بالرش شن جاب الحديد للقش
،،،،
Quote:
ود الباوقة تربطني به علآقة قرآبة لصيقة من جهة الوالد والوالدة . معاوية عبيد خال المقداد وفاطمة . محمد الشيخ إبن عَمتي .. . معاوية المدير ،
بدر الدين الامير يا زول انت مسخوت و المسخوت لا مرج عليه مشيت فتشت معنى الكلمة دى ما لقيت ليها المعنى الجابو الختمى الزول ده مرجكم ساكت كده مرج بمعنى فتنة هنا
أنا والله جد شاكر للكرام المرّو من هنا والصديقات الكريمات العطرن المكان، ؤ يا جلال اليوم إن شاء الله سوف ارجع البيت واواصل معكم الدردشة حتي نهاية رمضان ...
بت عمسيب الزاكى المفيرة و انتو من اهلو و ينعاد عليكم بالخير ____ بت عمسيب داير افتح لى بوست عن تراجى اها خصّمتك بى الله و رسولو ما تجى تقبقبينى من قولة احم خلينى اسرح فوقو شوية و بعد داك تعالى اعملى قينى الدايرة تعمليهو داير اتونس يختى
معاوية المديرمن الطف الناس؛ في هذا الوطن الافتراضي... اعلن انه كاتبي المفضل؛ اقرا كل ما يكتب وبكل الفرح والحب والبهجة؛ واحلم بلقاءه كونه جميل... وقيافة وفايت الناس مسافة... مسافة تهبشك غنوة واناولك كاس؛ كاسه مترعة دوما ابدا بكل ما هوجميل واريحي... ياخ دا من شدة تهذيبه بتروش بملابسه الداخلية!!!!
ولي رجاء خاص جلالدونا... ان توقف هذه الدردشة هنا..... من منطلق ان ليس بعد معاوية من دردشة فانت بدات من القمة فخليك هناك؛ ولا تنزل ارجوك؛ وان كان لابد من دردشة فنستثنى معاوية الزبير؛ كقمة اخيرة ... دمتم
ازيك يا عبد المنعم و رمضان كريم وتقبل الله طاعاتكم أشكرك على هذا الشعور الطيب، لكن أول تبادي أنا أخدت نصيبي من برنامج جلالدونا السنة قبل الفاتت تاني تبادي نتمنى أن يستضيف أخونا جلة في كل مرة شخصيات جديدة حتى نتعرف على الجانب الآخر في شخصيات أعضاء المنبر فغالبا ما يغيب هذا الجانب وتطغى عليه المداخلات اللحظية التي قد لا تعبر بالضرورة عن الشخصية الحقيقية لعضو المنبر فااا دعنا نواصل مع ود المدير ثم ننتقل للشخصية التالية أشكرك من جديد
العزيزة بسمات رمضانك كريم و عساك من عوادو اول حاجة و انا فى السودان سمعت بى انك برضو فى السودان بسبب مرض والدل اتمنى انو يكون بلغ العافية و فى اتم الصحة حاولت ألقى وسيلة اتصال بيكى لكن و الله ما لقيت درب شاكر مرورك الكريم و الاطراء و بى حضورك يطيب الحديث عن عطبرة و اهل عطبرة و تحية خاصة للاميرة بت السيد و قولى ليها فاقدنك و من هنا بهديها زهرة سوسن لو تعدل مزاجا
رمضان كريم يا منى . ألف شكر علي باقة الورود، ألف شكر، أنا لو فضلت اكرر ليكي عبارة ألف شكر طول عمري لن اوفيكِ حقك، بوست تخريج فطومة لوحده يجعلني اشعر بالعجز . إنت إن شاء الله لا تموتي لا تفوتي، ولك مني ألف شكر ...
Quote: تعرف يا قبانى .. ود المدير ده لامن كتب تلاتةايام فى ام قنيفيطة كان مدخله للقصة الزبالة و الزبالة يا ود قبانى لىهو معاها مجاهدات زى ما بقولوا ناسكم اليومين ديل خاضة و السيالة و عموم بيوت عطبرة ليها من الزبالة نصيب وافر يا ود المدير اختيار المدخل ده كان صدفة ولّ شى مربوط بى مواقف اخرى
ههههههههههههههههههه، ذكرتني شهاب عبد العظيم . شهاب عبد العظيم زول جميل وفيه شئ من الدروشة، دخل معاهو صديقي التاج عبد السيّد في نقاش حاد حول الزبالة، عجنها وتخميرها وخلطها بالتِبِن والكركجيّة، ثم جلطها ومواسمها، وكِت التاج عصر علي شهاب شديّد، شهاب قالو، يا التاج كمان داير تغالتني انا في الزبالة !، أنا ود الزبالة، كان ماك عارف أعرف . دحين يا جلال أنا ود الزبالة . اتبرا مدينة تِنشمَّ، ؤ زي ما قال عكير الدآمر في شأن الشعر، الشعر أصلو كلمات في القلب تتلمَّ و عند الحوبة زي بلح استوى و اترمَّ ننضما زي عقد على بعض تنضمَّ و تصبح بكره طيب و الفيهو طيب بنشمَّ
والزبالة أو (الكِرِك) ريحتو عندنا ولا العطور الباريسية وهي عابقة في حِيط عطبرة، وإختيار الزبالة كمدخل في قنيفيّطة لم يكن صدفة رغم إنّو قنيفيّطة كانت ونسة مباشرة من الكي بورد للشاشة لكني حشدت فيها حشد كبير من الممارسات في حلآل لي معها إرتباط وثيق ولها تعلُق مباشر باتبرا، فكانت قنيفيّطة كوّم إشتياق لزمن مضى وامكنة ومحلات ما زالت وستظل في الخاطر، إشتياق لأتبرا ؤ خليوة، ؤ دار مالي، والفريخة، والضانقيل، ؤ كنور، والسعدابية، ؤ بربر، والعبيدية، والبادراب، ؤ كدباس، والقمبرات ؤ ود الفكي علي، ؤ باوقة حمد واللميّن، وارتولي، ؤ حتي مبيريكة كمان . صدق شهاب، فالزبالة في حد زاتها فن ؤ فن ليهو تحضيراتو من لقيّط بعر الحمير، وخلطه بالتِبِن والكركجيّة (طين البحر)، ثمّ ريّه بالمويّة وقفله لمدة يومين تلآتة، ثمّ قلبه وقفله مرةً أُخرى، أها بعد الزبالة تخمر بتجي مرحلة جلط الحيّط، وكان ما كنت زول مُبدع ؤ حريف بتصوّط الشغلآنية بتسوّطا، والزبالة بعد يتم جلطها في الحيّط بيكون شكلها جميل جداً بالزآت لآمن تبدأ تنشف، ؤ تكون منها بُقع ناشفة ؤ بُقع ما زالت ليّنة، بتعكس لوحة تشكيلية تستعصي علي أبرع التشكليين . لآمن يجي الخريف وينزل المطر فوق الحيط المجلوطة بالزبالة بقى هنا بتكون في ريحة فايتة خُمر الفوق أردافها مجدّع، وأنا والله اشتاق لهذه الرائحة وانا في غربتي، اشتاق لريحة بيتنا ؤ بيوت الجيران، اشتاق لريحة حِلتنا ؤ لريحة اتبرا ...
Post: #49 Title: Re: ► دردشة رمضانية ◄ معاوبة المدير Author: زهير عثمان حمد Date: 06-01-2017, 12:59 PM Parent: #48
تحياتي لكل من جلادونا وود المدير وكل الاماجد الذين عبروا من تحياتي ورمضان كريم تعرفوا الالفة في هذا مفقودة وأنا سعيد بهذا البوست الذي يعبر عن أواصر ود عميقة بينكم وأهدي هذا النص للجميع
Post: #51 Title: Re: ► دردشة رمضانية ◄ معاوبة المدير Author: عزالدين عباس الفحل Date: 06-03-2017, 08:57 AM Parent: #50
من لا يعرف انو ود المدير راجل تبي وصلاي كل ما اضرب ليهو تلفون يقول لي يا الفحل انا منتظر صلاة الفجر لو ما صليت الفجر حاضر ما بنوم. إضافة الي
Post: #52 Title: Re: ► دردشة رمضانية ◄ معاوبة المدير Author: عزالدين عباس الفحل Date: 06-03-2017, 09:04 AM Parent: #50
من لا يعرف انو ود المدير راجل تقي وصلاي. و من أسرة متدينة . كل ما اضرب ليهو تلفون يقول لي يا الفحل انا منتظر صلاة الفجر لو ما صليت الفجر حاضر ما بنوم. يا الفحل. إضافة الي الوجه الطلق البشوش والمدير انسان كنز افتخر به دايما وزي ما قال واحد بعد ود المدير ما عايزين دردشة. بعد القمة مافي شي. كفي. كل سنة و الجميع بخير *** مداخلة من الآيفون
ياسلام يامعلم بداية في محلها ود المدير ود بلدتي شهادتي فيه مجروحة زول كلس ونيتو صافية - كان جنو سينما وكورة ياريت يستحصر لينا مواقف طريفة في الحتة دي تحية لك وله ورمصانكم كريم
يا اخوي محمد الشيخ مادام انت بتعرف باوقة حمد والامين فده معناه انك من الانقرياب او العبدلاب ولازم تكون اكلت من فواكه الباوقة في دكان بابكر عبد السيد في عطبرة... ومن تعليقك بعني نعرف ان ود المدير العطبراوي اجداده من ملوك الباوقة وبربر..!! وكل سنة وانت طيب ودمت بالف خير وصحة وعافية
مرحب بالاميرة بسمات ابنة عطبرة البارة. عمك او اخيك ان شئت من منطقة الباوقة وحلة فتوار على وجه التحديد والانقرياب اهل الوالد والباوقة امنا الرؤوم. خبرناها من الطفولة بيت بيت وحفرة حفرة. وعطبرة طبعا وجهة التسوق والفول الكارب والسمك الشهير ومكتبة دبورة والسينما الجمهورية وحليمة ماضي وبولمنات الدامر. تشكري كثيرا ورمضانك كريم ومرحب بعودتك للمنبر
طيب اذا كان كده يا محمد الشيخ باسأل عن اسرة آل حمزة ما شاء الله اسرة كبيرة من الباوقة فى الدروشاب بس عندهم على حسن حمزة و فاطمة حسن حمزة و المرحوم حسن البشير حمزة الناس ديل معرفة و جيرة من السبعينات و نحنا شفّع و لا يوم الليلة معرفة تشّرف و الله
نسال الله الرحمة للاعمام حسن البشير ومحمد حسن حمزة واخينا عبدالمنعم ديل اهلى دم ولحم المعنى ياجلالدونا انت ياقدر المرحوم محسن اوبشير فى اجازتى السابقة كنت فى زيارتهم
سلام المحترمة بت عبد الله ، بصراحة ود المدير ، رجل ترفع له القبعات ، كل سنة و إنت طيبة ،
،،،،
Quote:
والله يا ود المدير شهادة عز الدين عباس الفحل فيك شهادة تقدير كبيرة جدا ومفروض تجي تشكره من الاعماق...واظن ليك محبة كبيرة وسط اعضاء المنبر يعني ماسك الدنيا والاخرة ما شاء الله...واللهم لا حسادة...وانا متاكدة انهم جميعا لم يقولوا الا الحقيقة،،، ومداخلاتك وتعليقاتك السابقة لم نر فيها ابدا ما يشين او تعدي على احد...فيكفي انك تشع المرح والفرح في هذه الدنيا المليئة بالماسي والاحزان... وما دام البوست مستمر فنسالك نفس السؤال الذي سالناه لعبد الحفيظ ابو سن،، هل انت تتدخل في خيارات ابناءك في تخصصاتهم الدراسية؟ يعني بنتك الكبيرة الاختارت تقرا قانون هل انت فرضت عليها تقرا قانون وهي كانت دايرة تقرا طب...؟ واذا عاد بك الزمن للوراء هل كنت ستسير في نفس الطريق الذي تسير فيه الان؟ مع وافر التقدير والاحترام
إمتثال عبدالله ،،، [/B ]
عزالدين عباس الفحل ابوظبي
Post: #65 Title: Re: ► دردشة رمضانية ◄ معاوبة المدير Author: علي دفع الله Date: 06-04-2017, 10:04 PM Parent: #64
هلا ود المدير هلا جلالدونا و الله ود المدير يستاهل تتفتح ليه مية نفاج لانو زول جميل وحكاي وعندو دارجية نضم تشهيك الونسة . كان عندي فكرة افتح بوست للثناءيي ود البوش وود المدير لانهم اكتر اتنين بذكروني بي ثناءية حميد -قدال .. ود البوش -ود المدير حكاوي حميد -قدال شعرا .. ----------- ود الفحل يا اخي شوف ليك جوانب تانية غير حتة صلاة الصبح وصلاة الضحى دي... الزول دا فيه جمال اكتر من حصرو في عبادة بتخصو هو فقط !!! وبالمناسبة برضو عمر البشير وبكري واللمبي وعلي عصمان وحاج نور والكاروري ومحمد عطا وقوش كلهم بصلوا ..
طيب يا جلال دونا اجيك من الاخر علي حسن همزة متزوج من شقيقتي فاطمة. الباقي تمو براك ورحمة الله على عمى حسن البشير ومتع العمة فاطمة بالصحة والعافية. طيب بتعرف ناس الدرديري؟
Quote: طيب يا جلال دونا اجيك من الاخر علي حسن همزة متزوج من شقيقتي فاطمة. الباقي تمو براك ورحمة الله على عمى حسن البشير ومتع العمة فاطمة بالصحة والعافية. طيب بتعرف ناس الدرديري؟
امنتووووووو بالله كيف ما بعرف عم الدرديرى يا حليل ايامو الفى شونا و حكايات رحلاتو مع النميرى شفت بيت عمّك المرحوم حسن البشير . البيت المقاصدو طوالى ده بيتنا القديم فى البيت ده هاشم اخوى اتزوج بت عمك المرحوم حسن .. اخلاص .. و عندو منها محمد و شذى و مصطفى و على حسى حمزة خال الاولاد ديل فاطنة قبل الزواج كانت قاعدة مع ناس عمى الدرديرى يا زول كان كدى نحنا بقينا اهل و جيرة بلا ود المدير بلا بتيخ ود المدير قوم جيب شاى
معا.ية المدير ،،جلالدونا اطيب واندي التحايا ليكم ولي ضيوفكم الكرام وكل رمضان وانتو بخير
Post: #69 Title: Re: ► دردشة رمضانية ◄ معاوبة المدير Author: MOHAMMED ELSHEIKH Date: 06-05-2017, 08:08 AM Parent: #68
Quote: منتووووووو بالله كيف ما بعرف عم الدرديرىيا حليل ايامو الفى شونا و حكايات رحلاتو مع النميرىشفت بيت عمّك المرحوم حسن البشير . البيت المقاصدو طوالى ده بيتنا القديمفى البيت ده هاشم اخوى اتزوج بت عمك المرحوم حسن .. اخلاص ..و عندو منها محمد و شذى و مصطفىو على حسى حمزة خال الاولاد ديلفاطنة قبل الزواج كانت قاعدة مع ناس عمى الدرديرىيا زول كان كدى نحنا بقينا اهل و جيرة بلا ود المدير بلا بتيخود المدير قوم جيب شاى
ههههههههه عرفتك يا مجرم يا هارب انت اخو هاشم وفردة مجدي ؟ حولاااااااااااها الدرديري خاليوعم ود المديراتدبست عدييييييل كدى
بعدين تجي اجازة تكسر الشاشة بتاعة كبس وتزوق بدون تعويض؟
منتووووووو بالله كيف ما بعرف عم الدرديرى يا حليل ايامو الفى شونا و حكايات رحلاتو مع النميرى شفت بيت عمّك المرحوم حسن البشير . البيت المقاصدو طوالى ده بيتنا القديم فى البيت ده هاشم اخوى اتزوج بت عمك المرحوم حسن .. اخلاص .. المصد الاخ جلاادونا لك تحباتى المعنى الحكاية اتعدت الجيرة وبقينا نسابة
Post: #70 Title: Re: ► دردشة رمضانية ◄ معاوبة المدير Author: عزالدين عباس الفحل Date: 06-05-2017, 08:50 AM Parent: #65
الأخ علي دفع الله ياخي أولا كل سنة و انت طيب و بشكرك حتي تستغيث. علي المداخلات الناعمة الدسمة محبة القامة ود المدير زولا ما ساهل تب. ربنا يجعلنا في زمرة أهل الصلاح والفلاح و اكرر الثناء المعتق عسلا.
Quote: شايف ودالمدير من ضربت البداية جاب سيرة البحر
لا بُدّ من سيرة البحر يا ود اللمير، فأنا وِلدوني فوق قيفتو ؤ شربتَ مِنّو مع النخيل والدباس والوزازين شربناهو صافي ؤ عكران . بريرة الحسين ود الصادق انا ؤ هي شربنا من قيفة وآحدة قصاد جزيرة شيخنا نواوي، ؤ سمعت يآ ابو مروّة ساعت النيل يهيج ؤ يهدد قريتنا الصغيرة أو يهدد الجزيرة ؤ شاهدت ناس الفزعة مِتنفضين علي عجل لآمِن لِحقتَ أنا وبقيت أفزع معاهم . البحر يا ود اللمير جزء لا يتجزاء مني، ؤ هو أصلو بحر ؤ نحن زمنا كلللو يا مِدليين يا سادرين إسم النيل دا عِلآ سمعنابو في كتب الدرآسة ...
كمل جميلك واعمل مقابلة كمان مع ود البوش، صاحب الايادي البيضاء وود شيقوق الذي هجر المنبر العام ونحييهم من هنا ونقول ليهم كل سنة وانتو طيبين...ز ويا ريت كمان تعرج على استاذنا علي عبد الوهاب، وخلي الدردشة الرمضانية مستمرة وتكون مواصلة حتى بعد شهر رمضان.. ودمتم بالف خير وصحة وعافية..
اخونا عماد احمد رمضانك كريم و شاكر مرورك الطيب اخونا معاوية اخد فرضتو فى امل دردشة رمضانية لكن لو الحكايو ما يطلبه البورداب نجيبو ليكم تانى بس انتو اعملو حملة توقيعات و جاهزين للتنفيذ
Quote: حكاويك عن تجاربك يا ود المدير فيها الكثير من العبر والطرافة واللغة الرويانة، يا ريت تتحفنا ببعضها قبل أن يسرقك ويسرقنا الزمن تقبل مودتي وأشكرك على دعواتك الصادقة
ود الزبير يا أعزّ الناس، خباراتك يا زوّل ؟، طمنا عليك . تعرف يا معاوية مرحلة الثانوي العام رغم أنها من أقسى المراحل ؤ فيها ترهيب من غير ترغيب إلآ أنني بعتبرها من أجمل المراحل الدراسية في حياتي . قريت الثانوي العام في مدرسة القومية عطبرة علي يد اساتذة فطاحلة جد، ؤ درسنا الرياضيات الأستاذ صلاح حافظ عليه رحمة الله وكان من أميز اساتذة الرياضيات في المديرية في ذلك الزمان . كنت وما زلت بكره الرياضيات جداً ؤ ما عندي رغبة إتعلما ابداً، ؤ طبعاً زي ما عارف كان في التعليم في قسوة ؤ ضرب عنيف، ؤ صلاح حافظ دا من أوّل يوم جا داخل الفصل هددنا تهديد عنيف ؤ قالنا الضرب بالجزمة وفعلاً دقّ محمد يونس بالجزمة ؤ من يومها دخلتنا خوفة قويّة . أها يا زول انا قلت يا واد مافي حل غير تصحح برآك، لكن المشكلة الكانت مواجهاني إمضت صلاح حافظ حيث كان من الصعب تقليدا، أها يا زول بقيت اشفها في ورقة وادعك ضهر الورقة بقلم الرصاص واطبع الإمضاء في الكراس وأمشّي عليها بقلم التصحيح، ؤ بكترة تكرار العملية دي بقيّت عادي بمضى إمضاء صلاح حافظ من غير اشِفها، ؤ بقى ايّ طالب مزنوق انا بصححلو كراسو زي الترتيب . سنة أُولى كولها الحكاية عدّت ؤ لحدي نُص سنة تانية، حتي يوم ظهرت كراسات الفصل كلها مصححة بقلم عادي ؤ كراسي انا الوحيد المصحح بقلم تصحيح !، ؤ بدت المزآرارة، ورفضت أقر، وأخدت صلاح حافظ حيرة نسبةً لأنّ الإمضاء كانت حقتو تماماً !. مضت أيام والحكاية بقت ماشة بصورة كويسة فجأة ظهرت كل الكراسات مصححة بقلم عادي عدى كراسي انا مصحح بقلم تصحيح !. بقى هنا صلاح حافظ قال لي، شوّف يا ود المدير تقِر تقِر، ما تقِر علي بالطلآق بالتلآتة تاني ما تقرأ في مدرسة في المديرية دي، وكان أقريّت علي الطلآق ما أهبشك . عندها يا زول أقرّيت لأنو الراجل كان جادي جداً . بعد الحصة إنتهت قال لي تعال معاي واخدني معاهو للمكتب ؤ نادى جميع الأساتذة ؤ عمل مسائل وهمية في كراسي وفي حضرة جميع الأساتذة قال لي، أقعُد في كُرسي دا !. يا زول انا حرنت حرنة شديدة خلاس ؤ رفضت اخُت صُلبي فوق الكرسي لكن هو هددني، فإضطريت قعدت في حضرة جميع اساتذتي، وكان موقف صعب لدرجة إني تمنيت لو الأرض تنشقَ ؤ تبلعني . بعد قعدت اداني قلم التصحيح ؤ قال لي، صحح المسائل ديّل وامضى، بعد تردُد صححت ومضيت . إلتفت علي الأساتذة ؤ قال لهم، شُفتُ المصيبة دا !. ثم إلتفت عليّ ؤ قال لي، يا زول إنت حكايتك شنو ؟. قُتلو يا أُستاذ والله بصراحة الرياضيات دي أنا مكجِنا ؤ لا يمكن أكون شاطر فيها ابداً لا بي دق لا غيرو . قبّل علي الأساتذة ؤ قال ليهم، أها قدامكم الزول دا أنا عفيتو من الرياضيات، لكن أكان شفتو بالغلت شايلو قلم تصحيح بكسر رقبتو وكان داير يحضر الحصة اليحضر، وكان ما داير يحضر والله ما اسعلو طالما هو ما عندو الرغبة . دي كانت أعظم حصة انا دخلتها في حياتي يا ود الزبير، الناس ديّل كانوا عظماء . والله صحي ...
تحياتي ود المدير,جلالدونا و الضيوف الاكارم ود المدير من الجميلين و المحبوبين في المنبر بحكاويه الجمبلة و لغته المحببة اتمني من الله ان يديم عليكم نعمة الصحة و العافية رمضان كريم عليكم و علي كل زوار البوست الافاضل
ياود المدير رمضان كريم وربنا يعودك لى ام زهور بصراحة با لواضح ياودالمدير ( اتبرا ويس ) دايرة تقدنا بالوجع ولم ترضينا ابدا ومداخلتنا لى ود النو ان يسلم لينا على اولاد الباوقة ام زهور المعاهو كانت رسالة موجة لك
Post: #79 Title: Re: ► دردشة رمضانية ◄ معاوبة المدير Author: عبد العزيز محمد عمر Date: 06-06-2017, 09:19 AM Parent: #78
Quote: الشغيل ده دحين ما قريبك برضو؟
لحم ودم يا ود قباني .....
ود المدير له من حكاوي الزمن الجميل في عطبرة الثانوية ...
يا ريت لو يعرج عليها ... ويدينا جزء من أسمارهم ....
وبالمناسبة يا ود المدير .. تقبل تحيات الأخ طارق محجوب
Quote: ياود المدير رمضان كريم وربنا يعودك لى ام زهور بصراحة با لواضح ياودالمدير ( اتبرا ويس ) دايرة تقدنا بالوجع ولم ترضينا ابدا ومداخلتنا لى ود النو ان يسلم لينا على اولاد الباوقة ام زهور المعاهو كانت رسالة موجة لك
حباب أهلي، حبابك يا الزاكي . الباوقة كتبت عنها كتابات لا تقل عن اتبرا هنا وفي منتدى الباوقة والذي نحن بصدد بعثه من جديد في القريب العاجل إن شاء الله، كدي هاك اقرأ دوبني جيتك عندي معاكم نضمياً كتير كان الله هوّن .
Quote: تـنـقـورة، ؤحُـمـارة أُمـحُـومـد ود يـأسـيّـن البـيـضـاء... الغربة قطعة من الجحيم. نستنشقها حميم وزفيرها زمهرير. كلما طالت الأيام والسنين في سواءها، رمت بشررٍ كالقصر في مساحات النفس، فأهاجت الحنين وزادت الأنين جراء البعد عن مراتع الصباء ومسارح اللهو الجميل. الحنين للوطن والأهل ورائحة التراب، والمكان، والزمان، ما هو إلا خمر خندريس يزيدها الفراق ولوعته تعتيق. والله إنى ليعتصرني الحُزن والألم وتكتم العبرة أنفاسي، وتحتبس الدموع في محاجري عندما أخرج من المنزل في الصباح الباكر وأجد أثآر المطر التي تكون قد هطلت ليلاً خِلسةً دون أن أستشعر وقعها أو أسمع رعدها، أو يخطف بصري برقها... السوق الكبير في اتبرا. دكان خدر الكعيك، أو دكان المدير ود الشيخ، مُلتقيان أو نقطتا تجمع للأهل قبل التوجه لكلٍ من بربر، العبيدية، أو مُشرع الباوقة. يتركون ودائعهم هناك ويدخلوا السوق لِقضاء حوائجهم، ثم يتجمعوا في إنتظار مواعيد قيام بص العبيدية الذي ليس له مواعيد مُحددة، إنما يبدأ الرحلة بإكتمال جمعهم، وينصاع سائقه لِرغباتهم وطلباتهم... : عليك الله، غشنا دار مالي النسوق البِنيات معانا. : هوي يا ولدي، هوي لاتنسنى بعدين بدور لي سِميكات من مولود في بربر. : عليك الله غشنى ناس فلان في القدواب، عندى عندهم غرد. : يا ولدي لاتنسى وصيتى ليك، حِويجاتي الفى القمبرات. : أو يكون في بِكاء في عنيبس. كل البص يغشو بى سواقن. السواق يلبى الطلبات في صبر غريب، والركاب أكثر صبراً من السواق مستمتعين بالونسة والتعليق. كثيرأً ما حملني هذا البص لمشرع بنطون الباوقة برفقة هاؤلاء الناس الطاعمين، أتحمل معهم عناء ومشقة الرحلة. أستنشق رائحة الدخان المنبعث من البص وما زال أزيز ماكينته يدغدغ سمعي. هناك تعامل مباشر مع الناس، وإلفة غريبة بيني وبين هذا البص العجوز الذي يضعنى فوق المشرع بعد أن يكون قد إستنفذ طاقته كلها. ما أن يقترب البص من المشرع، حتى تلوح الباوقة في الأفق البعيد. جنّة مُدهمة، تبدو وكأنها على ربوة للناظر أليها من الشرق لِعلو القيفة. فوق المشرع يتواصل التعامل المباشر مع الناس والطبيعة. ندخل الرواكيب، نشرب الشاي ونروى ظمأنا من الأزيار التي قد دُفِن نصفها في الأرض ونبتت النجيلة في أطرافها، ونترقب وصول البنطون، الذي بمجرد وصوله تسمع: : يا زول أوّعَ السِقالة. : عليك الله يا جنا تعال نزّل معاي كراتين المنقة ديل. : يا ناس ده شنو ده؟ ماتخلو اللوري ده ينزل. وهكذا... الأمواج تتلاطم على الشاطئ و(بدير) يحلق في الفضاء ونظره الحآد موجه للماء في حالة تأهُب للإنقضاض على سمكة، ولايخلو الشاطئ في فصل الشتاء من (أُم قيردون) تركض خلف الحشرات الصغيرة وتلعب بذنبها، وفجاة تطير مصحوبة رفرفة جناحيها بصوتها الجميل المألوف... يشق البنطون عُباب النهر للضفة الغربية فتطأ أقدامنا أرض قريتنا الحبيبة، فنواصل مشوارنا سيراً على الأقدام متجهين شمالاً مع مجرى النيل في شارع ضيّق وسط غابات النخيل وحيضان البرسيم ونبات الحلفا الحآد الجوانب. نسمع شقشقة الطيور وقوقاي الدباس فينداح في أسماعنا كأحلى (سيمفونية)، ونستنشق عبير نوار الليمون والبرتكان فيضاهئ أفخم العطور الباريسية. نتعايش مع الطبيعة مباشرة، نحسها في كل شئ ونلمسها في كل الأشياء حولنا. نصل ديار الأهل، نطايبهم ويطايبونا، نستقصى أخبارهم ونبثهم أخبارنا. القرية يلفها الهدوء الذي تخترقه أصوات الطبيعة من حين إلى حين فتسمع نهيق حمار، ثمّ بعد صمت خوار ثور في الجزيرة، قوقاي القماري وأصوات العصافير تطرق سمعك من حين إلى حين، مرور النسيم العليل يأتيك بوشوشة جرايد النخيل. الطبيعة تحادثك وتناغمك، تتحدث اليك وأنت تصغى إليها. حمارة أُمحومد ود ياسين البيضاء في مربطها، يعرفها جميع ناس البلد كأنما هي فرد منهم، وتنقورة حمارة العوض ود حاج الخليفة أكثر شهرة منها. أعلام في البلد يتعامل معهن الناس بإلفة ومودة كأنهن فلذات أكبادهم. إذا أصاب إحداهنَّ مكروه يحدثوك: تنقورة الليلة عيانة. أو البيضاء البارح قرصانة، ولا يهداء لهم بال حتى ينعمن بالشفاء. الطبيعة وحيواناتها ونباتها تتجاوب معنا. تمرهندي ونبق (السِت) قطوفُه دآنية لايبخل علينا بشئ ، وقد علّقت (أُم دال دلو) أعشاشها في أطرافه كما النجف. (السِت) كانت تدفن علب اللبن في الأرض وتملأها بالماء حتى تشرب منها السحالى الهائمة في فناء دارها. تلحظنا دائماً ببسمة كانت مطبوعة على مُحياها الجميل. في اليل عندما نستلقى فوق العناقريب في الحوش يتجلى القمر بينات الضفائر فنناجيه ويحكي لنا عن سنين مضت، وناس سمحين قد عمروا الديار ثمّ مضو ليتركو بصماتهم على أشجار النخيل الباسقة. في اليل عندما نذهب للنيل ينعكس القمر لُجيناً على صفحته، مغازلاً المياه الرقراقة والخُضرة المنبسطة على الضفاف. أصوات الهوام والحشرات والحيوانات المتوحشة لاتخطئ سمعك، الصمت في ظلام اليل البهيم يهمس للأحاسيس حتى تستشعره كائناً حي يسكن في أغوار كهوف النفس. الطبيعة بكلياتها تجاذبنا أطراف الحديث، تلمس أحاسيسنا وتملاء نفوسنا إلفة وخوف، فنستشعرها في كُلّ الأشياء ونظل دوماً نتجاوب ونتفاعل معها. نسمات الفجر تدغدغ أرواحنا، فتصحينا فجراً لِتصحى معنا الطبيعة بكلياتها، آذان الفجر، صياح الديكة، تغريد العصافير، النبات يفلق الأرض ويخرج للفضاء الرحب، قطرات الندى تبلل ثغور الزهور الباسمة، أصوات الحيوانات أصوات الأهل في صباحات فجر جديد. الطبيعة تتناغم وتتفاعل في أبهى وأجمل صورها مع إشراقات الصباح الباسم. نودع الأهل والأحباب ونقفل راجعين إلى اتبرا ( المدينة القاطرة ). صافرات الوابورات وأزيزها لايخطئ سمعنا، حركة العمال الدءوبة، العجلات، الروح الإجتماعية العالية. عطبرة مدينة في هيئتها وقرية في تعاملها وإجتماعياتها. الطبيعة تحشد جيشها بسحب دآكنة يحدوها صوت الرعد مزمجراً في الفضاء، وبرق ينير لها الطريق يرشدها إلى مكان مدينتنا الحبيبة. ثمّ نبداء في الإستعداد كي نصد هجمة الطبيعة الجاسرة. نخشخش السباليق، ونفتّح المجاري، ثمّ نضاير كلنا في أوضة وآحدة حتى القطط والبهائم. كلنا في إتصال مباشر مع الطبيعة التي تمطرنا بوابلها وعندما يشتدّ وقعه علينا تسمع الحبوبات يجأرن بالدعاء ونده الأولياء الصالحين، ثمّ تهداء بعد أن تكون قد خلّفت سيول جارفة لاتستطيع بعض حيط الجالوص الصمود في وجهها فتستسلم. يبداء الناس في تفقد أحوال بعضهم البعض، وفتح المجاري مباشرةً لنهر النيل. النيل نفتقده كثيراً في الغربة، طبيعته الساحرة ومناظره الخلابة. الغربة عبارة عن مُدُن وآجمة وبلاد جآمدة مدلول الصنعة فيها يطغى على جمال الطبيعة. أكوام من بنايات الأسمنت الشاهقة والأرض المسفلتة، والأنوار الباهرة، الجو الخانق المحشو بدخان عوادم السيارات. الغربة ليست بها سماء، فالسماء قدحُجبت بسبب الأضواء الصارخة، وصوت الطبيعة إبتلعه زخم الغربة وهرجها ومرجها. بلاد الغربة بلاد مسعورة لاترحم، لذلك لاتترك لك مجال للتفكير والتأمُل. فهي دائماً سالبة للأفكار بهمومها ومتطلباتها التي لاتنقطع. الغربة ليست فيها أرض، فالأرض قد حجبتها طبقات الظلط والزفت فمنعتها تتنفس وتنتشي عندما يصيبها وأبل أو طل. لذلك ليست هناك خيوط أشواق وحنين تشدنا إليها، أو رائحة تراب تهيج الحنين في نفوسنا لأحضانها . نتمنى دوماً أن نفلت من براثنها وأن نخرج من تحت حُطامها. للوطن رائحة تسرى في دواخلنا فيجرفنا الحنين ويطول بنا الأنين فنتكئ على أحزاننا في الغربة ونحلم بالرجوع لنعانق الطبيعة في براحات الوطن الحبيب... ود المدير ...
Quote: طيب اذا كان كده يا محمد الشيخ باسأل عن اسرة آل حمزة ما شاء الله اسرة كبيرة من الباوقة فى الدروشاب بس عندهم على حسن حمزة و فاطمة حسن حمزة و المرحوم حسن البشير حمزة الناس ديل معرفة و جيرة من السبعينات و نحنا شفّع و لا يوم الليلة معرفة تشّرف و الله
ا يا سلام عليك وعلى بوستك وضيوفه الكرام بسوت جاب سيرة الأخوال حسن البشير ومحمد حسن حمزة وعلي حسن حمزة وعمنا الدريري وفاطمة وفاطمة ( نسيتوا بنت وهب ) ، أكيد يا جلال اتقابلنا في بيت الخال حسن رحمه الله أو في برش رمضان ما كنت أغيب عن بيتهم أكثر من أسبوعين أيام الدراسة في الجامعة . التحية من هنا لجميع أفراد الأسرة ورحم الله الأخوال محمد ، وحسن ، وأحمد.
أبنا الأخوال محمد الشيخ والزاكي لكم التحية ورمضان كريم .
العصبجية ود الشيخ و المغيرة و ود ديقول تحياتى ليكم اجمعين معقولة دى بيناتنا الحاجات الحلوة دى و ما عارفين بعض برش رمضان يا ديقول بدا من 1974 بيتين بس بعد شوية انضم المرحوم محمد بعد زمن على الرياطابى ثم الدرديرى الزهرة بت العمدة رحمة الله عليها و فاطىة بت الباوقة متّعها الله بالصحة و العافية ثم جات عليهم بت وهب لاحقاً ما جرت بيناتن الا الموده و المحبة ___ عيييييك حكاية التلفزيون دى قديمة خلاس الحكاها ليك منو الواد قال جاب شاشة فلات كسّرتها ليهو زى السلام عليكم هو التلفزيون الابيض و الاسود عندى حرام يقوم يجيبو فلات و ملّون __ ياخى مجدى ده اكتر زول مستنكح فى الدنيا دى غايتو ما عافى ليهو حقى فى الدنيا دى __ يا المغيرة دى علاقة فاتت اى حد فى مشيتى الاخيرة دى لى وفاة الوالدة لقيت الرجال واقفين فى الشارع واجبونى و قعدنا فى شارعنا بعد شوية سألت من بت الباوقة ,, قالوا في بيتا دخلت عليها قبل ما ادخل بيتنا ... برضك هى امّنا و ليها حق كبير علينا متّعها الله بالصحة و العافية
يعني البوست دا نخليهو ليكم يا ناس الباوقة ؤ نسابتُن واللآ شنو !.
Post: #89 Title: Re: ► دردشة رمضانية ◄ معاوبة المدير Author: MOHAMMED ELSHEIKH Date: 06-07-2017, 07:07 AM Parent: #88
مصيرك يا مدير مصير التكاوين. التكاوين قرية كبيرة جنوب الباوقة وتسكنها قبيلة تابعة للجعلين. في منطقة الجول شمال بكوالى ١٧ كلم يوجد فرع للتكاوين حوالى ستة او سبعة اسر. منذ الثمانينات بدات هذه الاسر في الرحيل للتكاوين الام حتى اتكاملوا هناك. ابراهيم عبدا علق بعد ان سالته عن اخبار ناس الفكي ودهاشم(وهم تكاويين) فرد بانهم " رحلوا ارض الميعاد" وانت يامدير مصيرك ارض ميعادك ام زهور
ود الشيخ ود المغيرة ود المديرولاد الملوك أسياد الوادي ذراري الصقر المجنح بالسيوف ترباية بنات كورينا ستات حجر أم بلة والجزائر الخضراء جلالدونا وبقية الرهط الجميل كان مني منكم اقعد في نصكم إلا الدماغ قاعد على بساط الريح ذاك القعاد الهادي ومريح محل يودي يودي وقت ما يعدي يعدي يزور الديار دار دار ( وبلغة بحر أبيض زنقة زنقة ) ويا حليلها دار مكلية والولية إلا يا ولاد الحلال الحي بلاقي ... في منبع الجمال بلاقي في حال مثل هادي أحوال بلاقي
كسرة:-شايف جلالدونا وجد الكنز بتوهطة عند ناس حمزة
بسمات: -بابكر عبد السيد خالي
Post: #91 Title: Re: ► دردشة رمضانية ◄ معاوبة المدير Author: حسين ديقول Date: 06-07-2017, 09:08 AM Parent: #87
Quote: العصبجية ود الشيخ و المغيرة و ود ديقول تحياتى ليكم اجمعين معقولة دى بيناتنا الحاجات الحلوة دى و ما عارفين بعض برش رمضان يا ديقول بدا من 1974 بيتين بس بعد شوية انضم المرحوم محمد بعد زمن على الرياطابى ثم الدرديرى الزهرة بت العمدة رحمة الله عليها و فاطىة بت الباوقة متّعها الله بالصحة و العافية ثم جات عليهم بت وهب لاحقاً ما جرت بيناتن الا الموده و المحبة
صباحكم زين جلال وضيوفه تعرف يا جلال كنت مفتكرك من نواحي أم الطيور طوال هذه الفترة. الأخوال محمد حسن حمزة وحسن البشير كانوا أخوال وأصحاب ولا تمل مجالستهم أبداً ومن محاسن الصدف دراستي في كلية الاداب حيث عمل الخال محمد فهو خير من يحدثك عن كلية الآداب بحكم علمه الطويل فيها رحمه الله أما الخال حسن فكان في أي جلسة يديك معلومة جديدة
بسمات: -بابكر عبد السيد خالي QUOTE >>>><>>><>>>>>>>>> المسافر بابكر عبد السيد بيعتبر من رموز عطبرة ومحبيها ، واخبرني والدي انه كان لا يشتري الفواكة إلا من دكانه ،،،، وانت سميت نفسك المسافر أن شاء الله ما تكون سافرت من نواحي عطبرة والباوقة وبربر.. ورمضان كريم ودمت بالف خير وصحة وعافية
ملحوظة: الحاجة الغريبة انه وعلى الرغم من ان الحديث الآن يدور حول الباوقة واهلها لكن ود الباوقة ما ظهر حتى الآن، مع انه اعتكاف شهر رمضان بيبدأ في العشر الاواخر من شهر رمضان، ويا دوبك انتهينا من الثلث الأول..
