م ع الصحة بكوستي ليته صمت

09:15 AM May, 24 2017

سودانيز اون لاين
عبدالحفيظ ابوسن-no where
مكتبتى
رابط مختصر

الخرطوم: سعاد الخضر
سخر مدير عام وزارة الصحة بولاية النيل الأبيض د. بابكر أحمد المقبول من تحميل الحكومة مسؤولية الوفيات التي حدثت بسبب الإسهالات المائية وأقر في الوقت نفسه بأن ما حدث يمثل وباء وحالة طوارئ وقطع بأنها ليست كوليرا وقال في نفيه لمسؤولية الحكومة عن الوفيات (هذا حديث غير منطقي الحكومة لا تمنع الموت والذين ماتوا بالوباء اعترفنا بهم وأعلناهم). وأضاف (بقولوا ربنا يحاسبكم خلوا ربنا يحاسبنا لو كنا مذنبين جاهزين للحساب ولوكنا بريئين نحمد الله على ذلك وأقر بأن المواطنين في ولاية النيل الأبيض كانوا يشربون مياهاً ملوثة وأكد أن ذلك يحدث بشكل موسمي لشح المياه وقال في حوار للجريدة ينشر بالداخل في كل السودان عندما تحدث ندرة وشح يلجأ المواطنون لشرب مياه غير آمنة ونظيفة إلا أنه أكد أن المواطنين الآن يحصلون على مياه نظيفة ومجانية، وحول إمكانية القضاء على الوباء قال مقبول: (ولوكنا شاطرين أو كنا محظوظين فستنتهي الإسهالات خلال 8 أسابيع الى 10 أسابيع ولن تنحسر الإسهالات بين يوم وليلة ووصف الأوضاع الحالية بالهادئة وأكد أنها تحت السيطرة وزاد: نحن الآن في كل أسبوع نسير نحو الأفضل ولن نقول إن الوباء انتهى إلا بعد 15 يوم من عدم ظهور أي حالة إسهال والآن يحصلون على مياه نظيفة مجاناً ولن نعلن انتهاء الوباء إلا بعد 15 يوم، ونفى المقبول تقاعس الولاية عن علاج المواطنين وقال هذا غير صحيح، الوزارة اتخذت القرار المناسب في الوقت المناسب وقامت الولاية بإغلاق مضارب المياه الملوثة ووفرت البديل على نفقة الدولة، واعترف بعدم أكتشاف الوزارة لأسباب انتشار الإسهالات المائية بالولاية بخلاف المياه الملوثة وقال: هذا يأخذ منا وقتاً، فالعلاج ظاهر في المرحلة الأولية والهدف منه إنقاذ الأرواح وزاد لو: (أي زول حققنا في سبب إصابته قبل علاجه فسيموت لذلك نحن نلتزم بالعلاج، ونحن نأخذ عينات ونقوم بإرسالها للخرطوم، وفي حالة الطوارئ يمكن الاستغناء عن ذلك ونأخذ عينات مختارة .

الجريدة

اشكرك يا ابا سن على ايراد الخبر ..

نسأل الله سبحانه و تعالى ان يحمى اهلنا من هذا المرض ..

تسلم قريمان
وكتر خيرك
ما عندي مزاج هسة
الجو سخن نار بس
بجي راجع لتفكيك الخطاب
والسخرية منو زي ما سخر مننا

يااب سن
المسول البتكلم دا هو وباء اخطر من الكولرا

اتمحنو زيادة
اقوال صحف اليوم
وزارة الصحة بالولاية

الاسهالات وباء وليس كارثة

وَباء : (معجم الرائد)
(اسم)
1- مصدر وبؤ ووبىء
2- كل مرض عام ، كالجدري والكوليرا وغيرهما ، جمع : أوبئة

الكارِثَةُ : (معجم الوسيط)
الكارِثَةُ : النازلةُ العظيمةُ والشدَّة. والجمع : .
كوارثُ. يقال: كَرَثَتْه الكوارثُ: أَقلقته.

عطلو القانون الجنائي
فالقاتل حقق مشيئة الله
الموت من الله

"""وأضاف (بقولوا ربنا يحاسبكم خلوا ربنا يحاسبنا لو كنا مذنبين جاهزين للحساب""""
>>>>>>>>>...............................
::::::::::::::::::::::::::::::::::::::::::::::::::::::::::::::::::::::::::

عبد الحفيظ ابوسن وضيوفه الكرام ،،

كل سنة وانتو طيبين،،

المدير العام ده بيؤكد انهم جاهزين للحساب اذا كانوا مذنبين...

فطبعا هم عارفين نفسهم مذنبين ، واكن للأسف هم ما مصدقين ان هناك يوم حساب، او يرونه بعيدا

جدا،،،، ولكن لا يعلمون انه ربما كان قريبا جدا،،

فإذا كان الوباء بمثل هذه الخطورة فيجب ان تتدخل الحكومة المركزية وتعلن حالة طوارئ لهذه الولاية

وتوجه كل الموارد لمكافحة الوباء، وان تقوم بمحاسبة المقصرين في اداء واجباتهم وتحميلهم المسؤولية

مثل هذا المدير العام...

مع وافر الاحترام

Quote: المسؤول البتكلم دا وباء اخطر من الكوليرا

ههههههههه ضحكتني وانا متأزم ..

اهو ديل اسباب البلاء زاتهم.
ياالاسمك وزير انت
حاصروا الوباء دا قبل ما ينتشر اكتر من كدا.
دا استهتار بس منكم

جاهزين للحساب يعني مردف ولا شنو
استخفاف شديد
الملاحظ خلو قوله من التعاطف

سخر
والحكومة لا تمنع الموت
عيب ياخ وانت دكتور
الناس بتجيك عشان تمنع منهم الموت يعني . طيب قفلوا عياداتكم واغلقوا كليات الطب
وقولك دة فيهو خلط مقصود بين الدين وتقصيرك عن اداء واجبك
نعم يدركنا الموت ويدركك .. يدركنا في بيوت طيننا وانت في قصرك المشيد
الحكومة لا تمنع الموت ولا تمنع موتها نفسها ان كان مثلك علي قمة وزارتها
ا

يقتلون الناس كمدا
وبالاوبئة
ربنا يلطف..بكم من وباء الكوليرا
ومن وباء هؤلاء
ابوسن كيفنك

المسالة تتخطى عدم الكفاءة .. هذه بلادة بمعنى الكلمة .. وهذا استهتار سخيف جدا ووقاحة وبذاءة و ....

الحكومة عاد ما مسؤولة كيف لكن
وانت قلت بعضمة لسانك ماتوا بالوباء
الوبا دة مسؤولية البكتريا طبعا
البكتريا زاتا ما مسؤولة
البكتريا جابها الله
وحقو نحن نفرق بين الوباء والكارثة
للأسف ان يصدر مثل هذا التصريح من طبيب دعك من مسؤول
طبيب يفترض ان يكون درس في تعليمه الاولي معني طبيب وطب
الطبيب يقتل الالم
تعبير انجليزي مترجم قرأناه في الثانوي العام
the doctor is the who kills the pain
ما تمنع الموت لكن اقتل الالم .
والآن انت تسبب ألمين
تقصيرك في واجبك
وتصريحك المؤلم والمستفز
الحكومة مسؤولة مسؤولية مباشرة عن الوباء بتردي صحة البيئة
ومسؤولة مسؤولية مباشرة ثانية بجعل المرض يتفشي بنكرانها وعدم التعامل الجدي والمهني
النوريك انا الما دكتور حالة كلويرا واحدة تعتبر وباء إذا لم يتم احتواءها ووضع المحاذير من اختلاط الحالة مع الناس .
نحمد الله ان المرض يستجيب للعلاج
يعني لو كان فيروس ما بكتريا كان قرضنا قرض

وأكد سيادته ان المواطنين كانوا يشربون مياها ملوثة
عليكم الله شوفو التصريح الكارثي دة
رش وزارتو ورش ناس الموية ورش الوزير المركزي في تصريحه
يعني شنو
يعني انت بتعترف بالتقصير المن صميم واجباتك
الموية ملوثة وانت قاعد تعمل شنو
ورينا عملت شنو
ملوثة بي شنو
عرف لينا التلوث بعد خلطك المريع دة دايرين نعرف بتقصد شنو
وكارثية تصريحك دة بتعني حاجة واحدة اننا موعدين بأوبئة تانية . فتلوث مياه الشرب ممكن تعمل كم مرض . وانت طبيب بكون درست دة ولا ..
وموسميا دي مش عشان الخريف . الخريف ليس مسببا للاوبئة سيادتك
الخريف دة في كل العالم فصل الانتاج
واكيد بتتذكر
هلا الخريف وهلا
اهلا به وسهلا
الخريف كارثة عندنا لتردي صحة البيئة واللي هي مسؤوليتك المباشرة ومسؤولية الدولة
الخريف لو كانت البلد نضيفة ما حيجرف القاذورات ويوزعها
لو كانت القنوات فاتحة للتصريف ما كان المياه اسنت وسط الاحياء .
واذكر سيادتك طبيب ان المياه الاسنة ولا خلينا نقول الراكدة عشان ما نخش في جدل وباء و كارثة
المياه الراكدة بيئة صالحة لتوالد الباعوض والذباب والبكتريا
اها ما تقوم تخش لي في الوسط البكتيري لانسان الولاية وكدة
تصريح اننا عادي بنشرب موية ملوثة حقو نبروزو ونحفظو والله
ارجو انو الحكومة ما تغالطنا لو تحدثنا عن تلوث مياه الشرب تاني

الان المواطنين يحصلون علي مياه نظيفة وامنة ومجانية
شوفو الكلام دة
وين يا عمك مجانية
وليه طول السنة بنحصل علي مياه ملوثة وهسة فجأة بقت آمنة
فترت ياخ من تصريحك الكارثي والمستفز دة
لكن زعلان منك
مش كمسؤول بل ك انسان
ابدي عطفك واخرج مشاعر الرحمة
ترحم علي الموتي
وادعو للمرضي
واسأل الله ان يجنب الناس المرض
ورينا اننا هامينك اكتر من اهمية الحفاظ علي الكرسي

قال اتخذنا القرار المناسب في الزمن المناسب
ما صاح كلامك دة
عندي بوست يوم 10 مايو يتحدث عن اسهالات وسؤ الموية .
وقفلتو مضارب الموية يوم 22 مايو
واوضح للناس الكلمة الفيخمة دي مضارب الموية
في ظل انعدام الموية . ناس المزارع حول النيل خلو الزراعة وربطو اللستر او نقول طرمبة الموية وعملو ليها خرطوش وبملو للكوارو بسعر معلوم .. اغلاقها ما محتاج لاكتر من امر محلي وعسكري يقعد يحمي صاحب المزرعة من تشغيل الطرمبة
اغلاقها علي نفقة الحكومة دي ما فهمتها يعني داير تدفعنا حق ورقة الامر ولا شنو . ولا ندفع للعسكري
وقال مياه مجانية
سألت الضابط التنفيذي وحسب لي ما اكتر من 4 تناكر تبرع لي حين واحد من كنانة
وقلت ليهو ما قالو 28 قال لي ديلك تجاريات
تجاري
وبالمدينة اكتر من مية حي
وريني وزعت مجاني وين وغطيت كم حي
بعدينك
هو انت اعلنت عن الوباء لامن تعلن عن توقفو
ما قبيل قلت ما مسؤوليتك

ما عارفين سيادتك لكن متهمين الموية
ما عملتو فحوصات عشان الزول ما يموت !! ما قلتو ما بتمنعو الموت ما تعمل فحوصاتك ساي
بي الله دة كلام طبيب ولا مسؤول
الميت لي زمن ممكن يعرفو مات ليه
بعدينك شيل الفسحة ولا زي ما بتقولو stool داير ليهو تعب
ولا بقايا القئ
ولا بتقرفو

المغص راقد

هؤلاء يا عزيزي في حل من أي فهم منطقي أو واقعي للحوادث والأمور فكلها (ابتلاءات) وخلاص واليوم (كاشا) الوالي صرح بأن الكوليرا من الله

هذه الكوليرا التي نسبها لخالقنا (جل شأنه) ما (شافت) هولندا الـ كلها (قنوات مائية) لكنها استطابت العيش في بحر أبيض المبتلى بأمثال الوالي (كاشــا)

والحقيقة أنتم ونحن في وادي وهؤلاء المجاهدين ... في وادي أخر تماماً وكل (جهادهـم) هــو (فوقنا) نحــن الشعب السوداني المبتلى فعلا بهــم

أشكر لك شجاعتك في اظهار الحقيقة وإلى الأمام نحــو مواقف مشرفـة يذكرها التاريخ

أحمد الشايقي

Quote: الاسهالات وباء وليس كارثة

و كأن الوباء ليس بكارثة!!!
يعني الا الناس تفنى عن بكرة ابيها حتى تكون كارثة؟
ده فهم شنو يا اخوانا ده؟
معقول يكون ده تصريح زول مسئول؟
لك الله يا وطني و لكم الله يا بني وطني
ربنا ولى عليكم من لا يخاف الله فيكم
و كمان بتياجح و يقول جاهزين للحساب
اللهم لا نسالك رد القضاء و لكنا نسالك اللطف فيه

معليش يا ابوسن من المغصة نسيت اسلم عليك و على ضيوفك
ازيكم ياخ

كتر خيركم
شوفو سؤ الادب والعنجهية مع الله
نحن جاهزين للحساب
ياخ سيدنا عمر رمز العدل وحجته ما كان مفتري كدة
بل قال في لحظات موته
لو خرجت كفافا لكنت فائزا
لا ليهو لا عليهو
ومعاوية قال تمنيت ان اكون راعي اغنام
وغيرهم
لكن انت استهنت بالعباد ورب العباد
سيحاسبك الله وامرك له
وستحاسب هنا
علي كل تقصير
وعلي كل موت عبثي حدث

قالوا
متخصص وبائيات

الدولة هذه اتتهـم غنيمـة من تدبير انقلابي

لذلك هــم تغلبوا وموقنين بالغلبة

فما الذي يدعوهم لاحترام الشعب أو على الأقل احترام مشاعر الشعب أو على الأقل إعادة صياغة كلامهم ليصبح (دبلماسياً) ومقبولاً

نسال الله الخلاص

أحمد الشايقي