عجوة دنقلا الدفيقا عمر .. خامي الموية سارب لونو حمر.. تامل في كلمات قصيدة

04:02 PM May, 21 2017

سودانيز اون لاين
باسط المكي-
مكتبتى
رابط مختصر

·
كلمات أغنية مكتوب لي مقدر
كلمات / خضر محمود
اداء الراحل/ النعام آدم
مكتوب لي مقدر .. الحب والغرام مكتوب مسطر
الفرع المناوي نداه قطر .. مع النسام يفوَح طيبو عطر
ود الأريل السارح مبطر .. في بكر الخريف واديهو مطر
بي حكمو ابتلاني على تجسر .. غير حالي في أفكاري أثر
مالكني الدقاق الشب خدر .. فالق دافي ما دايرو كمتر
حراسو النشيط في زرعو بدر .. جابق حوضو وما خلاهو ستر
وازن الموية ماسوق المغذر .. تقرقر ليلا والجدول محدر
عارف حبو لي تعالى وتأمر .. حرق قلبي فوق لهبو المجمر
بي جسمو الندي الفي الطيب مخمر .. صدرو العالي الخصر المضمر
عجوة دنقلا الدفيقا عمر .. خامي الموية سارب لونو حمر
يقوقي دباسو فوق كروقو زمر .. من الطير وقف حراسو شمر
فوسيب الجزيرة الموجا دفر .. رشرش بره نط القيف وطفر
هبهب توبو صمدو عليهو غفر .. ينهر تورو عند الشاي وحمر ..
الكرش الفدع عرجونو جرجر .. ما بدوه من الناس محجر
سبت النجمة قام تربالو فجر .. ما بتكل سقايتو على الموجر
خلاص اصبح اسير الحب مكنتر .. اقول انساهو من حظي المعتر
احس بي قلبي مايل ليهو واكتر .. انفلت اللسان للساسو فتر
دمع العين مع ذكراهو بدر .. انكشف المخبا الكان مستر
انتي اذى وشقا قلبي المعور .. جيتي الليلة بيكي فريقنا نور
القالك نسيناك غشا زور .. نحن كيفن ننسى حباً جرحو غور

الحبيب باسط .. إن شاء الله تكون باسط طول العمر ..
يا سلام على البوست الجميل .. قبل فترة أنا كنت أتحدث في نفس الموضوع ..
اهلنا الشايقية ديل أصحاب جمال وعيونهم لا ترى إلى الجمال مكنون في البيئة التربالية ..

كنت اتحدث عن (( الدفيفيق الدابو ني ))


الدفيفيق الدابو ني

يا سلام على جمال أهلنا الشايقية وتنغيم الكلمات النوبية على أبدع ما يكون .. ومثال ذلك كلمة .. (دفيه ) .. هي من المراحل الاولية في تراتب التمر ..
والتشبيه هنا للبنت متوسطة القامة مكتنزة الجسد لأن الدفيق بعد النضج ينكمش قليلاً فكان وصفه ( الدابو ني ) مازلت صغيرة :
الدفيفيق الدابو ني البسيمتو بتكويني كي
لاحظ أن كلمة ( الدفيفيق ) تتكون من ثمانية أحرف تقريباً ولكن طريقة تنغيم الكلمة والامالة تجعلها ذات عمق جمالي ولحني لا محدود ..
وأنا تـرنم بهذا اللحن إستحضرت نخيل قريتي في عمق دنقلا ..
ومعها وقفت اتعجب عن قوة ملاحظة شاعرنا الرائع إسماعيل وكيفية اكتشافه لقيم هذا الجمال المكنون ،
أشياء كنا نشاهدها يومياً ولكننا لم نكتشف فيها كل هذا الجمال .. ( الدفيفيق الدابو ني )
والدفيق هي مرحلة ما قبل الصفار .. وقبلها عبارة ( التميره الفي سبيطتا .. الصفار صابغ خضرتا )
(الصفار صابغ خضرتا ) هي مرحلة قصيرة جداً من مراحل نضوج التمر ولا يمكن ملاحظتها إلا عن طريق شخص له حس عالي وذوق راقي ..
لأن اجمل ألوان التمر هي هذه المرحلة ..

(( عجوة دنقلا الدفيقا عمر .. خامي الموية سارب لونو حمر ))
المشهور أكثر كمان عجو المحس (( في قمر بوبا عجو المحس التقيل فدع العراجين ))
الشاعر في الباخرة ما بين دنقلا وكريمة يكون شاف ليه وحدة من بناتنا الدنقلاويات .. حليل أيام الباخرة والقطر ..
أما عبارة (( خامي موية .. سارب لونو أحمر )) دي مرحلة بالنوبية ( كوجكول ) العجو من الجزء العلوي والنصف الباقي
مكتنز بالماء حتى الماء عندما يسيل في العراقي كان من المستحيل إزالته ..

(( الكرش الفدع عرجونو جرجر .. ما بدوه من الناس محجر ))

الكرش بالنوبية ( Koorosh ) ودائماً ما يكون باللون الاحمر الفاتح ..
وتمرة الواحدة منها تكون ثقيلة الوزن لأنها مشبعة بالماء وفي نهاية المطاف
الكرش يتحول إلى عجوة كاملة ..

أجمل ناس في السودان أهلنا الشايقية .. يعرفوا التفاصيل الدقيقة من مكونات الجمال ..

باسط الحبيب .. صدقني إنت بسطني للاخر .. الحاجات تجعلني أرحل إلى ضواحي الدنيا ..
وأستحضر تلك البيئة الجميلة .. ونحن في على ضفتي النيل أمة واحدة .. لسان عربي ونوبي
نفس الشواقي والنخيل والتربالة والسواقي ( شوف تناغم وردي وإسماعيل كيف ؟؟؟ )

مودتي .. ياجميل .. أبسطك الله ..

آسف الاخطاء الاملائية .. عمك كان مندمج للاخر ..

يا سلام على البوست الجميل .. قبل فترة أنا كنت أتحدث في نفس الموضوع .. اهلنا الشايقية ديل أصحاب جمال وعيونهم لا ترى إلى الجمال مكنون في البيئة التربالية ...........................سلامات ياعزيزي علي عبد الوهاب ياخي متعتنى المفرادات العميقة في لغة الترابلة تجبرك تقيف وتتامل مفردة مميزة جدا