Post: #1
Title: حُـــــزن البلـــــلد
Author: يوسف الحداد
Date: 05-18-2017, 08:38 AM
Parent: #0
08:38 AM May, 18 2017 سودانيز اون لاين
يوسف الحداد-جده
مكتبتى
رابط مختصر مرثية فى رحيل رفيقة دربى المغفور لها با ذن الله فاطمة بت الزاكى ود الحسن ابو الحسن وام الحسن تور نورى ابقرناً مسن والتى صعدت روحها الى بارئها
يوم 5 رجب الموافق 2 ابريل 2017 الا رحم الله الفقيد ة واسكنها فسيح جناتة مع الصديقين والشهداء وحسن اؤلئة رفيق
انا لله وانا اليه راجعون ,,,,
حزنت عليكى بلدنا كلها من طرف
حزنت عليكى حزن شديد
وبكت دموع ما بتتوصف
المدارس والتلأميذ
واي طالب وطالبة
والكل سمع بيكى وعرف
الشتيلأت والبيوت
الحوش وابواب الغرف
والحمام الكان بينهل من هديلك
ومن تراتيمك يشف
البوادى والسهول
الجداول والحقول
وريحة اللوامين والجرف
وحزنت عليكى بلدنا كلها من طرف
***
وا لهفى ياست الحروف
من قسوة الليل والظروف
من بُعدك المالينى خوف
وين تانى من بعدك ولف
الشوق بكى وقلبو انقطع
تمتم وقال يا للأسف
كل الحروف اتشتتت واتبعثرت
ما فضل فيها ولا حرف
حزنت عليكى بلدنا كلها من طرف
***
يا فاطمة نوارة الفريق
وزرع الجريف الأنجرف
عنوان غنايا واحرفى
لأ عمرو خالف واختلف
بقت القصايد حاله حال
تبكى وتناهد وترتجف
يا فاطنة وين روحتى وين
راجيكى شوق امرض واخف
انا بى وراك قرّبت اضيع
لو لأ انو بس ربك لطف
حزنت عليكى بلدنا كلها من طرف
***
واااا فرح الشماميت يا فطين
من لوعتى وحالى الوقف
كان الشموخ من لون غنانا
وليل مزازيكنا الترف
وين فتى يا نبض الغنا
قوليلى بعدك امشى وين
جواي جروح تنزف نزف
تايه وحيد فى دنيتى
ومكانى لأ اتلقا لأاتعرف
وحزنت عليكى بلدنا كلها من طرف
***
يا حليل حس الطنابير والدليب
وروعة الألحان والعذف
ويا حليلنا وكت كنا كيف
خِجل شوقنا ولأ إنكسف
يا فاطمة يا حلمى الجميل
فى لحظة إنشال وإنخطف
يا فاطمة يا مدد الكلأم
والله بحلف ليك حلف
كان حبى ليك صادق امين
ها اقولو للناس وإعترف
ما كنا لو حٍرد الكلأم
يتلأشا سرعة وينصرف
وانا وإنتى ننداح إندياح
ونتلأقا فى اقرب ملف
وحزنت عليكى بلدنا كلها من طرف ........
|
Post: #2
Title: Re: حُـــــزن البلـــــلد
Author: يوسف الحداد
Date: 05-19-2017, 07:24 AM
Parent: #1
P
|
Post: #3
Title: Re: حُـــــزن البلـــــلد
Author: احمد حمودى
Date: 05-20-2017, 08:02 AM
Parent: #2
لها الرحمة والمعفرة وصادق العزاء لكم اخى الشاعر الحداد
|
|