العودة النهائية للسودان وفوبيا 4848

03:29 PM May, 16 2017

سودانيز اون لاين
Abdalla Gaafar-Somaliland
مكتبتى
رابط مختصر

قررت العودة نهائيا للسودان رغم عدم قناعة الكثير من الاصدقاء والاخوان ووصلت والحمد لله الي منزلنا الكائن بشرق النيل ووجدنا الجميع بخير بما في ذلك صديقي المتفائل جدا أنس والذي عاد من قبلي للسودان.
في الرابعة صبا ح اليوم التالي قطعت الكهربا من بعض المنازل بالحي وكان من ضمنها منزلنا وبعد شروق الشمس وحسب النظام كما اخبروني انه يجب التبليغ الي الرقم 4848 وقد قمت بحمد الله وتوفيقه بتبليغ 4848 بأمر انقطاع التيار الكهربائي ... وبعدها بدأت رحلة متابعتي ل 4848 من أجل أن يتم اصلاح العطل وامدادنا بالكهرباء
من قولة تيت الاتصال ب4848 يبدأبرسالة من ناس زين بأن الرقم 4848 الذي أدخلته غير صحيح وبعد عدة محاولات مع شبكة زين يتاح الاتصال وتأتيك بشارة انك متصل بالشركة السودانية للكهربا بمقطع يتضمن ان يوم بلا كهربا هو حياة بلا خدمات بحيث يغمرك الأمل بأنك في ايدي امينة .. المهم تم التبليغ عن العطل في التاسعة والنصف صباحا وابلغتني الموظفة بأن بلاغي قد تم تسجيله فقط علي البقاء في انتظار التيم الذي سيقوم باصلاح العطب وسيتم ذلك سريعا جدا وبما ان سريعا هذه يمكن ان تكون بالكتير ساعة او ساعتين قمت بالالتصال ب 4848 بعد الساعتين والحقيقة الموظفة ما قصرت وبي اسلوب الزول المتأكد والمتمكن استطاعت أن تقنعني بأن بلاغي والحمد لله قيد التنفيذ وما علي سوي انتظار التيم العامل والذي يصل بسرعة حسب برنامج 4848.. وبعد ذلك توالت حلقات مسلسل اتصالاتي ب 4848 كل ساعتين وبرضو اتصالات جيراني والساكنين الاخرين بالمنزل ..كل راس ساعتين وطبعا بعد الاتصالات الكثيرة بدأت أفقد ثقتي ب 4848 خاصة وأن الأجابة واحدة (نحنا متأسفين يا أستاذ وتاكد أن التيم سيصلك سريعا وأن المشكلة تكمن في ان البلاغات كتيرة والاتيام محدودة ) وبدأت ازداد توتر بعد كل اتصال خاصة حين تكرر الموظفة نفس الجملة وكأنها مجيب آلي وتستميت الموظفة في اقناعك مرة اخري بذات الفكرة... المهم قررت الذهاب الي مكاتب الكهرباء علي الاقل لمعرفة اين يوجد التيم العامل ومن ثم الوصواليه ومعرفة مواعيد وصوله الينا وفعلا ذهبت الي المكتب وهناك أخطروني بان مكاتب البلاغات قد تم الغاؤها تماما ولا يوجد امام المواطن سوى 4848 وطبعا هذه المكاتب كنا نتعامل معها سابقا لان لديها الية لمتابعة الاتيام العاملة .. المهم ازداد توتري وارتفع ضغطي حين اكتشفت أن الكم الهائل من محادثاتي كانت مكالمات مدفوعة القيمة وليس محادثات طواريء تقدم كخدمات من الكهرباء لزبائنها
المهم بعد ارتفاع ضغطي قمت بالأتصال ب4848 لمعرفة ان كان لديهم اي آلية للمتابعة بحبث يمكنهم تحديد وصول الالتيام او مكان تواجدهم أو اي معلومة تمكنهم من اعطائي فكرة عن موعد اصلاح العطل... وفعلا بعد عمل مقدمتي بأن الذي تفعلونه يا ناس 4848 لا يرضي الله ولا رسوله ... سألت الموظفة سؤال واحد عن ان كان لديهم اي وسيلة لمتابعة اللاتيام ومعرفة برامجها أو اي الية لامدادي بمعلومة صحيحة لاصلاح العطل وبعد الحاح مني بشدة اعترفت الموظفة انه ليس لديهم اي آلية للمتابعة ... وان كل ما بفعلونه هو تسجيل البلاغات ورفعها ... سالتها ان كانت تعرف ان المكالمات هي مكالمات مدفوعة من جيب المواطن وليست محادثات طواريء كخدمات من الكهرباء فاجابت بنعم...
قلت لها اما كان في الامكان من المحادثة الأولي اخطاري او اخطار اي مواطن بأن 4848 هي مكان لتسجيل البلاغات فقط حتي لا يخسر المواطن مزيدا من المبالغ بالاتصال ب 4848 وطبعا بالتأكيد أن 4848 ريع من محاثات البلاغات .. لهذا يبدو ان كل الاستراتيجة قائمة علي محاولة جر المواطن لدفع قيمة اكبر عدد من المحادثات وبرضو تطويل زمن هذه المحادثات .. ولعمري هذا تفكير شيطاني بحت
أعرف ان افكار هيئة الكهرباء الشيطانية تتمحور في انو المواطن يقوم بشراء العداد ومن ثم تمليكه للهيئة وشراء الأعمدة ومن ثم تمليكها للهيئة وشراء أحيانا المحولات بواسطة مواطنين وجهات ومن ثم تمليكها للهيئة وشراء كل ما يلزم وما لا يلزم وتمليكه للهيئة
أما أن تصل افكار الهيئة الشيطانية لمرحلة الاستفادة ماديا من عدم تقديم الخدمات .... هذا لعمري تفكير يتحير فيه الشيطان يعني الاستفادة من القطوعات وحجب الخدمات في سلب المواطن ماله ب 4848 وطبعا الغاء مكاتب البلاغات والتي كانت هي الجهة التي تقوم بنفس العمل وزيادة لانها علي الاقل تملك الية المتابعة ما هو الا زيادة في حصار المواطن للتعامل مكرها مع 4848 .... تخيلو لما سألت ناس مكتب الكهرباء اسوي شنو عشان احل مشكلتي قالوا ما عندك حل غير 4848
حسبنا الله ونعم الوكيل البعرفو انو حتي لو انت فاجر في أكل المواطن بكون بتأكل من جيب المواطن مقابل خدمة ولو كانت بسيطة أما أن تأكل من جيب المواطن مفابل قطع الخدمات منو دي ابليس زاتو داير يدرسوها ليهو... يعني بدل يطلعو ليك ايصال وقف خدمة الامداد الكهربا أو ايصال حرمان من خدمات الكهربا ... بيودوك لي 4848 وهم كفيلين بجمع رسوم حرمان المواطن من خدمات الكهرباء من خلال دفع قيمة محادثات المواطنين الخاصة بالتبليغ عن وقف امدادهم بالكهرباء
عندي مجموعة اسئلة محتاجة لي اجابة من اي زول عندو فكرة
ماهي 4848 يعني هل هي شركة خاصة والله شركة حكومية من شركات الكهرباء والله ادارة والله شنو؟
كم تبلغ عائدات هذه الشركة او الاادارة من محاثات المواطنين وان لم يكن لهذه الشركة كم تبلغ عائدات زين من قيمة ارقام الطوارىء بالسودان ( في كلا الحالين اذا كانت زين تتكسب من أرقام الطوارىء تبقي مصيبة واذا كان هيئة الكهرباء تتكسب من محادثات الطوارىء يبقي مصيبتين)
هل كل محادثات الطورىء بالسودان يدفع قيمتها المواطن ( تلاتة تسعات والاسعاف وغيرو)؟
ألا يوجد اي قانون يمنع مثل هذا النوع من ظلم المواطن لدرجة ان يدفع مقابل عدم تقديم الخدمة؟
آخر الكلام سألت ناس 4848 لو داير اشتكي 4848 اسوي شنو وامشي وين ..قالوا تمشي المقرن وبما أن المقرن هو مقر شركة الكهرباء وجدت انه لاداعي لتعريض نفسي لمزيد من التوتر وارتفاع الضغط فهي بالتأكيد ستكون الخصم والحكم
بالمناسبة تم اصلاح العطل في عشرة دقايق بعد ان وجد ان المشكلة في فيوز ضارب... وكان ذلك بعد 30 ساعة (ثلاثين) يعني يوم كامل وستة ساعات من فتح البلاغ .... المشكلة الان انو بقت عندي فوبيا 4848 واسي الكهرباء قاطعة وما داير اتصل بيهم
ديل أول يومين من في عودتي الي ارض السودان ....اها رأيكم شنو ..... وزي دا بحصل لي كم زول في السودان يوماتي
الله المستعان

ما عندك حل غير تسأل الله أنو يخلص ليك حقك
من أكبر تمساح لأصغر حرامي فيهم في الدنيا
قبل الآخرة ..
ولو عفيت فلك الأجر .. خخخخخخخخ
المهم حمدلله ع السلامة .

بقيت من عرب ٤٨ ههههه
تحياتي

كمان لو جوك ناس 8484 ... تكون إتلحست

هم ديل ناس منو أنا زاتو ما عارف ... لكن خايف عليك منهم

حمدا لله على السلامة..دي المناظر الفلم لسع ما بدأ

الاخ الحاج
بس نسال الله السلامة ... مشاكل تقديم الخدمات وانقطاعها كوم ... و4848 دي كوم لانها بتسرق المواطن نظير عدم تقديم الخدمة .. يعني بي بساطة ممكن يقطعوا منك الكهرباء عشان 4848 تشتغل وانت تدفع مقابل قطع الكهرباء عنك

عليك الله دي ما بتحير ابليس

شكرا أيمن علي رفع البوست

تحياتي

العزيز عبد العزيز
طبعا كلو ممكن 8484 أو غيرو لانو حكاية 4848 تدل علي امكانية وجود اليات شيطانية لا تخطر علي بال بشر ولا جان
تحياتي

التحية للجميع :- خالص تحياتي للأخ عبد الله جعفر , وألف حمد الله على سلامة الوصول لارض الوطن, سالما سليما غانما معافا من دنياوات الغربة بعد كسر عصا الترحال , ونتمنى لكم طيب الاقامة في وطنك الأم , مستمتعا مع أهلك وعشيرتك , ومستمتعا بحياة المواطن السوداني اخو الاخوان وما يعانيه من متاعب ومشقة , ومع ذلك فهو المجاهد الذي تعود ان يعيش يومه صابرا , محتسبا ..سعيدا ,ضاحكا , بشوشا, رافعا شعار الصبر .. أنتم السابقون ونحن اللاحقون بكم ,بعون الله تعالى .. مشكلتنا الرئيسية في السودان هو ان الاهتمام بالمواطن ياتي في ذيل قائمة المسؤولين من أكبر مسؤول إلي اصغر مسؤول , والمواطن العادي اتعود على الكلام دا وبيقول ليك يا أخي انت في السودان وياهو دا السودان .. وللاسف دا الحال ... حبيبنا عبد الله .. انت يا دوب ليك يومين ... طول بالك ... اتعود قطع الكهرباء وقطع الغاز وقطع المويه ... ومشي حالك واتاقلم مع الوضع الجديد .. وابتسم واضحك دائما .. واما عن كلامك الأخير " ديل أول يومين من في عودتي الي ارض السودان ....اها رأيكم شنو " لو عاوز تعرف راينا بالضبط اتصل علينا في الرقم " 4848" , ونديك الاجابة بعد الفاصل ... خالص شكري وتقديري والعفو والعافية ... أع0000

الاخ عبد الله جعفر ياخ الف حمد لله على السلامه اولا وثانيا الجاتك في مالك سامحتك ... لكن يا اخوي ان الوداك هنا شنو زااااااتو .. كلنا بنحب السودان وعايزين نعيش في السودان ولكن هذا المكان لا يصلح للعيش فيه للك اخي نحن قررنا انو ننتظر يومنا هنا في البلد الامين ده ولكل اجل كتاب والله يعينك ياخي ,,,,, علما ان شرق النيل افضل الاماكن للعيش حول العاصمة لانو تمتاذ بميزات عديدة انت ادرى بها مني لذا اصبر واحتسب بس ...


تحياتي : ياسر العيلفون .....

ياسر
تحيات وتقدير
عارف السودان ما عندنا حل غيرو ... ورغم سوء الحال الزول ممكن يصبر ويستحمل ... لكن لما تواجه بي حاجة زي 4848 دي بتكون محتاج لي زول يفهمك ويفهم معاك ابليس انو كيف توصل شياطين الانس للاتسفادة من مصائب المواطن ومشاكله في زيادة دخلهم
يعني المشكلة ما مشكلة قروش .. مشكلة انو في جهة بتقطع مني الخدمة عشان تتحصل مني رسوم يتم دفها بصورة بسيطة لا يشعر بها المواطن... لكن لما تتأمل في هذه الالية وكم من الاتصالات يجريها المواطنون الذين اصابتهم مصيبة قطع الكهربا ستكتشف ان هذه الالية تمثل وسيلة لسرقة المواطن عبر قطع الخدمة عنه واجباره مكرها للاتصال ب4848

عشان كدا يا ياسر بفتكر انو دي حالة شاذة ومافي قانون في الدنيا يتيح فرض رسوم علي المواطن عبر حرمانه من الخدمات ... عارف 4848 دي مابتعرف مقدار ما يدفعه المواطنون عبر الاتصال بها الا حين تجرب بنفسك وحين تبدأ الموسيقي والاعلان ويطلب منك انتظار دورك لحين يوج موظف فاضي ومن ثم تبدأ في الشرح ويبدأ الموظف في التطمين وتنميق الكلام .... وتعاود الاتصال ب 4848 اكثر من مرة لانهم اخبروك بان العطل سيتم اصلاحه سريعا .. وتتصل وتتصل.. ولا ا احد سيخبرك أن موظفي 4848 لا حول لهم ولا قوة وان ما يقومون به هو فقط تسجيل بلاغك ورفعه في السيستم (السيستم دي بقولوها ليك ناس 4848 ) وانو واضح قدامس فس السيستم انو بلاغك قيد التنفيذ... ولا أحد سيخطرك ان هذه المكالمة مكالمة تخصم من رصيدك ...

نفسي اعرف دخل الكهربا او زين من 4848 (الدخل السنوي ) لما نعرف دا حتتأكدو انو الفكرة شيطانية وان المواطن قد دفع بلايين الجنيهات منذ قيام 4848 مقابل قطع الكهرباء وحرمانه منها

العزيز احمد علاء الدين
شكرا جزيلا لامنيات والدعوات وربنا يحفظك من 4848 وامثلها في السودان
طبعا الزول مستعد وممكن يصبر علي كل شي في السودان يصبر علي قطع الكهربا والموية والغلاء وكل البجيبو ربنا ... بس الصبر علي دفع المواطن رسوم عدم تقديم الخدمة جديدة وما بتتبلع.. يعني لو لقيت ليك محول بتاع ناس الكهرباء مولعة فيهو نار وداير تبلغهم عشان يلحقوهو (يعني بتقدم خدمة للكهربا) اها لازم تبلغ عبر 4848 وبالتالي تقوم بدفع رسوم تقديم خدماتك عبر دفع قيمة المحادثة
الغريبة حتي التبليغ عن الحالات الخطرة برضو لازم تتم عبر 4848 والخطرة دي ممكن تكون كوارث... ولما تضرب تلقي دروك رقم 100 وتظل منتظر ..وطبعا القيمة تمشي زايدة علي المواطن.. ومرات بعد دورك يقرب الخط يقطع وتبدأ المحادثة من الأول وتلقي برضو دورك رقم 100 الخ الخ
هل ممكن تتخيل كم من المواطنين البتصلو وكم مدة اتصالاتهم بسبب القطوعات ... وكم دخل 4848 أو زين من مصائب الناس ... غايتو بتخيل دخل ناس الكهربا من 4848 اكتر من دخلهم من بيع الكهربا للمواطن ...

تحياتي

العزيز طلحة
زي ما قلت الشكية الا لي الله ..هو كفيل بي كل ظالم.... لانو دلو داير تشتكي 4848 تمشي المقرن وطبعا هناك حتلقي الجماعة العملو 4848 قاعديييين ويمكن كمان يغرموك

الطيب
ياخوي عرب 48 ديل علي الاقل عندهم حق التصويت ودخول الكنيست

نحن عرب وضحايا 4848 لا نملك حتي حق ان نشتكي
الله المستعان

تحياتي للجميع
سلام الأخ عبدالله جعفر

الحمد لله على السلامة
واتمنى لك اقامة طيبة مع الأهل والأحباب في وطننا الحبيب
والعرجاء الى مراحها

انتم السابقون ونحن بكم لاحقون
وإنا لله وإنا إليه راجعون

صلاح حمد
تحيات وتقدير

ربنا يرد غربتك وتحصلنا وان شا الله لمن تجي 4848 تكون بفت مجان

د. عبدالله جعفر
يا قريبي الف حمدا لله ع السلامة
ده حالتو انت جايي من هرقيسا
يا ربي لو كنت جايي من هولندا كان كيف؟؟!!
===
والحال كذلك، يا عزيزي، ومع حالة "النوستالجيا" التي تدستر بينا كلنا ليل نهار
لا أملك الا أن أهديك قصيدة الشاعر الليبي الهوني والذي ظل منتظرا ليوم يحل
على ليبيا العقيد بلا سجون ولا مظالم ولا 4848 (:)
وقد ظل منتظرا حتى يومنا هذا
نرجو الا يطول بنا زمان مثلما طال بالشاعر الهوني فمات وفي نفسه "حتات" كثيرة
نهديك رائعته هذه ونصلي من أجل غد سعيد للسودانيين الطيبين وللليبيين كذلك
===

أم السعد"

أوتحسب حقا يا ولدى
أنى هاجرت
وتركت ورائى أحلامى
وفتاة تسكن عينيها الدنيا
ورفاقا أثمن من دنيا
وأهالينا
وقرانا السمر وصحرانا وشواطينا
لأعيش بقية أيامى من غير حبيب..
*******
أو تحسب حقا يا ولدى
أنى هاجرت
وتركت ورائى فرسانا فى عمر الورد
وصبايا رائحة المسك الغالى
ومذاق الشهد
وبلادا تسكن عينيها أيام السعد..
*******
أو تحسب أنى يا ولدى
غادرت مراعى أغنامى
من غير وداع
وحدائق أشجار الطلح الظامى
من دون وداع
وهجرت جوادا يألفنى وركبت البحر
أتصدّق أن البحر يروّض بدويا مثلى
لم يعرف حتى ما معنى النهر؟؟!!
********
أو تحسب يا ولدى أنى هاجرت
أتظن بأنى ضقت بأحزانى
ومللت هواجس جيرانى؟؟
****
أتصدق يا ولدى إن قالوا
إنى هاجرت؟؟
أتصدّق أقدر أن أنسى
ذات العينين السوداوين المأمونة
أتصدق أن أترك روض الأطفال، وجاراتى!!
وجموع السمر المحزونة!!
وأعيش بقية أيامى من غير حبيب
********
لا!! أبدا يا ولدى
لا ما هاجرت
لكنى خيمت بعيدا عن عرس الهم
أحزننى جدا يا ولدى
فى العرس الهم
لكن العيد سيقبل يا ولدى
فى يوم العيد
وأجىء بلادى مشتاقا فى يوم الوعد
سأجيئك يوما يا بلدى خذ هذا العهد
سأجيئك يوما يا أمى
يا ذات العينين السوداوين
ويا أم السعد!!

العزيز عبد الله عثمان
تحية وسلام
وربنا يقصر ايام غربة الجميع ويرد الجميع سالمين غانمين
غايتو ياخوي الله يستر من طول المشوار كما طال بالهوني
تصدق ارض الصومال ما بذكر فيها الكهربا قطعت في الحتة الساكن فيها متين ... وبالمناسبة اسعار الكهرباء والبترول متغيرة حسب السعر العالمي .. وزي ما قلت المشكلة مافي قطع الكهرباء المشكلة في 4848 وتكلفة محادثة يقوم المواطن بدفعها بدون ذنب جناهو
ربنا يصلح الحال
والله المستعان

سلام . صاحب البوست وضيوفه

الا يمكن فتح بلاغ جنائي ؟
مثلا اقوم بتوكيل محام ، او اقدم بنفسي عريضة لوكيل النيابة في دائرة اختصاص سكني .
مما يشجع هؤلاء اللصوص علي المزيد من النهب والسرقات هو سكوتنا ، وعدم متابعة حقوقنا .
او تشكيل مجموعة من المواطنيين وتقديم عريضة جماعية .
لانيأئس ، رغم انه في الظاهر لاتوجد جدوي لذلك ، لكن علي الاقل ينال الشخص شرف المحاولة.
ومع وجود مواقع التواصل ، وانتشار التقنيه ، وتطبيقاتها ، في السنين الماضية ، لابد لاحد ما ، ان يتتدخل
وحتما سيتغير الامر خوفا ووجلا ، بعد انتشار الامر ، وتصبح قضية رأي عام .

تبا لهم ..

العزيز كاروري
سلام وتحية
أنا برضو من {اي البحث عن مخرج قانوني والدفاع عن حقوق المواطن اذا كان في سبيل لذلك ... وكنت امل ان تقوم جهة مثل جمعية حماية المستهلك بالتبني القانوني لحكاية فرض الرسوم بدون وجه حق علي المواطن
وناوي اتصل عليهم واشوف رايهم شنو ... يعني كيف ادفع قيمة اي محادثة تلمؤسسة تعلق بي خدمة حرمتني منها ذات المؤسسة
الحكاية دايرة ليها تكاتف من الجميع علي الاقل لاحداث بعض التغيير العادل

andlt;a href="http://sudaneseonline.com/cgi-bin/sdb/2bb.cgi؟seq=printandboard=480andmsg=1444856290andrn=" target=_selfandgt;الكهرباء ، الطوارئ ، وبدعة 4848الكهرباء ، الطوارئ ، وبدعة 4848
وقد عدت قبل 11 سنة
والمعاناة ما تزال تتكرر
لكني أصبحت جزءا من المعاناة نفسها

العزيز ود قاسم
تقدير ومودة
المعاناة اصبحت جزء من حياة السوداني البسيط من يصحي لما ينوم

ربنا يصلح الحال ويغير الاحوال

سلام اخوي عبد الله وضيوفه الاكارم

الغريب انا عندي تجربة مختلفة تماماً عن تجربتك ...
كنت في اجازة
يوم جا هواء شديد قطع سلك الكهرباء الداخل عندنا
اتصلت على الرقم 4848
جمع معاي بكل سهولة
وبعد نص ساعة اشوف ليك العربية جات والجماعة متشعلقين في العمود
وتم اصلاح السلك

لحدي هسه انا مستغرب ومندهش

الشعب السوداني استسلم تماما للكيزان واساليبهم الملتوية في النصب والاحتيال بل واتعدينا - نحن معشر الشعب - ذلك خطوة وتخلقنا بخُلق النظام في الاستهبال ومن يحاول ان يخرج عن السستم اللي اتختا يبح صوته دون الوصول لنتيجة
غايتو الواحد يحتسب بس وخلاصا غير آجل يارب من ربقة الكيزان
واتمنى لك طيب الاقامة ويعز علي ان اردد المقولة المعروفة التي توصي بالاستسلام للحاصل والتعايش مع الوضع المليان اختلال وظلم

Quote: في الرابعة صبا ح اليوم التالي قطعت الكهربا من بعض المنازل بالحي وكان من ضمنها منزلنا وبعد شروق الشمس وحسب النظام كما اخبروني انه يجب التبليغ الي الرقم 4848 وقد قمت بحمد الله وتوفيقه بتبليغ 4848 بأمر انقطاع التيار الكهربائي ...

عبدالله جعفر
تحياتي
وحمدلله على سلامة العودة النهائية للوطن، والتمتع بالأكسجين الطبيعي والخروج بدون أن تتحسس موضع الإقامة، وأن تضحك ملئ شدقيك لأنك مواطن وليس أي مسما آخر ( مقيم/ أجنبي/وافد).......
والجاتك في الكهرباء سامحتك وبقدرما صبرت على الغربة فإصبر على 4848 خاصة وإنك لم تزل في فترة التهيئة Adabtation فخليك قريب من أصدق وأقرب الناس إليك ( ليس بالضرورة من الأهل)
وحينها ستتخى الكثير من كبكبة المغتربين عند العودة، فإني لم ازل مغتربا لكن بسبب السفر الكثير للسودان مارست شيئا من التهيئة علاوة على خطتي للعودة الطوعية التي بدأتها منذ عامين وهي أظن بلغت لمساتها الأخيرة
ومنها ترتيب الكهرباء بخيارات أخر منها المولد، وألواح طاقة شمسية، ومخرج آخر هو الهروب من العاصمة للمزرعة، لذلك إن لم تتدبر أمورك من بدري فعليك ان تسعى لتلحق ما يمكن وتعيش بسلام في بلدك.

العزيز حماد
تحيات وسلام وربنا يرد غربة الجميع وانا ايضا عشت باروبا وعانيت

وان كما ذكرت ليس لدب مشكلة في قلة الخدمات أو قطعها .. مشكلتي تتمحور في ان المواطن يدفع قيمة مكالمة لابلاغ مؤسسة مسئولة عن تقديم خدمة للمواطن وقد تكون ذات المؤسسة هي المسئولة من قطع الخدمة وحرمان المواطن يعني بي طريقة غير مباشرة المواطن بدفع مقابل حرمانه من الخدمة
تحياتي ومودتي

شكرا جزيلا مهدي
وفعلا الاستهانة بالاشياء واللا مبلاة تزيد الامور سوء
فلنبدأ بتغيير انفسنا لتغيير اكبر

ياسر منصور
تقدير وتحية

طبعا انا اساسا ما محتج علي بطء اصلاح العطل ولكن محتج علي ان يقوم المواطن بدفع اي قيمة لمحادثة لي مؤسسة قد تكون هي التسببة في العطل .. وضربت مثال انو لقيت محول بتا ناس الكهربا مولعة فيهو نار وممكن تتحول لي كارثة وداير تساعد ناس الكهربا بي انك تبلغهم لانقاد المحول ..تتصل ب 4848 وتدفع في سبيل تقديم خدماتك لي هيئة الكهرباء
وانت يا خوي عملت الشي العملتو اتصلت بي 4848 بس التيم جاك سريع وما حوجك تتصل عشرة أو عشرين مرة

آآآها ..في دي معاك الف حق يا حبيب
يا اخي مافي بلد في العالم الاتصال بالاسعاف والاسعاف زااااتو بالقروش
الا في السودان

سودان الدهشة

ههههههههههههههه

4848) لاستقبال شكاوى الكهرباء

الأربعاء, 18 يناير 2012 18:07 التحديث الأخير ( الأربعاء, 18 يناير 2012 22:56 )


الرئيس السوداني يستمع إلى شرح فني حول مركز الخدمة

افتتح الرئيس السوداني، عمر أحمد البشير، مركز خدمات الزبائن لتوزيع الكهرباء بحي السجانة وسط الخرطوم، لتلقي شكاوى وبلاغات المواطنين عبر الرقم (4848)، وبلغت تكلفة المركز 1,200 ألف جنيه سوداني وتتم جميع المعاملات بصورة آلية.

وقال وزير الكهرباء والسدود، أسامة عبدالله، للصحافيين، إن المركز هو أحد أقسام الشركة السودانية لتوزيع الكهرباء المحدودة، ويعتبر واجهة الشركة للتعامل مع الزبائن، حيث يقوم بخدمة الرد على استفساراتهم وتساؤلاتهم ومعالجة بلاغاتهم وقبول الشكاوى والاقتراحات وذلك عن طريق الرقم (4848) من كل الشبكات وعلى مدار الساعة.


وأضاف أن الخدمة تهدف لمزيد من التجويد ووضع شكاوى وبلاغات المواطنين في أيدٍ أمينة عبر تسجيل المكالمات، ويتم على أساسها المحاسبة لتلافي القصور.

Quote: مركز خدمات الزبائن 4848 هو رقم خدمات الكهرباء في كل الولايات ومن خلال كل شبكات الاتصالات على مدار الساعة. تكلفة المكالمة 50% من سعر المكالمة العادية بدعم من الشركة السودانية لتوزيع الكهرباء لزبائنها الكرام. بعتبر المركز واجهة الشركة للتعامل مع الزبائن حيث يقوم بخدمة الزبائن بالرد على إستفساراتهم وتساؤلاتهم وإستلام بلاغاتهم وقبول الشكاوي والاقتراحات وذلك من خلال رقم موحد (4848) على مدار الـ 24 ساعة يستقبل المجيب الآلي IVR) ) المكالمة ويطلب من المتصل إدخال رقم العداد الخاص به وهو رقم فريد مكون من 11 خانة ولا يتكرر في جميع أنحاء السودان أو الرقم 9 لبلاغات الخطورة ثم إدخال رمز الولاية بالضغط علي علامة النجمة (*) . يقوم المجيب الآلي IVR) ) بالتأكد من الرقم المدخل ومعرفة الولاية التي يوجد بها هذا الرقم وذلك من خلال إتصاله بقاعدة بيانات الزبائن والتي تحتوي على بيانات جميع الزبائن في كافة ولايات السودان. يتم الرد بواسطة المجيب الآلي عند حدوث عطل لعدد من الزبائن عن طريق الربط بنظام المعلومات الجغرافية (GIS) و التحكم بحيث يقومالمجيب الآليIVR) ) بتبليغ الزبون بانه ضمن المنطقه التى تم فصلها من قبل التحكم دون الحاجه لدخول المكالمات لوكلاء الرد. في حالة وجود عطل خاص للزبون يتلقى وكيل الردالمكالمة ويقوم بمعالجة مشكلته والرد عليه أو تسجيل البلاغ. إذا إستوجب حل المشكلة ميدانياً يقوم وكيل الرد بتحويل المشكلة عبر نظام البلاغاتلعربه فريق الصيانة. بعد معالجة فريق الصيانة للمشكلة يتم إدخال تلك البيانات فى النظام. يتم الرجوع للزبون للتأكد من حل مشكلته وقفل البلاغ نطاق المركز: يقوم المركز بخدمة الزبائن في ولاية الخرطوم والولايات الأخرى مهام مركز خدمات الزبائن • تلقي إشارات الزبون في أسرع وقت ممكن. • حل مشكلة الزبون خلال الزمن القياسي منذ تلقي الإشارة. • تقليل الفجوة بين الزبائن والشركة. • إرضاء الزبون وذلك بتجويد مستوى الخدمة. فوائد المركز للزبائن : الحصول على خدمة ذات جودة عالية وقدر كبير على الإهتمام وسرعة في الإستجابة . متابعة تنفيذ البلاغات من نقطة واحدة لكل ولايات السودان . إتاحة إتصال للزبون على مدار 24 ساعة. الإتصال بالرقم المختصر (4848) من جميع الشبكات . حفظ حقوق الزبون بتسجيل المكالمات الواردة . الرجوع لأكثر من 60% من الزبائن للتأكد من معالجة العطل . فوائد المركز الاستغلال الأمثل للموارد توفير معلومات تساعد في التطوير والتحسين المستمر. منفذ لتحديث المعلومات الخاصة بالزبائن . رفع جودة الخدمة المقدمة وإمكانية قياسها (الزبون والشركة ) تعزيز عنصر الرقابة والحفاظ على حقوق الطرفين . التقليل من فرص البيع المفقود . مزايا المركز للزبائن: • اختصار الوقت وتسهيل الخدمة. • توفير خدمة أفضل للزبائن. • مركزية البلاغات مما ينتج عنه المحافظة على مستوى خدمة جيد. مزايا المركز للشركة: • توفير المعلومات. • تقديم التقارير والإحصائيات المفصلة. • قياس جودة الخدمة. • التطوير المستمر. • حيازة رضاء الزبائن. • زيادة ثقة الزبون بالشركة.

كمال فرانكلي
تحية وسلام
وما عرفتك داير تقول شنو
كدي خليني ازيدك من الشعر بيتين
وأوريك نظام 4848 الحالي
من تتصل بتحس في مشكلة للوصول للرقم لانو ناس زين بنطو يقولو ليك الرقم خطأ ولما تبدأ الاتصال يطالبك المجيب الالي بادخال رقم العداد وبعدو يخطرك المجيب الالي بان رقمك كذا وستبقي في الانتظار لحين وجود موظف فاضي والحمد لله اثناء الانتظار تسمع مزيكة ورسائل عن ترشيد الكهرباء ولما يصلك الدور تقوم بالتبليغ للموظف او الموظفة يعني يا كمال لو كان رقمك 100 أو 50 انت تقوم بدفع القيمة أو حتي 50% من قيمة المحادثة العادية وطبعا المحادثة ممكن تكون طويلة ولحظات الانتظار اطول
أنا محتج انو انا كمواطن البخليني ادفع قيمة المحادثة دي شنو لي مؤسسة قد تكون هي المسئولة من قطع الكهرباء .. ولو صدقت أو ما صدقت أنا بعد اكثر من عشرة اتصالات سألت الموظفة أذا كان في امكن ناس 4848 متابعة اتيام الطواريء أو حتي باخطاري عن متي يمكن ان يصلني التيم العامل وبالواضح الصريح يا كمال قالو هم ماعندهم الية لذلك وهم بسجلو البلاغات وينزلوها في السيستم
كدي يا كمال خت نفسك محل مواطن عادي جاي ماشي لقي مشكلة في الكهرباء وممكن تتحول لي كارثة وداير يقدم خدمة لهيئة الكهربا بي ابلاغهم بالمشكلة كدي قول لي يا كمال ياتو قانون ممكن يفرض عليهو انو يدفع مقابل ذلك حتي لو لو كان 0ز0005% من قيمة المكالمة العادية
طبعا كنت حاضرب ليك مثال بي زوب ما عندو تلفون أو عندو تلفون وما عندو رصيد يسوي شنو بس ربما ما حتصدق انو في ناس زي ديل
كدي نتكلم من ناحية شفافية انت ما شايف انو الحكاية فيها تضارب مصالح حين تكون الجهة التي تقدم الخدمة هي الجهة التي تطلب من المواطن دفع ولو جزء من قيمة محادثة تتعلق بحرمانه من ذات الخدمة
زمان انا كنت بمشي مكتب البلاغات وبسجلو بلاغي وبتابع معاهم من مكتب الكهربا بمنطقتي وكانت هذه المكاتب تتابع تحركات الاتيام وتقوم بالاتصال بهم ومن ثم تمليكك الحقيقة
اسي عليك الانتظار
وبالمناسبة حكاية يرجعو ليك ناس 4848 عشان يتابعو معاك ما عارفك حتصدق لو قلت ليك دا المستحيل زاتو لانو انا جربتها معاهم شخصيا وطلبت منهم لو في اي طريقة زي ما أنا بتصل بيهم ممكن يتصلو بي ولو مرة واحدة لتمليكي معلومات اصلاح العطل
شكرا ليك علي المداخلة وان كانت عبارة عن تزويق وترويج ل 4848

والله ديل إبليس ما سبقهم عليها
ربنا يكون في عونكم الأخوة العائدين وفي عونا نحنا اللسة مغتربين لأننا حنكون
بندفع لناس 4848 ديل بصورة مستمرة وغير محسوبة كل ما تقطع عند أسرنا الكهرباء ويتوجهوا بتليفوناتهم بالاتصال
على المصيبة 4848 يعني الكل بيدفع العائد والمغترب والمواطن المستقر في بلده وأكيد المستفيد الأول شركة الكهرباء ويأتي بعدهم ناس شركة زين

حبيبنا عبدالله جعفر .. مودتي يا جميل ..

صدقني .. والله .. شفت القسم دا كيف .. دا كلو أحسن ليك من الكفـــــــــــــــــــــــــــــــــــــــــــل وشكله كل صباح

يا زول .. مع أهلك إخوانك عزك ارضك .. بعد داك الباقي هين
كلنا معاك راجعين .. إن شاء الله .. خلاص العمر راح ..
أمنياتي أن أتخذ مثل هذا القرار ..

مودتي الحبيب عبدالله ..

كيفك ياصديقى
حمدا لله على السلامة
ربنا يعينك وينتقم منهم
هههههه
ليه الناس دى ماعايزة تقتنع..انك
بتتكلم عن السرقة الواضحة
ربنا يعينك غايتو
مافى خط رجعة...
ماذا حل بالوطن ياصديقى
واصل.

يانورة اه

حمد الله على السلامه
ياخ في 4848 تانية بس لأنك جديد ما عارفها و شكلو الناس ما وروك ليها
سيبك من 4848 الرصاها ليك فرانكي دي و صور البشير و الكلام ده
الكتير من الناس ( بيزبطو ) أمورهم مع ناس الكهرباء و ناس الموية و النفايات و العوايد و الرخص و و و
و بكل أسف ده الحاصل الآن الكل مرتشي و راشي
و لو حسبتها صاح بتلقى 4848 التانية دي أسهل و أقل تكلفة و تديك فرقة زمن تدبر أمورك

المغترب العائد
حمد الله على السلامة والبلد نورت بيك عشان كدة قطعوا الكهرباء :)

عندك حلين
واحد تبلغ وتنسى الفكرة يجو على مهلتم
اتنين تبلغ برضو وتطلع تشوف اقرب مركز كهرباء بتلقى وراهو ست شاي قاعدين معاها كم واحد كدا
بشربو شاي وقهوة وفي بوكس الكهرباء ابو سلم داك مدسوس وراء الحيطه تمشي عليهم توووش
تديهم القصة والمحل وين واهم حاجة (حق الفطور علينا) تمشي تلقاقه قدامك

Quote: عندك حلين واحد تبلغ وتنسى الفكرة يجو على مهلتم اتنين تبلغ برضو وتطلع تشوف اقرب مركز كهرباء بتلقى وراهو ست شاي قاعدين معاها كم واحد كدا بشربو شاي وقهوة وفي بوكس الكهرباء ابو سلم داك مدسوس وراء الحيطه تمشي عليهم توووش تديهم القصة والمحل وين واهم حاجة (حق الفطور علينا) تمشي تلقاقه قدامك

للاسف ده الواقع ,,
غايتو ناس الحكومة ديل الا تجيهم ريح عاد ديك تطفشهم من الدنيا وسقطا.