سبحان الله, المرحومة كانت بتحب السكسكانية جدا !!

09:40 AM May, 12 2017

سودانيز اون لاين
محمد حيدر المشرف-دولة قطر
مكتبتى
رابط مختصر

..


شايف أعلنوا الحيكومة ..
مبروك نجاح حاتم السر ومبارك الفاضل وابراهيم الميرغني .. حاتم للتجارة ومبارك للاستثمار وابراهيم حاجه كده ..

ذكرني هذا الاختيار بي قصة لطيفة حصلت لينا في مقابر البكري اثناء مراسم دفن احدى خالاتنا رحمها الله .. اذكر ان اغلبنا لم يتمالك نفسو من الضحك رغم الموقف المهيب والحزين في ذات الوقت ..

كان "كمال آفرو" وهو احد ظرفاء مدينة امدرمان يراقب مسألة الدفن بانتباه وهم يهيلون التراب على الققيدة .. وفجأة تقدم خطوتين للامام وأمسك بحفنة من تراب القبر .. والتراب في مقابر البكري يتخذ شكل حبيبات دائرية لينة الى حد ما ولونها بني داكن ..

خمش "كمال آفرو" حفنة من التراب وتفحصها بيديه باهتمام .. نظر للقبر مليا ثم التفت الينا باسطا يده بحفنة التراب وقائلا في تأمل:

سبحان الله المرحومة كانت بتحب السكسكانية جدا !!

وبالفعل كانت حبيبات التراب اشبه ما تكون ب "السكسكانية" ..

مبروك يا مبارك وزراة الاستثمار
ومبروك يا مولانا التجارة

تنبيه:
هذا البوست لا علاقة له بتراجي نهائيا

ود المشرف سلام يغشاك ..


طيب ليه ما جيت اقترحت زيادة الكعكة بالسكسكانية ؟
كنا فاتحين بوست لو قصرت الكيكة الزلابية موجودة
هههههههههه . لكن بيني وبينك ديل حاشا عليهم .....
ما ناس سكسكانية ناس جاتوهات وانت ماشي لي فوق
هههههههه .

بلاهي شوف الكيكة عملوا فيها شنو ؟

ههههههههههههههههه

http://www.up-00.com/

ربنا يرحم خالتكم ويعوضها الدايراه في الاخرة .

تحياتي يا دكتور ...
ياخي الفقرا اتقاسمو النبقه ... بكري قال اتلقي 1500 طلب توزير ...
ههه نبقه والله ديل جمل ما يحوق فيهم ... الكيكه بت اللذينا
حلوا حلا ... الكل جاري وراها داير ليهو انشاالله لحسه ...

ياخي قروبات بلدتنا البسابير من امس وبكل اطيافها السياسية
محتفلين بي إبن البسابير الاستاذ المحامي حاتم السر سكينجو
كأول بسابيري ينال لقب وزير ... وفي البسابير بدا دق النحاس
قريب منتصف الليل ... مبروك لابن البسابير الخلوق المهذب
الوطني الشريف النظيف العفيف الواصل البار باهله ...
ونسال الله له التوفيق في الامانة التي كلف بها ...

من طرائف التشكيل الوزاري الجديد دا
وزير الري والموارد المائية
إسمو عطشان
بعني إكان ما هو روا تب
مافي زول بلقى ليهو جُقمة

سيف سلام يغشاك ..


لكن ما ارويتنا بالخبر دا ههههههههههههه .
من طرائف التشكيل الوزاري الجديد دا
وزير الري والموارد المائية إسمو عطشان
يعني من اليوم الموية حا تقطع ؟

تسلم ومشكور حقيقة ضحكتني ههههههههه .

هههههههههههه ..
اسمو عطشان يا سيف ..
then it suits him indeed
أمبارح كنت بقرأ في بوست عن ازمة المياه في حي العرضة !!!

بت عمسيب ..
ازيك يا حبيبه ..
كعكة شهداء سبتمبر يا منى ..

كعكة الموت !!

تحيه يادكتور المشرف ،،،
ما الذي تتوقعه من هذه التشكيلة الجديده
وهل من أمل في تغيير فعلي سيتم تفعيله علي أرض الواقع
ينتج عن مائير في مصلحة الوطن والمواطن العادىهل انت متفائل ام متشائم ام لديك مالم يطلع عليه أحد
رؤيتك الكامله للوضع الحالي تهمني ليلتي في ماتجود به من تحليل سياسي
احترامي

الوطني سجل هدفين في يوم واحد
جنن البارون
وشكل الحكومة

هدفان من تسلل واضح
البارون انصح من الحكومة
والحكومة لن تحل اي مشكلة من مشكلات الشعب
نفس الوجوه
نفس الفكرة
ذات الفريق
والمدرب فاسد
والحكم
....
لقد ازفت
الكرة الان في ملعب الشعب
هيا للتغيير

مبروك للبسابير يا صلاح ..

قبل قليل كنت اتحدث مع بعض الأصدقاء حول المحاصصات وكيف انها (للأسف الشديد) أصبحت تلبي احتياجات زائفة وغير حقيقية في المجتمع السوداني ..

وكأنما الخلاص عاد مرتبطا بالتوزير .. اعني توزير احد أبناء المنطقة او العمومة او نحو ذلك ..

ملهم يا فنان ..
كيفك وكيف كيفك آ زول ومشتاقين ..

أرى الأشياء من منظور مختلف قليلا قد لا يوافقني فيه الناس ولكن .. انظر لاي عملية سياسية وفقا لمعطياتها الأولية .. والمعطى الأولى لحوار الوثبة كانت الظروف الاجتماعية والسياسية والاقتصادية التي فرضت ضرورة هذا الحوار ... وبالتأكيد كانت انتفاضة سبتمبر هي حركة المد القصوى لتلك الظروف .. دماء أكثر من 200 شاب وشابة سودانية اهرقت في ظرف 3 أيام كانت مهرا غاليا دفعه الشعب السوداني نحو ظروف إنسانية واجتماعية ومعيشية وسياسية أفضل .. لذلك -يا صديقي- يجب ربط كل العملية السياسية ومخرجاتها بذلك الثمن الباهظ .. والحال كذلك, هل هذه النتيجة جيدة وفقا لهذه المعطيات ؟!

بالتأكيد الإجابة لا ..

لو أنهم فقط ارتقوا للتحديات الأساسية بدلا من بذل الترضيات هنا وهناك لكان ذلك افضل بكثير .. ماذا عن حكومة تكنوقراط ذات فعالية عالية وكادر بشري مؤهل وحجم اداري اصغر بكثير مما نراه .. الم يكن ذلك افضل يا صديقي ؟!

كمساري سالوه من الحكومة الجديدة قال ليهم نفس الركاب
بس رفعوا معاهم كم واحد في الشماعة

أضحك الله سنك يا محمد حيدر

قصة في محلها وتوقيتها

* ليسوا بتكنوقراط ولاكفاءات !
*حكومة مترهلة ومتكرشة -أفرزتها الضغوط والترضيات !
*
تمخض الحوار طويلا ثم ولد فارا !
* أفرزت المشاورات جملة من حملة السكاكين المشرعة نحو الكيكة والغنيمة !
حكومة يرأسها رئيس وزراء له مايقارب ال30 عام في الكرسي !
* مخرجات الحوار الهزيلة سطت عليها بدرية سليمان وأستبدلتها بحزمة إنقاذية !
* الحكومة تسير في نفس الخط والتوجه الفسادي والإستبدادي !
ولاعزاء للحالمين ولا لمن يسعون لعمل شربات من الفسيخ المتخثر !

حكومة يافيها يا أطفيها!ومن فاته ميري الوزارة يتمرغ في تراب البرلمان ! تمخض الجبل فولد جملة من أصحاب السكاكين المشرعة نحو صدر الغنائم ودسم السلطة !
*وبدرية سليمان تسبدل مخرجات الحوار بمخرجات سلطوية بلا رتوش ! وأحزاب " الشنط الوهمية تنازع الشخصيات "القومية" المقاعد والمغانم !* والنتيجة ميلاد حكومة مترهلة تشكل إضافة نوعية لطاقم الفساد والإستبداد وتعانق المحسوبية والترضيات والمساومات وتفارق الكفاءة والتأهيل والحس الوطني والنهج القويم ! ولازال البشير في كرسي بالقصر و ولازال بكري حسن صالح علي دست السلطة لأكثرمن ربع قرن !
* ومن فاته ميري الوزارة يهدد بحمل الكورة والخروج! ولاعجب فإنها حكومة يافيها يانطفيها !* ومع هذايسيل لعاب الحالميين بالفتات والكرتة طمعا في مغنم ويعرضون خدماتهمبصورة مهينة وبلا كرامة و ولا إحترام لذات أو ماضي بل بصق علي التاريخ!

مسا الخير
ياصديقي من ابو حريرة لعثمان عمر حاتم سكسكانتو بجوز الهند موش سكسكانيتنا نواحي الكلاكلة
مرة اشتريت لي فول من جبرة ابيااااض وناعم وشهي المهم لامن فرشناو في الكلاكلة قتا ليهم قافشا اتو عرفنا ايو شئ الفول ده كلما اتجهنا جنوبا ازداد غباشا

قالوا في خالة عندها سكري مرتفع


ومع دا بتمووووت في الشعيرية


اها كل ما تلاقي ليها شعيرية في الصينية تتمغص وتقوووول:


وووووووب علي انا من الشعيرية ...

اها هسي مع بوستك دا ممكن تقول :



وووووب علي انا من السكسكانية :)

مالقينا لينا فيها معلقة السكسانية دى
ماتقول كنت..
المنسق العام للتجمع الديمقراطى بكندا.
اى والله
ههههههه
كيفك يا دكتور.

انا لله وانا اليه راجعون ..
أوجعني هذا الفقد الجديد والكبير يا أصدقائي ..

رحم الله زميلنا كانتونا "كباشي الصافي" رحمة واسعة ..
والهم آله وذويه واصدقاءه الصبر والسلوان وحسن العزاء ..

ما أسوأ ولا أسوأ من فتح المنبر ليلقاك السواد يجلل الواجهة ..
ينقبض قلبك قبل أن تتطلع بهدوء للعناوين ..
والسؤال: من من الأصدقاء ؟!

فقد عظيم والله .. فقد عظيم ..

منعم يا صاحبي ..
تحياتي وانت تمارس هذه السخرية الرفيعة ..
والامر أشبه ما يكون ب "دافوري" مولع بالفعل ..
وفي البال شهوة المريد:

"شهوة لوجوه الرجال الذين بنوا فى المضافه
بيت الكرم
وبيت النكات اللئيمه
بيت التهكم من كل عال قوى
وبيت المساء الطويل بطول الجدال
واخبار كل البلاد كأن الحصيرةَ من تحتهمْ
هيئةٌ للأُمَمْ"

فقط يا ليتني يا صاحبي أشاركك ايمانك الجميل بالثورة والشعب والتوقعات الجميلة !!

أبا جهينة ..
زارتنا بركة زول ما ساهل والله ..
شرفت بمرورك جدا..

أستاذ كمال عباس ..
تحية طيبة يا عزيزي ..

ونعم هناك مفارقات كثيرة .. أهمها ما عددته انت هنا .. لاسيما تناقص هامش الحريات ..

يزداد الفول غباشاً نحو الجنوب!!

تعرف يا حامد !!

أسوأ مافي الموضوع هو الاستريوتايبق او الدمغة الفاضحة ..
وكأن لسان حالهم (اي المؤتمر الوطني) يقول:
مولانا ده بحب السكسكانية ولا يستطيع مقاومتها ..
فلنضع له صحنا شهيا تحت مشهد الجماهير

لينا الله وسواد الفول ..
وطوبى لزيت السمسم ...

سلامات يا دكتور
رغم انه الواحد ما كان ماخد موضوع الحوار دا بجدّية لكن من باب اليأس الشديد ومع غياب اي أمل في تغيير في المستقبل القريب قلنا ماله اهو قشّة نتعلّق بيها عسى ولعل
لكن يبدو ان الحكومة فسّرت إشارات رفع العقوبات و الرضى الخليجي مع الضعف العام للمعارضة و انشداه الناس بالمعيشة و صعوباتها واضف البهدلة التي تعيشها الحركة الشعبية و حركات دارفور و دولة الجنوب
فسّرتها بشكل خاطئ كالعادة, فحتى ما انتوته من مشاركة الناس و حوار و بتاع الذي ابتدرته اثر الضيق الذي كانت عليه حينها تراجعت عنه !
حقيقة من لحظة تعيين بكري رئيس وزراء كانت الرسالة واضحة, لا حوار يفضي لتغيير أو مشاركة حقيقية في السلطة
شوية مناصب تعين اصحابها على المعايش البقت قاسية دي, و من أمّل في مخرج و حل ياتي من الحوار الوطني فليركب هنا أو أينما يحب

سقطت كلمة الوطنى سهوا ياصديقى
فهل يعنى ذلك شيئا اعتقد ذلك
يالشفافية الطرح..ويالبؤسهم ياصاحب.
دم بخير والوطن ايضا.

اللمين ود موسى البشاري
حبابك 10 آ زول

الشعيرية, كما السكسكانية, بالغت
والله صحي ..

لم يتغير شيء يا عزيزي .. أحمد وحاج أحمد .. ذات التركيبة .. ذات الملامح .. ذات الشبه

رمانا السودان القديم "الملأ السوداني" بفلذات أكباده ..
لم يتخلف منهم أحد ..

لم أتعرف على عدد كبير من أسماء الوزراء .. وظننت -وبعض الظن إثم, أن بعضهم جاء من جهة مخرجات حوارهم الوطني .. ... .. كل ظن جميل في الناس ديل إثم ولا إستثناء

كيفك يا دكترة

بالله عليك في إسيتهتار بالأسماء الهرعت للحوار وبشرت بيه والآمال العريضة الفتحت أبوابها لينا حسب كلامهم ولقاءاتهم التلفزيونية ولجانهم وما إنبثق عنها وميزانيات فنادق وتذاكر ووووو
قالوا المؤمن لا يلدغ من جحر مرتين (إعتقد المؤمن إشارة هنا للشخص الحكيم)
مناوي إتلدغ في أبوجا
والحركة الشعبية إتلدغت في نيفاشا أها ديل مرتين ولا ما مرتين
إجوك ناس السيسي وأبوقردة في حواااااااار الدوحة
وجمااااااااااعة كدا في الحواااااااار الوطني
عليك الله الحكومة ما ليها حق في البتسوي فيهم دا
لكن بس نقول ليها فهم إنه كل المعارضين ديل قابلين للإنكسار كل في مرحلته وجولة حواره دا مفهوم نعم ضيع البلد لكن في النهاية حيضيع الإنقاذ ذات نفسها
ما يفرحوا بإنكسار علي الحاج والسنوسي وغازي ونخبة من المثقفين الدارفوريين والسياسيين الوصوليين لا سيما من أحزاب الوسط فالشاهد أن اليسار لا زال صلباً/ مبدئياً ومقاتلاً

عبدالصمد
تحياتي يا صديق ..

هو تحالف "السودان القديم" يا عزيزي .. القفطان والجلابية وبدلة العسكر .. اللامبدئية تسود المشهد السوداني الآن ومن المهم أن يبقى اليسار متماسكا ومبشرا ونذيرا ..

زمااان يا عبدالصمد كتبت أنا في هذا المنبر أن من الجيد أن تتمايز الصفوف .. من الجيد أن تمضي سيرورة المنظومة الخالفة لحسن الترابي نحو نهاياتها .. فليحكم "السودان القديم" حينا من الدهر .. وأتمنى أن يحافظوا على الحد الأدنى من الوطن .. وهذا أقصى ما يمكن لهذه المعادلات الشائهة جدا أن تنجزه

دكتور محمد الحسن كيفك يا رجل يا سمح والأولاد

يا زول السكسكانية خلتنا لافين صينية ... حول الكوز
بكرة إن شاء الله يزول هذا الهم الثقيل عن السودان ... قول يا رب

محمد قاضي ..
كيفك وكيف كيفك يا صديقي ..

سكسكانية جد جد يا محمد .. تحالفات أوسع بين الاستبداد والطائفية (تجارة واستثمار واتصالات و ... سكسكانية كاااربة) ... ربك يسهل

منعم سيد أحمد
تحياتي ..

السكسكانية دي المتر بتاعها غالي جدا خلى بالك .. بالشيء الفلاني

أجمل ما تكون السكسكانية عندما تكون في فطور العريس .. بيد أن ليوم الصبحية سكسكانيته الجيدة كذلك .. الشاهد في الأمر أن سكسكانية فطور العريس اقرب للاستثمار .. بيد أن التجارة لا تقل بأي حال من الاحوال من سكسكانية الصبحية والله أعلم.

محمد البشرى
تحية طيبة يا عزيزي..

تمرحلت رؤية المؤتمر الوطني للحوار منذ خطاب الوثبة وحتى مخرجات الحوار .. وهذا ما كنا نتحدث حوله من اخواننا الكملوا زينة الحوار وحققوا للمؤتمر الوطني مآرب اخرى..

ما ذكرته صحيح تماما يا عزيزي ... تغيرت المعطيات ولم تكن هناك رغبة حقيقية في التغيير ..

تعرف !

مسالة التوقعات .. كلنا انتظرنا مخاض هذا الحوار وفي النفس شيء من حتى .. على الاقل أن أن ينصلح الحال ولو قليلا .. جات بدرية جاطت المسألة جوطة شديدة جدا .. قبل أن تحل علينا جائحة السكسكانية دي ..

د المشرف

السيد ابراهيم الميرغني وزير دوله في وزاره الاتصالات ( هذا للعلم )

الاخ العزيز الزبير "الختمي"
تحية طيبة ..

نتمنى له التوفيق كوزير دولة بوزارة الاتصالات في دولة الاستبداد والفساد ..

Quote: تنبيه: هذا البوست لا علاقة له بتراجي نهائيا

ما قلت ......... شنو يا عمك عملت زغبير من بدري..... أنا هسي جبت سيرة تراجي؟

شكرا ود المشرف

أنا (لا أحب تخديش وجه الصاحب)

لكن تذكرت اليوم درسا أثناء دراستنا للتطور الدستوري في السودان على يد استاذنا الدكتور محمد نور الدين الطاهر

ذكر أن بعض حقائب حكومة السودنـة (فيها 13 وزير فقط لاغيـر) 3 حقائب للاخوة الجنوبيين مكتوب عليها (وزيـر بلا وزارة)

(طبعاً نسأل نفسنا ليه انفصل الجنوب) وكلمينت امبورو وسيريسيو ايرو وبوز ديــو (بلا وزارة) وناس تقول ليك كلام يوديك غرب وشرق

المهـم سألنا (طبعاً) كيف يعني بلا وزارة وكان في الخاطر المراهق وقتها (يعني وين يمشي الصباح ومسكين ما عنده وزارة) ؟؟؟؟؟

جماعة الأحزاب ديل (معزومين) على موائد غير الكرام... وهـم (فعلاً) بلا وزارات وأحسن ما يمشو أصلاً ...... أو يداوموا من (لندن)

إذا كان مسار الوزير لا يستطيع اعفاء (جادين) مدير سونا وإذا كان وزير العدل يزور حراسـة مقبوض فيها (مدير تلفزيون سابق) فكيف يدير أي منهم (وزارته)

وبعضهم اشتكى بأنه (لا يستطيع تعيين سكرتير له) هي سلطة ديكوريـة فقط لأغراض الدوكـرة

ولأن (الزمار يموت ويده تلعب) فالاخوة في الحركة الإسلامية يجيدون المعارضة حتى وهـم (في الحكومـة)

تخرج مظاهراتهم الهتافية ضد (مؤامرات مفترضة وأعداء مفترضين ودنا عذابهم وأعدوا لهم وهلمجرا) وهم في سلطة لا يستطيعون أو لا يريدون فيها توفير مياه شرب نقية

فهذه الوزارات مجرد (شراك يعني فــخـــاخ) لهؤلاء المستوزرين الجــدد

سيجري حساب عدد كبابي الشاي التي يحتسونها وعدد وأسماء الزوار الذين يترددون عليهم وعدد الابتسامات التي يبتسمونها

وستجد طريقها للارشفة وللصحــف إن لم يكن عاجلاً فآجلاً وللضمان كدا فعلى الأحزاب ألا تلعب بهؤلاء اللاعبين في أي (لعبـة) قادمــة

وللذاكرة الضعيفة هل رأيت كيف تم إلغاء قرار الوزير الاتحادي الفحـل المفوه عثمان عمر الشريف بالسماح باستيراد السيارات ؟؟؟؟؟

أحمد الشايقي

سلامات دكتور المشرف
اتفق تماما مع مقاله مولانا الشايقي بخصوص ديكورية الجُدد ..الحكومة الخفية هي التي بيدها كل القرارات المهمة
منذ نيفاشا ووزارت الحركة الحركة الشعبية نٌقلت معظم الصلاحيات لامناء الوزارات وهم اما مؤتمر وطني او جهاز امن
وكل منصب وزير له مواز في الظل , قبل مدة نٌقلت معظم صلاحيات وزير الداخلية لمدير عام الشرطة وصلاحيات وزارة الاستثمار الي
مفوضية تشجيع الاستثمار , مجلس تنسيق الاجهزة العدلية برئاسة رئيس الجمهورية يعني القضاء وحتي المحكمة الدستورية تحت الجهاز التنفيذي الخ..
القادمون الجُدد يٌسمح لهم بالنقة في مجلس الوزراء و البرلمان و التصريحات الصحفية ولكن القرار الفعلي في يد الغول.
اما النقطة التانية ستمارس وتتعلم الحكومة الشفافية للمرة الاولي في الجٌدد وسيكون سلوكهم مراقب ومادة ثابتة للصحف
و ستكون مرحلة حرق و اغتيال الشخصيات والابتزاز وبالذات لمنتسبي الحركات المسلحة عشان الفرفرة.