بهدوء حول تحويل الرصيد

05:46 AM May, 09 2017

سودانيز اون لاين
عبدالحفيظ ابوسن-no where
مكتبتى
رابط مختصر

ماهو وجه الشبه بين السلطة وشركات الاتصالات ؟

الازدراء بالمواطن / العميل
خداع المواطن / العميل
اجبار المواطن / العميل علي الموافقة علي العقود الاذعانية
استغلال الدين لخداع المواطن / العميل
وامتلاك المال
السلطة تسير تبع المال تحميه وتزيده علاقة طفيلية

اذكر اني كتبت منبها حول الامر قبل شهور . حين اعلن وزير المالية ذلك
اعلنه كمقترح سينفذ
ولا يصدقون الا فيما ينغص حياة المواطن

ما كثيره مسكر فقليله حرام
قاعدة شرعية حفظوها ليها زمان
ما يجي واحد من اياهم يطلعها آية ويقول جابتها الواشنطون بوست

الاسلام مكون اساسي للتراث والثقافة السودانية
ومؤثر بشكل مخيف وفعال !
لذا ألحقت هيئة الاتصالات قرارها بفتوي . فتوي زي حقات الونسة مع ستات الشاي
رغم تأثير الفتوي في ارزاق الناس
واحد منهم اسمو عبدالحفيظ الاسم سالم
قال فيها شبه ربا
طوالي اتذكرت
شبهة زنا
شبهة سكر
شبهة زندقة
رغم انه جاهل وهم جاهلون بقاعدة شرعية اخري برضوا حفظناها ونحن صغار
ادرأوا الحدود بالشبهات
ما يجي واحد منهم ناطي يقول آية . فتوي مني ساي دة حديث
فرقا شتى بين انسانية الاسلام وجشع المتأسلمين

قال حاسبه الله ومن يأتمر بأمرهم
شبهة ربا لكن ممكن تحول 500 ج
شفتو الفتوي كيف
الخلا ال500 ج ما تكون شبه ربا والاكتر ربا شنو
ما اياهو الربا زاتو
الربا في الفعل نفسه
لكن هم لا يفهمون الا في الكميات قبل فترة وزير الثقافة قال جبنا كم طن كتب لمعرض الخرطوم الدولي
يعني الكبيرة حقتهم براهم هم يتحملون ذنبها رفقا بالمواطن
وقياسا بالمناسبة قياسا دة برضو مصطلح
قياسا علي ذلك
لو بتسكرك قزازة تشرب قزازة الا كباية
مش سيادتو قال ال 500 ج ما ربا لكن الاكتر ربا
اها قرضو علي إلا دي

نبيض النية
ونقول الحكومة وهيئات الاتصالات خلت كل الربا الواضح ومسكت في شبهة الربا
دايرة تزكي المواطن
دايرة تودينا لي الله نضيفين صحن صيني بس
تموت تخش الجنة طوالي
وزي ما قالت النكتة ومعاها اعتذار
دايرة تنضف المواطن

المودر بفتش خشم البقرة
المواطن بقا مودر
مودر سبل كسب العيش كل الاعمال المربحة قابضينها الجماعة ورهطهم كان وظيفة ولا تجارة ولا ولا
بالذات المواطن الما عندو ضهر
شغال تحويل رصيد
بدون رخصة ودي عقوبة يعاقب عليها القانون مفروض .
تقول داير رصيد يقول ليك ناس فلان او فلانة بحولو رصيد
قاعدين في بيوتهم وشغالين
ولدها برسل ليها مصاريف الشهر وهي بتبيعو ولقت الشغلة مربحة بقت تشتري رصيد وتبيع

الولادة البقت بالملايين
واحدة راجلها خت ليها مصاريف الولادة وسافر
بتلد طبيعي
الدكتور قال عملية
من رسوم 200 ج لي رسوم 5000 ج
اها الدنيا ليل
لا بنك فاتح ولا زول يدينو منو
بسيطة
لا ما بسيطة ناس المستشفي دغرين بس ما مسلمين تموت تحيا تدفع قبل العملية
برضو بسيطة
راجلها يحول رصيد ويفكو عند اقرب بتاع رصيد
واحتمال يلقو ممرض ولا دكتور يشتري منهم

الصالح العام الشرد نصف العمال والموظفين يعود من جديد ولكن هذه المرة ليس لعدم المولاة بل لنهم الرأس مال الاسلاموي الكريه .
استكتروا علي هذه الشريحة انها تعيش مستورة وحلفوا الا يواصلوا في قبحهم وكرههم لهذا الشعب الجميل .
شوفوا حجم الكارثة الحا يعملها هذا القرار الكريه تشريدا وعطالة ..
الله يقرف الاسلاميون همهم تقفيل ابواب الرزق وإشباع نهمهم ويا ليتهم يشبعون...
ابسن اخوي حي على السلاح

آي والله يا علي
الحكومة طوالي كراها في البنزين
وتضيق في معايش الناس
خايف ما يخلو للناس طريقة الا الحرب الاهلية

بالله وِصلوا الناس في أضيق حتات الرزق
كويس إنو عمكم جحا ما حضر زمنهم دا
كان عذرو يكون شنو ما عارف

يحبوا المضرة زي عيونهم ياخ
هسي شوفهم ساكين الناس بي سيرة رمضان دا من متين؟
باقي ليهو اربعه شهور
باقي ليهو شهرين
برامج رمضان
الجديد في رمضان
ياخ نحن في الدوحة ما عارفين شهرنا الفينا دا أمشير ولّ طوبة

منقول

الخرطوم: لبني عبدالله
قالت منظمة الشفافية السودانية، إن دراسة حديثة للعام 2017 حول خدمة تحويل الرصيد في السودان، كشفت أن الفئات المستفيدة من تحويل الرصيد وفقاً لنسب محددة هم 31% طلاب، و36% موظفين، و33% عمال، فيما بلغ متوسط تحويل من الراسلين للمستلمين من الرصيد من جنيه الى 50 جنيه نسبة 20%، ومن 15 جنيهاً الى 300 جنيه 51%، ومن 300 الى 450 جنيهاً 20%، ومن450 جنيهاً فأكثر 9%.
وقال رئيس منظمة الشفافية، د. الطيب مختار، أمس، إن تحويل الرصيد جغرافيا من الجهات المرسلة للجهات المستلمة في ولاية الخرطوم الكبرى يبلغ نسبة 82% الى كل غرب السودان بنسبة مستلمين 45%، والولاية الوسطى بلغت نسبة المستلمين 10%، و الشرق نسبة 10%، وولاية نهر النيل 8%، مبيناً أن الدراسة حددت أن نسبة الذين يستلمون الرصيد خارج ساعات العمل يبلغ 77% مقسمة بواقع أن 65% يستلمونها في الفترة المسائية، و40% في العطلات و23% اثناء ساعات العمل، بجانب 8% في فترة بعد الظهر، موضحاً أن المبالغ التي يتم تحويلها تبلغ 2 مليار جنيه في العام، في الوقت الذي وصلت الايرادات لقطاع الاتصالات 57 مليار جنيه لعدد 3 شركات اتصالات، بينما ميزانية الدولة 70 مليار، وتابع بقوله: "بنك السودان عينو في الفيل ويطعن في ضلو"، وأضاف: "بدلاً من النظر لمبلغ 2 مليار يتم تحويلها للاحتياجات الاجتماعية وعبارة عن مصاريف".

اها يا معاوية
شوف الاحصائيات دي
انا مرة حصلت لي
بتي المغرب في الجامعة وقالت مفلسة حق العشاء ما عندها
اسعفتها سريع بي 55 ج رصيد باعتها بي 50 ج
وتاني يوم حولت ليها في حسابها
زمان تبيع ساعتك لو انسرقت وانقطعت في بلد غربب
هسة طلب من صاحب ويحول ليك

بارك الله فيك الاخ عبدالحفيظ ....كفيت ووفيت بالبوست .. وبالاحصائيات.

ميزانية تلات شركات 57 مليار
ميزانية الحكومة 70 مليار
الواحد بقا ما مستغرب كدة من دولة شركات الاتصال
السؤال الملح علي
لماذا الآن
لماذا هذا القرار الآن
من المستفيد بشكل فردي وشخصي نعم بهذا الابتذال رغم حججهم في الحتات الصعبة
الدين و الامن
كفتوي قالوا شبهة ربا
وتستعمل في دعم الارهاب
ثم سؤال
هي البنوك هسة معذبة الناس في الصراف الآلي
ايا كان
عذبتو الناس ونجضتوهم

ممكن الناس تعمل حملة رأي شعبي ضد ابقاف تحويل الرصيد..
معروف انو الانقاذ لا يهمها الناس تموت او تحيا. بيهمها العائد المالي لناسها الكبار ولكن حملة الرأي العام في الوسائط و غيرها يكون
كتسجيل موقف.

هم ماشيين يخموا الكتلة النقدية البرا بنوكهم و لا يهمهم انو المواطن في اقصى البلاد حيث لا يوجد بنك او صراف سيتمكن من الحصول على المال في الوقت المناسب.

لنفترض ان مواطنا يقيم في قرية تبعد 4 ساعات من اقرب بنك و افاده البنك بوصول حوالة له بمبلغ 500 جنيه. كم من المال سيصرف من اجل ان يستلم هذا المبلغ.
و ما مقدار الجهد البدني و النفسي و الصحي؟

الناس الي في الخرطوم بيفتكروا كل السودان زي العاصمة

اخيرا هيئه علماء السودان تصحو وتقل خيرا فى حق المواطن .
منقول : الانتباهه 10 مايو2017.
هيئة العلماء تنفي فيما أكدت هيئة علماء السودان بعدم وجود حرمة او شبهة ربا في عملية تحويل الرصيد،
حيث أوضح عضو هيئة علماء السودان ، عبدر الرحمن حسن ل(الانتباهة) أن عمليات تحويل الرصيد تعتبر لاي شركات اتصالات عبارة عن خدمة ويمكن للمواطن الاستفادة منها من خلال المحادثات او الرسائل النصية او عن طريق بيعها كرصيد .
فاذا كانت كذلك فلا يمكن أن تكون المعاملة بها ربا او شبهة ربا لانها تتم عبر الادارة فيمكن للشخص أن يتعامل بها حسبما يريد.

مرحبا عاصم
كتر خيرك اول وتاني
اصلا هي لا ربا ولا جمبو زاتو
القروش دي بتخش الموبايلات بتتحول لوحدات ولي سلعة تانية
ممكن تستخدمها في اتصال ولا نت ولا ولا
ولا تبيعها كمان
الربا دة واضح ما داير اجتهاد
وهم عارفين محلو وين
التحايل وفقه الضرورة دة وراه مصلحة للاسف مصلحة ضد المواطن البسيط
وحينطحن المواطن وينهزم اذا كانت مصلحتو قصاد مصلحة شخص واحد من السلطة
بل سينهزم كل الوطن اذا كان ضد مصلحة نفر واحد
حتي لو ينقسم

الاخ زول واحد .
اظن انى كنت اول من طرح الموضوع عبر المنبر وحسيت انو اكثر من لايدركون اهميه تحويل الاموال عبر الرصيد هم ناس مقيمين خارج السودان .
اما الناس بالداخل . اغلبهم ان لم يكن كلهم يدركون اهميه الخدمه اما بالاستفاده منها كمستقبل ومستفيد او مرسل الرصيد الرصيد الذى قد يكون فعل ذلك لنجده قريب او صديق .

http://sudaneseonline.com/board/490/msg/%D8%A7%D9%84%D9%85%D8%B1%D9%83%D8%B2%D9%8A-%D9%8A%D9%82%D8%B1%D9%8F%D9%91-%D8%B3%D9%82%D9%88%D9%81%D...8%AF-1494170799.html

ل
حين
ميسرة