أبو حجار طريق اللواري القديم

08:54 AM May, 07 2017

سودانيز اون لاين
أبوبكر عباس-الإمارات
مكتبتى
رابط مختصر

تزوجت شهر اتنين سنة أربعة وستين، أمها كانت معترضة على العريس، كلمتها تحتس أبوها عشان يرفضو، لكنها كانت بتريدو.
أمها قالت ليها: بباينك، الولد كويس، لكن امو لئيمة، وما عندها غيرو وفوق كدا شايقية ومشلخة.
قالت ليها: ح تجينا من مروي لمدني من سنة لسنة بتحملها.
ردت الأم: الشايفاهو عيني دي؛ بتكتل راجلا وبتجيكم تقعد ليك في قلبك

كراوي حبيت أم البت دي

يا مستنير
الا ابوحجار دي
ابوحجار دي خط أحمر فقد ولدت فيها السيدة الفاضلة زوجنا
الأستاذة نزيهة محمد الحسن عمر ادريس العبادي
شفت كيف

رحلوها مدني وسكنت اشلاق البوليس، لم تكن الاشلاق كما عليه الآن،
كانت بيوت محترمة جدا
زوجها بالرغم من إنّو عسكري، إلا أنه كعادة أولاد الشايقية وجيهين وحنينين وبقدروا المرأة.
قالت لمحدثها بقطية سوق بابي حجار وهي تستعيد ذكرياتها:
مدني دي في الستينات لم تكن تقل عن باريس في شيء

الراوي يقصد بعدم الاحترام لبيوت الاشلاق هسع، انها صارت خرابات من الاهمال

زايد إنّو اي تشابه مع الواقع، محض صدفة

يا عود، هو نحن نقدر نهبش ابو حجار
هي معشوقتي التالتة من المدن بعد دبي ومدني
التحية للست نزيهة وجميع أهل ابوحجار اللطيفين

واصلت:
وصلت مدني يوم خميس شهر اتنين سنة أربعة وستين، بعد احتفالات ناس الاشلاك بينا وكرمم،
الخميس أليعزر كنت مع خدر قاعدة في لوج سينما الخواجة بنحضر في فيلم:
امرأتان لصوفيا لورين
بعد الفيلم مشينا البيت كداري وكان ماسك يدي من باب السينما للبيت

سيد البوري البسمه في قصتها دي، سفتو قربت تقع من رخية شلوفتو وحيرتو

تصويب:
- الخميس البعدو
- سيد اللوري البسمع

شهر خمسة سنة أربعة وستين ابو خدر مات، تذكرت كلام أمها، قعدت تبكي بحرقة، خدر افتكرها متأثرة فعلا بموت ابوهو،
أكبر القصّة دي فيها
بعد أربعة شهور وعشرة يوم بالظبط، الشايقية كانت متحكرّة في الأوضة التانية واحتلت البرندة احتلال تام

قالت: فال الله ولا فالك يا أمي، يا سحارة

شهيتنا في ابو حجار
من المدن الجميلة اتمنيت ازورهااااااااا

سلام يا باسطة،
ابو حجار عجيبة وعندهم عصيدة دخن بملاح كجيك، لو أكلتها، صعب صعب تفوتها
باقي لي نسوان السوق بترترن فيها عرق

الزولة البحكي عنها دي كانت بتعاملني تعامل خاص من دون الموظفين، ما عارفها بتريدني عشان حلاوتي؟ولّ عشان كنت بستمع ليها بمحبة؟

قالت لسواق اللوري المتلش:
أم خدر دي لئيمة لؤم لؤم ما بتوصف ومن غير سبب، ما بتمر ساعة بدون تلصق ليك كلمة حامضة بالكسرة الشايقية ما تتبلع،
المعيشة معاها شبه مستحيلة وفِي نفس الوكت خدر لذيذ لذة تقول تبلعو بسفنجاتو.
المهم زي ما بقول تبارك:
قبل ثورة أكتوبر بيومين صبت آخر مطرة في خريف السنة ديك، الجو بعد العشا بقى جو فول، نسوان الاشلاك كلهن شدّن الحفر،
ربك ومكرمو المرفعين (النسيبة) شخرت شخير أهل الكهف

خدر كان بحضر ليهو في كورة بين برشلونة وريال مدريد، لمان شمّ ريحة العتقة، قفل التلفزيون وجاء ببنطلونو الكاكي والفنلّة الداخلية والقاش مفتوح، لقى المرفين نائم، خطفتي من النار وعلي الغرفة.
وحات الله، قبلتو وهو شايلني في نص البرندة قبلة حسدتني عليها صوفيا لورين، وسمعت صداها في خشمي الكبير دا.

بتاع اللوري بلع السفة وقال ليها وخشمو مليان لعاب:
مرّة حضرت لقاء مع براد بت قالوا ليهو منو من الممثلات بتحب تقبيلها
قال ليهم: جوليا روبرتس، فمها كبير بتسمع للقبلة صدى

يابكور انت كتاب يااااخ
بس اختا المطاعنة في السرد وللقراء

والله يا بكور قصة حلوه


لكن وكت فت ابو حجار لو ما نزلت علي تنقرو باريس النيل الازرق تكون بالغت بوليغ شديد

خدرة

ماء

وش حسن

سلام يا بكور
لكن الزمن داك كان فى تلفزيونات فى مدنى و للا كمان كان فى حاجة اسمها برشلونة و ريال مدريد؟
...

يا أسامة يا صديق ..
بكور دا زول واصل مقامنا معاه زي أبوبكر..
بعدين القصة دي أساسا عبارة عن C.V يحنك بيهو صاحبو معاوية الزبير عله يرعوى.
التحية له ولك.

التحبة ليك مولانا الملك

الزول كتاب لكن مرات مت بتعرف هظارو من جدو

لك خالص التحايا....

نزلت في حتة اخطر من تنقرو باريس يا معتز
تصدق مرّة حضرت لي قعدة في الشاطئ ضابحين فوقها سبعة خرفان،
أصلاً المطرة قطعت السكة حديد في ابي حجار
القطر كان فيهو موظفين كتار ماشين الدمازين
سقناهم الميس، واحد منهم قال بس بحر ابو حجار
شلنا الخرفان والمسجل

الكلام دا ليهو سبعة وعشرين سنة
متذكر لون قميص الزول الكان بدوبي لينا في الليلة ديك
واحد من الموظفين مرتو من أم درمان بتسوق عربية جات ساقتو
اعتذرت لي بصفتي الوحيد الصاحي، قالت لي: معليش، عارفاهو بتعولق بعد الشراب، تكلو وصلو لي العربية

يا محمد جمعة،
أبداً ما في مطاعنة
دا أدب
أدب رصين

يا اسامة،
دا أدب ما بعد بعد الحداثة
لا يتقيد بالزمكان

سلام ليك يا مستنير و بى ضيوفك الكرام
طال ما حمت الختات ديك لا عِن تمبول .. تنبول ..
و ما تغشى الحتّة ديك و لا تجيب ذكِرا ,, يبقى استنارتك عايزالا رقعة
و بل كمان خربانة من اساسا
القصيناب يا عزيزى المفروض تكون عاصمة استنارتك فى البلدات ديك
يبقى علينا العوض و اتغشينا فيك كان ما عِترت ليك فى درب استنارتك
خلى كمان مولانا الملك يجى يغالت فى الحتة دى كمان
عشان اسوقوا و اوريهو شوف عين ما سمع اضنين
___
ثم قال
رحم الله الاستيكة

يا ابو الشباب يا مستنير
التعليق دا مفروض أكان يكون في بوست الصاوي لكنه معطل اضافة الردود
شوف يا معلّم ما تخرب لينا الموت بالرفسي! اشرب زيتك و اتكرّع واحمد سيدك
ما تاكلنا حنك قال دييل قال, زي ما قلت ليك طريق ابوحجار دا ما بخارجك منّها, ايزين حجوة مجيّهة أقّل شي فيها قصص من المرسى ثم مقاهي دبي و كمان كان دخّلت لينا فيها دينا خالد تكون ما قصّرت

البياض بجيبها

يا بكور ياخ ينصر دينك يا مواطن ....

تلك الأنحاء سكر فيها العبادي ورفيقه الحاج محمد أحمد سرور من خمرة جمال عريبيات فيها ...

حين قال قال مترنحا على ظهر الفيات :

انزل ياصديق وشوف يد القدرة....شوف حسن البداوه الما لمس بدره
وراد النهر اردونى ما بدرى.......الكاتل الصفار أم نضرة الخضره
******
مانفرن تقول سابق الكلام الفه......عطشان قلت ليهن وصحت البلفه
مافيش كاس قريب قالن لي دون كلفه........تشرب بكفوفنا لما تتكفى


قول قول آزول ....

وعج على ربوع هندة واتيامن الرماش ....

قومت نفسنا ياخ ....

محبتي ....

أصوات الود العجيبة ديك صحّت المرفعين من النوم،
غضبت غضب شديد
كيف يخلوها نائمة في البرندة ويدخلوا يسووا في قلة الأدب؟!
حسّت اتعاملوا معاها كطفلة، نوموها وقاموا دخلوا الأوضة.
شالت عصايتا ودقت ليهم باب الأوضة وقالت بمساخة ولؤم شديدة ولكنة معروفة:
خدر، خدر هوي
دا شنو البتسوي فوقو دا؟
سيب البتسوي فوقو دا إتّا بكرة وراك استعداد

هلا ابوبكر
يااااخ ذكرت مكانا عزيزا علي ابوحجار
تلك الديار لنا فيها اهل واخوة واصدقاء واحبة وذكريات نعرفها اكثر مما نعرف انفسنا
فياصديقي المنطقة من النيل او كما يحلو لنا تسميتها نحن اهل كركوج الشريف بمنطقة الهوج اي غرب النيل
وللمعلومية شرق النيل وغربه هذه المدن والقري والحلول بينهما ود منقطع النظير يتداخل اهل الشرق والغرب في كل شي
بدءا من الافراح الاتراح الاعراس كل المناسبات حلوها ومرها حتي ان الجميع صاروا اهلا بحكم العشرة
وبها من المناظر الخلابة التي تذهب بالعقل ومعها نساء يمتن همة المسافرين فالتحية لكل اهالي المنطقة شرقا
بدءا من ودالعيس وجندلة والجزائر بشقيها مروا بالقبة والعمارة وام سنط ومحبوبتي كركوج الشريف وغربا
من ودالنيل والتفقية ودار عقيل وسيرو وابوحجار وابونعامة
والتحية ليك يا حبيب

أوعة يكون التكثيف الفات من أجل الوصول للحظة دق الباب المتعمد على زوجين اثناء قمة خصوصيتم، كان زايد عن حدو؟
غرضي اعطاء بطلتي مبرر لما فعلته بعد هذه اللحظة بحياتها
اللحظات دي كانت مفترق طرق لبداية حياة جديدة مختلفة

الشيطان أو الله أو الاحتمالات تترصدنا في مفترق الطرق

قبل أسبوعين كنت مع صديق في رحلة بريّة لمدة ثلاثة اسابيع
حكينا لبعض قصص وحكاوي كتيرة
واحدة من حاكاويهو تمت لي حكاية زولة بتبيع أكل وشاي علي طريف ابوحجار الدمازين سنة تسعين.
سنة تسعين، أنا بكور دا، كنت جلابي برجوازي رعديد
سنة ٢٠١٧ أنا جلابي برجوازي مستنير

بشرح ليكم ليش خيالي الرعديد احتفظ بصورة ست الشاي دي لحدي هسع

Quote: سنة ٢٠١٧ أنا جلابي برجوازي مستنير

دي غايتو صحبانك الشيوعيين حا يلبدو ليك بيها ...

زمان يا بقّة، قبل اشوف وأعيش في عواصم العالم المتحضر، كنت على قناعة إنّو أحسن مكان تعيش فيهو هو الضفة الغربية للنيل الأزرق من الدمازين لحدي جنوب الخرطوم.
أبو حجار بالتأكيد هي عروس هذه الضفة
الله يعرس ليك يا بقّة أخوي

ها زول هه ....

عرس عديييييييل كده ...

البنطون فيهو ريس .....

هههههههههههه

بمناسبة العرس ....

ورد أن أول زيجة لوالدنا الشيخ عبدالباقي ود الشيخ حمدالنيل رضي الله عنهما ... كانت من إحدى حسان أبو حجار من آل أبي روف

أسرة الناظر المعروف .... والذي كانت بينه وبين أهلنا العركيين علاقة ود ومصاهرة ....

لكن والله مرتي العركية دي تقرا كلامك الفوق ..

علا تحرم علي المنبر تب

ههههههههههههههه

كمل حديسك السمح ده

علا ما تجيب سيرة العرس ده