Post: #2 Title: Re: عصام محمد نور...(.الحوار الغلب شيخو) ../ لو Author: أحمد محمد عمر Date: 05-06-2017, 06:22 AM Parent: #1
البوست دة عامل لي كاروشة من اتكتب كل مرة أعاين ليه من بعيد راجب الفطاحلة يدخلو عشان أنا مؤمن بمقولة لا تكتب وانت شايل السوط لكن يا كافي البلا اصلو مافي زول ريحني تاني أدخل واحاول استنبط المعاني البعيدة وما بين السطور وأقول يمكن أنا الما جيت يمكن يكون البوست مقصود بيه اشارات خفية حول الماسونية وثقب الأوزون وسباق التسلح النووي ونظرية التطور لكن برضو ألقاك قاصد إنه الحوار عصام غلب الشيخ محمد وردي في أداء لو بهمسة .. يا النبي نوح !!
المهم لو دة فهمك أطالب بكري بسحب البوست وسحب الباسويرد كما أطالب شركات الاتصالات في البلد الانت قاعد فيها يسحبوا منك اتصال النت ونطالب محكمة النظام العام بجلدك 40 جلدة تعزيراً
Post: #3 Title: Re: عصام محمد نور...(.الحوار الغلب شيخو) ../ لو Author: جمال ود القوز Date: 05-06-2017, 06:47 AM Parent: #2
صعب عليهو.. وصعب جدا كمان .. وردي ماعنده أغنية ما وضع فيها لمسه خاصة بيهو .. بيهتم بي كل تفصيلة وجزئية حتى لو كانت صغبرة .. عشان كده صعب يتغلب .. عصام محمد نور فنان جميل وغنّاي جدا .. لكن تأثرغناه كثير جدا بعد وفاة نادر خضر ..
أنا ما من الفطاحلة يا احمد محمد عمر .. فلا تثريب عليّ أعتقد ..
رغم المرض وكبر السن لكن ظل وردي رقم عصي جدا .. يرفض يترك أي شاردة او واردة دون أن يضع لمسته الفنية عليها .. بالفعل هو مدرسة .. الله يرحمه .. وتمنياتنا بان يعود لعصام محمد نور ألقه القديم .. رغم إني شخصيا ماشايف زول بيغني بنفس روعة عصام في الأجيال الجات معاهو أوالبعده .. عدا محمود عبد العزيز الله يرحمه ..
الاخوان... احمد /جمال عاطر التحايا وجزيل الشكر... للمرور والمشاركة
الاخ احمد ... عندك حق واجد لك العذر في ان تكون مندفع ومتسرع بهذا الشكل لمشروع العملاق وردي وارثه الكبير ...
ولكن بعيدا عن التابوهات والتمترس .. يجب ان يكون هناك في وجداننا ممرات للمبدعين والموهبين والمتقنين الجدد ... وانا شخصيا احب بعض اعمال الرواد باصوات جديدة اخري موهوبة..وموسيقي مكتملة .. اكثر من ادائيها بواسطة منتجيها الاصليين ...
الان ....من منا او من الجيل الناشي يطرب لاغاني الحقيبة بصوت زنقار او كرومة او سرور ..مع عظيم عطائهم وفضلهم ..
للاداء المتقن والصوت العذب والموهبة العالية والسهل الممتنع ..مع اداء االفرقة الموسيقية المخلص ..دعاني اطرب جدا....واشعر ان عصام فعلا غلب شيخو وردي في هذه الاغنية ..مع الاحتفاظ باحترام ابداع وردي وبالملكية والسيادة.
نحتاج ان نفتح قلوبنا لبعض الموهوبين والمتقنين من الاجيال الحالية واللاحقة .. ليحفظو لنا الارث وليجددو فيه بالتحديث والموهبة... ولينقلو تجربة الاجيال السابقة لجيلهم الحالي بلغتهم ونفسايتهم وادواتهم ولوكهم ..
**نحتاج ان نتفهم ادوات وطريقة استجابة الجيل الحالي للفنون...لنحفظ اتراث عبر الاجيال والازمان والمتغيرات والمزاج****
ولولا الجيل الاول والجيل الوسيط لماتت اغاني سرور وكرومة في الاربعينات بالرق والتسجيل الضعيف ...ولكن بالتقليد والموهبة من جيل احمد المصطفي وابراهيم عوض وصلاح وزيدا ن وعثما حسين وعبد العزيز المبارك الي محمود وعصام م نور والعافية واسرار ..استمتعنا باغني سرور وكرومة وانتقل النا ارثهم .. في قالب التحديث والتجويد ...مع موهبة فائقة واحترافية
مع انه عصام لم يغيير اي شئ في اللحن ...ولكن سكب فيها كمية هائلة من موهبتةالعالية وصوته العذب ...مع موسيقي عالية التطريب والاحترافية ...
Post: #5 Title: Re: عصام محمد نور...(.الحوار الغلب شيخو) ../ لو Author: أحمد محمد عمر Date: 05-06-2017, 04:34 PM
Quote: ماشايف زول بيغني بنفس روعة عصام في الأجيال الجات معاهو أوالبعده .. عدا محمود عبد العزيز
العبارة دي بتفق معاك فيها جملة وتفصيلا يا جمال
يا عوض أنا متابع عصام من بدري شديد بحكم إنه ظهر في تلفزيون الجزيرة الريفي أول شريط ليه انتشر انتشار ما عادي كان فيه افتقدتك وأسير غزال في كردفان وأعز عزيز وفي لمحة غزل وعروس الشريط الحلم الجميل ما كنت بفتكر السنين زي أي زول بتغيرك وتقريباً دي كانت الأغنية الوحيدة الخاصة بيه في الشريط بعديها طلع شريط تاني برضو فيه أغاني مسموعة بتذكر منها زيدني من دلك شوية وأغاني خاصة بعدها طلع الشريط الخطير اعتذار ودة كان إعلان لميلاد الفنان العبقري بأعماله الخاصة وأتبعه بشريط آخر تقريباً لحدي ما جات الطامة الكبرى وهي البوم عبقرية الكاشف .. دة كان اعلان نهاية المبدع الخلاق وبداية المقلد نعم الالبوم حقق انتشار غير مسبوق لكن خلى عصام يركن للجاهز ويستسلم لبرنامج أغاني واغاني لي يوم الليلة
نعم يا عوض الفنانين الزمان ما مناسبين لذائقة المستمع الحالي .. لكن وردي ما منهم ياخ إبداع وردي لسة الناس ما وصلتو ذاتو خلي تفوت مرحلته
وشكراً لسعة صدرك وتقبلك المزاح
Post: #6 Title: Re: عصام محمد نور...(.الحوار الغلب شيخو) ../ لو Author: أحمد محمد عمر Date: 05-06-2017, 05:04 PM Parent: #5
وهاك دي هديتي ليك
ومعاها أجمل أداء لأغنية عشان خاطرنا .. هنا ممكن تقول الحوار الغلب شيخو بس وردي لأ :)
Post: #7 Title: Re: عصام محمد نور...(.الحوار الغلب شيخو) ../ لو Author: أبوبكر عباس Date: 05-06-2017, 06:10 PM Parent: #6
الزول دا بغني بسهولة يحسد عليها بغني مرتاح خالص
Post: #8 Title: Re: عصام محمد نور...(.الحوار الغلب شيخو) ../ لو Author: عبدالمنعم الطيب حسن Date: 05-06-2017, 06:31 PM Parent: #7
عصام أيه؟ وعصام مين؟ وعصام بتاع الساعة كم!!! ياخ دا يكتل اجعص غنوة وينومك في نصها... ياخ يتكشم زي نار القصب وضحكتو صفراء وضلو تقيل ياخ وصوتو ضعيف وما فيهو اي تطريب،،، دا ما قاعد يغني بتكلم ساكت.... بعدين وين غناهو الخاص قال عبقرية الكاشف بعدين دا بغني من سنة حفروا الكنار قال الحوار الغلب قلب مين؟؟ سلام لكل الأحباب هنا...
Post: #9 Title: Re: عصام محمد نور...(.الحوار الغلب شيخو) ../ لو Author: عبدالمنعم الطيب حسن Date: 05-06-2017, 06:38 PM Parent: #8
تصحيح قلب مين؟
القلب يبرا.. الصحيح
غلب مين؟
Post: #10 Title: Re: عصام محمد نور...(.الحوار الغلب شيخو) ../ لو Author: عبدالمنعم الطيب حسن Date: 05-06-2017, 06:38 PM Parent: #8
مكرر
Post: #11 Title: Re: عصام محمد نور...(.الحوار الغلب شيخو) ../ لو Author: جمال ود القوز Date: 05-06-2017, 07:02 PM Parent: #8
أعتقد تكفيه يا روعة .. رائعة عبد العظيم أكول دي .. ولو لم يغني غيرها ..
يا منعم بتبالغ يأخ .. والله أوجعتنا قبل ما توجع عصام محمد نور .. غايتو انت ما بتدورو ساكت ..
Post: #12 Title: Re: عصام محمد نور...(.الحوار الغلب شيخو) ../ لو Author: Maawya Hussein Date: 05-06-2017, 07:28 PM Parent: #11
Post: #13 Title: Re: عصام محمد نور...(.الحوار الغلب شيخو) ../ لو Author: علاء سيداحمد Date: 05-06-2017, 08:19 PM Parent: #12
عصام غنّاى جد ... لكن وردى سكب جهده كله وتاريخه الفنى فى اغنية لو بهمسه لذلك كان ابداعه اللامتناهى فى تلك الاغنية وليس هناك من مقلديه من اجادها مثله .
Post: #14 Title: Re: عصام محمد نور...(.الحوار الغلب شيخو) ../ لو Author: علاء سيداحمد Date: 05-06-2017, 08:34 PM Parent: #13
Post: #15 Title: Re: عصام محمد نور...(.الحوار الغلب شيخو) ../ لو Author: Zakaria Fadel Date: 05-07-2017, 01:19 PM Parent: #14
اخونا عوض عمر كلنا نخطئ..... وخيرنا من يبدأ بالتوبة.......
Post: #16 Title: Re: عصام محمد نور...(.الحوار الغلب شيخو) ../ لو Author: Ahmed Yassin Date: 05-07-2017, 08:35 PM Parent: #15
المشكلة الكلام ببلاش ممكن تقول أي شىء وعن أي شىء وممكن تسىء لوردي (مستلهم التراث) الادخل ايقاع الدليب في الاوركسترا وصاحب اجمل وابدع واطول واعقد (لازمة موسيقية) في (عصافير الخريف) وصاحب اجمل اغنية سودانية في كل شىء (ارحل) والتجاني سعيد مع كل الالحان دي والبروفات الاكثر والاطول في تاريخ الغناء السوداني مافي عازف واحد يقدر يقول انه ادخل تعديل في لحن من الالحان الخاصة بوردي او ادخل (مازورة) واحدة
Post: #17 Title: Re: عصام محمد نور...(.الحوار الغلب شيخو) ../ لو Author: احمد حمودى Date: 05-07-2017, 08:53 PM Parent: #16
ايه رايكم فى الحوار دة لكن اجاد كثيرا من تقستى
Post: #18 Title: Re: عصام محمد نور...(.الحوار الغلب شيخو) ../ لو Author: Awad Omer Date: 05-08-2017, 08:00 AM Parent: #17
اخونا عوض عمر كلنا نخطئ..... وخيرنا من يبدأ بالتوبة....... ========================== ؟؟؟؟؟ ٍشكرا للمشاركة وسالامات ..استذ زكريا
المشكلة الكلام ببلاش ممكن تقول أي شىء وعن أي شىء وممكن تسىء لوردي (مستلهم التراث) ؟؟؟؟؟؟؟ =======================================ن شكرا و سالامات الاستاذ/ احمد ياسين.... وين الكلام دة موجود- اعلاه- ؟؟
Post: #19 Title: Re: عصام محمد نور...(.الحوار الغلب شيخو) ../ لو Author: ترهاقا Date: 05-08-2017, 08:44 AM Parent: #18
الاخ عوض والضيوف الميامين
هنا حاتكلم كومسيقي من السبعينات لاواخر الثمانينات مع الراحل المقيم محمد وردي طيب الله ثراه ، بدايتي الفنية كانت مع الفنان الذي وضع بصمته الساسية قبل الفنية الفنان رحمه الله حسن خليفة العطبرواي ، ومن ثم بعد التخرج من عطبرة الثانوية انتقلت إلى الخرطوم بداية الثمانينات ووجدت نفسي في فرقة الاستاذ العطيم محمد وردي، الوضع كان كل فنان بيثبت نفسو بغناهو الخاص ، وعصام محمد محمد نور قد يجيد التغني بغناء غيره ولكن يجب أن يتحسس أين موقعه من الاعراب هل سيصنف نفسه بإجادة غناء ما لا يحق له ؟ ام سيبحث عن ارضية لاغانية الخاصة التي تضع له بصمته الخاصة؟
Post: #20 Title: Re: عصام محمد نور...(.الحوار الغلب شيخو) ../ لو Author: Zakaria Fadel Date: 05-08-2017, 01:38 PM Parent: #19
الاخ عوض.... ما يقلق في البوست اخي الكريم ...هو انك لم تزيًل العنوان بعبارة (في رأي) ولكنك اطلقت عبارة (الحوار الغلب شيخو) ..وكأنها حكم نهائي صدر من جهة ما عصام له صوت (فيه كمية من الحنان..والجمال )....نعم ولكن كمية الحنان و الجمال في صوت وردي أكبر و أكثر (وهذا ليس رأي انا وحدي) اداء وردي لاغنية لو بهمسة (تسجيل الاذاعة) ومض من كوكب آخر (قياسا بالاستقبال الذي حظيت به الاغنية ..وعبارات الاشادة و اطنان الاستحسان الذي لازم الاغنية منذ اواخر الخمسينات و جل عقد الستينات) لا يمكن ابدا مقارنة وردي بعصام ليس في الاداء و لا التاريخ الفني.....ولكن عصام ليس فنانا مبتدئا (حقيقة استمعت لعصام اول مرة في ديسمبر 1980 / يناير 1981 ) وقتها كا ن مرددا لاغان الغير وردي بعد برهة قصيرة من تقديم اعمال (جديدة) من الحان غيره ...قدًم (وفي زمن وجيز جدا مجموعة من الحانه وبعض منها من كلماته ايضا.....كان من بينها لو بهمسة)... وردي (ظاهرة) ...اخي الكريم
Post: #21 Title: Re: عصام محمد نور...(.الحوار الغلب شيخو) ../ لو Author: Ahmed Yassin Date: 05-08-2017, 09:41 PM Parent: #20
الاخ/ عوض عصام دا تقريبا ليهو (40) سنة في اجترار اغاني الغير زي فرفور وياسر تمتام. خليني اديك ليها بصراحة ... حوارك دا (خرب) اغاني ابراهيم ابوجبل – الكاشف -
Post: #22 Title: Re: عصام محمد نور...(.الحوار الغلب شيخو) ../ لو Author: Awad Omer Date: 05-10-2017, 08:16 AM Parent: #21
ت الاعزاء الاخوان/ ترهاقا الاخ زكريا ..
تحياتي وشكرا علي المشاركة..
طبعا ... البوست لم يكن اطلاقا مقصودا بالمقارنة بين اررث ومنتوج الاستاذين ولم يتطرق لتاريخ مساهمات الفنانيين / عصام واستاذ وردي عبر الازمان ... في معرض مقارنة لمجمل كسبهم ومساهمتهم واعمالهم ..
بل ... لواحدة من اغاني وردي بصوت واداء عصام ...
وانات ما زلت استمتع بهذه الاغنية بصوت وادا عصام في هذا التسجيل بالذات ... اكثر من سماعي لها بصوت واداء وردي ..(علي الاقل في ماتوفر لي من تسجيلات وردي لهذه الاغنية في فضاء النترنت...) ولم اطلب من احد ان يؤمن علي هذا الاحساس ( كحقيقة عندالكل) .....ولم اقل ان وردي لم يؤديها جيدا سابقا ......بس عصام هنا ...غلب شيخو... في الداء...في راي الشخصي.
ودمتم .....ع ع -----------------------
ألاخ احمد يس ... مشكور ايضا علي المساهمة ... انا طبعا ما عندي فكرة انه في تخريب لاغاني ابوالجبل الكاشف من هذا الحوار!! فان كان.....فمعزره له ...ولمعجبيه.
Post: #23 Title: Re: عصام محمد نور...(.الحوار الغلب شيخو) ../ لو Author: عثمان الأمام Date: 05-10-2017, 08:56 AM Parent: #22
عصام فنان جيد وقد يكون أدى أغاني أحسن من أسيادا
لكن لو بهمسة دي غير وردي ما بقدر عليها زول
في نظرتي لو بهمسة معجزة من معجزات وردي
Post: #24 Title: Re: عصام محمد نور...(.الحوار الغلب شيخو) ../ لو Author: Awad Omer Date: 05-11-2017, 11:15 AM Parent: #23
شكرا الاستاذ عثمان الامام ززعلي المرور والمشاركة ...
اعتقد انه اللحن اسطوري
Post: #25 Title: Re: عصام محمد نور...(.الحوار الغلب شيخو) ../ لو Author: Zakaria Fadel Date: 05-11-2017, 02:48 PM Parent: #24
اخونا عوض تمكن وردي في الأداء الصوتي امر لا يتناطح فيه عنزان لقد شهد له بذلك الملحن القدير برعي محمد دفع الله عندما أعطاه لحن أغنية الوصية شهد له بذلك ايضا السر محمد قدور حلاوة صوته تاكدت عندما برز وردي أواخر الخمسينات وأعلن الجميع انه لم يسمعوا مثل هذا الصوت منذ بروز ابراهيم عوض اسمع تسجيلات الإذاعة اخي الكريم عندما تريد اجراء مقارنة بين وردي وأي فنان اخر فوردي ليس فنانا عاديا
Post: #26 Title: Re: عصام محمد نور...(.الحوار الغلب شيخو) ../ لو Author: علي عبدالوهاب عثمان Date: 05-11-2017, 05:32 PM Parent: #25
مودتي للجميع .. الكاشف وردي أحمد المصطفى العطبراوي عثمان حسين ايراهيم .. وغيرهم .. لم يمض على وفاتهم وقت طويل يمكن سرور وكرومه رحمهم الله .. ألا يستحي الفنان عندما يردد ألحان الغير .. بالضيط زي واحد ينجح بالبخرات في الامتحان .. لا يمكن مهما كان أن يمتطي الواحد مجهود الاخرين .. وحفلات بفلوس تخيل شخص ما خطف مجهودك وحقك الادبي بدون إذن وراح يسترزق منه !!!!
يمكن أن يترنم في جلسة عفوية .. ولكن موسيقى وإستعداد ومع سبق الاصرار لا أعتبر هذا فن ولا هذا فنان .. أعرف عشرات الناس قابلتهم في جلسات خاصة يرددون أغاني الفنانين ولكن خلف وسائل الاعلام وإذا سمحوا بذلك سوف تجد أكثر من مليون فنان في السودان .. يعني واحد يجيب مجهود فنان آخر .. يتصنع الجدية والطرب ويغمض العيون ويهز رأسه طرباً ويتصنع حركات جسدية
مودتي يا جماعة ما تزعلوا مني ده رأي خاص وهذه نظرتي .. وأول مرة أكتب هكذا في البورد معليش يا جماعة الكبر حصل .. وليس لنا إلا أن نتجر ذكريات هؤلاء ..
إبننا عوض مودتي .. بالله ما تزعل من كلام عمك علي ده .. حبي لوردي فوق الوصف و بلا حدود .. بالعربية والنوبية
مودتي .. معليش يا جماعة .. صدقني ما زعلان منك ولكن من هذه الممارسة وعصام أكرمنا مثواه في جدة لأنه هو قريبنا كمان من منطقة دبلا وكودي وجهزنا ليه ليلة فخمة ومسرح وشخصياً كنت بقول ليه أبعد عن وردي الباقين ما مشكلة .. هو خلوق ومهذب جداً يقابلك بإبتسامة ويتمص كل غضبك وزول متدين جداً مع الاذان أول واحد يمشي للمسجد هو ..
قبل ما توجع عصام محمد نور ..