مُرتّبك هل تبوح به لزوجتك ؟

08:39 AM April, 26 2017

سودانيز اون لاين
walid taha-الرياض ، السعودية
مكتبتى
رابط مختصر

أحببناهنّ ثم تزوجناهنّ وسمحنا لهنّ بالدخول الى قلوبنا مكامن أسرارنا فصرن أقرب إلينا .
بعضنا ينسج خصوصية حول بعض أشياءه ويعتبرها خط أحمر ،والبعض الآخر يؤمن بالشفافية المطلقة و ما بين هذا وذاك يقف صفٌ آخر.
يستتبع ،، :

نعود الى السؤال والذي نحاول الرد عليه من خلال إستطلاعاتنا
- سألت الليمن هذا السؤال فنهرني "إنتا جنيت؟!" ثم أردفها بـ "ما بكلمها طبعا " ؟
- عاطف ختاها لى واضحة " والله أنا صريح معاها موريها مرتبي كلّووو"
- عبد العزيز اللزيز قال لى " أنا موريها لكن الزيادة الأخيرة ما جبت ليها سيرة عنها خير شر"
- ود الصول الساخر قال لى " ياخى والله ما من مصلحتها تعرف ذاتو " ههه

وليد

ات مو بصاحي؟!!!!!!!!

والله اول ما تزوجنا وريتا المرتب والوضع
الان انا ندمان وانصح اي زول ما يوريهن

أنا بعتبر نفسي تاجر وبزنس مان ....

شفت ليك تاجر بيوري زوجته ربح كم في البيعة الفلانية ..؟؟؟

صاحبي ود التومة .... بطاقة الصراف ما بيعرف عنها حاجة إلا يجددها بس ...

يشيل مصروفه زيو وزي سماح بنتو

سلامات ياوليد
معرفة الزوجة للراتب مفيد جدا في التدبير
قد يكون الرجل مسرفا ومبزرا ، الزوجة تضبط ايقاع المصروفات
ماعارف ليه معظم الرجال يعتقدون ان الزوجة لاتحسن التصرف في المال
ده اعتقاد عجيب جدا
الغريب ان الزوج ايضا يموت عشان يعرف راتب زوجته اذا كانت تعمل

وليد كيف حالك ..
أساسا لو دسيت أي معلومة عن دخلك أوقروشك ..
ستجعل نفسك هدف للملاحقة البايخة ..
والاسئلة المتكررة والطلبات التي لا تنتهي ..
فمن الأفضل تكون واضح في الحتة دي تحديدا ..

Quote: ات مو بصاحي؟!!!!!!!!

أول زول فى الصف التاني هههههه

شكرا يا دوك

ممكن توريها الاساسي بس
البدلات والامتيازات اعمل نايم

ذكرتني قصة واحد اخونا ما بوري زوجتو حاجة خصوصا الحوافز والبدلات
لكن اول ما يستلم الحافز او البدل يلقاها عارفاهو بالتفصيل .. اتاريهو المسكين من النوع البتكلم وهو نايم

انا قاسمو النص ..

50-50

سلام وليد وضيوفك الكرام حقيقى موضوع جميل ودمو خفيف أحياناً الواحد يندم إنوا إتسرع فى مسألة الراتب دى خصوصاً بعض الحريم لا يخفى عليهم شىء فمثلاً لما يشوفوك (تبحبح) وداخل البيت وأكياس العثيم فى إيدك طوالى تبدأ الأسئلة من عينة إنت أمس قلت مفلس الليلة جبت القروش من وين ؟ تقول ليها باقى الراتب الفات تسألك هو الراتب ماإنتهى راتبك كم أصلو وأناعارفاهو .
وعموماً يستحسن الزوجة تعرف راتبك بل يفضل تسليمها الراتب وتشيل منها حق الفطور بدل الصداع المزمن نهاية كل شهر ودمت بخير
كسرة : نهاية كل شهر الواحد يحس بوجع بطن من كترت الفواتير المحتاجة للسداد

أنا بعتقد الإجابة على السؤال بتعتمد بشكل كبير على (جنسية الزوجة)!

سلام وليد
حتي البونص عارفاهو
وعندها فبزا مرادفه
سلمنا امرنا لي الله ولعبنا علي المكشوف
التكنلوجيا اضرت بالكتمان رسايل الجوال الراتب نزل لقد تم سحب خمسة الف ريال
بدل المشاكل وانت نايم اقلبو الجوال احسن الزول اكون صريح

الاخ الدسيس
سلام.بالنسبه للتكنلوجيا .
مقطع كوميدى : المره خلت الراجل نام وقامت تجرب تفنحو بالبصمه .جربت اصابع ايدو العشره مافتح معاها .
الراجل قام من النوم فتح الموبايل ببصمه اصبع القدم (: .
الخلاصه الواحد لو ممكن يتصرف حسب الظروف .حتى التكنولوجيا مكن تقدر علىيها وتسد خشما ماتخليها تفتن عليك .

سلام يا ولّي

تصدق من يوم ما سلمتها الراتب وقلت ليها أصرفي أنتي علينا
ووريني الفصاحة حقتكم دي حدها وين !!
تصدق من ديك وحالنا اترتب ترتيب ما عادي

المشكلة إنه أنا يدي خرقا .. يعني لما أدخل محل عشان أشتري حاجة
تلقاني خميت معاه مليون حاجة تانية .. وكثير منها غير مطلوب

كسرة:
أكيد الزيادات الواحد ملبدها بعيد من الحساب والصراف
ودي الحاجة الوحيدة البقت لينا متنفس ياخ

مودتي

يا ولي
كلمتها ما كلمتها أصلو بكمل
أحسن تكون عارفة عشان تقعد براها كدا تقدر وتحسب بعد يوم 20 تعمل حسابها
وزي ما قال ليك الدسيس رسائل الجوال دي فضيحة

تخلي نصك عاقل و نصك مجنون
اقرار بجزء و الباقي للظروف
هو الباقي زاتو بكمل
فايدة مافي

الأستاذ وليد طه وضيوفه الكرام
(معرفة الزوجة للراتب مفيد جدا في التدبير قد يكون الرجل مسرفا ومبزرا ، الزوجة تضبط ايقاع المصروفات ماعارف ليه معظم الرجال
يعتقدون ان الزوجة لاتحسن التصرف في المال ده اعتقاد عجيب جدا الغريب ان الزوج ايضا يموت عشان يعرف راتب زوجته اذا كانت تعمل)
أتفق مع حيدر تماما في ما ذكره أعلاه .
في اليابان يقوم الرجل بتسليم كل الراتب للزوجة وهي التي تقوم بكل الواجب في ما يتعلق بالصرف والتوفير وكل شئون الأسرة ..الخ وتعطي
هي الزوج مصروفه اليومي . لذلك فاليابانيون يعتبرون من أعلى ممستويات التوفير في العالم .
الفهم في الصرف العام والوعي مختلف كثيرا للأسف عند نسائنا ..مثلا بعض النساء يعملن على استنزاف راتب الزوج خوفا من أن يوفر مبلغ
ليتزوج عليها زوجة اخرى .. البعض تصرف على (البوبار) ومجاملات غير ضرورية .
ومع هذا هناك زوجات عاقلات يحسن التصرف في المال .
أنا اخبرت زوجتي براتبي (سودانية) وطلبت منها أن تتصرف به ولكنها فضلت أن تركز على شئون المنزل والتربية ..الخ
تحياتي ووافر احترامي

نعم ، بُح به !

أنتَ وزوجتك تتشاركان جميع أسراركما وتفاصيلكما وليس بينكما أي حاجز ، فما معنى أن تخفي عنها مقدار راتبك ؟ هي شخص يشاركك كل لحظة في حياتك فالأفضل أن تتعاملا بشفافية في كل شيء.

وفي رأيي الخاص: من الأفضل أن تخبرها حتى وإن نشأ خلاف حول بنود الصرف وأولياته ، ذلك أفضل من أن تخفي عنها شيئاً يتعلق بك ...

لو اعتدتما التصارح والشفافية في كل شيء فذلك سيريح باليكما ويزيد الإلفة والانسجام ...


مودتي للجميع

شيء إيجابي ومهم للغاية أن تدرك زوجتك مقدار راتبك .

لأن مقدار الدخل الشهري يحدد من مصير صرفك .

حيث تستطيع الزوجة المدبرة أن تتفهم الوضع خصوصا

لو كان راتبك ضئيلا ، وقد مررت بتجربة مفيدة للغاية

وأبوح لها أيضا ما أقوم به من أعمال مساعدات أو دعم خيري ( حسب مقدرتي المتواضعة جدا)

كلامكم هنا كلو عبارة عن أن هذه المراة كائن غري ولا قوة ولا حول لهان وكـأنها لا تمثل بالنسبة للزوج شريكة حياته وأم أولاده.

ولكن يجب أن تعلموا أن الزمن تغير، ولم تعد الزوجة هي تلك الزوجة الجاهلة بالأشياء أو الغير متعلمة.

الزوجة أو المرأة الأن اتعلمت وأشتغلت وصارت شبه مستقلة بنفسها، لو لا القيود الأجتماعية والحالة الأقتصادية في السودان ، لكنا رأينا عدد كبير من النساء سكنو لوحدهن وبإستقلالية تامة

العزيز دينق إزيك ،، مع إنك حتى ما سلمت على :)

أمبارح أنا راقد كده اتذكرت مداخلتك قلت لابد أرجع ليك للتعليق .
موضوع البوست يا سيدي لا يصب فى الإتجاه الذى تعتقد فكلنا نؤمن بأن المراة ليست (كائن لا حول له ولا قوة) فهى الام والمربية والقائدة .فكرة البوست لا تنفصل عن البحث العلمي فى إطار مجتمعي بإعتبار أن الآراء تتعدد حول (السؤال) نفسه وقد ثمّن الكثيرون على ضرورة معرفة الزوجة لراتب زوجها لما فى ذلك من منافع عدة من واقع المداخلات بالتالى هذا ينفى إعتقادك تصويرنا للمرأة (ككائن ضعيف) ليس له الحق فى معرفة دخل الزوج!

quote لو لا القيود الأجتماعية والحالة الأقتصادية في السودان ، لكنا رأينا عدد كبير من النساء سكنو لوحدهن وبإستقلالية تامة [/gree


لا أدرى ما علاقة هذا بموضوع البوست لكن أقول حتى القيود الإجتماعية ـ كما تفضلت - لم تمنع المراة الإستقلالية ودونك السلك الدبلوماسي -كمثال -يعج بعدد هائل من الزوجات السفيرات . وأحسب أن من بينهن من تجهل راتب زوجها كذلك :).
دينق أعتبر البوست ده survey حتلقى الموضوع عادي جدا :)
إنت ذاتك ضمن السيرفى ده أها إنتا بتورى ولاا لا :)
محبتى .

من راي اخبارها بكل تفاصيل حياتك شيء ايجابي وخاصة موضوع الراتب ، الذي يخفي عن زوجته اعتقد غير مرتاح في حياته الاسرية.
بالعكس الزوجة تكون متفهمة في حالة الصراحة والووضوح ، بل تساعد في حلحلة بعض المشاكل، سواء كانت ديون او شيء يتعلق بحياتكم.