بقلم فتحي الضو! نعم منبر فتحي الضو حصريا!

08:44 PM April, 25 2017

سودانيز اون لاين
Bashasha-California, Los Angeles
مكتبتى
رابط مختصر

.*.

عزيز القارئي،

لي قرابة الكم طاشر سنة في هذا الفضاء الجلابي والي اليوم لا ادري ماهي السياسة او الاسلوب او المعيار، المتبع للنشر في واجهة المنبر؟

قصدي العناوين البتتصدر المنبر، ماهو المعيار في اختيار هذه العناوين او المواضيع؟

حب استطلاع او كده عشان نفهم الشغلة دي منطلقاتا شنو اصلا؟

كمثال لي كم طاشر سنة هنا وساهمت باضافة قرابة ال1,000,000 نقرة لهذا الفضاء، او بكتب في اي موقع اخر، او مواضيعي مختلفة تماما عن المتداول في السودان بطول وعرض اكثر من نصف قرن، ولكن ايا من هذا اطلاقا لايعني اي شئ لصاحب هذا الموقع القادين اليوم والتاني بي اسم الجلابي فتحي الضو مشنوق فوق ومفروض علي الاعناق كل 48 ساعة، والزول ده ما داقي طورية هنا، ولم يساهم ولو بي نقرة في هذا الفضا!!

بالنسبة لي المعيار اولا واخيرا وكقاعدة، عناوين المنبر مفروض تكون خاصة بمساهمات اعضاء هذا الفضاء اولا واخيرا، من باب العرفان لمجهودم الذي جعل من هذا الفضاء ماهو بالنسبة لامثال فتحي الضو، الذي لايساهم هنا ولو بي مثقال نقرة!

لا استبعد ان يكون السبب كالعادة تعالي معهود في مثقفاتية الجلابة العاملين مهمين جدا، مع انهم اول يرمم هنا، بلوشي لو لقا فرصة! نعم مرا علي اسمو في موقع الالفة نجاة محمد علي والناظر بولا، اي موقع المثقفاتية او كده، مش الكرور الزينا، ولكن ما شفتا ولا مداخلة واحدة في بوستات فتحي الضو هذا هناك، مما يوضح انو في ارض الواقع هو متواضع جدا من حيث الاسهام ولكن رقم هذا اليوم والتاني في المنبر ده بتلقي اسمو تحديدا مشنوق فوق من بقية الاسماء الاخري اللي تم اختيار مواضيعا في صدارة الموقع!

مافاهم، ده معناهو شنو يا بكري ابوبكر؟

مزاج مثلا؟

علاقات مثلا؟

ماهذا؟

ما ممكن ياخي اليوم والتالت "فتحي الضو"!

ماذا عن الاف البكتبو هنا، اللي جعلو من هذا الموقع ماهو اليوم؟

الفاهم حاجة، بالله يفهمنا لو سمحتو!

اللهم اجعلنا فى علييين بكرى انشاء الله فى البلكونة


تحياتى ي مواطن

المانع شنو مواضعيو البايتة من نصف قرن دي او طريقة تفكيرو المعتتة هذه، انها تنشر في بوستات عادية كماهو حال الجميع هنا؟

ليه فرد بعينه ولا عضو زاتو اي سطرين يكتبم تاح او طوالي ادارة المنبر تروح شانقه الموضوع فووووق في العلالي مع اضافة اسم الكاتب؟

ياخي انا الحمبرا بشاشا ده ليه ولامرة في كم طاشر سنة من تاريخ وجودي في هذا الفضاء ، ولو بالغلط لايمكن امين الموقع يشنق لي موضوع، ولو مرة، ولو بالصدفة؟

ليه؟

مع انو بشاشا ده بيكتب هنا في الموقع ده حصريا!

بينما فتحي الضو ذات كلامو المعتت القديم ده منشور بطول وعرض الاسافير!!

اكرر هو ماعضو هنا زاتو بينما بشاشا مثلا عضو!!!

سلام او مراحب بالطوربيد،

اها شفتا حكم قرقوش ده كيف؟

غايتو انا شايف هذا استفزاز ما بعدو استفزاز للبطرشو الدم في المنبر ده وجعلو منه ماهو في مقابل البراسايد البمصو في عرق العضوية عشان يبيعو كتبم او يلمعو اقلام اصلا ماليها وجود يذكر في سوح الدواس.

هذه بنسميها حملة رد الاعتبار للعضوية الخيلا بجقلب، ولكن للاسف الشكر كالعادة لي حماد!

نطالب بي نظام الي ميكانيكي بواسطة الكمبيوتر يرشح المواضيع البتتصدر واجهة المنبر المكتوبة بواسطة اعضاء هذا الفضاء في المقام الاول، وفق معيار محدد تشارك في وضعو العضوية.

غلطان الجلابي بكري ابو بكر :)


مفروض ينزل مقال فتحي الضو ويرفع عوارتك دي مثلا؟!

الجلابة تطير عيشتن ياخ!

النحكي ليك حكاية سمحة كدي مع مزاجك الرايق دا

زمان عندنا صاحبنا اسمو" بكته "

امتحن الشهادة السودانية كم مرة كدي وما اتوفق

اها بقى راقد في البيت .. يصحى الصباح الساعة 9 او 10

اها امو وابوه بقوا ينقو في النوم والرقاد الساي دا ..

اهله ناس بسيطين فابوه صول بالمعاش ويا داب معاشو يكفيه

في يوم من الايام .. امو جاتو الصباح وهو نايم وقالت ليهو

يا ولدي القراية عرفناك ما نجحته فيها قوم الله يرضى عليك شوف ليك شغل

وابوه سمع الحفلة وكمل الباقي ...

المهم ضاقت الدنيا بما رحبت بصديقنا بكته وكل يوم بسمع الموال دا

اها اليوم داك قرر يرد عليهم :

يا ابوي وامي امشي اشتغل شنو مثلا؟

عمار شغال في حافلة ابوه

ناصر شغال في مغلق ابوه

ياسر امو اشترت ليهو امجاد وشغال فيها


الخ الخ

انت حقكم وينو عشان اشتغل فيهو ؟


الشاهد يا بشه ...

فتحي الضو One of the remarkable في سودان الهنا

انت كتابتك وينه مع الرجال عشان يعلقوها ليك فوق ()


محاااااسن كبي نص

نمرة كاملة عد يا جماعة ..............

(1)

Quote: هذا الفضاء الجلابي

(2)

Quote: اسم الجلابي فتحي الضو

(3)

Quote: مثقفاتية الجلابة العاملين مهمين جدا

Quote: نطالب بي نظام الي ميكانيكي بواسطة الكمبيوتر يرشح المواضيع البتتصدر واجهة المنبر المكتوبة بواسطة اعضاء هذا الفضاء في المقام الاول، وفق معيار محدد تشارك في وضعو العضوية.

طيب مش ممكن الكمبيوتر يكون جلابي زي بكري ابو بكر

او الياباني الصنعو جلابي ؟

تسقط دولة الجلابة وتعيش مملكة كوش واميرها وقديسها هشاشا

تسقط دولة الجلابة وتعيش مملكة كوش واميرها وقديسها هشاشا

تسقط دولة الجلابة وتعيش مملكة كوش واميرها وقديسها هشاشا


ياخ والله ما طالبني حليفة انا قريت العنوان اتبسطته

قوووولته في ذات نفسي الامارة بالسوء

الليلة هشاشا : أتى بما لم تأتي به الأوائل ..

من شدة فرحتي عضيت جلابتي في خشمي وشلته مركوبي في يدي وتووووش

دخلته البوست .. فاذا بي اتفاجأ بالجلابي بكري ابو بكر وهو سادر في ساديته تجاه

الامير العسل بشاشا ..

يا ريس الكلام دا عيب منك ياخ

يعني لامن يموت حتى تعلق ليهو بوست ولا شنو؟

النبي كان ما بريت اخوك هشاشا دا بي بوست مشعلق فوووووق

حتى لو تنزل بوست الجلابي المتفلهم فتحي الضو

واوعك تاني ترفع بوست لتاج السر الملك ولا محسن خالد .. ولا الجلابة القاعد ترفع بوستاتهم ديل : )


اووووووووووووووووووف ياخ

محاسن كبي نص :)


الجلابة كرهونا السودان والمنبر ياخ!

!!!!!!

Quote: وساهمت باضافة قرابة ال1,000,000 نقرة لهذا الفضاء،

الشغلة بالكيف ما بالكم يا عمك ...!!

المليون نقرة القلتهم ديل بافتراض انو الرقم صحيح او تقريبي اقرب للصحيح لو جمعناهم مع بعض حا نلقاهم
(مكربنات ) من بعض .. يعني كلام مكرر بالكربون ما يساوو ولا حتى 50 نقرة على اكتر تقدير ..


اهو عمك مصطفى محمود ليو قريب 7 سنى ما عندو شغلة غير ينسخ ويلصق في بوستات وعبارات مكررة زي التجاهل التجاهل
وما أتو لحوار وبطيخ .. اوع كمان يعنبرا زيك دي نقرات ويجي يطالب بي تعليق بوستاتو !!

بعدين تعال أسألك : عندك مكتبة للمليون نقرة دي ؟!!

كم رف ؟!!

Quote: الشغلة بالكيف ما بالكم يا عمك ...!! المليون نقرة القلتهم ديل بافتراض انو الرقم صحيح او تقريبي اقرب للصحيح لو جمعناهم مع بعض حا نلقاهم (مكربنات ) من بعض .. يعني كلام مكرر بالكربون ما يساوو ولا حتى 50 نقرة على اكتر تقدير ..

نااااذر يا جلابي يا حاقد :)

برااااحة على الامير دا .. يعني تبقى عليهو انت والجلابة

زمان كان في ناس بخشو الفيلم .. عشان عوير الفيلم ياخ!

ولا تبخسوا الأمير الكوشي نقراته :)

Quote: بعدين تعال أسألك : عندك مكتبة للمليون نقرة دي ؟!! كم رف ؟!!

الامين موسي البشاري سلام مربع
جاييك.

توقع مداخلة بشاشا الجاية واكسب ... ثلاجة

اتوقع مايلي

ديباجة :

عزيزي قارئ بشاشا

(دي طبعا زي بسم الله الرحمن الرحيم)

Quote: عيييييييييييك!! نعم مجرد ان يطالب المهمش زي دينق بي حقوقو كمواطن من ذات الدرجة البستمتع بيها امثال مجيدو، ففي نظر البشاري وهو يتقمص شخصية الجلاد، فهذه جريمة تستدعي مسحو من الوجود!! اذن وبناءا عليه طبيعي جدا ان يحارب المهمش البشاري، رفيقو في التهميش دينق، باسم فاعل التهميش مجيدو!!! وقع ليك كلامنا؟ هذا ما عناه رسولنا استيف بيكو لما حدثنا عن كيف ذهنية المضطهد زي بشاري، هي امضي اسلحة المضطهِد مجيدو!!! مع تحيات معامل بشاشا...

Quote: امنتو بامون! اعلاه كلام صاحبي ا لمجولب بمعني المفردة البشاري! يا للماساه بحق! بسمع بالنص بل يرتل ترتيل خطاب جلادو الجلابي! هذا يوضح يشرح بل يثبت كيف امكن لي اقل من 5% من السكان اي امثال العنقالي مجيدو الهيمنة علي ال95% الباقين من السكان! نعم بذات الطريقة مستعمرينا تمكنو من احتلال واستعمار حاسوب دماغ امثال شكوكو اي الحلابة وكنتيجة اشعل الغزاة السودان نارا بالوكالة! المهمش البشاري اللي موضوعو او قضيتو الأساسية في المنبر الجلابي ده هو مطاردة دينق وهذا في حد زاتو معبر جدا نعم بسمع في خطاب الباصقين في وجه آدمية امثالو وبكل براه وعفوية تبعث علي الرعب حقيقة!! قال اهل الشمال ماشالو سلاح وهذا صحيح!

الباقي ممكن تتموه خياااال :)

الامين كيفنك يا زول ؟!

Quote: برااااحة على الامير دا .. يعني تبقى عليهو انت والجلابة

شفت زي حساباتك الانت اقتبستها فوق دي .. قيس عليهم المليون نقرا القالا بشاشا ..

في المليون نقرة دي حا تلقى كلمة الجلابة والاستلاب ومش عارف ايه أنقر نقرا كم نقرة ؟!!

اقل شي 4 مليون لفظة باعتبار النقرة الواحدة فيها اقلاها 4 عبارات جلابة وملحقاتا ...!!
أها دي يعلقوها كيف ولي شنو ويلقو ليها حبل يشروها فيو وين ؟!!
قول شروها .. باقيلك بتنشف ؟؟!!

عليك الله بشاشا دا ما ببالغ ؟!!!

شايف الجلابة وقفوا ليك شوكة حوت

مع أنه البوست فيه الكثير من الموضوعية فيما يتعلق
بأحقية أعضاء المنبر في تثبيت يوستاتهم وفق معايير محددة كما أشرت
وممكن جدا فتح قسم خاص للمشاهير وكتابات ترى إدارة المنبر بأنها مهمة وممكن
أن تشكل إضافة للمنبر
لكن
الله في يا بشاشا
مصطلح الجلابة ده بجيب الزيت وبخلي الخاجات حساسبته عالية
فخيلك حنين

الأمين ياصاح

بشاشا هذا في الخيط ده مجرد مثا فقط كغيره من الاف هنا من الأعضاء اللي يبدو لايسوو شي في نظر صاحب هذا الموقع مقارنة بي فردتو اعلاه اللي كل 48 ساعة شانق ليهو حاجة واحيانا حاجتين تلاته ورا بعض وهذا عجيب!

الفاهم حاجة يفهمنا!

بالعدم هذا غريب لانو الاول ده ما بتمرمط زينا بي جخانين البوستات عشان يثبت وجودوو وبالتالي يكون بي عرق الجبين اكتسب موقعو الخاص والمصري ده في صدارة المنبر او هكذا نفترض!

إذن كلام ايا منا ما مهم بقدر أهمية حجم قرااك وبالتالي عدد النقرات البتساهم بيها في رفع المنبر في محرك البحث.

ده هو معيار قوقل من حيث التراتبيه حول العالم.

ناذر الخليفه مشتاقين

بالنسبة لي عم قوقل التراتبيه للمواقع في محرك البحث بي كم النقرات في الاول.

إذن الاساس هو عدد النقرات البجيبا موقع مقارنة بالآخر وبالتالي واحد بكون فوق في الصفحة الاولي كأول موقع واخر بكون في الصفحة رقم مليون!

بنا عليه زول بكري ده لايساهم ولو بي نقره واحدة في رفع هذا الموقع في محركات البحث!

علي العكس بيلغف بس ويستهلك كلكات الاخرين اللي جعلو هذا ممكن!

في العادة ميزة زي دي بتدفع كاش عشان تتحصل عليها وهذا طبيعي.

موضوعنا هو عدم تقدير بكري لمجهود عضوية هذا الفضا بي زي تعصبو العاطفي ده او فرضو لي حبايبو علي الاخرين من دون ما يدقو طوريه!

في تقديري هذا مفروض يكون متروك لاختيار الاعضا.

نعم كل واحد فينا ينقر. ايقونة مخصصة في نهاية المداخلة ترشح ال بوست المحدد للشنق فوووووق في واجهة المنبر والأغلبية تكسب دون أدني مجامله او ترضيات او واسطات!

إذن في غاية البساطة!

المنبر كلو ممكن يدار بالطريقة دي بما فيهو الايقاف او السحب او غيرو.

مصطلح الجلابة ده بجيب الزيت وبخلي الخاجات حساسبته عالية فخيلك حنين

قرقرقر!

فرح الطاهر مشتاقين،

نعم كترنا المحلبية المرة دي، ولكن مرة مرة ما بطال.

خلاص مكسح قريب.

لما ارجع اوعدك حابعد من الزويل الفي المرايا اياهو!

نرجع لي موضوع البوست:

حقيقة هذا الاسلوب في تحرير هذا الموقع مكلف جدا، لانو بخصم من مصداقيتو، او بحولو لي موقع دكاكيني ماشي امفكو بالمزاج او مش علي اسس صلدة، صلبة، وتقاليد محددة عريقة مرعية.

الانا مافاهمو بكلف بكري شنو انو يضيف ايقونة لي:

ملفك

عدل

رد

واحدة رابعة تقول مثلا :

رشح

بمعني رشح هذا البوست عشان يتشنق فوق؟

بذات الطريقة ممكن قفل البوست او سحبو او ايقاف ايا كان بي 60 لي 70% من الاصوات وماشابه.

بمعني لازم يكون هناك نظام صارم عادل محدد لادارة هذا الفضاء فيهو عرفان ووفاء للمشاركين في جعله ماهو في صدارة المواقع السودانية.

نظام الترضيات المجاملات القوامو المزاج الشخصي لايليق بصرح كهذا اطلاقا!

حبيبي يا بشه ...

ياخ ما أحلاك وانت هادي ورصين كدا ..

Quote: بشاشا هذا في الخيط ده مجرد مثا فقط كغيره من الاف هنا من الأعضاء اللي يبدو لايسوو شي في نظر صاحب هذا الموقع مقارنة بي فردتو اعلاه اللي كل 48 ساعة شانق ليهو حاجة واحيانا حاجتين تلاته ورا بعض وهذا عجيب! الفاهم حاجة يفهمنا!

هذا الخيط .. ؟!

زي ما قلت ليك لو انك ابتدرته بشفافية وما حشرته فيهو جلابة ونوبة ودينكا وغرابه .. الخ

لكان هذا الخيط كما قال ابو ورطه ..

الحاجات البتتعلق دي ما ليها معايير محددة ولا ليها علاقة بالعضوية وأهم حاجة ما ليها علاقة بالجلابة والعنصرية

تعتمد فقط على حس بكري وشهرة الكاتب ومنتوجه الفكري والثقافي .. وفوق دا مصلحة بكري

هذا المنبر ليس مؤسسه ولا شركة .. هو لفرد يديره كما يشاء وكيفما يشاء ونحن ضيوف

وبكري محق في كثير من البوستات البتتعلق فوق ... حسب وجهة نظره

سيظل هذا المنبر مؤثرا وله دوره في نشر الوعي والثقافة مهما كانت طريقة ادارته

..
..







نرجع لجلابتنا ياخ!

وسيبك من احلام البوستات البتتعلق دي لأنو دا شعراً ما عندك ليهم رقبة .. والله :)

رش الجلابة والغرابة والنوبة والدينكا رش تقيل عشان ال 100000000 نقرة دي ما تروح ساي

عليك الله ما تخلي فيهم نفاخ نار هؤلاء الابارتيد اعداء النجاح والحرية والديمقراطية ()

وما تنسى تحلي بالبوابين والطباخين وعموم النوبيين امثال مجيدو وحامد بدري

ولي عودة باذن الله .....


علي فكرة كان كسحته حنشتاق ليييييك كتير (خالس) (خالس) ..

انصحك بتطوير خطابك لأنه اصبح مستهلك (1000000000000000000000000000 نقرة )

كما انصحك وللتصالح مع الجلابة قراءة هذا البوست الجلابة الحلوين

التحية والصمود لجمهور القراء والمدافعين عن حقوق شعب سودانيز االأغبش


ولا نامت أعين الجلابي بكري ابو بكر البعلق بوستات فتحي الضو

ويتجاهل بوستات أمير كوووووش هرقل العظيم بشاشا .. والله صحي :)

يا بشاشا سلام ...

قبل أكتر من عشرة سنوات في عضو في المنبر دا اسمو علاء الدين يوسف وأكيد متذكرو ..

الزول دا كان عندو راي واضح في حكاية تثبيت البوستات .. وكان رافضا من الأساس واظن معاو 1000 حق ...

وجهة نظرو انو ما دام مافي معايير لي تثبيت البوستات واحيانا بتجيب كلكات البوست ما بستحقها من الأساس اذا ما في داعي للتثبيت دا من الأساس
وأي عضو او كاتب بوست عاوز كلكات زيادة ومتابعة من القراء هو البيفرض نفسو بي اسلوبو وطرحو والقراء هم البيفتشو بوستاتو ويقروها ولو كانت اسفل الصفحة في القاع ..

يعني لو البوست او كاتبو ما بستاهل الناس تقراو حا يموت موت طبيعي لكن التثبيت بيخلي الناس تخش البوست تشوف الحاجة المهمة الخلت صاحب الموقع يثبت البوست وانا لاحظت
واظنك لاحظت انو في بوستات كتيرة مثبتة ومع ذلك عدد المتداخلين فيها ما كتار ..

اما في حالة المقالات زي الكاتب فتحي الضو فأنا اقترح انو تتعمل ليو عضوية هنا ويتم الغاء جميع البوستات المثبتة وحتى لو قلنا فتحي الضو ما بيرغب في انو تكون عندو عضوية ممكن
صاحب الموقع يعمل ليو نيك نيم وكل مرة ينزل المقال بي حسابو ويخلي البوست بتاعو بين البوستات ياكل نارو والناس تعلق عادي ..

افتكر دا حل كويس ..!!

سلام يا ناذر،

والفرق شنو بين البوست والمقالة؟

هذه مسميات وتفاصيل فقط لي حاجة واحدة تتمثل في كلام مكتوب منشور هنا.

بعدين هو زول بكري ده حبا يسجل او يكتب هنا او بكري حماهو، ام هو ذات استعلاء تكبر وتافف مثقفاتية الجلابة البشوفو البكتبو هنا كرور ساكت رغم انهم من انجز ظاهرة سودانيزاونلاين الخلا امثالو شغالين طواف حول كعبة هذا الصرح؟

بغض النظر ما مفروض فرد بعينه ماعايز يشترك هنا كعضو، ينفرد بي واجهة المنبر كل 48 ساعة، دون ادني اعتبار لعضوية هذا الفضاء.

معهود في مثقفاتية الجلابة
*************
نمطية مثقفاتية المركز وليس الجلابة...لان المركز ده بروز وليس جلابة "تجار"
لان التقسيم الجديد هو الناس يا سودانيين يا بروز
الموقع يركز على العلاقات العامة "مخلفات الشيوعيين " وليس التنوير اصلا
وكلمة جلابة الفالصو دي تجاوزناها في المنبر زمان
لان مكونات المركز دي والناس البقو قوميين وشيوعيين وكيزان في السودان ديل ..لا يمثلون السودان ولا السودانيين لا وعيا ولا سلوكا وهم اقلية في المركز
بعدين عنوسة الشيوعيين والكيزان بعد سن السبعين والياس "الدكاترة" المالية الاسافير دي ..لاشباع نرجسيتهم فقط ولا تفيد السودان ..ديل عالقين في سنة 1964 وهبي هبي يا اكتوبر
كتابة الشيوعيين بعد سن الياس مشكلة والله

اخونا كمال ...

غايته المرة الوحيدة البضمنا ليك انو اسمنا يكون فوق ( دون واسطات ) ... لامن بكري يسود المنبر ...

و بالكوم ... كل الناس تجي تعدد مآثرنا ... حتى لو بالكضب ... :)

انا غايتو في كم زول كده زي ما قال هاشم صديق عن علي مهدي :

" والله علي مهدي ده ... يجي بطاقيته الخضراء دي ... ويخطب ويعدد مآثري ... إلا أقوم وأحيا تاني ... وأعضيهو في نص راسو ..."

يا بشاشا ... الناس البتقرأ... بتمش للزول توش ...

انا واحد من الناس ما بشوف العناوين الفوق دي نهائياً ... لأني تعلمت ان معظمها مجاملة بس ...

سلام بشاشاممكن أضيف من الجلابة ع.ع.إ ومن غيرهم اللواء تلفون كوكو أبو جلحة لكن المشكلة يا بشاشا لو علق ليك مواضيعك فوق فأنت أيضاً جلابي

كلام بشاشا عن سياسة تعليق البوستات أعلى المنبر صحيح
وقد أحسن الاختصار بقوله: الخيل تجقلب والشكر لي حماد
شكرا عزيزي بشاشا
(هذه بنسميها حملة رد الاعتبار للعضوية الخيلا بجقلب، ولكن للاسف الشكر كالعادة لي حماد! )

بشاشا.

أعتقد أن الأستاذ فتحي الضو لديه عضوية في المنبر ولكنه غير نشط.

ولكن تجدني أتفق معك تماما، في ما زكرته عن أحقية النشر في أعلى الصفحة.
معظم القراء يدخلون الموقع بصفة يومية من أجل كتاب المنبر، وليس من أجل كتاب المقالات الأسبوعية أو الشهرية.
حتى أن هنالك أعضاء في المنبر غير نشطين بيتم وضع بوستاتهم في اعلى الصفحة، وكل ذلك كما زكرت بيتم على حساب الذين يكتبون بصفة دائمة ومستمرة.

وملاحظة هامة.

في أعضاء في المنبر إذا لم يتم تعليق بوستاتهم في اعلى الصفحة، فلن يدخلها احد، وسوتجد نفسها في ادنى الصفحة وربما في الصفحة الثانية.
وهنالك اعضاء بوستاتهم لهديهم عدد كبير من القراء وعدد كبير من المداخلات، ولكن لا يجدون حظهم في اعلى الصفحة.
أطالب الأخ بكري بأن ينتبه الى ذلك.

عزيزي بشاشا
اولا كامل التقدير لرأيك ولمساهماتك الرصينة في المنبر
بالفعل انت وغيرك من الاعضاء المميزين تستحقون نفس المعاملة
الاستاذ فتحي الضو (كصحفي إستقصائي ) يختلف في تفاعله مع المنبر عن العضوية النشطة (كتاباته ممنوعة من النشر داخل البلد)
لذلك من الضروري ان يفرد الاخ بكري حيزا لمقالاته اعلى المنبر من أجل تحقيق اكبر قدر من القراءة
لأنه يكتفي بالكتابة ولا يرد مثل بقية الاعضاء على ما يكتب .
هدفه الأساسي توصيل رسالة لمن يهمهم الأمر وليس التفاعل مع ما يكتب.
لا أرى أي مانع أن يفرد بكري لمقالاته حيزا أعلى المنبر طالما هناك هدف محدد لذلك
لك الحق ان تطالب الاخ بكري بان تحظى بنفس المعاملة دون ان تحجر على فتحي حقه في التمتع بهذه الأفضلية .
وافر الاحترام والتقدير لك ولفتحي

تحياتي بشاشا
وضيوفه
الحقيقة عادة لا اقرأ العناوين المعلقة
اتفق معك رغم اني لا اقرأها لكن بنبسط لامن يعلقو لي
ف شنو
هو نوع من التحفيز بالجد كدة
يعني ينكتب وفي زمن وجيز يحصل مئات المشاهدات ولا يعلق
ثم في قانون ثابت اظنو
اي حفلة في امريكا ولا لمة لازم تتعلق
وانتهز هذه الفرصة واطالب بي مكتبة للمشرف ولي مالنا ناقصين يد ولا كراع
بمناسبة فتحي الضو هو يجد كل الفضاء ونحن المساكين ديل حدنا سودانيز

هاهاهاهاهاهاهاهاهاهاهاها

( هشاشا )

ياخي انت ممتع .. و الله و بالله و تالله .. ممتع

وين ياخ انت اختفيت ليك فترة ؟
و ( جيتنا الليلة )

قلت لي (جلابة) ؟
جلبتك ياريتا بالقلبة ..

الأمين موسى البشاري
ناذر بن خليفة
( متعتماني ) متعة ليست كـ ( متعة ) اخونا بشاشا !!



تخ :

أستاذنا / فتحي الضو

لو مررت من هنا
أو قيل لك أن ( مغموراً ) اسمه بشاشا قال كذا و كذا وكذا ... إلخ ..

حلفتك بالله :
أن ترد
أو تعتبر
أو تعير


لأن بشاشا سيأتي بعد نصف قرن ليقول لأحفاد أحفاد أبناءنا : أن فتحي الضو رد علي و قال و قال و قال
و أن فتحي الضو ( شخصيا) قرأ ( مقالي الطويل عنه ) و كتب و علق و أسهب قائلا :
و أن فتحي الضو ( في معرض رده عن مقالي ) المنشور قال :
( ثم أنه )


تخ ثانية :
بشاشا ... ( عبارك كبير لكن )

مغمور: (اسم)
اسم مفعول من غمَرَ
المَغْمُورُ من الرجال : غيرُ المشهور ، مَجْهُولٌ ، خَامِلُ الذِّكْرِ
المَغْمُورُ : المطمورُ .

كااااااك وحات نظري اكلك ألييل المستشفى ده يرفعو بكري موش يعمل مجاعة فكرية وتسطيح وضبابية وتغبيش رؤى
دعاياتو دي تاني ماتجيب درهمين
شن نفرك اتا يعلقوك من عرقوبك قول امين
انسان بارع في طرح العلل والمشاكل افكارك دي توسعا براك في احلامك والصباح تشم يدك كويس وتكتح وترش الجلابة في صحيانك

يا سيد بشاشا...سلااااام تعليق الموضوعات فى صدر المنبر يخضع لسلطة تقديرية عند السيد بكرى ..وهناك موضوعات يتم تثبيتها فى صدر المنبرتدى لربك العجب على اية حال ...انا فى تقديرى موضوعات فتحى الضو لا ينبغى ان تعلق فى صدر المنبر لانها موضوعات بينها وبين هموم وتطلعات المواطن البسيط ما بين السماء والارض من بعد..اعتاد ان يكتب الموضوعات التى تجلب له الصيت والدعاية لنفسه وحده وهذا لعمرى ضرب من الانانية والتعالى والانتهازية والرياء...مثلا اقول ليك (اتصلت على المحكمة الجنائية بشان المعلومات الواردة فى بيت العنكبوت ...وام الفضائح ان قال سيرغى لافروف ان امريكاطلبت منه التوسط لدى البشير لفصل الجنوب مقابل المحكمة الجنائية...الخ كتابات الصيت والدعاية التى تسلط عليهالاضواء ...هل كتب ذات مرة عن انعدام مياه الشرب وتلوثها وعن تفشى الايدز والتهاب الكبد الوبائى وانهيارالتعليم والتسول وانعدام ابسط ضروريات الحياة للمواطن المسكين..هل كتب عن المسرحية والملهاة العبثية بين السلطة والمعارضة وفرجة المواطن عليها وضياع وطن جرا هذه المسرحية التى لا تنتهى فصولها...الخ الموضوعات الحية وليس موضوعات الاضواء والشو لصاحبها فحسب.

ياخ انتو ناس محبطين ..
خلو الراجل ينداح
انا ما عارف بكري دا ليه بيلقط البيض الزيكم ديل ويختهم في طبق واحد مع بيضة النعامه دا ليه ؟
اسي الرعاع المتلكم مفروض يكونو في منبر واحد مع صاحب معامل مشهور ؟

ليبقى عاليا حتى يتم شعلقته فووووق :)

يعني ما ممكن حبيبنا هشاشا دا

يلاقيها منكم ولا من الجلابي بكري ابو بكر ولا من البورد الجلابي دا


Up






..















UP













..














Up

Quote: الأمين موسى البشاري ناذر بن خليفة ( متعتماني ) متعة ليست كـ ( متعة ) اخونا بشاشا !!

حبيبنا عبد اللطيف ...

النصيحة نحن ذاتنا مستمتعين بالعك الكروي دا

تمخض مخ هرقل كوش بشاشا فولد منبراً جلابيا

اي والله


هذا المنبر طلع جلابي ملامح وهوية ... والله صحي ()

عادل امين يا مراحب

موضوعنا في الخيط ده كيف الاداره ما عندها اعتبار او تقدير يذكر لي مجهود او عرق العضوية اللي جعلت من هذا الفضا قبله لا مثال الجلابي فتح الضو المفروض علي رقابنا من دون اي مبرر او بي اسلوب فيهو تبخيس لي إسهام الالاف من الأعضاء.

نطالب من باب رد الاعتبار والعرفان لمجهود العضوية ترك قرار رفع البوستات او المساهمات في واجهة المنبر لرأي الأغلبية كقاعدة.

ده هو الطبيعي والمنطقي الا في هذا الفضاء الذي يدار بالمزاج الصرف لصاحب الموقع او موكله اللي في العادة شبح ومجهول للعضوية!!

هههههههه

اسع الناس دي مهسترة قدر دا مالا

انا لله ياخ من وجع الضرس

😂😂😂😂

أخ لو ما جاب سيرة الجلابة ولا قال فتحي ما يعلقوا ليهو ..
كان يكون قون في التمانيات .
في ناس هنا لابدين للجنس دا .
هاردلك بشاشا المجيد .. دي احتسبا .
خخخخخخخخ

غايته المرة الوحيدة البضمنا ليك انو اسمنا يكون فوق ( دون واسطات ) ... لامن بكري يسود المنبر ...

يحي قباني مرحب بيك،

فعلا لقد عبرت عن لسان حالنا كاعضاء في هذا الفضاء.

نعم امثال فتحي الضو متحكرين فووووق في العلالي ليل نهار من دون مايفكو بونية او ياخدو شلوت، كما هو حال امثالي، البقضو يومم حايمين بين جخانين البوستات، يشيلو او يردمو في الكلكات!

لكن او حقيقة لله، دي فعلا طريقتنا في السودان!

نعم، واســــــــــــــــــطة قال ليك!

عاش ابوهاشم!

Quote: هاردلك بشاشا المجيد .. دي احتسبا . خخخخخخخخ

طلحة يا صاحب

للضمان كدا مرحبا بك في عااالم الجلابة خخخخخخخخخخخخخخخخخخخ

الزول دا يكون قايل نفسو علي المك

منتصر يا مراحب

لام بشاشا عن سياسة تعليق البوستات أعلى المنبر صحيح وقد أحسن الاختصار بقوله: الخيل تجقلب والشكر لي حماد شكرا عزيزي بشاشا 

العزيز معاوية الزبير مرحب بيك.

نعم فهم بكري للشغلانه دي حقيقة شطب راسي تماما!

نعم الالاف البكتبو في الموقع ده في نظر بكري لايسوو شئ مقارنة بي فردتو وهذا عجيب!

من الجانب الاخر زولو ده لا يساهم اطلاقا باي شي في هذا الفضاء!

نعم لما قرر يساهم مشي سجل في موقع اخر منافس!!

غايتو الفاهم حاجة يفهمنا ماهي الحكمة في تسويق قلم لا يساهم في الموقع اللي هو مفروض فيهو علي الجميع باي شئ!

أعتقد أن الأستاذ فتحي الضو لديه عضوية في المنبر ولكنه غير نشط


شلوم يا دينق

طيب لو كده ليه هو نشط في موقع منافس اخر ما في زول هناك جايب خبرو؟

اليس هذا عجيب؟

كيف يخلي موقع هو مفروض فيهو علي رقاب العضوية ليشارك في تسويق موقع اخر منافس من دون ما زول هناك بهبب ليهو؟

بوستاتو الشفتها في فوراول ما فيها ولا حتي مداخلة واحدة بالغلط!!!

اكيد الموقع داك بالنسبة ليهو وللكثيريين موقع مثقفاتيه او مش زي ده الخاص بالعنقاله والكرور من أمثالنا!

أما آن لهذا المنبر الجلابي وصاحبه ..

أن يترك نرجسيته وتعاليه وصلفه وينصف أمير كوش صاحب ال 10000000000000 نقرة

الجلابي بكري ابو بكر يهتم فقط بكتابات الجلابة المتفلهمين والعاملين فيها مثقفاتية

هذا المنبر يتبع لدولة ابارتيد الجلابة ويجب مقاطعته ...

حتى يترك سياسة الخيار والفقوس التي يمارسها صاحبه ...

صباحكم جلابي بنكهة كوشية ......... !

أين الطباخين مجيدوووو وحامد بدري .. تعالوا اصطفوا مع اخوكم هشاشا دعما للقضية الكوشية ...............



عاااالم ،، بطاااالة ..

Quote: هههههههه اسع الناس دي مهسترة قدر دا مالا انا لله ياخ من وجع الضرس

الناس دي شكلها جلابة ومساندين لبكري ..

غايتو الواحد بقى زي بتاع العدة العندو كشك

يجي الصباح يفتح الكشك ويعمل فرش متااااع

يمشي ينوم وبعد الغداء يجي العصر تاني يفرش متاعو في البوست الممتع دا


عرفتنا ليه الناس دي مبسوطه ...؟!

لك الحق ان تطالب الاخ بكري بان تحظى بنفس المعاملة دون ان تحجر على فتحي حقه في التمتع بهذه الأفضلية

دكتور حيدر حسن ميرغني يامراحب،

ياعزيزي الموضوع ما كده بالنسبة لي.

ذكرت اسم بشاشا كمثال فقط.

الغرض من كلامنا ده هو اعضاء هذا الفضاء او كيف مجهودم ما مقدر حق التقدير وهم الاف مقارنة بفرد واحد احد!

ده موضوعي الاساسي هنا.

شخصيا لا احتاج لي بكري في هذا الفضاء بقدر حوجة بكري لامثالي بل كل عضو فاعل هنا، والعارف عزو قالو مستريح، ولاشنو؟

مع اني ما قاعد اكتب خارج هذا الفضاء اطلاقا بالعربي.

نعم مثل هذا الاخلاص والوفاء لهذا الموقع لايجد تقدير من بكري مقارنة بي زولو ده اللي كلامو القديم او معتت منشور في كل الاسافير وهو لايشارك هنا اصلا دعك من ان يشارك هنا حصريا كما نفعل.

اما كلامك عن مقال وماشابه فما فهمتو حقيقة لانو ذات البتسميهو مقال ده منشور في منبر اخر منافس زي ده كبوست عادي من دون زول ما يهبب ليهو!

اذن لافرق مابين مقال وبوست، ولامعني لي انو ما عايز نتناقش وماشابه!

اذن باختصار شديد ماذا قدم فتحي الضو لهذا الموقع مقارنة مش بي بشاشا وانما باي عضو هنا ليفرد هكذا بواجهة الموقع كلو من دون ما دون ما يدق مدماق واحد؟

اذن هذا تصرف خاطئ تماما من بكري ومستفز بل محتقر لاسهام العضوية هنا اللي جعلت من هذا الموقع ماهو الان، وانا اشهد انو بكري مابقصد كده، ولكن ده مامهم هنا. معزتي..

بمناسبة فتحي الضو هو يجد كل الفضاء ونحن المساكين ديل حدنا سودانيز

ود اب سن يامراحب،

نعم ذات كلامو القديم او معتت ده المفروض علي رقابنا فرض، سلفا مدلوق في كل المواقع وهذا عجيب!

نعم حتي هنا كنوع من العرفان افتراضا ورد الجميل، هو لايخص هذا الموقع بي مقالاتو هذه وهذا عجيب!

نعم ناس زيك كده بيكتبو حصريا في هذا الموقع لايجدون ولا واحد في المليون من البلقاهو صاحب الحظوة هذا اللي اصلا ماشغال بالموقع ده الشغلة رغم كل البلقاهو علي حساب من جعلو هذا الفضاء ماهو اليوم!

هذا ما يثبت انو الموقع ده، حقيقة دكاكيني او كيري ساكت من حيث الادارة فيما اتصل بسياسة التحرير القايمة علي المزاج والترضيات!

عبداللطيف خليل،

شكري لتعتيل البوست.

عتاد ان يكتب الموضوعات التى تجلب له الصيت والدعاية لنفسه

علي تاج الدين مرحب بيك،

نعم هذا جانب اخر!

اعترف انا ماعندي القدرة او الوكت لي قراية اي كلام معتت بايت او قديم من نصف قرن باقلام امثال هذا الجلابي.

ولكن من قدر القريتو اتضح لي انو فعلا شغلو معظمو بيع لي كتبو او ده ماعيب ولاغلط، ولكن البعرفو في ناس هنا بدفعو بالدولار للاعلان، او هو بيعلن عن بضاعتو بلوشي!!!

اسع الناس دي مهسترة قدر دا مالا

سلام يا هيثم غالي ومرحب بيك،

الطريف جدا الماسك في موضوع جلابة او جلابي هو صحبي المجولب البشاري، وكالعهد به،

هو لايملك غير اثبات كل شولة خطها خبير الوعي الجلابي رقم واحد في المليون ميل، بخصوص طريقة تفكيرو كمجولب اي الجلابي بشاشا!

كونو الموقع ده جلابي صرف فهذا قلناه حتي قبل ما اسجل هنا كعضو، او كمان بالانجليزي الزمن دااااك، حيث الكتابة بالعربي بالمناسبة ظهر مؤخرا مع هذا الموقع !

نعم امعانا في طبيعتو الجلابية!

اذن مضحك كونو البعض يمسك في كلام قلناهو قبل كم طاشر سنة، اي قبل ما نسجل هنا زاتو كعضو!

دليل اخر علي جهوية هذا الفضاء هو كيف المتصدرو او واجهتو جلابي صرف، وليس احد مهمشي الجلابة، وهذه حقايق تثبت صحة كل سطر خطه يراعنا هنا!

اذن لاجديد في جهوية هذا الفضاء بالنسبة لاخصائي الوعي الجلابي رقم واحد، اي الوغد بشاشا!!!!

أخ لو ما جاب سيرة الجلابة ولا قال فتحي ما يعلقوا ليهو .. كان يكون قون في التمانيات . في ناس هنا لابدين للجنس دا . هاردلك بشاشا المجيد .. دي احتسبا .

طلحة عبدالله مرحب بيك،

مافي زول قال ما يعلقو ليهو!

نعم في زول قال الاولي بالتعليق هم عضوية هذا الفضاء اولا واخيرا.

اي زول تاني ماعضو مابساهم في جلب النقرات لهذا الموقع، يكون في النص.

نعم مش زول واحد احد، ماسك الاول النص والاخر بي مفردو وعلي حساب الالاف من العضوية.

اما موضوع طبيعة هذا الفضاء الجلابي فده راينا او نحنا راينا بنقولو عنـــــــــــقر ما مدنـــــــــــــــقر!

لانجامل قط!

هلا بالامير هشاشا

كككككـــ .... كككككككككك

بشه تاني قام جاب سيرة البحر (الجلابة) :)

Quote: الطريف جدا الماسك في موضوع جلابة او جلابي هو صحبي المجولب البشاري، وكالعهد به، هو لايملك غير اثبات كل شولة خطها خبير الوعي الجلابي رقم واحد في المليون ميل، بخصوص طريقة تفكيرو كمجولب اي الجلابي بشاشا! كونو الموقع ده جلابي صرف فهذا قلناه حتي قبل ما اسجل هنا كعضو، او كمان بالانجليزي الزمن دااااك، حيث الكتابة بالعربي بالمناسبة ظهر مؤخرا مع هذا الموقع ! نعم امعانا في طبيعتو الجلابية! اذن مضحك كونو البعض يمسك في كلام قلناهو قبل كم طاشر سنة، اي قبل ما نسجل هنا زاتو كعضو! دليل اخر علي جهوية هذا الفضاء هو كيف المتصدرو او واجهتو جلابي صرف، وليس احد مهمشي الجلابة، وهذه حقايق تثبت صحة كل سطر خطه يراعنا هنا! اذن لاجديد في جهوية هذا الفضاء بالنسبة لاخصائي الوعي الجلابي رقم واحد، اي الوغد بشاشا!!!!

يا هشاشا .. انت ما عندك اصحاب ينصحوك؟

ياخ ما تبقى اضحوكة للناس لأنك اليومين دي بقيت مطلشة .. والله صحي ()

تعليق البوستات دا ما عندو علاقة بجهوية لا جلابة ولا غيرو

بكري بقرأ المقال وبعلق حسب مزاجو .. والمقال نفسه يفرض نفسه .. وبكري تاجر

وما بهمو الكتب المقال فتحي الضو ولا فضيلي جماع ولا محسن خالد ولا حتى انت

ههههههههههههههههههههه أوع تكون حاسب مساهمتك ام 1000000 نقرة دي مساهمة

ياخخخخخخي تح ...

ياخ انا القدامك دا بكري الله يجزاه الخير علق لي بوستات :)

انت زول عياااان ومريض ومهوووس بعنصرية معششه في عقلك الباطني

ولما تضرب ليك كاسين بتجي تطرش قرفك دا هنا ...

بكري تاجر وتهمه الكليكات بس وجودة المنتوج

اها انت فاخورتك الفاضية ما فيها التكتح عشان يعلقوا ليك موضوع

ياهن كلماتك ال 4

جلابي

مجولب

مستعلواتي

ابارتيد

المصيبة انت فاكر نفسك مارتن لوثر كنج

فتحي الضو الانت بتقارن نفسك بيهو

افتح أي موقع بتلاقي مقالاتو في التوب .. ومعدل قرايتها قدر نقراتك ال 1000000

هشاشا عليك الله خش الضل ياخ!

لأنك بقيت مسخرة ... ومضحكة

حبيب ألبي بشه ....

لا يزال الجلابي بكري سادر في غيه ومتجاهلا المطالب العادلة للامير الكوشي

يا بكري كدا شوف لينا الموضوع دا ياخ!

بشتنا دا زول تحفه وأثر من الآثار القيمة لسودان الغد ياخ

كتب حبيبنا هشاشا ما يلي

Quote: دليل اخر علي جهوية هذا الفضاء هو كيف المتصدرو او واجهتو جلابي صرف، وليس احد مهمشي الجلابة، وهذه حقايق تثبت صحة كل سطر خطه يراعنا هنا! اذن لاجديد في جهوية هذا الفضاء بالنسبة لاخصائي الوعي الجلابي رقم واحد، اي الوغد بشاشا!!!!

تعريف الاخصائي بشه للناس الما قادرين يعطوا بشه مكانته المرموقة

A specialist is a man who knows more and more about less and less

او

A specialist is a man who knows more and more about one thing


ظل ولمدة طاشر سنة وبمداخلات بلغت كم كدا ما عارف

يتحدث عن جلابية واستعلاء مؤسسات الجلابة

ومع هذا الجلابي بكري ابو بكر ما حصل شعلق ليهو بوست

يعني منتظرو يموت حتى تعلق ليهو بوست ولا شنو ؟!

وبعدين معاك يا بكري؟

يعني فتحي الضو الجلابي دا فايت حبيب ألبي بشاشا دا بشنو؟

مش ياهو كتابو الواحد دا بتاع بيت العنكبوت :)

بشتنا دا عندو مؤلفات لم ترى النور لضيق ذات اليد بس

دراسات في ال Jallabah Studies وأنا لو محلو ما بقعد الناس الوهم ديل :)

!!!!

Quote: ولكن البعرفو في ناس هنا بدفعو بالدولار للاعلان، او هو بيعلن عن بضاعتو بلوشي!!!

أمكن قاعد يدفع مقابل الاعلان ...!!

شن عرفك ؟!!

.*.

ناذر شلوم،

فجاة كلامو الفوق عن علي الحاج كمثال المنشور في الاسافير كله بقي اعلان مدفوع الاجر ولا شنو؟

ده اعلان لي شنو مثلا؟

اللي اداك بالكيلو يدينا بالوقية!!

مساء الانوار يا بشه حبيب ألبي

شايفك مداوم على رفع البوست ... فشكراً ياخ للعتالة وكدا :)

اوع يكون الجلابي الحقار بكري ابو بكر دا تاني عمل ليهو حاجة

لأني انشغلت شوية بهناااااك وما متابع حركات الجلابي دا :)



..



النبي فيك ما تكسح قبل تكلمنا .. عشان نقوم معاك بالواجب ياخ


حفلة وداع صغيرة كدي تتذكرنا بيها ..

جريقيس الجلابة البشاري،

ملكي اكتر من الملك عساه يجد القبول!!

حالتك تحنن العدو!

كالعهد بك، خارج المنبر ياكا حمرتي داك، وداخل المنبر ياكا موسي خلال!

مجرد اداة، في يد الجلاد!

شاكرين لخدماتك في تعتيل البوست، رجا واصل!

بهذا نتوقف عن الارسال، وداعا والي حين عودة لو حيينا.

Quote: بهذا نتوقف عن الارسال، وداعا والي حين عودة لو حيينا.

ما لسه بدري يا (هليفه)؟!

تدعوكم رابطة جراجيس الجلابة لحفل وداع أمير كوش

مناهض الجلابة وجراقيسهم ..

لقد ظل المذكور يهذي لمدة طاشر سنة في هذا البكان مساهما بحوالي 1000000 نقرة ونقرة

الحفل برعاية الجلابي بكري ابو بكر

والعاقبة عندكم في المسرات

سلامات الحضور وما استنتجته أنا شخصيا (كرأي شخصي)
لو كان العنوان يحتوي على (فكر الجمهوريين) او (كاتب ما قام بتعظيم الاستاذ او الفكر الجمهوري)
او (محاضرة أو كتاب لاحد الجمهوريين او معظمي الفكر الجمهوري والاستاذ)
ستجد العنوان مُعلق فوق بعد 3 ثواني من كتابة الموضوع
هذا غير رفع الموضوع على الصحفة الرئسية

Quote: يا هشاشا .. انت ما عندك اصحاب ينصحوك؟ ياخ ما تبقى اضحوكة للناس لأنك اليومين دي بقيت مطلشة .. والله صحي () تعليق البوستات دا ما عندو علاقة بجهوية لا جلابة ولا غيرو بكري بقرأ المقال وبعلق حسب مزاجو .. والمقال نفسه يفرض نفسه .. وبكري تاجر وما بهمو الكتب المقال فتحي الضو ولا فضيلي جماع ولا محسن خالد ولا حتى انت ههههههههههههههههههههه أوع تكون حاسب مساهمتك ام 1000000 نقرة دي مساهمة ياخخخخخخي تح ... ياخ انا القدامك دا بكري الله يجزاه الخير علق لي بوستات :) انت زول عياااان ومريض ومهوووس بعنصرية معششه في عقلك الباطني ولما تضرب ليك كاسين بتجي تطرش قرفك دا هنا ... بكري تاجر وتهمه الكليكات بس وجودة المنتوج اها انت فاخورتك الفاضية ما فيها التكتح عشان يعلقوا ليك موضوع ياهن كلماتك ال 4 جلابي مجولب مستعلواتي ابارتيد المصيبة انت فاكر نفسك مارتن لوثر كنج فتحي الضو الانت بتقارن نفسك بيهو افتح أي موقع بتلاقي مقالاتو في التوب .. ومعدل قرايتها قدر نقراتك ال 1000000 هشاشا عليك الله خش الضل ياخ! لأنك بقيت مسخرة ... ومضحكة

يا أصلي ....

انتو يقع فيكم العدو ... اصلو ما بتريحو الزوول ..

هشاشا ... اختشي على دمك ..
كمان عاوز تتدخل في الشئون الإدارية للمنبر ؟؟
يعلقو شنو وما يعلقو شنو ؟؟؟
هذه بحد زاتها مخالفة صريحة للائحة المنبر
وتستاهل العقاب فيها....

عااالم بطاالـــــــــــــة ,,

يااااا حليلك يا بشاشا


يا حليلك ياااا البتأدب لينا الجلابة بالعكاز تهئ تهئ تهئ

يا حليلك يا بشه البتجيب لينا اللحمة بالكراع


اللليلة ووووووب ...

ماشي تخلينا لمنو يا بشه ياخ

يا حليلك يا هشاشا البتجيب لينا اللبن بالعلبة

تهئ تهئ تهئ

يا حليلك يا النقراتك مليون ... وكيبوردك مسنون

كيف تفوت تخلينا ياخ!


يا بشششششششه بتطووووول؟

هشاشا كسح ... !

الديناصور هشاشا وحشتنا ياخ!

كنته ماسك لينا زمن .. والله صحي :)

بشة دا افقدوه ياخ

فوووق ... فوووق ... بشاشا فوووق ...