بنك الإدخار السوداني ومنصور أحمد الشيخ:

12:01 PM April, 13 2017

سودانيز اون لاين
أبوبكر عباس-الإمارات
مكتبتى
رابط مختصر

بنك الإدخار السوداني ومنصور أحمد الشيخ:
توثيق شفاهي:

منصور أحمد الشيخ مؤسس البنك هو شقيق الشفيع أحمد الشيخ القائد العمالي الذي أعدمه جعفر نميري بعد فشل محاولة انقلاب هاشم العطا.
زمان ناس مدني كان عندهم حاجتين بفتخروا بيهن:
- رئاسة وزارة الري بمدني
- رئاسة بنك الإدخار السوداني
وهن الرئاستين الوحيدتين لوزارة وبنك خارج الخرطوم

هلا بيك ابوبكر عباس
اشرقت الانوار والله
وحلت علينا البركات
ونتمنى دوام التقدم والارتقاء
وكمان الهادي احمد الشيخ
طبيب وجراح العيون الانسان
رحمهم الله جميعا بقدر ما اعطو للوطن

بدأ ميلاد بنوك الادخار فى العالم فى الدول الاوربية فى اوائل القرن التاسع عشر بهدف مساعدة الذين يعانون من وطأة الحاجة ثم إنتشر فى اجزاء اخرى من العالم. افتتح بنك الادخار السودانى فى يوم الادخار العالمى الموافق 31 أكتوبر 1974م. أختيرت مدينة ودمدنى مقراً لرئاسته وأعتقد بتمويل فني إيطالي.

ملحوظة: أي معلومة بهذا البوست قابلة للتعديل والتنقيح

قلت لمحمد عوض عباس ابن عمي المقيم بقطر حالياً، إتّا يا حمّد صوفي برهاني وأهلنا ختمية، اللماك زمان في منصور أحمد الشيخ وعيّنك ببنك الإدخار منو؟
إبتسم وقال لي: منصور بعد ناس الانقاذ أحالوهو، لاقاني وسلّم عليّ وقال لي إتّا شغال معانا بالبنك موش؟ متذكرك إتّا الوحيد الما حضرت معاينتو من الشغالين معانا بالبنك، وواصل محمد عوض من غير يكمل كيف إتعين قائلا:
لأي تعيين بالبنك حكاية، مرّة منصور الصباح وهو داخل على البنك لقى ليهو محمد احمد لابس ليهو عراقي وسروال وسديري وشايل ليهو سوطـ، قال لمنصور: ممكن يا أستاذ تديني خشمين معاك؟ منصور قال ليهو خشمين ومهاهن كباية شاي بالمكتب فوق.
بعد الشاي، محمد أحمد قال لمنصور: كان عندي كارو بحصان ساتر بيهو حالي، الحصان مات والحوجة خلتني أبيع الكارو
منصور: داير نساعدك بشنو؟
- بكارو وقروشكم برجعها ليكم
- منصور نادا ناس التمويل وقبل ما محمد أحمد يكمل القهوة؛ القرض المُيسر جدا إتصدق وعين ليهو بتو طالبة الثانوي بدوام جزئي على أن تلتزم بإكمال دراستها.

ياسلام على الزمن الجميل

وسودان الصدق والنزاهة وكفاءة الموظف

ياريت يعود تانى ياابوبكر

تحياتى

هي يا العشا بلبن أنت مش حردت المنبر ومشيت؟؟؟

قادر الله!

عودا جميلا مستطاب ...
تفوت وتخلينا نجلقب ..
والله سعيد بي عودتك ..
ويلكم باك مستنير

انا قلت لعمر دفع الله يرسمك كاركتير وأنت مغادر ..
وكتين رجعت لينا الطلب مسحوب..

الشفيع أحمد الشيخ (الله يرحمو ) ومنصور احمد الشيخ

مازال منزلهم العامر في ربوع شندي مفتوح للضيوف وطلاب العلم ....
فهم اهل كرم وجود وفزعه لله درهم ...

عودا حميدا مستطاب ايها المستنير
انرت البورد ...

حمدلله على السلامة


رجعة المستنير واليوم خميس

محظوظين ناس البورد

حمدلا بالسلامة
بكري
وضيوفه
قبل كم سنة . الوالد عليه الرحمة وديناهو الخرطوم للعلاج . زمن كان عندي عربية كورلا 96 . يا حليلا
المهم الوالد من ضمن الامراض كان عندو مشكلة في العيون . وديناهو للهادي احمد الشيخ . في ام درمان
العيادة بيوت ام درمان الزمان ديك . البناء اثري . حتي الادبخانة تحسسك انك خاشي بيت سودان . باب خشب يكاد يكشف داخله
اخدت لي لفة في البيت بي برة . فيهو حديقة داخلية
العيادة جوة صالون كبير
دقعنا الرسوم وخشينا
رجل لطيف وهادي ولكنه لم يبتسم ولم يتجهم بروفيشنال
اخد معانا قريب ساعة ونص . كشف واسئلة وجاب مجسم بتاع عين وشرح لابوي بلغة مبسطة وصبورة وابوي استزاد منو بالاسئلة
بعد دة كلو
قال لينا تمشو المركز العربي الحديث للعيون ومحل تاني نسيتو . لأنو محتاج عملية وانا ما بعملها
ونادا الشغال معاهو
رجع ليهم قروشهم
رفضنا
واصر
انا ما عملت حاجة اتونست معاكم بس
نسيت
العيادة عبارة عن معرض حائط للصور والذكريات علي طول الحوائط
رحمهم الله

(انا قلت لعمر دفع الله يرسمك كاركتير وأنت مغادر ..
وكتين رجعت لينا الطلب مسحوب.. )
انت هيّن يا ود الملك
انا قروش الكشف دي ارجعها كيف؟
ناس رجعوا دنقلا وناس غربّت وناس شرّقت
غايتو نشوف طريقة نتصدق بيها كان ينفع
(أوعى تسألني الكشف حق عِرس ولّ بكا)

حسب علي الرزوقي من الموظفين المؤسسين وفي إتصال تلفوني
: التمويل كان من بنك السودان ب250 ألف جنيه سوداني والدعم الفني كان من إيطاليا وقدمت إيطاليا منح دراسية كثيرة لموظفي بنك الإدخار.
أحدث هذا البنك أثر كبير في حياة أُسر كثيرة ويرجع الموظفين نجاح تجربة الإدخار بالجزيرة لعظمة الإقتصادي الإشتراكي القدير منصور أحمد الشيخ

رجعت للمنبر وفِي جعبتي (شنطتي) كميات من كلمات الذوق
كبادرة حسن نيّة أقول لمؤسس البورد الاستاذ دينق:
جيسس (عيسى) يسامحك
على وزن:
الله يسامحك عند المسلمين

هل يقل منصور أحمد الشيخ في رؤيته لحل مشاكل الفقراء عن البنغالي محمد يونس؟"وبسبب تفاقم أوضاع الفقراء في بلاده، مضى الإقتصادي البنغالي محمد يونس يحاول إقناع البنك المركزي أو البنوك التجارية بوضع نظام لإقراض الفقراء بدون ضمانات، وهو ما دعا رجال البنوك للسخرية منه ومن أفكاره، زاعمين أن الفقراء ليسوا أهلا للإقراض.لكنه صمم على أن الفقراء جديرون بالاقتراض، واستطاع بعد ذلك إنشاء بنك جرامين في عام 1979 في بنغلاديش، لاقراض الفقراء بنظام القروض متناهية الصغر التي تساعدهم على القيام بأعمال بسيطة تدر عليهم دخلا معقول وقد حصل علي جائزة نوبل للسلام عام 2006"نماذج من تجارب بنك الإدخار بود مدني قبل أن تقيل الإنقاذ منصور وتحول تبعية البنك للرعاية الإجتماعية:

تصدق يا مستنير لمن قريت خبر عن واحد بقى نبي اتوغوشت وقلت بكة عملها من ورانا المعفن اصلا حتة غيابو دي ما واقعة لي ..جري على الخبر لقيتو واحدا تاني وكنت ماشي عليه ابايعو بس اولاد الهرمة ديل قبضوه ..

كدي خلينا من موضوع البنك الما جايب حقو دا اها في امكانية نبوءة ولا لا ..
صدق ود البشرى لمن قال المستنير دا لو غاب كتير حا يفقد بريقو ولياقتو حا تكون واطاة واهو باين من بوستك المخستق دا😂

Quote: هي يا العشا بلبن أنت مش حردت المنبر ومشيت؟؟؟

المداخله دي ناقصة ولا انا ما شايف ... دينق بقيت تهرش ... غايتو يا مستنير بتكون تميتا في دقنوسك ساي واحتسبتا ...
بعدين يا علي دفع الله يكلموك عن أعظم اشتراكي سوداني وإنجازاته الاشتراكية علي الارض تكلموا عن نبي بري المخستك ... غايتو شيوعية آخر الزمان.

تجربة عربات التاكسي السيهان بيرد (saehan bird) الأنيقة الحمراء بمدني سبقت تجربة التاكسي التعاوني بالخرطوم

سوف احاول إيجاد صيغة التمويل التي تمت لاصحاب التاكسي.

لي يوم الليلة دي بتذكر حصالة الادخار بتاعتي التي تتبع للبنك.

والله، يا بكّة، إتّا فعلا عجوز

سيهان بيرد مش الجابتهم بثينة مرة نميري ومولهم بنك الادخار
في كوستي كان اسمو بنك الملجة

نورت البورد يا بكور بكانك فاضي ومافي زول قادر يحل محلك Wellcome back

يعني عشان المستنير قال لي انو السيد منصور احمد الشيخ دا اعظم اشتراكي في الدنيا دي كلها على طول اقوم اصفق واقتنع بي كلامو ..لا لا يا سيد صلاح زبير ..التجربة بتاعة بنك الادخار تجربة رأسمالية من الدرجة الاولى ولا تمت للاشتراكية لا من بعيد او قريب والآن نتاءيجها باينة وشوف صفوف المعسرين من هرب ومنهم من هو داخل السجن بتموين لو بقيت ادم سميث ما تقدر تطلع منو فاءيض قيمة تسد بيها اقساطك ..
فيا سيد صلاح المستنير هو حر في تصنيفو ... وانا حر في جرجرتي ليه للخستقة العاوزها ..
مع ودي وتقديري ليك

مراحب بعودة المستنير
انا طالبك تكمل بوست المداحين ياخ وقفتنا فى النص لاعرفنا نرجع لا عرفنا نواصل



عامر

لووول
عمو ابوبكر رجع :))

سلامات يا بوعلوة،

خستكه بالله بأشــدّما مما يعتلك، وسوّيلو "القيد حَرَن" ثم بشتكه واعلم، بأنّ
"بكّور المستنير" ببين في اللّفّة ..! في ما يشبه (انتا يا الدّهَب المجَمَّر مكتوبلك تنحرق
بالنّار دوام) .. وَ هكذا يكون "حباب الاشتراكية " ..


مرحب بالدكتور ابن عبّاس، الـمســـتنير الجهير ..

والرحمة والمغفرة لمَنْ ذكرت من ناسٍ سودانيين كانوا أفاضلا،
ولهم آثارٌ كثيرٌ منها إيجابي يكبُّ في نهر المصلحة القومية الشاملة..

ههههه والله يا ناس الدوحة قروشكم كتيرة ساي ..
الزول حيي فرفر تسولو كشف؟

كربون ابوحتحوت
راح شمار في مرقة.

سعيد بعودك دكتور أبوبكر
كنت من المتابعين لمناكفاتك من خارج المنبر, بصراحة زعلت لما غادرت المنبر مع جيتي, لأنك من الناس الذين أود محاورتهم جديا

الناس ده بتحب تناكفك, لكن واضح حتي الما بيطيقوك, ما بيحملوا بلاك!

علي دفع الله سلامات

Quote: لا لا يا سيد صلاح زبير ..التجربة بتاعة بنك الادخار تجربة رأسمالية من الدرجة الاولى ولا تمت للاشتراكية لا من بعيد او قريب ..

يا ريتك لو تكرمت بتوضيح البديل الإشتراكي في البنوك, وكيف أنها أفضل من تجربة بنوك الإدخار!

سلام يا طاهر،
موش ما بطيقوهو براي،
أصلاً المنتدى دا هو أنا
لو وريتك رسائل بكري الداخلية لي وتحنيسو؛
تبكي

بعد غيبة صراحة البوست جميل وخدم بنك الادخار مواطنى الجزيرة والمناقل واسهم كثيرا بقيادة وريادة المرحوم باذن الله الاستاذ / منصور محمد الشيخ
ولعودة ان شاء الله

عوداً حميداً و بركة الجيت....المنبر في غيابك عدم , قربَنا نفرش

Quote: أصلاً المنتدى دا هو أنا لو وريتك رسائل بكري الداخلية لي وتحنيسو؛ تبكي

غايتو مدلَع نفسك و ما مقصَر في حقها تب

بنك الادخار يا علي دفع الله، الذي تتحدث عليه يختلف عن بنك الادخار من ٧٤ - ٨٤
التجربة حدثت بمايو وبعد مايو في بداياتها
هي ليست تجربة اشتراكية خالصة، لكنها محاولة لتنمية الفقراء

سؤال يا علي،
هل منصور كان شيوعي؟

هناك شيء يحيرني في تعاون منصور مع نميري
كيف تجاوز منصور مقتل الشفيع وتعاون مع النميري؟

أرجو أن لا تبخل علينا

والله يا مستنير ما اي عندي معلومة عن منصور احمد الشيخ واول مرة اسمع بيه في بوستك دا ..
وبالجد تجاوزو لي مقتل اخوه وشغلو مع النميري بالجد حاجة محيرة على حسب معلوماتي الاخدت من موضوعك اعلاه.

فكرة البنوك اساسا فكرة راسمالية لأن الهدف الاساسي منها هو
تضخيم رأس المال وتعظيم الربح ومافي حاجة اسمها تمويل اشتراكي
الاقتصاد الاشتراكي تديره فقط الدول الاشتراكية وأي نظام سياسي غيره
يخضع السياسات التمويلية لنظامه السياسي ويديرها بالياته الاقتصادية
اغلب تدخلات النظم السياسية السودانية ومنسوبيها كانت وبالا علي الاقتصاد
وكرست لمفهوم للراسمالية واحتكار راس المال ، ووقعت في ذلك حتي النظم
ذات التوجهات الماركسية والطائفية الدينية .. أما نظام الانقاذ فقد مثل أكثر الانظمة
التي أضرت بالعمل المصرفي وذلك بافراغه له من اغراضه التنموية وأهدافه السوقية
ورغم أن النزعة الاسلامية للانقاذ سنت افكار عديدة لتمويل للفقراء مثل:
( التمويل الاصغر ، تمويل صغار المنتجين، تمويل الطلاب ، تمويل الحرفيين ، تمويل الخريجين ، الخ )
إلا أن كل هذه المسميات كانت ومازالت حبرا علي ورق ، ولم تتجه بالمصارف إلا للمزيد
من الربح التمويلي الطفيلي الناتج من مشاركة الأغنياء ارباحهم التصخمية بمختلف صيغ التمويل

Quote: ورغم أن النزعة الاسلامية للانقاذ سنت افكار عديدة لتمويل للفقراء مثل: ( التمويل الاصغر ، تمويل صغار المنتجين، تمويل الطلاب ، تمويل الحرفيين ، تمويل الخريجين ، الخ ) إلا أن كل هذه المسميات كانت ومازالت حبرا علي ورق ، ولم تتجه بالمصارف إلا للمزيد من الربح التمويلي الطفيلي الناتج من مشاركة الأغنياء ارباحهم التصخمية بمختلف صيغ التمويل

والله يا عمر اتفق في ما ذهبت إليه خاصة" في نسبة أرباح التمويل التي لا تمت للإسلام ولطبيعة الفقراء بي صلة .... من ناحية أخري الفقراء السودانيين أو من يحتاجون للتمويل تنقصهم ثقافة المديون الحصيف الذي يعرف أن عليه دين يجب سداده ... عدم الجدية في إدارة المشاريع الممولة ثقافة طاغية بيناتنا كسودانيين ... تكريس الوقت للاجتماعيات بدلا" من إدارة الأعمال هي السبب الأساسي في فشل المشاريع الممولة .... فيا صديقي المرض مرض حكومة وقبلهم مرض شعب يجب أن تتغير طريقته في الحياة.
تحياتي

عمر سلامات

Quote: ومافي حاجة اسمها تمويل اشتراكي الاقتصاد الاشتراكي تديره فقط الدول الاشتراكية

طيب في أي شئ تختلف سياسة الإقراض في البنوك الإشتراكية التي تديرها وتملكها الدولة عن بنوك الإدخار

لو كانوا الإتنين شغالين بالفائدة, اللهم إلا إذا كان الفرق في رأسمالية الدولة ورأسمالية القطاع الحاص!

نبذة عن المربي منصور أحمد الشيخ رحمه الله
نبذة تعريفية عن حياة المرحوم / المربي الكبير منصور أحمد الشيخ مؤسـس ومدير عام بنك الإدخار السوداني – ود مدني في الفترة من أكتوبر 1974م – 1991م .

* تلقى الدراسة الثانوية والجامعية بمصر ، تخرج في عام 1950م في شعبة العلوم السياسية بكلية التجارة – جامعة القاهرة .
* بدأ حياته العملية بمراسلة جريدة الإتحاد .
* إلتحق بمحطة الإذاعة المصرية في وظيفة مساعد فني ، وضم إلى ركن السودان حيث تعاون مع الأستاذ / توفيق أحمد البكري في الإشراف أثناء عمله بالقاهرة .
* كان يتردد على الخرطوم للقيام ببعض المهام الخاصة بالإذاعة .
* انتدب لتأسيس مكاتب وأستديو الإذاعة بالخرطوم أسوة بمكاتب إذاعتي بريطانيا والشرق الأدنى في القاهرة .
* كان منهاجه في الإذاعة السودانية في القاهرة – هو المساعدة على نشر الحقائق عن السودان والتركيز على الجوانب الثقافية وإنهاض الفن ، وتعتبر مجموعة الأحاديث والتعليقات في ركن السودان عربي وإنجليزي – وفرنسي – سجلاً فخماً للتطور السياسي والإجتماعي والثقافي والفني في السودان .
* وهب المرحوم / منصور لباقة وحصافة ومداورة وإستعداد طبيعي للعمل العام ، وفضلاً عن دراسته الجامعية فهو أصلح ما يكون للسلك الدبلوماسي ، وأصلح ما يكون لأي عمل يقتضي أعمال الذهن ، وحل المعضلات ، وتذليل الصعاب والمشاكل .
* كان يشرف على الركن منذ أنشاه الأستاذ / توفيق أحمد البكري بالإنتداب – يعاونه موظف منتدب وبعده إستلم مهام الإشراف على مكتب الخرطوم .
* عمل مديراً عاماً لبنك الخرطوم .
* كانت له عدة مشاريع زراعية – ثم عمل مديراً عاماً لمشروع ودتكتوك الزراعي – سنار .
* ثم عمل مديراً عاماً لبنك الإدخار السوداني في الفترة من 1974- 1991م ، إتسمت فترته بالتفاني والإخلاص ، وعمل على تأهيل العاملين ونشر الوعي المصرفي – ودعم الأسر المنتجة والأسر الصغيرة والأعمال التي ترتبط بالحرفين والعمال والزراع والطبقات الأخرى في المجتمع السوداني – لا زالت بصماته في السودان وخاصة في منطقة الجزيرة الخضراء .
نسأل الله له الرحمة والمغفرة .
إعداد : أزهري السماني كوكو
م/ المدير العام لمصرف الإدخار سابقاً
ود مدني السوق الكبير – موبايل 0912447095 - 092204426

منقول

نبذة عن المربي منصور أحمد الشيخ رحمه الله
نبذة تعريفية عن حياة المرحوم / المربي الكبير منصور أحمد الشيخ مؤسـس ومدير عام بنك الإدخار السوداني – ود مدني في الفترة من أكتوبر 1974م – 1991م .

* تلقى الدراسة الثانوية والجامعية بمصر ، تخرج في عام 1950م في شعبة العلوم السياسية بكلية التجارة – جامعة القاهرة .
* بدأ حياته العملية بمراسلة جريدة الإتحاد .
* إلتحق بمحطة الإذاعة المصرية في وظيفة مساعد فني ، وضم إلى ركن السودان حيث تعاون مع الأستاذ / توفيق أحمد البكري في الإشراف أثناء عمله بالقاهرة .
* كان يتردد على الخرطوم للقيام ببعض المهام الخاصة بالإذاعة .
* انتدب لتأسيس مكاتب وأستديو الإذاعة بالخرطوم أسوة بمكاتب إذاعتي بريطانيا والشرق الأدنى في القاهرة .
* كان منهاجه في الإذاعة السودانية في القاهرة – هو المساعدة على نشر الحقائق عن السودان والتركيز على الجوانب الثقافية وإنهاض الفن ، وتعتبر مجموعة الأحاديث والتعليقات في ركن السودان عربي وإنجليزي – وفرنسي – سجلاً فخماً للتطور السياسي والإجتماعي والثقافي والفني في السودان .
* وهب المرحوم / منصور لباقة وحصافة ومداورة وإستعداد طبيعي للعمل العام ، وفضلاً عن دراسته الجامعية فهو أصلح ما يكون للسلك الدبلوماسي ، وأصلح ما يكون لأي عمل يقتضي أعمال الذهن ، وحل المعضلات ، وتذليل الصعاب والمشاكل .
* كان يشرف على الركن منذ أنشاه الأستاذ / توفيق أحمد البكري بالإنتداب – يعاونه موظف منتدب وبعده إستلم مهام الإشراف على مكتب الخرطوم .
* عمل مديراً عاماً لبنك الخرطوم .
* كانت له عدة مشاريع زراعية – ثم عمل مديراً عاماً لمشروع ودتكتوك الزراعي – سنار .
* ثم عمل مديراً عاماً لبنك الإدخار السوداني في الفترة من 1974- 1991م ، إتسمت فترته بالتفاني والإخلاص ، وعمل على تأهيل العاملين ونشر الوعي المصرفي – ودعم الأسر المنتجة والأسر الصغيرة والأعمال التي ترتبط بالحرفين والعمال والزراع والطبقات الأخرى في المجتمع السوداني – لا زالت بصماته في السودان وخاصة في منطقة الجزيرة الخضراء .
نسأل الله له الرحمة والمغفرة .
إعداد : أزهري السماني كوكو
م/ المدير العام لمصرف الإدخار سابقاً
ود مدني السوق الكبير – موبايل 0912447095 - 092204426

منقول

سلام يا المستنير وضيوفك الكرام

عمر القراي كان ضمن كوكبة هذا البنك ولا انا غلطان

نتذكر عربات السيهان بيرد وعجلات كوبتريد لبعض نقابات العمال

عوداً حميداً و بركة الجيت....المنبر في غيابك عدم , قربَنا نفرش
عوداً حميداً و بركة الجيت....المنبر في غيابك عدم , قربَنا نفرش ا

يااخى كتر خيرك كثير والله ما فى داعى للفراش التكاليف عاليه

Quote: يااخى كتر خيرك كثير والله ما فى داعى للفراش التكاليف عاليه

مشكور اخ يوسف ابو سنينة علي تكبدك مشاق الرد بالانابة