اضطرابات في الوجدان

07:55 AM April, 08 2017

سودانيز اون لاين
عبدالحفيظ ابوسن-no where
مكتبتى
رابط مختصر

بدري جدا .. عندي خالي حبيب جدا
وهو ميكانيكي
احب ليهو واحدة .. يطلع من الورشة ويتبخبخ بالريحة ويقشر ويتمسح بال نيفيا 21
ويتحول لشاب وسيم وكان فعلا وسيم وانيق كأنو ما كان ملتخ بالزيت الصباح
ويمشي يحب البت في حديقة البلدية
اها فجأة كدة البت ادتو شاكوش دون مقدمات
خالنا بردلاب دق الواطة
ارفعك ارفعك ودوهو الاسبتالية . معاهو ود عمو
جانا الخبر واتخمخمنا وكسرنا زرافات ووحدانا
لقينا ود عمو برة العنبر وكان شلة ضكور واناتي
زمن المرض برنامج وما كتير زاتو خلي لامن يدخل غيبوبة
اها سألناهو وكنا خالين الذهن
عافية يا زول مالو فلان
رد لينا
لا مافي حاجة شوية
اضطرابات في الوجدان

من زمن ناس مجنون ليلي وبثينة والمحلق وغيرهم
اها من الزمن داك وحتي وقت ما بعيد مافي شي بجنن غير البنات
جنيت وجني جن
ما فاضلي الا تاني اطقع
البنات وبس البسببن اضطرابات الوجدان
ودة زاتو عندو عمر معين يعني ناس ود البوش ومن لف لفهم ما معانا . يشربو لبنهم وينومو بدري
سبب واحد يخليهم يجنو ولا يضطربو مافي
سلمو العدة بدري

بحكي لي منعم اخوي وكان طالبا بطب الخرطوم مطلع الثمانينات قبل الcurve ينقلب !!
قال لي
معانا واحد بحب واحدة من الدفعة ومكسر فيها . لكن ما بقدر يتكلم معاها ولا يجي جمبها
مرة مشو رحلة زمن رحل ابوهاشم ديك
نصة نهار بعد الفطور الشباب شتتو من معكسر الرحلة . نظام يتفرجوا ويحبو ويشوفو نفسهم
بقا مافي زول في المعكسر الا زولنا وحبيبتو المخفية
نظام دايرة تزيل الجفوة فتحت معاهو ونسة كاشول كدة زي
الواطة الليلة سخنت
ولا الزمن مشي
زولنا من نضمت معاهو ساي بردلاب دق الدلجة والبت ثكلبت
مالوا
ما عارفاهو سألتو وقع
اها دة برضو اضطراب وجداني حاد

الزمن داك مرض نفسي ما كان معروف بدلالة قريبي ما لقا فيهو وصف زاتو
ولا الشعراء زاتو ما بعرفوهو
يا مجنون يا نصيح
واتثقفو شوية بقو يقولو
الجن بتداوي كعب الاندراوة
الاندراوة هي منزلة بين المنزلتين

حكاية مرض نفسي دي ما كانت في بشكل تمثل ظاهرة
كوستي كلها كان فيها دكتور واحد يعاني من الكساد ومضرب مثل
يقولو ليك
حقو يودوك لي دكتور سيد
والسودان كلو كان بعرف دكتور نفسي واحد اظن حسبو
ما كتار
ندر المرض فندر متخصصيه

قريت امس تصريح منسوب لوزير الصحة يتحدث عن زيادة مرضي العيادة النفسية
وقبلها برضو كم شهر كدة في كلام عن زيادة اعداد المنتحرين
وقبل تقرير عن الدول السعيدة ومسكنا الفرملة بدون منازع
رغم عن هذه التقارير يجب ان يتم قراءتها بشكل عملي
وبرضو زيادة مرضي الكلي والسرطان
تظل مجرد تقرير اواحصائية ودون ان تلفت انتباه المسؤولين للخل او معرفة الاسباب
فتظل حرب علي ورق
كأنما اعلانها هو الانجاز والمطلب الوحيد للمسؤول
لماذا تفشت تلك الامراض التي لم تكن عند اسلافنا

تنويه
اسلافنا تعني من ماتوا قبل 1989

نيفيا 21
مالاقاني ياود ابو سن
بكون ضرب اقاشي من حي الفلاتة
وشطة بي عتي

حفيظ يا حفيظ

تصدق من لقيتك دخلت اسم ود البوش
وحظرت دخوله لهذا الخيت
طوالي قرنت البوست دا بي بوست القمل
عشان كدا لازمن يكون عندي مداخلة أخرى
حتى لا تضيع جمالية هذا النضمي
فاضطرابات الوجدان دي لنا معها حكاوي ياخ

مودتي

في تلك الفترة التي عنيتها في بوستك اللذيذ دا
كان عندنا واحد من الشباب كل يوم والتاني تاعب الجماعة
آآآآآآه ثم آآآآآآه وجري علي الدكتور
ويتم الكشف وحبوب سلفا وتحاليل نضيفة ومافي شئ
تكررت المسألة كثيرا
عنده خاله كدا النوع المفتح داك
نادى صاحبه وقال ليه الزول دا بحب منو في الحلة هنا
قال ليه فلانة لكن ما قادر يصرح ليها ولا كلمها
خاله من دربه مشى لأبوها وطلب يدها في سرية تامة
أها تمت المشاورات والزواج كما تعلم كان بسيط

ومن يومها صاحبنا ما قال آآآآآآآه
شفت الاضطراب الوجداني ممكن يعمل إيه يا حفيظ

مودتي

هي يا صادق اسمها نيفيا توينتي ون
علبتها بتبقا حقة صعوط ولها احجام مختلفة
تتمسح بيها جسمك كلو يوشل موية وتبقا زي الزير الجديد
الريحة كاشيت
ودهان الشعر اللونو اخدر داك
تتظبط بالبنطلون التريفيرا ولا الكوردورايت والقميص المربعات والمكواة سيف
انتا قايل ملاقاة البنوت كانت بالساهل
لا تلفون لا غيرو تحبس ليها الشارع امكن سنة ما تصادفك

هي يا صادق اسمها نيفيا توينتي ون
علبتها بتبقا حقة صعوط ولها احجام مختلفة
تتمسح بيها جسمك كلو يوشل موية وتبقا زي الزير الجديد
الريحة كاشيت
ودهان الشعر اللونو اخدر داك
تتظبط بالبنطلون التريفيرا ولا الكوردورايت والقميص المربعات والمكواة سيف
انتا قايل ملاقاة البنوت كانت بالساهل
لا تلفون لا غيرو تحبس ليها الشارع امكن سنة ما تصادفك

والله يا ابوعاقلة جيهو جيهة القبورة الفي القضارف
قطعو النمة
ياخ ألذ شي شحتفة الروح دي والدودوة
مكتول كمد وصبابة
بي الله لامن تلاقيك وتجر فيك نور كرعينك يخشو في بعض
وحلقك ينشف وريقك يجم
تقول ليك سلام تنبهط وصوتك يروح
عرقك يتخرت واعصابك تبوظ
لامن تلقا صوتك تلقاها كتلت الملف زاتو

ود ابو سن مستمتع بنضميك الثمح ده ..

تسلم عارف
وكتر خيرك
شوف جنس التصريحات دي دون ان يحركوا ساكنا ولا ان شاء الله يكحو ساكت
اها دي واحدة من انجازاتهم
هم الجابو لينا النفسيات
عليك امان الله زمان نفسياتنا فوق
لو لمينا في التبش بالشطة ناكلو التقول طيانة
هسة المحمر والمجمر والمقمر ندحش فيهو ساي
لقمة لقمتين ونفسك تتسد
الله يسد نفسهم زي ما سدو نفسنا

بعيدا عن الدراسات.
مشاهدة شارع ساي
في زيادة في المرضي النفسيين
وفي زيادة في المجانين
اما الطلاشة والدودوة بالكوم
ظاهره من السرحان والنسيان وعدم التركيز
الناس ماشه مهمومة
فجأة زول تلقاهو قال كلمة كلمتين وعمل حركات بي يدو
داخله فاض عليه

‏ شاء الله يا ود اب سن لما تكتب في الحاجات الجادة بتكون كتاباتك منتهى الحكمة >>, hglk'r>
, و لما تكتب في الحاجات الخفيفة ‏برضه ما شاء الله زول بيلحقك في خفة الدم مافي.
............وصف لذيذ ,,,,و فكاهة و مفارقات....حاجة جميلة.‏
تهانينا

تسلم محمد
وكتر خيرك
اشكرك والله
قالوا كترة النواح تعلم البكا
نستعين بالسخرية لنتوازن داخليا
لنستطيع ان نصمد يوما آخر
الامر مهزلة
السياسة السودانية بتشبه صورة شيخ اللمين
مكاواة ومغرزة
بهذا الابتذال اللغوي

B]عشان يعرفوا المسببات ويقدموا تقرير
يشكلوا لجنة ولجنة منبثقة من اللجة ولجنة اخري منبثقة من اللجنة المنبثقة ومنصرفات ....الخ من اللجان المنبثقة .
الشغلانة تبقي مأكلة وباب رزق للعطالة

يا عارف
عارف انو الاجتماع بتطلع ليهو حوافز تهولك وتتوزع حسب الدرجة والقرب

بداية عذرا لل اللفظ
مافي حكوة غيرها
نفرين ركبو البص واحد فيهم قال لاخوهو
البص دة فيهو ريحة
نزلو وركبو غيرو وتكرر نفس الموقف ونزلو
بعد خمسة ستة بصات . البشم ال ع فنة قال لأخوهو
انت يا فلان هريت ( خريت )
قال ليهو
آي ! ليه ؟!

خلاص أقيف قبلك
الباقي دا اقنع منو .... حدي فيهو قطع الجمار

سلام يا صاحبي
زوايا تناولك لأي خبر بتديه بعد تحليلي قمة في الروعة ..
قبل كم يوم زول جارنا صول بوليس معاش نزل من ركشة وماشي قدامي يناضم براه بصوت مسموع حاولت اتحاشاه لكن فجاءة اتلفت وراه لقاني .حسيت بيه اتحرج قال لي يا ولدي والله لو ما النضمي الفي الشارع البنمرقو دا كان الواحد انشق كرررررر ..
قلت ليه يا حاج فضفض ساي الحال من بعضو . ضحك ضحكة لمن خت كيس ملاحو في الواطاة وقال لي افضفض ساي والله قبل كم يوم بناضم في بنات شافوني كلمو بنتي الكبيرة قالو ليها ابوك جنا.
مامون حميدة و زمرتو حالفين كان ما زهللو بي الناس ما يرتاحو ..
مودتي ابو علاء

خلاس جيت يا المسنوح
الكعب غسل التكة بدل ال
قال ليهو بقا زي ساعة الجيب
ودالبوش ما تحرف البوستي

ود دفع الله يا صحبي
مبروك الوليد
جعله الله بارا بوالديه
نافعا لنفسه ووطنه
يا خوي قال تلاتين في المية من الطلاب يعانون وررررر
وزيرنا بقا ناطق رسمي بدل واضع حلول
قالها وهو فرحانو !!
كدة حدو وقف
ما خلاس كلمنا
نحن نتصرف برانا
آي ! ليه!؟

ضارباني فلسة فار المسيد
وحاكا معاي للصاجة
اقل حاجة الشرر يتطاير واللديتر يسخن
جوة البير ضربتني ملاريا ووجدت قلبا خاليا وخلتني زي الميت
جاني عمي صديق وكان رجل نكتة
قال لي ام عيالي وانا بين برزخ الموت والحياة
ولدي دة انا عارف علاجو
مرضنا واحد
لو لقينا حقن فلوسومايسين بنحرق تش
عليك الله امان الله النكتة فهمتها بعد نصحت

ضارباني فلسة فار المسيد
وحاكا معاي للصاجة
اقل حاجة الشرر يتطاير واللديتر يسخن
جوة البير ضربتني ملاريا ووجدت قلبا خاليا وخلتني زي الميت
جاني عمي صديق وكان رجل نكتة
قال لي ام عيالي وانا بين برزخ الموت والحياة
ولدي دة انا عارف علاجو
مرضنا واحد
لو لقينا حقن فلوسومايسين بنحرق تش
عليك الله امان الله النكتة فهمتها بعد نصحت