نهاية الاسبوع

02:37 PM April, 02 2017 سودانيز اون لاين
عباس الدسيس-Saudia
مكتبتى
رابط مختصرنهاية الاسبوع مشينا لينا عزاء لي وفاة اخو زول صاحبنا لي فترة بشعر بطعنه أو وخزه في جنبة القلب استشرت زول صاحبنا ماسك رئيس وحدة الغدد الصماء مع انو المجال بتاع قلب للإطمئنان و ل ارشدني اعمل شنو وريتو محل الطعنه قال لي انت بتهبش مالك كلو ما اقابلك تطلع لي بشكوي انت زول صاحبي ابعد من الاوهام وعارفك متوجس نسيت حكاية الطعنه واطانشتها وقعدته اخت ليها مبررات اقول مرة امكن عشان بنوم بالجنبه ....عشان كدا بقت اهم شيء.... اها قاعدين في العذاء جابو سيرة زول صاحبنا عمل عملية في القلب مشي للمستشفي لحاجة تانية طلعو ليهو بي حكاية القلب أها قمت فتحت ليهم حكاية الطعنة بتاعتي لقيت زول طيبان وود ناس من اولاد مدني مسك الموضوع الراجل كان منوم في مستشفي الحرس الوطني ثلاثة شهور نتيجة زبحة وقال لي نفس مواصفات طعنتك وكمان كنت منطط عيوني زيك كدا وقت اجيبو لي سيرة الموضوع أطنشو وكمان الطعنة بتمشي لي وراء الضهر احيانا الزول دا وقت قال لي كدا اشعر ليك ضهري ختو فيهو سكين عديييييييل وقال لي كمان بكون عندك فتور واقل شيء تناهد في المشي ما تقدر تمشي عشرين متر بالله لما طلعت منهم قلته نجرب حكاية العشرين متر ما مشيت زي خمسطاشر متر قعدته في الواطه اناهد جاء زول بعرفو ماشي لقاني قاعد في الواطه سالني مالك قلت ليهو عايز تخدمني قيس لي المسافة من هنا لي هناك كم الزول طلعا لي تسعة امتار قدر ما حاولت اخليها قريب لي عشرين الزول امشي واجيني في حوالي تسعة عشرة امتار اتقول عايز اشتري منو واطه في الخرتوم تلاتة خشا معاي في غلات كرهني مرض القلب ذاتو الراجل بتاع بيت العذاء اداني معلومة تاني قال لي حسي انت بتشعر راسك تقيل وعندك وجع رقبه أها قعدتي في الواطه حسيت ليك زي الشايل لي كونتنر في رقبتي الراس تقيييييل وما تقدر تودي بالجمبة خليت الزول داك في غلاتو واحسبها لي ببلاطة الاسمنت كم بلاطه تساوي متر ما فهمت منو اي حاجة وقمت اتاتي ركبت العربية وللبيت جري.قلته في البيت لو كلمته المدام تسوي لي سين وجيم الموضوع دا اموت بيهو براي لما امشي الدكتور المشكله الجمعه اجازة البصبرني لي السبت شنو الليل كلو القلب انتح والراس تقيل والضهر اطعن والكرعين منملات غايتو الخميس والجمعه قضيتم خنق وقلته الموت لو جاك يا زول مافي حاجة بتوقفو ربنا مد عمري لي السبت قلته اقوم بدري براحة الصباح الناس نايمين امشي الدكتور مع سهر الخميس والجمعه شالتني نومه مع الصباح صحيت لقيت دوام الصباح للدكاترة انتهي خلاس بقيت في الواقع امشي العصر لا زول شاف لا زول سمع قومي يا المدام نومي الولد الصغير وقالت لي احرسو أنا طالعه مع امي وابوي السوق صبت فيني مطره قلته المرأ دي غايتو بتقتلني حسي لو قلته ليها ماشي اعمل فحوصات للقلب بتكون مصيبه قعدته حرست الولد والقلب بالله طاحونه دق دق دق جابت ليها كاروشه في اليدين والاصابعين انملن بتاعت الكرعين ، الولد الكبير قال ماشي العب بالاكسبوكس مع اصاحبو قلته امانه ما مات راجل نهرتو نهره واحده قلته ليهو والله امك طالعه انت ما تطلع قلته حسي كان الزول انعصر و ل جاتو اغماءه اكون براهو والولد الصغير دا قبل كدا فتح الباب ومشي ركب الاصانصير طلع الشارع لما جابو البغسل العربات نموت الاثنين غايتو الولد الكبير جاب واحد من اصحابو وقعد معاي وانا منتظر السبت يا يوم بكره ما تسرع.السبت فجرا بدري لا مكتب لا غيرو طوالي للمستوصف الدكتور لقاني اول زول قاعد قبل ناس الكاونتر دخلني جوه وقعدنا نتونس مسافة الجماعه اجو ونستو شوفتها مسيخه طوالي دشيت ليهو حالتي قلت ليهو يا دكتور فلان لو عندي حاجة صعبة عليك الله دسها مني واديني العلاج و ل العملية طوالي ، دخلوني ليك غرفة رسم القلب الممرضه من قالت لي طلع القميص والفنيلة الرجفه مسكتني وجابت ليك الحاجات البشبكوهن في القلب والكرعين السائل لما تختو اشعر بيهو لوح تلج والالم ازيد عندها حاجات بقبضو بيها في الصدر قطعت وظعمطت شعر الصدر كلو ما حسيت بالم شيل الشعر والله لو جابت حلاوة النسوان البشيلو بيها ما اجيب خبرشغال مع القلب جوه البنتح طلعت بره بعد طباعة التقرير من الالة سمعتها تقول مع واحده بالانجليزي بلكنة فلبينيه he need Surgery قلته امك الزول بت الحرام ختتا عديل من هنا وللعملية راسا اها سالته التقرير كيف طلعت زوله لئيمة قالت لي امشي للدكتور اها انا خطوه قدام وخطوتين لي وراء لحظات صعبه المهم وصلته للدكتور والقلب شغال دق دق دق والراس فوووووووو مسخن وقعته في الكرسي كرب رب انشاءالله خير يا دكتور في اللحظه دي اتصل بيهو زول وماسك التقرير وبتكلم بالجوال جاتني لحظه لا شعوريه ختفت التقرير من يدو وقعدته اعاين فيهو ما فهمت حاجة بعد خلص المكالمة وساعة النتيجة المرؤ يكرم او يهان قال ليك يا عباس تقريرك زي ما بتقولو انتو السودانيين بلو وموصو واشربو موية قلبك سليم عندك عضلة بالجهه اليمين عاملة ليك مشكله نكتب ليك دهان امسحو بيها الظاهر انت بتتكل علي جمبة الشمال في الكرسي وقت الشغل ول بتنوم عليها او ضربك مكيف !!!قلت ليهو يا دكتور امكن مكاينكم بتاعت الفحص خربانات ؟؟؟الراجل طول بالو وقال لي مكائنا جديدة ...قلته طيب اجيك الاسبوع الجاي يوم الاحد تشوف لي انزيمات القلب؟؟قال لي يا عباس الاسبوع الجاي يوم الاحد انا مشغول حتي نهاية العمل لو عايز تجيني بعد الساعة 12 تتونس حبابك غير كدا عليك الله انا ما فاضي لي هواجسك.

هههههههههههههههههههههههه حمد لله على السلامة يا باشا

ياراجل
كفارات

Quote: هههههههههههههههههههههههه حمد لله على السلامة يا باشا

ابو الدر يا صديق اخبارك
نهاية الاسبوع عشت فلم رعب
ربك دي عداها بخير الله استر من الجايات

(الظاهر انت بتتكل علي جمبة الشمال في الكرسي)


ظاااااااهر من صورة البروفايل انك بتتكل على الجمبه الشمال . .
حمد لله على السلامه . .

Quote: ياراجل كفارات

صديق اخبارك يا حبيبنا
الوهم مشكله كفر الله سيئاتك

Quote: ظاااااااهر من صورة البروفايل انك بتتكل على الجمبه الشمال . . حمد لله على السلامه . .

عمر سعيد اخبارك
شغل المكاتب خلانا نتكل زي الغنم في الحيط
الله اسلمك يا حبيبنا

سلامتك سلامتك وناس مدنى والجزيرة كلهم كرامتك

سلامتك يا زول --- ما تشوف شر

الحمد لله علي السلامة ودمت بخير و عافية

Quote: سلامتك سلامتك وناس مدنى والجزيرة كلهم كرامتك

حبيبنا احمد سلام
اخبارك وجدة غير الله اديك العافية

حبيبنا عباس .. لله الحمد والشكر ..
نفس الاعراض حصل معاي .. ولكن أنا لجأت إلى القوقل .. وهذه سببت مشكلة نفسية
أدخلت الاعراض بالاضافة إلى طعنات الصدر الايسر و آلام في الكتف وطعنات في الظهر
القوقل ما قصر على طول دخل في مجال القلب .. رغم أن وزني 60 كلم وكما محافظ رياضة وفواكه
لأني زي عندي تضخيم لأقل حاجة ( سواس ) مرض .. كمان للعمر أحكام
عندما شخصت بالقوقل وقرأت النتيجة .. على الطول المستشفى ..
الحمدلله بعد الكشف سألني الطبيب
عن طبيعة الوظيفة ؟ وطريقة النوم ؟
أتضح يا عباس .. من الطباعة والجلوس في الكي بورد ..
ربما أطبع يومياً عشرة صفحات وأكثر وأنا سريع في الطباعة باللمس ..
تعرف أحسن الواحد يكون شغال عتالي يحمل شولات ولا يتشغل قصة الترجمة والطباعة الكثيرة
وكلام الدكتور صحيح لأنني عندما ذهبت إجازة إلى البلد لم أشعر بأي ألم ولا في الرقبة ولا الصدر
نصيحة الدكتور .. كل بعد ساعة لابد أن أتجول قليلاً داخل المكتب ثم المواصلة ..
الموضوع ده كان قبل سنة وأكثر شوية .. لله الحمد لا مضاعفات ولا اي تطور الحمدلله ..

ولا أنسى كلام الدكتور .. (( هل تفتكر أن أي مرض قلب هو الموت هناك أمراض قلب أخف كثير من الحميات والملاريا وغيرها ))

الحمدلله على الصحة والعافية ..
اللهم أبعد عنا وعن إخواننا كل مكروه ..

يا عبس كفارة وسلامتك والف عزيز كرامتك .... ياخ مالك علينا هسة خليتنا نتوهم معاك لانو انا عندي نفس الاعراض لكن عامل رايح لكن زي ما قالو العمر من ويييين بشترو .. كويس انك مشيت عملت فحوصات واطمنت وطمنتنا معاك يا حبيب وزي ما قال ود البوش عاين لي جاي .... انسى وعيش .... الف سلامة يا حبيب وما تشوف شر ان شاء الله ,,,,,, اها الكرامه متين هههههههههههههههههههه


تحياتي : ياسر العيلفون ......