مات من الضحــك .. هاشم صديق

01:21 PM April, 01 2017

سودانيز اون لاين
يحي قباني-فى الدنيا العجيبة
مكتبتى
رابط مختصر

مات من الضحك

هاشم صديق
____________
عالم مستف باليفط
وحتى اليفط
ناقصة النقط
عالم غلط
عالم غلط
عالم غلط
أقصى الأسف
أقصى الحُزُن
مافيش وسط

- والله أيام البارات فاتحة.. و( بيوت الهوى) مفتوحة ليل ونهار كان الناس عندها أخلاق، ياخي حتى بنات الهوى ديل كانت عندهن أخلاق..
لو دقيت باب الواحدة ولقتك صاحب صاحبها ما بتدخلك، ما بتنوم معاك حتى لو كسرت رقبتك.. إلا شوف أخلاق الزمن ده ..

ده عالم غلط يا حاج أبراهيم..

- بصق الحاج خميس (سفته) وهو يحني وجهه جانباً ثم عاد يواصل حديثه مع حاج أبراهيم،
وهما يجلسان تحت ظل (شجيرة) عجفاء ذات صباح، على كرسيين متهالكين، وتنتصب في مواجهتهما عمارة من عدة طوابق تحت التشييد

- والله كلامك صح يا حاج خميس.. داك زمن.. حتى الشي الكعب.. برضو تلقى فيهو شيتاً سمح.

كان الاثنان من أصدقاء الطفولة، والصبا الباكر، وذروة الشباب وتلازما وهما يلجان نفق الكهولة يتأرجحان على تضاريس العقد الثامن لا يلويان على شيء ؟

كان ظل (الشجيرة) العجفاء في الصباح، و(المصطبة) التي جحظ (طوبها) في المساء، هما مكان منتدى (الزمن الجميل) اليومي،
ونادي الذكريات، واجترار أساطير الفحولة الغابرة، ومرافعات الاتهام والإدانة (لأعاجيب) الزمان الجديد.

تساقطت الأسنان و( تكعكعت) الأوصال، وبرزت العروق في ثنايا الجسد مثل خطوط خارطة عصية الطلاسم،
وغارت العيون في غياهب الجمجمة، وخفت البصر حتى أضحى مثل بصيص ضوء (بطارية) شهقت (حجارتها) وهي تجاهد النفس الأخير, ولكن ،

ماشاء الله .. تبارك الله

الذاكرة (حديد) واللسان (فلغة)، ولو سمعتهما وهما يضربان بسوط لسانيهما على جواد ذكريات زمان الفحولة الغابرة،
ويثيران غبار (السفاهة) بتلك التفاصيل البذيئة الدقيقة، واستلهامها في (نكات) ذكية جامحة,
لاحترتَ وامتدت حيرتك لتتلبس شخصية (ود الريس) و(بت مجذوب) في رائعة الطيب صالح موسم الهجرة للشمال، وتتحول (بذائتهما) – بالمقارنة – إلى أدب جم، ورفيع..

أخرج حاج إبراهيم (كيس التمباك) من جيبه، وكأن (بصْق) حاج خميس (لسفته) ألهمه فكرة (تبادل السف والبصق) وهما (يتبادلان) الأنس في حديث الذكريات و(إسقاطات) الماضي والحاضر،
ووضع (سرج) (الكلمات) على صهوة جواد الفحولة بدلاً من (الفعل), بعد أن تساقطت (الفحولة) على وعثاء الكهولة مثل تساقط الأسنان تماماً .

قرّب حاج إبراهيم (كيس التمباك) من أنفه، واستنشقه بعمق، وكأنه يسترد أنفاس حياته، ثم أدخل إصبعين من يده اليمنى داخل (الكيس)
وأخذ يعالج إعداد (سفة) بمهارة وكأنه عازف يقوم (بضبط) أوتار آلته الموسيقية، ثم وضع السفة خلف شفته العليا وهو يرفع رأسه قليلاً نحو السماء..

- يا حليل زمان (الحُقة) يا حاج خميس.. جانا زمان الكيس.. زمان يا حاج لما الواحد يمرق الحُقة من جيبو..
وينقر عليهو بصوابعينو، قبال ما يفتحها، تقول بس (كرومة) أدى (الرِّق) نقرة قبل ما يغني..

انفجر حاج خميس بالضحك حتى أخذته نوبة سعال جعلته يدق على صدره بكفه أكثر من مرة، وهو يحاول جاهداً استرداد أنفاسه المتحشرجة .

نظر حاج إبراهيم – بعد برهة صمت – إلى المنزل تحت التشييد, والذي يتكون من عدة طوابق.

إنت يا حاج خميس.. شوف البُنا الببني فيهو ود عبد المجيد ده.. دي قروش شنو البتسوي ده كلو؟ -

- قالوا (سف) الخزنة

-وأنحنا مساكين (نسف) في التمباك.. يا حاج العمارة خمسة أدوار.. خمسة أدوار تمااااام !!

سبحان الله.. في زمنا نحنا.. ما في زول بعمل الخمسة دي، إلافي......

إنفجر الاثنان بضحك مجلجل وصاخب ومتصاعد، ثم أخذ صوت ضحك حاج خميس يخفت قليلاً قليلاً حتى تلاشى وهو يتداعى بجسده ويسقط أرضاً، ويتمدد بلا حراك تحت ظل الشجيرة العجفاء.

تحت خيمة العزاء المنتصبة بين الشجيرة العجفاء، و(المصطبة) جاحظة (الطوب)، كان الناس يرددون جملة واحدة، في حيرة وحزن

– سبحان الله .. حاج خميس مات من الضحك

سلام يا هندسة

والله بعد ما قريتها بحركة آلية نزلت تحت لأضغط لايك ...

سلام للرائع هاشم صديق عبرك

هو كمان عنده قدره مدهشة يدخل يده في كيس شقانا كل مرة يدردم سفة تسطلنا فترة من الزمن .

Quote: سلام يا هندسة والله بعد ما قريتها بحركة آلية نزلت تحت لأضغط لايك ... سلام للرائع هاشم صديق عبرك هو كمان عنده قدره مدهشة يدخل يده في كيس شقانا كل مرة يدردم سفة تسطلنا فترة من الزمن .

درديري يا فنان ...

يوصل السلام للمبدع هاشم صديق ان شاء الله ...

هاشم معطون بي حب البلد الاسمو السودان ده ...

إبداع .. ومتعة

~