الشلاقة

08:28 AM March, 26 2017

سودانيز اون لاين
عباس الدسيس-Saudia
مكتبتى
رابط مختصر

ناس الشركة عندنا قالو عايزين ليهم سواقين اثنين رخصة عامة اها قلته نخدم اهلي السودانيين فكيت اعلان لطلب سواقين في قروبين من الواتساب يلا تعال عينك ما تشوف الي النور
التلفون ما سكت دقيقة ليل نهار إكتشفت انو انا زول شليق بصورة نهاية الاسبوع الجمعه والسبت اجازة كرررن كررن نوم مافي كلام مكرر الراتب كم الشغل وين واسأله غريبه بجيكم ليها
فجأة التلفون اخد ليهو صنة سكت عن الجرس استغربته من كثرة الاتصال خاتيهو في الشاحن قمتا افتش فيهو لا لقيت الشاحن لا التلفون
المدام الله اطراها بالخير قلت اشوف الجوال حقها واتصل علي جوالي اشوفو وين قالت لي جوالك جدعتو بره وانا قفلتو بعدين انت شئون موظفين
قلت ليها لا قالت لي الشلاقه ليك ليك شنو تعمل اعلان عشان تحمينا النوم والقعاد في البيت تاني حركتك البايخه دي لو عملتها شوف ليك شقة مفروشه بعد تنتهي من شلاقتك تعال لينا راجع.
واحد اتصل علي قال سواق بعد ما نتهيت من الوصف الوظيفي للمهنة قال لي أنا عندي رخصة خاصة والمهنة في الاقامة سواق خاص (( طبعا سواق خاص وتربية مواشي وعامل منزلي ما بتتنقل))
وقال ليهو ثلاثة سنوات ما جدد اقامة وعليهو الفين ريال مخالفات اها كان جيتكم بتشغلوني...قلت ليهو انت المقعدك شنو ما ترجع السودان الزول دا سب لي دين ومعاها كم نبزه يعف اللسان عن ذكرها.
واحد اتصل من اهلنا ناس الجزيرة اقامة تمام رخصة عامة قلت ليهو خلاس تعال لينا في الشركة انا برسل ليك اللوكيشن في الواتساب
قال لي انتو عايزنلكم سواق و ل مدير ان بدور توصفلي قول الوصف وإن عايز تفلسف علي دا طرفي منكم.
واحد وصفت ليهو الشركة بعد شويه رجع لي اسمع يا الاخو هاك سواق الليموزين وصف ليهو قلت ليهو انا وصفت ليك وانت راكب معاهو كان ما فهم منك كيف افهم مني
الراجل كان مهذب قال لي عليك الله اخدمني قول ليهو الوصف انا ما فهمت اي حاجة منك سويتا لي كلها ترتره ((بقصد يو تيرن)).
بعد المدام هرشتني عملتو صامت اها في زول كرهني يوم الجمعه الزول دا متصل اكثر من عشرين مرة يوم السبت قلته ارد عليهو
اول حاجة قال لي يا زول انت بنتصل عليك مالك ما بترد قلت ليهو انا في الراحة الجمعه والسبت اجازة بكون نايم قال لي النايم ليها شنو وقت عاملك اعلان في الواتساب
قلت ليهو لقيت اعلاني وين قال لي اخوي كلمو صاحبو قال لقاهو في قروب سوط الجعليين والله اول مرة اسمع بالقروب دا اها كمان في جماعه بتصلو زي المرسلهم زول صاحبي ...
اسمع انا جاييك من طرف طه ... طه دا منو .... ما بتعرفو خلينا من حركات السودانيين المهم طه قال لي اتصل وانت بتشغلني
والله طه دا انا ما بعرفو لكن تعال لينا نعمل ليك معاينة كان لقيناك تمام بنشغل ...
معاينة شنو طه قلقلني من الخرج وبيتني مع عذابة الليل كلو انكرش من المارقوت والناموس بعد دا تقول لي معاينة كلام غريب....
اها انا قلته الزول دا نحظر رقمو لو عرف الموقع وما شغلتو بطعني بسكين و ل اعمل فيني حاجة تعوقني .
تاني توبة يا حبوبة
بالله يا جماعة رجاء خاص اصحابي الهنا في السعودية بقراء البوست دا ما اكون عندو واحد من اهلو سواق اديهو رقمي