Post: #1
Title: الاستثمار والتداول بالنت
Author: عباس الدسيس
Date: 03-23-2017, 01:18 PM
12:18 PM March, 23 2017 سودانيز اون لاين
عباس الدسيس-Saudia
مكتبتى
رابط مختصر
اتصل علي صديقي الباشمهندس يوسف إسألني عن الاستثمار والتداول بالنت الراجل عايز اكنس القروش بسرعة وارجع وقال اسأل زول اخد ليهو فترة شغل في بنك الراجحي
مع الاسف لو زول جاب لي سيرة اسهم وتداول طوالي اقوم علي القولون والصداع واتذكر ال200 الف ريال الانضربت فيهم فترة انهيار الاسهم
مع انو كنت حريص الاستثمارات الوهمية ما بخش فيها قبل كدا جاني صاحبي الله اطراهو بالخير قال لي عندنا استثمار وقعد اشرح لي شجرة وتجيب فرع باليمين إحسبو ليك شنو ما عارف
وقعد إلقط في الناس كل زول الف ريال والناس تحسب في خمة القروش
عليك امان الله الزول الكبير الجابم وقت قلبهم اكلهم وعرفو القروش طارت هجمو في البيت لقوهو قاعد في بيت شعبي لايملك غير لابتب ومرتبه في الواطه وبطانية
اها انا قلته ليهو وقت جاني... اوعك تقطع صفقة شجرة عشان ما اجيك جفاف وتصحر... ماسمع كلامي واتصحر وانا الاسهم رمدتني عديل
الموضة الحسي التداول بالنت ديل بشيلو منك الف ريال واطمعوك كم يوم اقولو ليك كسبت 300 ريال تاني اقولو ليك كسبت 400 ريال احولوهم ليك وانت تقول تزيد الجرعه تدخل بعشرة و ل عشرين وتاني عييييييك تلحق امات طه.
اتصلت علي لبنانية ترقق في صوتا وتشرح لي التداول بالنت قلت ليها حسي مشغول كل مرة تتصل بزوغ منها بطريقه ظريفه
لما زهجت منها قلت ليها يا بت الناس انتي سامعه صوتي وما شوفتيني انا سوداني لوني اسود متزوج اولادي خلاس في مرحلة دخول الجامعة والاصوات النسائية بتضرسني وبتعمل لي كاروشة بالله فكي طريقي وطريق جوالي.
اتذكرت لما كنا في زالنجي يوم بالليل ((بالليل دا ماشي وين)) كان في صاحبنا ما متزوج وللنصيحة وجيه واللون اصفر من اولاد ام درمان بجينا في الميز
مشكلتو ما اتزوج وصل الكم وستين انكسر هناك طشه الزمن مشي ولسع بشابب عامل صغير كنت سايق لي لاندروفر بعد المغرب وانا طالع قال لي وصلني معاك مشوار بوصف لي في البيت
والضلام خشا والفرامل عايزة الزول اكبس ليها مع لخمة الوصف وصلنا البيت والفرامل ابت تمسك توووشك شلت سور القش قدام العربية وماشي طوالي دخلت في قطية حتي العربية وقفت
شوفنا ليك قدام العربية حاجة مكومة في الواطه الظاهر كانت مراة عجوز ساكنه في القطية عمك المعاي راسو ضرب فتح الباب وقام جاري
والله بعد عمرو الكبير اول مرة اكتشفو جراي الناس اتلمت نزلنا انا قلت خلاس قتلت لي زول المكوم قدام العربية
بالله لقينا المكوم شوال تمباك الجماعه قالو لي الحق عمك ما اكون جن
اها انا جاري وراء وهو جاري بحاول افهمو الميت دا شوال تمباك كل ما اقول ليهو يا استاذ فلان اقول لي يا ولد انا قدرك انا راجل عجوز في حالي ما في حاجة بتلمني معاك الكتلتو امشي استرو...
اها بت التداول الظاهر عايزة تقتلني وتسترني
|
Post: #2
Title: Re: الاستثمار والتداول بالنت
Author: sadig mirghani
Date: 03-23-2017, 01:38 PM
Parent: #1
Easy come easy go
|
Post: #3
Title: Re: الاستثمار والتداول بالنت
Author: عماد قريش
Date: 03-23-2017, 01:39 PM
Parent: #1
حذف للتكرار
|
Post: #4
Title: Re: الاستثمار والتداول بالنت
Author: عماد قريش
Date: 03-23-2017, 01:40 PM
Parent: #1
ههههه ياعبس
اللبنانيه عايزه تطلع منك عمولتها
لقتك شوال تمباك
|
Post: #5
Title: Re: الاستثمار والتداول بالنت
Author: عماد قريش
Date: 03-23-2017, 01:40 PM
Parent: #1
حذف للتكرار
|
Post: #7
Title: Re: الاستثمار والتداول بالنت
Author: عباس الدسيس
Date: 03-23-2017, 02:04 PM
Parent: #5
صديق يا حبيبنا سلامات
كمان عندهم فن الدعاية للنصب والاستهبال
كل ما افتح المنبر هنا تقابلني الاعلانات دي
|
Post: #8
Title: Re: الاستثمار والتداول بالنت
Author: عباس الدسيس
Date: 03-23-2017, 02:06 PM
Parent: #5
Quote:
ههههه ياعبس البنانيه عايزه تطلع منك عمولتها لقتك شوال تمباك
|
عماد قريش سلام يا حبيبنا
كرهتني وقربت اقول ليها انا كمان شين ودشن
واغني ليها اغنية عقد الجلاد عشان تفارقني
|
Post: #6
Title: Re: الاستثمار والتداول بالنت
Author: عماد قريش
Date: 03-23-2017, 02:02 PM
Parent: #1
عفوا عباس والزوار الكرام
النت الردئ عملها فينى
معليش فتلنا ليك البوست
|
|