الي أمي ...صبحية عيد الام

10:00 AM March, 22 2017

سودانيز اون لاين
علي الكرار هاشم-الرياض
مكتبتى
رابط مختصر

يحتفل العالم بعيد الأم ولا شك أنها تستحق وتستاهل هذه الحفاوة والتكريم وهذه القصيدة ابعثها إلي أمي في الفردوس
إلي روح الوالدة الحاجة / حسب سيده بت يس ود البشير

أنا من زمنا
عيد الأم كان طول العام
من شمس الله بتشرق
تصابحك أمك
تبدأ تصبح
تاني تسلم
يومك يمشي تمام
وأمي قصاد عينى
وأنا في جوه عيونه
في صحيانه
وفي مشهاده
رقاده قيامه
لو في الحله
او في بيتنا وجوه السام
كانت امي
تبهرج
قمره تضوي السام
كانت رائعه كما النسام
وعيد الام كان طول العام
***
ما بتغيب عن بالي
ولا عن بالها بغيب
ورغما انو قليبها
كان يستوعب كل الحله
اخواني ولاد امى
ولاد ابوي
ولاد خالاتي
ولاد اعمامي
ولاد جيرانا
ولاد الكل بعيد وقريب
ما كانوا كذا اولادها
لكن كنت اعز حبيب
وحتى احفادنا
هاشم وناس كمبودي
وربنا يرحمو عادل
وناس اماتن نايمه
وامي وراهم صاحيه
مساكه دعاها
والله مجيب
وعيد الام كان كل العام
***
واتربينا علي الحنيه
ابوي حاج هاشمي يشد
وامي بترخي كتير مو شويه
ابوي دايرنا رجال الحاره
وامي تخاف
من عوم البحر الغربي
ولعب التحتانيه
لكن ما ربتنا عشان ندلع
ما مرقتنا بدون ما نشبع
جابت خيرها عشان ما نطمع
ست الفهم الزايد
ست التوب الجار والمقنع
رغما بيتها الكان
للناس ديوان وتكيه
وكان المشرع
ما اتهملنا ولا اتبطرنا
مما كنا صغارا شفع
وعيد الام كان طول العام
***
مشينا وجينا
قرينا كبرنا
وبرضك عند الوالده
كنا صغار
نفس الاحساس الكان ما تغير
مرات تزعل
ولمان تزعل
ترفع صوتها تداعي عليك
بل تدعو ليك
والشكله الحاره بتبقي هظار
والقلب الطيب
طيب وذاكر
مليان ايمان مو ناكر
حامد ربو صباح وعشيه
حامد وشاكر
ديك دعواتها معاي
لى الليله معاي
دعواته تذاكر
تفتح كل الابواب
لا شفنا هموم
لا زولا انهان
ماضقنا رفعنا حناجر
ما صقعتنا هواجر
ماشفناها مساخر
وعيد الام كان كل العام
***
ولما خلاص الناس ما كبرو
ولما الزول الشافع
اصبح شايل حملو
ولما العمر الفاني اتدور
كل ساعات الدنيا اكتملو
كانت امي حضور
ماغابت
ماشالوها ولا ختوها
لا ما احتاجت شان يسقوها
حافظه صلاتها
وحافظه الناس الغبت منها
عارفه الجوها
عارفه وواعيه
وكانت آخر كلمه شهاده
شهدت وقلبت صفحة
ياما كتار
صفحاتها قروها
وياما كتار صفحاته قروها
وعيد الام كان كل العام
***
عليك الرحمه
تتنزل عليك امطار
عيدك في الجنان
عيدك عشيه نهار
في الفردوس قصورك
جاريه تحتو انهار
تسكنى في النعيم
ورسولنا نعم الجار
ورسولنا نعم الجار
علي الكرار هاشم
21 مارس 2017

رحمها الله رحمة واسعة
ورحم امي زليخا بت محمد الشيخ
وكل امهات المسلمين

سلام يا أخي علي الكرار هاشم
ونسأل الله أن يرحم والدتكم وينزلها منازل المقربين ويجعل بركتها فيكم وفينا.

سعدت بموقفك الإنساني وبقصيدتك.

ولكن.. ما رأيك في كلام عارف الركابي؟؟

حكم الاحتفال بعيد الأم بقلم د. عارف الركابيحكم الاحتفال بعيد الأم بقلم د. عارف الركابي

وطبعا الوهابية يعتبرون حتى الاحتفال بمولد النبي عليه الصلاة والسلام بدعة بل يتنى أحد كبار علمائهم مجيء اليوم الذي يتسهل فيه هدمها. شايف كيف؟؟

ياسر