ناس الباوقة في المنبر زادوا واحد.

11:51 PM March, 19 2017

سودانيز اون لاين
سيف النصر محي الدين-
مكتبتى
رابط مختصر

عثمان ود احمد ود شرف الدين.
جده لابيه المرحوم شرف الدين زروق هو ايضا جدي شقيق حبوبتي المرحومة مدينة بت زروق والدة امي
اذن هو ابن خالي. عثمان اصغر مني بمراحل بحيث اني اذكر زواج ابيه.
من يعرف عثمان يعرف انه ناشط في قضية اساسية هي الباوقة. عثمان و رفاقه يسعون لتحسين
خدمات المستشفي، تنجيل الاستاد، اصلاح المدارس، دعم الداخليات، فرش المساجد و قائمة
طويلة من القضايا و المشاكل التي تبحث عن حلول.
عبر نشاطه على مواقع التواصل الاجتماعي و الفيسبوك بالتحديد لا يمل عثمان و لا يكل عن
نقل تفاصيل الحياة اليومية لناس الباوقة، اعراسهم و مآتمهم و اجتماعاتهم و مباريات
الدوري المحلي.
فوق كل ذلك عثمان كاتب و مثقف و هو اضافة حقيقية للمنبر العام.

سلام يا دكتور يا سيف النصر
مرحبا بعثمان فى منبر سودانيزاونلاين واتمنى ليه اقامة طيبة
لكن انت علاقة بالباوقة شنو ؟
ار سدونا كوركد ؟
لانو قبل كده فى المنبر ده نبذوك بالرطانى

(عثمان و رفاقه يسعون لتحسين
خدمات المستشفي، تنجيل الاستاد، اصلاح المدارس، دعم الداخليات، فرش المساجد و قائمة
طويلة من القضايا و المشاكل التي تبحث عن حلول.)
طيب تاعبين نفسهم ليه، ما كانوا يكلموا عمر ود الباوقة
بمزح والله، اتذكرت قصة عمك جمال محمد أحمد مع الزول البكورك في التلفون داك

مرحب عثمان أحمد شرف الدين
شفت ليك كم مداخلة والله حاجة تفرح

مراحب بالاصدقاء خالد حاكم و معاوية الزبير
يا خالد انا باوقاوي من ناحية الام و محسي من مشكيلة من ناحية الاب.

مرحبا عثمان
أكيد من يرحب به سيف سيكون له شأن
كلام محبة
لو كنت مكانك يا سيف لاخترت غير هذا العنوان المضلل

الف مبرحب بالاخ عثمان في هذا الحوش الوسيع ,, اتمنى له اقامة طيبة بيننا ..

تحياتي : ياسر العيلفون .....

السلام عليكم ورحمة الله وبركاته

مرحباً به
رجل بمثل هذه الصفات أسأل الله أن يكثر
من أمثاله في كل بقاع السودان

تحياتي له عبرك

الف مرحب ب عثمان في الحوش
والتحية ليك ي دكتورنا الأنيق

مرحبا بالاخ عثمان
وعبره مرحبا بكل اهلنا الطيبين سكان الباوقه
الباوقه جنة الشمال
الباوقه ام نخيل
للباوقه وابنائها مواقع متميزة لكن حضورهم هنا له وقه خاص

من باوقة حمد واللمين تحياتي المعطرة بطين الجروف لك اخي الاكبر دكتور سيف النصر وكل الاخوان الذين رحبوا بشخصي الضعيف

شاكر ومقدر هذا الترحيب وهذه الحفاوة
وفخور بأن اكون عضوا في هذا المنبر الذي يضم نخبة ومثقفي وطني العزيز ولا شك انني سوف استفيد منهم كثيرا
ويحدوني الامل ان اكون من ركائز هذا المنبر في المستقبل القريب

للجميع الود المطير

يا سلام بحضور الأخ الناشط النشط عثمان هنا
بس ما يكون خصما على قروباتنا

ايم الله لقد سرني عندما جلب لبوست (حاشاها من نقص العقل ) ..
رابط تلك الدراسة النادرة ( امي كاملة عقل ودين ) للدكتور الراحل عماد محمد بابكر ..
مرحبا به في سودانيز.

شكرا لكل الاصدقاء المرحبين بعثمان و مرحبا بعثمان في البمنبر و في البوست.

حباب اخونا وحبيبنا عثمان حفيد المرحوم شرف الدين

الذي كنا من زبائنه ونحن في مدرسة الباوقة الجنوبية الابتدائية

وتحية عبركم للدكتور زووق عبد الله زووق ودكتور امير

وكل الاسرة دون فرز

وهم جيراننا في الباوقة ويا له من جوار

حيث اصالة الطية ومنبع الكرم والتواصل

شكرا دكتور

بارك الله فيكم

الف مرحب بالاخ عثمان شرف الدين

الف مرحب بالاخ عثمان شرف الدين

الف مرحب بالأخ عثمان احمد شرف الدين و نتمنى له إقامة سعيدة و ذاخرة بالمنبر

و تحياتي يا دكتور سيف

لفت نظري تاريخ التسجيل

عثمان احمد شرف الدين تاريخ التسجيل: 03-04-2014 مجموع المشاركات: 54

هل هو خطأ فني أم أن التسجيل فعلاً قديم و لكن الأخ عثمان لم يستخدمه إلا في الأيام القليلة الفايتة؟

فعلا يا حافظ انا لاحظت لي المسألة دي هسه ههههههه
الموضوع انو دار حوار بيني و بين عثمان عن الكتابة في سودانيزاونلاين قبل شهور قليلة
و لكنه فات عليه أن ينبهني انه يمتلك باسويرد او انا ما اديتو فرصة لأنو الحوار تم كتابة على
ماسنجر الفيس. اها لما شفت مشاركاته الاخيرة قمت افتكرت انه يا داب دخل الحوش.
عموما نسمع من عثمان و ما فات شي ما رحبنا بيهو زمان نرحب بيهو الان.

السلام عليكم و مرحبا بالاخ عثمان و سيف و بقية الاخوة و انشاءالله تكون بداية نشاط جديد ليعكس لنا جمال الباوقة و اهلها ..........

مرحبتين حباب عثمان

وحباب اهل الباوقة نسابتى وأهل اولادى

ونعم الأهل

تحياتى

مكرر, عذرا

يا دكتورة كرري و لا يهمك نحن لاقينك وين :)
شكرا على مرورك و على الترحيب.
الشكر ايضا للاخوان احمد حمودي و حاتم تاج السر.

مرحبتين بالاخ عثمان .
وجيدن جيت .

الف مرحب بالأخ عثمان احمد شرف الدين و نتمنى له إقامة سعيدة و ذاخرة بالمنبر و تحياتي يا دكتور سيف لفت نظري تاريخ التسجيل عثمان احمد شرف الدين تاريخ التسجيل: 03-04-2014 مجموع المشاركات: 54 هل هو خطأ فني أم أن التسجيل فعلاً قديم و لكن الأخ عثمان لم يستخدمه إلا في الأيام القليلة الفايتة؟
ـــــــــــــــــــــــــــــــــــــــــــــــــــــــــــــــــ
ـــــــــــــــــــــــــ

الاخ الكريم حافظ اشكرك علي ترحيبك ...تاريخ التسجيل صحيح ولا ريب فيه
ولكن الفترة التي تحصلت فيها علي الباسوورد كانت الاجواء في المنبر اشبه ماتكون ملغومة وكثرت فيه المهاترات والنقاشات غير المجدية التي افقدتني شهية القراءة والمشاركة علي حد سواء فأثرت الانقطاع عن المنبر ريثما تهدأ الاحوال ويطيب لنا التواصل والتفاعل معكم علي نحو هادف و مفيد للجميع
كما ان اقامتي بالبلد (الباوقة ام نخيل) وضغط برنامج الحياة الاجتماعية هنا ايضا من الاسباب التي حالت دون المشاركة في الفترة الماضية



تقبل تحياتي..

مراحب عثمان شرف الدين

فركة رجل لا صعيد تلقانا متكلين في ود الفكي علي وحلة يونس ...




الشغيل

الف مرحب بعثمان أحمد شرف الدين.
وارجو أن يطيب لك المقام في المنبر.

شكرا دكتور سيف لتعريفنا بعثمان.
حقاً إن أجمل الناس حولنا قد لا نتعرف عليهم احياناً.

محبتي

( يا خالد انا باوقاوي من ناحية الام و محسي من مشكيلة من ناحية الاب )

شكرا دكتور سيف على المعلومة
برضو زميل المنبر الحاضر الغائب محمد الفاضلابى خلطة زيك كده
من اب فاضلابى وام حلفاوية وهو حال كثير من السودانيين