السوداني فى دنيا الإغتراب حبيس الوظيفة !!!

02:43 PM March, 16 2017

سودانيز اون لاين
walid taha-الرياض ، السعودية
مكتبتى
رابط مختصر

كُلنا نقضى عمرنا (الإغترابي) ماشين وجايين من المكتب للبيت وبالعكس ولمّن يرفدونا نقعد نفتش تانى لنفس المشوار !
لبناني ظريف كده قال لى : " شو أنا بدي أروح وأجى طول عمري هيك متل التور" ؟! فالرجل مع وظيفتو بياااااع فهو يسوق منتج تبع شركة اخرى بالمسا وياخد عمولة والقصة ماشة معاهو طحنية ،يقضى أمسياته فى الكافيهات يقبال هذا ويبيع ويعرض لذاك وحتى بالنهار وهو فى (مكتب الوظيفة) تلفونو ما ببطل رن : شو ؟ كم بدك منوو تأمرنى اليوم المسا نلتئي" كده دى بيعة تمت خلاص .
سبحان الله حتى بنو جنسه لو بقو موظفين تلقاهم آخر شي بفنتشو عنو المرتب فالعمولة هى الأهم .
حولى برضو هندي ببيع إسكراتش بالمسا ومرتب الوظيفة كلو فى البنك .
أما المصري يعجبك بالليل شغال طبيع بالصفحة وعمال يحوِّش !
اليمنى المعانا تحت تحت ببيع لينا عسل فى المكتب .
من أكثر الشعوب التى تخاف من (التفنيش) نحن ، لأن لا بديل لنا للوظيفة سوى الوظيفة !
والحمد لله ،،

السلام عليكم وليد...

قبل يومين كده طلبت أكل من مطعم ياباني قريب من البيت
و أنا منتظرة أسمع زول بيناديني من طرف الطباخين . طلع زميلي زمااان أيام البكالريوس فيتنامي أها حق الله بق الله
قال ده مطعمه هو و أخته , أخته المدير و هو بيجي جمعة و سبت بيساعد في الإدارة
في نفس الوقت شغال من البيت ك software developer أها قبال ما أشيل طلبي و أطلع أداني البزنس كارد بتاع
الكرت بتاعه realtor و فيه معلوماته و مكتبه (بياع بيوت و عقارات)... ضحكت قلت ليه الحالصل شنو :)

زمان كمان زميل في العمل فلسطيني كان بشتري و يبيع عربات أونلاين...

غايتو النساء في المكاتب في السودان فيهم دلاليات يبيعوا لناس المكتب لكن الفكرة دي ما وصلت الرجال كيف هههه
بوست ظريف.

تحياتي لك

شكرا فردوس للمرور
quoteغايتو النساء في المكاتب في السودان فيهم دلاليات يبيعوا لناس المكتب لكن الفكرة دي ما وصلت الرجال كيف ههههquote
بالمناسبة فى بلاد الإغتراب النساء أكتر همّة ، منهم (يحنّن) ومنهم من يخيز ويبيع ومنهم من يدِّرس .
الفيتنامي زميلك سبع صنايع بس البخت اكيد ما ضايع :)

تحياتي،،

طبعا يا ويلي ، حسب الأنظمة فإن العمل لدى غير صاحب العمل الرئيس يعتبر مخالفة..
ولكن بعض أصحاب المهن التي لا تحتاج إلى تواجد بالمكاتب، يعملون من المنزل ..
مثل المحاسبين والمهندسين ، والرسامين المعماريين ، وما إلى ذلك...

لكن هنالك قاعدة ثابتة : الموظف موظف ... والتاجر تاجر..


تحياتي

بوست مفيد وظريف ولذيذ وممتع
وفيهو فضفضة للوجع
سي سي عباس الدسيس
غايتو بس الحمد لله ... غايتو انا حمار بس ولاشك في ذلك ابدا
اي حمار عديل كدا ومعترف
في السودان اشتغلت عشرة سنة في محل وااااااااااااااااااااااااااحد
وهنا في السعودية عشرين سنة في محل وااااااااااااااااااااااااااحد
ولو في زول قال لي هاك البضاعة دي مجان وبيعا وشيل حقها كلو
ردي جاهز يا زول هوي داير تورطني ساكت وتدخلني السجن
تلاتين يوم او واحد وتلاتين يوم ويا حبذا ابو تمانية عشرين او تسعة عشرين يوم اشتغل حمار
رايح جاي ويوم واحد ول بالكتير يوم تلاتة في الشهر ولا تعريفة واحدة مافي هههههههه
الله حي ننتظر الاخرة بس
.
.
تحياتي الحبيب وليد طه وضيوفك

سي سي 2 ابوحراز

ود البوش إزاى الحال
طبعا يا ود البوش فى (أسير الوظيفة ) وفى (حبيس الوظيفة) وحبيس طبعا تعبير أكثر وجعا من أسير لذلك وقع الإختيار عليها ، فإنت تبع ياتو واحدة :)))
ههههه شكرا للمرور

الشغيل إزاى الحال

quoteحسب الأنظمة فإن العمل لدى غير صاحب العمل الرئيس يعتبر مخالفة..quote

رد الجماعة (أيه وشو فيها يا زلمة؟!)

مش قلت ليك (حبيس الوظيفة) ! :)

التحية لك اخي وليد على طرح هذا البوست عله يجاوب على تساؤلاتنا عن هذا الحال الذي يعيشه السوداني في دنيا الاغتراب ...
ويا وليد ما تنسى انو السوداني في الغربة كمان ما بيغرف يقدم نفسو بصورة جيده وحسب مؤهلاته وامكانياته التي قد تكون كبيرة جدا ولكنه يضيعها بهذه المتلازمة التي يعاني منها السودانيين في الغربة ايضا بالاضافة لما ذكرت فعلا السوداني يكاد يكون الشعب الوحيد الذي لا يجييد ولا يفكر في الحصول على دخل اضافي مهما كانت سهولة الحصول عليه وهناك جوانب اجتماعية بحته في هذا القصور منها اننا شعب يجامل على حساب نفسه ومصلحته مهما كلفه هذا الامر من خساير او اضرار فمثلا المجاملات الاجتماعية التي يقوم بها السوداني لا ولن تجدها عند اي شعب اخر وهذا غير تضحياته من اجل اهله بارسال مصاريفهم بصورة راتبه سوى كان ذلك لاهل بيته او لاقربائه مما يجعله منهك القوى وغير قادر على مزالوة اي نشاط تجاري اخر ...
وللحديث بقية ...

تحياتي : ياسر العيلفون ......

quoteوللحديث بقية : quote

ياسر يا فنان إزيك
إنت بالذات يا ياسر لو ما إشتغلت (أنصاص الليالي) تكون بالغت !! :))))))

أخى / وليد طه لك التحية وللإخوة الأعزاء طرح جميل نعم نحن هكذا فى الإغتراب (أسرى للوظبفة) ولو قالوا ليك مع السلامة فى أى لحظة ماتعرف تقبل وين يعنى الواحد عشرين سنة يحرس يوم الراتب 30 فى الشهر ويم ثلاثة بالكثير بكون (مقشط) ينتظر نهاية الشهر ودى مصيبة كبيرة لا والأدهى من ذلك يكون مديون قدر راتبو وشغال (طاقية دا X راس دا) ويبيع فى الإجازات عشان يسدد ديونه وإلتزاماته الأخرى وكل آخر شهر شكلة مع ست الفريق وللأسف دا حال الكثيرين وأولهم المتحدث العبدلله حسبناها يمين شمال أبت تنعدل لأن البداية كانت غلط يعنى أول خمسة سنين وقت ماجابت همها طوالى تشوف البديل لكن نحن لا (منكنكشين) فيها وحار فراقها بت اللذينا الوظيفة دى أها مع وجود أسرة معاك مستحيل تجازف بهم لو عزابى معليش لكن مع وجود أبناء فى المدارس وعلى وشك التخرج دى صعبة بالحيل الله يفرج همنا وهموم المسلمين

بوست لطيف ياوليد.
أهم سبب للكنكشة في الوظيفة من وجهة نظري ان السوداني بتركيبته ينظر لاحتمال الخسارة قبل الربح و متردد وبطئ في اتخاذ القرارات ويفتقر في معظم الأحيان للإبداع والأفكار الخلاقة بالاضافة الى الخجل وعدم القدرة على تسويق النفس بطريقة فعالة وهذه طبعا صفات لا تساعد على النجاح في العمل الحر. بس حتى لا نظلم السودانيين، فنحن شعب لا يتمتع بإرث عريق في التجارة ولا توجد تجارب كثيرة ناجحة يمكن الاسترشاد بها والسير على خطاها مما يجعل الأمر أصعب بخلاف باقي الجنسيات مثل الشوام واليمنيين وحتى الهنود، لكن متفائلين بالمستقبل لوجود سودانيين استفادوا خبرات جيدة من مقار إقامتهم.

وتقبل تحياتي،،،،

وهذه مساهمات شعرية في نفس المجال حيث كتب احد الشعراء هذه القصيدة مجسدا واقع الغربة والمغتربين في السبعينات والثمانينات من القرني الماضي ، والحقيقة القصدية جميلة ولكنها تصف شطر الحدث لذا اكملت الشطر الآخر برد على نفس النسق اترككم مع القيصدتين وتقبل مروري
قال الشاعر

يا غربة .. يا غشاشة .. يا بكاية .. يا مستهبلة
تغرينا بي درهم قروش وراه قنطار بهدله
جيناك سنة .. أو قول سنين بنكمله
نبني البيوت في العاصمة
وبي كوم أثاث بنجمله
وكرولا حاره نرسله أصلو التنقل مشكله
ونكمل الدين بي مهل والسمحة جاهزة نحصله
غير القروش اللي الأهل عبر الشهور حا نرسلا
والباقي يدخل في البنوك ونشوف دباره نشغله
ناس فكرت تجني العلم تبدأ الدراسة تواصلا
أحلام كتيره وشيقه وآمال كبيرة نأملا
لكن حساباتنا الغلط في كل عام بنرحله
مرت سنين من العمر بنعزها وبنفضله
والحسبة وصلت طاشرات يمكن نعيش وندبلا
وتعال نحاسبك يا وهم من غير رقم أو أمثله
كان للقروش نجري ونحوش لكن تقول بنشاكلا
ما راضية تقعد في الجيوب وتقول حرامي بينشلا
لكن بترقد في الضهور بديون تقيله متلتلا
ممحوقة ما بتقضي الغرض وأقل حاجة تكملا
كملانه سفرة وحق وزن ومجاملات مستفحله
ضرائب أبعاج المشي وإلزامي حمدي نحولا
وأحلامنا صبحت زي سراب نمشي ونجري ما نحصلا
يا ريت يكون هم القروش يا غربة فيك هو المعضله
لكن تعال شوف الهموم الما إفتكرنا نقابلا
ذلة ومهانة واحتقار خلو النفوس متململة
سجنا كبير فيهو الكفيل سجان قيوده مكبله
أشغالو شاقة ومؤلمه ودايما تكون مستعجله
ما عاد يكفيها النهار تحتاج ليالي مليله
أمراض كتيره بدت معاك عايزه الفحوص مستعجله
ناس الضغط والسكري ومرض القلب مع الكلى
ومصران وقرحة وإكتئاب ونفوسنا ما متحمله
وبنينا فيك كيمان لحم تحت الهدوم متندله
وأكيد يكون أكل المعلب والمجمد عاملا
عدم الرياضة والكونديشن لابد يكون ليهم صــــــلا
وكمان تعال لمعادلة ما قدرنا أصلا نعدلا
سجن العيال جوه الشقق وفراق الأهل والعائله
جيب العيال بي جيبنا مال وجيوبنا غيرو مميله
وصغارنا صبحت بالزهج متوحشة ومتجفله
لا قادرة تلعب في خلا ولا ضل شديره يضللا
لا قادرة تدرس بي نفس من الدروس المترهله
تلقي الولد غالبو الكلام والبت كبيرة ومريله
كل الضغوط سوا ما قدرنا حتى نقللا
في كل طرف تلقي القرف تلقي الخيوط مداخله
يا غربة أديناك كتير أدينا خاطرك يسهلا
خلينا نرجع بالفضل نلحق حياتنا نعدلا
آمالنا فيك بدري إتنست إلاّ الرجول متوحله
وبقينا زي أهل القبور لا البره عارف يدخلا
لا الجوه يرجع لي ورا يحكي الحقيقة يوصلا
لكن خلاص هان الخلاص عندك نزل مهما علا
وإن شاء الله نحيا نودعك وتكوني ذكرى نغازلا
يا غربة .. يا بكاية .. يا غشاشة .. يا مستهبله

وقلت ردا عليه ( محمد الزبير )

عذرا تمهل في الحكم الغربة لا غشاشة لا بكاية لا مستهبلة
شطر الكلام ماهو الصواب ما يستقيم دون تكملة
نصف الذكرتو كلام صحيح كانت ثقافة مرحلة
الغربة إختلفت كتير وبقت في نسخة معدلة
الغربة تخطيط منتظم ضبط الحكاية من اولا
الغربة زي موية المطر في الرملة ما بتحصلا
الغربة عايزة مؤهلات تطوير شديد دون ململة
الغربة كم ربت يتيم مسحت دميعات أرملة
في الغربة ناس تركوا الخمول عرفوا الصلاح درب الصلاة
بالغربة ناس فتحت بيوت حفظت صغارها من البلا
بالغربة كم حجوا الكبار دفعوا التذاكر في الغلا
الغربة كم سندت ضعاف اضحت امورها مسهلة
بالغربة كم مديون مهان سدد ديونو وحلحلا
بالغربة كم متروك ضعيف حاز العماير وسجلا
بالغربة ناس عملت بيوت مفروشة اثاث آخر حلا
في الغربة ناس حازت علم طب وإقتصاد مع صيدلة
في الغربة ناس درست فقه حفظوا المتون من اوّلا
الغربة كم دعمت إمام شيد مساجد للصلاة
الغربة كم رزعت حقول روت العطاشا الفي الخلا
قصة عيال جوة البيوت في دا الزمن ما مشكلة
ليه الولد غالبو الكلام والبت كبيرة مريلة
ليه مافي تربية وإهتمام ليه العيال متبهدلة
لو انت مشغول بالعمل دور الأمومة مكملة
تهوى السهر نوم النهار خلت عيالها مهملة
سوق الدهب ونسات حريم طبعا اكيد ليهم صلة
علم الشوارع ما بيفيد في البيت هوايتو بحصلا
ظل الشديرة دة كان زمان وقت البيوت مترهلة
كل البيوت صارت شقق مضروبه بوهية مقفلة
في البيت في انترنت بيجيب كل الخيوط متواصلة
البيت بيحفظو من الشرور ومخدرات ومن البلا
حتى اللعب بي إنتظام أوقاتو ما متداخلة
ليه للقروش تقعد تحوش بالأولويات نزلا
رتب حواجك بي عقل ما تسيبها ماشا سبهللة
طور معارفك بإنتظام أصلو المنافسة مذهلة
فيهم أعاجم والعرب واتراك معاهم بنقلة
الخبرة والتأهيل كمان بعد الشهادة مفضلة
الواسطة قبل الإمتحان ما اظن تحل المسألة
خلى المجاملة في حدود والواجبات ما معضلة
والغربة منحة من الكريم تستاهلك وتستاهلا
بس أبدا بي تخطيط سليم من دون كلل دون ململة
حصل قطارك ما يفوت بى سرعة من غير فرملة
سيب إكتئابك والملل كتر دعاك وقت الصلاة
فارق الشلل لعب الورق سهر إستراحات بطلا
اصلو الزمن دوار شديد لحظاتو ماها مطولا
وادعو الكريم ساعة السحور للمعضلات بيسهلا
بس حسن اعمالك كمان بي نية صافية من اولا
تلقي المراد يوم الحصاد كل المحطات توصلا
وإن فاتت في الفانية دي يوم القيامة تحصلا
في اللحظة ديك تقدر تقول الغربة لا بكاية لا غشاشة لا مستهبلة
محمد الزبير​ محمود

quoteسي سي 2 ابوحراز quote

فى إنتظار دلوه

اجتمعنا نحن ثلاثة سودانيين في شركة ... وكنا بعد الدوام كل زول ( يفر ) على محل الشغل التاني ...

كنا شباب ... وما خايفين من كشة ولا جوازات ولا مكتب عمل..

اطلقنا على العمل الثاني ( ود الذين ).... ونتقابل الصباح ... ونحكي عن ود الذين ..

وأولاد الذين المعانا ما فاهمين حاجة ... حتى ( الذين ) الكبير ما ناقشنا بنقول في شنو ..

فااااااا.... ود الذين حلو حلا ... لو جربتوهو ....

بس ما تشتكوا بعدين من وجع الضهر وطشاش العيون .....

الشغيل إزاى الحال
والله متمنى أشوف 5 او 6 مهندسين سودانيين إستشارين إجتمعوا وعملوا مكتب إستشارات شراكة !!
مافى ..فتشت وما لقيت !

سلام وليد وضيوفه الاكارم

نحن عموماً ما ناس تجارة
حتى في الغربة نادراً ما تجد سوداني في وظيفة لها علاقة بالبيع والشراء...
مع ودي

بوست غاية في الظرافة
وفعلاً أغلبنا عبدة للوظيفة الواحدة
خط سك حديد مكنكشين فيهو من يوم جينا
وبكرة لو قالو لينا فركش
رأسنا بيضرب
وما بنعرف وين نقبل
فعلاً ،،، الوظيفة إستثمار جبان

نسأل الله الثبات

اعرف سوداني يعمل في ورشة نجارة لمدة 33 سنة
كل الابواب التي بالمنطقة وماحولها كانت على راسه
والعمال معه هنود وبنغلاديش وسريلانكيين
اعطاه الكفيل فيزا
وقال له جيب لك واحد من جماعتك
عشان لو انت طلعت عمل خارجي يراقب الورشة في محلك
احضر زوج ابنته
الولد بعد ما اشتغل 6 شهور فاجا الكفيل باقتراح عجيب
وقال له .. ياعمنا شايفك زهجان من شغل الورشة ..
نحن ممكن نعطيك حل مريح
نديك كل شهر 12 الف ريال وندفع نحن الايجار ونكون مسؤلين من الورشة
سال لعاب الكفيل لهذا العرض
حيث كانت ايراداته الشهرية اقل من نصف هذا المبلغ
وبالفعل وافق
ليصبح هذا الاخير صاحب الورشة ومديرها العام ورئيس مجلس الادارة
بينما عمنا الذي له 33 سنة في مكانه الاول
رغم ان المدير الجديد قد غير طريقة الادارة
واصبح العمل بالانتاج
المدهش ان مداخيل الجميع قد ارتفعت بنسبة 100%

أبو حراز إزيك يا رجل
quoteالمدهش ان مداخيل الجميع قد ارتفعت بنسبة 100%quote
اهو ده واحد فلتة !!
تخريمة : شايف التجارة فى الملايات فيهو قروش كويسة

Cc : ست النفر :))))

فعلا الملايات استفدنا منها فترة من الزمن
لكن بدري درسنا في الابتدائي
ان كفار قريش اجتمعوا لقتل الرسول صلى الله عليه وسلم
واختاروا من كل قبيلة واحد
حتى يتفرق دمه بين القبائل
حدث لنا نفس الشيء
ولكن من نوع اخر
حيث تفرقت ارباح الملايات بين القبائل
وكلما اسال حكومتنا الرشيدة وين الارباح ؟؟
فتقول .. والله علوية الدنقلاوية دفعوا رسوم الجامعة للولد وظروفهم صعبة
وامنة الكاهلية قالت ابوهم نقل كفالة والحكومة شالت اليابس والاخدر
ورقية الشايقية كلما امشي ليها تتعذر لي وتقطع مصاريني
ونهلة البقارية قالت ماصرفت الصندوق لسه
وسكينة بوبار منتظرة ابوهم يبيع عربيتو وتخلصني قروشي
اها من اليوم داك قلت يا ابوحراز خليك عاقل
وخت قريشاتك تحت المخدة
والله القروش تحت المخدة دي من انجح الاستثمارات داخل وخارج السودان
قال سكينة بوبار قال !!!!

السلام عليكم صاحب البوست وضيوفه الافاضل

فعلا بوست ظريف وخفيف ، واحب ان اضيف ان يكون الانسان جاهز وعلي اهبه الاستعداد دائما للمغادرة ( كما يحدث الان ) .

معظم المغتربين في السعودية ( وانا منهم ) . ناوين نشد الرحال للديار . في وقت اصبحت الخيارات محدودة.

الخليج عموما ، وما افرزته التحولات الاقتصادية والسياسية ، وغيرها ، و ( انخفاض سعر النفط ) خلال العشر سنوات الماضية ، اجبر تلك الدول علي اتخاذ اجرأأت اقتصادية معينة ، للحفاظ علي اقتصاد بلادهم .

اوربا وامريكا والغرب عموما ( توقفوا عن تسجيل لاعبين جدد ) . واصبح الوضع غير مشجع .
لذا لابد ان يكون للمغتربين عموما خطة بديلة .

والله المستعان ،،،