Post: #1 Title: رفك عالي فوق للمعالق طيك : ( إلى ود البوش وآخرين ) Author: ابو جهينة Date: 03-14-2017, 07:51 PM Parent: #0
06:51 PM March, 14 2017 سودانيز اون لاين ابو جهينة-السعودية _ الرياض مكتبتى تقديم :تنفست هواء الوطن في مدينتي الوطن ( أتبرا )ثم ... ترعرعنا ما بين بربر ( الدكة ) حيث بيت جدي لأبي والذي تزوج هناك ، وبين ( مبيريكة ) حيث تزوج عمي ( رحمهم الله جميعا.) لم نعرف أننا ننتمي إلى قبيلة نوبية في أقصى الشمال إلا بعد أت تخطينا المرحلة المتوسطة. لذا كنت حريصا على مد جسور هذا التواصل ما أمكن ذلك. ثم تزوجت من بطحانية ، من عمق ( أبو دليق )وصرت أتباهى بمعرفتي بتاريخ قبائل السودان وشعرائهم وبطولات فرسانهم فاجأني يوما نسيبي البطحاني قائلا :
صادني الصاد (محلق) وابتليت بي غيك دعجة وكحلة وبضوي مع الكواكب ضيك رفك عالي فوق للمعالق طيك وسويتلي صي صي يا المقفره صيك مرقت بي هنا بي اضانها سمعت كرة وفوق كارتوت شخيتيرا تخين خره قلاتو الوهاط بي لشقة قبلوه محره يا باسط النعم اسقيها في هل المره ، ود عريج دومتك خرفت قلب القلادة كدوبة وايدك طولت من شقة البادية أوام دنقلا الفي اللجة قلب الهوبة اترتع تقول شارب لذيذ الكوبا
من عيشة الرذيلة ابليس حرمنا ومن الحاجة التعيبنا نعزقدمنا نحن اولاد كمال وافر كرمنا تستر الحال بارنا ان اصدمنا ضراع المسافات والواطة المتسعة عينو في الكرباج ويابي اللسعة ابيض ليهو زنقدة يعوم بالنسعة طيار السعودي قام من البلد يوم تسعة
يمشي ام تتالي الليلة باروو وزايرو اتخنتل متل زرع الذرة الفي جزايرو نهداً دابوا قام عراوي زرايرو قال للناس تراهو الموت بشيل الدايرو الادب الرفيع دارساه بدري دراسة والذوق والظرف من امهاته وراثة الا معاي دايما قوة راسه من عيشة الرذيلة ابليس حرمنا ومن الحاجة التعيبنا نعزقدمنا نحن اولاد كمال وافر كرمنا تستر الحال بارنا ان اصدمنا ود عريج دومتك خرفت قلب القلادة كدوبة وايدك طولت من شقة البادية أوام دنقلا الفي اللجة قلب الهوبة اترتع تقول شارب لذيذ الكوبا
Post: #2 Title: Re: رفك عالي فوق للمعالق طيك : ( إلى ود البوش وآ Author: ابو جهينة Date: 03-14-2017, 07:56 PM
فوق دربك
فبُهِتَ الذي استمع ، حيث أن نسيبي كان يقولها وكأنه متأبطا سيفه ويقدل في بطحاء البطانة خلف إبله
Post: #3 Title: Re: رفك عالي فوق للمعالق طيك : ( إلى ود البوش وآ Author: sadig mirghani Date: 03-14-2017, 08:33 PM
مادام ترعرعت في الدكة تكون لعبت الكوتشينة مع الحدنفر رحمة الله تغشاه
Post: #4 Title: Re: رفك عالي فوق للمعالق طيك : ( إلى ود البوش وآ Author: ابو جهينة Date: 03-14-2017, 09:21 PM Parent: #3
تحياتي صادق
سنواتنا في الدكة ما بين عام 1957 وحتى 1966 حيث بعدها تنقلت في أصقاع السودان معلما ما بين الشمال والوسط والشرق والغرب
جدنا أول ناظر محطة سوداني في بربر، وهو صديق للشيخ بابكر بدري ، درس خلاوي الغبش ثم رافق النجومي في حملته لتوشكي ثم عاد لأمدرمان
زولنا دة كان عايش في ياتو فترة ؟ دمتم
Post: #5 Title: Re: رفك عالي فوق للمعالق طيك : ( إلى ود البوش وآ Author: د.محمد حسن Date: 03-14-2017, 09:34 PM Parent: #4
ابو جهينة يا صديق الهجعة
تعرف لو بنسق قريب للبوست ده كتبت ايامك في التدريس كلها بتكون عملت حاجتين مهمتين 1- بتكون وثقت لمسيرة التعليم في السودان
2- بتكون عكست كيف كان التعليم متقدم وكيف اصبحي في عصر العولمة متاخر ومترنح وكثير محبتي التي تعلم
Post: #6 Title: Re: رفك عالي فوق للمعالق طيك : ( إلى ود البوش وآ Author: عبدالله ود البوش Date: 03-15-2017, 06:30 AM Parent: #5
ثم تزوجت من بطحانية ، من عمق ( أبو دليق ) ---------------------------------------------------- المتلك ات يا الضؤ يشرف البطانة والبطانة تزيد عزو عز فوق عزو القديم معتز . . بجيك صاد برواقة يا الحبيب
Post: #7 Title: Re: رفك عالي فوق للمعالق طيك : ( إلى ود البوش وآ Author: عبدالله ود البوش Date: 03-15-2017, 06:38 AM Parent: #6
دعجة وكحلة وبضوي مع الكواكب ضيك ----------------------------------------- هذا وصف حقيقي غير مبالغ فيه وتقريبا كانه وصف عادي للبطحانية . . . انك ميت يا ابو جهينة وانهم ميتون
Post: #8 Title: Re: رفك عالي فوق للمعالق طيك : ( إلى ود البوش وآ Author: عبدالحفيظ ابوسن Date: 03-15-2017, 07:20 AM Parent: #7
تحياتي ابا جهينة وضيوفه قصيدة جميلة جدا واقتباس مرباع الحردلو من مسدار الصيد اتي سلسا طبيعيا وباهرا ارجو ان اكون من الاخرين مع هذا الدفق العشقي
Post: #9 Title: Re: رفك عالي فوق للمعالق طيك : ( إلى ود البوش وآ Author: عبدالله ود البوش Date: 03-15-2017, 07:29 AM Parent: #8
القصيدة دي يا عبدالحفيظ قالها عبدالله ود اب سن بمناسبة استقبال نسابته له وهي حال لسان اخونا الاديب ابوجهينة لاستقبال نسابتو البطاحين له واكرموهو لمن حيروهو وحتى القصيدة قالها نسيبه نيابة عنه الناس ديل يا حفيظ لو ما خليتم يكرموك بدقوك ويكرموك بالغصب
Post: #10 Title: Re: رفك عالي فوق للمعالق طيك : ( إلى ود البوش وآ Author: عبدالله ود البوش Date: 03-15-2017, 07:37 AM Parent: #9
ايامك مضن زي البروق الرفـن النوح طال عليك ترع العيون ماجفَّن تاج حب الوداد راقد معاك إتكفن الدين والبشاشة إتقالدن وإتوفن ------------------------------ عبيد الطيب مطلوب حضوري فورا
Post: #11 Title: Re: رفك عالي فوق للمعالق طيك : ( إلى ود البوش وآ Author: عبدالحفيظ ابوسن Date: 03-15-2017, 07:42 AM Parent: #10
تشكر ودالبوش تصدق العبيد كان في بالي مع وصف مشي الالبل لكن مرباعك الاخير دة مناحة جيب باقيهو
Post: #12 Title: Re: رفك عالي فوق للمعالق طيك : ( إلى ود البوش وآ Author: عبد الباقي الجيلي Date: 03-15-2017, 07:49 AM Parent: #10
أبو المرتضى أيها الرجل الفخيم
لا أدعي معرفة شعر البطانة ..
لكنني حتماً من عشاقه
لما كنت أعمل بالرياض مع الأديب السعودي الشهير عبدالله بن خميس
Post: #18 Title: Re: رفك عالي فوق للمعالق طيك : ( إلى ود البوش وآ Author: عبد الباقي الجيلي Date: 03-15-2017, 09:23 AM Parent: #17
الراقي ود الأسد عجيب
وصرتو مدفونة في البطانة ....
بس قول ليهو بالله عليك تاني ما تتكلم في الصوفية ....
Post: #19 Title: Re: رفك عالي فوق للمعالق طيك : ( إلى ود البوش وآ Author: عبدالله ود البوش Date: 03-15-2017, 09:37 AM Parent: #18
بس قول ليهو بالله عليك تاني ما تتكلم في الصوفية ----------------------------------------------------------- في الفترة الاخيرة رفع كراعو من الابنص . . مرة عزمتو لقمة بملاح لوبا قال لي داير ملاح بت علوبة الفركتو وأبتو ههههههههههه
Post: #20 Title: Re: رفك عالي فوق للمعالق طيك : ( إلى ود البوش وآ Author: أحمد الشايقي Date: 03-15-2017, 09:45 AM Parent: #19
وتلاقــت قـمـم يا مــرحــى
المتعـة ذات الـزهـــو
أحمد الشايقي
Post: #21 Title: Re: رفك عالي فوق للمعالق طيك : ( إلى ود البوش وآ Author: بدرالدين بابكر مصطفى Date: 03-15-2017, 12:01 PM Parent: #20
السلام عليكم بوجهينة وصحبه الكرام ردفك عالي فوق للمعالق طيك (أظن ردفك)
Post: #30 Title: Re: رفك عالي فوق للمعالق طيك : ( إلى ود البوش وآ Author: ابو جهينة Date: 03-17-2017, 01:07 PM Parent: #21
تحياتي أخي بدر الدين
ردفك عالي فوق للمعالق طيك (أظن ردفك)
*** شكرا كثيرا على التصحيح
دمتم
Post: #29 Title: Re: رفك عالي فوق للمعالق طيك : ( إلى ود البوش وآ Author: ابو جهينة Date: 03-17-2017, 01:05 PM Parent: #20
تحياتنا أستاذ أحمد الشايقي
خد لك تكية هنا
دمتم
Post: #28 Title: Re: رفك عالي فوق للمعالق طيك : ( إلى ود البوش وآ Author: ابو جهينة Date: 03-17-2017, 01:03 PM Parent: #12
تحياتي أخي العزيز عبد الباقي
الدارجة السودانية هي الأقرب للفصحى الغربية ولي تجارب كثيرة مع خليجيين أعترفوا بهذه المعلومة
مشكور على الكرور البهي
Post: #24 Title: Re: رفك عالي فوق للمعالق طيك : ( إلى ود البوش وآ Author: ابو جهينة Date: 03-15-2017, 01:57 PM Parent: #8
حبابك أخي ابو سن
في أنتظار دفق بطاني
دمتم
Post: #25 Title: Re: رفك عالي فوق للمعالق طيك : ( إلى ود البوش وآ Author: ابو جهينة Date: 03-15-2017, 01:59 PM Parent: #8
الناس ديل يا حفيظ لو ما خليتم يكرموك بدقوك ويكرموك بالغصب
*** أضحك الله سنك يا ود البوش
لكن صراحة ... الكرم عندهم
Post: #22 Title: Re: رفك عالي فوق للمعالق طيك : ( إلى ود البوش وآ Author: ابو جهينة Date: 03-15-2017, 01:53 PM Parent: #6
المتلك ات يا الضؤ يشرف البطانة والبطانة تزيد عزو عز فوق عزو القديم معتز
***
لأخي ود البوش
يدوم عزك يا أصيل
تقبل تحياتي وها هنا معسكرين
Post: #27 Title: Re: رفك عالي فوق للمعالق طيك : ( إلى ود البوش وآ Author: اسامه العريفي Date: 03-15-2017, 02:02 PM Parent: #22
ثم تزوجت من بطحانية ، من عمق ( أبو دليق )
ياسلام عليك يالرئيس ابوجهينة في ستينات القرن الماضي عندي خالااتي اسمهم قادرية وعابده ربنا يرحمهم كانن شغالات معلمات كتاب المهم شيخ قبيلة البطاحين شيخ الزبير عليه الرحمة جاء طلبهم عشان يشتغلوا كمعلمات بمنطقة ابو دليق فصار لهم كالأب واي بنت ولدت في منطقة ابودليق في تللك الفترة كانوا بسموهم يا قادرية او عابدة . فلذلك صار لنا محبة وود بتلك المنطقة
Post: #31 Title: Re: رفك عالي فوق للمعالق طيك : ( إلى ود البوش وآ Author: ابو جهينة Date: 03-17-2017, 01:09 PM Parent: #27
سلام كبير أخي أسامة
بالفعل تلك المنطقة تمثل عراقة وأصالة متجذرة
مشكور على المرور البهي
Post: #23 Title: Re: رفك عالي فوق للمعالق طيك : ( إلى ود البوش وآ Author: ابو جهينة Date: 03-15-2017, 01:55 PM Parent: #5
تحياتي أبو التومات د. محمد
فعلا إنها فكرة صائبة حاولت ثم توقفت. ولكن ( دفرة ) منك سنواصل
دمتم
Post: #26 Title: Re: رفك عالي فوق للمعالق طيك : ( إلى ود البوش وآ Author: ابو جهينة Date: 03-15-2017, 02:00 PM Parent: #23