الأصدقاء الجميلين والصديقات الجميلات.أهل قلبي و آهٍليهِ(رسالة امانى حدو)

01:04 PM March, 14 2017 سودانيز اون لاين
معاوية عبيد الصائم-
مكتبتى
رابط مختصر

الأصدقاء الجميلين والصديقات الجميلات.....أهل قلبي و آهٍليهِأهلي و أفراد أسرتي ....أنا بخير و الحمدلله وفي تحسن…شُخصت حالتي في يوليو( 2016) بسرطان القولون و المستقيم (Colorectal cancer) خَضعت لعٍلاح كيماوي و إشعاعي ومن ثم جراحة استئصال ورم و اخضع الآن لعلاج كيماوي مرة أخرى, كل اسبوعين جرعة (وما ادراك ما الجرعة)...مياه كثيييييرة مرت من تحت الجسر وستمر مياه اكثر لا محالة طالما نحن هنا.. و للحلم بقية...ما اوّد قوله هنا انو في صورة نمطية لمريض السرطان (و لحدما هي حقيقة لكن لحالات محددة). يتبادر للذهن حال سماع كلمة (كانسر) (للغالبية العظمي وكنت انا منهم لحدي قريب) انو مريض الكانسر معلول الصحة... وهنان شعرو مافي عيونو غايرة وسهتان وكملان من العافية (دا ما يمنع في بعض الاحيان علي حسب نوع ومرحلة المرض و وبنيان الجسم للشحص والعمر قد تظهر بعض او كل هذة الاعراض مُجتمعة) ....وبرضو قد يمر المريض اثناء رحلة علاجه ببعض او كل هذة الاعراض لكن لفترات محددة ومن ثم يرجع لي وضعو الطبيعي. ..لكن النصيحة غالبية الناس اللاقيتهم حلوين حلا وجميلين ومليانين صحة و إبتسامات ولابسين بنفسج كمان (ودا غيّر مفاهيم كتيرة في ذهني حول المرض)...المهم يا اصدقائي اثناء رحلتي نحو الشفاء التي لم تكتمل بعد( ربنا يسهلا وتخلص على نجاح) ما جعلني اصمد واتماسك و اواصل في سكة العلاح السخيف الثقيل دا وجودكم حولي....بيوت جميلة واصدقاء حقيقيون مليانين ريد وغنا إحتوني وسندوني في اول فترة اكتشاف المرض ساندوني بقوة و ملوني محبة وقوة... وجود اصدقائي حولي و تتابع زياراتهم المُنسق الدقيق قاطعين بحور ومسافات ومقتطعين من جهدهم ومالهم و زمنهم الغالي وزمن اولادهم عشان يزوروني و يقدمو لي الدعم الانا مُحتاجاهو بحيث أنني و منذ تشخيص المرض دايماً ما يلازمني احدهم في محبة باينة و ودّ مقيم...قدر ما اشرح و اسهب في وصف شعوري ازاء تواجدكم والتفافكم هذا لن استطيع ان اوفي و اشرح... شعور اشبة بالتحليق في سموات من الرضى والحبور...اي (كانسر) يستطيع الصمود امام فيوض المحبة هذه اي مرض يستطيع الثبات امام جيوش الود وابتسامات الاصدقاء و وجودهم بجوارك...حدثني طبيبي السوداني المقيم بالامارات...انو مبسوط من روح التضامن والترابط دي ايما انبساط..و انو بعد ما قابلكم وشاف الود والمحبة والمراعاة والاهتمام... اثناء ايام العملية وزياراتي الاخري له انو غيّر رايو تماماً و بقى عندو امل كبير انو الشباب لسه بخير(شفتو أثركم المعدي الايجابي علي الآخرين؟؟؟)...عندي ونسات كتيرة معاكم لابد تتواصل ومشاوير وشاي بالقرنفل و وضحك و قرقراب وخستكات ما برضى غير اني أكملها معاكم... كل تلفون او مسج او زيارة او استيتوس في الفيس بوك عندي اشبة بقطرات مطر على ارض قاحلة... أستقبلها بشوق ولهفة وحوجة شديدة وبتعني لي حاجة كبيرة شديد (النبي ما توقفو ) و انا ماشة في سكة العلاج ورغم سخفو و عباطتو...لكن ما حفر عميقاً بقلبي ودعمني بشكل لا ُيوصف ..زيارات و تلفونات و مسجات و رسائل ورسومات اولادكم...ياخ دي محبة طاااازجة ومتصله ومتواراثة حُب مُعنعنْ وموصول والد عن ولد تلفون( عبدالوهاب معز) وهو يتمني لي الصحة....و سلام بنيات سارة تاج ...زيارة( حسن سردوب )ولد تقوى واحمد ومناغاته وجميل هدهدتو...زيارات( احمد اسعد) ولد مني المُتصلة... سلامات المحبة والاحضان من اولاد يوسف ومني حامد ...سؤال( احمد وسما) اولاد سحر و معتز و موانستهم لي ايام وجودي معهم اثناء فترة علاجي الاولي ...زيارة (قدال) ولد رحاب ومحمد وجمال ابتسامتة وذكاء حضوره...تلفون (هيلا وامير) اولاد كدودة ومايسة...رسالة ورسمة( موشا) بت توسل وعماد وتحايا (باسل) ومحبته.. قبلات وتحايا (مريومة) بت شيراز وحاتم ورسمة بدوري.....زيارة اولاد وفاء وشوقي ..و سعادتي بوجودهم وقصصهم و جمالهم جنونهم وشغبهم الجميل و انجليزيتهم الملخبطة بالسوداني (خففتو علينا البيت كيف....؟؟؟) و زيارات (مايا وزين) اولاد رانيا ومرتضي الاسبوعية وصبر(مايا )علي نسج الطاقية باناملها الصغيرة وبهذا الود ...الطاقية الملونة ال لّونت لي روحي بيها..الف شكر يا (مايا) يا حديقة....زيارة (عصومي ونصوري) اولاد منال قضل الله ...وابتسامة و صبر( نصوري) الانا استمديت منها القوة.....زيارة( مرهف) ولد اريج و معتصم... وزيارات اولاد صفوة وفتوح.. زيارات اولاد رباب صلاح ومصطفى و ويارة أولاد مبارك الجزولي... وكل من لم تسعفني الذاكرة بتذكره الان الّا ان وجوده و دعمه ساعدني وبقوة في رحلتي نحو التعافي ...ثمة علافات تكونت في هذة الفترة نتيجة لتشابة ظروف المرض او لوجدوهم الفيزكلي في تلك الاثناء...حمو وزوجتو من المغرب العربي ...سبقني في اكتشاف مرضه ومن ثم في العلاج والشفاء (لي فالو) ...زارني ليشرح لي ويدعمني ويقدم الLessons learnلو يعلم أثر زياراته هو و زوجتو والصغير سعد.....وليد النقر وسؤاله المستمر ونصايحه و زياراته...ثم قروب محاربين محاربات... وقروب (حدّو) الذي آنس ليالي المستشفي الصعبة ...اطبائي الذين تعدت علاقتي بهم الي اكثر بكثير من علاقة طبيب ومريض...لتصبح علاقات دم و أهل.. (د.عبدالرحمن) Abdelrahman Osman الذي يعاملني بود كبير و وجوده المُطمئن دايماً لي ولأًسرتي. (د. إيهم) و جميل دعمه وطِبابته.(د.مُبشر) Mobashir Ganiصديقي واخي الصغير مُمتنة لصدفة وجوده تلك الليلة نبطشي ..ماعارفة لو ما كان مداوم اليوم داك انا كنت حأنجو كيف؟؟؟...ما حاعرف اشكرو غايتو ...عشمي انو عارف انا واصدقائي واهلي و الكون بنريدو قدر شنو😍😍- تعبتا جداً في الفترة الفاتت دي جسدياً ونفسياً (و لا ازال) الاً ان اشد ألم إختبرته كان وفاة (سالمين)...شق علي الامر كثيراً ..اذا ان رسائله مازالت طازجة وصوته مازال يرن في أذني يسأل عن صحتي ويشد من أزري ويمدني بالقوة .. ألف رحمة و نور تغشاك يا طيب يا ابيض القلب يا سليم النوايا ويا جميل الروح.- تحت الطاقية دي في صلعه عظييييمة قادمة وبقوة (الله لا كسبها)...المهم كل الناس القالو لي حنحلق معاك صلعة وشنو وشنو انا حاااااااافظه كلامهم وحماسهم .... ف شنو انا شايفة تبلو راسكم غايتو😂😂امانى حدو

ربنا اشفي الاخت اماني
وانشاءالله تقوم بالسلامة

أسال الله ان يشفيها وجميع المرضى

ربنا يشفيها ويمتعها بالصحة والعافية
والشفاء من عند الله سبحانه وتعالى...
وما الامراض الا ابتلاءات ...ودائما بعد الكرب فرج..

ربنا يديك العافية

عاجل الشفاء للاخت امانى