Post: #2
Title: Re: لازالت شركة زين هي الاسوأ zain sd
Author: عبدالحفيظ ابوسن
Date: 03-10-2017, 07:14 AM
Parent: #1
براي سويتها في نفسي
بعد قطيعة شهور ولا اكتر من سنة ما بعرف
اقنعني صديق بشراء شريحة بيانات بمبلغ 150 ج
و5 قيقا شهريا ب 42 ج
وافقت وبدأت رحلة المعاناة مع زين عالم شين
|
Post: #3
Title: Re: لازالت شركة زين هي الاسوأ zain sd
Author: عبدالحفيظ ابوسن
Date: 03-10-2017, 07:19 AM
Parent: #2
تقوم الحكومة ترفع ضريبة الاتصال ل 30%
والحكومة ما احسن من زين
زين ترفع الاشتراك ل 95 ج
بدون اي مبررات وبنسبة لا تتساوي مع مقدار النسبة المستقطعة
مع انو الخصم مفروض يكون من ارباح الشركة مش المواطن
وزين دي بتكون ثاني جهة اكبر دخلا في السودان
شغالة تاكل بس
|
Post: #4
Title: Re: لازالت شركة زين هي الاسوأ zain sd
Author: عبدالحفيظ ابوسن
Date: 03-10-2017, 07:21 AM
Parent: #3
رضينا غصب
وعملنا اجراءات تقشفية
قراية بس
لا تنزل مقاطع ولا صور ولا برامج
تحافظ علي كوتك حتي نهاية الشهر
|
Post: #5
Title: Re: لازالت شركة زين هي الاسوأ zain sd
Author: عبدالحفيظ ابوسن
Date: 03-10-2017, 07:27 AM
Parent: #4
اها المعاناة وين
لامن تنتهي كوتك
تدخل الرمز للتنشيط ما يخش
تطلع الشريحة من الراوتر عشان تدخل الرمز
ما يخش
تطلع الشريحة من التلفون وتدخل شريحتك تتصل
وتتبع دخل صفر و دخل ستة وعييييك لامن يقول ليك ادخل صفر للتحدث مع احدي موظفي زين
تدوس الصفر وتقنب تسمع في موسيقي هبلة ولالال لا
مرات حداشر دقيقة
يتكرم عليك موظف بالرد
وتجاوب علي كل الاسئلة الغبية البطرحها ليك
ويسألك
فهمت !؟
تقول بشرح ليك في فيزيا الكم
|
Post: #6
Title: Re: لازالت شركة زين هي الاسوأ zain sd
Author: عبدالحفيظ ابوسن
Date: 03-10-2017, 07:31 AM
Parent: #5
اها يا المبروك نهايتو
نهايتو
ما بنقدر ننشط ليك من عندنا ونرفع ليك بلاغ
طيب امبارح رفعت بلاغ
والله ما ظاهر لي
الشبكة كعبة
طيب يعني بلاغي راح
والبمنع دة يروح شنو زاتو
شاعر انو زين غشتني واستغلتني بالتواطء مع الحكومة
الشريحة غالية وما بقدر اجدعها
ورضينا بالغلاء
|
Post: #7
Title: Re: لازالت شركة زين هي الاسوأ zain sd
Author: ايمن الصادق
Date: 03-10-2017, 07:37 AM
Parent: #3
" زين السودان ... عقلية الإحتكار ، وإدمان الإستهتار . "
|
Post: #8
Title: Re: لازالت شركة زين هي الاسوأ zain sd
Author: عبدالحفيظ ابوسن
Date: 03-10-2017, 07:43 AM
Parent: #7
آي والله يا ايمن
استهتار منقطع النظير
واكل اموال الناس بالباطل
وحرق دم
هذا شعب طيب ولكنه يتيم لا سلطة تدافع عنه
تاكل وتخلي عيرها ياكلو
|
Post: #9
Title: Re: لازالت شركة زين هي الاسوأ zain sd
Author: عبدالحفيظ ابوسن
Date: 03-10-2017, 07:47 AM
Parent: #8
حتي الآن في صفحة الراوتر 294 رسالة تقول لي خدمتك انتهت جدد
اجدد كيف عاد
وياهون دة الرد
عفوا ، لا يمكنك الإشتراك في هذه الخدمة.
عفوا دى موجعاني وجع
العفنة الما تفارقكم
|
Post: #10
Title: Re: لازالت شركة زين هي الاسوأ zain sd
Author: عبدالحفيظ ابوسن
Date: 03-10-2017, 07:54 AM
Parent: #9
زي الحكومة
بتدعم الاتصال
شوفو المحن
قالت بتدعمنا ب 50%
يعني علي حسب كلامها هي ب 145ج لكن فضل منها ساي نقصتنا
|
Post: #11
Title: Re: لازالت شركة زين هي الاسوأ zain sd
Author: sadig mirghani
Date: 03-10-2017, 12:03 PM
Parent: #1
شركة تافهة
ومجبور عليها كونها احسن الكعبين
لكن يا عبدالحفيظ انا ماواجعني الا
ناس الكول سنتر البدوهم مرتب 750
ورصيد بي 200
بالله شوف التافهين ديل
وييقول ليك المسعولية الاجتماعية
اولاد اللذين ديل بخصموها منهم اخر السنة من الضرايب
يعني لا كتر خيرهم ولا بارك الله فيهم
بالله لورفي زميل منبر شغال في زين يجينا جاي
عشان يزيل سوء الفهم
بعدين دا كوم وجائزة الطيب صالحزللابداع الروائي العالمي دي كوووم براهو
بس زي مابقولو(( عريان من طيزو ولابسلو سديري))
مالهم ومال الابداه الروائي
عروة بكتب قصص ولا الخرافي شاعر واديب
ما جوكية ساكت
يشيلو القروش. يدوها لي مركز عبدالكريم ميرغني
ابرك واخير وعندهم باع في الجائزة واقدم بخمس سنوات
واصحاب الفكرة الام
وجات بناءا توصية من الراحل الاديب الطيب صالح
رحمة الله تغشاه
لكن لقوا مدفوعي الاجر
ناس علي شمو والراحل حسن ابشر الطيب
وغيرهم وسرحوا بيهم
المهم
الحكومة تفك الاحتكار
وتعطي رخصة الهاتف السيار لي شركة الاتصالات الاماراتية
والحشاش يملا شبكتو
|
Post: #12
Title: Re: لازالت شركة زين هي الاسوأ zain sd
Author: عبدالحفيظ ابوسن
Date: 03-10-2017, 01:48 PM
Parent: #11
وبكضبو عليك
ضربت امس تلاتة مرات
قالوا
كود التفعيل فيهو مشكلة لأنهم غيروهو وبنعمل ليك بلاغ
ضربت الليلة قالوا لي
لا فترتك ما انتهت رغم انتهاء الكوتة
نشط يوم
وارجع نشط شهر
اليوم زاتو ابا
يعني
شايل لي شريحة بي 150 ج وفيها رصيد بي 100 ج
ربع مليون
وما عارف اعمل بيها شنو
حاولت اطلع الرصيد منها
قال لا يمكن
دة نهب
|
Post: #13
Title: Re: لازالت شركة زين هي الاسوأ zain sd
Author: د احمد حمدان
Date: 03-10-2017, 01:56 PM
Parent: #1
مساء الخير ابو سن
زين عالم معفن جدا لا ينفع معه الا المقاطعه
وافتكر شركة سوداني لديها القدرة على منافستها بتقوية الشبكة والاسعار الارخص لكن لا حس ولا خبر لهم
مودتي وكامل تضامني
|
Post: #14
Title: Re: لازالت شركة زين هي الاسوأ zain sd
Author: عبدالحفيظ ابوسن
Date: 03-10-2017, 02:01 PM
Parent: #13
براي يا صادق جيتهم
عرفنا سوء الخدمة
انا بقيت في الكضب والخداع
واهو مسجل عندهم
|
Post: #15
Title: Re: لازالت شركة زين هي الاسوأ zain sd
Author: عبدالحفيظ ابوسن
Date: 03-11-2017, 05:41 AM
Parent: #14
مرحبا احمد حمدان
زين عالم شين
واستغلالي
ودولة داخل دولة
|
Post: #16
Title: Re: لازالت شركة زين هي الاسوأ zain sd
Author: علي دفع الله
Date: 03-11-2017, 06:02 AM
Parent: #15
زين عالم شين
وكذلك سوداني واريبا
والمستشفيات والمحاكم.والكهرباء والموية والمرور والجوازات ومحل ما تقبل يا ابسن اخوي تلقى الجبايات وتدفع والمقابل من الدفع خدمة اتفه من التفاهة ..تخش المستشفى عشان تتبرع دم تدفع اربعة جنيه للدخول و16 جنيه للتحليل .
دفع دفع محل ما تمشي ..امس يا ابسن لقينا شرطة بتاعين المطافي قاطعين الطريق وبفتشو في العربات الماعندهن طفايات وهاك يا مخالفات ليس حبا في السلامة بل طمعا في حلب المواطنين ..
والله البلد بقت عاوزة تمشي امورها من قفانا ..
الموية زادوها والغاز وماشين في الزيادة .
غايتو يا ابسن وصلنا مرحلة يا صديقي الله يستر علينا من الزهللة
|
Post: #17
Title: Re: لازالت شركة زين هي الاسوأ zain sd
Author: عبدالحفيظ ابوسن
Date: 03-11-2017, 08:24 AM
Parent: #16
كما قال الحردلو مع التعديل
الحكومة دي ولدا قدل فوق عزو
حتي شركة زين شنو كدة ما عارف
قال ليهو النملة ام جعبات دي
|
Post: #18
Title: Re: لازالت شركة زين هي الاسوأ zain sd
Author: عبدالحفيظ ابوسن
Date: 03-11-2017, 08:36 AM
Parent: #17
مشيت الشركة عديل بي خشم الباب
اديني الرقم
اديتها
قالت لي
لكن انت ما منشط نشط اول
شفتو النضمي دة
يعني انا جاي لي شنو
عملت بليد واديتها التلفون . سجت و لجت فيهو
قالت لي
بعدين اعمل نجمة ورررر مربع هسة الشبكة كعبة
قلت ليها بتعرفو بس للردود السهلة
لامن انخلعت واستعدلت في قعدتها
انا بحاول لي تلاتة يوم
المهم مشت استشارت وقالت لي اضرب 123
قلت ليها ضربت وانا هسة جيت محل اشتريت
عرفت انو الشريحة الاشتريتها بي 150 بقت بي 3 ج
يعني الشركة الوحيدة الاسعار فيها بتنقص
يبيعو شرايح اكتر من طاقتهم ويزيدو السعر
المهم تخش وتتحول لي دجاجة تبيض ذهبا دون ضابط
|
Post: #19
Title: Re: لازالت شركة زين هي الاسوأ zain sd
Author: عبدالحفيظ ابوسن
Date: 03-11-2017, 10:57 AM
Parent: #18
قالوا هي تمنها 140 ج لكن لينا ب 70 ج
من غير ضريبة
وعما قريب حا يرفعو الدعم
محن يا طوكر
|
Post: #20
Title: Re: لازالت شركة زين هي الاسوأ zain sd
Author: عبدالحفيظ ابوسن
Date: 03-11-2017, 12:05 PM
Parent: #19
يعني موعودين بزيادة 100% ولا عزاء لنا في ظل شركة زين الاجنبية
لماذا نعجز حتي عن مقاطعة شركة اتصالات تمص دم الشعب في ظل غياب سلطة الرقابة الحكومية عليها
|
Post: #21
Title: Re: لازالت شركة زين هي الاسوأ zain sd
Author: ناذر محمد الخليفة
Date: 03-11-2017, 01:00 PM
Parent: #1
سلام ابو سن ..
انحن جبيل شن قلنا ..!!
ياما شخصي الضعيف دلق بوستات واحبار في المنبر دا في شان زين وسوداني !!
ولا حياة لمن تنادي ..!!!
|
Post: #22
Title: Re: لازالت شركة زين هي الاسوأ zain sd
Author: محمد عمر جبريل
Date: 03-11-2017, 02:58 PM
Parent: #21
أول شي زين ليست وقف خيري عشان هي تتحمل ضريبة القيمة المضافة ..
كل السلع الفي السودان لمن تتضاف ليها قيمة مضافة بتحملها المواطن الغلبان دا ..
تاني شي حول رصيد لي رقم الشريحة الموجودة في جهاز الواي فاي بس بقيمة الحزمة الإنت شغال بيها .. الموضوع ما حتاج كود تنشيط وكدا..
______________________
ممكن تخش على الآي بي أدريس الموجود في داخل جهاز الواي فاي (إذا الواي فاي النوع الصغير البتشال في الجيب) أفتح الغطى وبتلقى الآي بي أدريس
أنسخو في المتصفح بتاعك وأكتب اليوزنيم admin والباسويرد admin
لمن يفتح معاك بتلقى الإنبوكس بتاعك خش وامسح الرسايل دي كلها
لو جهاز الواي فاي الكبير بتلقى الآي بي أدريس أسفل الجهاز ..
|
Post: #23
Title: Re: لازالت شركة زين هي الاسوأ zain sd
Author: عبدالحفيظ ابوسن
Date: 03-11-2017, 04:29 PM
Parent: #22
مرحبا محمد عمر
وحبابك
طيب تلاتين في المية من 42 ج بتساوي 12.6ج مفروض تكون 54.6 مش 140 ج ولا حسب كلامهم 95 ج لانها مدعومة
يعني انا الاتحملت الضريبة كدة وخت في بالك ال 42 ج تجاهلت ضريبتها وكانت عشرة في المية
مافي زول قال انها مؤسسة خيرية
نعم
قاعد اخش علي الموقع وبقرا الرسايل
ولكن برضو التنشيط ما صار آلي زي زمان
عذرا ناذر بجيك
|
Post: #24
Title: Re: لازالت شركة زين هي الاسوأ zain sd
Author: محمد عمر جبريل
Date: 03-11-2017, 04:36 PM
Parent: #23
هلا بيك ..
برضو عادي جدا يزيدو أسعارهم .. ومن غير ما حد يستشير أي حد
زيييييييييييييهم وزي أي سلعة بتمشي تاني يوم بتلقاها زادت
|
Post: #25
Title: Re: لازالت شركة زين هي الاسوأ zain sd
Author: عبدالحفيظ ابوسن
Date: 03-11-2017, 05:19 PM
Parent: #24
مرحبا ناذر
فعلا بتذكر بوستاتك
ولازالت زين تتصدر السوء
والعنجهية والصلف
والاستغلال
|
Post: #26
Title: Re: لازالت شركة زين هي الاسوأ zain sd
Author: Dr. Ahmed Amin
Date: 03-11-2017, 09:44 PM
Parent: #25
تحياتي ود ابوسن ...بحكم بعدنا عن السودان لا معرفة لي بمستوى الخدمة المقدمة من زينبس انا كنت في اجازة اغسطس السابق ولا حظت سوء شبكة الاتصالات بالسودان عموماًوأعتقد بأن هذا الخلل ناتج من الضغط العالي على الخدمة وعدم قدرتها لتحمل هذا العدد الهائل من مستخدمي التلفونات ..بس أذكر بان اول شركة فكرت اشتري منها شريحة كانت (زين) .. بناء على نصائح أهل وأصدقاء ..ذهبت الى مكتبهم في الواحة مول وقمت بشراء 4 شرائح لي ولأسرتي ..نصحني الموظف بشراء شريحة تسمى (شباب) او شيئ قريب من هذا الإسم ..كان هدفنا الأول استخدام باقة (النت) .. وكانت متوافقة مع نظام تشغيل 4G الجيل الرابع ..والله كانت شبكة النت غاية في السرعة بما لم اشاهده خارج السودان ..وتحميل (اليوتيوب) سريع جداَ .. وحتى العيال علقوا بان النت وسرعته في السودانأسرع من الإمارات ..هذا فقط من تجربتي الشخصية وليس الأّ
|
Post: #27
Title: Re: لازالت شركة زين هي الاسوأ zain sd
Author: عبدالحفيظ ابوسن
Date: 03-12-2017, 03:56 AM
Parent: #26
مرحب احمد الامين
وحبابك
بدون شك سرعتهم جيدة .. وهذا عين ما ذكرته لهم بعد اتصالي
بعد الاتصال برسلو ليك استبيان
الحديث حول الاسعار وتعاملهم مع الجمهور
نافذة الاتصال محتاجة لمراجعة
في معلومة سمعتها ولا اقطع بصحتها انهم بشغلوا عمالة مؤقتة للرد علي الاتصال . واعتقد دة جهل بالتسويق وجشع ساي
خلي الزول البرد مؤهل فنيا من خلال الكورسات .. والزول البقعد فترة بكون خبرة
|
Post: #28
Title: Re: لازالت شركة زين هي الاسوأ zain sd
Author: Yousuf Taha
Date: 03-12-2017, 08:17 AM
شيخ العرب كيفنك
الجاتك في شريحتك سامحتك احكي ليك القصة العجيبة دي حصلت لي قبل يومين تلاتة كدة
عندي شريحة بيانات (داتا كارد) ادتني ليها زميلة واخت عشان اشغلها نت قمت نشطتها وبشتري حزمة ال 5 غيغا لي كم شهر.
اها اساسا انا صوتي بح من الاتصال بخدمات المشتركين والشكوى من سوء التغطية في محل ساكن دا طبعا برقمي الخاص ما بتخش معاي خدمات المشتركين لكن بتصل ليهم برقم خط مؤسسات تاني مركبوا في نفس التلفون.
الشهر الفات نشطت الخمسة غيغا بتاعتي وانتهت ولاحظت النت شغال لسة عشان اكون امين معاك استخدمته ليوم وقلت اكلمهم ياخ في النهاية ماصاح ناكل حرام اتصلت عليهم قلت ليهم الحاصل انو سيستمكم فيو غلط انا الحزمة بتاعتي انتهت والنت شغال من شريحة الداتا رقمها كدة كدة
البت قالت لي حظك من هنا ما بقدر اوقفا قلت ليها اللهم اني هلا قد بلغت اللهم فاشهد اشتغلت بيها اربعة ايام تاني اتصلت بيهم الدور دا لقيتو ولد قلت ليو ياود الناس شريحتي دي كوتتها انتهت وانا النت عندي لسة شغال شكله عندكم مشكلة طبعا متصل بيو من رقمي التاني خط وبرضو فيو كوتة 2 غيغا فانا قلت ليو عايز اكلمكم ودي المرة التانية
وبتكم قالت لي حظك قال لي كويس بس مافي حاجة بقدر اعملها قلت ليو خير وفي نيتي اوقفا واشتغل بالخط الفيو اتنين غيغا لانو كنت ملاوز يقصوا لي ويقومو يخصموها مني باثر رجعي لقدام لمن انزل رصيد في شريحة الداتا قفلت الخط على كدة.
بالله اتفاجاء ليك بالنت قطع من الشريحتين الداتا والخط.
رجعت ليهم قلت ليهم غلطان انا البقيت امين معاكم انتوا الواحد يديكم بالجزمة حتين تمشوا معاهو عدل قلت ليو عرفنا ديك من حقكم تقطعوا النت لانو اصلا الكوتة انتهت تقوم تقطع لي نت الخط اللي هو مارجع الاتاني يوم.
بالله دا عالم شنو دا
اسف للاطالة
وتحياتي
|
Post: #29
Title: Re: لازالت شركة زين هي الاسوأ zain sd
Author: ناصر حسين محمد
Date: 03-12-2017, 08:34 AM
Parent: #28
Quote:
بالله اتفاجاء ليك بالنت قطع من الشريحتين الداتا والخط. رجعت ليهم قلت ليهم غلطان انا البقيت امين معاكم انتوا الواحد يديكم بالجزمة حتين تمشوا معاهو عدل قلت ليو عرفنا ديك من حقكم تقطعوا النت لانو اصلا الكوتة انتهت تقوم تقطع لي نت الخط اللي هو مارجع الاتاني يوم. بالله دا عالم شنو دا
|
هههههههههههههه
اضحك الله سنك يا يوسف
الاخ عبد الحفيظ
زين مرهقة ومتخلفة
التجديد مربوط بزمن الخدمة على ما اعتقد وليس بانتهاء البيانات كما يفترض
اذكر ان خدمتي انتهت، اقصد القيقات انتهت وباقي زمن للخدمة رفضت التجديد الا تقعد الفترة الزمنية المفترضه
|
Post: #30
Title: Re: لازالت شركة زين هي الاسوأ zain sd
Author: Nasser Amin
Date: 03-12-2017, 02:39 PM
Parent: #29
سلام اب سن و الضيوف الافاضل
* سوء الشبكة ناتج عن الضغط العالي عالي الشبكة و زيادة عدد المستخدمين مع عدم التوسع في الشبكة
و ان حدث تحسين الا في مناطق الكثافة السكانية لاسباب ربحية (حساب الاجهزة و الابراج) ...
*اداريا و تقنياً كذلك سياسة الاوتسورس (Outsource) و ذلك بتحويل ادارات كاملة لشركات الاوتسورس
وذلك بتقليل مرتباتهم و امتيازاتهم و تتبيعهم لشركات اسمية تتبع للشركة الام (تحايل) و ذلك لتحقيق مكاسب و تقليل نفقات
هاجر معظم المهندسين و الكوادر.
* خدمات المشتركين (كول سنتر) تعيين الطلاب كمتدربين (ظاهر الموضوع رحمة) اما الحقيقة فهي استغلال باسم التدريب
فالمتدرب عارف مدة التدريب سنة غير قابلة للتجديد او التعيين ...(التعيين اساساً موقوف في الكول سنتر) لانو لاقين البديل الرخيص.
عشان كده خدمات المشتركين اصبحت سيئة...
|
|