خصوصا الناس ممن توفرت لهم الفرصة لدراسة الجامعات والمعاهد العليا
تنطبق عليهم الآية ولقد خلقنا الإنسان في كبد من ناحية ومن ناحية أخرى والأهم من أن تجالس أحدهم حتى تكتشف وجود علاقة ما تربط به إما صديق مشترك أو قرابة أو صداقة مع قريب لك أو له /ا الخ آخر العلاقات
هل السودان كان ضيقا وقتها أم كان الحراك الإجتماعي والثقافي حاضرا في حياة الناس
Post: #2 Title: Re: مواليد الستينات Author: حمد عبد الغفار عمر Date: 03-08-2017, 06:06 PM Parent: #1
حضروا نهايات الحياة السهلة البسيطة في طفولتهم واستمتعوا بوقت ليس بقصير بما توفر حينها من ملذات خاصة أيام الديمقراطية ولكن وقع عليهم كاهل معايشة ضنك الحياة وحياة الغربة وهم في مفترق مرحلة الشباب الثائر لذلك تجدهم أكثر أجيال السودان احباطا من مآلات الحال الماثل
Post: #4 Title: Re: مواليد الستينات Author: حمد عبد الغفار عمر Date: 03-08-2017, 06:53 PM Parent: #3
كيف مالي يا أبوسن ياخ دا جيل عجيب تحس إنو مالي السودان دا لي عينو أقول ليك حاجة انت تحديدا لاقاني زول قريبي في الرياض دي لما غرقت معاهو لقيتك في الجك هسه لو قالوا ليك حمد دا في شيء بلمك معاهو بتصدق ؟ بحكي ليك بس هسه طالع مشوار لحدي ما أجيك بخليك مع حوش ناس البكري في العزيبة .
كدي جرب في الفيسبوك شوف أي زول في القائمة حقتك وأمشي شوف قائمة أصدقاهو
السلام عليكم يا حمد نعم جيل الستينيات شقاوة شديدة يا أخوي كان مكضبني أسأل ود أب سن، الفضلابي وعاصم ____ الحليلة
Post: #10 Title: Re: مواليد الستينات Author: محمد الأمين موسى Date: 03-09-2017, 05:45 AM Parent: #9
جيلنا يا حمد أبدا ما محظوظ: 1 - دخلنا المدرسة سنة 70 مع السلم التعليمي الذي كان بداية انهيار التعليم في السودان. 2 - ترعرنا في كنف ديكتاتورية نميري. 3 - لم نكن محظوظين مثل الأجيال اللاحقة لنا فحَرمنا من البامبرز! (على الرغم من بقاء الفرصة لمن تطاول به العمر ليجرب مقاس 6) 4 - عندما وصلنا مرحلة الجامعة في الثمانينات، بدأت الجامعات - وعلى رأسها جامعة الخرطوم في التدهور من حيث الخدمات والراحات. 5 - وعندما تأهلنا لسوق العمل كان السودان طاردا ولا مفر من الاغتراب.
الحسن الوحيدة، أننا لم نرهق أولياء أمورنا في الدراسة: فلا رسوم ولا دروس خصوصية.
Post: #11 Title: Re: مواليد الستينات Author: عبدالحفيظ ابوسن Date: 03-09-2017, 06:03 AM Parent: #10
اوووو الحليلة وينك غاتس يا حمد جيلي انا آخر حائط صد لجعل السودان يحتفظ بذات صفاته نحن آباء اليوم سأعود الله يصلح المزاج والحال
Post: #12 Title: Re: مواليد الستينات Author: عبدالله ود البوش Date: 03-09-2017, 06:08 AM Parent: #11
وتد خيمة نصفه في الارض وعنقه في الحبل وراسه للسندال
Post: #13 Title: Re: مواليد الستينات Author: درديري كباشي Date: 03-09-2017, 06:38 AM Parent: #12
هاك يا حمد حكام العالم من مواليد الستينات
1- أوباما 2- بشار الأسد 3- الملك عبد الله ملك الاردن
وهل من مزيد ههههههههههه
Post: #14 Title: Re: مواليد الستينات Author: حمد عبد الغفار عمر Date: 03-09-2017, 07:09 PM Parent: #13
هلا عاصم علي
هاك دا منقول
(نحن جيل الستينات جيل لم ينهار نفسياً من عصا المعلم .. ولم يتأزم عاطفياً من ظروف العائلة .. ولم تتعلق قلوبنا بغير أمهاتنا .. ونحن جيل لم ندخل مدارسنا بهواتفنا النقالة .. ولم نشكو من كثافة المناهج الدراسية .. ولا حجم الحقائب المدرسية .. ولا كثرة الواجبات المنزلية نحن جيل لم يستذكر لنا أولياء أمورنا دروسنا .. ولم يكتبوا لنا واجباتنا المدرسية .. وكنا ننجح بلا دروس تقوية .. وبلا وعود دافعة للتفوق والنجاح .نحن جيل لم نرقص على أغاني السخف .. وكنا نٌقبل المصحف عند فتحه وعند غلقه .نحن جيل كنا نلاحق بعضنا في الطرقات القديمة بأمان .. ولم نخشى مفاجآت الطريق .. ولم يعترض طريقنا لص ولا مجرم ولا خائن وطن .نحن جيل كنا ننام بدون الكهرباء في فناء المنازل .. ونتحدث كثيراً .. ونتسامر كثيراً .. ونضحك كثيراً .. وننظر إلى السماء بفرح .. ونعد النجوم حتى نغفو ..نحن جيل كنا نحرك كفوفنا للطائرة بفرح .. ونٌحيي الشرطي بهيبة .نحن جيل كان للوالدين في داخلنا هيبة .. وللمعلم هيبة .. وللعشرة هيبة .. وكنا نحترم سابع جار .. ونتقاسم مع الصديق المصروف والأسرار واللقمة )
غايتو حسب شوف عينى و سمع اضانى الشنب ما قاعدين يلحسو سلام ليك يا حمد ولى جيل الستينات
Post: #16 Title: Re: مواليد الستينات Author: حيدر حسن ميرغني Date: 03-09-2017, 07:44 PM Parent: #15
غايتو كلام محمد الامين ده ينطبق علي شخصيا بنسبة ٩٩٪ كواحد من مواليد منتصف الستينات لم نكلف والدينا مليم واحد في التعليم حتى مرحلة الجامعة خارج السودان _ ود المدير اوعا تجي تتسلبط في دفعتنا دي :))
Post: #18 Title: Re: مواليد الستينات Author: حمد عبد الغفار عمر Date: 03-09-2017, 07:54 PM Parent: #16
مرحب زين العابدين الحليلة
جيل شقاوة فعلا عشنا حياة بتفاصيل صارمة محفورة في ذاكرة لا تصدأ نتذكر حتى زملاء الإبتدائي والثانوي العام
Post: #17 Title: Re: مواليد الستينات Author: Asim Ali Date: 03-09-2017, 07:50 PM Parent: #14
التحيه ليك الاخ حمد صدقت والله تلك ايام عندما يشتيد الشوق اليها يغص الحلق بالعبرات ويغرق الدمع المآقى لو تحدثنا عنها وعن دفئها نحتاج الى كتابه اسفار واسفار التكنولوجيا والعولمه رمتنا باسوء مافيها - اصبحنا جزر معزوله وقيمه الاخر هى المال او السلطه - وحتى الابتسامه فقدت اثرها لانها لاتخرج من القلب اصبحت كانها قناع من خشب الثقه بالنفس كانت من سمات الطالب تلك الايام - انا ابن معلم ولا اذكر اننى لجأت اليه ليشرح لى ولو حتى درس واحد والان الشباب حتى فى الجامعه يسعى للدروس الخصوصيه - وكان الكبير مهما كان بخلاف الاب معلم او جار او حتى عابر سبيل كلمته له احترامها بوجود الكبير يسود الاحترام حيثما كانالجميع كان يجتمع على صينيه الغدا حتى لو كان سخينه - احساس التواصل ودفء الاسره - الان ظهرت حاجه اسمها ساندويتش خلت كل واحد لايهتم بلمه الغدا اوحتى العشا وبسمع من ناس انهم احيانا ماتلاقى اخوك او اختك السكن معاك فى البيت كم يوم آه يازمن
و انا المجنون بذلك المليون ميل مربع ... و شكري لك و انت تنكأ الجروح المزمنة ...
بقول ليك و للجمع الجميل هنا ...
الزول المسكون ... و أقول مسكون و انت ضيف ليها بي أي حاجة ...
عمر الطيب الدوش قال :
حأسأل عن بلد رايح وافتش عن بلد سايح واسأل عن امانينا اللي ما بتدينا صوت صايح وأسأل وين مخابينا إذا جانا الزمن... لا فح واسأل عن بلد مجروح وعارف الجارحو ليه جارح وابكى على بلد ممدوح وعارف المادحو ما مادح واحلم بي حلم مسروق لا هو الليلة لا امبارح أعلق في جناح سفري خطابات لي زمن فجري وادخل من درب سري لكل مضاجع الأحزان واضفِّر من شجر بلدي بروقاً مارقة من صدري حأسأل عن بلد غاطٍ لحدِّ الليلهْ في الوجعة أَنط فوق سرجي واتْحزَّم أقوم من وقعة لي وقعة أخُتْ ايدي البتوجِعْني على السأم البراجِعْني واسأل.. يا وطن يا بيتنا ليه شوقك مواجهني ليه حبك مجهجهني وليه تاريخ زمن خسران موكّر لسَّه في شجني؟
ويقوم يجي ( المسكون ) التاني و يخت لحن عجيب و يقول :
Post: #20 Title: Re: مواليد الستينات Author: حمد عبد الغفار عمر Date: 03-09-2017, 08:03 PM Parent: #17
هلا محمد الأمين
انت لخصت مراحلنا العمرية بشكل دقيق
بس نحن محظوظين في أننا حضرنا بداية الانفتاح العالمي وبداية ظهور الحياة العصرية الرصينة موش الخليعة وأيضا واكبنا توهج عمالقة الفن وردي ومحمد الأمين وابو عركي وظهور مصطفى سيد أحمد
Post: #21 Title: Re: مواليد الستينات Author: حمد عبد الغفار عمر Date: 03-09-2017, 08:47 PM Parent: #20
جيلي انا آخر حائط صد لجعل السودان يحتفظ بذات صفاته
يا ابو سن الجملة دي ما ساهلة بتحمل كل ما حملناه على كاهلنا
Post: #22 Title: Re: مواليد الستينات Author: محمد على طه الملك Date: 03-09-2017, 09:30 PM Parent: #21
كلما أقول في نفسي هسه عمر البشير دا ميزتو شنو عشان يحكم سبعة وعشرين سنة ؟ قدر ما قلبتها أبت تجي معاي كلو كلو .. تصدق بوستيك دا فيه الاجابة.. جيل 95% منو خارج البلد.
Post: #23 Title: Re: مواليد الستينات Author: حمد عبد الغفار عمر Date: 03-10-2017, 08:46 AM Parent: #22
ود البوش
ملخبتين لخبتة شديدة الواحد بقى ما عارف رأسو من قعرو
هاك حت التويستي هنا
Post: #24 Title: Re: مواليد الستينات Author: حمد عبد الغفار عمر Date: 03-10-2017, 04:53 PM Parent: #23
مرحب درديري
أوباما بالله دا ود حفرتنا وحكم الولايات المتحدة كمان - الدنيا حظوظ
ماردونا برضو من جماعتنا
Post: #25 Title: Re: مواليد الستينات Author: حمد عبد الغفار عمر Date: 03-10-2017, 05:00 PM Parent: #24
يا جلالدونا كيفك
منو القال ليك الشنب ما بلحسو كدي شوف الأسد دا الغنماية دي لحستو كيف
Post: #26 Title: Re: مواليد الستينات Author: حمد عبد الغفار عمر Date: 03-10-2017, 07:39 PM Parent: #25
مرحب حيدرنا
قرينا ملح عديل يا حيدر ما عدا القليل عندنا قريبنا بعد اتخرج من الجامعة جاء السعودية في أول إجازة الحاج قال ليهو يلا أدفع خسارتنا قال ليهو خسارة شنو كمان والله أديك 100 دولار إلا تمشي تتسلف حتى ترجع لي الباقي
Post: #27 Title: Re: مواليد الستينات Author: حمد عبد الغفار عمر Date: 03-10-2017, 09:37 PM Parent: #26
مرحب يحيى قباني
ياخ نجضتنا نجاض عديل
الدوش ووردي ديل النار الما بعقبها سم الكلمة واللحن يخلوك غمران
تعرف اللحن بقع تحت فئة بناديها ومرحبا يا شوق والحبيب العائد ووأسفاي
والله أنا يا يحيى قاربت العشرين سنة غربة من جيت كل يوم بسأل نفسي سؤال إنو كيف أنا قادر استحمل اعيش بره السودان ولو سنة واحدة اشتهينا أي حاجة حتى غلاط سوق الخضار والجزارات وونسة الميكانيكية وتلاميذهم في المنطقة
ربك يهون
ويا شوق مالك أما كفاك عذابي
Post: #28 Title: Re: مواليد الستينات Author: ابوحراز Date: 03-11-2017, 07:34 AM Parent: #27
غايتو في الغربة دي مواليد الستينات نجضونا نجااض وعذبونا عذاب الويل تلقى الواحد لابس ليهو نضارة سميكة ورابطها بي حبل.. كباية الشاي الا تمسكها ليهو في يدو.. وبعد مايكرطع الكباية يختها جمب السرير .. يقوم من السرير يشوت ليك الكباية دي شوتة واحدة .. لحدت ما تصل المغسلة يلحقها في المغسلة عشان يرفعها مايشوفها .. ويشوتها تاني .. وفي النهاية تتكسر .. وتبقى انت تلقط في القزاز المكسور .. اما لو بدا يحكي ليك قصة .. عليك ان تتشهد .. وتقول انا لله وانا اليه راجعون.. مراسيلهم برضو كتيرة ومسيخة في الغربة .. ياولد جيب شاي .. ناولني الحقة .. حبوبي حقات الضغط وين؟؟؟ كدي شوف لي الرقم بتاع الولية دي .. ماذكرته اعلاه هو قطرة من محيط جمال هذا الجيل والقه.. جيل من النادر ان يتكرر .. لازالوا يحتفظون بالقيم النبيلة .. وكل معاني الجمال والحكمة والالق .. قلوبهم فسيحة وواسعة وشاسعة وممتدة وخصبة ومغسولة بالحليب .. لديهم مباديء لا تتزحزح .. وذوقهم الفني من فرط جماله .. يكفي لان يحول المشاعر لخيوط من الضوء .. واجمل مافيهم احساسهم بالمسئولية .. فالاحساس نعمة كبيرة .. هو جيل التضحيات والثورات .. جيل مشبع بحب الوطن والمكان .. حتى اللص فيهم تجده كتلة من المشاعر .. فعندما بكى احد الركاب في الحافلة المتجهة الى كوبر .. وقال ان القروش التي جمعها لعلاج امه نشلوها .. قام النشال من مقعده بارجاع المبلغ فورا .. بل وزاد عليه بان اعلن تبرعه للمساعدة في العلاج.. بينما قبل سنة تم القبض على نشال في زي امراة فاساء للنساء وللرجال ولابناء جيله .. ولكن رغم هذا وذاك.. يعاب على جيل الستينات انهم لم يشيدوا جسرا بينهم والاجيال التي تلتهم بغية ان ينقلوا ايقوناتهم الجميلة على سطح قلوب هذا الجيل .. وياخذوا مواطن الجمال والمعرفة والاستنارة من الجيل الجديد .. واعتقد ان هذا لو حدث .. سنخرج بخلطة ونكهة عجيبة اقلاها قتل الاحباط الذي لحق بهؤلاء وهؤلاء
Post: #29 Title: Re: مواليد الستينات Author: حيدر حسن ميرغني Date: 03-11-2017, 08:11 AM Parent: #28
حرام عليك يا ابوحراز نحن لسه في خريف العمر وليس تخاريفه زول الخمسينات في الالفية دي لسه شباب ومتقد الذهن ونشيط وبجيب عيال كمان :)) بل مرغوب في الشغل اكثر من البرينسات حتى نظارات النظر مابستخدموها كلامك ده بزعل ود المدير البنقذ من براري كندا لي امريكا مثل عتوت السرة :)) ده جيل العطاء ياخ .. قول غير كده
Post: #30 Title: Re: مواليد الستينات Author: طلحة عبدالله Date: 03-11-2017, 08:22 AM Parent: #29
Quote: لأسد لما يكبر الدكتاتورية بتمعط شنبو
لا لتحوير الأمثال الشعبية يا جيل الستينات
Post: #31 Title: Re: مواليد الستينات Author: عبدالحفيظ ابوسن Date: 03-11-2017, 08:22 AM Parent: #29
اهو طلعنا قرايب شفت كيف رسلت ليك في الخاص داير أكتب وغالبني والجوف يطقطق بالكلام
Post: #32 Title: Re: مواليد الستينات Author: حمد عبد الغفار عمر Date: 03-11-2017, 10:14 AM Parent: #31
مولانا الملك
ناس عمر البشير كانوا عارفين تماما إنو الجيل دا خطر عليهم لأنو بيعرف كيف يهز العروش لذلك كان لا بد أن بغادر وقد كان وخلوها زي فترة الرياضة الجماهيرية انقطاع تام عن الجيل الذي يليهم على كافة الأصعدة
Post: #33 Title: Re: مواليد الستينات Author: حمد عبد الغفار عمر Date: 03-11-2017, 01:18 PM Parent: #32
هلا أبوحراز
اوفيتنا تمام ورشيتنا في نفس الوقت ياخ ما للدرجة دي لسه فينا شعلة لم تنطفي
ومعاك تماما في عدم وصل جسر مع الأجيال التي تلت ودا أسبابو كتيرة منها انو جيلنا كسح في وقت حرج ومعقد جدا وترك الجيل البعدو يرزح تحت نير المشروع الحضاري وثقافة الحرب لذلك اصبح القاب واسع في كتير من النواحي لكن برغم دا حاليا ظهرت صحوة ممتازة في أوساط الاجيال دي وبدأو يدركوا مخاطر الطريق الماشين فيهو نأمل قيام حركة تصحيحية ترجع الأمور إلى نصابها
زي ما قاعد اقول زمان الناس بتحج مرة واحدة . وندر ان تجد شابا حج . فالحج يعني طريق اللاعودة نحو الخطيئة . والخطيئة لا تعدو كونها شرب الخمر او الزني الزول القروشو بتكتر بعمل مزيرة ولو زادت شوية بعمل فصل في مدرسة ولو كترت ببني مدرسة ولا جامع مافي تكالب علي الدنيا ولا جشع حتي للعهر قوانينه واحترامه للمجتمع اذكر تماما اثنين من الفاتحين بيوت في كوستي ويعرفهم جميع اهل كوستي . شفتهم بجو بيوت العزاء لافين عممهم يشيلو الفاتحة وما بقعدوا بمشو طوالي . رغم انو الناس بتطلب منهم الجلوس وبعاملوهم بإحترام حكي لي صحبي ما يجي عباس الدسيس بي هنا حكي لي دخل بيت دعارة وهو بالعالي . شافتو ست البيت نهزرتو وطردتو البجيبك البيوت العفنة دي شنو . والله اشوفك مرة تانية اكلم ابوك قيم وضوابط تحمي المجتمع دون اتفاق الحكومة تحترم شعبها يطلعو مظاهرة يرجع سعر السكر بريق الاشتراكية يشلع حركة الادب والمكتبات مذدهرة في ذلك الوقت جئنا شهدنا السودان
Quote: حكي لي صحبي ما يجي عباس الدسيس بي هنا حكي لي دخل بيت دعارة وهو بالعالي . شافتو ست البيت نهزرتو وطردتو البجيبك البيوت العفنة دي شنو . والله اشوفك مرة تانية اكلم ابوك
يا حفيظ ... عمك إبراهيم روثمان كان بقعد الشباب في البرندة البي غرب البيت عشان ما يشوفوا اعمامهم داخلين الصالون الكبير ... *
شكرا اخي حمد لفتحتك هذا النفاج من التواصل بين جيل الستينات جيل مميز وعاصر اجمل واسواء حالات البلد والان يعاني هزيان الانهزام الممنهج والحسرة ..فعلا جيل عايش وشاهد كل مؤسسات البلد الخدمية من والي والان بح لاشئ ..في مدرسة الاموي المتوسطة بالمتمة درسنا واتعلمنا وكان البيت الداخلية مجمتع كبير ومن شتي نواحي المنطقة انصهار وتعايش وطني حقيقي ووعي في الثانوي في عطبرة درسنا وكان البيت الداخلية فيها كل شئ وفي فترة الاجازة يصرفو لكل واحد قروش مواصلات من اقرب مدينة تصل لها وحتي قريتك واو وجهتك اي ان كانت .كان الوعي والمعرفة والاحساس بالوطن عالي والان تداعي كل شئ امامنا ونحن عاجزين ياخ بوستك موجع كل الود لك
Post: #40 Title: Re: مواليد الستينات Author: حمد عبد الغفار عمر Date: 03-12-2017, 08:14 AM Parent: #39
