حول زواج الفتاة دون ولي

09:45 AM March, 08 2017

سودانيز اون لاين
عبدالحفيظ ابوسن-no where
مكتبتى
رابط مختصر

موضوع التعديلات الدستورية
وشرعية زواج البنت دون توفر شرط الولي
رغم ان الولي شرط من شروط صحة الزواج في الاسلام
ورغم انو برضو قد يأتي احدهم داعما قوله من خلال الاسلام نفسه بعدم اشتراط ولي
دة كلو ما داير اخش فيهو
داير اتكلم بفهم سوداني
فهم سوداني يخصني وقد يتفق معي او يختلف معي آخرون

هنا في كوستي عشان أكون دقيق كنموذج لمعظم المدن السودانية دون الخرطوم . الخرطوم دي حقها براهو عشان فيها الجماعة كلهم وديل حقهم براهم .. يستنون ويقرون ما لا يشبهنا

ختان انجاله
عرفت معني كلمة ختان و انجال قبل دخول المدرسة
ختان الانجال من الافراح التي تشيع الفرح داخل المنزل . ومن الفرح بتعرف اهلك
الختان احتفال يستمر كم يوم .. توزع الكروت له يتصدرها اسم الاسرة
محمد علي ابوسن واولاده
يتشرفون بدعوة سيادتكم لتناول المرطبات بدارهم .....
والعاقبة عندكم في المسرات
دون مقاطع شعر ساذجة سمجة او غير ساذجة ولا سمجة
بدون صور
تتشابه الكروت
لا كروت دعوة فخمة ومذهبة
كرت عادي جدا بوستر
والمشاعر فرحة دافئة
مشاعر المعازيم واهل المناسبة
رغم عن بساطة ولغة الدعوة
البنات يدقن في الدلاليك قبل كم يوم من الطهور
بدقن بنات البيت والجيران وكل يوم بكترو
يأتي اهلنا من البلاد البعيدة لحضور الختان
تنحر وتذبح الذبائح
ومش كدة وبس
وفيها فنان ب الليل
افضل من عرس اليوم
الناس فرحانة
وود الطهور زاتو فرحان يقبض في القروش . واصحابو يسرقو ويجيبو ليهو . والمسروق يدفع حتي يرجعو ليهو حاجتو .. وهي شمن الحاجة
غنماية ولا صاج عواسة ولا كانون ولا جدادة
الختان فرح وبهجة

افراحنا شحيحة نكسر بها بساطة حياتنا الفقيرة
مافي غيرهم يا طهور ولا عرس
ولا حج
او العيدين
وحتي الزمن حقهن معروف
يقول ليك في رجب
ما بنعملو في الويحيد ولا قصير
وكل شهر يصاحبه وصف
افراحنا تمثل تماسكنا الاسري
وتماسكنا المجتمعي
بالمشاركات الوجدانية والعينية والمالية
وبل حتي المشاركة في اظهار الفرح
حقيقة هو فرح حقيقي
فرح سوداني باذخ

اها العرس دة كلامو تاني
اكان لي بت
ولا
ولد

غتي قدحك
ما حضرناها لكن بحكوها لينا
ما كل الاسر
في اسر بتلزم اولادها بالزواج من بت عمو ولا اهله الاقربين
إلزام وإلا العزلة له ولاسرته الجديدة
وتحور الامر
من إلزام لي شرط الموافقة وهذا الامر موجود حتي اليوم
فالزواج يخص كل الاسرة وبدرجات متفاوته
حتي اليوم
الاسر بتسأل وبشكل سري عن اسرة العريس او العروس
نعم اختلفت القيم ونوعية الاسئلة
اكتر من مرة بجيني زول او يضرب لي ومرات ما بكون عندو علاقة بكوستي ولا بعرفو
يسأل من اسرة . وبختها لي بالواضح الموضوع سري ويخص النسب
ويسألني من معلومات محددة جدا
وارد بنفس التحديد
قدر الطلب
ولا اتبرع بمعلومة زايدة او راي
فقط احيانا مع تكرار الونسة اقول ليهو
الامر مقضي قبالك

نعم في شباب تزوجا دون موافقة اسرهم
ودفعو التمن
والتمن دة مربوط بالزول
من يقيم وزنا للروابط الاسرية وحريص علي علاقته بأسرته سيكون الثمن فادحا له
والعكس
في زيجات كانت عدم موافقة الاسرة سببا في الطلاق
وبعضها استطاعت الزوجة غير المرضي عنها اكتساب ثقة الاسرة الممتدة بعد سنوات
وبعضها استمرت القطيعة لي جنا الجنا

في برضو بنات برفضن الزواج
واحدات في اطار الاسرة وفقا لطبيعة اسرتها
لو عرستو لي بنتحر
او ترفض الزواج بعناد او ما للمرأة من دهاء
وقليلات حسب سمعي ومعايشتي يتزوجن من خلال القاضي يعني دون موافقة الولي

يعني لو جينا كوستي ،
ح تستقبلنا إستقبال الملوك ،
أشواقي ،
،،،







عزالدين عباس الفحل
ابوظبي

بس انت تعال يا عزالدين
هو نحن لاقينك ياخ

الناس بتحتفي بتراث الشعوب الاخري غير المتمدنة . ذلك التراث المفارق للواقع الحالي كأنه اتي من سحيق التاريخ
ويدافعون عنه دفاعا مستميتا
وانا معهم
بحسبان ان التعامل مع التراث لايتم بالقهر ولا القوة . بل له قوانينه وشروطه الداخلية التي تؤثر فيه بشكل منساب وطبيعي
وكما نري في واقع التراث السوداني مثلا في الزواج . كأنها مؤامرة واعية او غير واعية . يتم تدميرها كل حين
تحولنا لمسخ مشوه من زيجات افرنجية ومصرية و خليجية .
نرقص علي انغام لا تمت لنا وجدانيا . وقد كانت يا عديلة يا بيضا تستخف الكهول والشباب وترسخ في ذاكرة الاطفال وتشبهنا

الامر ليس لدرجة الازمة
تتزوج البنات والاولاد عموما في السودان برضاء وموافقة ومباركة الاسر التي يقبع الولي داخلها كان ابو ولا عم ولا خال وابن عم او اخ
فالزواج في السودان يشبه السودان .. تترابط فيه الاسر
تلك الاسر التي لا يخرج منها البالغ بعد عمر معلوم من منزل والده
بل يسكن الزوج في بيت والده
ويسكن في بيت نسابته
ويعد في بعض الدول سكني البالغ مع اسرته كأنه مذمة له
انا في تقديري
الزواج اضافة حلقة في سلسلة مترابطة هي سلسلة الاسرة والمجتمع
لم يقف عدم رضاء الوالي عثرة في طريقة الزواج
وحديثا كان الزواج معروفا قبل ان يتقدم للخطبة نفسها
بل تكون الخطوبة اجراءا شكليا
صارت الاسر اكثر تفهما ووعيا
وكذلك البنات اكثر وعيا
هذه معركة اظنها تخفي تعمية وشغلا للناس عن واجباتهم

ف شنو
كان بت كان ولد
عارفين انهم ممكن يتزوجو بواسطة القاضي
وعارفين تعقيدات الامر دة ومآلاتو
يتزوجوا برضاء الطرفين ودون موافقة الولي وبشكل قانوني

حاليا معظم الآباء في المدن تلقوا تعليما متوسطا علي ادني تقدير . وهم اقل انغلاقا . وعلاقتهم بأولادهم اكثر انفتاحا ودة حكم الواقع
مثلا تربية والدي لاشقائي الاكبر تختلف عن تربيته لي مثلا كأبن اوسط . وتختلف عن تربيته لاخواني الصغار
اختلاف بين . وهذا الاختلاف رغم خصوصيته لاشقائي الاصغر ولكنه صار سمة شملتنا جميعا
هذا هو الواقع العنيد الخارج عن رغباتنا الذاتية . ان تسير مع موجته او تنتحر اجتماعيا
الآباء لهم سعة من الفهم ان يعرفوا
افضل تعرسو من الفضيحة
كثيرا ما تسمع مثل هذا القول لأب متعنت
ويقفز السؤال في رأسي
ليه العوة دي
الدستور دة محتاج لمراجعات اهم تمس بشكل مباشرة طريقة حكم الناس
لماذا

ابوسن لك التحية
اوافقك ..في عادات سودانية اصيلة وتعني بالترابط الاسري و الاجتماعي مفروض ما يهبشوها و يشوفوا ليهم موضوع تاني
وانا اعتقد الموضوع انصرافي ومقصود...

مأذون بيسأل ابو البنت :هل هي موافقة؟؟
قال الأب :انت لسه عايش من الزمن داك، هي موافقه قال ! دي هي اللي جابتو
اسألني انا موافق و ل لا؟ مش يمكن هي غصباني عليه

مرحب ناصر
سأعود لك

التحية للاستاذ ابوسن ولضيوفه الكرام

:::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::
وود الطهور زاتو فرحان يقبض في القروش . واصحابو يسرقو ويجيبو ليهو . والمسروق يدفع حتي يرجعو ليهو حاجتو ..
وهي شمن الحاجة غنماية ولا صاج عواسة ولا كانون ولا جدادة الختان فرح وبهجة
::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::
يا سلاااااااااااااااااااااااااااااااام يا ابوسن ياخ
ذكرتنا بأيام لها ايقاع وذكريات مريحة
فرحة الختان بتكون فرحة كل نديد في الحلة
يعلم الله كل الندايد في الحلة بنوموا سبعة أيام
متواصلة مع النديد المطهر حتي يوم المرقة
كلها ضحك وونسة ومقالب لذيذة.
كان هذا الفرح و الترابط والحميمية من أجل
النديد.
فما بالك بفرحة الاهل؟؟؟؟

مرحبا ناصر
الزواج في السودان مناسبة فرح عامة . تخص اهل العريس والعروس .
والجيران والاهل
ويتم تكبد المشاق للمشاركة فيها
يحرص الاهل علي تبليغ اهلهم ومعارفهم قبل فترة خوفا من اللوم . ويتم برضاء واريحية
من المنطق السليم نقول ان الزواج امر يخص العريس و العروس بل هذه حقيقة . نعم هو كذلك ولكنه يخص الاسرة وفقا لطبيعة علاقاتنا الاسرية

مرحبا علي
وحبابك
سأعود

أهلا بالمك ود اب سن

موضوعك غني ومليان

ما تنسى تعليق الأخ ناصر (((((((وانا اعتقد الموضوع انصرافي ومقصود)))))))))))

لما ترجع ليهو حتكون رجعت لي

خلاص مشاكلنا كلها انتهت بس فضلت حكاية الزواج بالتراضي ؟؟؟

ناس تحــف

أحمد الشايقي

سلام
من يقيم وزنا للروابط الاسرية وحريص علي علاقته بأسرته سيكون الثمن فادحا له والعكس
(الحرية نور ونار فمن اراد نورها فليصطلي بنارها)
أتمنى مزيد من القوانين التي تمنح حرية الاختيار
الشخصي..بدون تدخل وصي..وهذا القانون بداية
لحل كثيرا ما المشاكل اولها الاطفال مجهولي الهوية ومشاكل الاغتصاب..والعبودية..وبداية فترة يتحمل
كل شابة وشاب المسؤولية الكاملة
بعيدا عن ما وجدنا عليه الاولين...

عذرا للرد الراتب
حبابك عمر
الحديث حول الواقع من خلال معايشتي . دقتو مربوطة بتجربتي فقط .. سماع ومشاهدة
ما شايف في مشاكل رفض لزوج من قبل الاسر ..
بل ترحب الاسر لمن يتقدم لها
في احجام عن الزواج
الاطفال مجهولي الهوية عندها علاقة مباشرة مع الواقع السياسي الاقتصادي
في حرية اختيار مطلقة

مرحبا ناصر
الشايقي
فعلا انصرافي
وفي ظني هو افتراض امر عير موجود

ابو سن جمعتك مباركة

تحياتي يا عمنا عبد الحفيظ


حيرونا !

وانت طيب فرح
هههه
مالك مضيقها
الا الجمعة بس يعني