طرفة من أهلنا

طرفة من أهلنا


03-07-2017, 07:12 AM


  » http://sudaneseonline.com/cgi-bin/sdb/2bb.cgi?seq=msg&board=490&msg=1488867148&rn=3


Post: #1
Title: طرفة من أهلنا
Author: ولياب
Date: 03-07-2017, 07:12 AM
Parent: #0

06:12 AM March, 07 2017

سودانيز اون لاين
ولياب-الرياض
مكتبتى
رابط مختصر

التحية للجميع ، ومشتاقون وقد بعدنا خلال الفترة الأخيرة من المنتدى للمشغوليات ، وتفاديا لأمراض الضغط من جراء بعض المشاركات والنزاعات والاختلافات والمهاترات التي لا تسمن ولا تغني من فكر .

والمهم قلنا نفرفش معكم :-

عندنا في حلفا الإمام كان يصلي بالناس صلاة الفجر وكان يقرأ قوله تعالی :فألقاها فإذاهي حية تسعی..
فسقطت أمامه حية من السقف وكان سقف المسجد خشبيا فسكت الإمام وهو ينظر للحيه وهي قريبه منه.. احد المصلين خلفه ظن أن الإمام نسي فاكمل له الايه: خذها ولا تخف سنعيدها سيرتها الأولی..

الإمام قال ليهو تعال شيلها أنت..

Post: #2
Title: Re: طرفة من أهلنا
Author: علي عبدالوهاب عثمان
Date: 03-07-2017, 09:11 AM
Parent: #1

ولياب أننقا .. مسكاقمي ..
أخونا مجدي الحلفاوي في جدة ( الهنداوية ) أشهر محل فول في الحارة
عبارة عن منتدى للنوبيين .. وخاصة في ليالي الخميس والجمعة ..
مجدي الحلفاوي نموذج للنوبي الليبرالي التربال الجميل العفوي ..
في رمضان ذهبنا سوياً في المسجد لصلاة العشاء وهو بحكم عمله يقصر في التراويح
وفي المسجد إمامين بالتناوب ( كل ليلة إمام ) أحدهم يطول جداً في الصلاة ويقرأ السور الطويلة
جلسنا أنا ومجدي في إنتظار قدوم الامام ..
مجدي ينظر إلى باب ليعرف من الامام ؟
ومن حظه دخل علينا امام السور الطويلة .. تجهم وجه مجدي ..
ربما نسي مجدي أنه في المسجد وأبدى تزمره بجملة لن أنساها ( ملة أهلو .... الخرابة دا جا )
لم أتمالك نفسي من الضحك .. حتى إلتفت إلينا البعض ..
مودتي ولياب .. وتحية للزول الاصيل مجدي فاكهة مجالسنا ..

عوداً حميداً .. ووأننقا

Post: #3
Title: Re: طرفة من أهلنا
Author: عبدالله ود البوش
Date: 03-07-2017, 09:26 AM
Parent: #2

مسكاقمي ليكم الاتنين ولياب وعلى عبدالوهاب
ومن محاسن الصدف طلعت قافية ملحنة
.
.
دي لا نكتة ولا طرفة ولا قول قالوا حصلت في جامع حلتنا صقيعة سلامة
عمك السبعيني ود اب علالة في صلاة الجمعة ومع نهاية الصلاة اثناء التشهد اتضايق خلاس
وخشى ان تفسد تلك الريح اللعينة صلاته فقفل ما يخرج منه سبيلها بكعبه
والسبعيني بحكم العمر يصعب التحكم في اعصابه وممتلكاته وبقى يترقط ومنتظر الامام يسلم ويرجف
وفجأة كعبه فلت وخرجت الريح فزعل حد الزعل ما يقيف
وقال بطول حسه تسود ختوتك سوادا في عمرك يا الشفقانة

Post: #4
Title: Re: طرفة من أهلنا
Author: عبدالحفيظ ابوسن
Date: 03-07-2017, 09:37 AM

عودا حميدا
واتمني ان تكون فاتحة خير لعودة آخرين
قريتي الصقيعة ريفي رفاعة مسيد مادح الرسول جدي الشيخ حياتي ود حمد
جدنا يوسف بصلي في الجامع كل اوقاتو . غيرو وقت صلاة المغرب وماعندو علم
جا لقاهم في الجلوس الاخير والجامع مليان ..
بي طول حسو قال ليهم
تاني قمتو علي ل....... كم

الجماعة تمو صلاتهم بي تلتلة من الضحك حتي الامام

Post: #5
Title: Re: طرفة من أهلنا
Author: عبدالله ود البوش
Date: 03-07-2017, 09:42 AM
Parent: #4

تاني قمتو علي ل....... كم
-------------------------------------------------
هههههههههههههههههههههههههههههههههههههههههههههه
الجنا دا ممسوخ مسخة العدو والهدو

Post: #6
Title: Re: طرفة من أهلنا
Author: الزبير بشير
Date: 03-07-2017, 09:46 AM
Parent: #1


الكهرباء قطعت اثناء صلاه الجمعه و في الركعه الاولي

حبوبتي بت وهب و بي طول حسها في الجامع

قالت الكهربا دي مالها بتقطع كسع كسع

Post: #7
Title: Re: طرفة من أهلنا
Author: عبد العزيز محمد عمر
Date: 03-07-2017, 11:08 AM
Parent: #6


خالنا التجاني محمد اللمين من خليوة.. شمال عطبرة - الله يرحمه - كان مؤذن الجامع ..
اليوم داك كان عندو نزلة تقيلة وكحة شديدة...
ولدو قسم الله قاليهو : يا بوي الليلة ما تمشي تأذن .. ما ح تقدر ..قاليهو بقدر... ورفض انو ما يمشي...
المهم خالنا مشى أذن.. لمن وصل ( أشهد أن لا إله إلا الله ) مسكتو ليك عشراقة وكحة شديدة..
وكل ناس الحلة سمعوها .. بالمايكروفن طبعاً..
هنا قسم الله كان قاعد في البيت وسمع الكحة ..

قام قاليهو: أها الليلة ظُق ..

Post: #8
Title: Re: طرفة من أهلنا
Author: علي عبدالوهاب عثمان
Date: 03-07-2017, 01:53 PM
Parent: #7

حبيبنا ولياب مسكاقمي ..
في السبعينات كنا معلمين هناك في البلد .. وأذكر أزمة السكر أيام نميري في ( ضواحي الدنيا )
عمنا إدريس رحمه الله .. في مسجدنا بعد فطور رمضان مستلقي على البرش
وأنا كنت بجانبه .. وجاء إبنه (( أمي قالت ليك جيب مفتاح الشنطة عشان السكر ))
وأذكر أن الولاية على السكر أنتقلت إلى الرجال من النساء للحرص على المحافظة
حاول عمنا فك المقتاح من ( تكة السروال ) أخيرا زهج .. وقلع السروال ..
وقال لإبنه (( ياولد أفتحوا الشنطة ورجعوا لي السروال ده بسرعة ))
رحم الله هؤلاء ..

ولياب القصة بالنوبية حلوة .. المشكلة في الترجمة ..

Post: #9
Title: Re: طرفة من أهلنا
Author: ولياب
Date: 03-07-2017, 02:30 PM
Parent: #8

الأعزاء :-علي عبد الوهابود البوشود ابوسنالزبير بشيرعبد العزيز عمرلكم جميعا التحايا وإن شاء الله كلكم مسكاآجروا مع وليداتكم وأهاليكمعطرتم المكان بالمرور والمشاركة والطرفة والضحكة ، وبالطبع يا علي أهلنا العرب بيقولوا سمح القول من خشيم سيدو ، لذا نجد متعة في الطرفة والنكات التي تقال بالنوبية ، الحلفاوي الظريف زكريا حامد روى طرفة : قال لك عمنا كبير طلب موية من شافع ، الشافع قال ليهو موية شراب ، رد عليه عمنا لا موية تتقرمش ( لا لا أمن كورمنقا) .

Post: #10
Title: Re: طرفة من أهلنا
Author: علي عبدالوهاب عثمان
Date: 03-07-2017, 03:45 PM
Parent: #9

حبيبنا وليات .. أهلنا ناس ضواحي الدنيا ديل نوادرهم كثيرة .. خاصة بعد ظهور الازهريين
وبعد داك ناس الدعوة ..

عمنا عبدالله حمدنتود الله يرحمه في الستينات رجع من مصر وتقاعد في البلد
وحسب ثقافته الازهرية الصلاة في المسجد .. والناس ما كان يمشوا المساجد القرية ( المسيد )
إلا أيام رمضان .. وفي حالات العزاء .. فقط صلاة الجماعة كان يوم الجمعة في الجامع الكبير جنب قصر سيدي الحسن الادريسي ..
عمنا عبدالله فرض على إخوانه الصلوات وخاصة صلاة العصر لأن باقي الاوقات في الساقية ..
أصطف عمنا سعيد وبالقرب منه عمنا إبراهيم إحوان ..
وفي السجود أطال عمنا عبدالله في السجدة .. الجماعة ترابلة وعندهم مهام كثيرة ما بين العصر والمغرب ..
خرج سعيد من طوره وترك الصلاة وقال لأبراهيم ( عبدالله لمن يقوم قول ليه نحن عندنا بهايم في السهلة ما شاربين موية من الصباح )
ثم اضاف جملة رائعة جداً مازال أهلنا يتداولونها ( نحن ما نقدر نرفع مؤخرتنا فوق المدة دي كلها عشان نحن ناس بنأكل بليلة ..)
سمع السيد الحسن الادريسي القصة وإستدعى عبدالله وطلب منه التخفيف شوية ..
لأن أهلنا في ذلك الزمان ما يسمعوا غير كلام السيد الادريسي هو المفتي هو كل شيء ( طبعاً ماعارفين لا حكومة لا غيرو )

ولياب .. شكراً أن جعلتنا في هذه السياحة الجميلة .. ما راجعت الكلام عشان المكتب فيهو كاميرات ..

برجع بعدين ..

Post: #11
Title: Re: طرفة من أهلنا
Author: الزبير بشير
Date: 03-08-2017, 06:33 AM
Parent: #1


التحيه لكم جمعيا

قصص حلوه

مع هم و غم هذه الايام بقينا نقرا بس مثل هذه البوستات

Post: #12
Title: Re: طرفة من أهلنا
Author: حسن محمد عمر
Date: 03-08-2017, 07:16 AM
Parent: #11

أدروب عايز يكمل نصف الدين كلما يتقدم لواحدة من أول نظرة تتحجج بالقراية المهم أخونا زعل ودخل المسجد وبعد الصلاة قعد فى ركن المسجد سرحان إمام المسجد سأله مالك ياأدروب ؟ رد عليه دايزين نتزوج يامولانا وكل مانشوف بنية يقول داير يقرا ؟ الإمام قال له طلبك عندى يلا معاى البيت نشرب الشاى - دخلوا المنزل ونادى الإمام على بنته تجيب الشاى - دخلت البنت شافها أدروب لكنه لم يعرها إهتمام بعد شراب الشاى سأله أها ياأدروب رأيك شنو ؟ رد أدروب شنو قصدك ياشيخ ؟ رد الشيخ فى البنت ؟ أدروب فهم القصة وأجابه بسرعة البديهة المعروفة ( ياشيخ أنا داير أقرأ ) وخرج مهرولاً ... يديكم العافية وعلى قولكم مسكاقمى

Post: #13
Title: Re: طرفة من أهلنا
Author: علي عبدالوهاب عثمان
Date: 03-08-2017, 06:05 PM
Parent: #12

حبيبنا ولياب .. بوست جميل ..
المسجد الجامع في جزيرتنا أرتقاشا في منتصف الجزيرة بالقرب
من قصر السيد الحسن الادريسي .. وفي إحدى ليالي رمضان
وكان عمنا عبدون هو المؤذن طبعاً بدون ماهية .. وبجوار المسجد مباشرة
منزل جدي ( همان ) أو عبدالرحمن بالعربي .. وحبوبتي زينب رحمهم الله
وبعد أن تناولت حبوبتي السحور .. وطبعاً الشاي أهم من الأكل ..
مدت يدها نحو ( براد الشاي ) من الجمر .. بدأ الاذان ( الله أكبر ) ..
خرجت جدتي وقالت لعبدون ( عليك الله ما بطل الاذان لحدما ما أشرب الشاي)
أكمل عبدون الأذان وحلفت حبوبتي إنها تشرب الشاي بعد الأذان .. وكانت
مرأة قوية الشخصية .. وكالعادة ذهب الأمر إلى سيدنا الحسن الادريسي
وقال ( لا مشكلة الصيام صاح ) وفي حضور المؤذن جدنا سعيد .. وهنا
أقسم سعيد بالطلاق ان لا يؤذن للصلاة ( معقول يا سيدي أن غلط والمرة دي صح)
رحم الله هؤلاء الانقياء ..
ولياب إنت رجعتنا أكثر من نصف قرن من الزمان ..
ولاحظ حكمة سيدنا الادريسي وتعامله مع هؤلاء الناس برفق وطريقة محببة ..

حبيبنا ولياب .. إستراحة في زنقة الشغل .. كمان الكفيل ما في ..



Post: #14
Title: Re: طرفة من أهلنا
Author: ولياب
Date: 03-09-2017, 07:03 PM
Parent: #13

شكرا علي عبد الوهاب للمشاركات الجميلة والحكاوي الباقية في الذكريات

معظم المجتمعات النوبية لديهم الطرفة العفوية وهم على الفطرة أما المرأة

فكانت ذات شخصية قوية .