حكاية ممكن تصبح واقع !#

08:22 AM March, 06 2017

سودانيز اون لاين
زهير عثمان حمد-السودان الخرطوم
مكتبتى
رابط مختصر

وفجأة تسمع في الجامع بعد صلاة الجمعة يا جماعة أفتحوا الطريق لحليمة بت حسين جاية يعقدوا ليها علي (حسب الله ود عوج الدرب)...
والجماعة ينقنقوا ويجوطوا وتجي حليمة داخلة تتفرج في المصلين وتعاين ساي للمصلين لحدي ما تصل محل الامام قاعد ومعاه الجماعة ..
حلبمة تسلم على الامام وتقول ليه يا مولانا ممكن نظرة ؟! نظرة شنو يا حليمة كدي اهجسي وروقي المنقة !
يا مولانا تسمح لي بنظرة على المصلين..دايرة اطلع في المنبرة والقي نظرة على المصلين واتفرج يمكن الاقي لي واحد سمح ووجيه يعجبني واعقد عليه قبال ما تدبسوني في حسب الله ود عوج الدرب دا!
يا حليمة دا كلام شنو؟
هوووي يا مولانا خليك زول مودرن انت نسيت المادة 17 من دستور السودان الدايم لسنة 2017م ولا شنو؟ كدي اسأل مراقب عام الانكحة ..دا حق دستوري يا مولانا !!
وتقوم حليمة وتقيف على حيلها في المنبر والجماعة خجلانيين
..وتقعد تتفرج ساااي ! هووووي يا اللابس شال يا المدنقر يا القاعد في الصف الرابع كدي ارفع راسك دا وشيل الشال يشيلك الشال جدي!
ويضج الجامع بالضحك !!!
وتنزل حليمة من المنبر وتقول للامام: هسع يا مولانا حق العقد على منو؟ علينا ولا علي أهل العريس؟ ولا ففتي ففتي (50%_50%؟! )..
ويهز حسب الله راسه موافقا !!
ويبدأ الامام: يا حسب الله هل تقبل بحليمة زوجة لك في المنشط والمكره ؟ ويرد حسب الله: اااي موافق.
ثم يلتفت الامام الى حليمة والوفد المرافق لها: يا حليمة بت حسين هل تقبلين بحسب الله ود عوج الدرب زوجا لكي مدى الحياة؟! وتسكت حليمة مسافة ثم ترد : مدى الحياة ولا لمدة 10 سنوات ؟! يا جماعة مدي الحياة دي كتيرة ..مش الزواج بالتراضي؟! كدي خلوها 5 سنة وكان ما شد حيله بفكه طوالي عكس الهواء
وانا الدستورر معاي حسب المادة 17 يا مولانا ؟!
يا حليمة استهدي بالله وقولي موافقة خلينا نخلص من الموضوع دا انا ونحصل الغداء !! يا مولانا ما تستعجل وتقوم تدبسني في الزول دا ساااااي !!! خليني افكر شوية ..المواضيع دي ما فيها هزار ولا استعجال .. هسع انا كان دايرة اشتري لي توب جارات بحوم السوق كلو اربعة ساعات واحتمال ما القى الحاجة البتعجبني..انت هسع عايز تدبسني في عرسة تأبيدة في خمسة دقائق ..هسع المهم ياته العرس بالتراضي ولا التوب.؟؟.
خلوني افكر..
وما تنسى يا مولانا الزواج حسب الدستور الجديد بالتراضي..
ودي اهم توصية في مخرجات حوار الوثبة ولا عندك راي ؟!!!
طيب يا حليمة هل توافقين على ان يكون حسب الله زوجا لكي لمدة خمسة سنوات؟
وتصمت حليمة ثم ترد: موافقة لكن بشرط يا مولانا! شرطك شنو؟ ما يعرس فيني ولا يجيب فيني ضرة وكل عيد يجيب لي توب جديد وجزمة وفستان وشنطة ادوات تجميل وغويشة دهب عيار ٢٤ !!! 🙄🙄🙄🤔