**** طرائف واقعية لمحمد الأمين (بهلكه) أظرف ظرفاء عطبرة ****

[l]

محمد الأمين الملقب ب ( بهلكه ) بفتح الباء والهاء وتشديد وكسر اللام وفتح الكاف عطبراوي نقي السريرة لا يعرف الحقد الى قلبه سبيلا تجده في الأفراح والأتراح يتحلق حوله الناس لأنه شخص تغلب عليه الطرفة والسذاجة في آن واحد .. غلبت عليه البراءة (الدروشه) والاستنكاح والأستغفال فخلقت منه أنموذجا عطبراويا يحكي عنه أهل عطبرة ويتناقلون طرائفه ويتبادلونها .

نتابع ،،،

كان أكبر مننا في السن يسبقنا في مدرسة المزاد الابتدائية ولكنني زاملته في فصل واحد عددا من السنين لانه تم اعادته لضعف مستواه الأكاديمي .

بهلكه منذ ايامه في مدرسة المزاد مستهبل وبتاع حنك .. منضمه ويقنعك انه انت ما انت. يمتاز بالطرفة وخفة الدم وهو لايقل عن السر عكاز أظرف ظرفاء عطبرة .. علاوة على الاستهبال ببراءة .. يعني ياخد حاجتك وانت تضحك من دون أن تزعل .

بهلكه من شدة مافقري كان عندو في شنطته بتاعة المدرسة محبرتين بجيبهم فاضيات ويقعد يسحب اقلام الطلبة ويفضيها في محبرته ويرجع الاقلام خوفا من انكشاف أمره لأن الأستاذ ممكن يكشفه اما الحبر فلايمكن كشفه . المهم بيعبي خلسة المحبرتين full ويبيع الحبر لنفس الطلبة المسروق منهم الحبر ويعبئ لهم أقلامهم كل قلم بتعريفة.. ههههههه
بهلكه ده حير الشيطان ذاتوووو

طبعا بهلكه ده عندو قصص ومغامرات مع والدته رحمها الله تعالى ستجعلكم تضحكون ملء أشداقكم كتبها احد الأخوان وسأسوقها لكم هنا :

***************

الخالة نفيسة قررت السفر لدنقلا لوضوع بنتها البكر قبل السفر وصت جارتها جمال علي ام بدة علي الحمام وقالت ليها ابقي عشرة علي حمامي وسلمتها ربعين فتريتة وقالت ليها ماتنسي تملي ليهم الحوض موية مع الصباح والمغرب وتكبي ليهم الفترتية وشيلي اي حمامة صغيرة
حاجة جمال بقت عشرة علي الحمام تغسل ليهم حوض الموية وتفك تكب ليهم الفتريتة بعد اسبوع نفسها دخلت في دمعة حمام بالقراصة نادت جارها بالحيطة النقر ..
النقر جاها قالت ليهو اطلع قفص الحمام ده ونزل لي جوز تلاته النقر جاب السلم وطلع وبعد بحث نص ساعه جاها نازل قال ليها والله فتشت الققص فوق وتحت مالقيت حاجة

بعد يومين جاء بهلكة لافي في الحلة جمال طوالي نادتو وقالت اب اب حنك الا اطبق فيهو نظريه اتفقت معاهو ينظف ليها قفص الحمام واي حمامة في القفص من نصيبو وهي منتظرة برة بفارق الصبر قدوم بهلكة والحسرة علي وشو نص ساعة وبهلكة جاها شايل شوال فضلات الحمام سلمو ليها وقال ليها حلال عليكي بيعيهو سماد لمزارعين المقرن البزرعو عجور ودخل تاني البيت وجاء مارق بي قفة حمام
الحاجة جمال المغصة كاتلاها قالت ليهو شكيتك لي الله يا الشقي لقيت الحمام ده كيف بهلكة بي ضحك قال ليها مدسي تحت الصفايح وشال قفتو ومشى.

بهلكة محبوب لكل البيوت له سحر اقناع عجيب عمل بكل القوات النظامية شرطة المطافي وشرطة السكة حديد والمدفعية تبقي له حرس الصيد فقط ويكون كمل القوات النظامية كان الاقرب لوالديه بخفة دمه و كرمه وقلبو الابيض رغم مقالبو الكتيرة مريم القرير امو قررت الذهاب للخرطوم تاخد ليها فترة مع ولادها في الخرطوم وطبعا من طباع الحريم الكبار الحفاظ علي عدتهم اي حاجة ولا العدة وقبل السفر بيومين رسلت بهلكة يجيب ليها رزة واكبر مقاس للطبل جمعت حريم وعملت نفير للم عدتها كلها وقفلتها في غرفتها الكييرة ماخلت حاجة برة العرفة واحكمت قفل الشبايك وتركت لبهلكة الانبوبة والبوتجاز وحلة كبيرة وبراد الشاي والكبابي قالت ليهو اشتريها من الدكان .

بكره نتابع حكاوي بهلكه ومغامراته ....
أرقدوا عافية

إنا لله ياخ
بتعرف الزول ده يالهادي كمان
فردتي وجاري حيطة بالحيطة
احتفلنا في قروب ( جيران الزمن الجميل) قبل فترة بتخرج ابنه محمد خير من كلية الهندسة
بهلكة زول حنين وكريم وشهم جدا
تحية له ولأشقائه الافاضل
عندي عنه حكاوي كثيرة بس يسعفني الزمن واسردها لك

اخونا حيدر كتب :

Quote: عندي عنه حكاوي كثيرة بس يسعفني الزمن واسردها لك

خلاص خليك معاي في البوست ده صانع ألعاب لاني عارفك ياحيدروف صاحب تمريرات بينية Through pass تجعل المهاجم في مواجهة المرمى .

كسرة : بالمناسبة بهلكه متواصل معاي في الواتس وارسل لي مقطع تسجيلي بصوته وحكى كيف انه قام بتدقيس العزابة الذين يسكن معهم .. طرفة تخليك تضحك لمن مصارينك توجعك .. سؤالي لك ولاصحاب الخبرة هل يمكن انزال مقطع صوتي هنا في البوست ، اذا كان بالامكان انت يا حيدر او من له خبرة يرسل لي رقم الواتساب تبعو على الخاص.. انا حريص أسمعكم صوت بهلكه

نعود لقصتنا ..
وين وصلنا ؟؟ ... ايوة وصلنا مريم القرير والدة بهلكه على أهبة الاستعداد للسفر لقضاء بعض الوقت مع بقية اولادها في الخرطوم
........
قبل سفرها طلبت دجانقو وعوض الزنجي ان يحرسو البيت مع بهلكة بعد ثلاثة شهور من سفرها بهلكة بي طريقتو قدر يفتح شباك الغرفة ويشيل مكنة الشعرية اصحابو عرفو الحاصل وعلي طول قررو يبلغو بت القرير بالحاصل خوفا من مريم دجانقو قال للزنجي مريم لو جات وفقدت مكنة الشعرية حتشبكنا فيها افضل نكلمها قبل تجي مريم سمعت الخبر واول باص جايي من الخرطوم ركبت فيهو ودجانقو وعوض الزنجي في انتظارها بموقف البصات من الموقف اجرو تاكسي للشرقي وصلتها البيت وقبل تشرب ليها موية ولا تاخد نفسها جدعت شنطتها وجري علي الاحتياطي واي زول تلاقيهو في الشارع تحكي ليهو الحاصل مع ترديد بيت بيتين من اشعارها المؤلفاها في اولادها والحلة كلها تحنس فيها وهي رافضة وقالت بس عساكر الاحتياطي مافي غيرهم وصلت الاحتياطي و دخلت للضابط وحكت ليهو الحاصل انا ولدت الدكتور والمهندس والاستاذ وبهلكة ده الوحيد الفاشل فيهم بس عاوزاكم تادبوهو لي

الضابط جمع العساكر  وطلب منهم احضار بهلكة العساكر ركبو البوكس وشالوا درقاتهم وعكاكيزهم وقبل عشرة دقايق بهلكة كان مقفول في حراسة الاحتياطي بت الحلنقي شافت بهلكة في الحراسة سالتو مالك يا بهلكة هنا حكي ليها الحاصل دخلت علي الضابط واقنعتو  وقالت ليهو مش مريم دي بكرة حتلومك وتقول قبضتا ولدها الضابط فكا بهلكة والحلة كلها في الاحتياطي منتظرين الافراج عن بهلكة الحريم بيقنعو في مريم  و هي تقول   السماء قريب من الاحتياطيمشت للقاضي كمال علي حكت ليهو الحاصل مولانا كمال قال ليها بهلكة قبل اسبوع شال انبوبتنا يملاها غاز لا جاب الانبوبة ولارجع لينا قروش الغاز لمن تلقيهو قولي ليهو شيل قروش الغاز ورجع لينا انبوبتنا فكرت وقالت مافي غير المحامي هاشم حسن يرفع ليها عريضة في بهلكة

الغريبة بهلكة يضحك وماجايب خبر ويقول مش امي دي خلوها للمغرب لو ما لقيتونا بنشرب شاي المغرب مع بعض .
حضر المحامي هاشم وطبعا هو برضو عارف انو كلام مريم ده فورة  لبن ساي  وقعد مع الاتنين وقال لي بهلكة تحلف قسم ما تجي جنب عدة امك دي بهلكة وافق وخت يدو في المصحف وقعد يقول لي  امو والله من ختيت يدي في المصحف شفت الكعبة في يدي وامو مصدقة وتسال فيهو عليك الله بي صحك شايفها وبهلكة يحلف وكده المشكلة اتحلت والاتنين اتصالحو وبهلكة قال ليها بالمناسبة دي عازمكم بكرة فطور ملوحة وعزم الشباب كلهم في الفطور ومريومة خالفة رجلها وجادعة توبها في رجولها وتحكي في القصص ونست مكنة الشعرية وخسارة قروش التزكره
وطبعا يومي الونسة بقت مع مريم بعد المغرب ومشاغلتها بي مكنة الشعرية وهي بي ضحتكها تقول والله لو ما خفت عوض الزنجي وعصام بيكتلوهو كان قلت ليهم بهلكة قال انتو الشلتو مكنة الشعرية.

هههههههههههههه
هههههههههههههه
هههههههههههههه


المطموس دا جبتوهو من وين الليلة ..

كتب عبد العزيز محمد عمر :

Quote: هههههههههههههه هههههههههههههه هههههههههههههه المطموس دا جبتوهو من وين الليلة ..

ههههههه مادقسك قبل كده .. انا غايتو دقسني في الابتدائية قصة الحبر أعلاه.
خليك قريب ففي جعبتنا المزيد عن تدقيسات وطرائف بهلكه

بعد اسبوع ونحنا بنشرب معاها شاي المغرب في نص الونسه  سالها واحد مننا من باب الدعابة ان شاء الله يا مريم بهلكة ما مقصر معاكي في الاكل
قالت بهلكة كاتلني بالعدس والفول وبقت تشكر في ولادها الفي الخرطوم قالت ديك مامقصرين معاي شايليني فوق كفوف الراحة ان درتا  المشاوي بلقاها قدامي والفواكة  بانواعها والعاوزاهو بيجيبو هو لي
صاحبنا قال ليها طيب لو كده ما تمشي لي ناس الخرطوم مالك ومال بهلكة
اخدت ليها تنهيده طويلة وقالت احترت والله وماعارفة اعمل شنو لو بارينا بطنا بهلكة بيسرق عدتنا ولا قعدت احرسها الجوع بيكتلنا
رحم الله امنا مريم القرير وامد الله في عمر الحبيب بهلكة

[l]

صورة للحبيب بهلكه إبان عمله في البوليس

حكى عثمان ابراهيم
مره في مدرسة عطبرة القديمه قالو لى جيب ولي امرك اتلفت كدا اقرب زول لقيتو جنبي بهلكه كان في الشرطه العسكريه المدفعيه طوالي قلت للاستاذ دا خالي المهم صاحبنا وقف في باب المكتب دق تحية عسكريه انا قلت فى رتبه جوة ما في زول غير استاذ الخليل عليه رحمة الله المهم حنك الاستاذ انو الزول دا عيان وكدا لكن ما مشكله لازم تعاقبو قدامي زي ما قال الجيش الخير يخص والشر يعم الاستاذ قال ليهو ياخ نحن ما هدفنا العقاب نحن نوعي الاسر عشان تتابع غايتو مرقت لكن الاستاذ مقتنع انو ما خالي بس اوائل التسعينات وهيبة الجيش الموضوع مر بسلام في المدرسه.
قمت سالتو من موضوع التحيه قال لى دى للمكتب الحكومي دا
قام الفصل التاني من الفيلم في البيت صاحبك العصر يجي البيت لأبوي ازيك يا حاج ابراهيم والله قبيل حصل وحصل وفتاني ليك فته واخدت نصيبي من التقريع والحمدلله

بهلكه مجرم وشفت ومستنكح .. آخر حاجة كان سايق كارو يدوهو سريرين من المنطقة عشان يوصلن يزوغ ويبيعن هههههه

يازول كل يوم مشتكينه للبوليس وبيتهم مليان بالرجال دايرين حقهم .
يا اخي في اكتر من انه القاضي يرسله يعبيء انبوبة الغاز يروح يبيعها .. القاضي لمن حفى وفتر ما عرف يعمل معاهو شنو في النهاية حنس اهله قال ليهم خلوهو يرجع الانبوبة وبعفي ليهو قروش التعبئة

حبيبنا بهلكه طبعا ارسل لي مقطع تسجيلي واتساب بصوته يحكي كيف دقس العزابة الكان ساكن معاهم في الخرطوم ..
طبعا مابقدر انزل المقطع هنا .. عايزين واحد شفت يقدر يعمل ليهو معالجة وينزله كمقطع يوتيوب بحيث اقدر انزله في هذا البوست.
في انتظاركم

كتب اخونا مبارك سيد أحمد :

كتب بركوته :
هههههه طارق هجو عندو مناسبة رسلو للتلج قال ليهو عاوز 12لوح تلج .. جاب ليهو 6 الواح وضرب القروش الباقية ..
طارق زعل وقال ليهو :
نقول وصلت حي الجيش في لوح تلج وقع منك بدون تحس
وصلت حلة الاتحاد لقيت حريم حنسوك تبيع ليهم لوح تلج بعتو ليهم وصلت عيادة الفرجابي وقع لوح برضو واتدشدش جيت لافي بي بقالة ابوسعيد لقيت قريبتك شحدتك تلج اديتها لوح مع جاراتاها
في لفة الكبري لوح منك في الجسر في الوساخة الباقي حيكون سبعة الواح يا بهلكة يعني تصلنا ومعاك سبعة الواح تلج
بهلكة قال ليهو والله ياطارق التقول انت كنت معاي فعلا ده الحصل بالضبط ) قام طارق قال ليهو : طيب اللوح السابع وين .. ؟؟ انت جايب 6 بس .. قال ليهو اللوح السابع ساح ههههه
ههههههه

مرة بهلكة علي حظو السئ قابلو خواجات بالقرب من نادي الرابطة سألوه عن الميناء البري طبعا أي حاجة بعمل فيها عارفه طلع وقف في الزلط وقالهم حسب الإنجليزي الفاهمو قو قو قو قو تلفو شمال قو قو قو تلقوا الميناء البري يمينكم ههههههههههه

عاطف التولة جارهم في الشرقي اتصل علي وحكى لي عنه مايلي :
قال طبعا محمد الامين بهلكه ده معرس مرتين .. في زواجه التاني جاء استلف البدلة حقت عاطف نظام عريس وكده .. قال انتهى العرس زولي بهلكه بعد ما قشر ببدلتي شال البدلة وباعها ههههه

حكى عاطف كذلك انه عندما كان مقيم في بورتسودان جاء بهلكه ونزل عنده في البيت وكان في ازمة شاي ولو وجدوا مع الزول كميات يمكن العساكر يعملوا ليك مشكلة وكان وقتها بهلكه عسكري ففي واحد صديق لعاطف كلفه انه يجيب ليهو كرتونة ويرسلها ليه في عطبرة فاختار عاطف بهلكه بحكم انه عسكري ومافي زول بيفتشه واتصل على صاحبه في عطبرة قال ليهو الكرتونه جاياك مع بهلكه .. صاحبو صرخ وووووب علي بهلكه ببيعها .. بهلكه ماصدق وصل هيا ظووووط باع ليك الكرتونه بتاعة الشاي .. صاحب الكرتونه جاهو البيت .. بهلكه قال ليهو للأسف يافرده الكرتونه صادروها مني العساكر والعكاكيز دورت .. اخيرا ناس عاطف عملوا شيرنق ورجعوا للراجل حق الكرتونه

بهلكة طلق مرتو وفكر يستقر في الخرطوم نزل مع اخوهو وبي هنا وهنا لقو ليهو شغلة مع شركة بتوزع فواتير الموية الشغلة ما واقعة لي بهلكة في راسو وعطبرة فرقت معاهو كتير لكن مجبور وماعندو حل غير يصبر .
من الصباح لافي بالفواتير وصل عمارة ساكننها صينيين فاتورتهم 2مليون جنية الصيني بالعربي المكسر قال لي بهلكة انا اعطيك فلوس انتا ادفع وسلمو الاتنين مليون بهلكة عمل نايم بالقروش وقال لو سافرت حيعرفو انا الشلتهم
بعد قطعو موية الصيني الصيني جاهم المكنب وقال ليهم سلمت القروش لي واحد منكم يدفعهم
ناس المكتب لمو الشغالين وقال للصيني مرق السلمتو القروش الصيني لفا ماعرف بهلكة قال ليهم ما ديل
بعد الصيني مرق المدير حلف لي بهلكة وقال ليهو مافي زول غيرك انت بيكون عمل العملية دي بهلكة عمل فيها زعلان وقال ليهو مش شغلكم ده من بكرة ما دايرو وشال ال 2مليون وركب القطر ورجع عطبرة .
هههههه

كتب مبارك سيد أحمد جار بهلكه مايلي :

امي مرة كلفت خالنا يشتري ليها غنماية  
 المغرب خالنا جاب ا الغنماية  و امي مجرد واقفة مجرد ما شافت الغنماية منزلنها من  البوكس دايرة تقع من الهجمة قالت ليهو دي شنو الغنماية العجوزة الما شايلة حيلها دي انا رسلتك تجيب لي غنماية بي جناها عشان اللبن تجيب لي غنماية اكبر مني  واسه الغنماية دي ادوك ليها بي قروش ولا ساي .. خالنا قال ليها اشتريتها بسبعين الف وده الايصال وقال ليها سيد الغنماية قال دي حامل وشهر حتلد وسلم الايصال ومشي بيتهم العنماية يومي عاوزة ليها قش بي 2جنيه الصباح و2جنية المساء والنهار كلو فتريتة مشروبات غير بواقي الخضار وبعد  دة حالفة ماتسمن الشهر جاء والغنماية في حالها والليل كلو تكورك لو جابو ليها لوري برسيم تهرسو وكل ده مافي نقطة حليب.
امي لقت بهلكة في الشارع وحكت ليهو الحاصل وطلبت منو يبيعها ليها  ان شاء الله بي نص ثمنها من الصباح بهلكة جاها ورفعنا الغنماية وقال  لي  تمشي معاي .القشاشة بهلكة بي سيدريتو والسروال والعراقي تحلف تقول اكبر  جلابي في عطبرة  وصلتنا القشاشة قال لي دقيقة ننادي حاج حمد بجيهنا بقي سمسار غنم كيير في القشاشة (سوق الغنم) المهم كل البجي يهبش الغنماية من بطنها
يقول لينا دي ماكلة اكياس ما بتسمن
حاج حمد بي جاي وجاي اقنع واحد يشتريها بي 15ج   قال حيعمل ليها عملية في البيطري عشان يشيل ليها لفة الاكياس الفي بنطها واحتمال تموت في العملية بهلكة وافق شال القروش ادي حاج حمد 5ج حق السمسرة و 5ج قال دي حقت الكارو   انا قلت ليهو بهلكة انت براك بتعرف أمي صعبة انا لا جيت معاك ولا تقول لي شاهد ولا ما شاهد تتصرف معاها براك
قال لي  خلاص يالله عازمك فطور مشينا السوق ضربنا فطور كارب الحساب طلع 5ج من الفطور مشينا الشرقي  قبل نصل البيت قلت  ليهو نزلني هنا  .. دخلت البيت امي سالتني بعتو الغنماية بكم ؟ قلت ليها والله ماعارف انا ماحضرت البيعة مشيت اشرب موية  لقيت بهلكة باعها وامي تكورك والله من كلامك ده معناها في حاجة قلت بهلكة لمن يجيكي اساليهو انا غنمايتك دي ماعندي بيها شغلة .
بعد يومين امي تصادف بهلكة في سوق الشرقي سالتو وين قروش الغنماية قال ليها بعتها بي 15اديت السمسار 5وانا شلت 5حق الكارو والباقي فطرنا بيهو انا وولدك  امي عاوزة تكورك قال احمدي الله لو كان رجعتها ليكي كان خسرتي حق الكارو والقش يوميا بي عشرة يعني 15ده غير بافي الايام
انا للآن مستغرب بهلكة كيف اقنع امي  انو   باع  ليها غنمايتها بدون مايديها قرش
😂😂😂😂