انا ما بنضم غايتو لغاية ما اشوف الناس البعرفوهم بقولو شنو
خصوصا الناس البكونو من مواليد بداية الستينات
Post: #2 Title: Re: محمد بيرم و حامد عطا Author: أبوذر بابكر Date: 03-02-2017, 07:03 PM Parent: #1
اضافة للنضمى العام عن الاتنين السمحين ديل
صراحة انا قاصد و مركز على شى معين
بقولو لاحقا كان الله هون
Post: #3 Title: Re: محمد بيرم و حامد عطا Author: أبوذر بابكر Date: 03-02-2017, 07:28 PM Parent: #2
انتو الابداع المتميز نوبى ؟
ولا المبدعين النوبيين مميزين ؟
صحيح مثلا فى فترة او حقبة معينة بكون فى شعراء مجيدين ومبدعين
لكين يجى زول اسمه خليل فرح بدرى ويبقى مميز ومتفرد
يكون فى مغنيين مطربين وجيدين ومبدعين فعلا
ويجى زول اسمه محمد عثمان وردى ويبقى علامه
وقبلهم وبعدهم ومعاهم خلق كتار
جمال محمد احمد أبو سليم
مثلا مثلا
وخلق تانى كتاااااار
ولا اقول ليك
صالح ولولى
واخوه عمنا وصديقنا وهبه ولولى
وامش جنوبا شوييييه زكى عبد الكريم
عموما ده برضو ما الموضوع يتبع
Post: #4 Title: Re: محمد بيرم و حامد عطا Author: أبوذر بابكر Date: 03-02-2017, 07:28 PM Parent: #2
انتو الابداع المتميز نوبى ؟
ولا المبدعين النوبيين مميزين ؟
صحيح مثلا فى فترة او حقبة معينة بكون فى شعراء مجيدين ومبدعين
لكين يجى زول اسمه خليل فرح بدرى ويبقى مميز ومتفرد
يكون فى مغنيين مطربين وجيدين ومبدعين فعلا
ويجى زول اسمه محمد عثمان وردى ويبقى علامه
وقبلهم وبعدهم ومعاهم خلق كتار
جمال محمد احمد أبو سليم
مثلا مثلا
وخلق تانى كتاااااار
ولا اقول ليك
صالح ولولى
واخوه عمنا وصديقنا وهبه ولولى
وامش جنوبا شوييييه زكى عبد الكريم
عموما ده برضو ما الموضوع يتبع
Post: #5 Title: Re: محمد بيرم و حامد عطا Author: حمد إبراهيم محمد Date: 03-02-2017, 07:49 PM Parent: #4
السلام عليكم اخونا واستاذنا الغفاري ... كأنك داير تقولينا وكذلك ومن المتميزين الحلفاويين الذين اضافوا وابدعوا في النقش بالريشة "بيرم وود عطا" فعلا هم رواد وزاد مسافرين بعدهم ...؟ -------------------------------------------------
قبل ما انسى من اعجابي ببوست الجنا المبدع الفنان الموهوب علي ساجوري سويت لي قصيدة اظن ممكن تغنى ونهديها ليهو ونضيفها في بوستك الموسوم داك ان امكن.
تحياتي
Post: #8 Title: Re: محمد بيرم و حامد عطا Author: أبوذر بابكر Date: 03-03-2017, 10:30 AM Parent: #5
تحياتى الاخ حمد وكل التقدير
بيرم و عطا مبدعين من نوع فريد
ولولا ضيق البلد وشح مساحات البذل الجميل و العطاء الهميل كان بكون ليهم شأن تانى
وبنجى للتفاصيل ان شاء الله لاحقا
بالنسبة لموضوع المطرب ساجورى
اتفضل ياخى واعمل ما طاب لك زى ما تحب
Post: #6 Title: Re: محمد بيرم و حامد عطا Author: عرفات حسين Date: 03-02-2017, 07:50 PM Parent: #4
أبوذر بابكر الفاضل اذكر حامد عطا الي اليوم : وهو باقلامه العجيبه ... وكان شابا عندما بداء في الصباح الجديد وكان اغلب عمله في منزل حسين عثمان منصور
Post: #7 Title: Re: محمد بيرم و حامد عطا Author: عبد المنعم سيد احمد Date: 03-02-2017, 10:19 PM Parent: #6
ابو ذر كيفنك
Post: #10 Title: Re: محمد بيرم و حامد عطا Author: أبوذر بابكر Date: 03-03-2017, 10:56 AM Parent: #7
منعم الحبيب
شوق شديد والله
طولنا منك ياخ ومن اطلالتك البهية
ان شاء الله طيب انت والمعاك
صالح ولولى مطرب وفنان اصيل وجميل يمكن عشان متمسك بغناه وفنه النوبى ما لقى الذيوع و القدر البستاهله
حتى اخوه وهبه فنان مطرب وياما اشجانا بصوته و عزفه على العود
شكرا ليك يا منعم على الفيديو والغناء النوبى العالى وغالى
Post: #9 Title: Re: محمد بيرم و حامد عطا Author: أبوذر بابكر Date: 03-03-2017, 10:35 AM Parent: #6
عزيزنا عرفات
سليل المبدعين
تحية وتقدير
يا ريت والله يا عرفات تورينا مشاهداتك و شهادتك عن الفنان حامد عطا واكيد بكون فى تفاصيل كتيرة جميلة ما معروفة لينا نحن الشفناه من الخارج بس وانت كنت قريب منه
وبرضو عن مجلة الصباح الجديد الما استمرت كتير زيها زى باقى الاشراقات الاختفت من حياتنا
ليك التقدير والود يا عرفات
Post: #11 Title: Re: محمد بيرم و حامد عطا Author: أبوذر بابكر Date: 03-03-2017, 11:15 AM Parent: #1
المشهد
وكانك فى واحد من شوارع حى مومارتر الباريسى
مجموعة من الناس ملمومين ومندهشين ومعجبين حول شاب انيق بعيون ذكية براقة ظاهره من خلف عدسات انيقة وشعر كثيف فى الراس
الطقس بين صيفى وخريفى واضاءة شارع الجمهورية مع اضاءة المحلات التجارية القريبة اضفت سحر جميل و هادى على المكان
حتى رائحة الهواء جميلة و حلوه
والاجمل كان هدوء وسكينة وطمانينة وجوه الناس ال بتشى بدواخلهم المرتاحة
فى مساحة وبرحة صغيرة على جانب شارع الجمهورية ايام كان بنكهة شوارع وسط لندن تقريبا بين محلات الجوهرة والمحل المجاور ليها
هناك بقيف حامد عطا
وعدة الشغل الفنى الابداعى الجميل لسيطة وشويه
مقص نحيل واصابع مدهشة ونوع ورق شبه مقوى بلون اسود
انت تجى وتقيف قدام حامد وفى وضعية معينة واضاءة مخصصة
وفى ثوانى تبدا اصابع و مقص حامد عطا فى تشكيل وجهك على الورق الأسود
وفى لحظة تلقى نفسك ووجهك بكل تفاصيلة اتشكل وظهر توأم ليك
نفس الملامح مهما كانت دقيقة ياها وشك وخلقتك
بروفايل عجيب للوجه
والمقابل شى يسير وبسيط لا يذكر وحتى لو ما عندك كنت حتفوز ب ابتسامة وضيئة من الفنان
فن السيلويت
يا ترى لسه الناس عارفاه و متذكراه او حتى بتفكر فيه ؟
الا ليت ايام الجمال جديد
والخرطوم وليل الخرطوم وامسيات السوق الافرنجى
هداوة البال وروح الجمال
كان اسمها الخرطوم
والشوارع ذات النكهة الباريسية بقت مجاهل مخيفة
والناس
الناس ؟
مافى ناس
والله جد
الله كريم
وللنضمى باقى لسه
Post: #12 Title: Re: محمد بيرم و حامد عطا Author: أبوذر بابكر Date: 03-03-2017, 12:54 PM Parent: #1
الزمان
سبعينيات القرن العشرين
مجلة الاذاعة والتلفزيون والمسرح
الجانب التانى من الداخل للغلاف الامامى
الحياة من حولنا
ده اسم الصفحة
المحرر اسمه محمد بيرم
صورة مبتسمه للمحرر فى الزاوية العليا اليمين
الصفحة عبارة عن مقالات صغيرة الحجم متنوعة بين الخاطرة واللمحة او ربما مقاطع شعرية وخلافه
محمد بيرم صحفى تشكيلى رسام كاراكتيرست فنان
اجتمعت كل الكلمات دى وائتلفت داخل انسان جميل
بيرم كان بكون حضور بشكل متكرر وشبه منتظم فى حلقة حامد عطا انفة الذكر
وذات مساء بهيج
يشق الجموع "شافع" عمره حوالى اربعطاشر سنة وماش على الخمسطاشر
السلام عليك يا استاذ محمد بيرم وقبل انتظار رد السلام
عليك الله ممكن تكتب لى الكلام ده فى صفحة الحياة من حولنا فى المجلة ؟
والكلام المراد نشره ما بزيد من عشرة او حداشر سطر مكتوب بقلم حبر سائل فى ورقة مشروطة من كراس المدرسة
محمد بيرم وفى هدوء محبب
ايوه ممكن طوالى
وشال الورقة دساها فى جيب القميص ال نص كم لا فتح الورقة ولا قراها ولا قال ليهو انت منو ولا كاتب شنو
ايوااا زولك وزعك بركة الجات على كده وانصرف الشافع وفات
وفى اول عدد طلع يوم الخميس وصفحة الحياة من حولنا فيها كلام الشافع
معقول ؟ وياهو نفس العنوان
همسه
ويا ربا بس تجيب يوم السبت عشان يشيل المجلة ويوريها للجماعة فى الفصل فى المدرسة
شكرا يا محمد بيرم
كونك تنشر كلام شافع فى صفحة بكون فيها مقتطفات مع اسماء رموز الكتابة واعيان الادب
يا اما تكون مجنون يا مجنون
وهل الابداع الا واحده من ذرى الجنون ؟
وهل الجمال الا طعم الابداع ؟
شكرا يا بيرم يا فنان
الثقة الزرعتها فى ذلك الشافع بتلك الابتسامة الودودة
كان ممكن تحتاج لألف سنة عشان تقوم وتخضر وتثمر
شكرا
للابد شكرا
Post: #13 Title: Re: محمد بيرم و حامد عطا Author: عبد المنعم سيد احمد Date: 03-03-2017, 03:11 PM Parent: #12
Post: #14 Title: Re: محمد بيرم و حامد عطا Author: عبد المنعم سيد احمد Date: 03-03-2017, 03:14 PM Parent: #13
Post: #15 Title: Re: محمد بيرم و حامد عطا Author: محمد الأمين موسى Date: 03-03-2017, 07:46 PM
غايتو حامد عطا دا هو والأبداع أصحاب قاموا سوا واتربوا سوا..وولده ماجد رضع الإبداع من والده رضاعة طبيعيةشكرا لك أبوذر بابكر
Post: #16 Title: Re: محمد بيرم و حامد عطا Author: أبوذر بابكر Date: 03-04-2017, 10:15 AM Parent: #13
كتر خيرك وعافيتك يا منعم
والله ما كنت متخيل اشوف الناس ديل تانى
ولسه فى الذاكرة حامد عطا بالشعر الكتير والنضارة المدورة والشارلستون
هههه
لو لاحظت فى الفيديو حامد لسه مواصل فى فن السيلويت بالمقص والورق الاسود